| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๘. โลมสกงฺคิยเตฺถรอปทานํ
8. Lomasakaṅgiyattheraapadānaṃ
๒๒๕.
225.
‘‘อิมมฺหิ ภทฺทเก กเปฺป, พฺรหฺมพนฺธุ มหายโส;
‘‘Imamhi bhaddake kappe, brahmabandhu mahāyaso;
กสฺสโป นาม โคเตฺตน, อุปฺปชฺชิ วทตํ วโรฯ
Kassapo nāma gottena, uppajji vadataṃ varo.
๒๒๖.
226.
‘‘ตทาหํ จนฺทโน เจว, ปพฺพชิตฺวาน สาสเน;
‘‘Tadāhaṃ candano ceva, pabbajitvāna sāsane;
อาปาณโกฎิกํ ธมฺมํ, ปูรยิตฺวาน สาสเนฯ
Āpāṇakoṭikaṃ dhammaṃ, pūrayitvāna sāsane.
๒๒๗.
227.
‘‘ตโต จุตา สนฺตุสิตํ, อุปปนฺนา อุโภ มยํ;
‘‘Tato cutā santusitaṃ, upapannā ubho mayaṃ;
ตตฺถ ทิเพฺพหิ นเจฺจหิ, คีเตหิ วาทิเตหิ จฯ
Tattha dibbehi naccehi, gītehi vāditehi ca.
๒๒๘.
228.
‘‘รูปาทิทสหเงฺคหิ, อภิโภตฺวาน เสสเก;
‘‘Rūpādidasahaṅgehi, abhibhotvāna sesake;
ยาวตายุํ วสิตฺวาน, อนุโภตฺวา มหาสุขํฯ
Yāvatāyuṃ vasitvāna, anubhotvā mahāsukhaṃ.
๒๒๙.
229.
‘‘ตโต จวิตฺวา ติทสํ, จนฺทโน อุปปชฺชถ;
‘‘Tato cavitvā tidasaṃ, candano upapajjatha;
อหํ กปิลวตฺถุสฺมิํ, อชายิํ สากิยตฺรโชฯ
Ahaṃ kapilavatthusmiṃ, ajāyiṃ sākiyatrajo.
๒๓๐.
230.
‘‘ยทา อุทายิเตฺถเรน, อชฺฌิโฎฺฐ โลกนายโก;
‘‘Yadā udāyittherena, ajjhiṭṭho lokanāyako;
อนุกมฺปิย สกฺยานํ, อุเปสิ กปิลวฺหยํฯ
Anukampiya sakyānaṃ, upesi kapilavhayaṃ.
๒๓๑.
231.
‘‘ตทาติมานิโน สกฺยา, น พุทฺธสฺส คุณญฺญุโน;
‘‘Tadātimānino sakyā, na buddhassa guṇaññuno;
ปณมนฺติ น สมฺพุทฺธํ, ชาติถทฺธา อนาทราฯ
Paṇamanti na sambuddhaṃ, jātithaddhā anādarā.
๒๓๒.
232.
‘‘เตสํ สงฺกปฺปมญฺญาย, อากาเส จงฺกมี ชิโน;
‘‘Tesaṃ saṅkappamaññāya, ākāse caṅkamī jino;
ปชฺชุโนฺน วิย วสฺสิตฺถ, ปชฺชลิตฺถ ยถา สิขีฯ
Pajjunno viya vassittha, pajjalittha yathā sikhī.
๒๓๓.
233.
‘‘ทเสฺสตฺวา รูปมตุลํ, ปุน อนฺตรธายถ;
‘‘Dassetvā rūpamatulaṃ, puna antaradhāyatha;
เอโกปิ หุตฺวา พหุธา, อโหสิ ปุนเรกโกฯ
Ekopi hutvā bahudhā, ahosi punarekako.
๒๓๔.
234.
‘‘อนฺธการํ ปกาสญฺจ, ทสฺสยิตฺวา อเนกธา;
‘‘Andhakāraṃ pakāsañca, dassayitvā anekadhā;
ปาฎิเหรํ กริตฺวาน, วินยี ญาตเก มุนิฯ
Pāṭiheraṃ karitvāna, vinayī ñātake muni.
๒๓๕.
235.
‘‘จาตุทฺทีโป มหาเมโฆ, ตาวเทว ปวสฺสถ;
‘‘Cātuddīpo mahāmegho, tāvadeva pavassatha;
ตทา หิ ชาตกํ พุโทฺธ, เวสฺสนฺตรมเทสยิฯ
Tadā hi jātakaṃ buddho, vessantaramadesayi.
๒๓๖.
236.
‘‘ตทา เต ขตฺติยา สเพฺพ, นิหนฺตฺวา ชาติชํ มทํ;
‘‘Tadā te khattiyā sabbe, nihantvā jātijaṃ madaṃ;
อุเปสุํ สรณํ พุทฺธํ, อาห สุโทฺธทโน ตทาฯ
Upesuṃ saraṇaṃ buddhaṃ, āha suddhodano tadā.
๒๓๗.
237.
‘‘‘อิทํ ตติยํ ตว ภูริปญฺญ, ปาทานิ วนฺทามิ สมนฺตจกฺขุ;
‘‘‘Idaṃ tatiyaṃ tava bhūripañña, pādāni vandāmi samantacakkhu;
ยทาภิชาโต ปถวี ปกมฺปยี, ยทา จ ตํ นชฺชหิ ชมฺพุฉายา’ฯ
Yadābhijāto pathavī pakampayī, yadā ca taṃ najjahi jambuchāyā’.
๒๓๘.
238.
‘‘ตทา พุทฺธานุภาวํ ตํ, ทิสฺวา วิมฺหิตมานโส;
‘‘Tadā buddhānubhāvaṃ taṃ, disvā vimhitamānaso;
ปพฺพชิตฺวาน ตเตฺถว, นิวสิํ มาตุปูชโกฯ
Pabbajitvāna tattheva, nivasiṃ mātupūjako.
๒๓๙.
239.
‘‘จนฺทโน เทวปุโตฺต มํ, อุปคนฺตฺวานุปุจฺฉถ;
‘‘Candano devaputto maṃ, upagantvānupucchatha;
ภเทฺทกรตฺตสฺส ตทา, สเงฺขปวิตฺถารํ นยํฯ
Bhaddekarattassa tadā, saṅkhepavitthāraṃ nayaṃ.
๒๔๐.
240.
‘‘โจทิโตหํ ตทา เตน, อุเปจฺจ นรนายกํ;
‘‘Coditohaṃ tadā tena, upecca naranāyakaṃ;
ภเทฺทกรตฺตํ สุตฺวาน, สํวิโคฺค วนมามโกฯ
Bhaddekarattaṃ sutvāna, saṃviggo vanamāmako.
๒๔๑.
241.
‘‘ตทา มาตรมปุจฺฉิํ, วเน วจฺฉามิ เอกโก;
‘‘Tadā mātaramapucchiṃ, vane vacchāmi ekako;
๒๔๒.
242.
อุรสา ปนุทิสฺสามิ, วิเวกมนุพฺรูหยํฯ
Urasā panudissāmi, vivekamanubrūhayaṃ.
๒๔๓.
243.
‘‘ตทา วนํ ปวิโฎฺฐหํ, สริตฺวา ชินสาสนํ;
‘‘Tadā vanaṃ paviṭṭhohaṃ, saritvā jinasāsanaṃ;
ภเทฺทกรตฺตโอวาทํ, อรหตฺตมปาปุณิํฯ
Bhaddekarattaovādaṃ, arahattamapāpuṇiṃ.
๒๔๔.
244.
‘‘‘อตีตํ นานฺวาคเมยฺย, นปฺปฎิกเงฺข อนาคตํ;
‘‘‘Atītaṃ nānvāgameyya, nappaṭikaṅkhe anāgataṃ;
ยทตีตํ ปหีนํ ตํ, อปฺปตฺตญฺจ อนาคตํฯ
Yadatītaṃ pahīnaṃ taṃ, appattañca anāgataṃ.
๒๔๕.
245.
‘‘‘ปจฺจุปฺปนฺนญฺจ โย ธมฺมํ, ตตฺถ ตตฺถ วิปสฺสติ;
‘‘‘Paccuppannañca yo dhammaṃ, tattha tattha vipassati;
อสํหีรํ อสํกุปฺปํ, ตํ วิทฺวา มนุพฺรูหเยฯ
Asaṃhīraṃ asaṃkuppaṃ, taṃ vidvā manubrūhaye.
๒๔๖.
246.
‘‘‘อเชฺชว กิจฺจมาตปฺปํ, โก ชญฺญา มรณํ สุเว;
‘‘‘Ajjeva kiccamātappaṃ, ko jaññā maraṇaṃ suve;
๒๔๗.
247.
‘‘‘เอวํวิหาริํ อาตาปิํ, อโหรตฺตมตนฺทิตํ;
‘‘‘Evaṃvihāriṃ ātāpiṃ, ahorattamatanditaṃ;
ตํ เว ภเทฺทกรโตฺตติ, สโนฺต อาจิกฺขเต มุนิ’ฯ
Taṃ ve bhaddekarattoti, santo ācikkhate muni’.
๒๔๘.
248.
‘‘กิเลสา ฌาปิตา มยฺหํ…เป.… วิหรามิ อนาสโวฯ
‘‘Kilesā jhāpitā mayhaṃ…pe… viharāmi anāsavo.
๒๔๙.
249.
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
‘‘Svāgataṃ vata me āsi…pe… kataṃ buddhassa sāsanaṃ.
๒๕๐.
250.
‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ
‘‘Paṭisambhidā catasso…pe… kataṃ buddhassa sāsanaṃ’’.
อิตฺถํ สุทํ อายสฺมา โลมสกงฺคิโย 9 เถโร อิมา คาถาโย
Itthaṃ sudaṃ āyasmā lomasakaṅgiyo 10 thero imā gāthāyo
อภาสิตฺถาติฯ
Abhāsitthāti.
โลมสกงฺคิยเตฺถรสฺสาปทานํ อฎฺฐมํฯ
Lomasakaṅgiyattherassāpadānaṃ aṭṭhamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๘. โลมสกงฺคิยเตฺถรอปทานวณฺณนา • 8. Lomasakaṅgiyattheraapadānavaṇṇanā
