| Library / Tipiṭaka / ติปิฎก • Tipiṭaka / ปฎิสมฺภิทามคฺคปาฬิ • Paṭisambhidāmaggapāḷi |
๘. โลกุตฺตรกถา
8. Lokuttarakathā
๔๓. กตเม ธมฺมา โลกุตฺตรา? จตฺตาโร สติปฎฺฐานา, จตฺตาโร สมฺมปฺปธานา, จตฺตาโร อิทฺธิปาทา, ปญฺจินฺทฺริยานิ, ปญฺจ พลานิ, สตฺต โพชฺฌงฺคา, อริโย อฎฺฐงฺคิโก มโคฺค, จตฺตาโร อริยมคฺคา, จตฺตาริ จ สามญฺญผลานิ, นิพฺพานญฺจ – อิเม ธมฺมา โลกุตฺตราฯ
43. Katame dhammā lokuttarā? Cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā, ariyo aṭṭhaṅgiko maggo, cattāro ariyamaggā, cattāri ca sāmaññaphalāni, nibbānañca – ime dhammā lokuttarā.
โลกุตฺตราติ เกนเฎฺฐน โลกุตฺตรา? โลกํ ตรนฺตีติ – โลกุตฺตราฯ โลกา อุตฺตรนฺตีติ – โลกุตฺตราฯ โลกโต อุตฺตรนฺตีติ – โลกุตฺตราฯ โลกมฺหา อุตฺตรนฺตีติ – โลกุตฺตราฯ โลกํ อติกฺกมนฺตีติ – โลกุตฺตราฯ โลกํ สมติกฺกมนฺตีติ – โลกุตฺตราฯ โลกํ สมติกฺกนฺตาติ – โลกุตฺตราฯ โลเกน อติเรกาติ – โลกุตฺตราฯ โลกนฺตํ ตรนฺตีติ – โลกุตฺตราฯ โลกา นิสฺสรนฺตีติ – โลกุตฺตราฯ โลกโต นิสฺสรนฺตีติ – โลกุตฺตราฯ โลกมฺหา นิสฺสรนฺตีติ – โลกุตฺตราฯ โลกา นิสฺสฎาติ – โลกุตฺตราฯ โลเกน นิสฺสฎาติ – โลกุตฺตราฯ โลกมฺหา นิสฺสฎาติ – โลกุตฺตราฯ โลเก น ติฎฺฐนฺตีติ – โลกุตฺตราฯ โลกสฺมิํ น ติฎฺฐนฺตีติ – โลกุตฺตราฯ โลเก น ลิมฺปนฺตีติ – โลกุตฺตราฯ โลเกน น ลิมฺปนฺตีติ – โลกุตฺตราฯ โลเก อสํลิตฺตาติ – โลกุตฺตราฯ โลเกน อสํลิตฺตาติ – โลกุตฺตราฯ โลเก อนุปลิตฺตาติ – โลกุตฺตราฯ โลเกน อนุปลิตฺตาติ – โลกุตฺตราฯ โลเก วิปฺปมุตฺตาติ – โลกุตฺตราฯ โลเกน วิปฺปมุตฺตาติ – โลกุตฺตราฯ โลกา วิปฺปมุตฺตาติ – โลกุตฺตราฯ โลกโต วิปฺปมุตฺตาติ – โลกุตฺตราฯ โลกมฺหา วิปฺปมุตฺตาติ – โลกุตฺตราฯ โลเก วิสญฺญุตฺตาติ – โลกุตฺตราฯ โลเกน วิสญฺญุตฺตาติ – โลกุตฺตราฯ โลกา วิสญฺญุตฺตาติ – โลกุตฺตราฯ โลกสฺมิํ วิสญฺญุตฺตาติ – โลกุตฺตราฯ โลกโต วิสญฺญุตฺตาติ – โลกุตฺตราฯ โลกมฺหา วิสญฺญุตฺตาติ – โลกุตฺตราฯ โลกา สุชฺฌนฺตีติ – โลกุตฺตราฯ โลกโต สุชฺฌนฺตีติ – โลกุตฺตราฯ โลกมฺหา สุชฺฌนฺตีติ – โลกุตฺตราฯ โลกา วิสุชฺฌนฺตีติ – โลกุตฺตราฯ โลกโต วิสุชฺฌนฺตีติ – โลกุตฺตราฯ โลกมฺหา วิสุชฺฌนฺตีติ – โลกุตฺตราฯ โลกา วุฎฺฐหนฺตีติ 1 – โลกุตฺตราฯ โลกโต วุฎฺฐหนฺตีติ – โลกุตฺตราฯ โลกมฺหา วุฎฺฐหนฺตีติ – โลกุตฺตราฯ โลกา วิวฎฺฎนฺตีติ – โลกุตฺตรา ฯ โลกโต วิวฎฺฎนฺตีติ – โลกุตฺตราฯ โลกมฺหา วิวฎฺฎนฺตีติ – โลกุตฺตราฯ โลเก น สชฺชนฺตีติ – โลกุตฺตราฯ โลเก น คยฺหนฺตีติ – โลกุตฺตราฯ โลเก น พชฺฌนฺตีติ – โลกุตฺตราฯ โลกํ สมุจฺฉินฺทนฺตีติ – โลกุตฺตราฯ โลกํ สมุจฺฉินฺนตฺตาติ – โลกุตฺตราฯ โลกํ ปฎิปฺปสฺสเมฺภนฺตีติ – โลกุตฺตราฯ โลกํ ปฎิปฺปสฺสมฺภิตตฺตาติ – โลกุตฺตราฯ โลกสฺส อปถาติ – โลกุตฺตราฯ โลกสฺส อคตีติ – โลกุตฺตราฯ โลกสฺส อวิสยาติ – โลกุตฺตราฯ โลกสฺส อสาธารณาติ – โลกุตฺตราฯ โลกํ วมนฺตีติ – โลกุตฺตราฯ โลกํ น ปจฺจาวมนฺตีติ – โลกุตฺตราฯ โลกํ ปชหนฺตีติ – โลกุตฺตราฯ โลกํ น อุปาทิยนฺตีติ – โลกุตฺตราฯ โลกํ วิสิเนนฺตีติ – โลกุตฺตราฯ โลกํ น อุสฺสิเนนฺตีติ – โลกุตฺตราฯ โลกํ วิธูเปนฺตีติ – โลกุตฺตราฯ โลกํ น สํธูเปนฺตีติ – โลกุตฺตราฯ โลกํ สมติกฺกมฺม อภิภุยฺย ติฎฺฐนฺตีติ – โลกุตฺตราฯ
Lokuttarāti kenaṭṭhena lokuttarā? Lokaṃ tarantīti – lokuttarā. Lokā uttarantīti – lokuttarā. Lokato uttarantīti – lokuttarā. Lokamhā uttarantīti – lokuttarā. Lokaṃ atikkamantīti – lokuttarā. Lokaṃ samatikkamantīti – lokuttarā. Lokaṃ samatikkantāti – lokuttarā. Lokena atirekāti – lokuttarā. Lokantaṃ tarantīti – lokuttarā. Lokā nissarantīti – lokuttarā. Lokato nissarantīti – lokuttarā. Lokamhā nissarantīti – lokuttarā. Lokā nissaṭāti – lokuttarā. Lokena nissaṭāti – lokuttarā. Lokamhā nissaṭāti – lokuttarā. Loke na tiṭṭhantīti – lokuttarā. Lokasmiṃ na tiṭṭhantīti – lokuttarā. Loke na limpantīti – lokuttarā. Lokena na limpantīti – lokuttarā. Loke asaṃlittāti – lokuttarā. Lokena asaṃlittāti – lokuttarā. Loke anupalittāti – lokuttarā. Lokena anupalittāti – lokuttarā. Loke vippamuttāti – lokuttarā. Lokena vippamuttāti – lokuttarā. Lokā vippamuttāti – lokuttarā. Lokato vippamuttāti – lokuttarā. Lokamhā vippamuttāti – lokuttarā. Loke visaññuttāti – lokuttarā. Lokena visaññuttāti – lokuttarā. Lokā visaññuttāti – lokuttarā. Lokasmiṃ visaññuttāti – lokuttarā. Lokato visaññuttāti – lokuttarā. Lokamhā visaññuttāti – lokuttarā. Lokā sujjhantīti – lokuttarā. Lokato sujjhantīti – lokuttarā. Lokamhā sujjhantīti – lokuttarā. Lokā visujjhantīti – lokuttarā. Lokato visujjhantīti – lokuttarā. Lokamhā visujjhantīti – lokuttarā. Lokā vuṭṭhahantīti 2 – lokuttarā. Lokato vuṭṭhahantīti – lokuttarā. Lokamhā vuṭṭhahantīti – lokuttarā. Lokā vivaṭṭantīti – lokuttarā . Lokato vivaṭṭantīti – lokuttarā. Lokamhā vivaṭṭantīti – lokuttarā. Loke na sajjantīti – lokuttarā. Loke na gayhantīti – lokuttarā. Loke na bajjhantīti – lokuttarā. Lokaṃ samucchindantīti – lokuttarā. Lokaṃ samucchinnattāti – lokuttarā. Lokaṃ paṭippassambhentīti – lokuttarā. Lokaṃ paṭippassambhitattāti – lokuttarā. Lokassa apathāti – lokuttarā. Lokassa agatīti – lokuttarā. Lokassa avisayāti – lokuttarā. Lokassa asādhāraṇāti – lokuttarā. Lokaṃ vamantīti – lokuttarā. Lokaṃ na paccāvamantīti – lokuttarā. Lokaṃ pajahantīti – lokuttarā. Lokaṃ na upādiyantīti – lokuttarā. Lokaṃ visinentīti – lokuttarā. Lokaṃ na ussinentīti – lokuttarā. Lokaṃ vidhūpentīti – lokuttarā. Lokaṃ na saṃdhūpentīti – lokuttarā. Lokaṃ samatikkamma abhibhuyya tiṭṭhantīti – lokuttarā.
โลกุตฺตรกถา นิฎฺฐิตาฯ
Lokuttarakathā niṭṭhitā.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / ปฎิสมฺภิทามคฺค-อฎฺฐกถา • Paṭisambhidāmagga-aṭṭhakathā / โลกุตฺตรกถาวณฺณนา • Lokuttarakathāvaṇṇanā
