| Library / Tipiṭaka / ติปิฎก • Tipiṭaka / จริยาปิฎกปาฬิ • Cariyāpiṭakapāḷi |
๑๐. มจฺฉราชจริยา
10. Maccharājacariyā
๘๓.
83.
‘‘ปุนาปรํ ยทา โหมิ, มจฺฉราชา มหาสเร;
‘‘Punāparaṃ yadā homi, maccharājā mahāsare;
อุเณฺห สูริยสนฺตาเป, สเร อุทก ขียถฯ
Uṇhe sūriyasantāpe, sare udaka khīyatha.
๘๔.
84.
ภกฺขยนฺติ ทิวารตฺติํ, มเจฺฉ อุปนิสีทิยฯ
Bhakkhayanti divārattiṃ, macche upanisīdiya.
๘๕.
85.
‘‘เอวํ จิเนฺตสหํ ตตฺถ, สห ญาตีหิ ปีฬิโต;
‘‘Evaṃ cintesahaṃ tattha, saha ñātīhi pīḷito;
‘เกน นุ โข อุปาเยน, ญาตี ทุกฺขา ปโมจเย’ฯ
‘Kena nu kho upāyena, ñātī dukkhā pamocaye’.
๘๖.
86.
‘‘วิจินฺตยิตฺวา ธมฺมตฺถํ, สจฺจํ อทฺทส ปสฺสยํ;
‘‘Vicintayitvā dhammatthaṃ, saccaṃ addasa passayaṃ;
สเจฺจ ฐตฺวา ปโมเจสิํ, ญาตีนํ ตํ อติกฺขยํฯ
Sacce ṭhatvā pamocesiṃ, ñātīnaṃ taṃ atikkhayaṃ.
๘๗.
87.
‘‘อนุสฺสริตฺวา สตํ ธมฺมํ, ปรมตฺถํ วิจินฺตยํ;
‘‘Anussaritvā sataṃ dhammaṃ, paramatthaṃ vicintayaṃ;
อกาสิ สจฺจกิริยํ, ยํ โลเก ธุวสสฺสตํฯ
Akāsi saccakiriyaṃ, yaṃ loke dhuvasassataṃ.
๘๘.
88.
‘‘‘ยโต สรามิ อตฺตานํ, ยโต ปโตฺตสฺมิ วิญฺญุตํ;
‘‘‘Yato sarāmi attānaṃ, yato pattosmi viññutaṃ;
นาภิชานามิ สญฺจิจฺจ, เอกปาณมฺปิ หิํสิตํฯ
Nābhijānāmi sañcicca, ekapāṇampi hiṃsitaṃ.
๘๙.
89.
‘‘‘เอเตน สจฺจวเชฺชน, ปชฺชุโนฺน อภิวสฺสตุ;
‘‘‘Etena saccavajjena, pajjunno abhivassatu;
อภิตฺถนย ปชฺชุนฺน, นิธิํ กากสฺส นาสย;
Abhitthanaya pajjunna, nidhiṃ kākassa nāsaya;
กากํ โสกาย รเนฺธหิ, มเจฺฉ โสกา ปโมจย’ฯ
Kākaṃ sokāya randhehi, macche sokā pamocaya’.
๙๐.
90.
‘‘สหกเต สจฺจวเร, ปชฺชุโนฺน อภิคชฺชิย;
‘‘Sahakate saccavare, pajjunno abhigajjiya;
ถลํ นินฺนญฺจ ปูเรโนฺต, ขเณน อภิวสฺสถฯ
Thalaṃ ninnañca pūrento, khaṇena abhivassatha.
๙๑.
91.
‘‘เอวรูปํ สจฺจวรํ, กตฺวา วีริยมุตฺตมํ;
‘‘Evarūpaṃ saccavaraṃ, katvā vīriyamuttamaṃ;
วสฺสาเปสิํ มหาเมฆํ, สจฺจเตชพลสฺสิโต;
Vassāpesiṃ mahāmeghaṃ, saccatejabalassito;
สเจฺจน เม สโม นตฺถิ, เอสา เม สจฺจปารมี’’ติฯ
Saccena me samo natthi, esā me saccapāramī’’ti.
มจฺฉราชจริยํ ทสมํฯ
Maccharājacariyaṃ dasamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / จริยาปิฎก-อฎฺฐกถา • Cariyāpiṭaka-aṭṭhakathā / ๑๐. มจฺฉราชจริยาวณฺณนา • 10. Maccharājacariyāvaṇṇanā
