| Library / Tipiṭaka / ติปิฎก • Tipiṭaka / องฺคุตฺตรนิกาย (อฎฺฐกถา) • Aṅguttaranikāya (aṭṭhakathā) |
๗. โลกายติกสุตฺตวณฺณนา
7. Lokāyatikasuttavaṇṇanā
๓๘. สตฺตเม โลกายติกาติ โลกายตวาทกาฯ สตตนฺติ สทาฯ สมิตนฺติ นิรนฺตรํฯ ติฎฺฐเตตนฺติ ติฎฺฐตุ เอตํ, มา เอตํ ปฎฺฐเปถ, โก โว เอเตน อโตฺถฯ ธมฺมํ โว พฺราหฺมณา เทเสสฺสามีติ อหํ โว จตุสจฺจธมฺมํ เทเสสฺสามิฯ
38. Sattame lokāyatikāti lokāyatavādakā. Satatanti sadā. Samitanti nirantaraṃ. Tiṭṭhatetanti tiṭṭhatu etaṃ, mā etaṃ paṭṭhapetha, ko vo etena attho. Dhammaṃ vo brāhmaṇā desessāmīti ahaṃ vo catusaccadhammaṃ desessāmi.
ทฬฺหธโมฺมติ ทฬฺหธนุํ คเหตฺวา ฐิโตฯ ธนุคฺคโหติ อิสฺสาโสฯ ทฬฺหธนุ นาม ทฺวิสหสฺสถามํ วุจฺจติฯ ทฺวิสหสฺสถามํ นาม ยสฺส อาโรปิตสฺส ชิยาพโทฺธ โลหสีสาทีนํ ภาโร ทเณฺฑ คเหตฺวา ยาว กณฺฑปฺปมาณา อุกฺขิตฺตสฺส ปถวิโต มุจฺจติฯ สิกฺขิโตติ ทส ทฺวาทส วสฺสานิ อาจริยกุเล อุคฺคหิตสิโปฺปฯ กตหโตฺถติ เอโก สิปฺปเมว อุคฺคณฺหาติ, กตหโตฺถ น โหติ อยํ ปน กตหโตฺถ จิณฺณวสิภาโวฯ กตูปาสโนติ ราชกุลาทีสุ ทสฺสิตสิโปฺปฯ ลหุเกน อสเนนาติ อโนฺต สุสิรํ กตฺวา ตูลาทีหิ ปูเรตฺวา กตลกฺขปริกเมฺมน สลฺลหุกกเณฺฑนฯ เอวํ กตญฺหิ เอกอุสภคามี เทฺว อุสภานิปิ คจฺฉติ…เป.… อฎฺฐุสภคามี โสฬส อุสภานิปิ คจฺฉติฯ อปฺปกสิเรนาติ นิทฺทุเกฺขนฯ อติปาเตยฺยาติ อติกฺกเมยฺยฯ อิทํ วุตฺตํ โหติ – ยถา โส ธนุคฺคโห ตํ วิทตฺถิจตุรงฺคุลํ ฉายํ สีฆเมว อติกฺกาเมติ, เอวํ สกลจกฺกวาฬํ สีฆํ สีฆํ อติกฺกมนสมเตฺถน ชเวน สมนฺนาคโตฯ สนฺธาวนิกายาติ ปทสา ธาวเนนฯ เอวมาหํสูติ เอวํ วทนฺติฯ
Daḷhadhammoti daḷhadhanuṃ gahetvā ṭhito. Dhanuggahoti issāso. Daḷhadhanu nāma dvisahassathāmaṃ vuccati. Dvisahassathāmaṃ nāma yassa āropitassa jiyābaddho lohasīsādīnaṃ bhāro daṇḍe gahetvā yāva kaṇḍappamāṇā ukkhittassa pathavito muccati. Sikkhitoti dasa dvādasa vassāni ācariyakule uggahitasippo. Katahatthoti eko sippameva uggaṇhāti, katahattho na hoti ayaṃ pana katahattho ciṇṇavasibhāvo. Katūpāsanoti rājakulādīsu dassitasippo. Lahukena asanenāti anto susiraṃ katvā tūlādīhi pūretvā katalakkhaparikammena sallahukakaṇḍena. Evaṃ katañhi ekausabhagāmī dve usabhānipi gacchati…pe… aṭṭhusabhagāmī soḷasa usabhānipi gacchati. Appakasirenāti niddukkhena. Atipāteyyāti atikkameyya. Idaṃ vuttaṃ hoti – yathā so dhanuggaho taṃ vidatthicaturaṅgulaṃ chāyaṃ sīghameva atikkāmeti, evaṃ sakalacakkavāḷaṃ sīghaṃ sīghaṃ atikkamanasamatthena javena samannāgato. Sandhāvanikāyāti padasā dhāvanena. Evamāhaṃsūti evaṃ vadanti.
Related texts:
ติปิฎก (มูล) • Tipiṭaka (Mūla) / สุตฺตปิฎก • Suttapiṭaka / องฺคุตฺตรนิกาย • Aṅguttaranikāya / ๗. โลกายติกสุตฺตํ • 7. Lokāyatikasuttaṃ
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / องฺคุตฺตรนิกาย (ฎีกา) • Aṅguttaranikāya (ṭīkā) / ๗. โลกายติกสุตฺตวณฺณนา • 7. Lokāyatikasuttavaṇṇanā
