| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
9. லோணகபல்லஸுத்தவண்ணனா
9. Loṇakapallasuttavaṇṇanā
101. நவமே யதா² யதா² கம்மங் கரோதீதி யேன யேன பகாரேன பாணகா⁴தாதி³பாபகம்மங் கரோதி. விபாகங் படிஸங்வேதி³யதேவாதி அவதா⁴ரணேன கம்மஸித்³தி⁴யங் தப்³பி³பாகஸ்ஸ அப்பவத்தி நாம நத்தீ²தி தீ³பேதி. தேனேவாஹ ‘‘ந ஹி ஸக்கா’’திஆதி³. ஏவங் ஸந்தந்தி பு⁴ம்மத்தே² உபயோக³வசனந்தி ஆஹ ‘‘ஏவங் ஸந்தே’’தி. அபி⁴ஸங்கா²ரவிஞ்ஞாணனிரோதே⁴னாதி கம்மவிஞ்ஞாணஸ்ஸ ஆயதிங் அனுப்பத்தித⁴ம்மதாபஜ்ஜனேன.
101. Navame yathā yathā kammaṃ karotīti yena yena pakārena pāṇaghātādipāpakammaṃ karoti. Vipākaṃ paṭisaṃvediyatevāti avadhāraṇena kammasiddhiyaṃ tabbipākassa appavatti nāma natthīti dīpeti. Tenevāha ‘‘na hi sakkā’’tiādi. Evaṃ santanti bhummatthe upayogavacananti āha ‘‘evaṃ sante’’ti. Abhisaṅkhāraviññāṇanirodhenāti kammaviññāṇassa āyatiṃ anuppattidhammatāpajjanena.
‘‘அயம்பி கோ² காயோ ஏவங்த⁴ம்மோ ஏவங்பா⁴வீ ஏவங்அனதீதோ’’திஆதி³னா காயஸ்ஸ அஸுபா⁴னிச்சாதி³ஆகாரஅனுபஸ்ஸனா காயபா⁴வனாதி ஆஹ ‘‘காயானுபஸ்ஸனாஸங்கா²தாய தாய பா⁴வனாயா’’தி. ராகா³தீ³னந்தி ஆதி³-ஸத்³தே³ன தோ³ஸமோஹானங் ஸங்க³ஹோ த³ட்ட²ப்³போ³. ‘‘ராகோ³ கோ², ஆவுஸோ, பமாணகரணோ, தோ³ஸோ பமாணகரணோ, மோஹோ பமாணகரணோ, தே கீ²ணாஸவஸ்ஸ பி⁴க்கு²னோ பஹீனா உச்சி²ன்னமூலா தாலாவத்து²கதா அனபா⁴வங்கதா ஆயதிங் அனுப்பாத³த⁴ம்மா’’தி (ம॰ நி॰ 1.459) ஹி வுத்தங்.
‘‘Ayampi kho kāyo evaṃdhammo evaṃbhāvī evaṃanatīto’’tiādinā kāyassa asubhāniccādiākāraanupassanā kāyabhāvanāti āha ‘‘kāyānupassanāsaṅkhātāya tāya bhāvanāyā’’ti. Rāgādīnanti ādi-saddena dosamohānaṃ saṅgaho daṭṭhabbo. ‘‘Rāgo kho, āvuso, pamāṇakaraṇo, doso pamāṇakaraṇo, moho pamāṇakaraṇo, te khīṇāsavassa bhikkhuno pahīnā ucchinnamūlā tālāvatthukatā anabhāvaṃkatā āyatiṃ anuppādadhammā’’ti (ma. ni. 1.459) hi vuttaṃ.
யதா² ஹி பப்³ப³தபாதே³ பூதிபண்ணஸ்ஸ உத³கங் நாம ஹோதி, காளவண்ணங் ஓலோகெந்தானங் ப்³யாமஸதங் க³ம்பீ⁴ரங் விய கா²யதி, யட்டி²ங் வா ரஜ்ஜுங் வா க³ஹெத்வா மினந்தஸ்ஸ பிட்டி²பாதொ³த்³த⁴ரணமத்தம்பி ந ஹோதி, ஏவமேவ ஏகச்சஸ்ஸ யாவ ராகா³த³யோ நுப்பஜ்ஜந்தி, தாவ தங் புக்³க³லங் ஸஞ்ஜானிதுங் ந ஸக்கா ஹோதி, ஸோதாபன்னோ விய ஸகதா³கா³மீ விய அனாகா³மீ விய ச கா²யதி. யதா³ பனஸ்ஸ ராகா³த³யோ உப்பஜ்ஜந்தி, ததா³ ரத்தோ து³ட்டோ² மூள்ஹோதி பஞ்ஞாயதி. இதி தே ராகா³த³யோ ‘‘எத்தகோ அய’’ந்தி புக்³க³லஸ்ஸ பமாணங் த³ஸ்ஸெந்தாவ உப்பஜ்ஜந்தீதி பமாணகரணா நாம வுத்தா.
Yathā hi pabbatapāde pūtipaṇṇassa udakaṃ nāma hoti, kāḷavaṇṇaṃ olokentānaṃ byāmasataṃ gambhīraṃ viya khāyati, yaṭṭhiṃ vā rajjuṃ vā gahetvā minantassa piṭṭhipādoddharaṇamattampi na hoti, evameva ekaccassa yāva rāgādayo nuppajjanti, tāva taṃ puggalaṃ sañjānituṃ na sakkā hoti, sotāpanno viya sakadāgāmī viya anāgāmī viya ca khāyati. Yadā panassa rāgādayo uppajjanti, tadā ratto duṭṭho mūḷhoti paññāyati. Iti te rāgādayo ‘‘ettako aya’’nti puggalassa pamāṇaṃ dassentāva uppajjantīti pamāṇakaraṇā nāma vuttā.
ஜாபேதுந்தி ஜினத⁴னங் காதுங். ஸோதி ராஜா, மஹாமத்தோ வா. அஸ்ஸாதி அஞ்ஜலிங் பக்³க³ஹெத்வா யாசந்தஸ்ஸ. ஸேஸமெத்த² உத்தானமேவ.
Jāpetunti jinadhanaṃ kātuṃ. Soti rājā, mahāmatto vā. Assāti añjaliṃ paggahetvā yācantassa. Sesamettha uttānameva.
லோணகபல்லஸுத்தவண்ணனா நிட்டி²தா.
Loṇakapallasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 9. லோணகபல்லஸுத்தங் • 9. Loṇakapallasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 9. லோணகபல்லஸுத்தவண்ணனா • 9. Loṇakapallasuttavaṇṇanā
