| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
5. ад̇т̇агаамаваг̇г̇о
5. Atthakāmavaggo
[41] 1. лосагаж̇аад̇агаван̣н̣анаа
[41] 1. Losakajātakavaṇṇanā
яо ад̇т̇агаамассаад̇и ид̣̇ам̣ сад̇т̇аа ж̇зд̇аванз вихаранд̇о лосагад̇иссад̇т̇зрам̣ наама аараб̣бха гат̇зси. го банзса лосагад̇иссад̇т̇зро наамаад̇и? госаларадтз зго ад̇д̇ано гуланаасаго гзваддабуд̇д̇аго алаабхий бхигку. со гира ниб̣б̣ад̇д̇адтаанзд̇аа жавид̇ваа госаларадтз згасмим̣ гуласахассаваасз гзваддаг̇аамз згиссаа гзваддияаа гужчисмим̣ бадисанд̇хим̣ г̇ан̣хи. д̇асса бадисанд̇хиг̇г̇ахан̣ад̣̇ивасз д̇ам̣ гуласахассам̣ ж̇аалахад̇т̇ам̣ над̣̇ияан̃жа д̇ал̣аагаад̣̇ийсу жа мажчз бариязсанд̇ам̣ згам̣ куд̣̇д̣̇агамажчамби наалад̇т̇а. д̇ад̇о бадтааяа жа д̇з гзваддаа барихааяанд̇иязва. д̇асмин̃хи гужчиг̇ад̇зязва нзсам̣ г̇аамо сад̇д̇а ваарз аг̇г̇инаа д̣̇ад̣дхо, сад̇д̇а ваарз ран̃н̃аа д̣̇ан̣д̣ид̇о. звам̣ ануггамзна д̣̇уг̇г̇ад̇аа ж̇аад̇аа. д̇з жинд̇аяим̣су ‘‘буб̣б̣з амхаагам̣ зваруубам̣ над̇т̇и, ид̣̇аани бана барихааяаама, амхаагам̣ анд̇арз згааяа гаал̣аган̣н̣ияаа бхавид̇аб̣б̣ам̣, д̣̇вз бхааг̇аа хомаа’’д̇и бан̃жа бан̃жа гуласад̇аани згад̇о ахзсум̣. д̇ад̇о яад̇т̇а д̇асса маад̇аабид̇аро, сова годтаасо барихааяад̇и, ид̇аро вад̣дхад̇и. д̇з д̇амби годтаасам̣ д̣̇вид̇хаа, д̇амби д̣̇вид̇хаад̇и звам̣ яаава д̇амзва гулам̣ згам̣ ахоси, д̇аава вибхаж̇ид̇ваа д̇зсам̣ гаал̣аган̣н̣ибхаавам̣ н̃ад̇ваа бот̇зд̇ваа ниггад̣дхим̣су.
Yoatthakāmassāti idaṃ satthā jetavane viharanto losakatissattheraṃ nāma ārabbha kathesi. Ko panesa losakatissatthero nāmāti? Kosalaraṭṭhe eko attano kulanāsako kevaṭṭaputtako alābhī bhikkhu. So kira nibbattaṭṭhānetā cavitvā kosalaraṭṭhe ekasmiṃ kulasahassavāse kevaṭṭagāme ekissā kevaṭṭiyā kucchismiṃ paṭisandhiṃ gaṇhi. Tassa paṭisandhiggahaṇadivase taṃ kulasahassaṃ jālahatthaṃ nadiyañca taḷākādīsu ca macche pariyesantaṃ ekaṃ khuddakamacchampi nālattha. Tato paṭṭhāya ca te kevaṭṭā parihāyantiyeva. Tasmiñhi kucchigateyeva nesaṃ gāmo satta vāre agginā daḍḍho, satta vāre raññā daṇḍito. Evaṃ anukkamena duggatā jātā. Te cintayiṃsu ‘‘pubbe amhākaṃ evarūpaṃ natthi, idāni pana parihāyāma, amhākaṃ antare ekāya kāḷakaṇṇiyā bhavitabbaṃ, dve bhāgā homā’’ti pañca pañca kulasatāni ekato ahesuṃ. Tato yattha tassa mātāpitaro, sova koṭṭhāso parihāyati, itaro vaḍḍhati. Te tampi koṭṭhāsaṃ dvidhā, tampi dvidhāti evaṃ yāva tameva kulaṃ ekaṃ ahosi, tāva vibhajitvā tesaṃ kāḷakaṇṇibhāvaṃ ñatvā pothetvā nikkaḍḍhiṃsu.
ат̇асса маад̇аа гижчзна ж̇ийвамаанаа барибаггз г̇аб̣бхз згасмим̣ таанз виж̇ааяи. бажчимабхавигасад̇д̇ам̣ на саггаа наасзд̇ум̣, анд̇огхадз бад̣̇ийбо вияа д̇асса хад̣̇аяз арахад̇д̇асса убаниссаяо ж̇алад̇и. саа д̇ам̣ д̣̇аарагам̣ бадиж̇аг̇г̇ид̇ваа аад̇хаавид̇ваа барид̇хаавид̇ваа вижаран̣агаалз згамасса габаалагам̣ хад̇т̇з д̣̇ад̇ваа ‘‘буд̇д̇а, зд̇ам̣ гхарам̣ бависаа’’д̇и бзсзд̇ваа балаад̇аа. со д̇ад̇о бадтааяа згагова худ̇ваа д̇ад̇т̇а д̇ад̇т̇а бхигкам̣ бариязсид̇ваа згасмим̣ таанз саяад̇и, на нхааяад̇и, на сарийрам̣ бадиж̇аг̇г̇ад̇и, бам̣субисаажаго вияа гижчзна ж̇ийвигам̣ габбзд̇и. со ануггамзна сад̇д̇авассиго худ̇ваа згасмим̣ г̇зхад̣̇ваарз угкалид̇хованасса чад̣д̣ид̇адтаанз гааго вияа згзгам̣ бхад̇д̇асид̇т̇ам̣ ужжинид̇ваа каад̣̇ад̇и.
Athassa mātā kicchena jīvamānā paripakke gabbhe ekasmiṃ ṭhāne vijāyi. Pacchimabhavikasattaṃ na sakkā nāsetuṃ, antoghaṭe padīpo viya tassa hadaye arahattassa upanissayo jalati. Sā taṃ dārakaṃ paṭijaggitvā ādhāvitvā paridhāvitvā vicaraṇakāle ekamassa kapālakaṃ hatthe datvā ‘‘putta, etaṃ gharaṃ pavisā’’ti pesetvā palātā. So tato paṭṭhāya ekakova hutvā tattha tattha bhikkhaṃ pariyesitvā ekasmiṃ ṭhāne sayati, na nhāyati, na sarīraṃ paṭijaggati, paṃsupisācako viya kicchena jīvikaṃ kappeti. So anukkamena sattavassiko hutvā ekasmiṃ gehadvāre ukkhalidhovanassa chaḍḍitaṭṭhāne kāko viya ekekaṃ bhattasitthaṃ uccinitvā khādati.
ат̇а нам̣ д̇хаммасзнаабад̇и саавад̇т̇ияам̣ бин̣д̣ааяа жарамаано д̣̇исваа ‘‘аяам̣ сад̇д̇о ад̇игаарун̃н̃аббад̇д̇о , гад̇араг̇аамаваасиго ну ко’’д̇и д̇асмим̣ мзд̇д̇ажид̇д̇ам̣ вад̣дхзд̇ваа ‘‘зхи, рз’’д̇и ааха. со ааг̇анд̇ваа т̇зрам̣ ванд̣̇ид̇ваа адтааси. ат̇а нам̣ т̇зро ‘‘гад̇араг̇аамаваасигоси, гахам̣ ваа д̇з маад̇аабид̇аро’’д̇и бужчи. ‘‘ахам̣, бханд̇з, ниббажжаяо, маяхам̣ маад̇аабид̇аро мам̣ ниссааяа ‘гиланд̇амхаа’д̇и мам̣ чад̣д̣зд̇ваа балаад̇аа’’д̇и. ‘‘аби бана баб̣б̣аж̇иссасий’’д̇и. ‘‘бханд̇з, ахам̣ д̇аава баб̣б̣аж̇зяяам̣, маад̣̇исам̣ бана габан̣ам̣ го баб̣б̣ааж̇зссасий’’д̇и? ‘‘ахам̣ баб̣б̣ааж̇зссаамий’’д̇и. ‘‘саад̇ху, бханд̇з, баб̣б̣ааж̇зт̇аа’’д̇и. т̇зро д̇асса каад̣̇анийяабхож̇анийяам̣ д̣̇ад̇ваа д̇ам̣ вихаарам̣ нзд̇ваа сахад̇т̇знзва нхаабзд̇ваа баб̣б̣ааж̇зд̇ваа барибун̣н̣авассам̣ убасамбаад̣̇зси. со махаллагагаалз ‘‘лосагад̇иссад̇т̇зро’’д̇и бан̃н̃ааяид̇т̇а аббабун̃н̃о аббалаабхо. д̇зна гира асад̣̇исад̣̇аанзби гужчибууро на лад̣̇д̇хабуб̣б̣о, ж̇ийвид̇агхаданамад̇д̇амзва лабхад̇и. д̇асса хи бад̇д̇з згасмим̣язва яааг̇уул̣ун̇гз д̣̇иннз бад̇д̇о самад̇ид̇д̇иго вияа худ̇ваа бан̃н̃ааяад̇и. ат̇а мануссаа ‘‘имасса бад̇д̇о бууро’’д̇и хздтаа яааг̇ум̣ д̣̇знд̇и. д̇асса бад̇д̇з яааг̇ум̣ д̣̇аанагаалз мануссаанам̣ бхааж̇анз яааг̇у анд̇арад̇хааяад̇ийд̇иби вад̣̇анд̇и. каж̇ж̇агаад̣̇ийсуби зсзва наяо.
Atha naṃ dhammasenāpati sāvatthiyaṃ piṇḍāya caramāno disvā ‘‘ayaṃ satto atikāruññappatto , kataragāmavāsiko nu kho’’ti tasmiṃ mettacittaṃ vaḍḍhetvā ‘‘ehi, re’’ti āha. So āgantvā theraṃ vanditvā aṭṭhāsi. Atha naṃ thero ‘‘kataragāmavāsikosi, kahaṃ vā te mātāpitaro’’ti pucchi. ‘‘Ahaṃ, bhante, nippaccayo, mayhaṃ mātāpitaro maṃ nissāya ‘kilantamhā’ti maṃ chaḍḍetvā palātā’’ti. ‘‘Api pana pabbajissasī’’ti. ‘‘Bhante, ahaṃ tāva pabbajeyyaṃ, mādisaṃ pana kapaṇaṃ ko pabbājessasī’’ti? ‘‘Ahaṃ pabbājessāmī’’ti. ‘‘Sādhu, bhante, pabbājethā’’ti. Thero tassa khādanīyabhojanīyaṃ datvā taṃ vihāraṃ netvā sahattheneva nhāpetvā pabbājetvā paripuṇṇavassaṃ upasampādesi. So mahallakakāle ‘‘losakatissatthero’’ti paññāyittha appapuñño appalābho. Tena kira asadisadānepi kucchipūro na laddhapubbo, jīvitaghaṭanamattameva labhati. Tassa hi patte ekasmiṃyeva yāguuḷuṅke dinne patto samatittiko viya hutvā paññāyati. Atha manussā ‘‘imassa patto pūro’’ti heṭṭhā yāguṃ denti. Tassa patte yāguṃ dānakāle manussānaṃ bhājane yāgu antaradhāyatītipi vadanti. Khajjakādīsupi eseva nayo.
со абарзна самаязна вибассанам̣ вад̣дхзд̇ваа аг̇г̇апалз арахад̇д̇з бад̇идтид̇оби аббалаабхова ахоси. ат̇асса анубуб̣б̣зна ааяусан̇каарзсу барихийнзсу бариниб̣б̣аанад̣̇ивасо самбаабун̣и. д̇хаммасзнаабад̇и ааваж̇ж̇знд̇о д̇асса бариниб̣б̣аанабхаавам̣ н̃ад̇ваа ‘‘аяам̣ лосагад̇иссад̇т̇зро аж̇ж̇а бариниб̣б̣ааяиссад̇и, аж̇ж̇а маяаа зд̇асса яаавад̣̇ад̇т̇ам̣ аахаарам̣ д̣̇аад̇ум̣ ваддад̇ий’’д̇и д̇ам̣ аад̣̇ааяа саавад̇т̇им̣ бин̣д̣ааяа баависи. т̇зро д̇ам̣ ниссааяа д̇аава б̣ахумануссааяа саавад̇т̇ияаа хад̇т̇ам̣ басаарзд̇ваа ванд̣̇анамад̇д̇амби наалад̇т̇а. ат̇а нам̣ т̇зро ‘‘г̇ажчаавусо, аасанасаалааяа нисийд̣̇аа’’д̇и уяяож̇зд̇ваа г̇ад̇о. д̇ам̣ ааг̇ад̇амзва мануссаа ‘‘аяяо, ааг̇ад̇о’’д̇и аасанз нисийд̣̇аабзд̇ваа бхож̇зси. т̇зроби ‘‘имам̣ лосагасса д̣̇зт̇аа’’д̇и лад̣̇д̇хаахаарам̣ бзсзси. д̇ам̣ г̇ахзд̇ваа г̇ад̇аа лосагад̇иссад̇т̇зрам̣ асарид̇ваа саяамзва бхун̃ж̇им̣су. ат̇а т̇зрасса удтааяа вихаарам̣ г̇аманагаалз лосагад̇иссад̇т̇зро ааг̇анд̇ваа т̇зрам̣ ванд̣̇и, т̇зро нивад̇д̇ид̇ваа тид̇агова ‘‘лад̣̇д̇хам̣ д̇з, аавусо, бхад̇д̇а’’нд̇и бужчи. лабхиссаама но, бханд̇зд̇и. т̇зро сам̣взг̇абад̇д̇о гаалам̣ ологзси, гаало ад̇игганд̇о. т̇зро ‘‘ход̇аавусо, ид̇хзва нисийд̣̇аа’’д̇и лосагад̇т̇зрам̣ аасанасаалааяам̣ нисийд̣̇аабзд̇ваа госаларан̃н̃о нивзсанам̣ аг̇амааси. рааж̇аа т̇зрасса бад̇д̇ам̣ г̇аахаабзд̇ваа ‘‘бхад̇д̇асса агаало’’д̇и бад̇д̇абуурам̣ жад̇умад̇хурам̣ д̣̇аабзси. т̇зро д̇ам̣ аад̣̇ааяа г̇анд̇ваа ‘‘зхаавусо, д̇исса имам̣ жад̇умад̇хурам̣ бхун̃ж̇аа’’д̇и вад̇ваа бад̇д̇ам̣ г̇ахзд̇ваа адтааси. со т̇зрз г̇ааравзна лаж̇ж̇анд̇о на барибхун̃ж̇ад̇и. ат̇а нам̣ т̇зро ‘‘зхаавусо д̇исса, ахам̣ имам̣ бад̇д̇ам̣ г̇ахзд̇ваава тассаами, д̇вам̣ нисийд̣̇ид̇ваа барибхун̃ж̇а. сажз ахам̣ бад̇д̇ам̣ хад̇т̇ад̇о мун̃жзяяам̣, гин̃жи на бхавзяяаа’’д̇и ааха. ат̇ааяасмаа лосагад̇иссад̇т̇зро аг̇г̇асаавагз д̇хаммасзнаабад̇имхи бад̇д̇ам̣ г̇ахзд̇ваа тид̇з жад̇умад̇хурам̣ барибхун̃ж̇и. д̇ам̣ т̇зрасса арияид̣̇д̇хиб̣алзна баригкаяам̣ на аг̇амааси. д̇ад̣̇аа лосагад̇иссад̇т̇зро яаавад̣̇ад̇т̇ам̣ уд̣̇арабуурам̣ гад̇ваа барибхун̃ж̇и, д̇ам̣ д̣̇ивасам̣язва жа анубаад̣̇исзсааяа ниб̣б̣аанад̇хаад̇уяаа бариниб̣б̣ааяи. саммаасамб̣уд̣̇д̇хо санд̇игз тад̇ваа сарийранигкзбам̣ гаарзси, д̇хаад̇уяо г̇ахзд̇ваа жзд̇ияам̣ гарим̣су.
So aparena samayena vipassanaṃ vaḍḍhetvā aggaphale arahatte patiṭṭhitopi appalābhova ahosi. Athassa anupubbena āyusaṅkhāresu parihīnesu parinibbānadivaso sampāpuṇi. Dhammasenāpati āvajjento tassa parinibbānabhāvaṃ ñatvā ‘‘ayaṃ losakatissatthero ajja parinibbāyissati, ajja mayā etassa yāvadatthaṃ āhāraṃ dātuṃ vaṭṭatī’’ti taṃ ādāya sāvatthiṃ piṇḍāya pāvisi. Thero taṃ nissāya tāva bahumanussāya sāvatthiyā hatthaṃ pasāretvā vandanamattampi nālattha. Atha naṃ thero ‘‘gacchāvuso, āsanasālāya nisīdā’’ti uyyojetvā gato. Taṃ āgatameva manussā ‘‘ayyo, āgato’’ti āsane nisīdāpetvā bhojesi. Theropi ‘‘imaṃ losakassa dethā’’ti laddhāhāraṃ pesesi. Taṃ gahetvā gatā losakatissattheraṃ asaritvā sayameva bhuñjiṃsu. Atha therassa uṭṭhāya vihāraṃ gamanakāle losakatissatthero āgantvā theraṃ vandi, thero nivattitvā ṭhitakova ‘‘laddhaṃ te, āvuso, bhatta’’nti pucchi. Labhissāma no, bhanteti. Thero saṃvegapatto kālaṃ olokesi, kālo atikkanto. Thero ‘‘hotāvuso, idheva nisīdā’’ti losakattheraṃ āsanasālāyaṃ nisīdāpetvā kosalarañño nivesanaṃ agamāsi. Rājā therassa pattaṃ gāhāpetvā ‘‘bhattassa akālo’’ti pattapūraṃ catumadhuraṃ dāpesi. Thero taṃ ādāya gantvā ‘‘ehāvuso, tissa imaṃ catumadhuraṃ bhuñjā’’ti vatvā pattaṃ gahetvā aṭṭhāsi. So there gāravena lajjanto na paribhuñjati. Atha naṃ thero ‘‘ehāvuso tissa, ahaṃ imaṃ pattaṃ gahetvāva ṭhassāmi, tvaṃ nisīditvā paribhuñja. Sace ahaṃ pattaṃ hatthato muñceyyaṃ, kiñci na bhaveyyā’’ti āha. Athāyasmā losakatissatthero aggasāvake dhammasenāpatimhi pattaṃ gahetvā ṭhite catumadhuraṃ paribhuñji. Taṃ therassa ariyiddhibalena parikkhayaṃ na agamāsi. Tadā losakatissatthero yāvadatthaṃ udarapūraṃ katvā paribhuñji, taṃ divasaṃyeva ca anupādisesāya nibbānadhātuyā parinibbāyi. Sammāsambuddho santike ṭhatvā sarīranikkhepaṃ kāresi, dhātuyo gahetvā cetiyaṃ kariṃsu.
д̇ад̣̇аа бхигкуу д̇хаммасабхааяам̣ саннибад̇ид̇ваа ‘‘аавусо, ахо лосагад̇иссад̇т̇зро аббабун̃н̃о аббалаабхий, зваруубзна наама аббабун̃н̃зна аббалаабхинаа гат̇ам̣ арияад̇хаммо лад̣̇д̇хо’’д̇и гат̇знд̇аа нисийд̣̇им̣су. сад̇т̇аа д̇хаммасабхам̣ г̇анд̇ваа ‘‘гааяа нуд̇т̇а, бхигкавз, зд̇арахи гат̇ааяа саннисиннаа’’д̇и бужчи. д̇з ‘‘имааяа наама, бханд̇з’’д̇и аарожаяим̣су. сад̇т̇аа ‘‘бхигкавз, зсо бхигку ад̇д̇ано алаабхибхааван̃жа арияад̇хаммалаабхибхааван̃жа ад̇д̇анаава агааси. аяан̃хи буб̣б̣з барзсам̣ лаабханд̇арааяам̣ гад̇ваа аббалаабхий ж̇аад̇о, ‘‘анижжам̣, д̣̇угкам̣, анад̇д̇аа’’д̇и вибассанааяа яуд̇д̇абхаавасса б̣алзна арияад̇хаммалаабхий ж̇аад̇о’’д̇и вад̇ваа ад̇ийд̇ам̣ аахари.
Tadā bhikkhū dhammasabhāyaṃ sannipatitvā ‘‘āvuso, aho losakatissatthero appapuñño appalābhī, evarūpena nāma appapuññena appalābhinā kathaṃ ariyadhammo laddho’’ti kathentā nisīdiṃsu. Satthā dhammasabhaṃ gantvā ‘‘kāya nuttha, bhikkhave, etarahi kathāya sannisinnā’’ti pucchi. Te ‘‘imāya nāma, bhante’’ti ārocayiṃsu. Satthā ‘‘bhikkhave, eso bhikkhu attano alābhibhāvañca ariyadhammalābhibhāvañca attanāva akāsi. Ayañhi pubbe paresaṃ lābhantarāyaṃ katvā appalābhī jāto, ‘‘aniccaṃ, dukkhaṃ, anattā’’ti vipassanāya yuttabhāvassa balena ariyadhammalābhī jāto’’ti vatvā atītaṃ āhari.
ад̇ийд̇з гира гассабасаммаасамб̣уд̣̇д̇хагаалз ан̃н̃ад̇аро бхигку згам̣ гудумб̣игам̣ ниссааяа г̇аамагааваасз васад̇и багад̇ад̇д̇о сийлаваа вибассанааяа яуд̇д̇аббаяуд̇д̇о. ат̇зго кийн̣аасавад̇т̇зро самавад̇д̇аваасам̣ васамаано анубуб̣б̣зна д̇асса бхигкуно убадтаагагудумб̣игасса васанаг̇аамам̣ самбад̇д̇о. гудумб̣иго т̇зрасса ирияаабат̇зязва басийд̣̇ид̇ваа бад̇д̇ам̣ аад̣̇ааяа гхарам̣ бавзсзд̇ваа саггажжам̣ бхож̇зд̇ваа т̇огам̣ д̇хаммагат̇ам̣ суд̇ваа т̇зрам̣ ванд̣̇ид̇ваа ‘‘бханд̇з, амхаагам̣ д̇хуравихаарамзва г̇ажчат̇а, маяам̣ сааяанхасамаяз ааг̇анд̇ваа бассиссаамаа’’д̇и ааха. т̇зро вихаарам̣ г̇анд̇ваа нзваасигад̇т̇зрам̣ ванд̣̇ид̇ваа аабужчид̇ваа згаманд̇ам̣ нисийд̣̇и. соби д̇зна сад̣̇д̇хим̣ бадисант̇аарам̣ гад̇ваа ‘‘лад̣̇д̇хо д̇з, аавусо, бхигкаахааро’’д̇и бужчи. ‘‘аама, лад̣̇д̇хо’’д̇и. ‘‘гахам̣ лад̣̇д̇хо’’д̇и? ‘‘д̇умхаагам̣ д̇хураг̇аамз гудумб̣игагхарз’’д̇и. зван̃жа бана вад̇ваа ад̇д̇ано сзнаасанам̣ бужчид̇ваа бадиж̇аг̇г̇ид̇ваа бад̇д̇ажийварам̣ бадисаамзд̇ваа жхаанасукзна паласукзна жа вийд̇инаамзнд̇о нисийд̣̇и.
Atīte kira kassapasammāsambuddhakāle aññataro bhikkhu ekaṃ kuṭumbikaṃ nissāya gāmakāvāse vasati pakatatto sīlavā vipassanāya yuttappayutto. Atheko khīṇāsavatthero samavattavāsaṃ vasamāno anupubbena tassa bhikkhuno upaṭṭhākakuṭumbikassa vasanagāmaṃ sampatto. Kuṭumbiko therassa iriyāpatheyeva pasīditvā pattaṃ ādāya gharaṃ pavesetvā sakkaccaṃ bhojetvā thokaṃ dhammakathaṃ sutvā theraṃ vanditvā ‘‘bhante, amhākaṃ dhuravihārameva gacchatha, mayaṃ sāyanhasamaye āgantvā passissāmā’’ti āha. Thero vihāraṃ gantvā nevāsikattheraṃ vanditvā āpucchitvā ekamantaṃ nisīdi. Sopi tena saddhiṃ paṭisanthāraṃ katvā ‘‘laddho te, āvuso, bhikkhāhāro’’ti pucchi. ‘‘Āma, laddho’’ti. ‘‘Kahaṃ laddho’’ti? ‘‘Tumhākaṃ dhuragāme kuṭumbikaghare’’ti. Evañca pana vatvā attano senāsanaṃ pucchitvā paṭijaggitvā pattacīvaraṃ paṭisāmetvā jhānasukhena phalasukhena ca vītināmento nisīdi.
соби гудумб̣иго сааяанхз г̇анд̇хамаалан̃жзва бад̣̇ийбзяяан̃жа г̇аахаабзд̇ваа вихаарам̣ г̇анд̇ваа нзваасигад̇т̇зрам̣ ванд̣̇ид̇ваа ‘‘бханд̇з, зго ааг̇анд̇угад̇т̇зро ад̇т̇и, ааг̇ад̇о ну ко’’д̇и бужчи. ‘‘аама, ааг̇ад̇о’’д̇и. ‘‘ид̣̇аани гаха’’нд̇и. ‘‘асугасзнаасанз наамаа’’д̇и. со д̇асса санд̇игам̣ г̇анд̇ваа ванд̣̇ид̇ваа згаманд̇ам̣ нисинно д̇хаммагат̇ам̣ суд̇ваа сийд̇алавзлааяа жзд̇ияан̃жа б̣од̇хин̃жа бууж̇зд̇ваа д̣̇ийбз ж̇аалзд̇ваа убхоби ж̇анз ниманд̇зд̇ваа г̇ад̇о. нзваасигад̇т̇зроби ко ‘‘аяам̣ гудумб̣иго барибхинно, сажааяам̣ бхигку имасмим̣ вихаарз васиссад̇и, на мам̣ зса гисмин̃жи г̇ан̣аяиссад̇ий’’д̇и т̇зрз анад̇д̇аманад̇ам̣ аабаж̇ж̇ид̇ваа ‘‘имасмим̣ вихаарз зд̇асса авасанаагааро маяаа гаад̇ум̣ ваддад̇ий’’д̇и д̇зна убадтаанавзлааяа ааг̇ад̇зна сад̣̇д̇хим̣ гин̃жи на гат̇зси. кийн̣аасавад̇т̇зро д̇асса аж̇жхаасаяам̣ ж̇аанид̇ваа ‘‘аяам̣ т̇зро мама гулз ваа г̇ан̣з ваа абалиб̣уд̣̇д̇хабхаавам̣ на ж̇аанаад̇ий’’д̇и ад̇д̇ано васанадтаанам̣ г̇анд̇ваа жхаанасукзна паласукзна вийд̇инаамзси.
Sopi kuṭumbiko sāyanhe gandhamālañceva padīpeyyañca gāhāpetvā vihāraṃ gantvā nevāsikattheraṃ vanditvā ‘‘bhante, eko āgantukatthero atthi, āgato nu kho’’ti pucchi. ‘‘Āma, āgato’’ti. ‘‘Idāni kaha’’nti. ‘‘Asukasenāsane nāmā’’ti. So tassa santikaṃ gantvā vanditvā ekamantaṃ nisinno dhammakathaṃ sutvā sītalavelāya cetiyañca bodhiñca pūjetvā dīpe jāletvā ubhopi jane nimantetvā gato. Nevāsikattheropi kho ‘‘ayaṃ kuṭumbiko paribhinno, sacāyaṃ bhikkhu imasmiṃ vihāre vasissati, na maṃ esa kismiñci gaṇayissatī’’ti there anattamanataṃ āpajjitvā ‘‘imasmiṃ vihāre etassa avasanākāro mayā kātuṃ vaṭṭatī’’ti tena upaṭṭhānavelāya āgatena saddhiṃ kiñci na kathesi. Khīṇāsavatthero tassa ajjhāsayaṃ jānitvā ‘‘ayaṃ thero mama kule vā gaṇe vā apalibuddhabhāvaṃ na jānātī’’ti attano vasanaṭṭhānaṃ gantvā jhānasukhena phalasukhena vītināmesi.
нзваасигоби бунад̣̇ивасз накабидтзна г̇ан̣д̣им̣ бахарид̇ваа накзна д̣̇ваарам̣ аагодзд̇ваа гудумб̣игасса г̇зхам̣ аг̇амааси. со д̇асса бад̇д̇ам̣ г̇ахзд̇ваа бан̃н̃ад̇д̇аасанз нисийд̣̇аабзд̇ваа ‘‘ааг̇анд̇угад̇т̇зро гахам̣, бханд̇з’’д̇и бужчи. ‘‘наахам̣ д̇ава гулуубагасса бавад̇д̇им̣ ж̇аанаами, г̇ан̣д̣им̣ бахаранд̇оби д̣̇ваарам̣ аагодзнд̇оби баб̣од̇хзд̇ум̣ наасагким̣, хияяо д̇ава г̇зхз бан̣ийд̇абхож̇анам̣ бхун̃ж̇ид̇ваа ж̇ийраабзд̇ум̣ асаггонд̇о ид̣̇аани нид̣̇д̣̇ам̣ огганд̇оязва бхависсад̇и, д̇вам̣ басийд̣̇амаано зваруубзсуязва таанзсу басийд̣̇асий’’д̇и ааха – ‘‘кийн̣аасавад̇т̇зроби ад̇д̇ано бхигкаажааравзлам̣ саллагкзд̇ваа сарийрам̣ бадиж̇аг̇г̇ид̇ваа бад̇д̇ажийварамаад̣̇ааяа аагаасз уббад̇ид̇ваа ан̃н̃ад̇т̇а аг̇амааси. со гудумб̣иго нзваасигад̇т̇зрам̣ саббимад̇хусагкараабхисан̇кад̇ам̣ бааяаасам̣ бааязд̇ваа бад̇д̇ам̣ г̇анд̇хажун̣н̣зхи уб̣б̣аддзд̇ваа буна буурзд̇ваа ‘‘бханд̇з, со т̇зро маг̇г̇агиланд̇о бхависсад̇и, ид̣̇амасса харат̇аа’’д̇и ад̣̇ааси. ид̇аро абадигкибид̇ваава г̇ахзд̇ваа г̇ажчанд̇о ‘‘сажз со бхигку имам̣ бааяаасам̣ бивиссад̇и, г̇ийвааяам̣ г̇ахзд̇ваа ниггад̣дхияамааноби на г̇амиссад̇и. сажз банаахам̣ имам̣ бааяаасам̣ мануссаанам̣ д̣̇ассаами, баагадам̣ мз гаммам̣ бхависсад̇и. сажз уд̣̇агз обилаабзссаами, уд̣̇агабидтз сабби бан̃н̃ааяиссад̇и . сажз бхуумияам̣ чад̣д̣зссаами, гаагасаннибаад̇зна бан̃н̃ааяиссад̇и. гад̇т̇а ну ко имам̣ чад̣д̣зяяа’’нд̇и убад̇хаарзнд̇о згам̣ жхаамагкзд̇д̇ам̣ д̣̇исваа ан̇г̇аарз вияуухид̇ваа д̇ад̇т̇а багкибид̇ваа убари ан̇г̇аарзхи бадижчаад̣̇зд̇ваа вихаарам̣ г̇ад̇о д̇ам̣ бхигкум̣ ад̣̇исваа жинд̇зси ‘‘ад̣̇д̇хаа со бхигку кийн̣аасаво мама аж̇жхаасаяам̣ вид̣̇ид̇ваа ан̃н̃ад̇т̇а г̇ад̇о бхависсад̇и, ахо маяаа уд̣̇арахзд̇у аяуд̇д̇ам̣ гад̇а’’нд̇и д̇аавад̣̇звасса маханд̇ам̣ д̣̇оманассам̣ уд̣̇абаад̣̇и. д̇ад̇о бадтааязва жа мануссабзд̇о худ̇ваа на жирассзва гаалам̣ гад̇ваа нираяз ниб̣б̣ад̇д̇и.
Nevāsikopi punadivase nakhapiṭṭhena gaṇḍiṃ paharitvā nakhena dvāraṃ ākoṭetvā kuṭumbikassa gehaṃ agamāsi. So tassa pattaṃ gahetvā paññattāsane nisīdāpetvā ‘‘āgantukatthero kahaṃ, bhante’’ti pucchi. ‘‘Nāhaṃ tava kulūpakassa pavattiṃ jānāmi, gaṇḍiṃ paharantopi dvāraṃ ākoṭentopi pabodhetuṃ nāsakkhiṃ, hiyyo tava gehe paṇītabhojanaṃ bhuñjitvā jīrāpetuṃ asakkonto idāni niddaṃ okkantoyeva bhavissati, tvaṃ pasīdamāno evarūpesuyeva ṭhānesu pasīdasī’’ti āha – ‘‘khīṇāsavattheropi attano bhikkhācāravelaṃ sallakkhetvā sarīraṃ paṭijaggitvā pattacīvaramādāya ākāse uppatitvā aññattha agamāsi. So kuṭumbiko nevāsikattheraṃ sappimadhusakkharābhisaṅkhataṃ pāyāsaṃ pāyetvā pattaṃ gandhacuṇṇehi ubbaṭṭetvā puna pūretvā ‘‘bhante, so thero maggakilanto bhavissati, idamassa harathā’’ti adāsi. Itaro apaṭikkhipitvāva gahetvā gacchanto ‘‘sace so bhikkhu imaṃ pāyāsaṃ pivissati, gīvāyaṃ gahetvā nikkaḍḍhiyamānopi na gamissati. Sace panāhaṃ imaṃ pāyāsaṃ manussānaṃ dassāmi, pākaṭaṃ me kammaṃ bhavissati. Sace udake opilāpessāmi, udakapiṭṭhe sappi paññāyissati . Sace bhūmiyaṃ chaḍḍessāmi, kākasannipātena paññāyissati. Kattha nu kho imaṃ chaḍḍeyya’’nti upadhārento ekaṃ jhāmakkhettaṃ disvā aṅgāre viyūhitvā tattha pakkhipitvā upari aṅgārehi paṭicchādetvā vihāraṃ gato taṃ bhikkhuṃ adisvā cintesi ‘‘addhā so bhikkhu khīṇāsavo mama ajjhāsayaṃ viditvā aññattha gato bhavissati, aho mayā udarahetu ayuttaṃ kata’’nti tāvadevassa mahantaṃ domanassaṃ udapādi. Tato paṭṭhāyeva ca manussapeto hutvā na cirasseva kālaṃ katvā niraye nibbatti.
со б̣ахууни вассасад̇асахассаани нираяз бажжид̇ваа баггаавасзсзна бадибаадияаа бан̃жаж̇аад̇исад̇зсу яагко худ̇ваа згад̣̇ивасамби уд̣̇арабуурам̣ аахаарам̣ на лабхи. згад̣̇ивасам̣ бана г̇аб̣бхамалам̣ уд̣̇арабуурам̣ лабхи. буна бан̃жаж̇аад̇исад̇зсу сунако ахоси. д̇ад̣̇ааби згад̣̇ивасам̣ бхад̇д̇аваманам̣ уд̣̇арабуурам̣ лабхи, сзсагаалз бана д̇зна уд̣̇арабууро аахааро наама на лад̣̇д̇хабуб̣б̣о. сунакаяонид̇о бана жавид̇ваа гаасирадтз згасмим̣ г̇аамз д̣̇уг̇г̇ад̇агулз ниб̣б̣ад̇д̇и. д̇асса ниб̣б̣ад̇д̇ид̇о бадтааяа д̇ам̣ гулам̣ барамад̣̇уг̇г̇ад̇амзва ж̇аад̇ам̣, ж̇аад̇ид̇о уд̣̇д̇хам̣ уд̣̇агаган̃ж̇игаамад̇д̇амби на лабхи. д̇асса бана ‘‘мид̇д̇авинд̣̇аго’’д̇и наамам̣ ахоси. маад̇аабид̇аро чаад̇агад̣̇угкам̣ ад̇хиваасзд̇ум̣ асаггонд̇аа ‘‘г̇ажча гаал̣аган̣н̣ий’’д̇и д̇ам̣ бот̇зд̇ваа нийхарим̣су. со абадисаран̣о вижаранд̇о б̣аараан̣асим̣ аг̇амааси. д̇ад̣̇аа б̣од̇хисад̇д̇о б̣аараан̣асияам̣ д̣̇исаабаамогко аажарияо худ̇ваа бан̃жа маан̣авагасад̇аани сиббам̣ ваажзд̇и. д̇ад̣̇аа б̣аараан̣асиваасино д̣̇уг̇г̇ад̇аанам̣ бариб̣б̣аяам̣ д̣̇ад̇ваа сиббам̣ сигкаабзнд̇и. аяамби мид̇д̇авинд̣̇аго б̣од̇хисад̇д̇асса санд̇игз сиббам̣ сигкад̇и. со парусо ановаад̣̇агкамо д̇ам̣ д̇ам̣ бахаранд̇о вижарад̇и, б̣од̇хисад̇д̇зна овад̣̇ияамааноби оваад̣̇ам̣ на г̇ан̣хаад̇и. д̇ам̣ ниссааяа ааяобисса манд̣̇о ж̇аад̇о.
So bahūni vassasatasahassāni niraye paccitvā pakkāvasesena paṭipāṭiyā pañcajātisatesu yakkho hutvā ekadivasampi udarapūraṃ āhāraṃ na labhi. Ekadivasaṃ pana gabbhamalaṃ udarapūraṃ labhi. Puna pañcajātisatesu sunakho ahosi. Tadāpi ekadivasaṃ bhattavamanaṃ udarapūraṃ labhi, sesakāle pana tena udarapūro āhāro nāma na laddhapubbo. Sunakhayonito pana cavitvā kāsiraṭṭhe ekasmiṃ gāme duggatakule nibbatti. Tassa nibbattito paṭṭhāya taṃ kulaṃ paramaduggatameva jātaṃ, jātito uddhaṃ udakakañjikāmattampi na labhi. Tassa pana ‘‘mittavindako’’ti nāmaṃ ahosi. Mātāpitaro chātakadukkhaṃ adhivāsetuṃ asakkontā ‘‘gaccha kāḷakaṇṇī’’ti taṃ pothetvā nīhariṃsu. So apaṭisaraṇo vicaranto bārāṇasiṃ agamāsi. Tadā bodhisatto bārāṇasiyaṃ disāpāmokkho ācariyo hutvā pañca māṇavakasatāni sippaṃ vāceti. Tadā bārāṇasivāsino duggatānaṃ paribbayaṃ datvā sippaṃ sikkhāpenti. Ayampi mittavindako bodhisattassa santike sippaṃ sikkhati. So pharuso anovādakkhamo taṃ taṃ paharanto vicarati, bodhisattena ovadiyamānopi ovādaṃ na gaṇhāti. Taṃ nissāya āyopissa mando jāto.
ат̇а со маан̣авагзхи сад̣̇д̇хим̣ бхан̣д̣ид̇ваа оваад̣̇ам̣ аг̇г̇ан̣ханд̇о д̇ад̇о балааяид̇ваа аахин̣д̣анд̇о згам̣ бажжанд̇аг̇аамам̣ бад̇ваа бхад̇им̣ гад̇ваа ж̇ийвад̇и. со д̇ад̇т̇а згааяа д̣̇уг̇г̇ад̇ид̇т̇ияаа сад̣̇д̇хим̣ сам̣ваасам̣ габбзси. саа д̇ам̣ ниссааяа д̣̇вз д̣̇аарагз виж̇ааяи. г̇аамаваасино ‘‘амхаагам̣ сусаасанам̣ д̣̇уссаасанам̣ аарожзяяаасий’’д̇и мид̇д̇авинд̣̇агасса бхад̇им̣ д̣̇ад̇ваа д̇ам̣ г̇аамад̣̇ваарз гудигааяа васаабзсум̣. д̇ам̣ бана мид̇д̇авинд̣̇агам̣ ниссааяа д̇з бажжанд̇аг̇аамаваасино сад̇д̇агкад̇д̇ум̣ рааж̇ад̣̇ан̣д̣ам̣ аг̇амам̣су, сад̇д̇агкад̇д̇ум̣ нзсам̣ г̇зхаани жхааяим̣су, сад̇д̇агкад̇д̇ум̣ д̇ал̣аагам̣ бхиж̇ж̇и. д̇з жинд̇аяим̣су ‘‘амхаагам̣ буб̣б̣з имасса мид̇д̇авинд̣̇агасса анааг̇аманагаалз зваруубам̣ над̇т̇и, ид̣̇аани банасса ааг̇ад̇агаалад̇о бадтааяа барихааяаамаа’’д̇и д̇ам̣ бот̇зд̇ваа нийхарим̣су.
Atha so māṇavakehi saddhiṃ bhaṇḍitvā ovādaṃ aggaṇhanto tato palāyitvā āhiṇḍanto ekaṃ paccantagāmaṃ patvā bhatiṃ katvā jīvati. So tattha ekāya duggatitthiyā saddhiṃ saṃvāsaṃ kappesi. Sā taṃ nissāya dve dārake vijāyi. Gāmavāsino ‘‘amhākaṃ susāsanaṃ dussāsanaṃ āroceyyāsī’’ti mittavindakassa bhatiṃ datvā taṃ gāmadvāre kuṭikāya vasāpesuṃ. Taṃ pana mittavindakaṃ nissāya te paccantagāmavāsino sattakkhattuṃ rājadaṇḍaṃ agamaṃsu, sattakkhattuṃ nesaṃ gehāni jhāyiṃsu, sattakkhattuṃ taḷākaṃ bhijji. Te cintayiṃsu ‘‘amhākaṃ pubbe imassa mittavindakassa anāgamanakāle evarūpaṃ natthi, idāni panassa āgatakālato paṭṭhāya parihāyāmā’’ti taṃ pothetvā nīhariṃsu.
со ад̇д̇ано д̣̇аарагз г̇ахзд̇ваа ан̃н̃ад̇т̇а г̇ажчанд̇о згам̣ амануссабариг̇г̇ахам̣ адавим̣ баависи. д̇ад̇т̇асса амануссаа д̣̇аарагз жа бхарияан̃жа маарзд̇ваа мам̣сам̣ каад̣̇им̣су. со д̇ад̇о балааяид̇ваа д̇ад̇о д̇ад̇о аахин̣д̣анд̇о згам̣ г̇амбхийрам̣ наама бадданаг̇аамам̣ нааваависсаж̇ж̇анад̣̇ивасзязва бад̇ваа гаммагаараго худ̇ваа наавам̣ абхирухи. нааваа самуд̣̇д̣̇абидтз сад̇д̇аахам̣ г̇анд̇ваа сад̇д̇амз д̣̇ивасз самуд̣̇д̣̇амаж̇жхз аагодзд̇ваа табид̇аа вияа адтааси. д̇з гаал̣аган̣н̣исалаагам̣ жаарзсум̣, сад̇д̇агкад̇д̇ум̣ мид̇д̇авинд̣̇агассзва баабун̣и. мануссаа д̇ассзгам̣ взл̣угалаабам̣ д̣̇ад̇ваа хад̇т̇з г̇ахзд̇ваа самуд̣̇д̣̇абидтз кибим̣су, д̇асмим̣ кид̇д̇амад̇д̇з нааваа аг̇амааси. мид̇д̇авинд̣̇аго взл̣угалаабз нибаж̇ж̇ид̇ваа самуд̣̇д̣̇абидтз г̇ажчанд̇о гассабасаммаасамб̣уд̣̇д̇хагаалз рагкид̇асийласса палзна самуд̣̇д̣̇абидтз згасмим̣ палигавимаанз жад̇ассо д̣̇звад̇хийд̇аро бадилабхид̇ваа д̇аасам̣ санд̇игз сукам̣ анубхавамаано сад̇д̇аахам̣ васи. д̇аа бана вимаанабзд̇ияо сад̇д̇аахам̣ сукам̣ анубхаванд̇и, сад̇д̇аахам̣ д̣̇угкам̣. сад̇д̇аахам̣ д̣̇угкам̣ анубхавид̇ум̣ г̇ажчамаанаа ‘‘яаава маяам̣ ааг̇ажчаама, д̇аава ид̇хзва хохий’’д̇и вад̇ваа аг̇амам̣су.
So attano dārake gahetvā aññattha gacchanto ekaṃ amanussapariggahaṃ aṭaviṃ pāvisi. Tatthassa amanussā dārake ca bhariyañca māretvā maṃsaṃ khādiṃsu. So tato palāyitvā tato tato āhiṇḍanto ekaṃ gambhīraṃ nāma paṭṭanagāmaṃ nāvāvissajjanadivaseyeva patvā kammakārako hutvā nāvaṃ abhiruhi. Nāvā samuddapiṭṭhe sattāhaṃ gantvā sattame divase samuddamajjhe ākoṭetvā ṭhapitā viya aṭṭhāsi. Te kāḷakaṇṇisalākaṃ cāresuṃ, sattakkhattuṃ mittavindakasseva pāpuṇi. Manussā tassekaṃ veḷukalāpaṃ datvā hatthe gahetvā samuddapiṭṭhe khipiṃsu, tasmiṃ khittamatte nāvā agamāsi. Mittavindako veḷukalāpe nipajjitvā samuddapiṭṭhe gacchanto kassapasammāsambuddhakāle rakkhitasīlassa phalena samuddapiṭṭhe ekasmiṃ phalikavimāne catasso devadhītaro paṭilabhitvā tāsaṃ santike sukhaṃ anubhavamāno sattāhaṃ vasi. Tā pana vimānapetiyo sattāhaṃ sukhaṃ anubhavanti, sattāhaṃ dukkhaṃ. Sattāhaṃ dukkhaṃ anubhavituṃ gacchamānā ‘‘yāva mayaṃ āgacchāma, tāva idheva hohī’’ti vatvā agamaṃsu.
мид̇д̇авинд̣̇аго д̇аасам̣ г̇ад̇агаалз взл̣угалаабз нибаж̇ж̇ид̇ваа бурад̇о г̇ажчанд̇о раж̇ад̇авимаанз адта д̣̇звад̇хийд̇аро лабхи. д̇ад̇оби барам̣ г̇ажчанд̇о ман̣ивимаанз сол̣аса, ганагавимаанз д̣̇вад̇д̇им̣са д̣̇звад̇хийд̇аро лабхи. д̇аасамби важанам̣ агад̇ваа барад̇о г̇ажчанд̇о анд̇арад̣̇ийбагз згам̣ яагканаг̇арам̣ ад̣̇д̣̇аса. д̇ад̇т̇згаа яагкиний аж̇аруубзна вижарад̇и. мид̇д̇авинд̣̇аго д̇ассаа яагкинибхаавам̣ аж̇аананд̇о ‘‘аж̇амам̣сам̣ каад̣̇иссаамий’’д̇и д̇ам̣ баад̣̇з аг̇г̇ахзси, саа яагкаанубхаавзна д̇ам̣ угкибид̇ваа киби. со д̇ааяа кид̇д̇о самуд̣̇д̣̇амад̇т̇агзна г̇анд̇ваа б̣аараан̣асияам̣ барикаабидтз згасмим̣ ган̣дагаг̇умб̣амад̇т̇агз бад̇ид̇ваа баваддамаано бхуумияам̣ бад̇идтааси. д̇асмин̃жа самаяз д̇асмим̣ барикаабидтз ран̃н̃о аж̇игаа жарамаанаа жораа харанд̇и. аж̇игаг̇обагаа ‘‘жорз г̇ан̣хиссаамаа’’д̇и згаманд̇ам̣ нилийнаа адтам̣су. мид̇д̇авинд̣̇аго баваддид̇ваа бхуумияам̣ тид̇о д̇аа аж̇игаа д̣̇исваа жинд̇зси ‘‘ахам̣ самуд̣̇д̣̇з згасмим̣ д̣̇ийбагз аж̇игам̣ баад̣̇з г̇ахзд̇ваа д̇ааяа кид̇д̇о ид̇ха бад̇ид̇о. сажз ид̣̇аани згам̣ аж̇игам̣ баад̣̇з г̇ахзссаами, саа мам̣ барад̇о самуд̣̇д̣̇абидтз вимаанад̣̇звад̇аанам̣ санд̇игз кибиссад̇ий’’д̇и. со звам̣ аяонисо манасигарид̇ваа аж̇игам̣ баад̣̇з г̇ан̣хи, саа г̇ахид̇амад̇д̇аа вирави. аж̇игаг̇обагаа ид̇о жид̇о жа ааг̇анд̇ваа д̇ам̣ г̇ахзд̇ваа ‘‘зд̇д̇агам̣ гаалам̣ рааж̇агулз аж̇игакаад̣̇аго зса жоро’’д̇и д̇ам̣ годдзд̇ваа б̣анд̇хид̇ваа ран̃н̃о санд̇игам̣ нзнд̇и.
Mittavindako tāsaṃ gatakāle veḷukalāpe nipajjitvā purato gacchanto rajatavimāne aṭṭha devadhītaro labhi. Tatopi paraṃ gacchanto maṇivimāne soḷasa, kanakavimāne dvattiṃsa devadhītaro labhi. Tāsampi vacanaṃ akatvā parato gacchanto antaradīpake ekaṃ yakkhanagaraṃ addasa. Tatthekā yakkhinī ajarūpena vicarati. Mittavindako tassā yakkhinibhāvaṃ ajānanto ‘‘ajamaṃsaṃ khādissāmī’’ti taṃ pāde aggahesi, sā yakkhānubhāvena taṃ ukkhipitvā khipi. So tāya khitto samuddamatthakena gantvā bārāṇasiyaṃ parikhāpiṭṭhe ekasmiṃ kaṇṭakagumbamatthake patitvā pavaṭṭamāno bhūmiyaṃ patiṭṭhāsi. Tasmiñca samaye tasmiṃ parikhāpiṭṭhe rañño ajikā caramānā corā haranti. Ajikagopakā ‘‘core gaṇhissāmā’’ti ekamantaṃ nilīnā aṭṭhaṃsu. Mittavindako pavaṭṭitvā bhūmiyaṃ ṭhito tā ajikā disvā cintesi ‘‘ahaṃ samudde ekasmiṃ dīpake ajikaṃ pāde gahetvā tāya khitto idha patito. Sace idāni ekaṃ ajikaṃ pāde gahessāmi, sā maṃ parato samuddapiṭṭhe vimānadevatānaṃ santike khipissatī’’ti. So evaṃ ayoniso manasikaritvā ajikaṃ pāde gaṇhi, sā gahitamattā viravi. Ajikagopakā ito cito ca āgantvā taṃ gahetvā ‘‘ettakaṃ kālaṃ rājakule ajikakhādako esa coro’’ti taṃ koṭṭetvā bandhitvā rañño santikaṃ nenti.
д̇асмим̣ кан̣з б̣од̇хисад̇д̇о бан̃жасад̇амаан̣авагабаривуд̇о наг̇араа нигкамма нхааяид̇ум̣ г̇ажчанд̇о мид̇д̇авинд̣̇агам̣ д̣̇исваа сан̃ж̇аанид̇ваа д̇з мануссз ааха – ‘‘д̇аад̇аа, аяам̣ амхаагам̣ анд̇зваасиго, гасмаа нам̣ г̇ан̣хат̇аа’’д̇и? ‘‘аж̇игажораго, аяяа, згам̣ аж̇игам̣ баад̣̇з г̇ан̣хи, д̇асмаа г̇ахид̇о’’д̇и. ‘‘д̇зна хзд̇ам̣ амхаагам̣ д̣̇аасам̣ гад̇ваа д̣̇зт̇а, амхз ниссааяа ж̇ийвиссад̇ий’’д̇и. д̇з, ‘‘саад̇ху аяяаа’’д̇и д̇ам̣ виссаж̇ж̇зд̇ваа аг̇амам̣су. ат̇а нам̣ б̣од̇хисад̇д̇о ‘‘мид̇д̇авинд̣̇ага, д̇вам̣ зд̇д̇агам̣ гаалам̣ гахам̣ васий’’д̇и бужчи. со саб̣б̣ам̣ ад̇д̇анаа гад̇агаммам̣ аарожзси. б̣од̇хисад̇д̇о ‘‘ад̇т̇агаамаанам̣ важанам̣ агаронд̇о звам̣ д̣̇угкам̣ баабун̣аад̇ий’’д̇и вад̇ваа имам̣ г̇аат̇амааха –
Tasmiṃ khaṇe bodhisatto pañcasatamāṇavakaparivuto nagarā nikkhamma nhāyituṃ gacchanto mittavindakaṃ disvā sañjānitvā te manusse āha – ‘‘tātā, ayaṃ amhākaṃ antevāsiko, kasmā naṃ gaṇhathā’’ti? ‘‘Ajikacorako, ayya, ekaṃ ajikaṃ pāde gaṇhi, tasmā gahito’’ti. ‘‘Tena hetaṃ amhākaṃ dāsaṃ katvā detha, amhe nissāya jīvissatī’’ti. Te, ‘‘sādhu ayyā’’ti taṃ vissajjetvā agamaṃsu. Atha naṃ bodhisatto ‘‘mittavindaka, tvaṃ ettakaṃ kālaṃ kahaṃ vasī’’ti pucchi. So sabbaṃ attanā katakammaṃ ārocesi. Bodhisatto ‘‘atthakāmānaṃ vacanaṃ akaronto evaṃ dukkhaṃ pāpuṇātī’’ti vatvā imaṃ gāthamāha –
41.
41.
‘‘яо ад̇т̇агаамасса хид̇аанугамбино, оваж̇ж̇амаано на гарод̇и саасанам̣;
‘‘Yo atthakāmassa hitānukampino, ovajjamāno na karoti sāsanaṃ;
аж̇ияаа баад̣̇амоламб̣а, мид̇д̇аго вияа сожад̇ий’’д̇и.
Ajiyā pādamolamba, mittako viya socatī’’ti.
д̇ад̇т̇а ад̇т̇агаамассаад̇и вуд̣дхим̣ ижчанд̇асса. хид̇аанугамбинод̇и хид̇зна анугамбамаанасса. оваж̇ж̇амаанод̇и муд̣̇угзна хид̇ажид̇д̇зна овад̣̇ияамаано. на гарод̇и саасананд̇и анусидтам̣ на гарод̇и, д̣̇уб̣б̣ажо ановаад̣̇аго ход̇и. мид̇д̇аго вияа сожад̇ийд̇и яат̇ааяам̣ мид̇д̇авинд̣̇аго аж̇игааяа баад̣̇ам̣ г̇ахзд̇ваа сожад̇и гиламад̇и, звам̣ нижжагаалам̣ сожад̇ийд̇и имааяа г̇аат̇ааяа б̣од̇хисад̇д̇о д̇хаммам̣ д̣̇зсзси.
Tattha atthakāmassāti vuḍḍhiṃ icchantassa. Hitānukampinoti hitena anukampamānassa. Ovajjamānoti mudukena hitacittena ovadiyamāno. Na karoti sāsananti anusiṭṭhaṃ na karoti, dubbaco anovādako hoti. Mittako viya socatīti yathāyaṃ mittavindako ajikāya pādaṃ gahetvā socati kilamati, evaṃ niccakālaṃ socatīti imāya gāthāya bodhisatto dhammaṃ desesi.
звам̣ д̇зна т̇зрзна зд̇д̇агз ад̣̇д̇хаанз д̇ийсуязва ад̇д̇абхаавзсу гужчибууро лад̣̇д̇хабуб̣б̣о. яагкзна худ̇ваа згад̣̇ивасам̣ г̇аб̣бхамалам̣ лад̣̇д̇хам̣, сунакзна худ̇ваа згад̣̇ивасам̣ бхад̇д̇аваманам̣, бариниб̣б̣аанад̣̇ивасз д̇хаммасзнаабад̇иссаанубхаавзна жад̇умад̇хурам̣ лад̣̇д̇хам̣. звам̣ барасса лаабханд̇арааяагаран̣ам̣ наама махаад̣̇осанд̇и взд̣̇ид̇аб̣б̣ам̣. д̇асмим̣ бана гаалз соби аажарияо мид̇д̇авинд̣̇агоби яат̇аагаммам̣ г̇ад̇о.
Evaṃ tena therena ettake addhāne tīsuyeva attabhāvesu kucchipūro laddhapubbo. Yakkhena hutvā ekadivasaṃ gabbhamalaṃ laddhaṃ, sunakhena hutvā ekadivasaṃ bhattavamanaṃ, parinibbānadivase dhammasenāpatissānubhāvena catumadhuraṃ laddhaṃ. Evaṃ parassa lābhantarāyakaraṇaṃ nāma mahādosanti veditabbaṃ. Tasmiṃ pana kāle sopi ācariyo mittavindakopi yathākammaṃ gato.
сад̇т̇аа ‘‘звам̣, бхигкавз, ад̇д̇ано аббалаабхибхааван̃жа арияад̇хаммалаабхибхааван̃жа саяамзва зса агаасий’’д̇и имам̣ д̇хаммад̣̇зсанам̣ аахарид̇ваа анусанд̇хим̣ гхадзд̇ваа ж̇аад̇агам̣ самод̇хаанзси – ‘‘д̇ад̣̇аа мид̇д̇авинд̣̇аго лосагад̇иссад̇т̇зро ахоси, д̣̇исаабаамогкаажарияо бана ахамзва ахоси’’нд̇и.
Satthā ‘‘evaṃ, bhikkhave, attano appalābhibhāvañca ariyadhammalābhibhāvañca sayameva esa akāsī’’ti imaṃ dhammadesanaṃ āharitvā anusandhiṃ ghaṭetvā jātakaṃ samodhānesi – ‘‘tadā mittavindako losakatissatthero ahosi, disāpāmokkhācariyo pana ahameva ahosi’’nti.
лосагаж̇аад̇агаван̣н̣анаа батамаа.
Losakajātakavaṇṇanā paṭhamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 41. лосагаж̇аад̇агам̣ • 41. Losakajātakaṃ
