| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[433] 7. ломасагассабаж̇аад̇агаван̣н̣анаа
[433] 7. Lomasakassapajātakavaṇṇanā
асса инд̣̇асамо рааж̇аад̇и ид̣̇ам̣ сад̇т̇аа ж̇зд̇аванз вихаранд̇о згам̣ угган̣тид̇абхигкум̣ аараб̣бха гат̇зси. д̇ан̃хи бхигкум̣ сад̇т̇аа ‘‘сажжам̣ гира д̇вам̣ бхигку угган̣тид̇осий’’д̇и бужчид̇ваа ‘‘сажжа’’нд̇и вуд̇д̇з ‘‘бхигку синзругамбанаваад̇о гим̣ бураан̣абан̣н̣аани на гамбзссад̇и, яасасаман̇г̇иноби саббурисаа ааяасагяам̣ баабун̣анд̇и, гилзсаа наамзд̇з барисуд̣̇д̇хасад̇д̇зби сам̣гилидтз гаронд̇и, баг̇зва д̇аад̣̇иса’’нд̇и вад̇ваа д̇зна яаажид̇о ад̇ийд̇ам̣ аахари.
Assa indasamo rājāti idaṃ satthā jetavane viharanto ekaṃ ukkaṇṭhitabhikkhuṃ ārabbha kathesi. Tañhi bhikkhuṃ satthā ‘‘saccaṃ kira tvaṃ bhikkhu ukkaṇṭhitosī’’ti pucchitvā ‘‘sacca’’nti vutte ‘‘bhikkhu sinerukampanavāto kiṃ purāṇapaṇṇāni na kampessati, yasasamaṅginopi sappurisā āyasakyaṃ pāpuṇanti, kilesā nāmete parisuddhasattepi saṃkiliṭṭhe karonti, pageva tādisa’’nti vatvā tena yācito atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣рахмад̣̇ад̇д̇асса буд̇д̇о б̣рахмад̣̇ад̇д̇агумааро наама бурохид̇абуд̇д̇о жа гассабо наама д̣̇вз сахааяагаа худ̇ваа згаажарияагулз саб̣б̣асиббаани уг̇г̇ан̣хим̣су. абарабхааг̇з б̣рахмад̣̇ад̇д̇агумааро бид̇у ажжаязна раж̇ж̇з бад̇идтааси. гассабо жинд̇зси ‘‘маяхам̣ сахааяо рааж̇аа ж̇аад̇о, ид̣̇аани мз маханд̇ам̣ иссарияам̣ д̣̇ассад̇и, гим̣ мз иссариязна, ахам̣ маад̇аабид̇аро жа рааж̇аанан̃жа аабужчид̇ваа баб̣б̣аж̇иссаамий’’д̇и. со рааж̇аанан̃жа маад̇аабид̇аро жа аабужчид̇ваа химаванд̇ам̣ бависид̇ваа исибаб̣б̣аж̇ж̇ам̣ баб̣б̣аж̇ид̇ваа сад̇д̇амз д̣̇ивасз абхин̃н̃аа жа самаабад̇д̇ияо жа ниб̣б̣ад̇д̇зд̇ваа ун̃чаажарияааяа яаабзнд̇о вихааси. баб̣б̣аж̇ид̇ам̣ бана нам̣ ‘‘ломасагассабо’’д̇и сан̃ж̇ааним̣су. со барамаж̇ид̇инд̣̇рияо гхорад̇або д̇аабасо ахоси. д̇асса д̇зж̇зна саггасса бхаванам̣ гамби. сагго ааваж̇ж̇знд̇о д̇ам̣ д̣̇исваа жинд̇зси ‘‘аяам̣ д̇аабасо ад̇ивияа уг̇г̇ад̇зж̇о саггабхаавааби мам̣ жаавзяяа, б̣аараан̣асиран̃н̃аа сад̣̇д̇хим̣ згад̇о худ̇ваа д̇абамасса бхинд̣̇иссаамий’’д̇и. со саггаанубхаавзна ад̣дхарад̇д̇асамаяз б̣аараан̣асиран̃н̃о сириг̇аб̣бхам̣ бависид̇ваа сагалаг̇аб̣бхам̣ сарийраббабхааяа обхаасзд̇ваа ран̃н̃о санд̇игз аагаасз тид̇о ‘‘удтзхи, махаарааж̇аа’’д̇и рааж̇аанам̣ баб̣од̇хзси. ‘‘госи д̇ва’’нд̇и вуд̇д̇з ‘‘саггохамасмий’’д̇и ааха. ‘‘гимад̇т̇ам̣ ааг̇ад̇осий’’д̇и? ‘‘махаарааж̇а, сагалаж̇амб̣уд̣̇ийбз згараж̇ж̇ам̣ ижчаси, на ижчасий’’д̇и? ‘‘гисса на ижчаамий’’д̇и? ат̇а нам̣ сагго ‘‘д̇зна хи ломасагассабам̣ аанзд̇ваа басугхаад̇аяан̃н̃ам̣ яаж̇аабзхи, саггасамо аж̇араамаро худ̇ваа сагалаж̇амб̣уд̣̇ийбз раж̇ж̇ам̣ гаарзссасий’’д̇и вад̇ваа батамам̣ г̇аат̇амааха –
Atīte bārāṇasiyaṃ brahmadatte rajjaṃ kārente brahmadattassa putto brahmadattakumāro nāma purohitaputto ca kassapo nāma dve sahāyakā hutvā ekācariyakule sabbasippāni uggaṇhiṃsu. Aparabhāge brahmadattakumāro pitu accayena rajje patiṭṭhāsi. Kassapo cintesi ‘‘mayhaṃ sahāyo rājā jāto, idāni me mahantaṃ issariyaṃ dassati, kiṃ me issariyena, ahaṃ mātāpitaro ca rājānañca āpucchitvā pabbajissāmī’’ti. So rājānañca mātāpitaro ca āpucchitvā himavantaṃ pavisitvā isipabbajjaṃ pabbajitvā sattame divase abhiññā ca samāpattiyo ca nibbattetvā uñchācariyāya yāpento vihāsi. Pabbajitaṃ pana naṃ ‘‘lomasakassapo’’ti sañjāniṃsu. So paramajitindriyo ghoratapo tāpaso ahosi. Tassa tejena sakkassa bhavanaṃ kampi. Sakko āvajjento taṃ disvā cintesi ‘‘ayaṃ tāpaso ativiya uggatejo sakkabhāvāpi maṃ cāveyya, bārāṇasiraññā saddhiṃ ekato hutvā tapamassa bhindissāmī’’ti. So sakkānubhāvena aḍḍharattasamaye bārāṇasirañño sirigabbhaṃ pavisitvā sakalagabbhaṃ sarīrappabhāya obhāsetvā rañño santike ākāse ṭhito ‘‘uṭṭhehi, mahārājā’’ti rājānaṃ pabodhesi. ‘‘Kosi tva’’nti vutte ‘‘sakkohamasmī’’ti āha. ‘‘Kimatthaṃ āgatosī’’ti? ‘‘Mahārāja, sakalajambudīpe ekarajjaṃ icchasi, na icchasī’’ti? ‘‘Kissa na icchāmī’’ti? Atha naṃ sakko ‘‘tena hi lomasakassapaṃ ānetvā pasughātayaññaṃ yajāpehi, sakkasamo ajarāmaro hutvā sakalajambudīpe rajjaṃ kāressasī’’ti vatvā paṭhamaṃ gāthamāha –
60.
60.
‘‘асса инд̣̇асамо рааж̇а, ажжанд̇ам̣ аж̇араамаро;
‘‘Assa indasamo rāja, accantaṃ ajarāmaro;
сажз д̇вам̣ яан̃н̃ам̣ яааж̇зяяа, исим̣ ломасагассаба’’нд̇и.
Sace tvaṃ yaññaṃ yājeyya, isiṃ lomasakassapa’’nti.
д̇ад̇т̇а ассаад̇и бхависсаси. яааж̇зяяаад̇и сажз д̇вам̣ аран̃н̃ааяад̇анад̇о исим̣ ломасагассабам̣ аанзд̇ваа яан̃н̃ам̣ яаж̇зяяаасийд̇и.
Tattha assāti bhavissasi. Yājeyyāti sace tvaṃ araññāyatanato isiṃ lomasakassapaṃ ānetvā yaññaṃ yajeyyāsīti.
д̇асса важанам̣ суд̇ваа рааж̇аа ‘‘саад̇хуу’’д̇и самбадижчи. сагго ‘‘д̇зна хи маа бабан̃жам̣ гарий’’д̇и вад̇ваа баггаами. рааж̇аа бунад̣̇ивасз сзяяам̣ наама амажжам̣ баггосаабзд̇ваа ‘‘самма, маяхам̣ бияасахааяагасса ломасагассабасса санд̇игам̣ г̇анд̇ваа мама важанзна звам̣ вад̣̇зхи ‘рааж̇аа гира д̇умхзхи басугхаад̇аяан̃н̃ам̣ яаж̇аабзд̇ваа сагалаж̇амб̣уд̣̇ийбз згарааж̇аа бхависсад̇и, д̇умхаагамби яад̇д̇агам̣ бад̣̇зсам̣ ижчат̇а, д̇ад̇д̇агам̣ д̣̇ассад̇и, маяаа сад̣̇д̇хим̣ яан̃н̃ам̣ яаж̇ид̇ум̣ ааг̇ажчат̇аа’’’д̇и ааха. со ‘‘саад̇ху, д̣̇зваа’’д̇и д̇аабасасса васаногаасаж̇аананад̇т̇ам̣ наг̇арз бхзрим̣ жараабзд̇ваа згзна ванажарагзна ‘‘ахам̣ ж̇аанаамий’’д̇и вуд̇д̇з д̇ам̣ бурад̇о гад̇ваа маханд̇зна бариваарзна д̇ад̇т̇а г̇анд̇ваа исим̣ ванд̣̇ид̇ваа згаманд̇ам̣ нисинно д̇ам̣ саасанам̣ аарожзси. ат̇а нам̣ со ‘‘сзяяа гим̣ наамзд̇ам̣ гат̇зсий’’д̇и вад̇ваа бадигкибанд̇о жад̇ассо г̇аат̇аа абхааси –
Tassa vacanaṃ sutvā rājā ‘‘sādhū’’ti sampaṭicchi. Sakko ‘‘tena hi mā papañcaṃ karī’’ti vatvā pakkāmi. Rājā punadivase seyyaṃ nāma amaccaṃ pakkosāpetvā ‘‘samma, mayhaṃ piyasahāyakassa lomasakassapassa santikaṃ gantvā mama vacanena evaṃ vadehi ‘rājā kira tumhehi pasughātayaññaṃ yajāpetvā sakalajambudīpe ekarājā bhavissati, tumhākampi yattakaṃ padesaṃ icchatha, tattakaṃ dassati, mayā saddhiṃ yaññaṃ yajituṃ āgacchathā’’’ti āha. So ‘‘sādhu, devā’’ti tāpasassa vasanokāsajānanatthaṃ nagare bheriṃ carāpetvā ekena vanacarakena ‘‘ahaṃ jānāmī’’ti vutte taṃ purato katvā mahantena parivārena tattha gantvā isiṃ vanditvā ekamantaṃ nisinno taṃ sāsanaṃ ārocesi. Atha naṃ so ‘‘seyya kiṃ nāmetaṃ kathesī’’ti vatvā paṭikkhipanto catasso gāthā abhāsi –
61.
61.
‘‘сасамуд̣̇д̣̇абарияааяам̣, махим̣ сааг̇арагун̣д̣алам̣;
‘‘Sasamuddapariyāyaṃ, mahiṃ sāgarakuṇḍalaṃ;
на ижчз саха нинд̣̇ааяа, звам̣ сзяяа виж̇аанахи.
Na icche saha nindāya, evaṃ seyya vijānahi.
62.
62.
‘‘д̇хирад̇т̇у д̇ам̣ яасалаабхам̣, д̇ханалаабхан̃жа б̣раахман̣а;
‘‘Dhiratthu taṃ yasalābhaṃ, dhanalābhañca brāhmaṇa;
яаа вуд̇д̇и винибаад̇зна, ад̇хаммажаран̣зна ваа.
Yā vutti vinipātena, adhammacaraṇena vā.
63.
63.
‘‘аби жз бад̇д̇амаад̣̇ааяа, анаг̇ааро бариб̣б̣аж̇з;
‘‘Api ce pattamādāya, anagāro paribbaje;
сааязва ж̇ийвигаа сзяяо, яаа жаад̇хаммзна зсанаа.
Sāyeva jīvikā seyyo, yā cādhammena esanā.
64.
64.
‘‘аби жз бад̇д̇амаад̣̇ааяа, анаг̇ааро бариб̣б̣аж̇з;
‘‘Api ce pattamādāya, anagāro paribbaje;
ан̃н̃ам̣ ахим̣саяам̣ логз, аби раж̇ж̇зна д̇ам̣ вара’’нд̇и.
Aññaṃ ahiṃsayaṃ loke, api rajjena taṃ vara’’nti.
д̇ад̇т̇а сасамуд̣̇д̣̇абарияааяанд̇и сасамуд̣̇д̣̇абаригкзбам̣. сааг̇арагун̣д̣аланд̇и жад̇д̇ааро д̣̇ийбз баригкибид̇ваа тид̇асааг̇арзхи ган̣н̣авалияаа табид̇агун̣д̣алзхи вияа саманнааг̇ад̇ам̣. саха нинд̣̇ааяаад̇и ‘‘иминаа басугхаад̇агаммам̣ гад̇а’’нд̇и имааяа нинд̣̇ааяа саха жаггаваал̣абарияанд̇ам̣ махаабат̇авим̣ на ижчаамийд̇и вад̣̇ад̇и. яаа вуд̇д̇и винибаад̇знаад̇и нарагз винибаад̇агаммзна яаа жа ж̇ийвид̇авуд̇д̇и ход̇и, д̇ам̣ д̇хирад̇т̇у, г̇арахаами д̇ам̣ вуд̇д̇инд̇и д̣̇ийбзд̇и. сааязва ж̇ийвигаад̇и баб̣б̣аж̇ид̇асса мад̇д̇игаабад̇д̇ам̣ аад̣̇ааяа барагхараани убасан̇гамид̇ваа аахаарабариязсанаж̇ийвигаава яасад̇ханалаабхад̇о сад̇аг̇ун̣зна сахассаг̇ун̣зна варад̇араад̇и ад̇т̇о аби раж̇ж̇зна д̇ам̣ варанд̇и д̇ам̣ анаг̇аарасса сад̇о ан̃н̃ам̣ авихим̣санд̇асса бариб̣б̣аж̇анам̣ сагалаж̇амб̣уд̣̇ийбараж̇ж̇знаби варанд̇и ад̇т̇о.
Tattha sasamuddapariyāyanti sasamuddaparikkhepaṃ. Sāgarakuṇḍalanti cattāro dīpe parikkhipitvā ṭhitasāgarehi kaṇṇavaliyā ṭhapitakuṇḍalehi viya samannāgataṃ. Saha nindāyāti ‘‘iminā pasughātakammaṃ kata’’nti imāya nindāya saha cakkavāḷapariyantaṃ mahāpathaviṃ na icchāmīti vadati. Yā vutti vinipātenāti narake vinipātakammena yā ca jīvitavutti hoti, taṃ dhiratthu, garahāmi taṃ vuttinti dīpeti. Sāyeva jīvikāti pabbajitassa mattikāpattaṃ ādāya paragharāni upasaṅkamitvā āhārapariyesanajīvikāva yasadhanalābhato sataguṇena sahassaguṇena varatarāti attho api rajjena taṃ varanti taṃ anagārassa sato aññaṃ avihiṃsantassa paribbajanaṃ sakalajambudīparajjenapi varanti attho.
амажжо д̇асса гат̇ам̣ суд̇ваа г̇анд̇ваа ран̃н̃о аарожзси. д̇ам̣ суд̇ваа рааж̇аа ‘‘анааг̇ажчанд̇з гим̣ саггаа гаад̇у’’нд̇и д̇ун̣хий ахоси. буна сагго ад̣дхарад̇д̇асамаяз ааг̇анд̇ваа аагаасз тад̇ваа ‘‘гим̣, махаарааж̇а, ломасагассабам̣ аанзд̇ваа яан̃н̃ам̣ на яаж̇аабзсий’’д̇и ааха. ‘‘маяаа бзсид̇оби нааг̇ажчад̇ий’’д̇и. ‘‘д̇зна хи, махаарааж̇а, ад̇д̇ано д̇хийд̇арам̣ жанд̣̇авад̇им̣ гумааригам̣ алан̇гарид̇ваа сзяяам̣ д̇ат̇зва бзсзд̇ваа ‘сажз гира ааг̇анд̇ваа яан̃н̃ам̣ яаж̇иссаси, рааж̇аа д̇з имам̣ гумааригам̣ д̣̇ассад̇ий’д̇и вад̣̇аабзхи, ад̣̇д̇хаа со гумааригааяа бадиб̣ад̣̇д̇хажид̇д̇о худ̇ваа ааг̇ажчиссад̇ий’’д̇и. рааж̇аа ‘‘саад̇хуу’’д̇и самбадижчид̇ваа бунад̣̇ивасз сзяяасса хад̇т̇з д̇хийд̇арам̣ ад̣̇ааси. со рааж̇ад̇хийд̇арам̣ г̇ахзд̇ваа д̇ад̇т̇а г̇анд̇ваа исим̣ ванд̣̇ид̇ваа бадисант̇аарам̣ гад̇ваа д̣̇зважчарабадибхааг̇ам̣ рааж̇ад̇хийд̇арам̣ д̇асса д̣̇ассзд̇ваа згаманд̇ам̣ адтааси. ат̇а иси инд̣̇рияаани бхинд̣̇ид̇ваа д̇ам̣ ологзси, саха ологанзнзва бадиб̣ад̣̇д̇хажид̇д̇о худ̇ваа жхаанаа барихааяи. амажжо д̇асса бадиб̣ад̣̇д̇хажид̇д̇абхаавам̣ н̃ад̇ваа ‘‘бханд̇з, сажз гира яан̃н̃ам̣ яаж̇иссат̇а, рааж̇аа д̇з имам̣ д̣̇ааригам̣ баад̣̇абарижааригам̣ гад̇ваа д̣̇ассад̇ий’’д̇и ааха. со гилзсавасзна гамбанд̇о ‘‘имам̣ гира мз д̣̇ассад̇ий’’д̇и ааха. ‘‘аама, яан̃н̃ам̣ яаж̇анд̇асса д̇з д̣̇ассад̇ий’’д̇и. со ‘‘саад̇ху имам̣ лабханд̇о яаж̇иссаамий’’д̇и вад̇ваа д̇ам̣ г̇ахзд̇ваа сахзва ж̇адаахи алан̇гад̇арат̇ам̣ абхируяха б̣аараан̣асим̣ аг̇амааси. рааж̇ааби ‘‘ааг̇ажчад̇и гираа’’д̇и суд̇ваа яан̃н̃ааваадз гаммам̣ бадтабзси. ат̇а нам̣ ааг̇ад̇ам̣ д̣̇исваа ‘‘свз яан̃н̃ам̣ яаж̇аахи, ахам̣ инд̣̇асамо бхависсаами, яан̃н̃абарияосаанз д̇з д̇хийд̇арам̣ д̣̇ассаамий’’д̇и ааха. гассабо ‘‘саад̇хуу’’д̇и самбадижчи. ат̇а нам̣ рааж̇аа бунад̣̇ивасз д̇ам̣ аад̣̇ааяа жанд̣̇авад̇ияаа сад̣̇д̇хим̣язва яан̃н̃ааваадам̣ г̇ад̇о. д̇ад̇т̇а хад̇т̇иассаусабхаад̣̇исаб̣б̣ажад̇уббад̣̇аа бадибаадияаа табид̇аава ахзсум̣. гассабо д̇з саб̣б̣з ханид̇ваава гхаад̇зд̇ваа яан̃н̃ам̣ яаж̇ид̇ум̣ аарабхи. ат̇а нам̣ д̇ад̇т̇а саннибад̇ид̇о махааж̇ано д̣̇исваа ‘‘ид̣̇ам̣ д̇з ломасагассаба аяуд̇д̇ам̣ аббад̇ируубам̣, гим̣ наамзд̇ам̣ гаросий’’д̇и вад̇ваа барид̣̇званд̇о д̣̇вз г̇аат̇аа абхааси –
Amacco tassa kathaṃ sutvā gantvā rañño ārocesi. Taṃ sutvā rājā ‘‘anāgacchante kiṃ sakkā kātu’’nti tuṇhī ahosi. Puna sakko aḍḍharattasamaye āgantvā ākāse ṭhatvā ‘‘kiṃ, mahārāja, lomasakassapaṃ ānetvā yaññaṃ na yajāpesī’’ti āha. ‘‘Mayā pesitopi nāgacchatī’’ti. ‘‘Tena hi, mahārāja, attano dhītaraṃ candavatiṃ kumārikaṃ alaṅkaritvā seyyaṃ tatheva pesetvā ‘sace kira āgantvā yaññaṃ yajissasi, rājā te imaṃ kumārikaṃ dassatī’ti vadāpehi, addhā so kumārikāya paṭibaddhacitto hutvā āgacchissatī’’ti. Rājā ‘‘sādhū’’ti sampaṭicchitvā punadivase seyyassa hatthe dhītaraṃ adāsi. So rājadhītaraṃ gahetvā tattha gantvā isiṃ vanditvā paṭisanthāraṃ katvā devaccharapaṭibhāgaṃ rājadhītaraṃ tassa dassetvā ekamantaṃ aṭṭhāsi. Atha isi indriyāni bhinditvā taṃ olokesi, saha olokaneneva paṭibaddhacitto hutvā jhānā parihāyi. Amacco tassa paṭibaddhacittabhāvaṃ ñatvā ‘‘bhante, sace kira yaññaṃ yajissatha, rājā te imaṃ dārikaṃ pādaparicārikaṃ katvā dassatī’’ti āha. So kilesavasena kampanto ‘‘imaṃ kira me dassatī’’ti āha. ‘‘Āma, yaññaṃ yajantassa te dassatī’’ti. So ‘‘sādhu imaṃ labhanto yajissāmī’’ti vatvā taṃ gahetvā saheva jaṭāhi alaṅkatarathaṃ abhiruyha bārāṇasiṃ agamāsi. Rājāpi ‘‘āgacchati kirā’’ti sutvā yaññāvāṭe kammaṃ paṭṭhapesi. Atha naṃ āgataṃ disvā ‘‘sve yaññaṃ yajāhi, ahaṃ indasamo bhavissāmi, yaññapariyosāne te dhītaraṃ dassāmī’’ti āha. Kassapo ‘‘sādhū’’ti sampaṭicchi. Atha naṃ rājā punadivase taṃ ādāya candavatiyā saddhiṃyeva yaññāvāṭaṃ gato. Tattha hatthiassausabhādisabbacatuppadā paṭipāṭiyā ṭhapitāva ahesuṃ. Kassapo te sabbe hanitvāva ghātetvā yaññaṃ yajituṃ ārabhi. Atha naṃ tattha sannipatito mahājano disvā ‘‘idaṃ te lomasakassapa ayuttaṃ appatirūpaṃ, kiṃ nāmetaṃ karosī’’ti vatvā paridevanto dve gāthā abhāsi –
65.
65.
‘‘б̣алам̣ жанд̣̇о б̣алам̣ сурияо, б̣алам̣ саман̣аб̣раахман̣аа;
‘‘Balaṃ cando balaṃ suriyo, balaṃ samaṇabrāhmaṇā;
б̣алам̣ взлаа самуд̣̇д̣̇асса, б̣алаад̇иб̣аламид̇т̇ияо.
Balaṃ velā samuddassa, balātibalamitthiyo.
66.
66.
‘‘яат̇аа уг̇г̇ад̇абам̣ санд̇ам̣, исим̣ ломасагассабам̣;
‘‘Yathā uggatapaṃ santaṃ, isiṃ lomasakassapaṃ;
бид̇у ад̇т̇аа жанд̣̇авад̇ий, вааж̇абзяяам̣ аяааж̇аяий’’д̇и.
Pitu atthā candavatī, vājapeyyaṃ ayājayī’’ti.
д̇ад̇т̇а б̣алам̣ жанд̣̇о б̣алам̣ сурияод̇и маханд̇хагааравид̇хаманз ан̃н̃ам̣ б̣алам̣ наама над̇т̇и, жанд̣̇имасуурияаавзд̇т̇а б̣алаванд̇од̇и ад̇т̇о. саман̣аб̣раахман̣аад̇и идтаанидтависаяавзг̇асаханз канд̇иб̣алан̃аан̣аб̣алзна саманнааг̇ад̇аа самид̇абаабаб̣аахид̇абаабаа саман̣аб̣раахман̣аа. б̣алам̣ взлаа самуд̣̇д̣̇ассаад̇и махаасамуд̣̇д̣̇асса уд̇д̇арид̇ум̣ ад̣̇ад̇ваа уд̣̇агам̣ ааварид̇ваа винаасзд̇ум̣ самад̇т̇ад̇ааяа взлаа б̣алам̣ наама. б̣алаад̇иб̣аламид̇т̇ияод̇и ид̇т̇ияо бана висад̣̇ан̃аан̣зби авийд̇арааг̇з ад̇д̇ано васам̣ аанзд̇ваа винаасзд̇ум̣ самад̇т̇ад̇ааяа д̇зхи саб̣б̣зхи б̣алзхиби ад̇иб̣алаа наама, саб̣б̣аб̣алзхи ид̇т̇иб̣аламзва маханд̇анд̇и ад̇т̇о. яат̇аад̇и яасмаа. бид̇у ад̇т̇аад̇и бид̇у вуд̣дхиад̇т̇ааяа. ид̣̇ам̣ вуд̇д̇ам̣ ход̇и – яасмаа имам̣ уг̇г̇ад̇абам̣ самаанам̣ сийлаад̣̇иг̇ун̣аанам̣ зсид̇ад̇д̇аа исим̣ аяам̣ жанд̣̇авад̇ий ниссийлам̣ гад̇ваа бид̇у вуд̣дхиад̇т̇ааяа вааж̇абзяяам̣ яан̃н̃ам̣ яааж̇зд̇и, д̇асмаа ж̇аанид̇аб̣б̣амзд̇ам̣ ‘‘б̣алаад̇иб̣аламид̇т̇ияо’’д̇и.
Tattha balaṃ cando balaṃ suriyoti mahandhakāravidhamane aññaṃ balaṃ nāma natthi, candimasūriyāvettha balavantoti attho. Samaṇabrāhmaṇāti iṭṭhāniṭṭhavisayavegasahane khantibalañāṇabalena samannāgatā samitapāpabāhitapāpā samaṇabrāhmaṇā. Balaṃ velā samuddassāti mahāsamuddassa uttarituṃ adatvā udakaṃ āvaritvā vināsetuṃ samatthatāya velā balaṃ nāma. Balātibalamitthiyoti itthiyo pana visadañāṇepi avītarāge attano vasaṃ ānetvā vināsetuṃ samatthatāya tehi sabbehi balehipi atibalā nāma, sabbabalehi itthibalameva mahantanti attho. Yathāti yasmā. Pitu atthāti pitu vuḍḍhiatthāya. Idaṃ vuttaṃ hoti – yasmā imaṃ uggatapaṃ samānaṃ sīlādiguṇānaṃ esitattā isiṃ ayaṃ candavatī nissīlaṃ katvā pitu vuḍḍhiatthāya vājapeyyaṃ yaññaṃ yājeti, tasmā jānitabbametaṃ ‘‘balātibalamitthiyo’’ti.
д̇асмим̣ самаяз гассабо яан̃н̃ам̣ яаж̇анад̇т̇ааяа ‘‘ман̇г̇алахад̇т̇им̣ г̇ийвааяам̣ бахариссаамий’’д̇и каг̇г̇арад̇анам̣ угкиби. хад̇т̇ий д̇ам̣ д̣̇исваа маран̣абхаяад̇аж̇ж̇ид̇о махааравам̣ рави. д̇асса равам̣ суд̇ваа сзсааби хад̇т̇иассаусабхаад̣̇аяо маран̣абхаяад̇аж̇ж̇ид̇аа бхаязна виравим̣су. махааж̇аноби вирави. гассабо д̇ам̣ махаавиравам̣ суд̇ваа сам̣взг̇аббад̇д̇о худ̇ваа ад̇д̇ано ж̇адаад̣̇ийни ологзси. ат̇асса ж̇адаамассугажчаломаани баагадаани ахзсум̣. со виббадисаарий худ̇ваа ‘‘анануруубам̣ вад̇а мз баабагаммам̣ гад̇а’’нд̇и сам̣взг̇ам̣ багаасзнд̇о адтамам̣ г̇аат̇амааха –
Tasmiṃ samaye kassapo yaññaṃ yajanatthāya ‘‘maṅgalahatthiṃ gīvāyaṃ paharissāmī’’ti khaggaratanaṃ ukkhipi. Hatthī taṃ disvā maraṇabhayatajjito mahāravaṃ ravi. Tassa ravaṃ sutvā sesāpi hatthiassausabhādayo maraṇabhayatajjitā bhayena viraviṃsu. Mahājanopi viravi. Kassapo taṃ mahāviravaṃ sutvā saṃvegappatto hutvā attano jaṭādīni olokesi. Athassa jaṭāmassukacchalomāni pākaṭāni ahesuṃ. So vippaṭisārī hutvā ‘‘ananurūpaṃ vata me pāpakammaṃ kata’’nti saṃvegaṃ pakāsento aṭṭhamaṃ gāthamāha –
67.
67.
‘‘д̇ам̣ лобхабагад̇ам̣ гаммам̣, гадугам̣ гаамахзд̇угам̣;
‘‘Taṃ lobhapakataṃ kammaṃ, kaṭukaṃ kāmahetukaṃ;
д̇асса муулам̣ г̇авзсиссам̣, чзжчам̣ рааг̇ам̣ саб̣анд̇хана’’нд̇и.
Tassa mūlaṃ gavesissaṃ, checchaṃ rāgaṃ sabandhana’’nti.
д̇ассад̇т̇о – махаарааж̇а, яам̣ зд̇ам̣ маяаа жанд̣̇авад̇ияаа лобхам̣ уббаад̣̇зд̇ваа д̇зна лобхзна багад̇ам̣ гаамахзд̇угам̣ баабагам̣, д̇ам̣ гадугам̣ д̇икин̣авибаагам̣. д̇ассаахам̣ аяонисоманасигаарасан̇каад̇ам̣ муулам̣ г̇авзсиссам̣, алам̣ мз иминаа каг̇г̇зна, бан̃н̃аакаг̇г̇ам̣ нийхарид̇ваа субханимид̇д̇аб̣анд̇ханзна сад̣̇д̇хим̣ саб̣анд̇ханам̣ рааг̇ам̣ чинд̣̇иссаамийд̇и.
Tassattho – mahārāja, yaṃ etaṃ mayā candavatiyā lobhaṃ uppādetvā tena lobhena pakataṃ kāmahetukaṃ pāpakaṃ, taṃ kaṭukaṃ tikhiṇavipākaṃ. Tassāhaṃ ayonisomanasikārasaṅkhātaṃ mūlaṃ gavesissaṃ, alaṃ me iminā khaggena, paññākhaggaṃ nīharitvā subhanimittabandhanena saddhiṃ sabandhanaṃ rāgaṃ chindissāmīti.
ат̇а нам̣ рааж̇аа ‘‘маа бхааяи самма, ид̣̇аани д̇з жанд̣̇авад̇им̣ гумаарин̃жа радтан̃жа сад̇д̇арад̇анараасин̃жа д̣̇ассаами, яаж̇аахи яан̃н̃а’’нд̇и ааха. д̇ам̣ суд̇ваа гассабо ‘‘на мз, махаарааж̇а, иминаа гилзсзна ад̇т̇о’’д̇и вад̇ваа осаанаг̇аат̇амааха –
Atha naṃ rājā ‘‘mā bhāyi samma, idāni te candavatiṃ kumāriñca raṭṭhañca sattaratanarāsiñca dassāmi, yajāhi yañña’’nti āha. Taṃ sutvā kassapo ‘‘na me, mahārāja, iminā kilesena attho’’ti vatvā osānagāthamāha –
68.
68.
‘‘д̇хирад̇т̇у гаамз суб̣ахууби логз, д̇абова сзяяо гаамаг̇ун̣зхи рааж̇а;
‘‘Dhiratthu kāme subahūpi loke, tapova seyyo kāmaguṇehi rāja;
д̇або гариссаами бахааяа гаамз, д̇авзва радтам̣ жанд̣̇авад̇ий жа ход̇уу’’д̇и.
Tapo karissāmi pahāya kāme, taveva raṭṭhaṃ candavatī ca hotū’’ti.
д̇ад̇т̇а суб̣ахуубийд̇и ад̇иб̣ахугзби. д̇або гариссаамийд̇и сийласам̣яамад̇абамзва гариссаами.
Tattha subahūpīti atibahukepi. Tapo karissāmīti sīlasaṃyamatapameva karissāmi.
со звам̣ вад̇ваа гасин̣ам̣ саманнаахарид̇ваа надтам̣ висзсам̣ уббаад̣̇зд̇ваа аагаасз баллан̇гзна нисийд̣̇ид̇ваа ран̃н̃о д̇хаммам̣ д̣̇зсзд̇ваа ‘‘аббамад̇д̇о хохий’’д̇и овад̣̇ид̇ваа яан̃н̃ааваадам̣ вид̣̇д̇хам̣саабзд̇ваа махааж̇анасса абхаяад̣̇аанам̣ д̣̇аабзд̇ваа ран̃н̃о яаажанд̇ассзва уббад̇ид̇ваа ад̇д̇ано васанадтаанамзва г̇анд̇ваа яааваж̇ийвам̣ тад̇ваа ааяубарияосаанз б̣рахмалогабарааяан̣о ахоси.
So evaṃ vatvā kasiṇaṃ samannāharitvā naṭṭhaṃ visesaṃ uppādetvā ākāse pallaṅkena nisīditvā rañño dhammaṃ desetvā ‘‘appamatto hohī’’ti ovaditvā yaññāvāṭaṃ viddhaṃsāpetvā mahājanassa abhayadānaṃ dāpetvā rañño yācantasseva uppatitvā attano vasanaṭṭhānameva gantvā yāvajīvaṃ ṭhatvā āyupariyosāne brahmalokaparāyaṇo ahosi.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз угган̣тид̇абхигку сод̇аабад̇д̇ипалз бад̇идтахи. д̇ад̣̇аа сзяяо махааамажжо саарибуд̇д̇о ахоси, ломасагассабо бана ахамзва ахосинд̇и.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne ukkaṇṭhitabhikkhu sotāpattiphale patiṭṭhahi. Tadā seyyo mahāamacco sāriputto ahosi, lomasakassapo pana ahameva ahosinti.
ломасагассабаж̇аад̇агаван̣н̣анаа сад̇д̇амаа.
Lomasakassapajātakavaṇṇanā sattamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 433. ломасагассабаж̇аад̇агам̣ • 433. Lomasakassapajātakaṃ
