| Library / Tipiṭaka / တိပိဋက • Tipiṭaka / ပဋိသမ္ဘိဒာမဂ္ဂပာဠိ • Paṭisambhidāmaggapāḷi |
၈. လောကုတ္တရကထာ
8. Lokuttarakathā
၄၃. ကတမေ ဓမ္မာ လောကုတ္တရာ? စတ္တာရော သတိပဋ္ဌာနာ, စတ္တာရော သမ္မပ္ပဓာနာ, စတ္တာရော ဣဒ္ဓိပာဒာ, ပဉ္စိန္ဒ္ရိယာနိ, ပဉ္စ ဗလာနိ, သတ္တ ဗောဇ္ဈင္ဂာ, အရိယော အဋ္ဌင္ဂိကော မဂ္ဂော, စတ္တာရော အရိယမဂ္ဂာ, စတ္တာရိ စ သာမညဖလာနိ, နိဗ္ဗာနဉ္စ – ဣမေ ဓမ္မာ လောကုတ္တရာ။
43. Katame dhammā lokuttarā? Cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā, ariyo aṭṭhaṅgiko maggo, cattāro ariyamaggā, cattāri ca sāmaññaphalāni, nibbānañca – ime dhammā lokuttarā.
လောကုတ္တရာတိ ကေနဋ္ဌေန လောကုတ္တရာ? လောကံ တရန္တီတိ – လောကုတ္တရာ။ လောကာ ဥတ္တရန္တီတိ – လောကုတ္တရာ။ လောကတော ဥတ္တရန္တီတိ – လောကုတ္တရာ။ လောကမ္ဟာ ဥတ္တရန္တီတိ – လောကုတ္တရာ။ လောကံ အတိက္ကမန္တီတိ – လောကုတ္တရာ။ လောကံ သမတိက္ကမန္တီတိ – လောကုတ္တရာ။ လောကံ သမတိက္ကန္တာတိ – လောကုတ္တရာ။ လောကေန အတိရေကာတိ – လောကုတ္တရာ။ လောကန္တံ တရန္တီတိ – လောကုတ္တရာ။ လောကာ နိသ္သရန္တီတိ – လောကုတ္တရာ။ လောကတော နိသ္သရန္တီတိ – လောကုတ္တရာ။ လောကမ္ဟာ နိသ္သရန္တီတိ – လောကုတ္တရာ။ လောကာ နိသ္သဋာတိ – လောကုတ္တရာ။ လောကေန နိသ္သဋာတိ – လောကုတ္တရာ။ လောကမ္ဟာ နိသ္သဋာတိ – လောကုတ္တရာ။ လောကေ န တိဋ္ဌန္တီတိ – လောကုတ္တရာ။ လောကသ္မိံ န တိဋ္ဌန္တီတိ – လောကုတ္တရာ။ လောကေ န လိမ္ပန္တီတိ – လောကုတ္တရာ။ လောကေန န လိမ္ပန္တီတိ – လောကုတ္တရာ။ လောကေ အသံလိတ္တာတိ – လောကုတ္တရာ။ လောကေန အသံလိတ္တာတိ – လောကုတ္တရာ။ လောကေ အနုပလိတ္တာတိ – လောကုတ္တရာ။ လောကေန အနုပလိတ္တာတိ – လောကုတ္တရာ။ လောကေ ဝိပ္ပမုတ္တာတိ – လောကုတ္တရာ။ လောကေန ဝိပ္ပမုတ္တာတိ – လောကုတ္တရာ။ လောကာ ဝိပ္ပမုတ္တာတိ – လောကုတ္တရာ။ လောကတော ဝိပ္ပမုတ္တာတိ – လောကုတ္တရာ။ လောကမ္ဟာ ဝိပ္ပမုတ္တာတိ – လောကုတ္တရာ။ လောကေ ဝိသညုတ္တာတိ – လောကုတ္တရာ။ လောကေန ဝိသညုတ္တာတိ – လောကုတ္တရာ။ လောကာ ဝိသညုတ္တာတိ – လောကုတ္တရာ။ လောကသ္မိံ ဝိသညုတ္တာတိ – လောကုတ္တရာ။ လောကတော ဝိသညုတ္တာတိ – လောကုတ္တရာ။ လောကမ္ဟာ ဝိသညုတ္တာတိ – လောကုတ္တရာ။ လောကာ သုဇ္ဈန္တီတိ – လောကုတ္တရာ။ လောကတော သုဇ္ဈန္တီတိ – လောကုတ္တရာ။ လောကမ္ဟာ သုဇ္ဈန္တီတိ – လောကုတ္တရာ။ လောကာ ဝိသုဇ္ဈန္တီတိ – လောကုတ္တရာ။ လောကတော ဝိသုဇ္ဈန္တီတိ – လောကုတ္တရာ။ လောကမ္ဟာ ဝိသုဇ္ဈန္တီတိ – လောကုတ္တရာ။ လောကာ ဝုဋ္ဌဟန္တီတိ 1 – လောကုတ္တရာ။ လောကတော ဝုဋ္ဌဟန္တီတိ – လောကုတ္တရာ။ လောကမ္ဟာ ဝုဋ္ဌဟန္တီတိ – လောကုတ္တရာ။ လောကာ ဝိဝဋ္ဋန္တီတိ – လောကုတ္တရာ ။ လောကတော ဝိဝဋ္ဋန္တီတိ – လောကုတ္တရာ။ လောကမ္ဟာ ဝိဝဋ္ဋန္တီတိ – လောကုတ္တရာ။ လောကေ န သဇ္ဇန္တီတိ – လောကုတ္တရာ။ လောကေ န ဂယ္ဟန္တီတိ – လောကုတ္တရာ။ လောကေ န ဗဇ္ဈန္တီတိ – လောကုတ္တရာ။ လောကံ သမုစ္ဆိန္ဒန္တီတိ – လောကုတ္တရာ။ လောကံ သမုစ္ဆိန္နတ္တာတိ – လောကုတ္တရာ။ လောကံ ပဋိပ္ပသ္သမ္ဘေန္တီတိ – လောကုတ္တရာ။ လောကံ ပဋိပ္ပသ္သမ္ဘိတတ္တာတိ – လောကုတ္တရာ။ လောကသ္သ အပထာတိ – လောကုတ္တရာ။ လောကသ္သ အဂတီတိ – လောကုတ္တရာ။ လောကသ္သ အဝိသယာတိ – လောကုတ္တရာ။ လောကသ္သ အသာဓာရဏာတိ – လောကုတ္တရာ။ လောကံ ဝမန္တီတိ – လောကုတ္တရာ။ လောကံ န ပစ္စာဝမန္တီတိ – လောကုတ္တရာ။ လောကံ ပဇဟန္တီတိ – လောကုတ္တရာ။ လောကံ န ဥပာဒိယန္တီတိ – လောကုတ္တရာ။ လောကံ ဝိသိနေန္တီတိ – လောကုတ္တရာ။ လောကံ န ဥသ္သိနေန္တီတိ – လောကုတ္တရာ။ လောကံ ဝိဓူပေန္တီတိ – လောကုတ္တရာ။ လောကံ န သံဓူပေန္တီတိ – လောကုတ္တရာ။ လောကံ သမတိက္ကမ္မ အဘိဘုယ္ယ တိဋ္ဌန္တီတိ – လောကုတ္တရာ။
Lokuttarāti kenaṭṭhena lokuttarā? Lokaṃ tarantīti – lokuttarā. Lokā uttarantīti – lokuttarā. Lokato uttarantīti – lokuttarā. Lokamhā uttarantīti – lokuttarā. Lokaṃ atikkamantīti – lokuttarā. Lokaṃ samatikkamantīti – lokuttarā. Lokaṃ samatikkantāti – lokuttarā. Lokena atirekāti – lokuttarā. Lokantaṃ tarantīti – lokuttarā. Lokā nissarantīti – lokuttarā. Lokato nissarantīti – lokuttarā. Lokamhā nissarantīti – lokuttarā. Lokā nissaṭāti – lokuttarā. Lokena nissaṭāti – lokuttarā. Lokamhā nissaṭāti – lokuttarā. Loke na tiṭṭhantīti – lokuttarā. Lokasmiṃ na tiṭṭhantīti – lokuttarā. Loke na limpantīti – lokuttarā. Lokena na limpantīti – lokuttarā. Loke asaṃlittāti – lokuttarā. Lokena asaṃlittāti – lokuttarā. Loke anupalittāti – lokuttarā. Lokena anupalittāti – lokuttarā. Loke vippamuttāti – lokuttarā. Lokena vippamuttāti – lokuttarā. Lokā vippamuttāti – lokuttarā. Lokato vippamuttāti – lokuttarā. Lokamhā vippamuttāti – lokuttarā. Loke visaññuttāti – lokuttarā. Lokena visaññuttāti – lokuttarā. Lokā visaññuttāti – lokuttarā. Lokasmiṃ visaññuttāti – lokuttarā. Lokato visaññuttāti – lokuttarā. Lokamhā visaññuttāti – lokuttarā. Lokā sujjhantīti – lokuttarā. Lokato sujjhantīti – lokuttarā. Lokamhā sujjhantīti – lokuttarā. Lokā visujjhantīti – lokuttarā. Lokato visujjhantīti – lokuttarā. Lokamhā visujjhantīti – lokuttarā. Lokā vuṭṭhahantīti 2 – lokuttarā. Lokato vuṭṭhahantīti – lokuttarā. Lokamhā vuṭṭhahantīti – lokuttarā. Lokā vivaṭṭantīti – lokuttarā . Lokato vivaṭṭantīti – lokuttarā. Lokamhā vivaṭṭantīti – lokuttarā. Loke na sajjantīti – lokuttarā. Loke na gayhantīti – lokuttarā. Loke na bajjhantīti – lokuttarā. Lokaṃ samucchindantīti – lokuttarā. Lokaṃ samucchinnattāti – lokuttarā. Lokaṃ paṭippassambhentīti – lokuttarā. Lokaṃ paṭippassambhitattāti – lokuttarā. Lokassa apathāti – lokuttarā. Lokassa agatīti – lokuttarā. Lokassa avisayāti – lokuttarā. Lokassa asādhāraṇāti – lokuttarā. Lokaṃ vamantīti – lokuttarā. Lokaṃ na paccāvamantīti – lokuttarā. Lokaṃ pajahantīti – lokuttarā. Lokaṃ na upādiyantīti – lokuttarā. Lokaṃ visinentīti – lokuttarā. Lokaṃ na ussinentīti – lokuttarā. Lokaṃ vidhūpentīti – lokuttarā. Lokaṃ na saṃdhūpentīti – lokuttarā. Lokaṃ samatikkamma abhibhuyya tiṭṭhantīti – lokuttarā.
လောကုတ္တရကထာ နိဋ္ဌိတာ။
Lokuttarakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / ခုဒ္ဒကနိကာယ (အဋ္ဌကထာ) • Khuddakanikāya (aṭṭhakathā) / ပဋိသမ္ဘိဒာမဂ္ဂ-အဋ္ဌကထာ • Paṭisambhidāmagga-aṭṭhakathā / လောကုတ္တရကထာဝဏ္ဏနာ • Lokuttarakathāvaṇṇanā
