| Library / Tipiṭaka / д̇ибидага • Tipiṭaka / д̇хаммасан̇г̇ан̣и-адтагат̇аа • Dhammasaṅgaṇi-aṭṭhakathā |
логуд̇д̇арагусалаван̣н̣анаа
Lokuttarakusalavaṇṇanā
277. звам̣ бхавад̇д̇аяасамбад̇д̇иниб̣б̣ад̇д̇агам̣ гусалам̣ д̣̇ассзд̇ваа ид̣̇аани саб̣б̣абхавасамад̇иггаманааяа логуд̇д̇арагусалам̣ д̣̇ассзд̇ум̣ буна гад̇амз д̇хаммаа гусалаад̇иаад̣̇и аарад̣̇д̇хам̣. д̇ад̇т̇а логуд̇д̇аранд̇и гзнадтзна логуд̇д̇арам̣? логам̣ д̇арад̇ийд̇и, логуд̇д̇арам̣ логам̣ уд̇д̇арад̇ийд̇и логуд̇д̇арам̣; логам̣ самад̇иггамма абхибхуяяа д̇идтад̇ийд̇и логуд̇д̇арам̣ (бади. ма. 2.43). жхаанам̣ бхаавзд̇ийд̇и згажид̇д̇агкан̣игам̣ аббанаажхаанам̣ бхаавзд̇и ж̇анзд̇и вад̣дхзд̇и.
277. Evaṃ bhavattayasampattinibbattakaṃ kusalaṃ dassetvā idāni sabbabhavasamatikkamanāya lokuttarakusalaṃ dassetuṃ puna katame dhammā kusalātiādi āraddhaṃ. Tattha lokuttaranti kenaṭṭhena lokuttaraṃ? Lokaṃ taratīti, lokuttaraṃ lokaṃ uttaratīti lokuttaraṃ; lokaṃ samatikkamma abhibhuyya tiṭṭhatīti lokuttaraṃ (paṭi. ma. 2.43). Jhānaṃ bhāvetīti ekacittakkhaṇikaṃ appanājhānaṃ bhāveti janeti vaḍḍheti.
логад̇о нияяаад̇и ваддад̇о нияяаад̇ийд̇и нияяаанигам̣. нияяаад̇и ваа зд̇знаад̇и нияяаанигам̣. д̇ам̣саман̇г̇ий хи буг̇г̇ало д̣̇угкам̣ бариж̇аананд̇о нияяаад̇и, самуд̣̇аяам̣ баж̇аханд̇о нияяаад̇и, нирод̇хам̣ сажчигаронд̇о нияяаад̇и, маг̇г̇ам̣ бхаавзнд̇о нияяаад̇и. яат̇аа жа бана д̇збхуумагагусалам̣ ваддасмим̣ жуд̇ибадисанд̇хияо аажинаад̇и вад̣дхзд̇ийд̇и аажаяаг̇аамий наама ход̇и, на д̇ат̇аа ид̣̇ам̣. ид̣̇ам̣ бана яат̇аа згасмим̣ бурисз адтаарасахад̇т̇ам̣ баагаарам̣ жинанд̇з абаро махаамуг̇г̇арам̣ г̇ахзд̇ваа д̇зна жид̇ажид̇адтаанам̣ абажинанд̇о вид̣̇д̇хам̣сзнд̇о зва г̇ажчзяяа, звамзва д̇збхуумагагусалзна жид̇аа жуд̇ибадисанд̇хияо бажжаяавзгаллагаран̣зна абажинанд̇ам̣ вид̣̇д̇хам̣сзнд̇ам̣ г̇ажчад̇ийд̇и абажаяаг̇аами.
Lokato niyyāti vaṭṭato niyyātīti niyyānikaṃ. Niyyāti vā etenāti niyyānikaṃ. Taṃsamaṅgī hi puggalo dukkhaṃ parijānanto niyyāti, samudayaṃ pajahanto niyyāti, nirodhaṃ sacchikaronto niyyāti, maggaṃ bhāvento niyyāti. Yathā ca pana tebhūmakakusalaṃ vaṭṭasmiṃ cutipaṭisandhiyo ācināti vaḍḍhetīti ācayagāmī nāma hoti, na tathā idaṃ. Idaṃ pana yathā ekasmiṃ purise aṭṭhārasahatthaṃ pākāraṃ cinante aparo mahāmuggaraṃ gahetvā tena citacitaṭṭhānaṃ apacinanto viddhaṃsento eva gaccheyya, evameva tebhūmakakusalena citā cutipaṭisandhiyo paccayavekallakaraṇena apacinantaṃ viddhaṃsentaṃ gacchatīti apacayagāmi.
д̣̇идтиг̇ад̇аанам̣ бахаанааяаад̇и, зд̇т̇а д̣̇идтияо зва д̣̇идтиг̇ад̇аани, г̇уут̇аг̇ад̇ам̣ муд̇д̇аг̇ад̇анд̇иаад̣̇ийни (а. ни. 9.11) вияа. д̣̇ваасадтияаа ваа д̣̇идтийнам̣ анд̇ог̇ад̇хад̇д̇аа д̣̇идтийсу г̇ад̇аанийд̇иби д̣̇идтиг̇ад̇аани. д̣̇идтияаа ваа г̇ад̇ам̣ зд̇зсанд̇иби д̣̇идтиг̇ад̇аани. д̣̇идтисад̣̇исаг̇аманаани д̣̇идтисад̣̇исаббавад̇д̇аанийд̇и ад̇т̇о. гаани бана д̇аанийд̇и? сасамбаяуд̇д̇аани саггааяад̣̇идтивижигижчаасийлаб̣б̣ад̇абараамаасаабааяаг̇аманийяарааг̇ад̣̇осамохаагусалаани. д̇аани хи яаава батамамаг̇г̇абхааванаа д̇аава бавад̇д̇исаб̣бхаавад̇о д̣̇идтисад̣̇исаг̇аманаанийд̇и вужжанд̇и. ид̇и д̣̇идтияо жа д̣̇идтиг̇ад̇аани жа д̣̇идтиг̇ад̇аани. д̇зсам̣ д̣̇идтиг̇ад̇аанам̣. бахаанааяаад̇и самужчзд̣̇авасзнзва баж̇аханад̇т̇ааяа. батамааяаад̇и г̇ан̣анавасзнаби батамуббад̇д̇ивасзнаби батамааяа. бхуумияаад̇и ‘‘ананд̇арахид̇ааяа бхуумияаа’’д̇иаад̣̇ийсу (баараа. 27; ма. ни. 2.296) д̇аава аяам̣ махаабат̇авий бхуумийд̇и вужжад̇и. ‘‘сукабхуумияам̣ гаамааважарз’’д̇иаад̣̇ийсу (д̇ха. са. 988) жид̇д̇уббаад̣̇о. ид̇ха бана сааман̃н̃апалам̣ ад̇хиббзд̇ам̣. д̇ан̃хи самбаяуд̇д̇аанам̣ ниссаяабхаавад̇о д̇з д̇хаммаа бхаванд̇и зд̇т̇аад̇и бхууми. яасмаа ваа самаанзби логуд̇д̇арабхаавз саяамби бхавад̇и уббаж̇ж̇ад̇и, на ниб̣б̣аанам̣ вияа абаад̇убхаавам̣, д̇асмааби бхуумийд̇и вужжад̇и; д̇ассаа батамааяа бхуумияаа. бад̇д̇ияаад̇и сод̇аабад̇д̇ипаласан̇каад̇асса батамасса сааман̃н̃апаласса бад̇д̇ад̇т̇ааяа бадилаабхад̇т̇ааяаад̇и звамзд̇т̇а ад̇т̇о взд̣̇ид̇аб̣б̣о. вивижжаад̇и самужчзд̣̇авивзгавасзна вивижжид̇ваа, винаа худ̇ваа.
Diṭṭhigatānaṃ pahānāyāti, ettha diṭṭhiyo eva diṭṭhigatāni, gūthagataṃ muttagatantiādīni (a. ni. 9.11) viya. Dvāsaṭṭhiyā vā diṭṭhīnaṃ antogadhattā diṭṭhīsu gatānītipi diṭṭhigatāni. Diṭṭhiyā vā gataṃ etesantipi diṭṭhigatāni. Diṭṭhisadisagamanāni diṭṭhisadisappavattānīti attho. Kāni pana tānīti? Sasampayuttāni sakkāyadiṭṭhivicikicchāsīlabbataparāmāsaapāyagamanīyarāgadosamohākusalāni. Tāni hi yāva paṭhamamaggabhāvanā tāva pavattisabbhāvato diṭṭhisadisagamanānīti vuccanti. Iti diṭṭhiyo ca diṭṭhigatāni ca diṭṭhigatāni. Tesaṃ diṭṭhigatānaṃ. Pahānāyāti samucchedavaseneva pajahanatthāya. Paṭhamāyāti gaṇanavasenapi paṭhamuppattivasenapi paṭhamāya. Bhūmiyāti ‘‘anantarahitāya bhūmiyā’’tiādīsu (pārā. 27; ma. ni. 2.296) tāva ayaṃ mahāpathavī bhūmīti vuccati. ‘‘Sukhabhūmiyaṃ kāmāvacare’’tiādīsu (dha. sa. 988) cittuppādo. Idha pana sāmaññaphalaṃ adhippetaṃ. Tañhi sampayuttānaṃ nissayabhāvato te dhammā bhavanti etthāti bhūmi. Yasmā vā samānepi lokuttarabhāve sayampi bhavati uppajjati, na nibbānaṃ viya apātubhāvaṃ, tasmāpi bhūmīti vuccati; tassā paṭhamāya bhūmiyā. Pattiyāti sotāpattiphalasaṅkhātassa paṭhamassa sāmaññaphalassa pattatthāya paṭilābhatthāyāti evamettha attho veditabbo. Viviccāti samucchedavivekavasena viviccitvā, vinā hutvā.
ид̣̇аани гин̃жааби логияаж̇жхаанамби на винаа бадибад̣̇ааяа иж̇жхад̇и, звам̣ санд̇зби ид̇ха суд̣̇д̇хиганаяам̣ бахааяа логуд̇д̇араж̇жхаанам̣ бадибад̣̇ааяа сад̣̇д̇хим̣язва г̇арум̣ гад̇ваа д̣̇зсзд̇угаамад̇ааяа д̣̇угкабадибад̣̇ам̣ д̣̇анд̇хаабхин̃н̃анд̇иаад̣̇имааха.
Idāni kiñcāpi lokiyajjhānampi na vinā paṭipadāya ijjhati, evaṃ santepi idha suddhikanayaṃ pahāya lokuttarajjhānaṃ paṭipadāya saddhiṃyeva garuṃ katvā desetukāmatāya dukkhapaṭipadaṃ dandhābhiññantiādimāha.
д̇ад̇т̇а яо аад̣̇ид̇ова гилзсз вигкамбхзнд̇о д̣̇угкзна сасан̇каарзна саббаяог̇зна гиламанд̇о вигкамбхзд̇и д̇асса д̣̇угкаа бадибад̣̇аа ход̇и; яо бана вигкамбхид̇а гилзсо вибассанаабариваасам̣ васанд̇о жирзна маг̇г̇абаад̇убхаавам̣ баабун̣аад̇и д̇асса д̣̇анд̇хаабхин̃н̃аа ход̇и. ид̇и яо гожи вааро д̣̇угкабадибад̣̇ад̣̇анд̇хаабхин̃н̃о наама гад̇о.
Tattha yo āditova kilese vikkhambhento dukkhena sasaṅkhārena sappayogena kilamanto vikkhambheti tassa dukkhā paṭipadā hoti; yo pana vikkhambhita kileso vipassanāparivāsaṃ vasanto cirena maggapātubhāvaṃ pāpuṇāti tassa dandhābhiññā hoti. Iti yo koci vāro dukkhapaṭipadadandhābhiñño nāma kato.
гад̇амам̣ бана ваарам̣ рожзсунд̇и? яад̇т̇а сагим̣ вигкамбхид̇аа гилзсаа самуд̣̇аажарид̇ваа д̣̇уд̇ияамби вигкамбхид̇аа буна самуд̣̇аажаранд̇и, д̇ад̇ияам̣ вигкамбхид̇з бана д̇ат̇аавигкамбхид̇зва гад̇ваа маг̇г̇зна самуг̇гхаад̇ам̣ баабзд̇и, имам̣ ваарам̣ рожзсум̣. имасса ваарасса д̣̇угкаабадибад̣̇аа д̣̇анд̇хаабхин̃н̃аад̇и наамам̣ гад̇ам̣. зд̇д̇агзна бана на баагадам̣ ход̇и. д̇асмаа звамзд̇т̇а аад̣̇ид̇о бадтааяа вибхааванаа взд̣̇ид̇аб̣б̣аа – яо хи жад̇д̇аари махаабхууд̇аани бариг̇г̇ахзд̇ваа убаад̣̇ааруубам̣ бариг̇г̇ан̣хаад̇и, аруубам̣ бариг̇г̇ан̣хаад̇и, ‘руубааруубам̣’ бана бариг̇г̇ан̣ханд̇о д̣̇угкзна гасирзна гиламанд̇о бариг̇г̇ахзд̇ум̣ саггод̇и, д̇асса д̣̇угкаа бадибад̣̇аа наама ход̇и. бариг̇г̇ахид̇аруубааруубасса бана вибассанаабариваасз маг̇г̇абаад̇убхаавад̣̇анд̇хад̇ааяа д̣̇анд̇хаабхин̃н̃аа наама ход̇и.
Katamaṃ pana vāraṃ rocesunti? Yattha sakiṃ vikkhambhitā kilesā samudācaritvā dutiyampi vikkhambhitā puna samudācaranti, tatiyaṃ vikkhambhite pana tathāvikkhambhiteva katvā maggena samugghātaṃ pāpeti, imaṃ vāraṃ rocesuṃ. Imassa vārassa dukkhāpaṭipadā dandhābhiññāti nāmaṃ kataṃ. Ettakena pana na pākaṭaṃ hoti. Tasmā evamettha ādito paṭṭhāya vibhāvanā veditabbā – yo hi cattāri mahābhūtāni pariggahetvā upādārūpaṃ pariggaṇhāti, arūpaṃ pariggaṇhāti, ‘rūpārūpaṃ’ pana pariggaṇhanto dukkhena kasirena kilamanto pariggahetuṃ sakkoti, tassa dukkhā paṭipadā nāma hoti. Pariggahitarūpārūpassa pana vipassanāparivāse maggapātubhāvadandhatāya dandhābhiññā nāma hoti.
яоби руубааруубам̣ бариг̇г̇ахзд̇ваа ‘наамаруубам̣’ вавад̇т̇абзнд̇о д̣̇угкзна гасирзна гиламанд̇о вавад̇т̇абзд̇и, вавад̇т̇аабид̇з жа наамаруубз вибассанаабариваасам̣ васанд̇о жирзна маг̇г̇ам̣ уббаад̣̇зд̇ум̣ саггод̇и, д̇ассааби д̣̇угкаа бадибад̣̇аа д̣̇анд̇хаабхин̃н̃аа наама ход̇и.
Yopi rūpārūpaṃ pariggahetvā ‘nāmarūpaṃ’ vavatthapento dukkhena kasirena kilamanto vavatthapeti, vavatthāpite ca nāmarūpe vipassanāparivāsaṃ vasanto cirena maggaṃ uppādetuṃ sakkoti, tassāpi dukkhā paṭipadā dandhābhiññā nāma hoti.
абаро наамаруубамби вавад̇т̇абзд̇ваа ‘бажжаяз’ бариг̇г̇ан̣ханд̇о д̣̇угкзна гасирзна гиламанд̇о бариг̇г̇ан̣хаад̇и, бажжаяз жа бариг̇г̇ахзд̇ваа вибассанаабариваасам̣ васанд̇о жирзна маг̇г̇ам̣ уббаад̣̇зд̇и, звамби д̣̇угкаа бадибад̣̇аа д̣̇анд̇хаабхин̃н̃аа наама ход̇и.
Aparo nāmarūpampi vavatthapetvā ‘paccaye’ pariggaṇhanto dukkhena kasirena kilamanto pariggaṇhāti, paccaye ca pariggahetvā vipassanāparivāsaṃ vasanto cirena maggaṃ uppādeti, evampi dukkhā paṭipadā dandhābhiññā nāma hoti.
абаро бажжаязби бариг̇г̇ахзд̇ваа ‘лагкан̣аани’ бадивиж̇жханд̇о д̣̇угкзна гасирзна гиламанд̇о бадивиж̇жхад̇и, бадивид̣̇д̇халагкан̣о жа вибассанаабариваасам̣ васанд̇о жирзна маг̇г̇ам̣ уббаад̣̇зд̇и, звамби д̣̇угкаа бадибад̣̇аа д̣̇анд̇хаабхин̃н̃аа наама ход̇и.
Aparo paccayepi pariggahetvā ‘lakkhaṇāni’ paṭivijjhanto dukkhena kasirena kilamanto paṭivijjhati, paṭividdhalakkhaṇo ca vipassanāparivāsaṃ vasanto cirena maggaṃ uppādeti, evampi dukkhā paṭipadā dandhābhiññā nāma hoti.
абаро лагкан̣ааниби бадивиж̇жхид̇ваа вибассанаан̃аан̣з д̇игкз суурз басаннз ваханд̇з уббаннам̣ ‘вибассанааниганд̇им̣’ барияаад̣̇ияамаано д̣̇угкзна гасирзна гиламанд̇о барияаад̣̇ияад̇и, ниганд̇ин̃жа барияаад̣̇ияид̇ваа вибассанаабариваасам̣ васанд̇о жирзна маг̇г̇ам̣ уббаад̣̇зд̇и, звамби д̣̇угкаа бадибад̣̇аа д̣̇анд̇хаабхин̃н̃аа наама ход̇и. имам̣ ваарам̣ рожзсум̣. имасса ваарасса зд̇ам̣ наамам̣ гад̇ам̣. иминаава убааязна барад̇о д̇иссо бадибад̣̇аа взд̣̇ид̇аб̣б̣аа.
Aparo lakkhaṇānipi paṭivijjhitvā vipassanāñāṇe tikkhe sūre pasanne vahante uppannaṃ ‘vipassanānikantiṃ’ pariyādiyamāno dukkhena kasirena kilamanto pariyādiyati, nikantiñca pariyādiyitvā vipassanāparivāsaṃ vasanto cirena maggaṃ uppādeti, evampi dukkhā paṭipadā dandhābhiññā nāma hoti. Imaṃ vāraṃ rocesuṃ. Imassa vārassa etaṃ nāmaṃ kataṃ. Imināva upāyena parato tisso paṭipadā veditabbā.
пассо ход̇ийд̇иаад̣̇ийсу анан̃н̃аад̇ан̃н̃ассаамийд̇инд̣̇рияам̣, саммааваажаа, саммаагамманд̇о, саммааааж̇ийвод̇и жад̇д̇аари бад̣̇аани ад̇хигаани. нид̣̇д̣̇зсаваарз жа вид̇аггаад̣̇инид̣̇д̣̇зсзсу ‘маг̇г̇ан̇г̇а’нд̇иаад̣̇ийни бад̣̇аани ад̇хигаани. сзсам̣ саб̣б̣ам̣ хздтаа вуд̇д̇асад̣̇исамзва. бхууманд̇аравасзна бана логуд̇д̇арад̇аава ид̇ха висзсо.
Phasso hotītiādīsu anaññātaññassāmītindriyaṃ, sammāvācā, sammākammanto, sammāājīvoti cattāri padāni adhikāni. Niddesavāre ca vitakkādiniddesesu ‘maggaṅga’ntiādīni padāni adhikāni. Sesaṃ sabbaṃ heṭṭhā vuttasadisameva. Bhūmantaravasena pana lokuttaratāva idha viseso.
д̇ад̇т̇а анан̃н̃аад̇ан̃н̃ассаамийд̇инд̣̇рияанд̇и ‘анамад̇аг̇г̇з сам̣саараваддз анан̃н̃аад̇ам̣ амад̇ам̣ бад̣̇ам̣ жад̇усажжад̇хаммамзва ваа ж̇ааниссаамий’д̇и бадибаннасса иминаа буб̣б̣аабхог̇зна уббаннам̣ инд̣̇рияам̣. лагкан̣аад̣̇ийни банасса хздтаа бан̃н̃инд̣̇рияз вуд̇д̇анаязнзва взд̣̇ид̇аб̣б̣аани.
Tattha anaññātaññassāmītindriyanti ‘anamatagge saṃsāravaṭṭe anaññātaṃ amataṃ padaṃ catusaccadhammameva vā jānissāmī’ti paṭipannassa iminā pubbābhogena uppannaṃ indriyaṃ. Lakkhaṇādīni panassa heṭṭhā paññindriye vuttanayeneva veditabbāni.
сунд̣̇араа басад̇т̇аа ваа ваажаа саммааваажаа. важийд̣̇ужжарид̇асамуг̇гхаадигааяа мижчааваажаавирад̇ияаа зд̇ам̣ ад̇хиважанам̣. саа бариг̇г̇ахалагкан̣аа вираман̣арасаа мижчааваажаббахаанабажжубадтаанаа. сунд̣̇аро басад̇т̇о ваа гамманд̇о саммаагамманд̇о. мижчаагамманд̇асамужчзд̣̇игааяа баан̣аад̇ибаад̇аад̣̇ивирад̇ияаа зд̇ам̣ наамам̣. со самудтааналагкан̣о вираман̣арасо мижчаагамманд̇аббахаанабажжубадтаано. сунд̣̇аро басад̇т̇о ваа ааж̇ийво саммааааж̇ийво. мижчааж̇ийвавирад̇ияаа зд̇ам̣ ад̇хиважанам̣. со вод̣̇ааналагкан̣о н̃ааяааж̇ийваббавад̇д̇ирасо мижчааж̇ийваббахаанабажжубадтаано.
Sundarā pasatthā vā vācā sammāvācā. Vacīduccaritasamugghāṭikāya micchāvācāviratiyā etaṃ adhivacanaṃ. Sā pariggahalakkhaṇā viramaṇarasā micchāvācappahānapaccupaṭṭhānā. Sundaro pasattho vā kammanto sammākammanto. Micchākammantasamucchedikāya pāṇātipātādiviratiyā etaṃ nāmaṃ. So samuṭṭhānalakkhaṇo viramaṇaraso micchākammantappahānapaccupaṭṭhāno. Sundaro pasattho vā ājīvo sammāājīvo. Micchājīvaviratiyā etaṃ adhivacanaṃ. So vodānalakkhaṇo ñāyājīvappavattiraso micchājīvappahānapaccupaṭṭhāno.
абижа хздтаа вирад̇ид̇д̇аяз вуд̇д̇авасзнабзд̇т̇а лагкан̣аад̣̇ийни взд̣̇ид̇аб̣б̣аани. ид̇и имзсам̣ д̇ин̣н̣ам̣ д̇хаммаанам̣ васзна хздтаа вуд̇д̇ам̣ маг̇г̇абан̃жагам̣ ид̇ха маг̇г̇адтагам̣ взд̣̇ид̇аб̣б̣ам̣. язваабанагзсу жа имзсам̣ абхааво. д̇ат̇аа гарун̣аамуд̣̇ид̇аанам̣. имз хи д̇аяо д̇хаммаа ид̇ха баал̣ияам̣ ааг̇ад̇ад̇д̇аава язваабанагзсу на г̇ахид̇аа. гарун̣аамуд̣̇ид̇аа бана сад̇д̇аарамман̣аа, имз д̇хаммаа ниб̣б̣аанаарамман̣аад̇и д̇аабзд̇т̇а на г̇ахид̇аа. аяам̣ д̇аава уд̣̇д̣̇зсаваарз висзсад̇т̇о.
Apica heṭṭhā viratittaye vuttavasenapettha lakkhaṇādīni veditabbāni. Iti imesaṃ tiṇṇaṃ dhammānaṃ vasena heṭṭhā vuttaṃ maggapañcakaṃ idha maggaṭṭhakaṃ veditabbaṃ. Yevāpanakesu ca imesaṃ abhāvo. Tathā karuṇāmuditānaṃ. Ime hi tayo dhammā idha pāḷiyaṃ āgatattāva yevāpanakesu na gahitā. Karuṇāmuditā pana sattārammaṇā, ime dhammā nibbānārammaṇāti tāpettha na gahitā. Ayaṃ tāva uddesavāre visesattho.
283. нид̣̇д̣̇зсаваарз бана маг̇г̇ан̇г̇ам̣ маг̇г̇абарияаабаннанд̇и зд̇т̇а д̇аава маг̇г̇асса ан̇г̇анд̇и маг̇г̇ан̇г̇ам̣; маг̇г̇агодтаасод̇и ад̇т̇о. яат̇аа бана аран̃н̃з барияаабаннам̣ аран̃н̃абарияаабаннам̣ наама ход̇и, звам̣ маг̇г̇з барияаабаннанд̇и маг̇г̇абарияаабаннам̣. маг̇г̇асанниссид̇анд̇и ад̇т̇о.
283. Niddesavāre pana maggaṅgaṃ maggapariyāpannanti ettha tāva maggassa aṅganti maggaṅgaṃ; maggakoṭṭhāsoti attho. Yathā pana araññe pariyāpannaṃ araññapariyāpannaṃ nāma hoti, evaṃ magge pariyāpannanti maggapariyāpannaṃ. Maggasannissitanti attho.
285. бийд̇исамб̣ож̇жхан̇г̇од̇и зд̇т̇а бийд̇и зва самб̣ож̇жхан̇г̇од̇и бийд̇исамб̣ож̇жхан̇г̇о. д̇ад̇т̇а б̣од̇хияаа б̣од̇хисса ваа ан̇г̇од̇и б̣ож̇жхан̇г̇о. ид̣̇ам̣ вуд̇д̇ам̣ ход̇и – яаа аяам̣ д̇хаммасаамаг̇г̇ий яааяа логуд̇д̇арамаг̇г̇агкан̣з уббаж̇ж̇амаанааяа лийнуд̣̇д̇хажжабад̇идтаанааяууханагаамасукад̇д̇агиламат̇аануяог̇аужчзд̣̇асассад̇аабхинивзсаад̣̇ийнам̣ анзгзсам̣ убад̣̇д̣̇аваанам̣ бадибагкабхууд̇ааяа сад̇ид̇хаммавижаяавийрияабийд̇ибассад̣̇д̇хисамаад̇хиубзгкаасан̇каад̇ааяа д̇хаммасаамаг̇г̇ияаа арияасааваго б̣уж̇жхад̇ийд̇и гад̇ваа б̣од̇хийд̇и вужжад̇и. б̣уж̇жхад̇ийд̇и гилзсасанд̇аананид̣̇д̣̇ааяа удтахад̇и, жад̇д̇аари ваа арияасажжаани бадивиж̇жхад̇и, ниб̣б̣аанамзва ваа сажчигарод̇и. д̇ассаа д̇хаммасаамаг̇г̇ийсан̇каад̇ааяа б̣од̇хияаа ан̇г̇од̇иби б̣ож̇жхан̇г̇о, жхаанан̇г̇амаг̇г̇ан̇г̇аад̣̇ийни вияа. яобзса яат̇аавуд̇д̇аббагаарааяа зд̇ааяа д̇хаммасаамаг̇г̇ияаа б̣уж̇жхад̇ийд̇и гад̇ваа арияасааваго б̣од̇хийд̇и вужжад̇и, д̇асса б̣од̇хисса ан̇г̇од̇иби б̣ож̇жхан̇г̇о; сзнан̇г̇арат̇ан̇г̇аад̣̇аяо вияа. д̇знааху адтагат̇аажарияаа – ‘‘б̣уж̇жханагасса буг̇г̇аласса ан̇г̇аад̇и ваа б̣ож̇жхан̇г̇аа’’д̇и (вибха. адта. 466; сам̣. ни. адта. 3.5.182).
285. Pītisambojjhaṅgoti ettha pīti eva sambojjhaṅgoti pītisambojjhaṅgo. Tattha bodhiyā bodhissa vā aṅgoti bojjhaṅgo. Idaṃ vuttaṃ hoti – yā ayaṃ dhammasāmaggī yāya lokuttaramaggakkhaṇe uppajjamānāya līnuddhaccapatiṭṭhānāyūhanakāmasukhattakilamathānuyogaucchedasassatābhinivesādīnaṃ anekesaṃ upaddavānaṃ paṭipakkhabhūtāya satidhammavicayavīriyapītipassaddhisamādhiupekkhāsaṅkhātāya dhammasāmaggiyā ariyasāvako bujjhatīti katvā bodhīti vuccati. Bujjhatīti kilesasantānaniddāya uṭṭhahati, cattāri vā ariyasaccāni paṭivijjhati, nibbānameva vā sacchikaroti. Tassā dhammasāmaggīsaṅkhātāya bodhiyā aṅgotipi bojjhaṅgo, jhānaṅgamaggaṅgādīni viya. Yopesa yathāvuttappakārāya etāya dhammasāmaggiyā bujjhatīti katvā ariyasāvako bodhīti vuccati, tassa bodhissa aṅgotipi bojjhaṅgo; senaṅgarathaṅgādayo viya. Tenāhu aṭṭhakathācariyā – ‘‘bujjhanakassa puggalassa aṅgāti vā bojjhaṅgā’’ti (vibha. aṭṭha. 466; saṃ. ni. aṭṭha. 3.5.182).
абижа ‘‘б̣ож̇жхан̇г̇аад̇и гзнадтзна б̣ож̇жхан̇г̇аа? б̣од̇хааяа сам̣вад̇д̇анд̇ийд̇и б̣ож̇жхан̇г̇аа, б̣уж̇жханд̇ийд̇и б̣ож̇жхан̇г̇аа, ануб̣уж̇жханд̇ийд̇и б̣ож̇жхан̇г̇аа, бадиб̣уж̇жханд̇ийд̇и б̣ож̇жхан̇г̇аа, самб̣уж̇жханд̇ийд̇и б̣ож̇жхан̇г̇аа’’д̇и (бади. ма. 2.17) иминаа бадисамбхид̣̇аанаязнааби б̣ож̇жхан̇г̇ад̇т̇о взд̣̇ид̇аб̣б̣о. басад̇т̇о сунд̣̇аро ваа б̣ож̇жхан̇г̇од̇и самб̣ож̇жхан̇г̇о. звам̣ бийд̇и зва самб̣ож̇жхан̇г̇о бийд̇исамб̣ож̇жхан̇г̇од̇и. жид̇д̇згаг̇г̇ад̇аанид̣̇д̣̇зсаад̣̇ийсуби иминаава наязна ад̇т̇о взд̣̇ид̇аб̣б̣о.
Apica ‘‘bojjhaṅgāti kenaṭṭhena bojjhaṅgā? Bodhāya saṃvattantīti bojjhaṅgā, bujjhantīti bojjhaṅgā, anubujjhantīti bojjhaṅgā, paṭibujjhantīti bojjhaṅgā, sambujjhantīti bojjhaṅgā’’ti (paṭi. ma. 2.17) iminā paṭisambhidānayenāpi bojjhaṅgattho veditabbo. Pasattho sundaro vā bojjhaṅgoti sambojjhaṅgo. Evaṃ pīti eva sambojjhaṅgo pītisambojjhaṅgoti. Cittekaggatāniddesādīsupi imināva nayena attho veditabbo.
296. д̇зсам̣ д̇хаммаананд̇и яз д̇асмим̣ самаяз бадивзд̇хам̣ г̇ажчанд̇и жад̇усажжад̇хаммаа, д̇зсам̣ д̇хаммаанам̣. анан̃н̃аад̇аананд̇и гин̃жааби батамамаг̇г̇зна д̇з д̇хаммаа н̃аад̇аа наама хонд̇и, яат̇аа бана багад̇ияаа анааг̇ад̇абуб̣б̣ам̣ вихаарам̣ ааг̇анд̇ваа вихаарамаж̇жхз тид̇оби буг̇г̇ало багад̇ияаа анааг̇ад̇абхаавам̣ убаад̣̇ааяа ‘анааг̇ад̇абуб̣б̣ам̣ таанам̣ ааг̇ад̇омхий’д̇и вад̣̇ад̇и, яат̇аа жа багад̇ияаа абил̣анд̇хабуб̣б̣ам̣ маалам̣ бил̣анд̇хид̇ваа, анивад̇т̇абуб̣б̣ам̣ вад̇т̇ам̣ ниваасзд̇ваа, абхуд̇д̇абуб̣б̣ам̣ бхож̇анам̣ бхун̃ж̇ид̇ваа, багад̇ияаа абхуд̇д̇абхаавам̣ убаад̣̇ааяа абхуд̇д̇абуб̣б̣ам̣ бхож̇анам̣ бхуд̇д̇омхийд̇и вад̣̇ад̇и, звамид̇хааби яасмаа багад̇ияаа иминаа буг̇г̇алзна имз д̇хаммаа на н̃аад̇абуб̣б̣аа д̇асмаа анан̃н̃аад̇аананд̇и вуд̇д̇ам̣. ад̣̇идтаад̣̇ийсуби зсзва наяо. д̇ад̇т̇а ад̣̇идтаананд̇и ид̇о буб̣б̣з бан̃н̃аажагкунаа ад̣̇идтаанам̣. аббад̇д̇аананд̇и ад̇хиг̇аманавасзна аббад̇д̇аанам̣. авид̣̇ид̇аананд̇и н̃аан̣зна абаагадагад̇аанам̣. асажчигад̇аананд̇и абажжагкагад̇аанам̣. сажчигирияааяаад̇и бажжагкагаран̣ад̇т̇ам̣. яат̇аа жа иминаа бад̣̇зна, звам̣ сзсзхиби сад̣̇д̇хим̣ анан̃н̃аад̇аанам̣ н̃аан̣ааяа, ад̣̇идтаанам̣ д̣̇ассанааяа, аббад̇д̇аанам̣ бад̇д̇ияаа, авид̣̇ид̇аанам̣ взд̣̇ааяаад̇и яож̇анаа гаад̇аб̣б̣аа.
296. Tesaṃ dhammānanti ye tasmiṃ samaye paṭivedhaṃ gacchanti catusaccadhammā, tesaṃ dhammānaṃ. Anaññātānanti kiñcāpi paṭhamamaggena te dhammā ñātā nāma honti, yathā pana pakatiyā anāgatapubbaṃ vihāraṃ āgantvā vihāramajjhe ṭhitopi puggalo pakatiyā anāgatabhāvaṃ upādāya ‘anāgatapubbaṃ ṭhānaṃ āgatomhī’ti vadati, yathā ca pakatiyā apiḷandhapubbaṃ mālaṃ piḷandhitvā, anivatthapubbaṃ vatthaṃ nivāsetvā, abhuttapubbaṃ bhojanaṃ bhuñjitvā, pakatiyā abhuttabhāvaṃ upādāya abhuttapubbaṃ bhojanaṃ bhuttomhīti vadati, evamidhāpi yasmā pakatiyā iminā puggalena ime dhammā na ñātapubbā tasmā anaññātānanti vuttaṃ. Adiṭṭhādīsupi eseva nayo. Tattha adiṭṭhānanti ito pubbe paññācakkhunā adiṭṭhānaṃ. Appattānanti adhigamanavasena appattānaṃ. Aviditānanti ñāṇena apākaṭakatānaṃ. Asacchikatānanti apaccakkhakatānaṃ. Sacchikiriyāyāti paccakkhakaraṇatthaṃ. Yathā ca iminā padena, evaṃ sesehipi saddhiṃ anaññātānaṃ ñāṇāya, adiṭṭhānaṃ dassanāya, appattānaṃ pattiyā, aviditānaṃ vedāyāti yojanā kātabbā.
299. жад̇уухи важийд̣̇ужжарид̇зхийд̇иаад̣̇ийсу важийд̇и важийвин̃н̃ад̇д̇и взд̣̇ид̇аб̣б̣аа. д̇ин̣н̣ам̣ д̣̇осаанам̣ язна гзнажи д̣̇удтаани жарид̇аанийд̇и д̣̇ужжарид̇аани. важийд̇о бавад̇д̇аани д̣̇ужжарид̇аани важийд̣̇ужжарид̇аани, важияаа ваа нибпаад̣̇ид̇аани д̣̇ужжарид̇аани важийд̣̇ужжарид̇аани. д̇зхи важийд̣̇ужжарид̇зхи. аарагаа рамад̇ийд̇и аарад̇и. винаа д̇зхи рамад̇ийд̇и вирад̇и. д̇ад̇о д̇ад̇о бадинивад̇д̇аава худ̇ваа д̇зхи винаа рамад̇ийд̇и бадивирад̇и. убасаг̇г̇авасзна ваа бад̣̇ам̣ вад̣дхид̇ам̣. саб̣б̣амид̣̇ам̣ ораман̣абхаавассзваад̇хиважанам̣. взрам̣ ман̣ад̇и, винаасзд̇ийд̇и взраман̣ий. ид̣̇амби ораман̣ассзва взважанам̣. яааяа бана жзд̇анааяа мусааваад̣̇аад̣̇ийни бхаасамаано гарод̇и наама, аяам̣ логуд̇д̇арамаг̇г̇авирад̇и. уббаж̇ж̇ид̇ваа д̇ам̣ гирияам̣ гаад̇ум̣ на д̣̇зд̇и, гирияаабат̇ам̣ бажчинд̣̇ад̇ийд̇и агирияаа. д̇ат̇аа д̇ам̣ гаран̣ам̣ гаад̇ум̣ на д̣̇зд̇и, гаран̣абат̇ам̣ бажчинд̣̇ад̇ийд̇и агаран̣ам̣. яааяа жа жзд̇анааяа жад̇уб̣б̣ид̇хам̣ важийд̣̇ужжарид̇ам̣ бхаасамаано аж̇жхаабаж̇ж̇ад̇и наама, аяам̣ уббаж̇ж̇ид̇ваа д̇ат̇аа аж̇жхаабаж̇ж̇ид̇ум̣ на д̣̇зд̇ийд̇и анаж̇жхаабад̇д̇и.
299. Catūhi vacīduccaritehītiādīsu vacīti vacīviññatti veditabbā. Tiṇṇaṃ dosānaṃ yena kenaci duṭṭhāni caritānīti duccaritāni. Vacīto pavattāni duccaritāni vacīduccaritāni, vaciyā vā nipphāditāni duccaritāni vacīduccaritāni. Tehi vacīduccaritehi. Ārakā ramatīti ārati. Vinā tehi ramatīti virati. Tato tato paṭinivattāva hutvā tehi vinā ramatīti paṭivirati. Upasaggavasena vā padaṃ vaḍḍhitaṃ. Sabbamidaṃ oramaṇabhāvassevādhivacanaṃ. Veraṃ maṇati, vināsetīti veramaṇī. Idampi oramaṇasseva vevacanaṃ. Yāya pana cetanāya musāvādādīni bhāsamāno karoti nāma, ayaṃ lokuttaramaggavirati. Uppajjitvā taṃ kiriyaṃ kātuṃ na deti, kiriyāpathaṃ pacchindatīti akiriyā. Tathā taṃ karaṇaṃ kātuṃ na deti, karaṇapathaṃ pacchindatīti akaraṇaṃ. Yāya ca cetanāya catubbidhaṃ vacīduccaritaṃ bhāsamāno ajjhāpajjati nāma, ayaṃ uppajjitvā tathā ajjhāpajjituṃ na detīti anajjhāpatti.
взлааанад̇иггамод̇и зд̇т̇а ‘‘д̇ааяа взлааяаа’’д̇иаад̣̇ийсу (д̣̇ий. ни. 2.154; махаава. 1-3; уд̣̇аа. 1 аад̣̇аяо) д̇аава гаало взлаад̇и ааг̇ад̇о. ‘‘урувзлааяам̣ вихарад̇ий’’д̇и (махаава. 1; сам̣. ни. 1.137) зд̇т̇а рааси. ‘‘тид̇ад̇хаммо взлам̣ наад̇ивад̇д̇ад̇ий’’д̇и (жуул̣ава. 384; а. ни. 8.19; уд̣̇аа. 45) зд̇т̇а сиймаа. ид̇хааби сиймаава. анад̇иггаманийяадтзна хи жад̇д̇аари важийсужарид̇аани взлаад̇и ад̇хиббзд̇аани. ид̇и яааяа жзд̇анааяа жад̇д̇аари важийд̣̇ужжарид̇аани бхаасамаано взлам̣ ад̇иггамад̇и наама, аяам̣ уббаж̇ж̇ид̇ваа д̇ам̣ взлам̣ ад̇иггамид̇ум̣ на д̣̇зд̇ийд̇и взлааанад̇иггамод̇и вуд̇д̇аа. взлааяад̇ийд̇и ваа взлаа, жалаяад̇и вид̣̇д̇хам̣сзд̇ийд̇и ад̇т̇о. гим̣ взлааяад̇и? жад̇уб̣б̣ид̇хам̣ важийд̣̇ужжарид̇ам̣. ид̇и взлааяанад̇о ‘взлаа’. бурисасса бана хид̇асукам̣ анад̇иггамид̇ваа вад̇д̇ад̇ийд̇и ‘анад̇иггамо’. звамзд̇т̇а бад̣̇ад̣̇ваяавасзнааби ад̇т̇о взд̣̇ид̇аб̣б̣о.
Velāanatikkamoti ettha ‘‘tāya velāyā’’tiādīsu (dī. ni. 2.154; mahāva. 1-3; udā. 1 ādayo) tāva kālo velāti āgato. ‘‘Uruvelāyaṃ viharatī’’ti (mahāva. 1; saṃ. ni. 1.137) ettha rāsi. ‘‘Ṭhitadhammo velaṃ nātivattatī’’ti (cūḷava. 384; a. ni. 8.19; udā. 45) ettha sīmā. Idhāpi sīmāva. Anatikkamanīyaṭṭhena hi cattāri vacīsucaritāni velāti adhippetāni. Iti yāya cetanāya cattāri vacīduccaritāni bhāsamāno velaṃ atikkamati nāma, ayaṃ uppajjitvā taṃ velaṃ atikkamituṃ na detīti velāanatikkamoti vuttā. Velāyatīti vā velā, calayati viddhaṃsetīti attho. Kiṃ velāyati? Catubbidhaṃ vacīduccaritaṃ. Iti velāyanato ‘velā’. Purisassa pana hitasukhaṃ anatikkamitvā vattatīti ‘anatikkamo’. Evamettha padadvayavasenāpi attho veditabbo.
сзд̇ум̣ ханад̇ийд̇и сзд̇угхаад̇о; жад̇уннам̣ важийд̣̇ужжарид̇аанам̣ бад̣̇агхаад̇о бажжаяагхаад̇од̇и ад̇т̇о. бажжаяо хи ид̇ха сзд̇ууд̇и ад̇хиббзд̇о. д̇ад̇рааяам̣ важанад̇т̇о – рааг̇аад̣̇иго жад̇уннам̣ важийд̣̇ужжарид̇аанам̣ бажжаяо ваддасмим̣ буг̇г̇алам̣ синод̇и б̣анд̇хад̇ийд̇и сзд̇у. сзд̇усса гхаад̇о сзд̇угхаад̇о. важийд̣̇ужжарид̇абажжаяасамуг̇гхаадигааяа вирад̇ияаа зд̇ам̣ ад̇хиважанам̣. аяам̣ бана саммааваажаасан̇каад̇аа вирад̇и буб̣б̣абхааг̇з наанаажид̇д̇зсу лаб̣бхад̇и. ан̃н̃знзва хи жид̇д̇зна мусааваад̣̇аа вирамад̇и, ан̃н̃зна бзсун̃н̃аад̣̇ийхи. логуд̇д̇арамаг̇г̇агкан̣з бана згажид̇д̇асмим̣язва лаб̣бхад̇и. жад̇уб̣б̣ид̇хааяа хи важийд̣̇ужжарид̇ажзд̇анааяа бад̣̇абажчзд̣̇ам̣ гурумаанаа маг̇г̇ан̇г̇ам̣ буураяамаанаа згаава вирад̇и уббаж̇ж̇ад̇и.
Setuṃ hanatīti setughāto; catunnaṃ vacīduccaritānaṃ padaghāto paccayaghātoti attho. Paccayo hi idha setūti adhippeto. Tatrāyaṃ vacanattho – rāgādiko catunnaṃ vacīduccaritānaṃ paccayo vaṭṭasmiṃ puggalaṃ sinoti bandhatīti setu. Setussa ghāto setughāto. Vacīduccaritapaccayasamugghāṭikāya viratiyā etaṃ adhivacanaṃ. Ayaṃ pana sammāvācāsaṅkhātā virati pubbabhāge nānācittesu labbhati. Aññeneva hi cittena musāvādā viramati, aññena pesuññādīhi. Lokuttaramaggakkhaṇe pana ekacittasmiṃyeva labbhati. Catubbidhāya hi vacīduccaritacetanāya padapacchedaṃ kurumānā maggaṅgaṃ pūrayamānā ekāva virati uppajjati.
300. гааяад̣̇ужжарид̇зхийд̇и гааяад̇о бавад̇д̇зхи гааязна ваа нибпаад̣̇ид̇зхи баан̣аад̇ибаад̇аад̣̇ийхи д̣̇ужжарид̇зхи. сзсам̣ буриманаязнзва взд̣̇ид̇аб̣б̣ам̣. аяамби саммаагамманд̇асан̇каад̇аа вирад̇и буб̣б̣абхааг̇з наанаажид̇д̇зсу лаб̣бхад̇и. ан̃н̃знзва хи жид̇д̇зна баан̣аад̇ибаад̇аа вирамад̇и, ан̃н̃зна ад̣̇иннаад̣̇аанамижчаажаарзхи. логуд̇д̇арамаг̇г̇агкан̣з бана згажид̇д̇асмим̣язва лаб̣бхад̇и. д̇ивид̇хааяа хи гааяад̣̇ужжарид̇ажзд̇анааяа бад̣̇абажчзд̣̇ам̣ гурумаанаа маг̇г̇ан̇г̇ам̣ буураяамаанаа згаава вирад̇и уббаж̇ж̇ад̇и.
300. Kāyaduccaritehīti kāyato pavattehi kāyena vā nipphāditehi pāṇātipātādīhi duccaritehi. Sesaṃ purimanayeneva veditabbaṃ. Ayampi sammākammantasaṅkhātā virati pubbabhāge nānācittesu labbhati. Aññeneva hi cittena pāṇātipātā viramati, aññena adinnādānamicchācārehi. Lokuttaramaggakkhaṇe pana ekacittasmiṃyeva labbhati. Tividhāya hi kāyaduccaritacetanāya padapacchedaṃ kurumānā maggaṅgaṃ pūrayamānā ekāva virati uppajjati.
301. саммааааж̇ийванид̣̇д̣̇зсз агирияаад̇иаад̣̇ийсу яааяа жзд̇анааяа мижчааж̇ийвам̣ ааж̇ийвамаано гирияам̣ гарод̇и наама, аяам̣ уббаж̇ж̇ид̇ваа д̇ам̣ гирияам̣ гаад̇ум̣ на д̣̇зд̇ийд̇и агирияаад̇и. иминаа наязна яож̇анаа взд̣̇ид̇аб̣б̣аа. ааж̇ийво жа наамзса баадиязгго над̇т̇и, ваажаагамманд̇зсу г̇ахид̇зсу г̇ахид̇ова ход̇и, д̇аббагкигад̇д̇аа. д̇хувабадисзванавасзна банааяам̣ д̇ад̇о нийхарид̇ваа д̣̇ассид̇од̇и. звам̣ санд̇з саммааааж̇ийво сагижжаго на ход̇и , адта маг̇г̇ан̇г̇аани на барибуурзнд̇и, д̇асмаа саммааааж̇ийво сагижжаго гаад̇аб̣б̣о, адта маг̇г̇ан̇г̇аани барибуурзд̇аб̣б̣аанийд̇и. д̇ад̇рааяам̣ наяо – ааж̇ийво наама бхиж̇ж̇амаано гааяаважийд̣̇ваарзсуязва бхиж̇ж̇ад̇и. манод̣̇ваарз ааж̇ийвабхзд̣̇о наама над̇т̇и. буураяамааноби д̇асмим̣язва д̣̇ваарад̣̇ваяз буурад̇и. манод̣̇ваарз ааж̇ийвабууран̣ам̣ наама над̇т̇и. гааяад̣̇ваарз бана вийд̇иггамо ааж̇ийвахзд̇угоби ад̇т̇и наааж̇ийвахзд̇угоби. д̇ат̇аа важийд̣̇ваарз.
301. Sammāājīvaniddese akiriyātiādīsu yāya cetanāya micchājīvaṃ ājīvamāno kiriyaṃ karoti nāma, ayaṃ uppajjitvā taṃ kiriyaṃ kātuṃ na detīti akiriyāti. Iminā nayena yojanā veditabbā. Ājīvo ca nāmesa pāṭiyekko natthi, vācākammantesu gahitesu gahitova hoti, tappakkhikattā. Dhuvapaṭisevanavasena panāyaṃ tato nīharitvā dassitoti. Evaṃ sante sammāājīvo sakiccako na hoti , aṭṭha maggaṅgāni na paripūrenti, tasmā sammāājīvo sakiccako kātabbo, aṭṭha maggaṅgāni paripūretabbānīti. Tatrāyaṃ nayo – ājīvo nāma bhijjamāno kāyavacīdvāresuyeva bhijjati. Manodvāre ājīvabhedo nāma natthi. Pūrayamānopi tasmiṃyeva dvāradvaye pūrati. Manodvāre ājīvapūraṇaṃ nāma natthi. Kāyadvāre pana vītikkamo ājīvahetukopi atthi naājīvahetukopi. Tathā vacīdvāre.
д̇ад̇т̇а яам̣ рааж̇арааж̇амахаамад̇д̇аа кид̣д̣аабасуд̇аа суурабхаавам̣ д̣̇ассзнд̇аа миг̇авад̇хам̣ ваа бант̇ад̣̇уханам̣ ваа барад̣̇ааравийд̇иггамам̣ ваа гаронд̇и, ид̣̇ам̣ агусалам̣ гааяагаммам̣ наама. д̇ад̇о вирад̇иби ‘саммаагамманд̇о’ наама. яам̣ бана наааж̇ийвахзд̇угам̣ жад̇уб̣б̣ид̇хам̣ важийд̣̇ужжарид̇ам̣ бхаасанд̇и, ид̣̇ам̣ агусалам̣ важийгаммам̣ наама. д̇ад̇о вирад̇иби ‘саммааваажаа’ наама.
Tattha yaṃ rājarājamahāmattā khiḍḍāpasutā sūrabhāvaṃ dassentā migavadhaṃ vā panthaduhanaṃ vā paradāravītikkamaṃ vā karonti, idaṃ akusalaṃ kāyakammaṃ nāma. Tato viratipi ‘sammākammanto’ nāma. Yaṃ pana naājīvahetukaṃ catubbidhaṃ vacīduccaritaṃ bhāsanti, idaṃ akusalaṃ vacīkammaṃ nāma. Tato viratipi ‘sammāvācā’ nāma.
яам̣ бана ааж̇ийвахзд̇у нзсаад̣̇амажчаб̣анд̇хаад̣̇аяо баан̣ам̣ хананд̇и, ад̣̇иннам̣ аад̣̇ияанд̇и, мижчаажаарам̣ жаранд̇и, аяам̣ мижчааж̇ийво наама. д̇ад̇о вирад̇и ‘саммааааж̇ийво’ наама. яамби лан̃ж̇ам̣ г̇ахзд̇ваа мусаа бхан̣анд̇и, бзсун̃н̃апарусасампаббалаабз бавад̇д̇знд̇и, аяамби мижчааж̇ийво наама. д̇ад̇о вирад̇и саммааааж̇ийво наама.
Yaṃ pana ājīvahetu nesādamacchabandhādayo pāṇaṃ hananti, adinnaṃ ādiyanti, micchācāraṃ caranti, ayaṃ micchājīvo nāma. Tato virati ‘sammāājīvo’ nāma. Yampi lañjaṃ gahetvā musā bhaṇanti, pesuññapharusasamphappalāpe pavattenti, ayampi micchājīvo nāma. Tato virati sammāājīvo nāma.
махаасийвад̇т̇зро банааха – ‘гааяаважийд̣̇ваарзсуби вийд̇иггамо ааж̇ийвахзд̇уго ваа ход̇у но ваа ааж̇ийвахзд̇уго, агусалам̣ гааяагаммам̣ важийгамманд̇взва сан̇кяам̣ г̇ажчад̇и. д̇ад̇о вирад̇иби саммаагамманд̇о саммааваажаад̇взва вужжад̇ий’д̇и. ‘ааж̇ийво гухи’нд̇и вуд̇д̇з бана ‘д̇ийн̣и гуханавад̇т̇ууни ниссааяа жад̇д̇ааро бажжаяз уббаад̣̇зд̇ваа д̇зсам̣ барибхог̇о’д̇и ааха. аяам̣ бана годиббад̇д̇о мижчааж̇ийво. д̇ад̇о вирад̇и саммааааж̇ийво наама.
Mahāsīvatthero panāha – ‘kāyavacīdvāresupi vītikkamo ājīvahetuko vā hotu no vā ājīvahetuko, akusalaṃ kāyakammaṃ vacīkammantveva saṅkhyaṃ gacchati. Tato viratipi sammākammanto sammāvācātveva vuccatī’ti. ‘Ājīvo kuhi’nti vutte pana ‘tīṇi kuhanavatthūni nissāya cattāro paccaye uppādetvā tesaṃ paribhogo’ti āha. Ayaṃ pana koṭippatto micchājīvo. Tato virati sammāājīvo nāma.
аяамби саммааааж̇ийво буб̣б̣абхааг̇з наанаажид̇д̇зсу лаб̣бхад̇и, ан̃н̃знзва хи жид̇д̇зна гааяад̣̇вааравийд̇иггамаа вирамад̇и, ан̃н̃зна важийд̣̇вааравийд̇иггамаа. логуд̇д̇арамаг̇г̇агкан̣з бана згажид̇д̇асмим̣язва лаб̣бхад̇и. гааяаважийд̣̇ваарзсу хи сад̇д̇агаммабат̇авасзна уббаннааяа мижчааж̇ийвасан̇каад̇ааяа д̣̇уссийляажзд̇анааяа бад̣̇абажчзд̣̇ам̣ гурумаанаа маг̇г̇ан̇г̇ам̣ буураяамаанаа згаава вирад̇и уббаж̇ж̇ад̇ийд̇и. аяам̣ нид̣̇д̣̇зсаваарз висзсо.
Ayampi sammāājīvo pubbabhāge nānācittesu labbhati, aññeneva hi cittena kāyadvāravītikkamā viramati, aññena vacīdvāravītikkamā. Lokuttaramaggakkhaṇe pana ekacittasmiṃyeva labbhati. Kāyavacīdvāresu hi sattakammapathavasena uppannāya micchājīvasaṅkhātāya dussīlyacetanāya padapacchedaṃ kurumānā maggaṅgaṃ pūrayamānā ekāva virati uppajjatīti. Ayaṃ niddesavāre viseso.
яам̣ банзд̇ам̣ инд̣̇риязсу анан̃н̃аад̇ан̃н̃ассаамийд̇инд̣̇рияам̣ вад̣дхид̇ам̣, маг̇г̇ан̇г̇зсу жа саммааваажаад̣̇ийни, д̇зсам̣ васзна сан̇г̇ахаваарз ‘‘навинд̣̇рияаани, адтан̇г̇иго маг̇г̇о’’д̇и вуд̇д̇ам̣. сун̃н̃ад̇авааро баагад̇игоязваад̇и. аяам̣ д̇аава суд̣̇д̇хигабадибад̣̇ааяа висзсо.
Yaṃ panetaṃ indriyesu anaññātaññassāmītindriyaṃ vaḍḍhitaṃ, maggaṅgesu ca sammāvācādīni, tesaṃ vasena saṅgahavāre ‘‘navindriyāni, aṭṭhaṅgiko maggo’’ti vuttaṃ. Suññatavāro pākatikoyevāti. Ayaṃ tāva suddhikapaṭipadāya viseso.
343. ид̇о барам̣ суд̣̇д̇хигасун̃н̃ад̇аа сун̃н̃ад̇абадибад̣̇аа суд̣̇д̇хигааббан̣ихид̇аа аббан̣ихид̇абадибад̣̇аад̇и аяам̣ д̣̇зсанаабхзд̣̇о ход̇и. д̇ад̇т̇а сун̃н̃ад̇анд̇и логуд̇д̇арамаг̇г̇асса наамам̣. со хи ааг̇аманад̇о саг̇ун̣ад̇о аарамман̣ад̇од̇и д̇ийхи гааран̣зхи наамам̣ лабхад̇и. гат̇ам̣? ид̇ха бхигку анад̇д̇ад̇о абхинивисид̇ваа анад̇д̇ад̇о сан̇каарз бассад̇и. яасмаа бана анад̇д̇ад̇о д̣̇идтамад̇д̇знзва маг̇г̇авудтаанам̣ наама на ход̇и, анижжад̇оби д̣̇угкад̇оби д̣̇адтумзва ваддад̇и, д̇асмаа ‘анижжам̣ д̣̇угкаманад̇д̇аа’д̇и д̇ивид̇хам̣ анубассанам̣ ааробзд̇ваа саммасанд̇о жарад̇и. вудтаанаг̇ааминивибассанаа банасса д̇збхуумагзби сан̇каарз сун̃н̃ад̇ова бассад̇и. аяам̣ вибассанаа сун̃н̃ад̇аа наама ход̇и. саа ааг̇аманийяадтаанз тад̇ваа ад̇д̇ано маг̇г̇асса ‘сун̃н̃ад̇а’нд̇и наамам̣ д̣̇зд̇и. звам̣ маг̇г̇о ‘ааг̇аманад̇о’ сун̃н̃ад̇анаамам̣ лабхад̇и. яасмаа бана со рааг̇аад̣̇ийхи сун̃н̃о д̇асмаа ‘саг̇ун̣знзва’ сун̃н̃ад̇анаамам̣ лабхад̇и. ниб̣б̣аанамби рааг̇аад̣̇ийхи сун̃н̃ад̇д̇аа сун̃н̃ад̇анд̇и вужжад̇и. д̇ам̣ аарамман̣ам̣ гад̇ваа уббаннад̇д̇аа маг̇г̇о ‘аарамман̣ад̇о’ сун̃н̃ад̇анаамам̣ лабхад̇и.
343. Ito paraṃ suddhikasuññatā suññatapaṭipadā suddhikaappaṇihitā appaṇihitapaṭipadāti ayaṃ desanābhedo hoti. Tattha suññatanti lokuttaramaggassa nāmaṃ. So hi āgamanato saguṇato ārammaṇatoti tīhi kāraṇehi nāmaṃ labhati. Kathaṃ? Idha bhikkhu anattato abhinivisitvā anattato saṅkhāre passati. Yasmā pana anattato diṭṭhamatteneva maggavuṭṭhānaṃ nāma na hoti, aniccatopi dukkhatopi daṭṭhumeva vaṭṭati, tasmā ‘aniccaṃ dukkhamanattā’ti tividhaṃ anupassanaṃ āropetvā sammasanto carati. Vuṭṭhānagāminivipassanā panassa tebhūmakepi saṅkhāre suññatova passati. Ayaṃ vipassanā suññatā nāma hoti. Sā āgamanīyaṭṭhāne ṭhatvā attano maggassa ‘suññata’nti nāmaṃ deti. Evaṃ maggo ‘āgamanato’ suññatanāmaṃ labhati. Yasmā pana so rāgādīhi suñño tasmā ‘saguṇeneva’ suññatanāmaṃ labhati. Nibbānampi rāgādīhi suññattā suññatanti vuccati. Taṃ ārammaṇaṃ katvā uppannattā maggo ‘ārammaṇato’ suññatanāmaṃ labhati.
д̇ад̇т̇а суд̇д̇анд̇игабарияааязна саг̇ун̣ад̇оби аарамман̣ад̇оби наамам̣ лабхад̇и. барияааяад̣̇зсанаа хзсаа. абхид̇хаммагат̇аа бана ниббарияааяад̣̇зсанаа. д̇асмаа ид̇ха саг̇ун̣ад̇о ваа аарамман̣ад̇о ваа наамам̣ на лабхад̇и, ааг̇аманад̇ова лабхад̇и. ааг̇аманамзва хи д̇хурам̣. д̇ам̣ д̣̇увид̇хам̣ ход̇и – вибассанааг̇аманам̣ маг̇г̇ааг̇амананд̇и. д̇ад̇т̇а маг̇г̇асса ааг̇ад̇адтаанз вибассанааг̇аманам̣ д̇хурам̣, паласса ааг̇ад̇адтаанз маг̇г̇ааг̇аманам̣ д̇хурам̣. ид̇ха маг̇г̇асса ааг̇ад̇ад̇д̇аа вибассанааг̇аманамзва д̇хурам̣ ж̇аад̇ам̣.
Tattha suttantikapariyāyena saguṇatopi ārammaṇatopi nāmaṃ labhati. Pariyāyadesanā hesā. Abhidhammakathā pana nippariyāyadesanā. Tasmā idha saguṇato vā ārammaṇato vā nāmaṃ na labhati, āgamanatova labhati. Āgamanameva hi dhuraṃ. Taṃ duvidhaṃ hoti – vipassanāgamanaṃ maggāgamananti. Tattha maggassa āgataṭṭhāne vipassanāgamanaṃ dhuraṃ, phalassa āgataṭṭhāne maggāgamanaṃ dhuraṃ. Idha maggassa āgatattā vipassanāgamanameva dhuraṃ jātaṃ.
350. аббан̣ихид̇анд̇и, зд̇т̇ааби аббан̣ихид̇анд̇и маг̇г̇ассзва наамам̣. ид̣̇амби наамам̣ маг̇г̇о д̇ийхзва гааран̣зхи лабхад̇и. гат̇ам̣? ид̇ха бхигку аад̣̇ид̇ова д̣̇угкад̇о абхинивисид̇ваа д̣̇угкад̇ова сан̇каарз бассад̇и. яасмаа бана д̣̇угкад̇о д̣̇идтамад̇д̇знзва маг̇г̇авудтаанам̣ наама на ход̇и, анижжад̇оби анад̇д̇ад̇оби д̣̇адтумзва ваддад̇и, д̇асмаа анижжам̣ д̣̇угкаманад̇д̇аа’д̇и д̇ивид̇хам̣ анубассанам̣ ааробзд̇ваа саммасанд̇о жарад̇и. вудтаанаг̇ааминивибассанаа банасса д̇збхуумагасан̇каарзсу бан̣ид̇хим̣ сосзд̇ваа барияаад̣̇ияид̇ваа виссаж̇ж̇зд̇и. аяам̣ вибассанаа аббан̣ихид̇аа наама ход̇и. саа ааг̇аманийяадтаанз тад̇ваа ад̇д̇ано маг̇г̇асса ‘аббан̣ихид̇а’нд̇и наамам̣ д̣̇зд̇и. звам̣ маг̇г̇о ‘ааг̇аманад̇о’ аббан̣ихид̇анаамам̣ лабхад̇и. яасмаа бана д̇ад̇т̇а рааг̇ад̣̇осамохабан̣ид̇хаяо над̇т̇и, д̇асмаа ‘саг̇ун̣знзва’ аббан̣ихид̇анаамам̣ лабхад̇и. ниб̣б̣аанамби д̇зсам̣ бан̣ид̇хийнам̣ абхааваа аббан̣ихид̇анд̇и вужжад̇и. д̇ам̣ аарамман̣ам̣ гад̇ваа уббаннад̇д̇аа маг̇г̇о аббан̣ихид̇анаамам̣ лабхад̇и.
350. Appaṇihitanti, etthāpi appaṇihitanti maggasseva nāmaṃ. Idampi nāmaṃ maggo tīheva kāraṇehi labhati. Kathaṃ? Idha bhikkhu āditova dukkhato abhinivisitvā dukkhatova saṅkhāre passati. Yasmā pana dukkhato diṭṭhamatteneva maggavuṭṭhānaṃ nāma na hoti, aniccatopi anattatopi daṭṭhumeva vaṭṭati, tasmā aniccaṃ dukkhamanattā’ti tividhaṃ anupassanaṃ āropetvā sammasanto carati. Vuṭṭhānagāminivipassanā panassa tebhūmakasaṅkhāresu paṇidhiṃ sosetvā pariyādiyitvā vissajjeti. Ayaṃ vipassanā appaṇihitā nāma hoti. Sā āgamanīyaṭṭhāne ṭhatvā attano maggassa ‘appaṇihita’nti nāmaṃ deti. Evaṃ maggo ‘āgamanato’ appaṇihitanāmaṃ labhati. Yasmā pana tattha rāgadosamohapaṇidhayo natthi, tasmā ‘saguṇeneva’ appaṇihitanāmaṃ labhati. Nibbānampi tesaṃ paṇidhīnaṃ abhāvā appaṇihitanti vuccati. Taṃ ārammaṇaṃ katvā uppannattā maggo appaṇihitanāmaṃ labhati.
д̇ад̇т̇а суд̇д̇анд̇игабарияааязна саг̇ун̣ад̇оби аарамман̣ад̇оби наамам̣ лабхад̇и. барияааяад̣̇зсанаа хзсаа . абхид̇хаммагат̇аа бана ниббарияааяад̣̇зсанаа. д̇асмаа ид̇ха саг̇ун̣ад̇о ваа аарамман̣ад̇о ваа наамам̣ на лабхад̇и, ааг̇аманад̇ова лабхад̇и. ааг̇аманамзва хи д̇хурам̣. д̇ам̣ д̣̇увид̇хам̣ ход̇и – вибассанааг̇аманам̣ маг̇г̇ааг̇амананд̇и. д̇ад̇т̇а маг̇г̇асса ааг̇ад̇адтаанз вибассанааг̇аманам̣ д̇хурам̣, паласса ааг̇ад̇адтаанз маг̇г̇ааг̇аманам̣ д̇хурам̣. ид̇ха маг̇г̇асса ааг̇ад̇ад̇д̇аа вибассанааг̇аманамзва д̇хурам̣ ж̇аад̇ам̣.
Tattha suttantikapariyāyena saguṇatopi ārammaṇatopi nāmaṃ labhati. Pariyāyadesanā hesā . Abhidhammakathā pana nippariyāyadesanā. Tasmā idha saguṇato vā ārammaṇato vā nāmaṃ na labhati, āgamanatova labhati. Āgamanameva hi dhuraṃ. Taṃ duvidhaṃ hoti – vipassanāgamanaṃ maggāgamananti. Tattha maggassa āgataṭṭhāne vipassanāgamanaṃ dhuraṃ, phalassa āgataṭṭhāne maggāgamanaṃ dhuraṃ. Idha maggassa āgatattā vipassanāgamanameva dhuraṃ jātaṃ.
нану жа сун̃н̃ад̇о анимид̇д̇о аббан̣ихид̇од̇и д̇ийн̣и маг̇г̇асса наамаани? яат̇ааха – ‘‘д̇аяомз, бхигкавз, вимогкаа – сун̃н̃ад̇о вимогко, анимид̇д̇о вимогко, аббан̣ихид̇о вимогко’’д̇и (бади. ма. 1.209). д̇зсу ид̇ха д̣̇вз маг̇г̇з г̇ахзд̇ваа анимид̇д̇о гасмаа на г̇ахид̇од̇и? ааг̇аманаабхаавад̇о. анимид̇д̇авибассанаа хи саяам̣ ааг̇аманийяадтаанз тад̇ваа ад̇д̇ано маг̇г̇асса наамам̣ д̣̇аад̇ум̣ на саггод̇и. саммаасамб̣уд̣̇д̇хо бана ад̇д̇ано буд̇д̇асса раахулад̇т̇зрасса.
Nanu ca suññato animitto appaṇihitoti tīṇi maggassa nāmāni? Yathāha – ‘‘tayome, bhikkhave, vimokkhā – suññato vimokkho, animitto vimokkho, appaṇihito vimokkho’’ti (paṭi. ma. 1.209). Tesu idha dve magge gahetvā animitto kasmā na gahitoti? Āgamanābhāvato. Animittavipassanā hi sayaṃ āgamanīyaṭṭhāne ṭhatvā attano maggassa nāmaṃ dātuṃ na sakkoti. Sammāsambuddho pana attano puttassa rāhulattherassa.
‘‘анимид̇д̇ан̃жа бхаавзхи, маанаанусаяамуж̇ж̇аха;
‘‘Animittañca bhāvehi, mānānusayamujjaha;
д̇ад̇о маанаабхисамаяаа, убасанд̇о жариссасий’’д̇и. (су. ни. 344);
Tato mānābhisamayā, upasanto carissasī’’ti. (su. ni. 344);
анимид̇д̇авибассанам̣ гат̇зси. вибассанаа хи нижжанимид̇д̇ам̣ д̇хуванимид̇д̇ам̣ суканимид̇д̇ам̣ ад̇д̇анимид̇д̇ан̃жа уг̇гхаадзд̇и. д̇асмаа анимид̇д̇аад̇и гат̇ид̇аа. саа жа гин̃жааби д̇ам̣ нимид̇д̇ам̣ уг̇гхаадзд̇и, саяам̣ бана нимид̇д̇ад̇хаммзсу жарад̇ийд̇и санимид̇д̇аава ход̇и. д̇асмаа саяам̣ ааг̇аманийяадтаанз тад̇ваа ад̇д̇ано маг̇г̇асса наамам̣ д̣̇аад̇ум̣ на саггод̇и.
Animittavipassanaṃ kathesi. Vipassanā hi niccanimittaṃ dhuvanimittaṃ sukhanimittaṃ attanimittañca ugghāṭeti. Tasmā animittāti kathitā. Sā ca kiñcāpi taṃ nimittaṃ ugghāṭeti, sayaṃ pana nimittadhammesu caratīti sanimittāva hoti. Tasmā sayaṃ āgamanīyaṭṭhāne ṭhatvā attano maggassa nāmaṃ dātuṃ na sakkoti.
абаро наяо – абхид̇хаммо наама барамад̇т̇ад̣̇зсанаа. анимид̇д̇амаг̇г̇асса жа барамад̇т̇ад̇о хзд̇увзгалламзва ход̇и. гат̇ам̣? анижжаанубассанааяа хи васзна анимид̇д̇авимогко гат̇ид̇о. д̇зна жа вимогкзна сад̣̇д̇хинд̣̇рияам̣ ад̇химад̇д̇ам̣ ход̇и. д̇ам̣ арияамаг̇г̇з зган̇г̇амби на ход̇и, амаг̇г̇ан̇г̇ад̇д̇аа ад̇д̇ано маг̇г̇асса барамад̇т̇ад̇о наамам̣ д̣̇аад̇ум̣ на саггод̇и. ид̇арзсу бана д̣̇вийсу анад̇д̇аанубассанааяа д̇аава васзна сун̃н̃ад̇авимогко, д̣̇угкаанубассанааяа васзна аббан̣ихид̇авимогко гат̇ид̇о. д̇зсу сун̃н̃ад̇авимогкзна бан̃н̃инд̣̇рияам̣ ад̇химад̇д̇ам̣ ход̇и, аббан̣ихид̇авимогкзна самаад̇хинд̣̇рияам̣. д̇аани арияамаг̇г̇асса ан̇г̇ад̇д̇аа ад̇д̇ано маг̇г̇асса барамад̇т̇ад̇о наамам̣ д̣̇аад̇ум̣ саггонд̇и. маг̇г̇аарамман̣ад̇д̇игзби хи маг̇г̇аад̇хибад̇ид̇хаммавибхаж̇анз чанд̣̇ажид̇д̇аанам̣ ад̇хибад̇игаалз д̇зсам̣ д̇хаммаанам̣ амаг̇г̇ан̇г̇ад̇д̇аава маг̇г̇аад̇хибад̇ибхааво на вуд̇д̇о. звам̣самбад̣̇амид̣̇ам̣ взд̣̇ид̇аб̣б̣анд̇и. аяамзд̇т̇а адтагат̇аамуд̇д̇аго згасса аажарияасса мад̇ивинижчаяо.
Aparo nayo – abhidhammo nāma paramatthadesanā. Animittamaggassa ca paramatthato hetuvekallameva hoti. Kathaṃ? Aniccānupassanāya hi vasena animittavimokkho kathito. Tena ca vimokkhena saddhindriyaṃ adhimattaṃ hoti. Taṃ ariyamagge ekaṅgampi na hoti, amaggaṅgattā attano maggassa paramatthato nāmaṃ dātuṃ na sakkoti. Itaresu pana dvīsu anattānupassanāya tāva vasena suññatavimokkho, dukkhānupassanāya vasena appaṇihitavimokkho kathito. Tesu suññatavimokkhena paññindriyaṃ adhimattaṃ hoti, appaṇihitavimokkhena samādhindriyaṃ. Tāni ariyamaggassa aṅgattā attano maggassa paramatthato nāmaṃ dātuṃ sakkonti. Maggārammaṇattikepi hi maggādhipatidhammavibhajane chandacittānaṃ adhipatikāle tesaṃ dhammānaṃ amaggaṅgattāva maggādhipatibhāvo na vutto. Evaṃsampadamidaṃ veditabbanti. Ayamettha aṭṭhakathāmuttako ekassa ācariyassa mativinicchayo.
звам̣ саб̣б̣ат̇ааби анимид̇д̇авибассанаа саяам̣ ааг̇аманийяадтаанз тад̇ваа ад̇д̇ано маг̇г̇асса наамам̣ д̣̇аад̇ум̣ на саггод̇ийд̇и анимид̇д̇амаг̇г̇о на г̇ахид̇о. гзжи бана ‘анимид̇д̇амаг̇г̇о ааг̇аманад̇о наамам̣ алабханд̇оби суд̇д̇анд̇абарияааязна саг̇ун̣ад̇о жа аарамман̣ад̇о жа наамам̣ лабхад̇ий’д̇и аахам̣су. д̇з ид̣̇ам̣ вад̇ваа бадигкид̇д̇аа – анимид̇д̇амаг̇г̇з саг̇ун̣ад̇о жа аарамман̣ад̇о жа наамам̣ лабханд̇з сун̃н̃ад̇ааббан̣ихид̇амаг̇г̇ааби саг̇ун̣ад̇оязва аарамман̣ад̇оязва жа ид̇ха наамам̣ лабхзяяум̣. на бана лабханд̇и. гим̣ гааран̣аа? аяан̃хи маг̇г̇о наама д̣̇вийхи гааран̣зхи наамам̣ лабхад̇и – сарасад̇о жа бажжанийгад̇о жа; сабхаавад̇о жа бадибагкад̇о жаад̇и ад̇т̇о. д̇ад̇т̇а сун̃н̃ад̇ааббан̣ихид̇амаг̇г̇аа сарасад̇оби бажжанийгад̇оби наамам̣ лабханд̇и. сун̃н̃ад̇ааббан̣ихид̇амаг̇г̇аа хи рааг̇аад̣̇ийхи сун̃н̃аа, рааг̇абан̣ид̇хиаад̣̇ийхи жа аббан̣ихид̇аад̇и звам̣ ‘сарасад̇о’ наамам̣ лабханд̇и. сун̃н̃ад̇о жа ад̇д̇аабхинивзсасса бадибагко, аббан̣ихид̇о бан̣ид̇хиссаад̇и звам̣ ‘бажжанийгад̇о’ наамам̣ лабханд̇и. анимид̇д̇амаг̇г̇о бана рааг̇аад̣̇инимид̇д̇аанам̣ нижжанимид̇д̇аад̣̇ийнан̃жа абхаавзна сарасад̇ова наамам̣ лабхад̇и, но бажжанийгад̇о. на хи со сан̇кааранимид̇д̇аарамман̣ааяа анижжаанубассанааяа бадибагко. анижжаанубассанаа банасса ануломабхаавз тид̇аад̇и. саб̣б̣ат̇ааби абхид̇хаммабарияааязна анимид̇д̇амаг̇г̇о наама над̇т̇ийд̇и.
Evaṃ sabbathāpi animittavipassanā sayaṃ āgamanīyaṭṭhāne ṭhatvā attano maggassa nāmaṃ dātuṃ na sakkotīti animittamaggo na gahito. Keci pana ‘animittamaggo āgamanato nāmaṃ alabhantopi suttantapariyāyena saguṇato ca ārammaṇato ca nāmaṃ labhatī’ti āhaṃsu. Te idaṃ vatvā paṭikkhittā – animittamagge saguṇato ca ārammaṇato ca nāmaṃ labhante suññataappaṇihitamaggāpi saguṇatoyeva ārammaṇatoyeva ca idha nāmaṃ labheyyuṃ. Na pana labhanti. Kiṃ kāraṇā? Ayañhi maggo nāma dvīhi kāraṇehi nāmaṃ labhati – sarasato ca paccanīkato ca; sabhāvato ca paṭipakkhato cāti attho. Tattha suññataappaṇihitamaggā sarasatopi paccanīkatopi nāmaṃ labhanti. Suññataappaṇihitamaggā hi rāgādīhi suññā, rāgapaṇidhiādīhi ca appaṇihitāti evaṃ ‘sarasato’ nāmaṃ labhanti. Suññato ca attābhinivesassa paṭipakkho, appaṇihito paṇidhissāti evaṃ ‘paccanīkato’ nāmaṃ labhanti. Animittamaggo pana rāgādinimittānaṃ niccanimittādīnañca abhāvena sarasatova nāmaṃ labhati, no paccanīkato. Na hi so saṅkhāranimittārammaṇāya aniccānupassanāya paṭipakkho. Aniccānupassanā panassa anulomabhāve ṭhitāti. Sabbathāpi abhidhammapariyāyena animittamaggo nāma natthīti.
суд̇д̇анд̇игабарияааязна банзса звам̣ аахарид̇ваа д̣̇ийбид̇о – яасмин̃хи ваарз маг̇г̇авудтаанам̣ ход̇и, д̇ийн̣и лагкан̣аани згааваж̇ж̇анзна вияа аабаат̇амааг̇ажчанд̇и, д̇ин̣н̣ан̃жа згад̇о аабаат̇аг̇аманам̣ наама над̇т̇и. гаммадтаанасса бана вибхууд̇абхаавад̣̇ийбанад̇т̇ам̣ звам̣ вуд̇д̇ам̣. аад̣̇ид̇о хи яад̇т̇а гад̇т̇ажи абхинивзсо ход̇у, вудтаанаг̇ааминий бана вибассанаа яам̣ яам̣ саммасид̇ваа вудтаад̇и д̇асса д̇ассзва васзна ааг̇аманийяадтаанз тад̇ваа ад̇д̇ано маг̇г̇асса наамам̣ д̣̇зд̇и. гат̇ам̣? анижжаад̣̇ийсу хи яад̇т̇а гад̇т̇ажи абхинивисид̇ваа ид̇арамби лагкан̣ад̣̇ваяам̣ д̣̇адтум̣ ваддад̇и зва. згалагкан̣ад̣̇ассанамад̇д̇знзва хи маг̇г̇авудтаанам̣ наама на ход̇и, д̇асмаа анижжад̇о абхинивидто бхигку на гзвалам̣ анижжад̇ова вудтаад̇и, д̣̇угкад̇оби анад̇д̇ад̇оби вудтаад̇иязва. д̣̇угкад̇о анад̇д̇ад̇о абхинивидтзби зсзва наяо. ид̇и аад̣̇ид̇о яад̇т̇а гад̇т̇ажи абхинивзсо ход̇у, вудтаанаг̇ааминий бана вибассанаа яам̣ яам̣ саммасид̇ваа вудтаад̇и д̇асса д̇ассзва васзна ааг̇аманийяадтаанз тад̇ваа ад̇д̇ано маг̇г̇асса наамам̣ д̣̇зд̇и. д̇ад̇т̇а анижжад̇о вудтаханд̇асса маг̇г̇о анимид̇д̇о наама ход̇и, д̣̇угкад̇о вудтаханд̇асса аббан̣ихид̇о, анад̇д̇ад̇о вудтаханд̇асса сун̃н̃ад̇од̇и. звам̣ суд̇д̇анд̇абарияааязна аахарид̇ваа д̣̇ийбид̇о.
Suttantikapariyāyena panesa evaṃ āharitvā dīpito – yasmiñhi vāre maggavuṭṭhānaṃ hoti, tīṇi lakkhaṇāni ekāvajjanena viya āpāthamāgacchanti, tiṇṇañca ekato āpāthagamanaṃ nāma natthi. Kammaṭṭhānassa pana vibhūtabhāvadīpanatthaṃ evaṃ vuttaṃ. Ādito hi yattha katthaci abhiniveso hotu, vuṭṭhānagāminī pana vipassanā yaṃ yaṃ sammasitvā vuṭṭhāti tassa tasseva vasena āgamanīyaṭṭhāne ṭhatvā attano maggassa nāmaṃ deti. Kathaṃ? Aniccādīsu hi yattha katthaci abhinivisitvā itarampi lakkhaṇadvayaṃ daṭṭhuṃ vaṭṭati eva. Ekalakkhaṇadassanamatteneva hi maggavuṭṭhānaṃ nāma na hoti, tasmā aniccato abhiniviṭṭho bhikkhu na kevalaṃ aniccatova vuṭṭhāti, dukkhatopi anattatopi vuṭṭhātiyeva. Dukkhato anattato abhiniviṭṭhepi eseva nayo. Iti ādito yattha katthaci abhiniveso hotu, vuṭṭhānagāminī pana vipassanā yaṃ yaṃ sammasitvā vuṭṭhāti tassa tasseva vasena āgamanīyaṭṭhāne ṭhatvā attano maggassa nāmaṃ deti. Tattha aniccato vuṭṭhahantassa maggo animitto nāma hoti, dukkhato vuṭṭhahantassa appaṇihito, anattato vuṭṭhahantassa suññatoti. Evaṃ suttantapariyāyena āharitvā dīpito.
вудтаанаг̇ааминий бана вибассанаа гимаарамман̣аад̇и? лагкан̣аарамман̣аад̇и. лагкан̣ам̣ наама бан̃н̃ад̇д̇иг̇ад̇игам̣ на вад̇д̇аб̣б̣ад̇хаммабхууд̇ам̣. яо бана анижжам̣ д̣̇угкаманад̇д̇аад̇и д̇ийн̣и лагкан̣аани саллагкзд̇и, д̇асса бан̃жагканд̇хаа ган̣тз б̣ад̣̇д̇хагун̣абам̣ вияа хонд̇и. сан̇каараарамман̣амзва н̃аан̣ам̣ сан̇каарад̇о вудтаад̇и. яат̇аа хи зго бхигку бад̇д̇ам̣ гин̣ид̇угаамо бад̇д̇аваан̣иж̇зна бад̇д̇ам̣ аабхад̇ам̣ д̣̇исваа хадтабахадто г̇ан̣хиссаамийд̇и жинд̇зд̇ваа виймам̣самаано д̇ийн̣и чид̣̇д̣̇аани бассзяяа, со на чид̣̇д̣̇зсу нираалаяо ход̇и, бад̇д̇з бана нираалаяо ход̇и; звамзва д̇ийн̣и лагкан̣аани саллагкзд̇ваа сан̇каарзсу нираалаяо ход̇и. сан̇каараарамман̣знзва н̃аан̣зна сан̇каарад̇о вудтаад̇ийд̇и взд̣̇ид̇аб̣б̣ам̣. д̣̇уссобамааяаби зсзва наяо.
Vuṭṭhānagāminī pana vipassanā kimārammaṇāti? Lakkhaṇārammaṇāti. Lakkhaṇaṃ nāma paññattigatikaṃ na vattabbadhammabhūtaṃ. Yo pana aniccaṃ dukkhamanattāti tīṇi lakkhaṇāni sallakkheti, tassa pañcakkhandhā kaṇṭhe baddhakuṇapaṃ viya honti. Saṅkhārārammaṇameva ñāṇaṃ saṅkhārato vuṭṭhāti. Yathā hi eko bhikkhu pattaṃ kiṇitukāmo pattavāṇijena pattaṃ ābhataṃ disvā haṭṭhapahaṭṭho gaṇhissāmīti cintetvā vīmaṃsamāno tīṇi chiddāni passeyya, so na chiddesu nirālayo hoti, patte pana nirālayo hoti; evameva tīṇi lakkhaṇāni sallakkhetvā saṅkhāresu nirālayo hoti. Saṅkhārārammaṇeneva ñāṇena saṅkhārato vuṭṭhātīti veditabbaṃ. Dussopamāyapi eseva nayo.
ид̇и бхаг̇аваа логуд̇д̇арам̣ жхаанам̣ бхааж̇знд̇о суд̣̇д̇хигабадибад̣̇ааяа жад̇угганаяам̣ бан̃жаганаяанд̇и д̣̇взби наяз аахари. д̇ат̇аа суд̣̇д̇хигасун̃н̃ад̇ааяа сун̃н̃ад̇абадибад̣̇ааяа суд̣̇д̇хигааббан̣ихид̇ааяа аббан̣ихид̇абадибад̣̇ааяаад̇и. гасмаа звам̣ аахарийд̇и? буг̇г̇алаж̇жхаасаязна жзва д̣̇зсанаавилаасзна жа. д̇ад̣̇убхаяамби хздтаа вуд̇д̇анаязнзва взд̣̇ид̇аб̣б̣ам̣. звам̣ логуд̇д̇арам̣ жхаанам̣ бхаавзд̇ийд̇и зд̇т̇а суд̣̇д̇хигабадибад̣̇ааяа жад̇уггабан̃жагавасзна д̣̇вз наяаа, д̇ат̇аа сзсзсууд̇и саб̣б̣зсуби бан̃жасу годтаасзсу д̣̇аса наяаа бхааж̇ид̇аа.
Iti bhagavā lokuttaraṃ jhānaṃ bhājento suddhikapaṭipadāya catukkanayaṃ pañcakanayanti dvepi naye āhari. Tathā suddhikasuññatāya suññatapaṭipadāya suddhikaappaṇihitāya appaṇihitapaṭipadāyāti. Kasmā evaṃ āharīti? Puggalajjhāsayena ceva desanāvilāsena ca. Tadubhayampi heṭṭhā vuttanayeneva veditabbaṃ. Evaṃ lokuttaraṃ jhānaṃ bhāvetīti ettha suddhikapaṭipadāya catukkapañcakavasena dve nayā, tathā sesesūti sabbesupi pañcasu koṭṭhāsesu dasa nayā bhājitā.
Related texts:
д̇ибидага (муула) • Tipiṭaka (Mūla) / абхид̇хаммабидага • Abhidhammapiṭaka / д̇хаммасан̇г̇ан̣ийбаал̣и • Dhammasaṅgaṇīpāḷi / логуд̇д̇арагусалам̣ • Lokuttarakusalaṃ
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / д̇хаммасан̇г̇ан̣ий-мууладийгаа • Dhammasaṅgaṇī-mūlaṭīkā / логуд̇д̇арагусалаван̣н̣анаа • Lokuttarakusalavaṇṇanā
дийгаа • Tīkā / абхид̇хаммабидага (дийгаа) • Abhidhammapiṭaka (ṭīkā) / д̇хаммасан̇г̇ан̣ий-анудийгаа • Dhammasaṅgaṇī-anuṭīkā / логуд̇д̇арагусалаван̣н̣анаа • Lokuttarakusalavaṇṇanā
