| Library / Tipiṭaka / ತಿಪಿಟಕ • Tipiṭaka / ಪಟಿಸಮ್ಭಿದಾಮಗ್ಗಪಾಳಿ • Paṭisambhidāmaggapāḷi |
೮. ಲೋಕುತ್ತರಕಥಾ
8. Lokuttarakathā
೪೩. ಕತಮೇ ಧಮ್ಮಾ ಲೋಕುತ್ತರಾ? ಚತ್ತಾರೋ ಸತಿಪಟ್ಠಾನಾ, ಚತ್ತಾರೋ ಸಮ್ಮಪ್ಪಧಾನಾ, ಚತ್ತಾರೋ ಇದ್ಧಿಪಾದಾ, ಪಞ್ಚಿನ್ದ್ರಿಯಾನಿ, ಪಞ್ಚ ಬಲಾನಿ, ಸತ್ತ ಬೋಜ್ಝಙ್ಗಾ, ಅರಿಯೋ ಅಟ್ಠಙ್ಗಿಕೋ ಮಗ್ಗೋ, ಚತ್ತಾರೋ ಅರಿಯಮಗ್ಗಾ, ಚತ್ತಾರಿ ಚ ಸಾಮಞ್ಞಫಲಾನಿ, ನಿಬ್ಬಾನಞ್ಚ – ಇಮೇ ಧಮ್ಮಾ ಲೋಕುತ್ತರಾ।
43. Katame dhammā lokuttarā? Cattāro satipaṭṭhānā, cattāro sammappadhānā, cattāro iddhipādā, pañcindriyāni, pañca balāni, satta bojjhaṅgā, ariyo aṭṭhaṅgiko maggo, cattāro ariyamaggā, cattāri ca sāmaññaphalāni, nibbānañca – ime dhammā lokuttarā.
ಲೋಕುತ್ತರಾತಿ ಕೇನಟ್ಠೇನ ಲೋಕುತ್ತರಾ? ಲೋಕಂ ತರನ್ತೀತಿ – ಲೋಕುತ್ತರಾ। ಲೋಕಾ ಉತ್ತರನ್ತೀತಿ – ಲೋಕುತ್ತರಾ। ಲೋಕತೋ ಉತ್ತರನ್ತೀತಿ – ಲೋಕುತ್ತರಾ। ಲೋಕಮ್ಹಾ ಉತ್ತರನ್ತೀತಿ – ಲೋಕುತ್ತರಾ। ಲೋಕಂ ಅತಿಕ್ಕಮನ್ತೀತಿ – ಲೋಕುತ್ತರಾ। ಲೋಕಂ ಸಮತಿಕ್ಕಮನ್ತೀತಿ – ಲೋಕುತ್ತರಾ। ಲೋಕಂ ಸಮತಿಕ್ಕನ್ತಾತಿ – ಲೋಕುತ್ತರಾ। ಲೋಕೇನ ಅತಿರೇಕಾತಿ – ಲೋಕುತ್ತರಾ। ಲೋಕನ್ತಂ ತರನ್ತೀತಿ – ಲೋಕುತ್ತರಾ। ಲೋಕಾ ನಿಸ್ಸರನ್ತೀತಿ – ಲೋಕುತ್ತರಾ। ಲೋಕತೋ ನಿಸ್ಸರನ್ತೀತಿ – ಲೋಕುತ್ತರಾ। ಲೋಕಮ್ಹಾ ನಿಸ್ಸರನ್ತೀತಿ – ಲೋಕುತ್ತರಾ। ಲೋಕಾ ನಿಸ್ಸಟಾತಿ – ಲೋಕುತ್ತರಾ। ಲೋಕೇನ ನಿಸ್ಸಟಾತಿ – ಲೋಕುತ್ತರಾ। ಲೋಕಮ್ಹಾ ನಿಸ್ಸಟಾತಿ – ಲೋಕುತ್ತರಾ। ಲೋಕೇ ನ ತಿಟ್ಠನ್ತೀತಿ – ಲೋಕುತ್ತರಾ। ಲೋಕಸ್ಮಿಂ ನ ತಿಟ್ಠನ್ತೀತಿ – ಲೋಕುತ್ತರಾ। ಲೋಕೇ ನ ಲಿಮ್ಪನ್ತೀತಿ – ಲೋಕುತ್ತರಾ। ಲೋಕೇನ ನ ಲಿಮ್ಪನ್ತೀತಿ – ಲೋಕುತ್ತರಾ। ಲೋಕೇ ಅಸಂಲಿತ್ತಾತಿ – ಲೋಕುತ್ತರಾ। ಲೋಕೇನ ಅಸಂಲಿತ್ತಾತಿ – ಲೋಕುತ್ತರಾ। ಲೋಕೇ ಅನುಪಲಿತ್ತಾತಿ – ಲೋಕುತ್ತರಾ। ಲೋಕೇನ ಅನುಪಲಿತ್ತಾತಿ – ಲೋಕುತ್ತರಾ। ಲೋಕೇ ವಿಪ್ಪಮುತ್ತಾತಿ – ಲೋಕುತ್ತರಾ। ಲೋಕೇನ ವಿಪ್ಪಮುತ್ತಾತಿ – ಲೋಕುತ್ತರಾ। ಲೋಕಾ ವಿಪ್ಪಮುತ್ತಾತಿ – ಲೋಕುತ್ತರಾ। ಲೋಕತೋ ವಿಪ್ಪಮುತ್ತಾತಿ – ಲೋಕುತ್ತರಾ। ಲೋಕಮ್ಹಾ ವಿಪ್ಪಮುತ್ತಾತಿ – ಲೋಕುತ್ತರಾ। ಲೋಕೇ ವಿಸಞ್ಞುತ್ತಾತಿ – ಲೋಕುತ್ತರಾ। ಲೋಕೇನ ವಿಸಞ್ಞುತ್ತಾತಿ – ಲೋಕುತ್ತರಾ। ಲೋಕಾ ವಿಸಞ್ಞುತ್ತಾತಿ – ಲೋಕುತ್ತರಾ। ಲೋಕಸ್ಮಿಂ ವಿಸಞ್ಞುತ್ತಾತಿ – ಲೋಕುತ್ತರಾ। ಲೋಕತೋ ವಿಸಞ್ಞುತ್ತಾತಿ – ಲೋಕುತ್ತರಾ। ಲೋಕಮ್ಹಾ ವಿಸಞ್ಞುತ್ತಾತಿ – ಲೋಕುತ್ತರಾ। ಲೋಕಾ ಸುಜ್ಝನ್ತೀತಿ – ಲೋಕುತ್ತರಾ। ಲೋಕತೋ ಸುಜ್ಝನ್ತೀತಿ – ಲೋಕುತ್ತರಾ। ಲೋಕಮ್ಹಾ ಸುಜ್ಝನ್ತೀತಿ – ಲೋಕುತ್ತರಾ। ಲೋಕಾ ವಿಸುಜ್ಝನ್ತೀತಿ – ಲೋಕುತ್ತರಾ। ಲೋಕತೋ ವಿಸುಜ್ಝನ್ತೀತಿ – ಲೋಕುತ್ತರಾ। ಲೋಕಮ್ಹಾ ವಿಸುಜ್ಝನ್ತೀತಿ – ಲೋಕುತ್ತರಾ। ಲೋಕಾ ವುಟ್ಠಹನ್ತೀತಿ 1 – ಲೋಕುತ್ತರಾ। ಲೋಕತೋ ವುಟ್ಠಹನ್ತೀತಿ – ಲೋಕುತ್ತರಾ। ಲೋಕಮ್ಹಾ ವುಟ್ಠಹನ್ತೀತಿ – ಲೋಕುತ್ತರಾ। ಲೋಕಾ ವಿವಟ್ಟನ್ತೀತಿ – ಲೋಕುತ್ತರಾ । ಲೋಕತೋ ವಿವಟ್ಟನ್ತೀತಿ – ಲೋಕುತ್ತರಾ। ಲೋಕಮ್ಹಾ ವಿವಟ್ಟನ್ತೀತಿ – ಲೋಕುತ್ತರಾ। ಲೋಕೇ ನ ಸಜ್ಜನ್ತೀತಿ – ಲೋಕುತ್ತರಾ। ಲೋಕೇ ನ ಗಯ್ಹನ್ತೀತಿ – ಲೋಕುತ್ತರಾ। ಲೋಕೇ ನ ಬಜ್ಝನ್ತೀತಿ – ಲೋಕುತ್ತರಾ। ಲೋಕಂ ಸಮುಚ್ಛಿನ್ದನ್ತೀತಿ – ಲೋಕುತ್ತರಾ। ಲೋಕಂ ಸಮುಚ್ಛಿನ್ನತ್ತಾತಿ – ಲೋಕುತ್ತರಾ। ಲೋಕಂ ಪಟಿಪ್ಪಸ್ಸಮ್ಭೇನ್ತೀತಿ – ಲೋಕುತ್ತರಾ। ಲೋಕಂ ಪಟಿಪ್ಪಸ್ಸಮ್ಭಿತತ್ತಾತಿ – ಲೋಕುತ್ತರಾ। ಲೋಕಸ್ಸ ಅಪಥಾತಿ – ಲೋಕುತ್ತರಾ। ಲೋಕಸ್ಸ ಅಗತೀತಿ – ಲೋಕುತ್ತರಾ। ಲೋಕಸ್ಸ ಅವಿಸಯಾತಿ – ಲೋಕುತ್ತರಾ। ಲೋಕಸ್ಸ ಅಸಾಧಾರಣಾತಿ – ಲೋಕುತ್ತರಾ। ಲೋಕಂ ವಮನ್ತೀತಿ – ಲೋಕುತ್ತರಾ। ಲೋಕಂ ನ ಪಚ್ಚಾವಮನ್ತೀತಿ – ಲೋಕುತ್ತರಾ। ಲೋಕಂ ಪಜಹನ್ತೀತಿ – ಲೋಕುತ್ತರಾ। ಲೋಕಂ ನ ಉಪಾದಿಯನ್ತೀತಿ – ಲೋಕುತ್ತರಾ। ಲೋಕಂ ವಿಸಿನೇನ್ತೀತಿ – ಲೋಕುತ್ತರಾ। ಲೋಕಂ ನ ಉಸ್ಸಿನೇನ್ತೀತಿ – ಲೋಕುತ್ತರಾ। ಲೋಕಂ ವಿಧೂಪೇನ್ತೀತಿ – ಲೋಕುತ್ತರಾ। ಲೋಕಂ ನ ಸಂಧೂಪೇನ್ತೀತಿ – ಲೋಕುತ್ತರಾ। ಲೋಕಂ ಸಮತಿಕ್ಕಮ್ಮ ಅಭಿಭುಯ್ಯ ತಿಟ್ಠನ್ತೀತಿ – ಲೋಕುತ್ತರಾ।
Lokuttarāti kenaṭṭhena lokuttarā? Lokaṃ tarantīti – lokuttarā. Lokā uttarantīti – lokuttarā. Lokato uttarantīti – lokuttarā. Lokamhā uttarantīti – lokuttarā. Lokaṃ atikkamantīti – lokuttarā. Lokaṃ samatikkamantīti – lokuttarā. Lokaṃ samatikkantāti – lokuttarā. Lokena atirekāti – lokuttarā. Lokantaṃ tarantīti – lokuttarā. Lokā nissarantīti – lokuttarā. Lokato nissarantīti – lokuttarā. Lokamhā nissarantīti – lokuttarā. Lokā nissaṭāti – lokuttarā. Lokena nissaṭāti – lokuttarā. Lokamhā nissaṭāti – lokuttarā. Loke na tiṭṭhantīti – lokuttarā. Lokasmiṃ na tiṭṭhantīti – lokuttarā. Loke na limpantīti – lokuttarā. Lokena na limpantīti – lokuttarā. Loke asaṃlittāti – lokuttarā. Lokena asaṃlittāti – lokuttarā. Loke anupalittāti – lokuttarā. Lokena anupalittāti – lokuttarā. Loke vippamuttāti – lokuttarā. Lokena vippamuttāti – lokuttarā. Lokā vippamuttāti – lokuttarā. Lokato vippamuttāti – lokuttarā. Lokamhā vippamuttāti – lokuttarā. Loke visaññuttāti – lokuttarā. Lokena visaññuttāti – lokuttarā. Lokā visaññuttāti – lokuttarā. Lokasmiṃ visaññuttāti – lokuttarā. Lokato visaññuttāti – lokuttarā. Lokamhā visaññuttāti – lokuttarā. Lokā sujjhantīti – lokuttarā. Lokato sujjhantīti – lokuttarā. Lokamhā sujjhantīti – lokuttarā. Lokā visujjhantīti – lokuttarā. Lokato visujjhantīti – lokuttarā. Lokamhā visujjhantīti – lokuttarā. Lokā vuṭṭhahantīti 2 – lokuttarā. Lokato vuṭṭhahantīti – lokuttarā. Lokamhā vuṭṭhahantīti – lokuttarā. Lokā vivaṭṭantīti – lokuttarā . Lokato vivaṭṭantīti – lokuttarā. Lokamhā vivaṭṭantīti – lokuttarā. Loke na sajjantīti – lokuttarā. Loke na gayhantīti – lokuttarā. Loke na bajjhantīti – lokuttarā. Lokaṃ samucchindantīti – lokuttarā. Lokaṃ samucchinnattāti – lokuttarā. Lokaṃ paṭippassambhentīti – lokuttarā. Lokaṃ paṭippassambhitattāti – lokuttarā. Lokassa apathāti – lokuttarā. Lokassa agatīti – lokuttarā. Lokassa avisayāti – lokuttarā. Lokassa asādhāraṇāti – lokuttarā. Lokaṃ vamantīti – lokuttarā. Lokaṃ na paccāvamantīti – lokuttarā. Lokaṃ pajahantīti – lokuttarā. Lokaṃ na upādiyantīti – lokuttarā. Lokaṃ visinentīti – lokuttarā. Lokaṃ na ussinentīti – lokuttarā. Lokaṃ vidhūpentīti – lokuttarā. Lokaṃ na saṃdhūpentīti – lokuttarā. Lokaṃ samatikkamma abhibhuyya tiṭṭhantīti – lokuttarā.
ಲೋಕುತ್ತರಕಥಾ ನಿಟ್ಠಿತಾ।
Lokuttarakathā niṭṭhitā.
Footnotes:
Related texts:
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಖುದ್ದಕನಿಕಾಯ (ಅಟ್ಠಕಥಾ) • Khuddakanikāya (aṭṭhakathā) / ಪಟಿಸಮ್ಭಿದಾಮಗ್ಗ-ಅಟ್ಠಕಥಾ • Paṭisambhidāmagga-aṭṭhakathā / ಲೋಕುತ್ತರಕಥಾವಣ್ಣನಾ • Lokuttarakathāvaṇṇanā
