| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
9. மச்ச²ரிஸுத்தவண்ணனா
9. Maccharisuttavaṇṇanā
49. நவமே மச்ச²ரினோதி மச்சே²ரேன ஸமன்னாக³தா. ஏகச்சோ ஹி அத்தனோ வஸனட்டா²னே பி⁴க்கு²ங் ஹத்த²ங் பஸாரெத்வாபி ந வந்த³தி, அஞ்ஞத்த² க³தோ விஹாரங் பவிஸித்வா ஸக்கச்சங் வந்தி³த்வா மது⁴ரபடிஸந்தா²ரங் கரோதி – ‘‘ப⁴ந்தே, அம்ஹாகங் வஸனட்டா²னங் நாக³ச்ச²த², ஸம்பன்னோ பதே³ஸோ, படிப³லா மயங் அய்யானங் யாகு³ப⁴த்தாதீ³ஹி உபட்டா²னங் காது’’ந்தி. பி⁴க்கூ² ‘‘ஸத்³தோ⁴ அயங் உபாஸகோ’’தி யாகு³ப⁴த்தாதீ³ஹி ஸங்க³ண்ஹந்தி. அதே²கோ தே²ரோ தஸ்ஸ கா³மங் க³ந்த்வா பிண்டா³ய சரதி. ஸோ தங் தி³ஸ்வா அஞ்ஞேன வா க³ச்ச²தி, க⁴ரங் வா பவிஸதி. ஸசேபி ஸம்முகீ²பா⁴வங் ஆக³ச்ச²தி, ஹத்தே²ன வந்தி³த்வா – ‘‘அய்யஸ்ஸ பி⁴க்க²ங் தே³த², அஹங் ஏகேன கம்மேன க³ச்சா²மீ’’தி பக்கமதி. தே²ரோ ஸகலகா³மங் சரித்வா துச்ச²பத்தோவ நிக்க²மதி. இத³ங் தாவ முது³மச்ச²ரியங் நாம, யேன ஸமன்னாக³தோ அதா³யகோபி தா³யகோ விய பஞ்ஞாயதி. இத⁴ பன த²த்³த⁴மச்ச²ரியங் அதி⁴ப்பேதங், யேன ஸமன்னாக³தோ பி⁴க்கூ²ஸு பிண்டா³ய பவிட்டே²ஸு, ‘‘தே²ரா டி²தா’’தி வுத்தே, ‘‘கிங் மய்ஹங் பாதா³ ருஜ்ஜந்தீ’’திஆதீ³னி வத்வா ஸிலாத²ம்போ⁴ விய கா²ணுகோ விய ச த²த்³தோ⁴ ஹுத்வா திட்ட²தி, ஸாமீசிம்பி ந கரோதி. கத³ரியாதி இத³ங் மச்ச²ரினோதி பத³ஸ்ஸேவ வேவசனங். முது³கம்பி ஹி மச்ச²ரியங் ‘‘மச்ச²ரிய’’ந்தேவ வுச்சதி, த²த்³த⁴ங் பன கத³ரியங் நாம. பரிபா⁴ஸகாதி பி⁴க்கூ² க⁴ரத்³வாரே டி²தே தி³ஸ்வா, ‘‘கிங் தும்ஹே கஸித்வா ஆக³தா, வபித்வா, லாயித்வா? மயங் அத்தனோபி ந லபா⁴ம, குதோ தும்ஹாகங், ஸீக⁴ங் நிக்க²மதா²’’திஆதீ³ஹி ஸங்தஜ்ஜகா. அந்தராயகராதி தா³யகஸ்ஸ ஸக்³க³ந்தராயோ, படிக்³கா³ஹகானங் லாப⁴ந்தராயோ, அத்தனோ உபகா⁴தோதி இமேஸங் அந்தராயானங் காரகா.
49. Navame maccharinoti maccherena samannāgatā. Ekacco hi attano vasanaṭṭhāne bhikkhuṃ hatthaṃ pasāretvāpi na vandati, aññattha gato vihāraṃ pavisitvā sakkaccaṃ vanditvā madhurapaṭisanthāraṃ karoti – ‘‘bhante, amhākaṃ vasanaṭṭhānaṃ nāgacchatha, sampanno padeso, paṭibalā mayaṃ ayyānaṃ yāgubhattādīhi upaṭṭhānaṃ kātu’’nti. Bhikkhū ‘‘saddho ayaṃ upāsako’’ti yāgubhattādīhi saṅgaṇhanti. Atheko thero tassa gāmaṃ gantvā piṇḍāya carati. So taṃ disvā aññena vā gacchati, gharaṃ vā pavisati. Sacepi sammukhībhāvaṃ āgacchati, hatthena vanditvā – ‘‘ayyassa bhikkhaṃ detha, ahaṃ ekena kammena gacchāmī’’ti pakkamati. Thero sakalagāmaṃ caritvā tucchapattova nikkhamati. Idaṃ tāva mudumacchariyaṃ nāma, yena samannāgato adāyakopi dāyako viya paññāyati. Idha pana thaddhamacchariyaṃ adhippetaṃ, yena samannāgato bhikkhūsu piṇḍāya paviṭṭhesu, ‘‘therā ṭhitā’’ti vutte, ‘‘kiṃ mayhaṃ pādā rujjantī’’tiādīni vatvā silāthambho viya khāṇuko viya ca thaddho hutvā tiṭṭhati, sāmīcimpi na karoti. Kadariyāti idaṃ maccharinoti padasseva vevacanaṃ. Mudukampi hi macchariyaṃ ‘‘macchariya’’nteva vuccati, thaddhaṃ pana kadariyaṃ nāma. Paribhāsakāti bhikkhū gharadvāre ṭhite disvā, ‘‘kiṃ tumhe kasitvā āgatā, vapitvā, lāyitvā? Mayaṃ attanopi na labhāma, kuto tumhākaṃ, sīghaṃ nikkhamathā’’tiādīhi saṃtajjakā. Antarāyakarāti dāyakassa saggantarāyo, paṭiggāhakānaṃ lābhantarāyo, attano upaghātoti imesaṃ antarāyānaṃ kārakā.
ஸம்பராயோதி பரலோகோ. ரதீதி பஞ்சகாமகு³ணரதி. கி²ட்³டா³தி காயிககி²ட்³டா³தி³கா திவிதா⁴ கி²ட்³டா³. தி³ட்டே² த⁴ம்மேஸ விபாகோதி தஸ்மிங் நிப்³ப³த்தப⁴வனே தி³ட்டே² த⁴ம்மே ஏஸ விபாகோ. ஸம்பராயே ச து³க்³க³தீதி ‘‘யமலோகங் உபபஜ்ஜரே’’தி வுத்தே ஸம்பராயே ச து³க்³க³தி.
Samparāyoti paraloko. Ratīti pañcakāmaguṇarati. Khiḍḍāti kāyikakhiḍḍādikā tividhā khiḍḍā. Diṭṭhe dhammesa vipākoti tasmiṃ nibbattabhavane diṭṭhe dhamme esa vipāko. Samparāye ca duggatīti ‘‘yamalokaṃ upapajjare’’ti vutte samparāye ca duggati.
வத³ஞ்ஞூதி பி⁴க்கூ² க⁴ரத்³வாரே டி²தா கிஞ்சாபி துண்ஹீவ ஹொந்தி, அத்த²தோ பன – ‘‘பி⁴க்க²ங் தே³தா²’’தி வத³ந்தி நாம. தத்ர யே ‘‘மயங் பசாம, இமே பன ந பசந்தி, பசமானே பத்வா அலப⁴ந்தா குஹிங் லபி⁴ஸ்ஸந்தீ’’தி? தெ³ய்யத⁴ம்மங் ஸங்விப⁴ஜந்தி, தே வத³ஞ்ஞூ நாம. பகாஸந்தீதி விமானப்பபா⁴ய ஜோதந்தி. பரஸம்ப⁴தேஸூதி பரேஹி ஸம்பிண்டி³தேஸு. ஸம்பராயே ச ஸுக்³க³தீதி, ‘‘ஏதே ஸக்³கா³’’தி ஏவங் வுத்தஸம்பராயே ஸுக³தி. உபி⁴ன்னம்பி வா ஏதேஸங் ததோ சவித்வா புன ஸம்பராயேபி து³க்³க³திஸுக³தியேவ ஹோதீதி. நவமங்.
Vadaññūti bhikkhū gharadvāre ṭhitā kiñcāpi tuṇhīva honti, atthato pana – ‘‘bhikkhaṃ dethā’’ti vadanti nāma. Tatra ye ‘‘mayaṃ pacāma, ime pana na pacanti, pacamāne patvā alabhantā kuhiṃ labhissantī’’ti? Deyyadhammaṃ saṃvibhajanti, te vadaññū nāma. Pakāsantīti vimānappabhāya jotanti. Parasambhatesūti parehi sampiṇḍitesu. Samparāye ca suggatīti, ‘‘ete saggā’’ti evaṃ vuttasamparāye sugati. Ubhinnampi vā etesaṃ tato cavitvā puna samparāyepi duggatisugatiyeva hotīti. Navamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. மச்ச²ரிஸுத்தங் • 9. Maccharisuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. மச்ச²ரிஸுத்தவண்ணனா • 9. Maccharisuttavaṇṇanā
