| Library / Tipiṭaka / तिपिटक • Tipiṭaka / अङ्गुत्तरनिकाय (टीका) • Aṅguttaranikāya (ṭīkā) |
५-१३. मच्छरिनीसुत्तादिवण्णना
5-13. Maccharinīsuttādivaṇṇanā
११५-१२३. पञ्चमे आवासमच्छरियादीनि पञ्च इध भिक्खुनिया वसेन आगतानि, भिक्खुस्स वसेनपि तानि वेदितब्बानि। आवासमच्छरियेन हि समन्नागतो भिक्खु आगन्तुकं दिस्वा ‘‘एत्थ चेतियस्स वा सङ्घस्स वा परिक्खारो ठपितो’’तिआदीनि वत्वा सङ्घिकआवासं न देति। कुलमच्छरियेन समन्नागतो भिक्खु तेहि तेहि कारणेहि आदीनवं दस्सेत्वा अत्तनो उपट्ठाके कुले अञ्ञेसं पवेसम्पि निवारेति। लाभमच्छरियेन समन्नागतो सङ्घिकम्पि लाभं मच्छरायन्तो यथा अञ्ञे न लभन्ति, एवं करोति अत्तना विसमनिस्सितताय बलवनिस्सितताय च। वण्णमच्छरियेन समन्नागतो अत्तनो वण्णं वण्णेति, परेसं वण्णे ‘‘किं वण्णो एसो’’ति तं तं दोसं वदति। वण्णोति चेत्थ सरीरवण्णोपि, गुणवण्णोपि वेदितब्बो।
115-123. Pañcame āvāsamacchariyādīni pañca idha bhikkhuniyā vasena āgatāni, bhikkhussa vasenapi tāni veditabbāni. Āvāsamacchariyena hi samannāgato bhikkhu āgantukaṃ disvā ‘‘ettha cetiyassa vā saṅghassa vā parikkhāro ṭhapito’’tiādīni vatvā saṅghikaāvāsaṃ na deti. Kulamacchariyena samannāgato bhikkhu tehi tehi kāraṇehi ādīnavaṃ dassetvā attano upaṭṭhāke kule aññesaṃ pavesampi nivāreti. Lābhamacchariyena samannāgato saṅghikampi lābhaṃ maccharāyanto yathā aññe na labhanti, evaṃ karoti attanā visamanissitatāya balavanissitatāya ca. Vaṇṇamacchariyena samannāgato attano vaṇṇaṃ vaṇṇeti, paresaṃ vaṇṇe ‘‘kiṃ vaṇṇo eso’’ti taṃ taṃ dosaṃ vadati. Vaṇṇoti cettha sarīravaṇṇopi, guṇavaṇṇopi veditabbo.
धम्ममच्छरियेन समन्नागतो – ‘‘इमं धम्मं परियापुणित्वा एसो मं अभिभविस्सती’’ति अञ्ञस्स न देति। यो पन – ‘‘अयं इमं धम्मं उग्गहेत्वा अञ्ञथा अत्थं विपरिवत्तेत्वा नासेस्सती’’ति धम्मनुग्गहेन वा – ‘‘अयं इमं धम्मं उग्गहेत्वा उद्धतो उन्नळो अवूपसन्तचित्तो अपुञ्ञं पसविस्सती’’ति पुग्गलानुग्गहेन वा न देति, न तं मच्छरियं। धम्मोति चेत्थ परियत्तिधम्मो अधिप्पेतो। पटिवेधधम्मो हि अरियानंयेव होति, ते च नं न मच्छरायन्ति मच्छरियस्स सब्बसो पहीनत्ताति तस्स असम्भवो एव। तत्थ आवासमच्छरियेन लोहगेहे पच्चति, यक्खो वा पेतो वा हुत्वा तस्सेव आवासस्स सङ्कारं सीसेन उक्खिपित्वा चरति। कुलमच्छरियेन अप्पभोगो होति। लाभमच्छरियेन गूथनिरये निब्बत्तति, सङ्घस्स वा गणस्स वा लाभं मच्छरायित्वा पुग्गलिकपरिभोगेन वा परिभुञ्जित्वा यक्खो वा पेतो वा महाअजगरो वा हुत्वा निब्बत्तति। वण्णमच्छरियेन भवेसु निब्बत्तस्स वण्णो नाम न होति। धम्ममच्छरियेन कुक्कुळनिरये निब्बत्तति। छट्ठादीनि उत्तानत्थानेव।
Dhammamacchariyena samannāgato – ‘‘imaṃ dhammaṃ pariyāpuṇitvā eso maṃ abhibhavissatī’’ti aññassa na deti. Yo pana – ‘‘ayaṃ imaṃ dhammaṃ uggahetvā aññathā atthaṃ viparivattetvā nāsessatī’’ti dhammanuggahena vā – ‘‘ayaṃ imaṃ dhammaṃ uggahetvā uddhato unnaḷo avūpasantacitto apuññaṃ pasavissatī’’ti puggalānuggahena vā na deti, na taṃ macchariyaṃ. Dhammoti cettha pariyattidhammo adhippeto. Paṭivedhadhammo hi ariyānaṃyeva hoti, te ca naṃ na maccharāyanti macchariyassa sabbaso pahīnattāti tassa asambhavo eva. Tattha āvāsamacchariyena lohagehe paccati, yakkho vā peto vā hutvā tasseva āvāsassa saṅkāraṃ sīsena ukkhipitvā carati. Kulamacchariyena appabhogo hoti. Lābhamacchariyena gūthaniraye nibbattati, saṅghassa vā gaṇassa vā lābhaṃ maccharāyitvā puggalikaparibhogena vā paribhuñjitvā yakkho vā peto vā mahāajagaro vā hutvā nibbattati. Vaṇṇamacchariyena bhavesu nibbattassa vaṇṇo nāma na hoti. Dhammamacchariyena kukkuḷaniraye nibbattati. Chaṭṭhādīni uttānatthāneva.
मच्छरिनीसुत्तादिवण्णना निट्ठिता।
Maccharinīsuttādivaṇṇanā niṭṭhitā.
अन्धकविन्दवग्गवण्णना निट्ठिता।
Andhakavindavaggavaṇṇanā niṭṭhitā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / अङ्गुत्तरनिकाय • Aṅguttaranikāya
५. मच्छरिनीसुत्तं • 5. Maccharinīsuttaṃ
६. वण्णनासुत्तं • 6. Vaṇṇanāsuttaṃ
७. इस्सुकिनीसुत्तं • 7. Issukinīsuttaṃ
८. मिच्छादिट्ठिकसुत्तं • 8. Micchādiṭṭhikasuttaṃ
९. मिच्छावाचासुत्तं • 9. Micchāvācāsuttaṃ
१०. मिच्छावायामसुत्तं • 10. Micchāvāyāmasuttaṃ
१. गिलानसुत्तं • 1. Gilānasuttaṃ
२. सतिसूपट्ठितसुत्तं • 2. Satisūpaṭṭhitasuttaṃ
३. पठमउपट्ठाकसुत्तं • 3. Paṭhamaupaṭṭhākasuttaṃ
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / अङ्गुत्तरनिकाय (अट्ठकथा) • Aṅguttaranikāya (aṭṭhakathā)
५. मच्छरिनीसुत्तवण्णना • 5. Maccharinīsuttavaṇṇanā
६-७. वण्णनासुत्तादिवण्णना • 6-7. Vaṇṇanāsuttādivaṇṇanā
