| Library / Tipiṭaka / д̇ибидага • Tipiṭaka / винаяасан̇г̇аха-адтагат̇аа • Vinayasaṅgaha-aṭṭhakathā |
6. мажчамам̣савинижчаяагат̇аа
6. Macchamaṃsavinicchayakathā
38. мажчамам̣сзсу бана мажчаг̇г̇ахан̣зна саб̣б̣амби ж̇алаж̇ам̣ вуд̇д̇ам̣. д̇ад̇т̇а агаббияам̣ наама над̇т̇и. мам̣сзсу бана мануссахад̇т̇иассасунакаахисийхаб̣яаг̇гхад̣̇ийбиажчад̇аражчаанам̣ васзна д̣̇аса мам̣саани агаббияаани. д̇ад̇т̇а мануссамам̣сз т̇уллажжаяам̣, сзсзсу д̣̇уггадам̣. ид̇и имзсам̣ мануссаад̣̇ийнам̣ д̣̇асаннам̣ мам̣самби адтиби лохид̇амби жаммамби ломамби саб̣б̣ам̣ на ваддад̇и. васаасу бана згаа мануссавасаава на ваддад̇и. кийраад̣̇ийсу агаббияам̣ наама над̇т̇и. имзсу бана агаббияамам̣сзсу адтиаад̣̇ийсу ваа яам̣ гин̃жи н̃ад̇ваа ваа ан̃ад̇ваа ваа каад̣̇анд̇асса аабад̇д̇иязва. яад̣̇аа ж̇аанаад̇и, д̇ад̣̇аа д̣̇зсзд̇аб̣б̣аа. ‘‘абужчид̇ваава каад̣̇иссаамий’’д̇и г̇ан̣хад̇о бадиг̇г̇ахан̣зби д̣̇уггадам̣, ‘‘бужчид̇ваа каад̣̇иссаамий’’д̇и г̇ан̣хад̇о анаабад̇д̇и. уд̣̇д̣̇иссагад̇ам̣ бана ж̇аанид̇ваа каад̣̇анд̇ассзва аабад̇д̇и, бажчаа ж̇аананд̇о аабад̇д̇ияаа на гаарзд̇аб̣б̣о (махаава. адта. 281).
38.Macchamaṃsesu pana macchaggahaṇena sabbampi jalajaṃ vuttaṃ. Tattha akappiyaṃ nāma natthi. Maṃsesu pana manussahatthiassasunakhaahisīhabyagghadīpiacchataracchānaṃ vasena dasa maṃsāni akappiyāni. Tattha manussamaṃse thullaccayaṃ, sesesu dukkaṭaṃ. Iti imesaṃ manussādīnaṃ dasannaṃ maṃsampi aṭṭhipi lohitampi cammampi lomampi sabbaṃ na vaṭṭati. Vasāsu pana ekā manussavasāva na vaṭṭati. Khīrādīsu akappiyaṃ nāma natthi. Imesu pana akappiyamaṃsesu aṭṭhiādīsu vā yaṃ kiñci ñatvā vā añatvā vā khādantassa āpattiyeva. Yadā jānāti, tadā desetabbā. ‘‘Apucchitvāva khādissāmī’’ti gaṇhato paṭiggahaṇepi dukkaṭaṃ, ‘‘pucchitvā khādissāmī’’ti gaṇhato anāpatti. Uddissakataṃ pana jānitvā khādantasseva āpatti, pacchā jānanto āpattiyā na kāretabbo (mahāva. aṭṭha. 281).
д̇ад̇т̇а (баараа. адта. 2.410) уд̣̇д̣̇иссагад̇ам̣ наама бхигкуунам̣ ад̇т̇ааяа вад̇хид̇ваа самбаад̣̇ид̇ам̣ мажчамам̣сам̣. убхаяамби хи уд̣̇д̣̇иссагад̇ам̣ на ваддад̇и. д̇амби ад̣̇идтам̣ асуд̇ам̣ абарисан̇гид̇ам̣ ваддад̇и. д̇игодибарисуд̣̇д̇хан̃хи мажчамам̣сам̣ бхаг̇авад̇аа анун̃н̃аад̇ам̣ ад̣̇идтам̣ асуд̇ам̣ абарисан̇гид̇ам̣. д̇ад̇т̇а ад̣̇идтам̣ наама бхигкуунам̣ ад̇т̇ааяа миг̇амажчз вад̇хид̇ваа г̇аяхамаанам̣ ад̣̇идтам̣. асуд̇ам̣ наама бхигкуунам̣ ад̇т̇ааяа миг̇амажчз вад̇хид̇ваа г̇ахид̇анд̇и асуд̇ам̣. абарисан̇гид̇ам̣ бана д̣̇идтабарисан̇гид̇ам̣ суд̇абарисан̇гид̇ам̣ д̇ад̣̇убхаяавинимуд̇д̇абарисан̇гид̇ан̃жа н̃ад̇ваа д̇аб̣б̣ибагкад̇о ж̇аанид̇аб̣б̣ам̣. гат̇ам̣? ид̇ха бхигкуу бассанд̇и мануссз ж̇аалавааг̇ураад̣̇ихад̇т̇з г̇аамад̇о ваа нигкаманд̇з аран̃н̃з ваа вижаранд̇з. д̣̇уд̇ияад̣̇ивасз жа нзсам̣ д̇ам̣ г̇аамам̣ бин̣д̣ааяа бавидтаанам̣ самажчамам̣сам̣ бин̣д̣абаад̇ам̣ абхихаранд̇и. д̇з д̇зна д̣̇идтзна барисан̇ганд̇и ‘‘бхигкуунам̣ ну ко ад̇т̇ааяа гад̇а’’нд̇и, ид̣̇ам̣ д̣̇идтабарисан̇гид̇ам̣, зд̇ам̣ г̇ахзд̇ум̣ на ваддад̇и. яам̣ звам̣ абарисан̇гид̇ам̣, д̇ам̣ ваддад̇и. сажз бана д̇з мануссаа ‘‘гасмаа, бханд̇з, на г̇ан̣хат̇аа’’д̇и бужчид̇ваа д̇амад̇т̇ам̣ суд̇ваа ‘‘наяид̣̇ам̣, бханд̇з, бхигкуунам̣ ад̇т̇ааяа гад̇ам̣, амхзхи ад̇д̇ано ад̇т̇ааяа ваа рааж̇аяуд̇д̇аад̣̇ийнам̣ ваа ад̇т̇ааяа гад̇а’’нд̇и вад̣̇анд̇и, габбад̇и.
Tattha (pārā. aṭṭha. 2.410) uddissakataṃ nāma bhikkhūnaṃ atthāya vadhitvā sampāditaṃ macchamaṃsaṃ. Ubhayampi hi uddissakataṃ na vaṭṭati. Tampi adiṭṭhaṃ asutaṃ aparisaṅkitaṃ vaṭṭati. Tikoṭiparisuddhañhi macchamaṃsaṃ bhagavatā anuññātaṃ adiṭṭhaṃ asutaṃ aparisaṅkitaṃ. Tattha adiṭṭhaṃ nāma bhikkhūnaṃ atthāya migamacche vadhitvā gayhamānaṃ adiṭṭhaṃ. Asutaṃ nāma bhikkhūnaṃ atthāya migamacche vadhitvā gahitanti asutaṃ. Aparisaṅkitaṃ pana diṭṭhaparisaṅkitaṃ sutaparisaṅkitaṃ tadubhayavinimuttaparisaṅkitañca ñatvā tabbipakkhato jānitabbaṃ. Kathaṃ? Idha bhikkhū passanti manusse jālavāgurādihatthe gāmato vā nikkhamante araññe vā vicarante. Dutiyadivase ca nesaṃ taṃ gāmaṃ piṇḍāya paviṭṭhānaṃ samacchamaṃsaṃ piṇḍapātaṃ abhiharanti. Te tena diṭṭhena parisaṅkanti ‘‘bhikkhūnaṃ nu kho atthāya kata’’nti, idaṃ diṭṭhaparisaṅkitaṃ, etaṃ gahetuṃ na vaṭṭati. Yaṃ evaṃ aparisaṅkitaṃ, taṃ vaṭṭati. Sace pana te manussā ‘‘kasmā, bhante, na gaṇhathā’’ti pucchitvā tamatthaṃ sutvā ‘‘nayidaṃ, bhante, bhikkhūnaṃ atthāya kataṃ, amhehi attano atthāya vā rājayuttādīnaṃ vā atthāya kata’’nti vadanti, kappati.
на хзва ко бхигкуу бассанд̇и, абижа ко сун̣анд̇и ‘‘мануссаа гира ж̇аалавааг̇ураад̣̇ихад̇т̇аа г̇аамад̇о ваа нигкаманд̇и, аран̃н̃з ваа вижаранд̇ий’’д̇и. д̣̇уд̇ияад̣̇ивасз жа д̇зсам̣ д̇ам̣ г̇аамам̣ бин̣д̣ааяа бавидтаанам̣ самажчамам̣сам̣ бин̣д̣абаад̇ам̣ абхихаранд̇и. д̇з д̇зна суд̇зна барисан̇ганд̇и ‘‘бхигкуунам̣ ну ко ад̇т̇ааяа гад̇а’’нд̇и, ид̣̇ам̣ суд̇абарисан̇гид̇ам̣ наама, зд̇ам̣ г̇ахзд̇ум̣ на ваддад̇и. яам̣ звам̣ абарисан̇гид̇ам̣, д̇ам̣ ваддад̇и. сажз бана д̇з мануссаа ‘‘гасмаа, бханд̇з, на г̇ан̣хат̇аа’’д̇и бужчид̇ваа д̇амад̇т̇ам̣ суд̇ваа ‘‘наяид̣̇ам̣, бханд̇з, бхигкуунам̣ ад̇т̇ааяа гад̇ам̣, амхзхи ад̇д̇ано ад̇т̇ааяа ваа рааж̇аяуд̇д̇аад̣̇ийнам̣ ваа ад̇т̇ааяа гад̇а’’нд̇и вад̣̇анд̇и, габбад̇и.
Na heva kho bhikkhū passanti, apica kho suṇanti ‘‘manussā kira jālavāgurādihatthā gāmato vā nikkhamanti, araññe vā vicarantī’’ti. Dutiyadivase ca tesaṃ taṃ gāmaṃ piṇḍāya paviṭṭhānaṃ samacchamaṃsaṃ piṇḍapātaṃ abhiharanti. Te tena sutena parisaṅkanti ‘‘bhikkhūnaṃ nu kho atthāya kata’’nti, idaṃ sutaparisaṅkitaṃ nāma, etaṃ gahetuṃ na vaṭṭati. Yaṃ evaṃ aparisaṅkitaṃ, taṃ vaṭṭati. Sace pana te manussā ‘‘kasmā, bhante, na gaṇhathā’’ti pucchitvā tamatthaṃ sutvā ‘‘nayidaṃ, bhante, bhikkhūnaṃ atthāya kataṃ, amhehi attano atthāya vā rājayuttādīnaṃ vā atthāya kata’’nti vadanti, kappati.
на хзва ко бана бхигкуу бассанд̇и на сун̣анд̇и, абижа ко д̇зсам̣ д̇ам̣ г̇аамам̣ бин̣д̣ааяа бавидтаанам̣ бад̇д̇ам̣ г̇ахзд̇ваа самажчамам̣сам̣ бин̣д̣абаад̇ам̣ абхисан̇карид̇ваа абхихаранд̇и. д̇з барисан̇ганд̇и ‘‘бхигкуунам̣ ну ко ад̇т̇ааяа гад̇а’’нд̇и, ид̣̇ам̣ д̇ад̣̇убхаяавинимуд̇д̇абарисан̇гид̇ам̣ наама, зд̇амби г̇ахзд̇ум̣ на ваддад̇и. яам̣ звам̣ абарисан̇гид̇ам̣, д̇ам̣ ваддад̇и. сажз бана д̇з мануссаа ‘‘гасмаа, бханд̇з, на г̇ан̣хат̇аа’’д̇и бужчид̇ваа д̇амад̇т̇ам̣ суд̇ваа ‘‘наяид̣̇ам̣, бханд̇з, бхигкуунам̣ ад̇т̇ааяа гад̇ам̣, амхзхи ад̇д̇ано ад̇т̇ааяа ваа рааж̇аяуд̇д̇аад̣̇ийнам̣ ваа ад̇т̇ааяа гад̇ам̣, бавад̇д̇амам̣сам̣ ваа габбияамзва лабхид̇ваа бхигкуунам̣ ад̇т̇ааяа самбаад̣̇ид̇а’’нд̇и вад̣̇анд̇и, габбад̇и. мад̇аанам̣ бзд̇агижжад̇т̇ааяа ман̇г̇алаад̣̇ийнам̣ ваа ад̇т̇ааяа гад̇зби зсзва наяо. яам̣ яан̃хи бхигкуунам̣язва ад̇т̇ааяа агад̇ам̣, яад̇т̇а жа ниб̣б̣змад̇иго ход̇и, д̇ам̣ саб̣б̣ам̣ габбад̇и.
Na heva kho pana bhikkhū passanti na suṇanti, apica kho tesaṃ taṃ gāmaṃ piṇḍāya paviṭṭhānaṃ pattaṃ gahetvā samacchamaṃsaṃ piṇḍapātaṃ abhisaṅkharitvā abhiharanti. Te parisaṅkanti ‘‘bhikkhūnaṃ nu kho atthāya kata’’nti, idaṃ tadubhayavinimuttaparisaṅkitaṃ nāma, etampi gahetuṃ na vaṭṭati. Yaṃ evaṃ aparisaṅkitaṃ, taṃ vaṭṭati. Sace pana te manussā ‘‘kasmā, bhante, na gaṇhathā’’ti pucchitvā tamatthaṃ sutvā ‘‘nayidaṃ, bhante, bhikkhūnaṃ atthāya kataṃ, amhehi attano atthāya vā rājayuttādīnaṃ vā atthāya kataṃ, pavattamaṃsaṃ vā kappiyameva labhitvā bhikkhūnaṃ atthāya sampādita’’nti vadanti, kappati. Matānaṃ petakiccatthāya maṅgalādīnaṃ vā atthāya katepi eseva nayo. Yaṃ yañhi bhikkhūnaṃyeva atthāya akataṃ, yattha ca nibbematiko hoti, taṃ sabbaṃ kappati.
39. сажз бана згасмим̣ вихаарз бхигкуунам̣ уд̣̇д̣̇иссагад̇ам̣ ход̇и, д̇з жа ад̇д̇ано ад̇т̇ааяа гад̇абхаавам̣ на ж̇аананд̇и, ан̃н̃з ж̇аананд̇и. яз ж̇аананд̇и, д̇зсам̣ на ваддад̇и, ид̇арзсам̣ бана ваддад̇и. ан̃н̃з на ж̇аананд̇и, д̇зязва ж̇аананд̇и, д̇зсам̣язва на ваддад̇и, ан̃н̃зсам̣ ваддад̇и. д̇зби ‘‘амхаагам̣ ад̇т̇ааяа гад̇а’’нд̇и ж̇аананд̇и, ан̃н̃зби ‘‘зд̇зсам̣ ад̇т̇ааяа гад̇а’’нд̇и ж̇аананд̇и, саб̣б̣зсамби на ваддад̇и. саб̣б̣з на ж̇аананд̇и, саб̣б̣зсамби ваддад̇и. бан̃жасу хи сахад̇хаммигзсу яасса ваа д̇асса ваа ад̇т̇ааяа уд̣̇д̣̇иссагад̇ам̣ саб̣б̣зсам̣ на габбад̇и.
39. Sace pana ekasmiṃ vihāre bhikkhūnaṃ uddissakataṃ hoti, te ca attano atthāya katabhāvaṃ na jānanti, aññe jānanti. Ye jānanti, tesaṃ na vaṭṭati, itaresaṃ pana vaṭṭati. Aññe na jānanti, teyeva jānanti, tesaṃyeva na vaṭṭati, aññesaṃ vaṭṭati. Tepi ‘‘amhākaṃ atthāya kata’’nti jānanti, aññepi ‘‘etesaṃ atthāya kata’’nti jānanti, sabbesampi na vaṭṭati. Sabbe na jānanti, sabbesampi vaṭṭati. Pañcasu hi sahadhammikesu yassa vā tassa vā atthāya uddissakataṃ sabbesaṃ na kappati.
сажз бана гожи згам̣ бхигкум̣ уд̣̇д̣̇исса баан̣ам̣ вад̇хид̇ваа д̇асса бад̇д̇ам̣ буурзд̇ваа д̣̇зд̇и, со жа ад̇д̇ано ад̇т̇ааяа гад̇абхаавам̣ ж̇аанам̣язва г̇ахзд̇ваа ан̃н̃асса бхигкуно д̣̇зд̇и, со д̇ам̣ д̇асса сад̣̇д̇хааяа барибхун̃ж̇ад̇и, гасса аабад̇д̇ийд̇и? д̣̇виннамби анаабад̇д̇и. яан̃хи уд̣̇д̣̇исса гад̇ам̣, д̇асса абхуд̇д̇ад̇ааяа анаабад̇д̇и, ид̇арасса аж̇аананад̇ааяа. габбияамам̣сасса хи бадиг̇г̇ахан̣з аабад̇д̇и над̇т̇и, уд̣̇д̣̇иссагад̇ан̃жа аж̇аанид̇ваа бхуд̇д̇асса бажчаа н̃ад̇ваа аабад̇д̇ид̣̇зсанаагижжам̣ наама над̇т̇и. агаббияамам̣сам̣ бана аж̇аанид̇ваа бхуд̇д̇зна бажчаа н̃ад̇вааби аабад̇д̇и д̣̇зсзд̇аб̣б̣аа. уд̣̇д̣̇иссагад̇ан̃хи н̃ад̇ваа бхун̃ж̇ад̇ова аабад̇д̇и, агаббияамам̣сам̣ аж̇аанид̇ваа бхун̃ж̇анд̇ассаби аабад̇д̇иязва, д̇асмаа аабад̇д̇ибхийругзна руубам̣ саллагкзнд̇знаби бужчид̇ваава мам̣сам̣ бадиг̇г̇ахзд̇аб̣б̣ам̣. барибхог̇агаалз ‘‘бужчид̇ваа барибхун̃ж̇иссаамий’’д̇и ваа г̇ахзд̇ваа бужчид̇ваава барибхун̃ж̇ид̇аб̣б̣ам̣. гасмаа? д̣̇увин̃н̃зяяад̇д̇аа. ажчамам̣самби хи суугарамам̣сасад̣̇исам̣ ход̇и, д̣̇ийбимам̣саад̣̇ийни жа миг̇амам̣саад̣̇исад̣̇исаани, д̇асмаа бужчид̇ваа г̇ахан̣амзва вад̇д̇анд̇и вад̣̇анд̇и.
Sace pana koci ekaṃ bhikkhuṃ uddissa pāṇaṃ vadhitvā tassa pattaṃ pūretvā deti, so ca attano atthāya katabhāvaṃ jānaṃyeva gahetvā aññassa bhikkhuno deti, so taṃ tassa saddhāya paribhuñjati, kassa āpattīti? Dvinnampi anāpatti. Yañhi uddissa kataṃ, tassa abhuttatāya anāpatti, itarassa ajānanatāya. Kappiyamaṃsassa hi paṭiggahaṇe āpatti natthi, uddissakatañca ajānitvā bhuttassa pacchā ñatvā āpattidesanākiccaṃ nāma natthi. Akappiyamaṃsaṃ pana ajānitvā bhuttena pacchā ñatvāpi āpatti desetabbā. Uddissakatañhi ñatvā bhuñjatova āpatti, akappiyamaṃsaṃ ajānitvā bhuñjantassapi āpattiyeva, tasmā āpattibhīrukena rūpaṃ sallakkhentenapi pucchitvāva maṃsaṃ paṭiggahetabbaṃ. Paribhogakāle ‘‘pucchitvā paribhuñjissāmī’’ti vā gahetvā pucchitvāva paribhuñjitabbaṃ. Kasmā? Duviññeyyattā. Acchamaṃsampi hi sūkaramaṃsasadisaṃ hoti, dīpimaṃsādīni ca migamaṃsādisadisāni, tasmā pucchitvā gahaṇameva vattanti vadanti.
ид̇и баал̣имуд̇д̇агавинаяавинижчаяасан̇г̇ахз
Iti pāḷimuttakavinayavinicchayasaṅgahe
мажчамам̣савинижчаяагат̇аа самад̇д̇аа.
Macchamaṃsavinicchayakathā samattā.
