| Library / Tipiṭaka / திபிடக • Tipiṭaka / சரியாபிடக-அட்ட²கதா² • Cariyāpiṭaka-aṭṭhakathā |
10. மச்ச²ராஜசரியாவண்ணனா
10. Maccharājacariyāvaṇṇanā
83. த³ஸமே யதா³ ஹோமி, மச்ச²ராஜா மஹாஸரேதி அதீதே மச்ச²யோனியங் நிப்³ப³த்தித்வா கோஸலரட்டே² ஸாவத்தி²யங் ஜேதவனே பொக்க²ரணிட்டா²னே வல்லிக³ஹனபரிக்கி²த்தே ஏகஸ்மிங் மஹாஸரே மச்சா²னங் சதூஹி ஸங்க³ஹவத்தூ²ஹி ரஞ்ஜனதோ யதா³ அஹங் ராஜா ஹோமி, மச்ச²க³ணபரிவுதோ தத்த² படிவஸாமி ததா³. உண்ஹேதி உண்ஹகாலே கி³ம்ஹஸமயே. ஸூரியஸந்தாபேதி ஆதி³ச்சஸந்தாபேன. ஸரே உத³க கீ²யதா²தி தஸ்மிங் ஸரே உத³கங் கீ²யித்த² சி²ஜ்ஜித்த². தஸ்மிஞ்ஹி ரட்டே² ததா³ தே³வோ ந வஸ்ஸி, ஸஸ்ஸானி மிலாயிங்ஸு, வாபிஆதீ³ஸு உத³கங் பரிக்க²யங் பரியாதா³னங் அக³மாஸி, மச்ச²கச்ச²பா கலலக³ஹனங் பவிஸிங்ஸு. தஸ்மிம்பி ஸரே மச்சா² கத்³த³மக³ஹனங் பவிஸித்வா தஸ்மிங் தஸ்மிங் டா²னே நிலீயிங்ஸு.
83. Dasame yadā homi, maccharājā mahāsareti atīte macchayoniyaṃ nibbattitvā kosalaraṭṭhe sāvatthiyaṃ jetavane pokkharaṇiṭṭhāne valligahanaparikkhitte ekasmiṃ mahāsare macchānaṃ catūhi saṅgahavatthūhi rañjanato yadā ahaṃ rājā homi, macchagaṇaparivuto tattha paṭivasāmi tadā. Uṇheti uṇhakāle gimhasamaye. Sūriyasantāpeti ādiccasantāpena. Sare udaka khīyathāti tasmiṃ sare udakaṃ khīyittha chijjittha. Tasmiñhi raṭṭhe tadā devo na vassi, sassāni milāyiṃsu, vāpiādīsu udakaṃ parikkhayaṃ pariyādānaṃ agamāsi, macchakacchapā kalalagahanaṃ pavisiṃsu. Tasmimpi sare macchā kaddamagahanaṃ pavisitvā tasmiṃ tasmiṃ ṭhāne nilīyiṃsu.
84. ததோதி ததோ உத³கபரிக்க²யதோ அபரபா⁴கே³. குலலஸேனகாதி குலலாசேவ ஸேனா ச. ப⁴க்க²யந்தி தி³வாரத்திங், மச்சே² உபனிஸீதி³யாதி தத்த² தத்த² கலலபிட்டே² உபனிஸீதி³த்வா கலலக³ஹனங் பவிஸித்வா நிபன்னே மச்சே² காகா வா இதரே வா தி³வா சேவ ரத்திஞ்ச கணயக்³க³ஸதி³ஸேஹி துண்டே³ஹி கொட்டெத்வா கொட்டெத்வா நீஹரித்வா விப்ப²ந்த³மானே ப⁴க்க²யந்தி.
84.Tatoti tato udakaparikkhayato aparabhāge. Kulalasenakāti kulalāceva senā ca. Bhakkhayanti divārattiṃ, macche upanisīdiyāti tattha tattha kalalapiṭṭhe upanisīditvā kalalagahanaṃ pavisitvā nipanne macche kākā vā itare vā divā ceva rattiñca kaṇayaggasadisehi tuṇḍehi koṭṭetvā koṭṭetvā nīharitvā vipphandamāne bhakkhayanti.
85. அத² மஹாஸத்தோ மச்சா²னங் தங் ப்³யஸனங் தி³ஸ்வா மஹாகருணாய ஸமுஸ்ஸாஹிதஹத³யோ ‘‘ட²பெத்வா மங் இமே மம ஞாதகே இமஸ்மா து³க்கா² மோசேதுங் ஸமத்தோ² நாம அஞ்ஞோ நத்தி², கேன நு கோ² அஹங் உபாயேன தே இதோ து³க்க²தோ மோசெய்ய’’ந்தி சிந்தெந்தோ ‘‘யங்னூனாஹங் புப்³ப³கேஹி மஹேஸீஹி ஆசிண்ணஸமாசிண்ணங் மயி ச ஸங்விஜ்ஜமானங் ஸச்சத⁴ம்மங் நிஸ்ஸாய ஸச்சகிரியங் கத்வா தே³வங் வஸ்ஸாபெத்வா மம ஞாதிஸங்க⁴ஸ்ஸ ஜீவிததா³னங் த³தெ³ய்யங், தேன ச ஸகலஸ்ஸாபி ஆஹாரூபஜீவினோ ஸத்தலோகஸ்ஸ மஹாஉபகாரோ ஸம்பாதி³தோ மயா’’தி நிச்ச²யங் கத்வா தே³வங் வஸ்ஸாபேதுங் ஸச்சகிரியங் அகாஸி. தேன வுத்தங் ‘‘ஏவங் சிந்தேஸஹ’’ந்திஆதி³.
85. Atha mahāsatto macchānaṃ taṃ byasanaṃ disvā mahākaruṇāya samussāhitahadayo ‘‘ṭhapetvā maṃ ime mama ñātake imasmā dukkhā mocetuṃ samattho nāma añño natthi, kena nu kho ahaṃ upāyena te ito dukkhato moceyya’’nti cintento ‘‘yaṃnūnāhaṃ pubbakehi mahesīhi āciṇṇasamāciṇṇaṃ mayi ca saṃvijjamānaṃ saccadhammaṃ nissāya saccakiriyaṃ katvā devaṃ vassāpetvā mama ñātisaṅghassa jīvitadānaṃ dadeyyaṃ, tena ca sakalassāpi āhārūpajīvino sattalokassa mahāupakāro sampādito mayā’’ti nicchayaṃ katvā devaṃ vassāpetuṃ saccakiriyaṃ akāsi. Tena vuttaṃ ‘‘evaṃ cintesaha’’ntiādi.
தத்த² ஸஹ ஞாதீஹி பீளிதோதி மய்ஹங் ஞாதீஹி ஸத்³தி⁴ங் தேன உத³கபரிக்க²யேன பீளிதோ. ஸஹாதி வா நிபாதமத்தங். மஹாகாருணிகதாய தேன ப்³யஸனேன து³க்கி²தேஹி ஞாதீஹி காரணபூ⁴தேஹி பீளிதோ, ஞாதிஸங்க⁴து³க்க²து³க்கி²தோதி அத்தோ².
Tattha saha ñātīhi pīḷitoti mayhaṃ ñātīhi saddhiṃ tena udakaparikkhayena pīḷito. Sahāti vā nipātamattaṃ. Mahākāruṇikatāya tena byasanena dukkhitehi ñātīhi kāraṇabhūtehi pīḷito, ñātisaṅghadukkhadukkhitoti attho.
86. த⁴ம்மத்த²ந்தி த⁴ம்மபூ⁴தங் அத்த²ங், த⁴ம்மதோ வா அனபேதங் அத்த²ங். கிங் தங்? ஸச்சங். அத்³த³ஸபஸ்ஸயந்தி மய்ஹங் ஞாதீனஞ்ச அபஸ்ஸயங் அத்³த³ஸங். அதிக்க²யந்தி மஹாவினாஸங்.
86.Dhammatthanti dhammabhūtaṃ atthaṃ, dhammato vā anapetaṃ atthaṃ. Kiṃ taṃ? Saccaṃ. Addasapassayanti mayhaṃ ñātīnañca apassayaṃ addasaṃ. Atikkhayanti mahāvināsaṃ.
87. ஸத்³த⁴ம்மந்தி ஸதங் ஸாதூ⁴னங் பு³த்³தா⁴தீ³னங் ஏகஸ்ஸாபி பாணினோ அஹிங்ஸனஸங்கா²தங் த⁴ம்மங். அனுஸ்ஸரித்வா. பரமத்த²ங் விசிந்தயந்தி தங் கோ² பன பரமத்த²ங் ஸச்சங் அவிபரீதஸபா⁴வங் கத்வா சிந்தயந்தோ. யங் லோகே து⁴வஸஸ்ஸதந்தி யதே³தங் பு³த்³த⁴பச்சேகபு³த்³த⁴ஸாவகானங் ஏகஸ்ஸாபி பாணினோ அஹிங்ஸனங், தங் ஸப்³ப³காலங் தத²பா⁴வேன து⁴வங் ஸஸ்ஸதங் விசிந்தயங் ஸச்சகிரியங் அகாஸிந்தி ஸம்ப³ந்தோ⁴.
87.Saddhammanti sataṃ sādhūnaṃ buddhādīnaṃ ekassāpi pāṇino ahiṃsanasaṅkhātaṃ dhammaṃ. Anussaritvā. Paramatthaṃ vicintayanti taṃ kho pana paramatthaṃ saccaṃ aviparītasabhāvaṃ katvā cintayanto. Yaṃ loke dhuvasassatanti yadetaṃ buddhapaccekabuddhasāvakānaṃ ekassāpi pāṇino ahiṃsanaṃ, taṃ sabbakālaṃ tathabhāvena dhuvaṃ sassataṃ vicintayaṃ saccakiriyaṃ akāsinti sambandho.
88. இதா³னி தங் த⁴ம்மங் மஹாஸத்தோ அத்தனி விஜ்ஜமானங் க³ஹெத்வா ஸச்சவசனங் பயோஜேதுகாமோ காலவண்ணங் கத்³த³மங் த்³விதா⁴ வியூஹித்வா அஞ்ஜனருக்க²ஸாரக⁴டிகவண்ணமஹாஸரீரோ ஸுதோ⁴தலோஹிதகமணிஸதி³ஸானி அக்கீ²னி உம்மீலெத்வா ஆகாஸங் உல்லோகெந்தோ ‘‘யதோ ஸராமி அத்தான’’ந்தி கா³த²மாஹ.
88. Idāni taṃ dhammaṃ mahāsatto attani vijjamānaṃ gahetvā saccavacanaṃ payojetukāmo kālavaṇṇaṃ kaddamaṃ dvidhā viyūhitvā añjanarukkhasāraghaṭikavaṇṇamahāsarīro sudhotalohitakamaṇisadisāni akkhīni ummīletvā ākāsaṃ ullokento ‘‘yato sarāmi attāna’’nti gāthamāha.
தத்த² யதோ ஸராமி அத்தானந்தி யதோ பட்டா²ய அஹங் அத்தபா⁴வஸங்கா²தங் அத்தானங் ஸராமி அனுஸ்ஸராமி. யதோ பத்தொஸ்மி விஞ்ஞுதந்தி யதோ பட்டா²ய தாஸு தாஸு இதிகத்தப்³ப³தாஸு விஞ்ஞுதங் விஜானநபா⁴வங் பத்தொஸ்மி, உத்³த⁴ங் ஆரோஹனவஸேன இதோ யாவ மய்ஹங் காயவசீகம்மானங் அனுஸ்ஸரணஸமத்த²தா விஞ்ஞுதப்பத்தி ஏவ, எத்த²ந்தரே ஸமானஜாதிகானங் கா²த³னட்டா²னே நிப்³ப³த்தோபி தண்டு³லகணப்பமாணம்பி மச்ச²ங் மயா ந கா²தி³தபுப்³ப³ங், அஞ்ஞம்பி கஞ்சி பாணங் ஸஞ்சிச்ச ஹிங்ஸிதங் பா³தி⁴தங் நாபி⁴ஜானாமி, பகே³வ ஜீவிதா வோரோபிதங்.
Tattha yato sarāmi attānanti yato paṭṭhāya ahaṃ attabhāvasaṅkhātaṃ attānaṃ sarāmi anussarāmi. Yato pattosmi viññutanti yato paṭṭhāya tāsu tāsu itikattabbatāsu viññutaṃ vijānanabhāvaṃ pattosmi, uddhaṃ ārohanavasena ito yāva mayhaṃ kāyavacīkammānaṃ anussaraṇasamatthatā viññutappatti eva, etthantare samānajātikānaṃ khādanaṭṭhāne nibbattopi taṇḍulakaṇappamāṇampi macchaṃ mayā na khāditapubbaṃ, aññampi kañci pāṇaṃ sañcicca hiṃsitaṃ bādhitaṃ nābhijānāmi, pageva jīvitā voropitaṃ.
89. ஏதேன ஸச்சவஜ்ஜேனாதி ‘‘யதே³தங் மயா கஸ்ஸசி பாணஸ்ஸ அஹிங்ஸனங் வுத்தங், ஸசே ஏதங் ஸச்சங் தத²ங் அவிபரீதங், ஏதேன ஸச்சவசனேன பஜ்ஜுன்னோ மேகோ⁴ அபி⁴வஸ்ஸது, ஞாதிஸங்க⁴ங் மே து³க்கா² பமோசேதூ’’தி வத்வா புன அத்தனோ பரிசாரிகசேடகங் ஆணாபெந்தோ விய பஜ்ஜுன்னங் தே³வராஜானங் ஆலபந்தோ ‘‘அபி⁴த்த²னயா’’தி கா³த²மாஹ.
89.Etena saccavajjenāti ‘‘yadetaṃ mayā kassaci pāṇassa ahiṃsanaṃ vuttaṃ, sace etaṃ saccaṃ tathaṃ aviparītaṃ, etena saccavacanena pajjunno megho abhivassatu, ñātisaṅghaṃ me dukkhā pamocetū’’ti vatvā puna attano paricārikaceṭakaṃ āṇāpento viya pajjunnaṃ devarājānaṃ ālapanto ‘‘abhitthanayā’’ti gāthamāha.
தத்த² அபி⁴த்த²னய பஜ்ஜுன்னாதி பஜ்ஜுன்னோ வுச்சதி மேகோ⁴, அயங் பன மேக⁴வஸேன லத்³த⁴னாமங் வஸ்ஸவலாஹகதே³வராஜானங் ஆலபதி. அயங் ஹிஸ்ஸ அதி⁴ப்பாயோ – தே³வோ நாம அனபி⁴த்த²னயந்தோ விஜ்ஜுலதா அனிச்சா²ரெந்தோ பவஸ்ஸந்தோபி ந ஸோப⁴தி, தஸ்மா த்வங் அபி⁴த்த²னயந்தோ விஜ்ஜுலதா நிச்சா²ரெந்தோ வஸ்ஸாபேஹீதி. நிதி⁴ங் காகஸ்ஸ நாஸயாதி காகா கலலங் பவிஸித்வா டி²தே மச்சே² துண்டே³ன கொட்டெத்வா நீஹரித்வா கா²த³ந்தி , தஸ்மா தேஸங் அந்தோகலலே மச்சா² ‘‘நிதீ⁴’’தி வுச்சந்தி. தங் காகஸங்க⁴ஸ்ஸ நிதி⁴ங் தே³வங் வஸ்ஸாபெந்தோ உத³கேன படிச்சா²தெ³த்வா நாஸேஹி. காகங் ஸோகாய ரந்தே⁴ஹீதி காகஸங்கோ⁴ இமஸ்மிங் மஹாஸரே உத³கேன புண்ணே மச்சே² அலப⁴மானோ ஸோசிஸ்ஸதி, தங் காகக³ணங் த்வங் இமங் கத்³த³மங் பூரெந்தோ ஸோகாய ரந்தே⁴ஹி, ஸோகஸ்ஸத்தா²ய பன வஸ்ஸாபயத², யதா² அந்தோனிஜ்ஜா²னலக்க²ணங் ஸோகங் பாபுணாதி, ஏவங் கரோஹீதி அத்தோ². மச்சே² ஸோகா பமோசயாதி மம ஞாதகே ஸப்³பே³வ மச்சே² இமம்ஹா மரணஸோகா பமோசேஹி. ‘‘மஞ்ச ஸோகா பமோசயா’’தி (ஜா॰ 1.1.75) ஜாதகே பட²ந்தி. தத்த² ச-காரோ ஸம்பிண்ட³னத்தோ², மஞ்ச மம ஞாதகே சாதி ஸப்³பே³வ மரணஸோகா பமோசேஹி (ஜா॰ அட்ட²॰ 1.1.75). மச்சா²னஞ்ஹி அனுத³கபா⁴வேன பச்சத்தி²கானங் கா⁴ஸபா⁴வங் க³ச்சா²மாதி மஹாமரணஸோகோ, மஹாஸத்தஸ்ஸ பன தேஸங் அனயப்³யஸனங் படிச்ச கருணாயதோ கருணாபதிரூபமுகே²ன ஸோகஸம்ப⁴வோ வேதி³தப்³போ³.
Tattha abhitthanaya pajjunnāti pajjunno vuccati megho, ayaṃ pana meghavasena laddhanāmaṃ vassavalāhakadevarājānaṃ ālapati. Ayaṃ hissa adhippāyo – devo nāma anabhitthanayanto vijjulatā anicchārento pavassantopi na sobhati, tasmā tvaṃ abhitthanayanto vijjulatā nicchārento vassāpehīti. Nidhiṃ kākassa nāsayāti kākā kalalaṃ pavisitvā ṭhite macche tuṇḍena koṭṭetvā nīharitvā khādanti , tasmā tesaṃ antokalale macchā ‘‘nidhī’’ti vuccanti. Taṃ kākasaṅghassa nidhiṃ devaṃ vassāpento udakena paṭicchādetvā nāsehi. Kākaṃ sokāya randhehīti kākasaṅgho imasmiṃ mahāsare udakena puṇṇe macche alabhamāno socissati, taṃ kākagaṇaṃ tvaṃ imaṃ kaddamaṃ pūrento sokāya randhehi, sokassatthāya pana vassāpayatha, yathā antonijjhānalakkhaṇaṃ sokaṃ pāpuṇāti, evaṃ karohīti attho. Macche sokā pamocayāti mama ñātake sabbeva macche imamhā maraṇasokā pamocehi. ‘‘Mañca sokā pamocayā’’ti (jā. 1.1.75) jātake paṭhanti. Tattha ca-kāro sampiṇḍanattho, mañca mama ñātake cāti sabbeva maraṇasokā pamocehi (jā. aṭṭha. 1.1.75). Macchānañhi anudakabhāvena paccatthikānaṃ ghāsabhāvaṃ gacchāmāti mahāmaraṇasoko, mahāsattassa pana tesaṃ anayabyasanaṃ paṭicca karuṇāyato karuṇāpatirūpamukhena sokasambhavo veditabbo.
ஏவங் போ³தி⁴ஸத்தோ அத்தனோ பரிசாரிகசேடகங் ஆணாபெந்தோ விய பஜ்ஜுன்னங் ஆலபித்வா ஸகலே கோஸலரட்டே² மஹாவஸ்ஸங் வஸ்ஸாபேஸி. மஹாஸத்தஸ்ஸ ஹி ஸீலதேஜேன ஸச்சகிரியாய ஸமகாலமேவ ஸக்கஸ்ஸ பண்டு³கம்ப³லஸிலாஸனங் உண்ஹாகாரங் த³ஸ்ஸேஸி. ஸோ ‘‘கிங் நு கோ²’’தி ஆவஜ்ஜெந்தோ தங் காரணங் ஞத்வா வஸ்ஸவலாஹகதே³வராஜானங் பக்கோஸாபெத்வா ‘‘தாத, மஹாபுரிஸோ மச்ச²ராஜா ஞாதீனங் மரணஸோகேன வஸ்ஸாபனங் இச்ச²தி, ஸகலங் கோஸலரட்ட²ங் ஏகமேக⁴ங் கத்வா வஸ்ஸாபேஹீ’’தி ஆஹ.
Evaṃ bodhisatto attano paricārikaceṭakaṃ āṇāpento viya pajjunnaṃ ālapitvā sakale kosalaraṭṭhe mahāvassaṃ vassāpesi. Mahāsattassa hi sīlatejena saccakiriyāya samakālameva sakkassa paṇḍukambalasilāsanaṃ uṇhākāraṃ dassesi. So ‘‘kiṃ nu kho’’ti āvajjento taṃ kāraṇaṃ ñatvā vassavalāhakadevarājānaṃ pakkosāpetvā ‘‘tāta, mahāpuriso maccharājā ñātīnaṃ maraṇasokena vassāpanaṃ icchati, sakalaṃ kosalaraṭṭhaṃ ekameghaṃ katvā vassāpehī’’ti āha.
ஸோ ‘‘ஸாதூ⁴’’தி ஸம்படிச்சி²த்வா ஏகங் வலாஹகங் நிவாஸெத்வா ஏகங் பாருபித்வா மேக⁴கீ³தங் கா³யந்தோ பாசீனலோகதா⁴துஅபி⁴முகோ² பக்க²ந்தி³. பாசீனதி³ஸாபா⁴கே³ க²லமண்ட³லமத்தங் ஏகங் மேக⁴மண்ட³லங் உட்டா²ய ஸதபடலங் ஸஹஸ்ஸபடலங் ஹுத்வா அபி⁴த்த²னயந்தங் விஜ்ஜுலதா நிச்சா²ரெந்தங் அதோ⁴முக²ட²பிதஉத³ககும்பா⁴காரேன விஸ்ஸந்த³மானங் ஸகலங் கோஸலரட்ட²ங் மஹோகே⁴ன அஜ்ஜொ²த்த²ரி. தே³வோ அச்சி²ன்னதா⁴ரங் வஸ்ஸந்தோ முஹுத்தேனேவ தங் மஹாஸரங் பூரேஸி. மச்சா² மரணப⁴யதோ முச்சிங்ஸு. காகாத³யோ அபதிட்டா² அஹேஸுங். ந கேவலங் மச்சா² ஏவ, மனுஸ்ஸாபி விவித⁴ஸஸ்ஸானி ஸம்பாதெ³ந்தா சதுப்பதா³த³யோபீதி ஸப்³பே³பி வஸ்ஸூபஜீவினோ காயிகசேதஸிகது³க்க²தோ முச்சிங்ஸு. தேன வுத்தங் –
So ‘‘sādhū’’ti sampaṭicchitvā ekaṃ valāhakaṃ nivāsetvā ekaṃ pārupitvā meghagītaṃ gāyanto pācīnalokadhātuabhimukho pakkhandi. Pācīnadisābhāge khalamaṇḍalamattaṃ ekaṃ meghamaṇḍalaṃ uṭṭhāya satapaṭalaṃ sahassapaṭalaṃ hutvā abhitthanayantaṃ vijjulatā nicchārentaṃ adhomukhaṭhapitaudakakumbhākārena vissandamānaṃ sakalaṃ kosalaraṭṭhaṃ mahoghena ajjhotthari. Devo acchinnadhāraṃ vassanto muhutteneva taṃ mahāsaraṃ pūresi. Macchā maraṇabhayato mucciṃsu. Kākādayo apatiṭṭhā ahesuṃ. Na kevalaṃ macchā eva, manussāpi vividhasassāni sampādentā catuppadādayopīti sabbepi vassūpajīvino kāyikacetasikadukkhato mucciṃsu. Tena vuttaṃ –
90.
90.
‘‘ஸஹ கதே ஸச்சவரே, பஜ்ஜுன்னோ அபி⁴க³ஜ்ஜிய;
‘‘Saha kate saccavare, pajjunno abhigajjiya;
த²லங் நின்னஞ்ச பூரெந்தோ, க²ணேன அபி⁴வஸ்ஸதா²’’தி.
Thalaṃ ninnañca pūrento, khaṇena abhivassathā’’ti.
தத்த² க²ணேன அபி⁴வஸ்ஸதா²தி அத³ந்தா⁴யித்வா ஸச்சகிரியக²ணேனேவ அபி⁴வஸ்ஸி.
Tattha khaṇena abhivassathāti adandhāyitvā saccakiriyakhaṇeneva abhivassi.
91. கத்வா வீரியமுத்தமந்தி தே³வே அவஸ்ஸந்தே கிங் காதப்³ப³ந்தி கோஸஜ்ஜங் அனாபஜ்ஜித்வா ஞாதத்த²சரியாஸம்பாத³னமுகே²ன மஹதோ ஸத்தனிகாயஸ்ஸ ஹிதஸுக²னிப்பா²த³னங் உத்தமங் வீரியங் கத்வா. ஸச்சதேஜப³லஸ்ஸிதோ மம ஸச்சானுபா⁴வப³லஸன்னிஸ்ஸிதோ ஹுத்வா ததா³ மஹாமேக⁴ங் வஸ்ஸாபேஸிங். யஸ்மா சேததே³வங், தஸ்மா ‘‘ஸச்சேன மே ஸமோ நத்தி², ஏஸா மே ஸச்சபாரமீ’’தி மஹாமச்ச²ராஜகாலே அத்தனோ ஸச்சபாரமியா அனஞ்ஞஸாதா⁴ரணபா⁴வங் த³ஸ்ஸேஸி த⁴ம்மராஜா.
91.Katvā vīriyamuttamanti deve avassante kiṃ kātabbanti kosajjaṃ anāpajjitvā ñātatthacariyāsampādanamukhena mahato sattanikāyassa hitasukhanipphādanaṃ uttamaṃ vīriyaṃ katvā. Saccatejabalassito mama saccānubhāvabalasannissito hutvā tadā mahāmeghaṃ vassāpesiṃ. Yasmā cetadevaṃ, tasmā ‘‘saccena me samo natthi, esā me saccapāramī’’ti mahāmaccharājakāle attano saccapāramiyā anaññasādhāraṇabhāvaṃ dassesi dhammarājā.
ஏவங் மஹாஸத்தோ மஹாகருணாய ஸமுஸ்ஸாஹிதஹத³யோ ஸகலரட்டே² மஹாவஸ்ஸங் வஸ்ஸாபனவஸேன மஹாஜனங் மரணது³க்க²தோ மோசெத்வா ஜீவிதபரியோஸானே யதா²கம்மங் க³தோ.
Evaṃ mahāsatto mahākaruṇāya samussāhitahadayo sakalaraṭṭhe mahāvassaṃ vassāpanavasena mahājanaṃ maraṇadukkhato mocetvā jīvitapariyosāne yathākammaṃ gato.
ததா³ பஜ்ஜுன்னோ ஆனந்த³த்தே²ரோ அஹோஸி, மச்ச²க³ணா பு³த்³த⁴பரிஸா, மச்ச²ராஜா லோகனாதோ².
Tadā pajjunno ānandatthero ahosi, macchagaṇā buddhaparisā, maccharājā lokanātho.
தஸ்ஸ ஹெட்டா² வுத்தனயேனேவ ஸேஸபாரமியோபி நித்³தா⁴ரேதப்³பா³. ததா² அத்தனோ ஸமானஜாதிகானங் கா²த³னட்டா²னே மச்ச²யோனியங் நிப்³ப³த்தித்வா தண்டு³லகணமத்தம்பி மச்ச²ங் ஆதி³ங் கத்வா கஸ்ஸசிபி பாணினோ அகா²த³னங், திட்ட²து கா²த³னங் ஏகஸத்தஸ்ஸபி அவிஹேட²னங், ததா² ஸச்சகரணேன தே³வஸ்ஸ வஸ்ஸாபனங், உத³கே பரிக்கீ²ணே கலலக³ஹனே நிமுஜ்ஜனவஸேன அத்தனா அனுப⁴வமானங் து³க்க²ங் வீரபா⁴வேன அக³ணெத்வா ஞாதிஸங்க⁴ஸ்ஸேவ தங் து³க்க²ங் அத்தனோ ஹத³யே கத்வா அஸஹந்தஸ்ஸ ஸப்³ப³பா⁴வேன கருணாயனா, ததா² ச படிபத்தீதி ஏவமாத³யோ கு³ணானுபா⁴வா விபா⁴வேதப்³பா³தி.
Tassa heṭṭhā vuttanayeneva sesapāramiyopi niddhāretabbā. Tathā attano samānajātikānaṃ khādanaṭṭhāne macchayoniyaṃ nibbattitvā taṇḍulakaṇamattampi macchaṃ ādiṃ katvā kassacipi pāṇino akhādanaṃ, tiṭṭhatu khādanaṃ ekasattassapi aviheṭhanaṃ, tathā saccakaraṇena devassa vassāpanaṃ, udake parikkhīṇe kalalagahane nimujjanavasena attanā anubhavamānaṃ dukkhaṃ vīrabhāvena agaṇetvā ñātisaṅghasseva taṃ dukkhaṃ attano hadaye katvā asahantassa sabbabhāvena karuṇāyanā, tathā ca paṭipattīti evamādayo guṇānubhāvā vibhāvetabbāti.
மச்ச²ராஜசரியாவண்ணனா நிட்டி²தா.
Maccharājacariyāvaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / சரியாபிடகபாளி • Cariyāpiṭakapāḷi / 10. மச்ச²ராஜசரியா • 10. Maccharājacariyā
