| Library / Tipiṭaka / তিপিটক • Tipiṭaka / অঙ্গুত্তরনিকায (টীকা) • Aṅguttaranikāya (ṭīkā) |
৯. লোণকপল্লসুত্তৰণ্ণনা
9. Loṇakapallasuttavaṇṇanā
১০১. নৰমে যথা যথা কম্মং করোতীতি যেন যেন পকারেন পাণঘাতাদিপাপকম্মং করোতি। ৰিপাকং পটিসংৰেদিযতেৰাতি অৰধারণেন কম্মসিদ্ধিযং তব্বিপাকস্স অপ্পৰত্তি নাম নত্থীতি দীপেতি। তেনেৰাহ ‘‘ন হি সক্কা’’তিআদি। এৰং সন্তন্তি ভুম্মত্থে উপযোগৰচনন্তি আহ ‘‘এৰং সন্তে’’তি। অভিসঙ্খারৰিঞ্ঞাণনিরোধেনাতি কম্মৰিঞ্ঞাণস্স আযতিং অনুপ্পত্তিধম্মতাপজ্জনেন।
101. Navame yathā yathā kammaṃ karotīti yena yena pakārena pāṇaghātādipāpakammaṃ karoti. Vipākaṃ paṭisaṃvediyatevāti avadhāraṇena kammasiddhiyaṃ tabbipākassa appavatti nāma natthīti dīpeti. Tenevāha ‘‘na hi sakkā’’tiādi. Evaṃ santanti bhummatthe upayogavacananti āha ‘‘evaṃ sante’’ti. Abhisaṅkhāraviññāṇanirodhenāti kammaviññāṇassa āyatiṃ anuppattidhammatāpajjanena.
‘‘অযম্পি খো কাযো এৰংধম্মো এৰংভাৰী এৰংঅনতীতো’’তিআদিনা কাযস্স অসুভানিচ্চাদিআকারঅনুপস্সনা কাযভাৰনাতি আহ ‘‘কাযানুপস্সনাসঙ্খাতায তায ভাৰনাযা’’তি। রাগাদীনন্তি আদি-সদ্দেন দোসমোহানং সঙ্গহো দট্ঠব্বো। ‘‘রাগো খো, আৰুসো, পমাণকরণো, দোসো পমাণকরণো, মোহো পমাণকরণো, তে খীণাসৰস্স ভিক্খুনো পহীনা উচ্ছিন্নমূলা তালাৰত্থুকতা অনভাৰংকতা আযতিং অনুপ্পাদধম্মা’’তি (ম॰ নি॰ ১.৪৫৯) হি ৰুত্তং।
‘‘Ayampi kho kāyo evaṃdhammo evaṃbhāvī evaṃanatīto’’tiādinā kāyassa asubhāniccādiākāraanupassanā kāyabhāvanāti āha ‘‘kāyānupassanāsaṅkhātāya tāya bhāvanāyā’’ti. Rāgādīnanti ādi-saddena dosamohānaṃ saṅgaho daṭṭhabbo. ‘‘Rāgo kho, āvuso, pamāṇakaraṇo, doso pamāṇakaraṇo, moho pamāṇakaraṇo, te khīṇāsavassa bhikkhuno pahīnā ucchinnamūlā tālāvatthukatā anabhāvaṃkatā āyatiṃ anuppādadhammā’’ti (ma. ni. 1.459) hi vuttaṃ.
যথা হি পব্বতপাদে পূতিপণ্ণস্স উদকং নাম হোতি, কাল়ৰণ্ণং ওলোকেন্তানং ব্যামসতং গম্ভীরং ৰিয খাযতি, যট্ঠিং ৰা রজ্জুং ৰা গহেত্ৰা মিনন্তস্স পিট্ঠিপাদোদ্ধরণমত্তম্পি ন হোতি, এৰমেৰ একচ্চস্স যাৰ রাগাদযো নুপ্পজ্জন্তি, তাৰ তং পুগ্গলং সঞ্জানিতুং ন সক্কা হোতি, সোতাপন্নো ৰিয সকদাগামী ৰিয অনাগামী ৰিয চ খাযতি। যদা পনস্স রাগাদযো উপ্পজ্জন্তি, তদা রত্তো দুট্ঠো মূল়্হোতি পঞ্ঞাযতি। ইতি তে রাগাদযো ‘‘এত্তকো অয’’ন্তি পুগ্গলস্স পমাণং দস্সেন্তাৰ উপ্পজ্জন্তীতি পমাণকরণা নাম ৰুত্তা।
Yathā hi pabbatapāde pūtipaṇṇassa udakaṃ nāma hoti, kāḷavaṇṇaṃ olokentānaṃ byāmasataṃ gambhīraṃ viya khāyati, yaṭṭhiṃ vā rajjuṃ vā gahetvā minantassa piṭṭhipādoddharaṇamattampi na hoti, evameva ekaccassa yāva rāgādayo nuppajjanti, tāva taṃ puggalaṃ sañjānituṃ na sakkā hoti, sotāpanno viya sakadāgāmī viya anāgāmī viya ca khāyati. Yadā panassa rāgādayo uppajjanti, tadā ratto duṭṭho mūḷhoti paññāyati. Iti te rāgādayo ‘‘ettako aya’’nti puggalassa pamāṇaṃ dassentāva uppajjantīti pamāṇakaraṇā nāma vuttā.
জাপেতুন্তি জিনধনং কাতুং। সোতি রাজা, মহামত্তো ৰা। অস্সাতি অঞ্জলিং পগ্গহেত্ৰা যাচন্তস্স। সেসমেত্থ উত্তানমেৰ।
Jāpetunti jinadhanaṃ kātuṃ. Soti rājā, mahāmatto vā. Assāti añjaliṃ paggahetvā yācantassa. Sesamettha uttānameva.
লোণকপল্লসুত্তৰণ্ণনা নিট্ঠিতা।
Loṇakapallasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / অঙ্গুত্তরনিকায • Aṅguttaranikāya / ৯. লোণকপল্লসুত্তং • 9. Loṇakapallasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / অঙ্গুত্তরনিকায (অট্ঠকথা) • Aṅguttaranikāya (aṭṭhakathā) / ৯. লোণকপল্লসুত্তৰণ্ণনা • 9. Loṇakapallasuttavaṇṇanā
