| Library / Tipiṭaka / திபிடக • Tipiṭaka / வினயாலங்கார-டீகா • Vinayālaṅkāra-ṭīkā |
6. மச்ச²மங்ஸவினிச்ச²யகதா²
6. Macchamaṃsavinicchayakathā
38. ஏவங் குலஸங்க³ஹவினிச்ச²யங் கதெ²த்வா இதா³னி மச்ச²மங்ஸவினிச்ச²யங் கதே²துங் ‘‘மச்ச²மங்ஸேஸு பனா’’திஆதி³ வுத்தங். தத்த² த²லே ட²பிதமத்தே மரதி, கேவட்டாதீ³ஹி வா மாரியதீதி மச்சோ². மச்ச²ஸ்ஸ இத³ந்தி மச்ச²ங், மஸியதே ஆமஸியதேதி மங்ஸங், மச்ச²ஞ்ச மங்ஸஞ்ச மச்ச²மங்ஸானி, தேஸு. மச்ச²மங்ஸேஸு பன வினிச்ச²யோ ஏவங் வேதி³தப்³போ³தி யோஜனா. மச்ச²க்³க³ஹணேனாதி எத்த² நித்³தா⁴ரணங் ந காதப்³ப³ங். பன-ஸத்³தோ³ பக்க²ந்தரத்தோ², தி³வாஸெய்யாதீ³ஸு வினிச்ச²யதோ அபரோ மச்ச²மங்ஸேஸு வினிச்ச²யோ வேதி³தப்³போ³தி அத்தோ². க³ய்ஹதே அனேனாதி க³ஹணங். கிங் தங்? ஸத்³தோ³, மச்ச²இதி க³ஹணங் மச்ச²க்³க³ஹணங், தேன மச்ச²க்³க³ஹணேன, மச்ச²ஸத்³தே³னாதி அத்தோ². மங்ஸேஸு பன…பே॰… அகப்பியானீதி எத்த² மனுஸ்ஸமங்ஸங் ஸமானஜாதிமங்ஸதோ படிக்கி²த்தங். ஹத்தி²அஸ்ஸானங் மங்ஸானி ராஜங்க³தோ, ஸுனக²அஹீனங் ஜேகு³ச்ச²பா⁴வதோ, ஸேஸானங் வாளமிக³த்தா பி⁴க்கூ²னங் பரிப³ந்த⁴விமோசனத்த²ங் படிக்கி²த்தந்தி த³ட்ட²ப்³ப³ங்.
38. Evaṃ kulasaṅgahavinicchayaṃ kathetvā idāni macchamaṃsavinicchayaṃ kathetuṃ ‘‘macchamaṃsesu panā’’tiādi vuttaṃ. Tattha thale ṭhapitamatte marati, kevaṭṭādīhi vā māriyatīti maccho. Macchassa idanti macchaṃ, masiyate āmasiyateti maṃsaṃ, macchañca maṃsañca macchamaṃsāni, tesu. Macchamaṃsesu pana vinicchayo evaṃ veditabboti yojanā. Macchaggahaṇenāti ettha niddhāraṇaṃ na kātabbaṃ. Pana-saddo pakkhantarattho, divāseyyādīsu vinicchayato aparo macchamaṃsesu vinicchayo veditabboti attho. Gayhate anenāti gahaṇaṃ. Kiṃ taṃ? Saddo, macchaiti gahaṇaṃ macchaggahaṇaṃ, tena macchaggahaṇena, macchasaddenāti attho. Maṃsesu pana…pe… akappiyānīti ettha manussamaṃsaṃ samānajātimaṃsato paṭikkhittaṃ. Hatthiassānaṃ maṃsāni rājaṅgato, sunakhaahīnaṃ jegucchabhāvato, sesānaṃ vāḷamigattā bhikkhūnaṃ paribandhavimocanatthaṃ paṭikkhittanti daṭṭhabbaṃ.
திகோடிபரிஸுத்³த⁴ந்தி தி³ட்ட²ஸுதபரிஸங்கிதஸங்கா²தாஹி தீஹி கோடீஹி தீஹி ஆகாரேஹி தீஹி காரணேஹி பரிஸுத்³த⁴ங், விமுத்தந்தி அத்தோ². தத்த² அதி³ட்ட²அஸுதானி சக்கு²விஞ்ஞாணஸோதவிஞ்ஞாணானங் அனாரம்மணபா⁴வதோ ஜானிதப்³பா³னி. அபரிஸங்கிதங் பன கத²ங் ஜானிதப்³ப³ந்தி ஆஹ ‘‘அபரிஸங்கிதங் பனா’’திஆதி³, தீணி பரிஸங்கிதானி ஞத்வா தேஸங் படிபக்க²வஸேன அபரிஸங்கிதங் ஜானிதப்³ப³ந்தி அத்தோ². இதா³னி தானி தீணி பரிஸங்கிதானி ச ஏவங் பரிஸங்கிதே ஸதி பி⁴க்கூ²ஹி கத்தப்³ப³விதி⁴ஞ்ச தேன விதி⁴னா அபரிஸங்கிதே ஸதி கத்தப்³ப³பா⁴வஞ்ச வித்தா²ரதோ த³ஸ்ஸேதுங் ‘‘கத²’’ந்திஆதி³மாஹ . தத்த² தி³ஸ்வா பரிஸங்கிதங் தி³ட்ட²பரிஸங்கிதங் நாம. ஸுத்வா பரிஸங்கிதங் ஸுதபரிஸங்கிதங் நாம. அதி³ஸ்வா அஸுத்வா தக்கேன அனுமானேன பரிஸங்கிதங் தது³ப⁴யவினிமுத்தபரிஸங்கிதங் நாம. தங் திவித⁴ம்பி பரிஸங்கிதஸாமஞ்ஞேன ஏகா கோடி ஹோதி, ததோ விமுத்தங் அபரிஸங்கிதங் நாம. ஏவங் அதி³ட்ட²ங் அஸுதங் அபரிஸங்கிதங் மச்ச²மங்ஸங் திகோடிபரிஸுத்³த⁴ங் ஹோதி.
Tikoṭiparisuddhanti diṭṭhasutaparisaṅkitasaṅkhātāhi tīhi koṭīhi tīhi ākārehi tīhi kāraṇehi parisuddhaṃ, vimuttanti attho. Tattha adiṭṭhaasutāni cakkhuviññāṇasotaviññāṇānaṃ anārammaṇabhāvato jānitabbāni. Aparisaṅkitaṃ pana kathaṃ jānitabbanti āha ‘‘aparisaṅkitaṃ panā’’tiādi, tīṇi parisaṅkitāni ñatvā tesaṃ paṭipakkhavasena aparisaṅkitaṃ jānitabbanti attho. Idāni tāni tīṇi parisaṅkitāni ca evaṃ parisaṅkite sati bhikkhūhi kattabbavidhiñca tena vidhinā aparisaṅkite sati kattabbabhāvañca vitthārato dassetuṃ ‘‘katha’’ntiādimāha . Tattha disvā parisaṅkitaṃ diṭṭhaparisaṅkitaṃ nāma. Sutvā parisaṅkitaṃ sutaparisaṅkitaṃ nāma. Adisvā asutvā takkena anumānena parisaṅkitaṃ tadubhayavinimuttaparisaṅkitaṃ nāma. Taṃ tividhampi parisaṅkitasāmaññena ekā koṭi hoti, tato vimuttaṃ aparisaṅkitaṃ nāma. Evaṃ adiṭṭhaṃ asutaṃ aparisaṅkitaṃ macchamaṃsaṃ tikoṭiparisuddhaṃ hoti.
ஜாலங் மச்ச²ப³ந்த⁴னங். வாகு³ரா மிக³ப³ந்தி⁴னீ. கப்பதீதி யதி³ தேஸங் வசனேன ஸங்கா நிவத்ததி, வட்டதி, ந தங் வசனங் லேஸகப்பங் காதுங் வட்டதி. தேனேவ வக்க²தி ‘‘யத்த² ச நிப்³பே³மதிகோ ஹோதி, தங் ஸப்³ப³ங் கப்பதீ’’தி. பவத்தமங்ஸந்தி ஆபணாதீ³ஸு பவத்தங் விக்காயிகங் வா மதமங்ஸங் வா. மங்க³லாதீ³னந்தி ஆதி³-ஸத்³தே³ன ஆஹுனபாஹுனாதி³கே ஸங்க³ண்ஹாதி. பி⁴க்கூ²னங்யேவ அத்தா²ய அகதந்தி எத்த² அட்டா²னப்பயுத்தோ ஏவ-ஸத்³தோ³, பி⁴க்கூ²னங் அத்தா²ய அகதமேவாதி ஸம்ப³ந்தி⁴தப்³ப³ங், தஸ்மா பி⁴க்கூ²னஞ்ச மங்க³லாதீ³னஞ்சாதி மிஸ்ஸெத்வா கதம்பி ந வத்ததீதி வேதி³தப்³ப³ங். கேசி பன ‘‘யதா²டி²தவஸேன அவதா⁴ரணங் க³ஹெத்வா வட்டதீ’’தி வத³ந்தி, தங் ந ஸுந்த³ரங். யத்த² ச நிப்³பே³மதிகோ ஹோதீதி பி⁴க்கூ²னங் அத்தா²ய கதேபி ஸப்³பே³ன ஸப்³ப³ங் பரிஸங்கிதாபா⁴வமாஹ.
Jālaṃ macchabandhanaṃ. Vāgurā migabandhinī. Kappatīti yadi tesaṃ vacanena saṅkā nivattati, vaṭṭati, na taṃ vacanaṃ lesakappaṃ kātuṃ vaṭṭati. Teneva vakkhati ‘‘yattha ca nibbematiko hoti, taṃ sabbaṃ kappatī’’ti. Pavattamaṃsanti āpaṇādīsu pavattaṃ vikkāyikaṃ vā matamaṃsaṃ vā. Maṅgalādīnanti ādi-saddena āhunapāhunādike saṅgaṇhāti. Bhikkhūnaṃyeva atthāya akatanti ettha aṭṭhānappayutto eva-saddo, bhikkhūnaṃ atthāya akatamevāti sambandhitabbaṃ, tasmā bhikkhūnañca maṅgalādīnañcāti missetvā katampi na vattatīti veditabbaṃ. Keci pana ‘‘yathāṭhitavasena avadhāraṇaṃ gahetvā vaṭṭatī’’ti vadanti, taṃ na sundaraṃ. Yattha ca nibbematiko hotīti bhikkhūnaṃ atthāya katepi sabbena sabbaṃ parisaṅkitābhāvamāha.
39. தமேவத்த²ங் ஆவிகாதுங் ‘‘ஸசே பனா’’திஆதி³ வுத்தங். இதரேஸங் வட்டதீதி அஜானந்தானங் வட்டதி, ஜானதோவெத்த² ஆபத்தி ஹோதீதி. தேயேவாதி யே உத்³தி³ஸ்ஸ கதங், தேயேவ. உத்³தி³ஸ்ஸ கதமங்ஸபரிபோ⁴க³தோ அகப்பியமங்ஸபரிபோ⁴கே³ விஸேஸங் த³ஸ்ஸேதுங் ‘‘அகப்பியமங்ஸங் பனா’’திஆதி³ வுத்தங். புரிமஸ்மிங் ஸசித்தகாபத்தி, இதரஸ்மிங் அசித்தகா. தேனாஹ ‘‘அகப்பியமங்ஸங் அஜானித்வா பு⁴ஞ்ஜந்தஸ்ஸபி ஆபத்தியேவா’’தி. ‘‘பரிபோ⁴க³காலே புச்சி²த்வா பரிபு⁴ஞ்ஜிஸ்ஸாமீதி வா க³ஹெத்வா புச்சி²த்வாவ பரிபு⁴ஞ்ஜிதப்³ப³’’ந்தி (வி॰ ஸங்க³॰ அட்ட²॰ 39) வசனதோ அகப்பியமங்ஸங் அஜானித்வா படிக்³க³ண்ஹந்தஸ்ஸ படிக்³க³ஹணே அனாபத்தி ஸித்³தா⁴. அஜானித்வா பரிபு⁴ஞ்ஜந்தஸ்ஸேவ ஹி ஆபத்தி வுத்தா. வத்தந்தி வத³ந்தீதி இமினா ஆபத்தி நத்தீ²தி த³ஸ்ஸேதி.
39. Tamevatthaṃ āvikātuṃ ‘‘sace panā’’tiādi vuttaṃ. Itaresaṃ vaṭṭatīti ajānantānaṃ vaṭṭati, jānatovettha āpatti hotīti. Teyevāti ye uddissa kataṃ, teyeva. Uddissa katamaṃsaparibhogato akappiyamaṃsaparibhoge visesaṃ dassetuṃ ‘‘akappiyamaṃsaṃ panā’’tiādi vuttaṃ. Purimasmiṃ sacittakāpatti, itarasmiṃ acittakā. Tenāha ‘‘akappiyamaṃsaṃ ajānitvā bhuñjantassapi āpattiyevā’’ti. ‘‘Paribhogakāle pucchitvā paribhuñjissāmīti vā gahetvā pucchitvāva paribhuñjitabba’’nti (vi. saṅga. aṭṭha. 39) vacanato akappiyamaṃsaṃ ajānitvā paṭiggaṇhantassa paṭiggahaṇe anāpatti siddhā. Ajānitvā paribhuñjantasseva hi āpatti vuttā. Vattanti vadantīti iminā āpatti natthīti dasseti.
இதி வினயஸங்க³ஹஸங்வண்ணனாபூ⁴தே வினயாலங்காரே
Iti vinayasaṅgahasaṃvaṇṇanābhūte vinayālaṅkāre
மச்ச²மங்ஸவினிச்ச²யகதா²லங்காரோ நாம
Macchamaṃsavinicchayakathālaṅkāro nāma
ச²ட்டோ² பரிச்சே²தோ³.
Chaṭṭho paricchedo.
