| Library / Tipiṭaka / तिपिटक • Tipiṭaka / संयुत्तनिकाय • Saṃyuttanikāya |
९. मच्छरिसुत्तं
9. Maccharisuttaṃ
४९.
49.
‘‘येध मच्छरिनो लोके, कदरिया परिभासका।
‘‘Yedha maccharino loke, kadariyā paribhāsakā;
अञ्ञेसं ददमानानं, अन्तरायकरा नरा॥
Aññesaṃ dadamānānaṃ, antarāyakarā narā.
‘‘कीदिसो तेसं विपाको, सम्परायो च कीदिसो।
‘‘Kīdiso tesaṃ vipāko, samparāyo ca kīdiso;
भगवन्तं पुट्ठुमागम्म, कथं जानेमु तं मय’’न्ति॥
Bhagavantaṃ puṭṭhumāgamma, kathaṃ jānemu taṃ maya’’nti.
‘‘येध मच्छरिनो लोके, कदरिया परिभासका।
‘‘Yedha maccharino loke, kadariyā paribhāsakā;
अञ्ञेसं ददमानानं, अन्तरायकरा नरा॥
Aññesaṃ dadamānānaṃ, antarāyakarā narā.
‘‘निरयं तिरच्छानयोनिं, यमलोकं उपपज्जरे।
‘‘Nirayaṃ tiracchānayoniṃ, yamalokaṃ upapajjare;
सचे एन्ति मनुस्सत्तं, दलिद्दे जायरे कुले॥
Sace enti manussattaṃ, dalidde jāyare kule.
‘‘चोळं पिण्डो रती खिड्डा, यत्थ किच्छेन लब्भति।
‘‘Coḷaṃ piṇḍo ratī khiḍḍā, yattha kicchena labbhati;
‘‘इतिहेतं विजानाम, अञ्ञं पुच्छाम गोतम।
‘‘Itihetaṃ vijānāma, aññaṃ pucchāma gotama;
येध लद्धा मनुस्सत्तं, वदञ्ञू वीतमच्छरा॥
Yedha laddhā manussattaṃ, vadaññū vītamaccharā.
‘‘बुद्धे पसन्ना धम्मे च, सङ्घे च तिब्बगारवा।
‘‘Buddhe pasannā dhamme ca, saṅghe ca tibbagāravā;
कीदिसो तेसं विपाको, सम्परायो च कीदिसो।
Kīdiso tesaṃ vipāko, samparāyo ca kīdiso;
भगवन्तं पुट्ठुमागम्म, कथं जानेमु तं मय’’न्ति॥
Bhagavantaṃ puṭṭhumāgamma, kathaṃ jānemu taṃ maya’’nti.
‘‘येध लद्धा मनुस्सत्तं, वदञ्ञू वीतमच्छरा।
‘‘Yedha laddhā manussattaṃ, vadaññū vītamaccharā;
बुद्धे पसन्ना धम्मे च, सङ्घे च तिब्बगारवा।
Buddhe pasannā dhamme ca, saṅghe ca tibbagāravā;
‘‘सचे एन्ति मनुस्सत्तं, अड्ढे आजायरे कुले।
‘‘Sace enti manussattaṃ, aḍḍhe ājāyare kule;
चोळं पिण्डो रती खिड्डा, यत्थाकिच्छेन लब्भति॥
Coḷaṃ piṇḍo ratī khiḍḍā, yatthākicchena labbhati.
‘‘परसम्भतेसु भोगेसु, वसवत्तीव मोदरे।
‘‘Parasambhatesu bhogesu, vasavattīva modare;
दिट्ठे धम्मेस विपाको, सम्पराये च सुग्गती’’ति॥
Diṭṭhe dhammesa vipāko, samparāye ca suggatī’’ti.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / संयुत्तनिकाय (अट्ठकथा) • Saṃyuttanikāya (aṭṭhakathā) / ९. मच्छरिसुत्तवण्णना • 9. Maccharisuttavaṇṇanā
टीका • Tīkā / सुत्तपिटक (टीका) • Suttapiṭaka (ṭīkā) / संयुत्तनिकाय (टीका) • Saṃyuttanikāya (ṭīkā) / ९. मच्छरिसुत्तवण्णना • 9. Maccharisuttavaṇṇanā
