| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
2. மச்ச²ரிஸுத்தவண்ணனா
2. Maccharisuttavaṇṇanā
32. து³தியே மச்சே²ரா ச பமாதா³ சாதி அத்தஸம்பத்தினிகூ³ஹனலக்க²ணேன மச்சே²ரேன சேவ ஸதிவிப்பவாஸலக்க²ணேன பமாதே³ன ச. ஏகச்சோ ஹி ‘இத³ங் மே தெ³ந்தஸ்ஸ பரிக்க²யங் க³மிஸ்ஸதி, மய்ஹங் வா க⁴ரமானுஸகானங் வா ந ப⁴விஸ்ஸதீ’’தி மச்ச²ரியேன தா³னங் ந தே³தி. ஏகச்சோ கி²ட்³டா³தி³பஸுதத்தா ‘தா³னங் தா³தப்³ப³’’ந்தி சித்தம்பி ந உப்பாதே³தி. ஏவங் தா³னங் ந தீ³யதீதி ஏவமேதங் யஸதா³யகங் ஸிரீதா³யகங் ஸம்பத்திதா³யகங் ஸுக²தா³யகங் தா³னங் நாம ந தீ³யதீதிஆதி³னா காரணங் கதே²ஸி. புஞ்ஞங் ஆகங்க²மானேனாதி புப்³ப³சேதனாதி³பே⁴த³ங் புஞ்ஞங் இச்ச²மானேன. தெ³ய்யங் ஹோதி விஜானதாதி அத்தி² தா³னஸ்ஸ ப²லந்தி ஜானந்தேன தா³தப்³ப³மேவாதி வத³தி.
32. Dutiye maccherā ca pamādā cāti attasampattinigūhanalakkhaṇena maccherena ceva sativippavāsalakkhaṇena pamādena ca. Ekacco hi ‘idaṃ me dentassa parikkhayaṃ gamissati, mayhaṃ vā gharamānusakānaṃ vā na bhavissatī’’ti macchariyena dānaṃ na deti. Ekacco khiḍḍādipasutattā ‘dānaṃ dātabba’’nti cittampi na uppādeti. Evaṃ dānaṃ na dīyatīti evametaṃ yasadāyakaṃ sirīdāyakaṃ sampattidāyakaṃ sukhadāyakaṃ dānaṃ nāma na dīyatītiādinā kāraṇaṃ kathesi. Puññaṃ ākaṅkhamānenāti pubbacetanādibhedaṃ puññaṃ icchamānena. Deyyaṃ hoti vijānatāti atthi dānassa phalanti jānantena dātabbamevāti vadati.
தமேவ பா³லங் பு²ஸதீதி தங்யேவ பா³லங் இத⁴லோகபரலோகேஸு ஜிக⁴ச்சா² ச பிபாஸா ச பு²ஸதி அனுப³ந்த⁴தி ந விஜஹதி. தஸ்மாதி யஸ்மா தமேவ பு²ஸதி, தஸ்மா. வினெய்ய மச்சே²ரந்தி மச்சே²ரமலங் வினெத்வா. த³ஜ்ஜா தா³னங் மலாபி⁴பூ⁴தி மலாபி⁴பூ⁴ ஹுத்வா தங் மச்சே²ரமலங் அபி⁴ப⁴வித்வா தா³னங் த³தெ³ய்ய.
Tameva bālaṃ phusatīti taṃyeva bālaṃ idhalokaparalokesu jighacchā ca pipāsā ca phusati anubandhati na vijahati. Tasmāti yasmā tameva phusati, tasmā. Vineyya maccheranti maccheramalaṃ vinetvā. Dajjā dānaṃ malābhibhūti malābhibhū hutvā taṃ maccheramalaṃ abhibhavitvā dānaṃ dadeyya.
தே மதேஸு ந மீயந்தீதி அதா³னஸீலதாய மரணேன மதேஸு ந மீயந்தி. யதா² ஹி மதோ ஸம்பரிவாரெத்வா ட²பிதே ப³ஹும்ஹிபி அன்னபானாதி³ம்ஹி ‘‘இத³ங் இமஸ்ஸ ஹோது, இத³ங் இமஸ்ஸா’’தி உட்ட²ஹித்வா ஸங்விபா⁴க³ங் ந கரோதி, ஏவங் அதா³னஸீலோபீதி மதகஸ்ஸ ச அதா³னஸீலஸ்ஸ ச போ⁴கா³ ஸமஸமா நாம ஹொந்தி. தேன தா³னஸீலா ஏவரூபேஸு மதேஸு ந மீயந்தீதி அத்தோ². பந்தா²னங்வ ஸஹ வஜங், அப்பஸ்மிங் யே பவெச்ச²ந்தீதி யதா² அத்³தா⁴னங் கந்தாரமக்³க³ங் ஸஹ வஜந்தா பதி²கா ஸஹ வஜந்தானங் பதி²கானங் அப்பஸ்மிங் பாதெ²ய்யே ஸங்விபா⁴க³ங் கத்வா பவெச்ச²ந்தி த³த³ந்தியேவ, ஏவமேவங் யே பன அனமதக்³க³ங் ஸங்ஸாரகந்தாரங் ஸஹ வஜந்தா ஸஹ வஜந்தானங் அப்பஸ்மிம்பி தெ³ய்யத⁴ம்மே ஸங்விபா⁴க³ங் கத்வா த³த³ந்தியேவ, தே மதேஸு ந மீயந்தி.
Te matesu na mīyantīti adānasīlatāya maraṇena matesu na mīyanti. Yathā hi mato samparivāretvā ṭhapite bahumhipi annapānādimhi ‘‘idaṃ imassa hotu, idaṃ imassā’’ti uṭṭhahitvā saṃvibhāgaṃ na karoti, evaṃ adānasīlopīti matakassa ca adānasīlassa ca bhogā samasamā nāma honti. Tena dānasīlā evarūpesu matesu na mīyantīti attho. Panthānaṃva saha vajaṃ, appasmiṃ ye pavecchantīti yathā addhānaṃ kantāramaggaṃ saha vajantā pathikā saha vajantānaṃ pathikānaṃ appasmiṃ pātheyye saṃvibhāgaṃ katvā pavecchanti dadantiyeva, evamevaṃ ye pana anamataggaṃ saṃsārakantāraṃ saha vajantā saha vajantānaṃ appasmimpi deyyadhamme saṃvibhāgaṃ katvā dadantiyeva, te matesu na mīyanti.
ஏஸ த⁴ம்மோ ஸனந்தனோதி ஏஸ போராணகோ த⁴ம்மோ, ஸனந்தனானங் வா பண்டி³தானங் ஏஸ த⁴ம்மோதி. அப்பஸ்மேகேதி அப்பஸ்மிங் தெ³ய்யத⁴ம்மே ஏகே. பவெச்ச²ந்தீதி த³த³ந்தி. ப³ஹுனேகே ந தி³ச்ச²ரேதி ப³ஹுனாபி போ⁴கே³ன ஸமன்னாக³தா ஏகச்சே ந த³த³ந்தி. ஸஹஸ்ஸேன ஸமங் மிதாதி ஸஹஸ்ஸேன ஸத்³தி⁴ங் மிதா, ஸஹஸ்ஸ தா³னஸதி³ஸா ஹோதி.
Esa dhammo sanantanoti esa porāṇako dhammo, sanantanānaṃ vā paṇḍitānaṃ esa dhammoti. Appasmeketi appasmiṃ deyyadhamme eke. Pavecchantīti dadanti. Bahuneke na dicchareti bahunāpi bhogena samannāgatā ekacce na dadanti. Sahassena samaṃ mitāti sahassena saddhiṃ mitā, sahassa dānasadisā hoti.
து³ரன்வயோதி து³ரனுக³மனோ, து³ப்பூரோதி அத்தோ². த⁴ம்மங் சரேதி த³ஸகுஸலகம்மபத²த⁴ம்மங் சரதி. யோபி ஸமுஞ்ஜகஞ்சரேதி யோ அபி க²லமண்ட³லாதி³ஸோத⁴னபலாலபோட²னாதி³வஸேன ஸமுஞ்ஜகஞ்சரதி. தா³ரஞ்ச போஸந்தி தா³ரஞ்ச போஸந்தோ. த³த³ங் அப்பகஸ்மிந்தி அப்பகஸ்மிங் பண்ணஸாகமத்தஸ்மிம்பி ஸங்விபா⁴க³ங் கத்வா த³த³ந்தோவ ஸோ த⁴ம்மங் சரதி. ஸதங் ஸஹஸ்ஸானந்தி ஸஹஸ்ஸங் ஸஹஸ்ஸங் கத்வா க³ணிதானங் புரிஸானங் ஸதங், ஸதஸஹஸ்ஸந்தி அத்தோ². ஸஹஸ்ஸயாகி³னந்தி பி⁴க்கு²ஸஹஸ்ஸஸ்ஸ வா யாகோ³ கஹாபணஸஹஸ்ஸேன வா நிப்³ப³த்திதோ யாகோ³பி ஸஹஸ்ஸயாகோ³. ஸோ ஏதேஸங் அத்தீ²தி ஸஹஸ்ஸயாகி³னோ, தேஸங் ஸஹஸ்ஸயாகி³னங். ஏதேன த³ஸன்னங் வா பி⁴க்கு²கோடீனங் த³ஸன்னங் வா கஹாபணகோடீனங் பிண்ட³பாதோ த³ஸ்ஸிதோ ஹோதி. யே எத்தகங் த³த³ந்தி, தே கலம்பி நக்³க⁴ந்தி ததா²வித⁴ஸ்ஸாதி ஆஹ. ய்வாயங் ஸமுஞ்ஜகங் சரந்தோபி த⁴ம்மங் சரதி, தா³ரங் போஸெந்தோபி, அப்பகஸ்மிங் த³த³ந்தோபி, ததா²வித⁴ஸ்ஸ ஏதே ஸஹஸ்ஸயாகி³னோ கலம்பி நக்³க⁴ந்தி. யங் தேன த³லித்³தே³ன ஏகபடிவீஸகமத்தம்பி ஸலாகப⁴த்தமத்தம்பி வா தி³ன்னங், தஸ்ஸ தா³னஸ்ஸ ஸப்³பே³ஸம்பி தேஸங் தா³னங் கலங் நக்³க⁴தீதி. கலங் நாம ஸோளஸபா⁴கோ³பி ஸதபா⁴கோ³பி ஸஹஸ்ஸபா⁴கோ³பி. இத⁴ ஸதபா⁴கோ³ க³ஹிதோ. யங் தேன தா³னங் தி³ன்னங், தஸ்மிங் ஸததா⁴ விப⁴த்தே இதரேஸங் த³ஸகோடிஸஹஸ்ஸதா³னங் ததோ ஏககொட்டா²ஸம்பி நக்³க⁴தீதி ஆஹ.
Duranvayoti duranugamano, duppūroti attho. Dhammaṃ careti dasakusalakammapathadhammaṃ carati. Yopi samuñjakañcareti yo api khalamaṇḍalādisodhanapalālapoṭhanādivasena samuñjakañcarati. Dārañca posanti dārañca posanto. Dadaṃ appakasminti appakasmiṃ paṇṇasākamattasmimpi saṃvibhāgaṃ katvā dadantova so dhammaṃ carati. Sataṃ sahassānanti sahassaṃ sahassaṃ katvā gaṇitānaṃ purisānaṃ sataṃ, satasahassanti attho. Sahassayāginanti bhikkhusahassassa vā yāgo kahāpaṇasahassena vā nibbattito yāgopi sahassayāgo. So etesaṃ atthīti sahassayāgino, tesaṃ sahassayāginaṃ. Etena dasannaṃ vā bhikkhukoṭīnaṃ dasannaṃ vā kahāpaṇakoṭīnaṃ piṇḍapāto dassito hoti. Ye ettakaṃ dadanti, te kalampi nagghanti tathāvidhassāti āha. Yvāyaṃ samuñjakaṃ carantopi dhammaṃ carati, dāraṃ posentopi, appakasmiṃ dadantopi, tathāvidhassa ete sahassayāgino kalampi nagghanti. Yaṃ tena daliddena ekapaṭivīsakamattampi salākabhattamattampi vā dinnaṃ, tassa dānassa sabbesampi tesaṃ dānaṃ kalaṃ nagghatīti. Kalaṃ nāma soḷasabhāgopi satabhāgopi sahassabhāgopi. Idha satabhāgo gahito. Yaṃ tena dānaṃ dinnaṃ, tasmiṃ satadhā vibhatte itaresaṃ dasakoṭisahassadānaṃ tato ekakoṭṭhāsampi nagghatīti āha.
ஏவங் ததா²க³தே தா³னஸ்ஸ அக்³க⁴ங் கரொந்தே ஸமீபே டி²தா தே³வதா சிந்தேஸி – ‘‘ஏவங் ப⁴க³வா மஹந்தங் தா³னங் பாதே³ன பவட்டெத்வா ரதனஸதிகே விய நரகே பக்கி²பந்தோ இத³ங் ஏவங் பரித்தகங் தா³னங் சந்த³மண்ட³லே பஹரந்தோ விய உக்கி²பதி, கத²ங் நு கோ² ஏதங் மஹப்ப²லதர’’ந்தி ஜானநத்த²ங் கா³தா²ய அஜ்ஜ²பா⁴ஸி. தத்த² கேனாதி கேன காரணேன. மஹக்³க³தோதி மஹத்தங் க³தோ, விபுலஸ்ஸேதங் வேவசனங். ஸமேன தி³ன்னஸ்ஸாதி ஸமேன தி³ன்னஸ்ஸ தா³னஸ்ஸ. அத²ஸ்ஸா ப⁴க³வா தா³னங் விப⁴ஜித்வா த³ஸ்ஸெந்தோ த³த³ந்தி ஹேகேதிஆதி³மாஹ. தத்த² விஸமே நிவிட்டா²தி விஸமே காயவசீமனோகம்மே பதிட்டி²தா ஹுத்வா. செ²த்வாதி போதெ²த்வா. வதி⁴த்வாதி மாரெத்வா. ஸோசயித்வாதி பரங் ஸோகஸமப்பிதங் கத்வா. அஸ்ஸுமுகா²தி அஸ்ஸுமுக²ஸம்மிஸ்ஸா. பரங் ரோதா³பெத்வா தி³ன்னதா³னஞ்ஹி அஸ்ஸுமுக²தா³னந்தி வுச்சதி. ஸத³ண்டா³தி த³ண்டே³ன தஜ்ஜெத்வா பஹரித்வா தி³ன்னத³க்கி²ணா ஸத³ண்டா³தி வுச்சதி. ஏவந்தி நாஹங் ஸம்மாஸம்பு³த்³த⁴தாய மஹாதா³னங் க³ஹெத்வா அப்பப²லங் நாம காதுங் ஸக்கோமி பரித்தகதா³னங் வா மஹப்ப²லங் நாம. இத³ங் பன மஹாதா³னங் அத்தனோ உப்பத்தியா அபரிஸுத்³த⁴தாய ஏவங் அப்பப²லங் நாம ஹோதி, இதரங் பரித்ததா³னங் அத்தனோ உப்பத்தியா பரிஸுத்³த⁴தாய ஏவங் மஹப்ப²லங் நாமாதி இமமத்த²ங் த³ஸ்ஸெந்தோ ஏவந்திஆதி³மாஹாதி. து³தியங்.
Evaṃ tathāgate dānassa agghaṃ karonte samīpe ṭhitā devatā cintesi – ‘‘evaṃ bhagavā mahantaṃ dānaṃ pādena pavaṭṭetvā ratanasatike viya narake pakkhipanto idaṃ evaṃ parittakaṃ dānaṃ candamaṇḍale paharanto viya ukkhipati, kathaṃ nu kho etaṃ mahapphalatara’’nti jānanatthaṃ gāthāya ajjhabhāsi. Tattha kenāti kena kāraṇena. Mahaggatoti mahattaṃ gato, vipulassetaṃ vevacanaṃ. Samena dinnassāti samena dinnassa dānassa. Athassā bhagavā dānaṃ vibhajitvā dassento dadanti heketiādimāha. Tattha visame niviṭṭhāti visame kāyavacīmanokamme patiṭṭhitā hutvā. Chetvāti pothetvā. Vadhitvāti māretvā. Socayitvāti paraṃ sokasamappitaṃ katvā. Assumukhāti assumukhasammissā. Paraṃ rodāpetvā dinnadānañhi assumukhadānanti vuccati. Sadaṇḍāti daṇḍena tajjetvā paharitvā dinnadakkhiṇā sadaṇḍāti vuccati. Evanti nāhaṃ sammāsambuddhatāya mahādānaṃ gahetvā appaphalaṃ nāma kātuṃ sakkomi parittakadānaṃ vā mahapphalaṃ nāma. Idaṃ pana mahādānaṃ attano uppattiyā aparisuddhatāya evaṃ appaphalaṃ nāma hoti, itaraṃ parittadānaṃ attano uppattiyā parisuddhatāya evaṃ mahapphalaṃ nāmāti imamatthaṃ dassento evantiādimāhāti. Dutiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 2. மச்ச²ரிஸுத்தங் • 2. Maccharisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. மச்ச²ரிஸுத்தவண்ணனா • 2. Maccharisuttavaṇṇanā
