| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
4. ලොකෙ නත්‌ථිභාවපඤ්‌හො
4. Loke natthibhāvapañho
4. ‘‘භන්‌තෙ නාගසෙන, දිස්‌සන්‌ති ලොකෙ බුද්‌ධා, දිස්‌සන්‌ති පච්‌චෙකබුද්‌ධා, දිස්‌සන්‌ති තථාගතස්‌ස සාවකා, දිස්‌සන්‌ති චක්‌කවත්‌තිරාජානො, දිස්‌සන්‌ති පදෙසරාජානො, දිස්‌සන්‌ති දෙවමනුස්‌සා, දිස්‌සන්‌ති සධනා, දිස්‌සන්‌ති අධනා, දිස්‌සන්‌ති සුගතා, දිස්‌සන්‌ති දුග්‌ගතා, දිස්‌සති පුරිසස්‌ස ඉත්‌ථිලිඞ්‌ගං පාතුභූතං, දිස්‌සති ඉත්‌ථියා පුරිසලිඞ්‌ගං පාතුභූතං, දිස්‌සති සුකතං දුක්‌කතං කම්‌මං, දිස්‌සන්‌ති කල්‍යාණපාපකානං කම්‌මානං විපාකූපභොගිනො සත්‌තා, අත්‌ථි ලොකෙ සත්‌තා අණ්‌ඩජා ජලාබුජා සංසෙදජා ඔපපාතිකා, අත්‌ථි සත්‌තා අපදා ද්‌විපදා චතුප්‌පදා බහුප්‌පදා, අත්‌ථි ලොකෙ යක්‌ඛා රක්‌ඛසා කුම්‌භණ්‌ඩා අසුරා දානවා ගන්‌ධබ්‌බා පෙතා පිසාචා, අත්‌ථි කින්‌නරා මහොරගා නාගා සුපණ්‌ණා සිද්‌ධා විජ්‌ජාධරා, අත්‌ථි හත්‌ථී අස්‌සා ගාවො මහිංසා 1 ඔට්‌ඨා ගද්‍රභා අජා එළකා මිගා සූකරා සීහා බ්‍යග්‌ඝා දීපී අච්‌ඡා කොකා තරච්‌ඡා සොණා සිඞ්‌ගාලා, අත්‌ථි බහුවිධා සකුණා, අත්‌ථි සුවණ්‌ණං රජතං මුත්‌තා මණි සඞ්‌ඛො සිලා පවාළං ලොහිතඞ්‌කො මසාරගල්‌ලං වෙළුරියො වජිරං ඵලිකං කාළලොහං තම්‌බලොහං වට්‌ටලොහං කංසලොහං, අත්‌ථි ඛොමං කොසෙය්‍යං කප්‌පාසිකං සාණං භඞ්‌ගං කම්‌බලං, අත්‌ථි සාලි වීහි යවො කඞ්‌ගු කුද්‍රූසො වරකො ගොධූමො මුග්‌ගො, මාසො තිලං කුලත්‌ථං, අත්‌ථි මූලගන්‌ධො සාරගන්‌ධො ඵෙග්‌ගුගන්‌ධො තචගන්‌ධො පත්‌තගන්‌ධො පුප්‌ඵගන්‌ධො ඵලගන්‌ධො සබ්‌බගන්‌ධො, අත්‌ථි තිණ ලතා ගච්‌ඡ රුක්‌ඛ ඔසධි වනප්‌පති නදී පබ්‌බත සමුද්‌ද මච්‌ඡකච්‌ඡපා සබ්‌බං ලොකෙ අත්‌ථි. යං, භන්‌තෙ, ලොකෙ නත්‌ථි, තං මෙ කථෙහී’’ති.
4. ‘‘Bhante nāgasena, dissanti loke buddhā, dissanti paccekabuddhā, dissanti tathāgatassa sāvakā, dissanti cakkavattirājāno, dissanti padesarājāno, dissanti devamanussā, dissanti sadhanā, dissanti adhanā, dissanti sugatā, dissanti duggatā, dissati purisassa itthiliṅgaṃ pātubhūtaṃ, dissati itthiyā purisaliṅgaṃ pātubhūtaṃ, dissati sukataṃ dukkataṃ kammaṃ, dissanti kalyāṇapāpakānaṃ kammānaṃ vipākūpabhogino sattā, atthi loke sattā aṇḍajā jalābujā saṃsedajā opapātikā, atthi sattā apadā dvipadā catuppadā bahuppadā, atthi loke yakkhā rakkhasā kumbhaṇḍā asurā dānavā gandhabbā petā pisācā, atthi kinnarā mahoragā nāgā supaṇṇā siddhā vijjādharā, atthi hatthī assā gāvo mahiṃsā 2 oṭṭhā gadrabhā ajā eḷakā migā sūkarā sīhā byagghā dīpī acchā kokā taracchā soṇā siṅgālā, atthi bahuvidhā sakuṇā, atthi suvaṇṇaṃ rajataṃ muttā maṇi saṅkho silā pavāḷaṃ lohitaṅko masāragallaṃ veḷuriyo vajiraṃ phalikaṃ kāḷalohaṃ tambalohaṃ vaṭṭalohaṃ kaṃsalohaṃ, atthi khomaṃ koseyyaṃ kappāsikaṃ sāṇaṃ bhaṅgaṃ kambalaṃ, atthi sāli vīhi yavo kaṅgu kudrūso varako godhūmo muggo, māso tilaṃ kulatthaṃ, atthi mūlagandho sāragandho pheggugandho tacagandho pattagandho pupphagandho phalagandho sabbagandho, atthi tiṇa latā gaccha rukkha osadhi vanappati nadī pabbata samudda macchakacchapā sabbaṃ loke atthi. Yaṃ, bhante, loke natthi, taṃ me kathehī’’ti.
‘‘තීණිමානි, මහාරාජ, ලොකෙ නත්‌ථි. කතමානි තීණි? සචෙතනා වා අචෙතනා වා අජරාමරා ලොකෙ නත්‌ථි, සඞ්‌ඛාරානං නිච්‌චතා නත්‌ථි, පරමත්‌ථෙන සත්‌තූපලද්‌ධි නත්‌ථි, ඉමානි ඛො, මහාරාජ, තීණි ලොකෙ නත්‌ථී’’ති. ‘‘සාධු, භන්‌තෙ නාගසෙන, එවමෙතං තථා සම්‌පටිච්‌ඡාමී’’ති.
‘‘Tīṇimāni, mahārāja, loke natthi. Katamāni tīṇi? Sacetanā vā acetanā vā ajarāmarā loke natthi, saṅkhārānaṃ niccatā natthi, paramatthena sattūpaladdhi natthi, imāni kho, mahārāja, tīṇi loke natthī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
ලොකෙ නත්‌ථිභාවපඤ්‌හො චතුත්‌ථො.
Loke natthibhāvapañho catuttho.
Footnotes:
