| Library / Tipiṭaka / திபிடக • Tipiṭaka / த⁴ம்மஸங்க³ணீ-அனுடீகா • Dhammasaṅgaṇī-anuṭīkā |
லோகுத்தரவிபாககதா²வண்ணனா
Lokuttaravipākakathāvaṇṇanā
505. தண்ஹாவிஜ்ஜாதீ³ஹி ஆஹிதவிஸேஸங் லோகியகம்மங் விபாகுப்பாத³னஸமத்த²ங் ஹோதி, ந அஞ்ஞதா²தி வுத்தங் ‘‘தண்ஹாதீ³ஹி அபி⁴ஸங்க²த’’ந்தி. இதரஸ்ஸாதி ஸுஞ்ஞதாப்பணிஹிதனாமரஹிதஸ்ஸ. யோ ஸுத்³தி⁴கபடிபதா³ய விபா⁴விதோ, யோ ச ஸுத்தந்தபரியாயேன அனிமித்தோதி வுச்சதி. தேனேவாஹ ‘‘அனிச்சானுபஸ்ஸனானந்தரஸ்ஸபி மக்³க³ஸ்ஸா’’திஆதி³. வளஞ்ஜன…பே॰… பே⁴தோ³ ஹோதி மக்³கா³க³மனவஸேனாதி அதி⁴ப்பாயோ. ‘‘மக்³கா³னந்தரப²லசித்தஸ்மிங் யேவா’’தி வசனங் அபெக்கி²த்வா ‘‘ஸுஞ்ஞதாதி³னாமலாபே⁴ ஸதீ’’தி ஸாஸங்கங் ஆஹ. அனிமித்தனாமஞ்ச லப⁴தி மக்³கா³க³மனதோ ப²லஸ்ஸ நாமலாபே⁴ விஸேஸாபா⁴வதோதி அதி⁴ப்பாயோ. தாதி³ஸாய ஏவாதி யாதி³ஸா மக்³கே³ ஸத்³தா⁴, தாதி³ஸாய ஏவ ப²லே ஸத்³தா⁴ய.
505. Taṇhāvijjādīhi āhitavisesaṃ lokiyakammaṃ vipākuppādanasamatthaṃ hoti, na aññathāti vuttaṃ ‘‘taṇhādīhi abhisaṅkhata’’nti. Itarassāti suññatāppaṇihitanāmarahitassa. Yo suddhikapaṭipadāya vibhāvito, yo ca suttantapariyāyena animittoti vuccati. Tenevāha ‘‘aniccānupassanānantarassapi maggassā’’tiādi. Vaḷañjana…pe… bhedo hoti maggāgamanavasenāti adhippāyo. ‘‘Maggānantaraphalacittasmiṃ yevā’’ti vacanaṃ apekkhitvā ‘‘suññatādināmalābhe satī’’ti sāsaṅkaṃ āha. Animittanāmañca labhati maggāgamanato phalassa nāmalābhe visesābhāvatoti adhippāyo. Tādisāya evāti yādisā magge saddhā, tādisāya eva phale saddhāya.
555. ‘‘கதமே த⁴ம்மா நிய்யானிகா? சத்தாரோ மக்³கா³’’தி வசனதோ (த⁴॰ ஸ॰ 1295, 1609) அனிய்யானிகபத³னித்³தே³ஸே ச ‘‘சதூஸு பூ⁴மீஸு விபாகோ’’தி (த⁴॰ ஸ॰ 1610) வுத்தத்தா ந நிப்பரியாயேன ப²லங் நிய்யானஸபா⁴வங், நிய்யானஸபா⁴வஸ்ஸ பன விபாகோ கிலேஸானங் படிப்பஸ்ஸத்³தி⁴ப்பஹானவஸேன பவத்தமானோ பரியாயதோ ததா² வுச்சதீதி ஆஹ ‘‘நிய்யானிகஸபா⁴வஸ்ஸா’’திஆதி³. பஞ்சங்கி³கோ சாதி ஏதேன மக்³க³விப⁴ங்கே³ ஸப்³ப³வாரேஸுபி ப²லஸ்ஸ மக்³க³பரியாயோ ஆக³தோதி த³ஸ்ஸேதி. தத்த² ஹி அரியமக்³க³க்க²ணே விஜ்ஜமானாஸுபி விரதீஸு தத³வஸிட்டா²னங் பஞ்சன்னங் காராபகங்கா³னங் அதிரேககிச்சதாத³ஸ்ஸனத்த²ங் பாளியங் பஞ்சங்கி³கோபி மக்³கோ³ உத்³த⁴டோதி. ஏவங் பொ³ஜ்ஜ²ங்கா³பீதி யதா² மக்³கோ³, ஏவங் மக்³க³பொ³ஜ்ஜ²ங்க³விப⁴ங்கே³ஸு ப²லேஸு ச பொ³ஜ்ஜ²ங்கா³ உத்³த⁴டாதி அத்தோ².
555. ‘‘Katame dhammā niyyānikā? Cattāro maggā’’ti vacanato (dha. sa. 1295, 1609) aniyyānikapadaniddese ca ‘‘catūsu bhūmīsu vipāko’’ti (dha. sa. 1610) vuttattā na nippariyāyena phalaṃ niyyānasabhāvaṃ, niyyānasabhāvassa pana vipāko kilesānaṃ paṭippassaddhippahānavasena pavattamāno pariyāyato tathā vuccatīti āha ‘‘niyyānikasabhāvassā’’tiādi. Pañcaṅgiko cāti etena maggavibhaṅge sabbavāresupi phalassa maggapariyāyo āgatoti dasseti. Tattha hi ariyamaggakkhaṇe vijjamānāsupi viratīsu tadavasiṭṭhānaṃ pañcannaṃ kārāpakaṅgānaṃ atirekakiccatādassanatthaṃ pāḷiyaṃ pañcaṅgikopi maggo uddhaṭoti. Evaṃ bojjhaṅgāpīti yathā maggo, evaṃ maggabojjhaṅgavibhaṅgesu phalesu ca bojjhaṅgā uddhaṭāti attho.
லோகுத்தரவிபாககதா²வண்ணனா நிட்டி²தா.
Lokuttaravipākakathāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / த⁴ம்மஸங்க³ணீபாளி • Dhammasaṅgaṇīpāḷi / லோகுத்தரவிபாக-பட²மமக்³க³விபாகா • Lokuttaravipāka-paṭhamamaggavipākā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā / லோகுத்தரவிபாககதா² • Lokuttaravipākakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / த⁴ம்மஸங்க³ணீ-மூலடீகா • Dhammasaṅgaṇī-mūlaṭīkā / லோகுத்தரவிபாககதா²வண்ணனா • Lokuttaravipākakathāvaṇṇanā
