| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) |
7. ලොකායතිකසුත්‌තවණ්‌ණනා
7. Lokāyatikasuttavaṇṇanā
38. සත්‌තමෙ ලොකායතිකාති ලොකායතවාදකා. සතතන්‌ති සදා. සමිතන්‌ති නිරන්‌තරං. තිට්‌ඨතෙතන්‌ති තිට්‌ඨතු එතං, මා එතං පට්‌ඨපෙථ, කො වො එතෙන අත්‌ථො. ධම්‌මං වො බ්‍රාහ්‌මණා දෙසෙස්‌සාමීති අහං වො චතුසච්‌චධම්‌මං දෙසෙස්‌සාමි.
38. Sattame lokāyatikāti lokāyatavādakā. Satatanti sadā. Samitanti nirantaraṃ. Tiṭṭhatetanti tiṭṭhatu etaṃ, mā etaṃ paṭṭhapetha, ko vo etena attho. Dhammaṃ vo brāhmaṇā desessāmīti ahaṃ vo catusaccadhammaṃ desessāmi.
දළ්‌හධම්‌මොති දළ්‌හධනුං ගහෙත්‌වා ඨිතො. ධනුග්‌ගහොති ඉස්‌සාසො. දළ්‌හධනු නාම ද්‌විසහස්‌සථාමං වුච්‌චති. ද්‌විසහස්‌සථාමං නාම යස්‌ස ආරොපිතස්‌ස ජියාබද්‌ධො ලොහසීසාදීනං භාරො දණ්‌ඩෙ ගහෙත්‌වා යාව කණ්‌ඩප්‌පමාණා උක්‌ඛිත්‌තස්‌ස පථවිතො මුච්‌චති. සික්‌ඛිතොති දස ද්‌වාදස වස්‌සානි ආචරියකුලෙ උග්‌ගහිතසිප්‌පො. කතහත්‌ථොති එකො සිප්‌පමෙව උග්‌ගණ්‌හාති, කතහත්‌ථො න හොති අයං පන කතහත්‌ථො චිණ්‌ණවසිභාවො. කතූපාසනොති රාජකුලාදීසු දස්‌සිතසිප්‌පො. ලහුකෙන අසනෙනාති අන්‌තො සුසිරං කත්‌වා තූලාදීහි පූරෙත්‌වා කතලක්‌ඛපරිකම්‌මෙන සල්‌ලහුකකණ්‌ඩෙන. එවං කතඤ්‌හි එකඋසභගාමී ද්‌වෙ උසභානිපි ගච්‌ඡති…පෙ.… අට්‌ඨුසභගාමී සොළස උසභානිපි ගච්‌ඡති. අප්‌පකසිරෙනාති නිද්‌දුක්‌ඛෙන. අතිපාතෙය්‍යාති අතික්‌කමෙය්‍ය. ඉදං වුත්‌තං හොති – යථා සො ධනුග්‌ගහො තං විදත්‌ථිචතුරඞ්‌ගුලං ඡායං සීඝමෙව අතික්‌කාමෙති, එවං සකලචක්‌කවාළං සීඝං සීඝං අතික්‌කමනසමත්‌ථෙන ජවෙන සමන්‌නාගතො. සන්‌ධාවනිකායාති පදසා ධාවනෙන. එවමාහංසූති එවං වදන්‌ති.
Daḷhadhammoti daḷhadhanuṃ gahetvā ṭhito. Dhanuggahoti issāso. Daḷhadhanu nāma dvisahassathāmaṃ vuccati. Dvisahassathāmaṃ nāma yassa āropitassa jiyābaddho lohasīsādīnaṃ bhāro daṇḍe gahetvā yāva kaṇḍappamāṇā ukkhittassa pathavito muccati. Sikkhitoti dasa dvādasa vassāni ācariyakule uggahitasippo. Katahatthoti eko sippameva uggaṇhāti, katahattho na hoti ayaṃ pana katahattho ciṇṇavasibhāvo. Katūpāsanoti rājakulādīsu dassitasippo. Lahukena asanenāti anto susiraṃ katvā tūlādīhi pūretvā katalakkhaparikammena sallahukakaṇḍena. Evaṃ katañhi ekausabhagāmī dve usabhānipi gacchati…pe… aṭṭhusabhagāmī soḷasa usabhānipi gacchati. Appakasirenāti niddukkhena. Atipāteyyāti atikkameyya. Idaṃ vuttaṃ hoti – yathā so dhanuggaho taṃ vidatthicaturaṅgulaṃ chāyaṃ sīghameva atikkāmeti, evaṃ sakalacakkavāḷaṃ sīghaṃ sīghaṃ atikkamanasamatthena javena samannāgato. Sandhāvanikāyāti padasā dhāvanena. Evamāhaṃsūti evaṃ vadanti.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / අඞ්‌ගුත්‌තරනිකාය • Aṅguttaranikāya / 7. ලොකායතිකසුත්‌තං • 7. Lokāyatikasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 7. ලොකායතිකසුත්‌තවණ්‌ණනා • 7. Lokāyatikasuttavaṇṇanā
