| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
৪. লোমসকঙ্গিযভদ্দেকরত্তসুত্তৰণ্ণনা
4. Lomasakaṅgiyabhaddekarattasuttavaṇṇanā
২৮৬. এৰং মে সুতন্তি লোমসকঙ্গিযভদ্দেকরত্তসুত্তং। তত্থ লোমসকঙ্গিযোতি অঙ্গথেরো কির নামেস, কাযস্স পন ঈসকলোমসাকারতায লোমসকঙ্গিযোতি পাকটো জাতো। চন্দনো দেৰপুত্তোতি কস্সপসম্মাসম্বুদ্ধকালে কিরেস চন্দনো নাম উপাসকো অড্ঢো মহদ্ধনো তীণি রতনানি চতূহি পচ্চযেহি পূজেত্ৰা দেৰলোকে নিব্বত্তো, পুরিমনামেন চন্দনো দেৰপুত্তোত্ৰেৰ সঙ্খং গতো। পণ্ডুকম্বলসিলাযন্তি রত্তকম্বলসিলাযং। তস্সা কির রত্তকম্বলস্সেৰ জযসুমনপুপ্ফরাসি ৰিয ৰণ্ণো, তস্মা ‘‘পণ্ডুকম্বলসিলা’’তি ৰুচ্চতি।
286.Evaṃme sutanti lomasakaṅgiyabhaddekarattasuttaṃ. Tattha lomasakaṅgiyoti aṅgathero kira nāmesa, kāyassa pana īsakalomasākāratāya lomasakaṅgiyoti pākaṭo jāto. Candanodevaputtoti kassapasammāsambuddhakāle kiresa candano nāma upāsako aḍḍho mahaddhano tīṇi ratanāni catūhi paccayehi pūjetvā devaloke nibbatto, purimanāmena candano devaputtotveva saṅkhaṃ gato. Paṇḍukambalasilāyanti rattakambalasilāyaṃ. Tassā kira rattakambalasseva jayasumanapuppharāsi viya vaṇṇo, tasmā ‘‘paṇḍukambalasilā’’ti vuccati.
কদা পন তত্থ ভগৰা ৰিহাসীতি? বোধিপত্তিতো সত্তমে সংৰচ্ছরে সাৰত্থিযং আসাল়্হীমাসপুণ্ণমায দ্ৰাদসযোজনায পরিসায মজ্ঝে যমকপাটিহারিযং কত্ৰা ওরুয্হ কণ্ডম্বমূলে পঞ্ঞত্তৰরবুদ্ধাসনে নিসীদিত্ৰা ধম্মদেসনায মহাজনং মহাৰিদুগ্গতো উদ্ধরিত্ৰা বুদ্ধা নাম যস্মা পাটিহারিযং কত্ৰা মনুস্সপথে ন ৰসন্তি, তস্মা পস্সমানস্সেৰ তস্স জনস্স পদৰীক্কমং কত্ৰা তাৰতিংসভৰনে পারিচ্ছত্তকমূলে পণ্ডুকম্বলসিলাযং ৰস্সং উপগতো, তস্মিং সমযে ৰিহাসি।
Kadā pana tattha bhagavā vihāsīti? Bodhipattito sattame saṃvacchare sāvatthiyaṃ āsāḷhīmāsapuṇṇamāya dvādasayojanāya parisāya majjhe yamakapāṭihāriyaṃ katvā oruyha kaṇḍambamūle paññattavarabuddhāsane nisīditvā dhammadesanāya mahājanaṃ mahāviduggato uddharitvā buddhā nāma yasmā pāṭihāriyaṃ katvā manussapathe na vasanti, tasmā passamānasseva tassa janassa padavīkkamaṃ katvā tāvatiṃsabhavane pāricchattakamūle paṇḍukambalasilāyaṃ vassaṃ upagato, tasmiṃ samaye vihāsi.
তত্র ভগৰাতি তত্র ৰিহরন্তো ভগৰা যেভুয্যেন দসহি চক্কৰাল়সহস্সেহি সন্নিপতিতাহি দেৰতাহি পরিৰুতো মাতরং কাযসক্খিং কত্ৰা অভিধম্মপিটকং কথেন্তো গম্ভীরং নিপুণং তিলক্খণাহতং রূপারূপপরিচ্ছেদকথং পটিৰিজ্ঝিতুং অসক্কোন্তানং দেৰানং সংৰেগজননত্থং অন্তরন্তরা ভদ্দেকরত্তস্স উদ্দেসঞ্চ ৰিভঙ্গঞ্চ অভাসি। তত্রাযং দেৰপুত্তো উগ্গণ্হন্তো ইমা গাথা সদ্ধিং ৰিভঙ্গেন উগ্গণ্হি, দেৰত্তস্স পন পমাদাধিট্ঠানত্তা দিব্বেহি আরম্মণেহি নিপ্পীল়িযমানো অনুপুব্বেন সুত্তং সম্মুট্ঠো গাথামত্তমেৰ ধারেসি। তেনাহ ‘‘এৰং খো অহং ভিক্খু ধারেমি ভদ্দেকরত্তিযো গাথা’’তি।
Tatra bhagavāti tatra viharanto bhagavā yebhuyyena dasahi cakkavāḷasahassehi sannipatitāhi devatāhi parivuto mātaraṃ kāyasakkhiṃ katvā abhidhammapiṭakaṃ kathento gambhīraṃ nipuṇaṃ tilakkhaṇāhataṃ rūpārūpaparicchedakathaṃ paṭivijjhituṃ asakkontānaṃ devānaṃ saṃvegajananatthaṃ antarantarā bhaddekarattassa uddesañca vibhaṅgañca abhāsi. Tatrāyaṃ devaputto uggaṇhanto imā gāthā saddhiṃ vibhaṅgena uggaṇhi, devattassa pana pamādādhiṭṭhānattā dibbehi ārammaṇehi nippīḷiyamāno anupubbena suttaṃ sammuṭṭho gāthāmattameva dhāresi. Tenāha ‘‘evaṃ kho ahaṃ bhikkhu dhāremi bhaddekarattiyo gāthā’’ti.
উগ্গণ্হাহি ত্ৰন্তিআদীসু তুণ্হীভূতো নিসীদিত্ৰা সুণন্তো উগ্গণ্হাতি নাম, ৰাচায সজ্ঝাযং করোন্তো পরিযাপুণাতি নাম, অঞ্ঞেসং ৰাচেন্তো ধারেতি নাম। সেসমেত্থ উত্তানমেৰাতি।
Uggaṇhāhitvantiādīsu tuṇhībhūto nisīditvā suṇanto uggaṇhāti nāma, vācāya sajjhāyaṃ karonto pariyāpuṇāti nāma, aññesaṃ vācento dhāreti nāma. Sesamettha uttānamevāti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
লোমসকঙ্গিযভদ্দেকরত্তসুত্তৰণ্ণনা নিট্ঠিতা।
Lomasakaṅgiyabhaddekarattasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৪. লোমসকঙ্গিযভদ্দেকরত্তসুত্তং • 4. Lomasakaṅgiyabhaddekarattasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৪. লোমসককঙ্গিযভদ্দেকরত্তসুত্তৰণ্ণনা • 4. Lomasakakaṅgiyabhaddekarattasuttavaṇṇanā
