| Library / Tipiṭaka / திபிடக • Tipiṭaka / வினயஸங்க³ஹ-அட்ட²கதா² • Vinayasaṅgaha-aṭṭhakathā |
6. மச்ச²மங்ஸவினிச்ச²யகதா²
6. Macchamaṃsavinicchayakathā
38. மச்ச²மங்ஸேஸு பன மச்ச²க்³க³ஹணேன ஸப்³ப³ம்பி ஜலஜங் வுத்தங். தத்த² அகப்பியங் நாம நத்தி². மங்ஸேஸு பன மனுஸ்ஸஹத்தி²அஸ்ஸஸுனக²அஹிஸீஹப்³யக்³க⁴தீ³பிஅச்ச²தரச்சா²னங் வஸேன த³ஸ மங்ஸானி அகப்பியானி. தத்த² மனுஸ்ஸமங்ஸே து²ல்லச்சயங், ஸேஸேஸு து³க்கடங். இதி இமேஸங் மனுஸ்ஸாதீ³னங் த³ஸன்னங் மங்ஸம்பி அட்டி²பி லோஹிதம்பி சம்மம்பி லோமம்பி ஸப்³ப³ங் ந வட்டதி. வஸாஸு பன ஏகா மனுஸ்ஸவஸாவ ந வட்டதி. கீ²ராதீ³ஸு அகப்பியங் நாம நத்தி². இமேஸு பன அகப்பியமங்ஸேஸு அட்டி²ஆதீ³ஸு வா யங் கிஞ்சி ஞத்வா வா அஞத்வா வா கா²த³ந்தஸ்ஸ ஆபத்தியேவ. யதா³ ஜானாதி, ததா³ தே³ஸேதப்³பா³. ‘‘அபுச்சி²த்வாவ கா²தி³ஸ்ஸாமீ’’தி க³ண்ஹதோ படிக்³க³ஹணேபி து³க்கடங், ‘‘புச்சி²த்வா கா²தி³ஸ்ஸாமீ’’தி க³ண்ஹதோ அனாபத்தி. உத்³தி³ஸ்ஸகதங் பன ஜானித்வா கா²த³ந்தஸ்ஸேவ ஆபத்தி, பச்சா² ஜானந்தோ ஆபத்தியா ந காரேதப்³போ³ (மஹாவ॰ அட்ட²॰ 281).
38.Macchamaṃsesu pana macchaggahaṇena sabbampi jalajaṃ vuttaṃ. Tattha akappiyaṃ nāma natthi. Maṃsesu pana manussahatthiassasunakhaahisīhabyagghadīpiacchataracchānaṃ vasena dasa maṃsāni akappiyāni. Tattha manussamaṃse thullaccayaṃ, sesesu dukkaṭaṃ. Iti imesaṃ manussādīnaṃ dasannaṃ maṃsampi aṭṭhipi lohitampi cammampi lomampi sabbaṃ na vaṭṭati. Vasāsu pana ekā manussavasāva na vaṭṭati. Khīrādīsu akappiyaṃ nāma natthi. Imesu pana akappiyamaṃsesu aṭṭhiādīsu vā yaṃ kiñci ñatvā vā añatvā vā khādantassa āpattiyeva. Yadā jānāti, tadā desetabbā. ‘‘Apucchitvāva khādissāmī’’ti gaṇhato paṭiggahaṇepi dukkaṭaṃ, ‘‘pucchitvā khādissāmī’’ti gaṇhato anāpatti. Uddissakataṃ pana jānitvā khādantasseva āpatti, pacchā jānanto āpattiyā na kāretabbo (mahāva. aṭṭha. 281).
தத்த² (பாரா॰ அட்ட²॰ 2.410) உத்³தி³ஸ்ஸகதங் நாம பி⁴க்கூ²னங் அத்தா²ய வதி⁴த்வா ஸம்பாதி³தங் மச்ச²மங்ஸங். உப⁴யம்பி ஹி உத்³தி³ஸ்ஸகதங் ந வட்டதி. தம்பி அதி³ட்ட²ங் அஸுதங் அபரிஸங்கிதங் வட்டதி. திகோடிபரிஸுத்³த⁴ஞ்ஹி மச்ச²மங்ஸங் ப⁴க³வதா அனுஞ்ஞாதங் அதி³ட்ட²ங் அஸுதங் அபரிஸங்கிதங். தத்த² அதி³ட்ட²ங் நாம பி⁴க்கூ²னங் அத்தா²ய மிக³மச்சே² வதி⁴த்வா க³ய்ஹமானங் அதி³ட்ட²ங். அஸுதங் நாம பி⁴க்கூ²னங் அத்தா²ய மிக³மச்சே² வதி⁴த்வா க³ஹிதந்தி அஸுதங். அபரிஸங்கிதங் பன தி³ட்ட²பரிஸங்கிதங் ஸுதபரிஸங்கிதங் தது³ப⁴யவினிமுத்தபரிஸங்கிதஞ்ச ஞத்வா தப்³பி³பக்க²தோ ஜானிதப்³ப³ங். கத²ங்? இத⁴ பி⁴க்கூ² பஸ்ஸந்தி மனுஸ்ஸே ஜாலவாகு³ராதி³ஹத்தே² கா³மதோ வா நிக்க²மந்தே அரஞ்ஞே வா விசரந்தே. து³தியதி³வஸே ச நேஸங் தங் கா³மங் பிண்டா³ய பவிட்டா²னங் ஸமச்ச²மங்ஸங் பிண்ட³பாதங் அபி⁴ஹரந்தி. தே தேன தி³ட்டே²ன பரிஸங்கந்தி ‘‘பி⁴க்கூ²னங் நு கோ² அத்தா²ய கத’’ந்தி, இத³ங் தி³ட்ட²பரிஸங்கிதங், ஏதங் க³ஹேதுங் ந வட்டதி. யங் ஏவங் அபரிஸங்கிதங், தங் வட்டதி. ஸசே பன தே மனுஸ்ஸா ‘‘கஸ்மா, ப⁴ந்தே, ந க³ண்ஹதா²’’தி புச்சி²த்வா தமத்த²ங் ஸுத்வா ‘‘நயித³ங், ப⁴ந்தே, பி⁴க்கூ²னங் அத்தா²ய கதங், அம்ஹேஹி அத்தனோ அத்தா²ய வா ராஜயுத்தாதீ³னங் வா அத்தா²ய கத’’ந்தி வத³ந்தி, கப்பதி.
Tattha (pārā. aṭṭha. 2.410) uddissakataṃ nāma bhikkhūnaṃ atthāya vadhitvā sampāditaṃ macchamaṃsaṃ. Ubhayampi hi uddissakataṃ na vaṭṭati. Tampi adiṭṭhaṃ asutaṃ aparisaṅkitaṃ vaṭṭati. Tikoṭiparisuddhañhi macchamaṃsaṃ bhagavatā anuññātaṃ adiṭṭhaṃ asutaṃ aparisaṅkitaṃ. Tattha adiṭṭhaṃ nāma bhikkhūnaṃ atthāya migamacche vadhitvā gayhamānaṃ adiṭṭhaṃ. Asutaṃ nāma bhikkhūnaṃ atthāya migamacche vadhitvā gahitanti asutaṃ. Aparisaṅkitaṃ pana diṭṭhaparisaṅkitaṃ sutaparisaṅkitaṃ tadubhayavinimuttaparisaṅkitañca ñatvā tabbipakkhato jānitabbaṃ. Kathaṃ? Idha bhikkhū passanti manusse jālavāgurādihatthe gāmato vā nikkhamante araññe vā vicarante. Dutiyadivase ca nesaṃ taṃ gāmaṃ piṇḍāya paviṭṭhānaṃ samacchamaṃsaṃ piṇḍapātaṃ abhiharanti. Te tena diṭṭhena parisaṅkanti ‘‘bhikkhūnaṃ nu kho atthāya kata’’nti, idaṃ diṭṭhaparisaṅkitaṃ, etaṃ gahetuṃ na vaṭṭati. Yaṃ evaṃ aparisaṅkitaṃ, taṃ vaṭṭati. Sace pana te manussā ‘‘kasmā, bhante, na gaṇhathā’’ti pucchitvā tamatthaṃ sutvā ‘‘nayidaṃ, bhante, bhikkhūnaṃ atthāya kataṃ, amhehi attano atthāya vā rājayuttādīnaṃ vā atthāya kata’’nti vadanti, kappati.
ந ஹேவ கோ² பி⁴க்கூ² பஸ்ஸந்தி, அபிச கோ² ஸுணந்தி ‘‘மனுஸ்ஸா கிர ஜாலவாகு³ராதி³ஹத்தா² கா³மதோ வா நிக்க²மந்தி, அரஞ்ஞே வா விசரந்தீ’’தி. து³தியதி³வஸே ச தேஸங் தங் கா³மங் பிண்டா³ய பவிட்டா²னங் ஸமச்ச²மங்ஸங் பிண்ட³பாதங் அபி⁴ஹரந்தி. தே தேன ஸுதேன பரிஸங்கந்தி ‘‘பி⁴க்கூ²னங் நு கோ² அத்தா²ய கத’’ந்தி, இத³ங் ஸுதபரிஸங்கிதங் நாம, ஏதங் க³ஹேதுங் ந வட்டதி. யங் ஏவங் அபரிஸங்கிதங், தங் வட்டதி. ஸசே பன தே மனுஸ்ஸா ‘‘கஸ்மா, ப⁴ந்தே, ந க³ண்ஹதா²’’தி புச்சி²த்வா தமத்த²ங் ஸுத்வா ‘‘நயித³ங், ப⁴ந்தே, பி⁴க்கூ²னங் அத்தா²ய கதங், அம்ஹேஹி அத்தனோ அத்தா²ய வா ராஜயுத்தாதீ³னங் வா அத்தா²ய கத’’ந்தி வத³ந்தி, கப்பதி.
Na heva kho bhikkhū passanti, apica kho suṇanti ‘‘manussā kira jālavāgurādihatthā gāmato vā nikkhamanti, araññe vā vicarantī’’ti. Dutiyadivase ca tesaṃ taṃ gāmaṃ piṇḍāya paviṭṭhānaṃ samacchamaṃsaṃ piṇḍapātaṃ abhiharanti. Te tena sutena parisaṅkanti ‘‘bhikkhūnaṃ nu kho atthāya kata’’nti, idaṃ sutaparisaṅkitaṃ nāma, etaṃ gahetuṃ na vaṭṭati. Yaṃ evaṃ aparisaṅkitaṃ, taṃ vaṭṭati. Sace pana te manussā ‘‘kasmā, bhante, na gaṇhathā’’ti pucchitvā tamatthaṃ sutvā ‘‘nayidaṃ, bhante, bhikkhūnaṃ atthāya kataṃ, amhehi attano atthāya vā rājayuttādīnaṃ vā atthāya kata’’nti vadanti, kappati.
ந ஹேவ கோ² பன பி⁴க்கூ² பஸ்ஸந்தி ந ஸுணந்தி, அபிச கோ² தேஸங் தங் கா³மங் பிண்டா³ய பவிட்டா²னங் பத்தங் க³ஹெத்வா ஸமச்ச²மங்ஸங் பிண்ட³பாதங் அபி⁴ஸங்க²ரித்வா அபி⁴ஹரந்தி. தே பரிஸங்கந்தி ‘‘பி⁴க்கூ²னங் நு கோ² அத்தா²ய கத’’ந்தி, இத³ங் தது³ப⁴யவினிமுத்தபரிஸங்கிதங் நாம, ஏதம்பி க³ஹேதுங் ந வட்டதி. யங் ஏவங் அபரிஸங்கிதங், தங் வட்டதி. ஸசே பன தே மனுஸ்ஸா ‘‘கஸ்மா, ப⁴ந்தே, ந க³ண்ஹதா²’’தி புச்சி²த்வா தமத்த²ங் ஸுத்வா ‘‘நயித³ங், ப⁴ந்தே, பி⁴க்கூ²னங் அத்தா²ய கதங், அம்ஹேஹி அத்தனோ அத்தா²ய வா ராஜயுத்தாதீ³னங் வா அத்தா²ய கதங், பவத்தமங்ஸங் வா கப்பியமேவ லபி⁴த்வா பி⁴க்கூ²னங் அத்தா²ய ஸம்பாதி³த’’ந்தி வத³ந்தி, கப்பதி. மதானங் பேதகிச்சத்தா²ய மங்க³லாதீ³னங் வா அத்தா²ய கதேபி ஏஸேவ நயோ. யங் யஞ்ஹி பி⁴க்கூ²னங்யேவ அத்தா²ய அகதங், யத்த² ச நிப்³பே³மதிகோ ஹோதி, தங் ஸப்³ப³ங் கப்பதி.
Na heva kho pana bhikkhū passanti na suṇanti, apica kho tesaṃ taṃ gāmaṃ piṇḍāya paviṭṭhānaṃ pattaṃ gahetvā samacchamaṃsaṃ piṇḍapātaṃ abhisaṅkharitvā abhiharanti. Te parisaṅkanti ‘‘bhikkhūnaṃ nu kho atthāya kata’’nti, idaṃ tadubhayavinimuttaparisaṅkitaṃ nāma, etampi gahetuṃ na vaṭṭati. Yaṃ evaṃ aparisaṅkitaṃ, taṃ vaṭṭati. Sace pana te manussā ‘‘kasmā, bhante, na gaṇhathā’’ti pucchitvā tamatthaṃ sutvā ‘‘nayidaṃ, bhante, bhikkhūnaṃ atthāya kataṃ, amhehi attano atthāya vā rājayuttādīnaṃ vā atthāya kataṃ, pavattamaṃsaṃ vā kappiyameva labhitvā bhikkhūnaṃ atthāya sampādita’’nti vadanti, kappati. Matānaṃ petakiccatthāya maṅgalādīnaṃ vā atthāya katepi eseva nayo. Yaṃ yañhi bhikkhūnaṃyeva atthāya akataṃ, yattha ca nibbematiko hoti, taṃ sabbaṃ kappati.
39. ஸசே பன ஏகஸ்மிங் விஹாரே பி⁴க்கூ²னங் உத்³தி³ஸ்ஸகதங் ஹோதி, தே ச அத்தனோ அத்தா²ய கதபா⁴வங் ந ஜானந்தி, அஞ்ஞே ஜானந்தி. யே ஜானந்தி, தேஸங் ந வட்டதி, இதரேஸங் பன வட்டதி. அஞ்ஞே ந ஜானந்தி, தேயேவ ஜானந்தி, தேஸங்யேவ ந வட்டதி, அஞ்ஞேஸங் வட்டதி. தேபி ‘‘அம்ஹாகங் அத்தா²ய கத’’ந்தி ஜானந்தி, அஞ்ஞேபி ‘‘ஏதேஸங் அத்தா²ய கத’’ந்தி ஜானந்தி, ஸப்³பே³ஸம்பி ந வட்டதி. ஸப்³பே³ ந ஜானந்தி, ஸப்³பே³ஸம்பி வட்டதி. பஞ்சஸு ஹி ஸஹத⁴ம்மிகேஸு யஸ்ஸ வா தஸ்ஸ வா அத்தா²ய உத்³தி³ஸ்ஸகதங் ஸப்³பே³ஸங் ந கப்பதி.
39. Sace pana ekasmiṃ vihāre bhikkhūnaṃ uddissakataṃ hoti, te ca attano atthāya katabhāvaṃ na jānanti, aññe jānanti. Ye jānanti, tesaṃ na vaṭṭati, itaresaṃ pana vaṭṭati. Aññe na jānanti, teyeva jānanti, tesaṃyeva na vaṭṭati, aññesaṃ vaṭṭati. Tepi ‘‘amhākaṃ atthāya kata’’nti jānanti, aññepi ‘‘etesaṃ atthāya kata’’nti jānanti, sabbesampi na vaṭṭati. Sabbe na jānanti, sabbesampi vaṭṭati. Pañcasu hi sahadhammikesu yassa vā tassa vā atthāya uddissakataṃ sabbesaṃ na kappati.
ஸசே பன கோசி ஏகங் பி⁴க்கு²ங் உத்³தி³ஸ்ஸ பாணங் வதி⁴த்வா தஸ்ஸ பத்தங் பூரெத்வா தே³தி, ஸோ ச அத்தனோ அத்தா²ய கதபா⁴வங் ஜானங்யேவ க³ஹெத்வா அஞ்ஞஸ்ஸ பி⁴க்கு²னோ தே³தி, ஸோ தங் தஸ்ஸ ஸத்³தா⁴ய பரிபு⁴ஞ்ஜதி, கஸ்ஸ ஆபத்தீதி? த்³வின்னம்பி அனாபத்தி. யஞ்ஹி உத்³தி³ஸ்ஸ கதங், தஸ்ஸ அபு⁴த்ததாய அனாபத்தி, இதரஸ்ஸ அஜானநதாய. கப்பியமங்ஸஸ்ஸ ஹி படிக்³க³ஹணே ஆபத்தி நத்தி², உத்³தி³ஸ்ஸகதஞ்ச அஜானித்வா பு⁴த்தஸ்ஸ பச்சா² ஞத்வா ஆபத்திதே³ஸனாகிச்சங் நாம நத்தி². அகப்பியமங்ஸங் பன அஜானித்வா பு⁴த்தேன பச்சா² ஞத்வாபி ஆபத்தி தே³ஸேதப்³பா³. உத்³தி³ஸ்ஸகதஞ்ஹி ஞத்வா பு⁴ஞ்ஜதோவ ஆபத்தி, அகப்பியமங்ஸங் அஜானித்வா பு⁴ஞ்ஜந்தஸ்ஸபி ஆபத்தியேவ, தஸ்மா ஆபத்திபீ⁴ருகேன ரூபங் ஸல்லக்கெ²ந்தேனபி புச்சி²த்வாவ மங்ஸங் படிக்³க³ஹேதப்³ப³ங். பரிபோ⁴க³காலே ‘‘புச்சி²த்வா பரிபு⁴ஞ்ஜிஸ்ஸாமீ’’தி வா க³ஹெத்வா புச்சி²த்வாவ பரிபு⁴ஞ்ஜிதப்³ப³ங். கஸ்மா? து³விஞ்ஞெய்யத்தா. அச்ச²மங்ஸம்பி ஹி ஸூகரமங்ஸஸதி³ஸங் ஹோதி, தீ³பிமங்ஸாதீ³னி ச மிக³மங்ஸாதி³ஸதி³ஸானி, தஸ்மா புச்சி²த்வா க³ஹணமேவ வத்தந்தி வத³ந்தி.
Sace pana koci ekaṃ bhikkhuṃ uddissa pāṇaṃ vadhitvā tassa pattaṃ pūretvā deti, so ca attano atthāya katabhāvaṃ jānaṃyeva gahetvā aññassa bhikkhuno deti, so taṃ tassa saddhāya paribhuñjati, kassa āpattīti? Dvinnampi anāpatti. Yañhi uddissa kataṃ, tassa abhuttatāya anāpatti, itarassa ajānanatāya. Kappiyamaṃsassa hi paṭiggahaṇe āpatti natthi, uddissakatañca ajānitvā bhuttassa pacchā ñatvā āpattidesanākiccaṃ nāma natthi. Akappiyamaṃsaṃ pana ajānitvā bhuttena pacchā ñatvāpi āpatti desetabbā. Uddissakatañhi ñatvā bhuñjatova āpatti, akappiyamaṃsaṃ ajānitvā bhuñjantassapi āpattiyeva, tasmā āpattibhīrukena rūpaṃ sallakkhentenapi pucchitvāva maṃsaṃ paṭiggahetabbaṃ. Paribhogakāle ‘‘pucchitvā paribhuñjissāmī’’ti vā gahetvā pucchitvāva paribhuñjitabbaṃ. Kasmā? Duviññeyyattā. Acchamaṃsampi hi sūkaramaṃsasadisaṃ hoti, dīpimaṃsādīni ca migamaṃsādisadisāni, tasmā pucchitvā gahaṇameva vattanti vadanti.
இதி பாளிமுத்தகவினயவினிச்ச²யஸங்க³ஹே
Iti pāḷimuttakavinayavinicchayasaṅgahe
மச்ச²மங்ஸவினிச்ச²யகதா² ஸமத்தா.
Macchamaṃsavinicchayakathā samattā.
