| Library / Tipiṭaka / திபிடக • Tipiṭaka / படிஸம்பி⁴தா³மக்³க³-அட்ட²கதா² • Paṭisambhidāmagga-aṭṭhakathā |
8. லோகுத்தரகதா²
8. Lokuttarakathā
லோகுத்தரகதா²வண்ணனா
Lokuttarakathāvaṇṇanā
43. இதா³னி லோகுத்தரத⁴ம்மவதியா த⁴ம்மசக்ககதா²ய அனந்தரங் கதி²தாய லோகுத்தரகதா²ய அபுப்³ப³த்தா²னுவண்ணனா. தத்த² லோகுத்தரபத³ஸ்ஸ அத்தோ² நித்³தே³ஸவாரே ஆவி ப⁴விஸ்ஸதி. சத்தாரோ ஸதிபட்டா²னாதிஆத³யோ ஸத்ததிங்ஸ போ³தி⁴பக்கி²யத⁴ம்மா யதா²யோக³ங் மக்³க³ப²லஸம்பயுத்தா. தே பு³ஜ்ஜ²னட்டே²ன போ³தீ⁴தி ஏவங்லத்³த⁴னாமஸ்ஸ அரியஸ்ஸ பக்கே² ப⁴வத்தா போ³தி⁴பக்கி²யா நாம. பக்கே² ப⁴வத்தாதி உபகாரபா⁴வே டி²தத்தா. தேஸு ஆரம்மணேஸு ஓக்கந்தித்வா பக்க²ந்தி³த்வா உபட்டா²னதோ உபட்டா²னங், ஸதியேவ உபட்டா²னங் ஸதிபட்டா²னங். காயவேத³னாசித்தத⁴ம்மேஸு பனஸ்ஸ அஸுப⁴து³க்கா²னிச்சானத்தாகாரக³ஹணவஸேன ஸுப⁴ஸுக²னிச்சஅத்தஸஞ்ஞாபஹானகிச்சஸாத⁴னவஸேன ச பவத்திதோ சதுதா⁴ பே⁴தோ³ ஹோதி. தஸ்மா சத்தாரோ ஸதிபட்டா²னாதி வுச்சதி. பத³ஹந்தி ஏதேனாதி பதா⁴னங், ஸோப⁴னங் பதா⁴னங் ஸம்மப்பதா⁴னங், ஸம்மா வா பத³ஹந்தி ஏதேனாதி ஸம்மப்பதா⁴னங், ஸோப⁴னங் வா தங் கிலேஸவிரூபபவத்தவிரஹிததோ பதா⁴னஞ்ச ஹிதஸுக²னிப்பா²த³கட்டே²ன ஸெட்ட²பா⁴வாவஹனதோ பதா⁴னபா⁴வகரணதோ வாதி ஸம்மப்பதா⁴னங். வீரியஸ்ஸேதங் அதி⁴வசனங். தயித³ங் உப்பன்னானுப்பன்னானங் அகுஸலானங் பஹானானுப்பத்திகிச்சங், அனுப்பன்னுப்பன்னானஞ்ச குஸலானங் உப்பத்திட்டி²திகிச்சங் ஸாத⁴யதீதி சதுப்³பி³த⁴ங் ஹோதி. தஸ்மா சத்தாரோ ஸம்மப்பதா⁴னாதி வுச்சதி. நிப்ப²த்திபரியாயேன இஜ்ஜ²னட்டே²ன, இஜ்ஜ²ந்தி ஏதாய ஸத்தா இத்³தா⁴ வுத்³தா⁴ உக்கங்ஸக³தா ஹொந்தீதி இமினா வா பரியாயேன இத்³தி⁴, தஸ்ஸா ஸம்பயுத்தாய புப்³ப³ங்க³மட்டே²ன ப²லபூ⁴தாய புப்³ப³பா⁴க³காரணட்டே²ன ச இத்³தி⁴யா பாதோ³தி இத்³தி⁴பாதோ³. ஸோ ச²ந்த³வீரியசித்தவீமங்ஸாவஸேன சதுப்³பி³தோ⁴வ ஹோதி. தஸ்மா சத்தாரோ இத்³தி⁴பாதா³தி வுச்சதி. அஸ்ஸத்³தி⁴யகோஸஜ்ஜபமாத³விக்கே²பஸம்மோஹானங் அபி⁴ப⁴வனதோ அபி⁴ப⁴வனஸங்கா²தேன அதி⁴பதியட்டே²ன இந்த்³ரியங். அஸ்ஸத்³தி⁴யாதீ³ஹி அனபி⁴ப⁴வனீயதோ அகம்பியட்டே²ன ப³லங். தது³ப⁴யம்பி ஸத்³தா⁴வீரியஸதிஸமாதி⁴பஞ்ஞாவஸேன பஞ்சவித⁴ங் ஹோதி. தஸ்மா பஞ்சிந்த்³ரியானி பஞ்ச ப³லானீதி வுச்சந்தி. பு³ஜ்ஜ²னகஸத்தஸ்ஸ பன அங்க³பா⁴வேன ஸதிஆத³யோ ஸத்த த⁴ம்மா பொ³ஜ்ஜ²ங்கா³, நிய்யானட்டே²ன ச ஸம்மாதி³ட்டி²ஆத³யோ அட்ட² மக்³க³ங்கா³ ஹொந்தி. தேன வுச்சதி ஸத்த பொ³ஜ்ஜ²ங்கா³ அரியோ அட்ட²ங்கி³கோ மக்³கோ³தி.
43. Idāni lokuttaradhammavatiyā dhammacakkakathāya anantaraṃ kathitāya lokuttarakathāya apubbatthānuvaṇṇanā. Tattha lokuttarapadassa attho niddesavāre āvi bhavissati. Cattāro satipaṭṭhānātiādayo sattatiṃsa bodhipakkhiyadhammā yathāyogaṃ maggaphalasampayuttā. Te bujjhanaṭṭhena bodhīti evaṃladdhanāmassa ariyassa pakkhe bhavattā bodhipakkhiyā nāma. Pakkhe bhavattāti upakārabhāve ṭhitattā. Tesu ārammaṇesu okkantitvā pakkhanditvā upaṭṭhānato upaṭṭhānaṃ, satiyeva upaṭṭhānaṃ satipaṭṭhānaṃ. Kāyavedanācittadhammesu panassa asubhadukkhāniccānattākāragahaṇavasena subhasukhaniccaattasaññāpahānakiccasādhanavasena ca pavattito catudhā bhedo hoti. Tasmā cattāro satipaṭṭhānāti vuccati. Padahanti etenāti padhānaṃ, sobhanaṃ padhānaṃ sammappadhānaṃ, sammā vā padahanti etenāti sammappadhānaṃ, sobhanaṃ vā taṃ kilesavirūpapavattavirahitato padhānañca hitasukhanipphādakaṭṭhena seṭṭhabhāvāvahanato padhānabhāvakaraṇato vāti sammappadhānaṃ. Vīriyassetaṃ adhivacanaṃ. Tayidaṃ uppannānuppannānaṃ akusalānaṃ pahānānuppattikiccaṃ, anuppannuppannānañca kusalānaṃ uppattiṭṭhitikiccaṃ sādhayatīti catubbidhaṃ hoti. Tasmā cattāro sammappadhānāti vuccati. Nipphattipariyāyena ijjhanaṭṭhena, ijjhanti etāya sattā iddhā vuddhā ukkaṃsagatā hontīti iminā vā pariyāyena iddhi, tassā sampayuttāya pubbaṅgamaṭṭhena phalabhūtāya pubbabhāgakāraṇaṭṭhena ca iddhiyā pādoti iddhipādo. So chandavīriyacittavīmaṃsāvasena catubbidhova hoti. Tasmā cattāro iddhipādāti vuccati. Assaddhiyakosajjapamādavikkhepasammohānaṃ abhibhavanato abhibhavanasaṅkhātena adhipatiyaṭṭhena indriyaṃ. Assaddhiyādīhi anabhibhavanīyato akampiyaṭṭhena balaṃ. Tadubhayampi saddhāvīriyasatisamādhipaññāvasena pañcavidhaṃ hoti. Tasmā pañcindriyāni pañca balānīti vuccanti. Bujjhanakasattassa pana aṅgabhāvena satiādayo satta dhammā bojjhaṅgā, niyyānaṭṭhena ca sammādiṭṭhiādayo aṭṭha maggaṅgā honti. Tena vuccati satta bojjhaṅgā ariyo aṭṭhaṅgiko maggoti.
இதி இமே ஸத்ததிங்ஸ போ³தி⁴பக்கி²யா த⁴ம்மா புப்³ப³பா⁴கே³ லோகியவிபஸ்ஸனாய வத்தமானாய சுத்³த³ஸவிதே⁴ன காயங் பரிக்³க³ண்ஹதோ ச காயானுபஸ்ஸனாஸதிபட்டா²னங், நவவிதே⁴ன வேத³னங் பரிக்³க³ண்ஹதோ ச வேத³னானுபஸ்ஸனாஸதிபட்டா²னங், ஸோளஸவிதே⁴ன சித்தங் பரிக்³க³ண்ஹதோ ச சித்தானுபஸ்ஸனாஸதிபட்டா²னங், பஞ்சவிதே⁴ன த⁴ம்மே பரிக்³க³ண்ஹதோ ச த⁴ம்மானுபஸ்ஸனாஸதிபட்டா²னங். இதி இமஸ்மிங் அத்தபா⁴வே அனுப்பன்னபுப்³ப³ங் பரஸ்ஸ உப்பன்னங் அகுஸலங் தி³ஸ்வா ‘‘யதா² படிபன்னஸ்ஸ தஸ்ஸ தங் உப்பன்னங், ந ததா² படிபஜ்ஜிஸ்ஸாமி, ஏவங் மே ஏதங் நுப்பஜ்ஜிஸ்ஸதீ’’தி தஸ்ஸ அனுப்பாதா³ய வாயமனகாலே பட²மங் ஸம்மப்பதா⁴னங், அத்தனோ ஸமுதா³சாரப்பத்தமகுஸலங் தி³ஸ்வா தஸ்ஸ பஹானாய வாயமனகாலே து³தியங், இமஸ்மிங் அத்தபா⁴வே அனுப்பன்னபுப்³ப³ங் ஜா²னங் வா விபஸ்ஸனங் வா உப்பாதே³துங் வாயமந்தஸ்ஸ ததியங், உப்பன்னங் யதா² ந பரிஹாயதி, ஏவங் புனப்புனங் உப்பாதெ³ந்தஸ்ஸ சதுத்த²ங் ஸம்மப்பதா⁴னங். ச²ந்த³ங் து⁴ரங் கத்வா குஸலுப்பாத³னகாலே ச²ந்தி³த்³தி⁴பாதோ³, வீரியங், சித்தங், வீமங்ஸங் து⁴ரங் கத்வா குஸலுப்பாத³னகாலே வீமங்ஸித்³தி⁴பாதோ³. மிச்சா²வாசாய விரமணகாலே ஸம்மாவாசா , மிச்சா²கம்மந்தா, மிச்சா²ஜீவா விரமணகாலே ஸம்மாஜீவோதி ஏவங் நானாசித்தேஸு லப்³ப⁴ந்தி. சதுமக்³க³க்க²ணே பன ஏகசித்தே லப்³ப⁴ந்தி, ப²லக்க²ணே ட²பெத்வா சத்தாரோ ஸம்மப்பதா⁴னே அவஸேஸா தெத்திங்ஸ லப்³ப⁴ந்தி. ஏவங் ஏகசித்தே லப்³ப⁴மானேஸு சேதேஸு ஏகாவ நிப்³பா³னாரம்மணா ஸதி காயாதீ³ஸு ஸுப⁴ஸஞ்ஞாதி³பஹானகிச்சஸாத⁴னவஸேன ‘‘சத்தாரோ ஸதிபட்டா²னா’’தி வுச்சதி. ஏகமேவ ச வீரியங் அனுப்பன்னுப்பன்னானங் அனுப்பாதா³தி³கிச்சஸாத⁴னவஸேன ‘‘சத்தாரோ ஸம்மப்பதா⁴னா’’தி வுச்சதி. ஸேஸேஸு ஹாபனவட்³ட⁴னங் நத்தி².
Iti ime sattatiṃsa bodhipakkhiyā dhammā pubbabhāge lokiyavipassanāya vattamānāya cuddasavidhena kāyaṃ pariggaṇhato ca kāyānupassanāsatipaṭṭhānaṃ, navavidhena vedanaṃ pariggaṇhato ca vedanānupassanāsatipaṭṭhānaṃ, soḷasavidhena cittaṃ pariggaṇhato ca cittānupassanāsatipaṭṭhānaṃ, pañcavidhena dhamme pariggaṇhato ca dhammānupassanāsatipaṭṭhānaṃ. Iti imasmiṃ attabhāve anuppannapubbaṃ parassa uppannaṃ akusalaṃ disvā ‘‘yathā paṭipannassa tassa taṃ uppannaṃ, na tathā paṭipajjissāmi, evaṃ me etaṃ nuppajjissatī’’ti tassa anuppādāya vāyamanakāle paṭhamaṃ sammappadhānaṃ, attano samudācārappattamakusalaṃ disvā tassa pahānāya vāyamanakāle dutiyaṃ, imasmiṃ attabhāve anuppannapubbaṃ jhānaṃ vā vipassanaṃ vā uppādetuṃ vāyamantassa tatiyaṃ, uppannaṃ yathā na parihāyati, evaṃ punappunaṃ uppādentassa catutthaṃ sammappadhānaṃ. Chandaṃ dhuraṃ katvā kusaluppādanakāle chandiddhipādo, vīriyaṃ, cittaṃ, vīmaṃsaṃ dhuraṃ katvā kusaluppādanakāle vīmaṃsiddhipādo. Micchāvācāya viramaṇakāle sammāvācā , micchākammantā, micchājīvā viramaṇakāle sammājīvoti evaṃ nānācittesu labbhanti. Catumaggakkhaṇe pana ekacitte labbhanti, phalakkhaṇe ṭhapetvā cattāro sammappadhāne avasesā tettiṃsa labbhanti. Evaṃ ekacitte labbhamānesu cetesu ekāva nibbānārammaṇā sati kāyādīsu subhasaññādipahānakiccasādhanavasena ‘‘cattāro satipaṭṭhānā’’ti vuccati. Ekameva ca vīriyaṃ anuppannuppannānaṃ anuppādādikiccasādhanavasena ‘‘cattāro sammappadhānā’’ti vuccati. Sesesu hāpanavaḍḍhanaṃ natthi.
அபிச தேஸு –
Apica tesu –
நவ ஏகவிதா⁴ ஏகோ, த்³வேதா⁴த² சதுபஞ்சதா⁴;
Nava ekavidhā eko, dvedhātha catupañcadhā;
அட்ட²தா⁴ நவதா⁴ சேவ, இதி ச²த்³தா⁴ ப⁴வந்தி தே.
Aṭṭhadhā navadhā ceva, iti chaddhā bhavanti te.
நவ ஏகவிதா⁴தி ச²ந்தோ³ சித்தங் பீதி பஸ்ஸத்³தி⁴ உபெக்கா² ஸங்கப்போ வாசா கம்மந்தோ ஆஜீவோதி இமே நவ ச²ந்தி³த்³தி⁴பாதா³தி³வஸேன ஏகவிதா⁴வ ஹொந்தி, அஞ்ஞகொட்டா²ஸங் ந ப⁴ஜந்தி. ஏகோ த்³வேதா⁴தி ஸத்³தா⁴ இந்த்³ரியப³லவஸேன த்³வேதா⁴ டி²தா. அத² சதுபஞ்சதா⁴தி அத²ஞ்ஞோ ஏகோ சதுதா⁴, அஞ்ஞோ பஞ்சதா⁴ டி²தோதி அத்தோ². தத்த² ஸமாதி⁴ ஏகோ இந்த்³ரியப³லபொ³ஜ்ஜ²ங்க³மக்³க³ங்க³வஸேன சதுதா⁴ டி²தோ, பஞ்ஞா தேஸங் சதுன்னங் இத்³தி⁴பாத³கொட்டா²ஸஸ்ஸ ச வஸேன பஞ்சதா⁴. அட்ட²தா⁴ நவதா⁴ சேவாதி அபரோ ஏகோ அட்ட²தா⁴, ஏகோ நவதா⁴ டி²தோதி அத்தோ². சதுஸதிபட்டா²னஇந்த்³ரியப³லபொ³ஜ்ஜ²ங்க³மக்³க³ங்க³வஸேன ஸதி அட்ட²தா⁴ டி²தா, சதுஸம்மப்பதா⁴னஇத்³தி⁴பாத³இந்த்³ரியப³லபொ³ஜ்ஜ²ங்க³மக்³க³ங்க³வஸேன வீரியங் நவதா⁴தி. ஏவங் –
Navaekavidhāti chando cittaṃ pīti passaddhi upekkhā saṅkappo vācā kammanto ājīvoti ime nava chandiddhipādādivasena ekavidhāva honti, aññakoṭṭhāsaṃ na bhajanti. Eko dvedhāti saddhā indriyabalavasena dvedhā ṭhitā. Atha catupañcadhāti athañño eko catudhā, añño pañcadhā ṭhitoti attho. Tattha samādhi eko indriyabalabojjhaṅgamaggaṅgavasena catudhā ṭhito, paññā tesaṃ catunnaṃ iddhipādakoṭṭhāsassa ca vasena pañcadhā. Aṭṭhadhā navadhā cevāti aparo eko aṭṭhadhā, eko navadhā ṭhitoti attho. Catusatipaṭṭhānaindriyabalabojjhaṅgamaggaṅgavasena sati aṭṭhadhā ṭhitā, catusammappadhānaiddhipādaindriyabalabojjhaṅgamaggaṅgavasena vīriyaṃ navadhāti. Evaṃ –
சுத்³த³ஸேவ அஸம்பி⁴ன்னா, ஹொந்தேதே போ³தி⁴பக்கி²யா;
Cuddaseva asambhinnā, hontete bodhipakkhiyā;
கொட்டா²ஸதோ ஸத்தவிதா⁴, ஸத்ததிங்ஸ பபே⁴த³தோ.
Koṭṭhāsato sattavidhā, sattatiṃsa pabhedato.
ஸகிச்சனிப்பா²த³னதோ, ஸரூபேன ச வுத்திதோ;
Sakiccanipphādanato, sarūpena ca vuttito;
ஸப்³பே³வ அரியமக்³க³ஸ்ஸ, ஸம்ப⁴வே ஸம்ப⁴வந்தி தே.
Sabbeva ariyamaggassa, sambhave sambhavanti te.
ஏவங் மக்³க³ப²லஸம்பயுத்தே ஸத்ததிங்ஸ போ³தி⁴பக்கி²யத⁴ம்மே த³ஸ்ஸெத்வா புன தே மக்³க³ப²லேஸு ஸங்கி²பித்வா சத்தாரோ அரியமக்³கா³ சத்தாரி ச ஸாமஞ்ஞப²லானீதி ஆஹ. ஸமணபா⁴வோ ஸாமஞ்ஞங், சதுன்னங் அரியமக்³கா³னமேதங் நாமங். ஸாமஞ்ஞானங் ப²லானி ஸாமஞ்ஞப²லானி. நிப்³பா³னங் பன ஸப்³பே³ஹி அஸம்மிஸ்ஸமேவ. இதி வித்தா²ரதோ ஸத்ததிங்ஸபோ³தி⁴பக்கி²யசதுமக்³க³சதுப²லனிப்³பா³னானங் வஸேன ச²சத்தாலீஸ லோகுத்தரத⁴ம்மா, ததோ ஸங்கே²பேன சதுமக்³க³சதுப²லனிப்³பா³னானங் வஸேன நவ லோகுத்தரத⁴ம்மா, ததோபி ஸங்கே²பேன மக்³க³ப²லனிப்³பா³னானங் வஸேன தயோ லோகுத்தரத⁴ம்மாதி வேதி³தப்³ப³ங். ஸதிபட்டா²னாதீ³னங் மக்³க³ப²லானஞ்ச லோகுத்தரத்தே வுத்தே தங்ஸம்பயுத்தானங் ப²ஸ்ஸாதீ³னம்பி லோகுத்தரத்தங் வுத்தமேவ ஹோதி. பதா⁴னத⁴ம்மவஸேன பன ஸதிபட்டா²னாத³யோவ வுத்தா. அபி⁴த⁴ம்மே (த⁴॰ ஸ॰ 277 ஆத³யோ, 505 ஆத³யோ) ச லோகுத்தரத⁴ம்மனித்³தே³ஸே மக்³க³ப²லஸம்பயுத்தானங் ப²ஸ்ஸாதீ³னங் லோகுத்தரத்தங் வுத்தமேவாதி.
Evaṃ maggaphalasampayutte sattatiṃsa bodhipakkhiyadhamme dassetvā puna te maggaphalesu saṅkhipitvā cattāro ariyamaggā cattāri ca sāmaññaphalānīti āha. Samaṇabhāvo sāmaññaṃ, catunnaṃ ariyamaggānametaṃ nāmaṃ. Sāmaññānaṃ phalāni sāmaññaphalāni. Nibbānaṃ pana sabbehi asammissameva. Iti vitthārato sattatiṃsabodhipakkhiyacatumaggacatuphalanibbānānaṃ vasena chacattālīsa lokuttaradhammā, tato saṅkhepena catumaggacatuphalanibbānānaṃ vasena nava lokuttaradhammā, tatopi saṅkhepena maggaphalanibbānānaṃ vasena tayo lokuttaradhammāti veditabbaṃ. Satipaṭṭhānādīnaṃ maggaphalānañca lokuttaratte vutte taṃsampayuttānaṃ phassādīnampi lokuttarattaṃ vuttameva hoti. Padhānadhammavasena pana satipaṭṭhānādayova vuttā. Abhidhamme (dha. sa. 277 ādayo, 505 ādayo) ca lokuttaradhammaniddese maggaphalasampayuttānaṃ phassādīnaṃ lokuttarattaṃ vuttamevāti.
லோகங் தரந்தீதி லோகங் அதிக்கமந்தி. ஸப்³ப³மித⁴ ஈதி³ஸங் வத்தமானகாலவசனங் சத்தாரோ அரியமக்³கே³ ஸந்தா⁴ய வுத்தங். ஸோதாபத்திமக்³கோ³ ஹி அபாயலோகங் தரதி, ஸகதா³கா³மிமக்³கோ³ காமாவசரலோகேகதே³ஸங் தரதி, அனாகா³மிமக்³கோ³ காமாவசரலோகங் தரதி, அரஹத்தமக்³கோ³ ரூபாரூபாவசரலோகங் தரதி. லோகா உத்தரந்தீதி லோகா உக்³க³ச்ச²ந்தி. லோகதோதி ச லோகம்ஹாதி ச ததே³வ நிஸ்ஸக்கவசனங் விஸேஸெத்வா த³ஸ்ஸிதங். லோகங் ஸமதிக்கமந்தீதி பட²மங் வுத்தத்த²மேவ. தத்த² உபஸக்³க³த்த²ங் அனபெக்கி²த்வா வுத்தங், இத⁴ ஸஹ உபஸக்³க³த்தே²ன வுத்தங். லோகங் ஸமதிக்கந்தாதி யதா²வுத்தங் லோகங் ஸம்மா அதிக்கந்தா. ஸப்³ப³மித⁴ ஈதி³ஸங் அதீதகாலவசனங் ப²லனிப்³பா³னானி ஸந்தா⁴ய வுத்தங், ஸோதாபத்திப²லாதீ³னி ஹி யதா²வுத்தங் லோகங் அதிக்கமித்வா டி²தானி, ஸதா³ நிப்³பா³னங் ஸப்³ப³லோகங் அதிக்கமித்வா டி²தங். லோகேன அதிரேகாதி லோகதோ அதி⁴கபூ⁴தா. இத³ங் ஸப்³பே³பி லோகுத்தரத⁴ம்மே ஸந்தா⁴ய வுத்தங். நிஸ்ஸரந்தீதி நிக்³க³ச்ச²ந்தி. நிஸ்ஸடாதி நிக்³க³தா. லோகே ந திட்ட²ந்தீதிஆதீ³னி அட்டா²ரஸ வசனானி ஸப்³ப³லோகுத்தரேஸுபி யுஜ்ஜந்தி. ந திட்ட²ந்தீதி லோகே அபரியாபன்னத்தா வுத்தங். லோகே ந லிம்பந்தீதி க²ந்த⁴ஸந்தானே வத்தமானாபி தஸ்மிங் ந லிம்பந்தீதி அத்தோ². லோகேன ந லிம்பந்தீதி அகதபடிவேதா⁴னங் கேனசி சித்தேன, கதபடிவேதா⁴னங் அகுஸலேன அப்பமத்தேனபி சித்தேன ந லிம்பந்தீதி அத்தோ². அஸங்லித்தா அனுபலித்தாதி உபஸக்³கே³ன விஸேஸிதங்.
Lokaṃ tarantīti lokaṃ atikkamanti. Sabbamidha īdisaṃ vattamānakālavacanaṃ cattāro ariyamagge sandhāya vuttaṃ. Sotāpattimaggo hi apāyalokaṃ tarati, sakadāgāmimaggo kāmāvacaralokekadesaṃ tarati, anāgāmimaggo kāmāvacaralokaṃ tarati, arahattamaggo rūpārūpāvacaralokaṃ tarati. Lokā uttarantīti lokā uggacchanti. Lokatoti ca lokamhāti ca tadeva nissakkavacanaṃ visesetvā dassitaṃ. Lokaṃ samatikkamantīti paṭhamaṃ vuttatthameva. Tattha upasaggatthaṃ anapekkhitvā vuttaṃ, idha saha upasaggatthena vuttaṃ. Lokaṃ samatikkantāti yathāvuttaṃ lokaṃ sammā atikkantā. Sabbamidha īdisaṃ atītakālavacanaṃ phalanibbānāni sandhāya vuttaṃ, sotāpattiphalādīni hi yathāvuttaṃ lokaṃ atikkamitvā ṭhitāni, sadā nibbānaṃ sabbalokaṃ atikkamitvā ṭhitaṃ. Lokena atirekāti lokato adhikabhūtā. Idaṃ sabbepi lokuttaradhamme sandhāya vuttaṃ. Nissarantīti niggacchanti. Nissaṭāti niggatā. Loke na tiṭṭhantītiādīni aṭṭhārasa vacanāni sabbalokuttaresupi yujjanti. Na tiṭṭhantīti loke apariyāpannattā vuttaṃ. Loke na limpantīti khandhasantāne vattamānāpi tasmiṃ na limpantīti attho. Lokena na limpantīti akatapaṭivedhānaṃ kenaci cittena, katapaṭivedhānaṃ akusalena appamattenapi cittena na limpantīti attho. Asaṃlittā anupalittāti upasaggena visesitaṃ.
விப்பமுத்தாதி அலித்தத்தமேவ நானாப்³யஞ்ஜனேன விஸேஸிதங். யே கேசி ஹி யத்த² யேன வா அலித்தா, தே தத்த² தேன வா விப்பமுத்தா ஹொந்தி. லோகா விப்பமுத்தாதிஆதீ³னி தீணி நிஸ்ஸக்கவஸேன வுத்தானி. விஸஞ்ஞுத்தாதி விப்பமுத்தத்தவிஸேஸனங். யே கேசி ஹி யத்த² யேன யதோ விப்பமுத்தா, தே தத்த² தேன ததோ விஸஞ்ஞுத்தா நாம ஹொந்தி. லோகா ஸுஜ்ஜ²ந்தீதி லோகமலங் தோ⁴வித்வா லோகா ஸுஜ்ஜ²ந்தி. விஸுஜ்ஜ²ந்தீதி ததே³வ உபஸக்³கே³ன விஸேஸிதங். வுட்ட²ஹந்தீதி உட்டி²தா ஹொந்தி. விவட்டந்தீதி நிவட்டந்தி. ந ஸஜ்ஜந்தீதி ந லக்³க³ந்தி. ந க³ய்ஹந்தீதி ந க³ண்ஹீயந்தி. ந ப³ஜ்ஜ²ந்தீதி ந பா³தீ⁴யந்தி. ஸமுச்சி²ந்த³ந்தீதி அப்பவத்திங் கரொந்தி. யதா² ச லோகங் ஸமுச்சி²ன்னத்தாதி, ததே²வ ‘‘லோகா விஸுத்³த⁴த்தா’’திஆதி³ வுத்தமேவ ஹோதி. படிப்பஸ்ஸம்பெ⁴ந்தீதி நிரோதெ⁴ந்தி. அபதா²திஆதீ³னி சத்தாரி ஸப்³பே³ஸுபி லோகுத்தரேஸு யுஜ்ஜந்தி. அபதா²தி அமக்³கா³. அக³தீதி அப்பதிட்டா². அவிஸயாதி அனாயத்தா. அஸாதா⁴ரணாதி அஸமானா. வமந்தீதி உக்³கி³லந்தி. ந பச்சாவமந்தீதி வுத்தபடிபக்க²னயேன வுத்தங், வந்தங் புன ந அத³ந்தீதி அத்தோ². ஏதேன வந்தஸ்ஸ ஸுவந்தபா⁴வோ வுத்தோ ஹோதி. அனந்தரது³கத்தயேபி ஏஸேவ நயோ. விஸீனெந்தீதி விகிரந்தி விமுச்சந்தி, ந ப³ந்த⁴ந்தீதி அத்தோ². ந உஸ்ஸீனெந்தீதி ந விகிரந்தி ந விமுச்சந்தி. ‘‘விஸினெந்தீ’’தி ‘‘ந உஸ்ஸினெந்தீ’’தி ரஸ்ஸங் கத்வா பாடோ² ஸுந்த³ரோ. விதூ⁴பெந்தீதி நிப்³பா³பெந்தி. ந ஸங்தூ⁴பெந்தீதி ந உஜ்ஜலந்தி. லோகங் ஸமதிக்கம்ம அபி⁴பு⁴ய்ய திட்ட²ந்தீதி ஸப்³பே³பி லோகுத்தரா த⁴ம்மா லோகங் ஸம்மா அதிக்கமித்வா அபி⁴ப⁴வித்வா ச திட்ட²ந்தீதி லோகுத்தரா. ஸப்³பே³ஹிபி இமேஹி யதா²வுத்தேஹி பகாரேஹி லோகுத்தரானங் லோகதோ உத்தரபா⁴வோ அதி⁴கபா⁴வோ ச வுத்தோ ஹோதீதி.
Vippamuttāti alittattameva nānābyañjanena visesitaṃ. Ye keci hi yattha yena vā alittā, te tattha tena vā vippamuttā honti. Lokā vippamuttātiādīni tīṇi nissakkavasena vuttāni. Visaññuttāti vippamuttattavisesanaṃ. Ye keci hi yattha yena yato vippamuttā, te tattha tena tato visaññuttā nāma honti. Lokā sujjhantīti lokamalaṃ dhovitvā lokā sujjhanti. Visujjhantīti tadeva upasaggena visesitaṃ. Vuṭṭhahantīti uṭṭhitā honti. Vivaṭṭantīti nivaṭṭanti. Na sajjantīti na lagganti. Na gayhantīti na gaṇhīyanti. Na bajjhantīti na bādhīyanti. Samucchindantīti appavattiṃ karonti. Yathā ca lokaṃ samucchinnattāti, tatheva ‘‘lokā visuddhattā’’tiādi vuttameva hoti. Paṭippassambhentīti nirodhenti. Apathātiādīni cattāri sabbesupi lokuttaresu yujjanti. Apathāti amaggā. Agatīti appatiṭṭhā. Avisayāti anāyattā. Asādhāraṇāti asamānā. Vamantīti uggilanti. Na paccāvamantīti vuttapaṭipakkhanayena vuttaṃ, vantaṃ puna na adantīti attho. Etena vantassa suvantabhāvo vutto hoti. Anantaradukattayepi eseva nayo. Visīnentīti vikiranti vimuccanti, na bandhantīti attho. Na ussīnentīti na vikiranti na vimuccanti. ‘‘Visinentī’’ti ‘‘na ussinentī’’ti rassaṃ katvā pāṭho sundaro. Vidhūpentīti nibbāpenti. Nasaṃdhūpentīti na ujjalanti. Lokaṃ samatikkamma abhibhuyya tiṭṭhantīti sabbepi lokuttarā dhammā lokaṃ sammā atikkamitvā abhibhavitvā ca tiṭṭhantīti lokuttarā. Sabbehipi imehi yathāvuttehi pakārehi lokuttarānaṃ lokato uttarabhāvo adhikabhāvo ca vutto hotīti.
லோகுத்தரகதா²வண்ணனா நிட்டி²தா.
Lokuttarakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / படிஸம்பி⁴தா³மக்³க³பாளி • Paṭisambhidāmaggapāḷi / 8. லோகுத்தரகதா² • 8. Lokuttarakathā
