| Library / Tipiṭaka / তিপিটক • Tipiṭaka / থেরগাথা-অট্ঠকথা • Theragāthā-aṭṭhakathā |
৭. লোমসকঙ্গিযত্থেরগাথাৰণ্ণনা
7. Lomasakaṅgiyattheragāthāvaṇṇanā
দব্বং কুসন্তি আযস্মতো লোমসকঙ্গিযত্থেরস্স গাথা। কা উপ্পত্তি? সো কির ইতো একনৰুতে কপ্পে ৰিপস্সিং ভগৰন্তং পস্সিত্ৰা পসন্নমানসো নানাপুপ্ফেহি পূজেত্ৰা তেন পুঞ্ঞকম্মেন দেৰলোকে নিব্বত্তো পুন অপরাপরং পুঞ্ঞানি কত্ৰা সুগতীসুযেৰ সংসরন্তো কস্সপস্স ভগৰতো সাসনে পব্বজিত্ৰা সমণধম্মং করোতি। তেন চ সমযেন সত্থারা ভদ্দেকরত্তপটিপদায কথিতায অঞ্ঞতরো ভিক্খু ভদ্দেকরত্তসুত্তৰসেন তেন সাকচ্ছং করোতি। সো তং ন সম্পাযাসি। অসম্পাযন্তো ‘‘অহং অনাগতে তুয্হং ভদ্দেকরত্তং কথেতুং সমত্থো ভৰেয্য’’ন্তি পণিধানং অকাসি, ইতরো ‘‘পুচ্ছেয্য’’ন্তি। এতেসু পঠমো একং বুদ্ধন্তরং দেৰমনুস্সেসু সংসরিত্ৰা অম্হাকং ভগৰতো কালে কপিলৰত্থুস্মিং সাকিযরাজকুলে নিব্বত্তি। তস্স সুখুমালভাৰেন সোণস্স ৰিয পাদতলেসু লোমানি জাতানি, তেনস্স লোমসকঙ্গিযোতি নামং অহোসি। ইতরো দেৰলোকে নিব্বত্তিত্ৰা চন্দনোতি পঞ্ঞাযিত্থ। লোমসকঙ্গিযো অনুরুদ্ধাদীসু সক্যকুমারেসু পব্বজন্তেসু পব্বজিতুং ন ইচ্ছি। অথ নং সংৰেজেতুং চন্দনো দেৰপুত্তো উপসঙ্কমিত্ৰা ভদ্দেকরত্তং পুচ্ছি। ইতরো ‘‘ন জানামী’’তি। পুন দেৰপুত্তো ‘‘অথ কস্মা তযা ‘ভদ্দেকরত্তং কথেয্য’ন্তি সঙ্গরো কতো, ইদানি পন নামমত্তম্পি ন জানাসী’’তি চোদেসি। ইতরো তেন সদ্ধিং ভগৰন্তং উপসঙ্কমিত্ৰা, ‘‘মযা কির, ভন্তে, পুব্বে ‘ইমস্স ভদ্দেকরত্তং কথেস্সামী’তি সঙ্গরো কতো’’তি পুচ্ছি। ভগৰা ‘‘আম, কুলপুত্ত, কস্সপস্স ভগৰতো কালে তযা এৰং কত’’ন্তি আহ। স্ৰাযমত্থো উপরিপণ্ণাসকে আগতনযেন ৰিত্থারতো ৰেদিতব্বো। অথ লোমসকঙ্গিযো ‘‘তেন হি, ভন্তে, পব্বাজেথ ম’’ন্তি আহ। ভগৰা ‘‘ন, খো, তথাগতা মাতাপিতূহি অননুঞ্ঞাতং পুত্তং পব্বাজেন্তী’’তি পটিক্খিপি। সো মাতু সন্তিকং গন্ত্ৰা ‘‘অনুজানাহি মং, অম্ম, পব্বজিতুং, পব্বজিস্সামহ’’ন্তি ৰত্ৰা, মাতরা ‘‘তাত, সুখুমালো ত্ৰং কথং পব্বজিস্সসী’’তি ৰুত্তে, ‘‘অত্তনো পরিস্সযসহনভাৰং পকাসেন্তো ‘‘দব্বং কুসং পোটকিল’’ন্তি গাথং অভাসি।
Dabbaṃkusanti āyasmato lomasakaṅgiyattherassa gāthā. Kā uppatti? So kira ito ekanavute kappe vipassiṃ bhagavantaṃ passitvā pasannamānaso nānāpupphehi pūjetvā tena puññakammena devaloke nibbatto puna aparāparaṃ puññāni katvā sugatīsuyeva saṃsaranto kassapassa bhagavato sāsane pabbajitvā samaṇadhammaṃ karoti. Tena ca samayena satthārā bhaddekarattapaṭipadāya kathitāya aññataro bhikkhu bhaddekarattasuttavasena tena sākacchaṃ karoti. So taṃ na sampāyāsi. Asampāyanto ‘‘ahaṃ anāgate tuyhaṃ bhaddekarattaṃ kathetuṃ samattho bhaveyya’’nti paṇidhānaṃ akāsi, itaro ‘‘puccheyya’’nti. Etesu paṭhamo ekaṃ buddhantaraṃ devamanussesu saṃsaritvā amhākaṃ bhagavato kāle kapilavatthusmiṃ sākiyarājakule nibbatti. Tassa sukhumālabhāvena soṇassa viya pādatalesu lomāni jātāni, tenassa lomasakaṅgiyoti nāmaṃ ahosi. Itaro devaloke nibbattitvā candanoti paññāyittha. Lomasakaṅgiyo anuruddhādīsu sakyakumāresu pabbajantesu pabbajituṃ na icchi. Atha naṃ saṃvejetuṃ candano devaputto upasaṅkamitvā bhaddekarattaṃ pucchi. Itaro ‘‘na jānāmī’’ti. Puna devaputto ‘‘atha kasmā tayā ‘bhaddekarattaṃ katheyya’nti saṅgaro kato, idāni pana nāmamattampi na jānāsī’’ti codesi. Itaro tena saddhiṃ bhagavantaṃ upasaṅkamitvā, ‘‘mayā kira, bhante, pubbe ‘imassa bhaddekarattaṃ kathessāmī’ti saṅgaro kato’’ti pucchi. Bhagavā ‘‘āma, kulaputta, kassapassa bhagavato kāle tayā evaṃ kata’’nti āha. Svāyamattho uparipaṇṇāsake āgatanayena vitthārato veditabbo. Atha lomasakaṅgiyo ‘‘tena hi, bhante, pabbājetha ma’’nti āha. Bhagavā ‘‘na, kho, tathāgatā mātāpitūhi ananuññātaṃ puttaṃ pabbājentī’’ti paṭikkhipi. So mātu santikaṃ gantvā ‘‘anujānāhi maṃ, amma, pabbajituṃ, pabbajissāmaha’’nti vatvā, mātarā ‘‘tāta, sukhumālo tvaṃ kathaṃ pabbajissasī’’ti vutte, ‘‘attano parissayasahanabhāvaṃ pakāsento ‘‘dabbaṃ kusaṃ poṭakila’’nti gāthaṃ abhāsi.
২৭. তত্থ দব্বন্তি দব্বতিণমাহ, যং ‘‘সদ্দুলো’’তিপি ৰুচ্চতি। কুসন্তি কুসতিণং, যো ‘‘কাসো’’তি ৰুচ্চতি। পোটকিলন্তি সকণ্টকং অকণ্টকঞ্চ গচ্ছং। ইধ পন সকণ্টকমেৰ অধিপ্পেতং। উসীরাদীনি সুৰিঞ্ঞেয্যানি। দব্বাদীনি তিণানি বীরণতিণানি পাদেহি অক্কন্তস্সাপি দুক্খজনকানি গমনন্তরাযকরানি চ, তানি চ পনাহং উরসা পনুদিস্সামি উরসাপি অপনেস্সামি। এৰং অপনেন্তো তং নিমিত্তং দুক্খং সহন্তো অরঞ্ঞাযতনে গুম্বন্তরং পৰিসিত্ৰা সমণধম্মং কাতুং সক্খিস্সামি। কো পন ৰাদো পাদেহি অক্কমনেতি দস্সেতি। ৰিৰেকমনুব্রূহযন্তি কাযৰিৰেকং চিত্তৰিৰেকং উপধিৰিৰেকঞ্চ অনুব্রূহযন্তো। গণসঙ্গণিকঞ্হি পহায কাযৰিৰেকং অনুব্রূহযন্তস্সেৰ অট্ঠতিংসায আরম্মণেসু যত্থ কত্থচি চিত্তং সমাদহন্তস্স চিত্তৰিৰেকো, ন সঙ্গণিকারতস্স। সমাহিতস্সেৰ ৰিপস্সনায কম্মং করোন্তস্স সমথৰিপস্সনঞ্চ যুগনদ্ধং করোন্তস্স কিলেসানং খেপনেন উপধিৰিৰেকাধিগমো, ন অসমাহিতস্স। তেন ৰুত্তং ‘‘ৰিৰেকমনুব্রূহযন্তি কাযৰিৰেকং চিত্তৰিৰেকং উপধিৰিৰেকঞ্চ অনুব্রূহযন্তো’’তি। এৰং পন পুত্তেন ৰুত্তে মাতা ‘‘তেন হি, তাত, পব্বজা’’তি অনুজানি। সো ভগৰন্তং উপসঙ্কমিত্ৰা পব্বজ্জং যাচি। তং সত্থা পব্বাজেসি। তং পব্বজিত্ৰা কতপুব্বকিচ্চং কম্মট্ঠানং গহেত্ৰা অরঞ্ঞং পৰিসন্তং ভিক্খূ আহংসু – ‘‘আৰুসো, ত্ৰং সুখুমালো কিং সক্খিস্সসি অরঞ্ঞে ৰসিতু’’ন্তি। সো তেসম্পি তমেৰ গাথং ৰত্ৰা অরঞ্ঞং পৰিসিত্ৰা ভাৰনং অনুযুঞ্জন্তো নচিরস্সেৰ ছল়ভিঞ্ঞো অহোসি। তেন ৰুত্তং অপদানে (অপ॰ থের ২.৫২.২৩-২৭) –
27. Tattha dabbanti dabbatiṇamāha, yaṃ ‘‘saddulo’’tipi vuccati. Kusanti kusatiṇaṃ, yo ‘‘kāso’’ti vuccati. Poṭakilanti sakaṇṭakaṃ akaṇṭakañca gacchaṃ. Idha pana sakaṇṭakameva adhippetaṃ. Usīrādīni suviññeyyāni. Dabbādīni tiṇāni bīraṇatiṇāni pādehi akkantassāpi dukkhajanakāni gamanantarāyakarāni ca, tāni ca panāhaṃ urasā panudissāmi urasāpi apanessāmi. Evaṃ apanento taṃ nimittaṃ dukkhaṃ sahanto araññāyatane gumbantaraṃ pavisitvā samaṇadhammaṃ kātuṃ sakkhissāmi. Ko pana vādo pādehi akkamaneti dasseti. Vivekamanubrūhayanti kāyavivekaṃ cittavivekaṃ upadhivivekañca anubrūhayanto. Gaṇasaṅgaṇikañhi pahāya kāyavivekaṃ anubrūhayantasseva aṭṭhatiṃsāya ārammaṇesu yattha katthaci cittaṃ samādahantassa cittaviveko, na saṅgaṇikāratassa. Samāhitasseva vipassanāya kammaṃ karontassa samathavipassanañca yuganaddhaṃ karontassa kilesānaṃ khepanena upadhivivekādhigamo, na asamāhitassa. Tena vuttaṃ ‘‘vivekamanubrūhayanti kāyavivekaṃ cittavivekaṃ upadhivivekañca anubrūhayanto’’ti. Evaṃ pana puttena vutte mātā ‘‘tena hi, tāta, pabbajā’’ti anujāni. So bhagavantaṃ upasaṅkamitvā pabbajjaṃ yāci. Taṃ satthā pabbājesi. Taṃ pabbajitvā katapubbakiccaṃ kammaṭṭhānaṃ gahetvā araññaṃ pavisantaṃ bhikkhū āhaṃsu – ‘‘āvuso, tvaṃ sukhumālo kiṃ sakkhissasi araññe vasitu’’nti. So tesampi tameva gāthaṃ vatvā araññaṃ pavisitvā bhāvanaṃ anuyuñjanto nacirasseva chaḷabhiñño ahosi. Tena vuttaṃ apadāne (apa. thera 2.52.23-27) –
‘‘সুৰণ্ণৰণ্ণং সম্বুদ্ধং, আহুতীনং পটিগ্গহং।
‘‘Suvaṇṇavaṇṇaṃ sambuddhaṃ, āhutīnaṃ paṭiggahaṃ;
রথিযং পটিপজ্জন্তং, নানাপুপ্ফেহি পূজযিং॥
Rathiyaṃ paṭipajjantaṃ, nānāpupphehi pūjayiṃ.
‘‘একনৰুতিতো কপ্পে, যং পুপ্ফমভিপূজযিং।
‘‘Ekanavutito kappe, yaṃ pupphamabhipūjayiṃ;
দুগ্গতিং নাভিজানামি, বুদ্ধপূজাযিদং ফলং॥
Duggatiṃ nābhijānāmi, buddhapūjāyidaṃ phalaṃ.
‘‘কিলেসা ঝাপিতা ময্হং…পে॰… কতং বুদ্ধস্স সাসন’’ন্তি॥
‘‘Kilesā jhāpitā mayhaṃ…pe… kataṃ buddhassa sāsana’’nti.
অরহত্তং পন পত্ৰা থেরো অঞ্ঞং ব্যাকরোন্তো তংযেৰ গাথং অভাসীতি।
Arahattaṃ pana patvā thero aññaṃ byākaronto taṃyeva gāthaṃ abhāsīti.
লোমসকঙ্গিযত্থেরগাথাৰণ্ণনা নিট্ঠিতা।
Lomasakaṅgiyattheragāthāvaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / থেরগাথাপাল়ি • Theragāthāpāḷi / ৭. লোমসকঙ্গিযত্থেরগাথা • 7. Lomasakaṅgiyattheragāthā
