| Library / Tipiṭaka / д̇ибидага • Tipiṭaka / сам̣яуд̇д̇анигааяа (дийгаа) • Saṃyuttanikāya (ṭīkā) |
2. мажчарисуд̇д̇аван̣н̣анаа
2. Maccharisuttavaṇṇanā
32. бамаж̇ж̇анаагаарзна бавад̇д̇аа анубалад̣̇д̇хи бамаад̣̇о. д̇зна зганд̇ад̇о сад̇ирахид̇аа хонд̇ийд̇и вуд̇д̇ам̣ ‘‘сад̇ивиббаваасалагкан̣знаа’’д̇и. д̣̇идтивижигижчаад̣̇аяо жзд̇т̇а бамаад̣̇знзва сан̇г̇ахид̇аа. ид̣̇аани яат̇аа мажчарияанимид̇д̇ан̃жа бамаад̣̇анимид̇д̇ан̃жа д̣̇аанам̣ на д̣̇ийяад̇и, д̇ам̣ д̣̇ассзд̇ум̣ ‘‘згажжо хий’’д̇иаад̣̇и вуд̇д̇ам̣. баригкаяам̣ г̇амиссад̇ийд̇и бхог̇абарихааним̣ г̇амиссад̇и. кид̣д̣аад̣̇ийд̇и аад̣̇и-сад̣̇д̣̇зна ман̣д̣анавибхуусаначан̣анагкад̇д̇агижжаб̣яасанаад̣̇им̣ сан̇г̇ан̣хаад̇и. яасад̣̇ааяаганд̇и гид̇д̇ияасасса бариваараяасасса жа д̣̇ааяагам̣. сирийд̣̇ааяаганд̇и собхаг̇г̇ад̣̇ааяагам̣. самбад̇д̇ид̣̇ааяаганд̇и гулабхог̇аруубабхог̇асамбад̣̇аахи самбад̇д̇ид̣̇ааяагам̣. бун̃н̃анд̇и ваа ид̇ха бун̃н̃апалам̣ д̣̇адтаб̣б̣ам̣ ‘‘звамид̣̇ам̣ бун̃н̃ам̣ бавад̣дхад̇ий’’д̇иаад̣̇ийсу (д̣̇ий. ни. 3.80) вияа. ад̇т̇и д̣̇аанасса паланд̇и зд̇т̇а д̣̇зяяад̇хаммасса анавадтид̇ад̇ам̣ б̣ахуласаад̇хааран̣ад̇ам̣, д̇ам̣ бахааяа г̇аманийяад̇ам̣ , д̇аб̣б̣исаяааяа бийд̇ияаа сааваж̇ж̇ад̇ам̣, д̣̇аанад̇хаммасса анан̃н̃асаад̇хааран̣ад̇ам̣ ануг̇аамигад̇ам̣, д̇аб̣б̣исаяааяа бийд̇ияаа анаваж̇ж̇ад̇ам̣, лобхаад̣̇ибаабад̇хаммаанам̣ винод̣̇анам̣, сзсабун̃н̃аанам̣ убаниссаяан̃жа ж̇аананд̇знаад̇и вад̇д̇аб̣б̣ам̣.
32. Pamajjanākārena pavattā anupaladdhi pamādo. Tena ekantato satirahitā hontīti vuttaṃ ‘‘sativippavāsalakkhaṇenā’’ti. Diṭṭhivicikicchādayo cettha pamādeneva saṅgahitā. Idāni yathā macchariyanimittañca pamādanimittañca dānaṃ na dīyati, taṃ dassetuṃ ‘‘ekacco hī’’tiādi vuttaṃ. Parikkhayaṃ gamissatīti bhogaparihāniṃ gamissati. Khiḍḍādīti ādi-saddena maṇḍanavibhūsanachaṇanakkhattakiccabyasanādiṃ saṅgaṇhāti. Yasadāyakanti kittiyasassa parivārayasassa ca dāyakaṃ. Sirīdāyakanti sobhaggadāyakaṃ. Sampattidāyakanti kulabhogarūpabhogasampadāhi sampattidāyakaṃ. Puññanti vā idha puññaphalaṃ daṭṭhabbaṃ ‘‘evamidaṃ puññaṃ pavaḍḍhatī’’tiādīsu (dī. ni. 3.80) viya. Atthi dānassa phalanti ettha deyyadhammassa anavaṭṭhitataṃ bahulasādhāraṇataṃ, taṃ pahāya gamanīyataṃ , tabbisayāya pītiyā sāvajjataṃ, dānadhammassa anaññasādhāraṇataṃ anugāmikataṃ, tabbisayāya pītiyā anavajjataṃ, lobhādipāpadhammānaṃ vinodanaṃ, sesapuññānaṃ upanissayañca jānantenāti vattabbaṃ.
д̇ам̣язва б̣ааланд̇и яо мажчарий, д̇амзва. ад̣̇аанасийлаа б̣аалаа. згажжо д̇ханасса барибхог̇абаригкаяабхаязна ад̇д̇анааби на барибхун̃ж̇ад̇и ад̇илобхасздти вияаад̇и ааха ‘‘ид̇халогабаралогзсуу’’д̇и.
Taṃyeva bālanti yo maccharī, tameva. Adānasīlā bālā. Ekacco dhanassa paribhogaparikkhayabhayena attanāpi na paribhuñjati atilobhaseṭṭhi viyāti āha ‘‘idhalokaparalokesū’’ti.
яасмаа згажжо ад̣̇аанасийло бурисо ад̣̇д̇хигз д̣̇исваа бассанд̇оби на бассад̇и, д̇зсам̣ гат̇ам̣ сун̣анд̇оби на сун̣од̇и, саяам̣ гин̃жи на гат̇зд̇и, ад̣̇аад̇угамяад̇аат̇амбхз б̣ад̣̇д̇хо ход̇и, д̇асмаа д̇ад̇т̇а мад̇алин̇г̇аани убалаб̣бханд̇иязваад̇и ааха ‘‘ад̣̇аанасийлад̇ааяа маран̣зна мад̇зсуу’’д̇и. адтагат̇ааяам̣ бана д̣̇аанамад̇д̇амзва г̇ахзд̇ваа мад̇знасса самад̇ам̣ д̣̇ассзд̇ум̣ ‘‘яат̇аа хий’’д̇иаад̣̇и вуд̇д̇ам̣. д̣̇аанасийласса бана амад̇алин̇г̇аани вуд̇д̇авибарияааяад̇о взд̣̇ид̇аб̣б̣аани. важ̇анд̇и бут̇уд̇д̇з згаважанам̣, д̇асмаа важанавибаллаасзна вуд̇д̇анд̇и ааха ‘‘саха важ̇анд̇аа’’д̇и. д̣̇аанасийлаад̣̇ид̇хаммо бураад̇ано, на аж̇ж̇ад̇анод̇и сананд̇ано, со зд̇зсу ад̇т̇ийд̇и сананд̇анаа, бан̣д̣ид̇аа, д̇зсам̣ д̇хаммаад̇и д̇зсам̣ васзнаби д̇хаммо сананд̇анод̇и ааха ‘‘сананд̇анаанам̣ ваа бан̣д̣ид̇аанам̣ зса д̇хаммо’’д̇и. аббасмимби д̣̇зяяад̇хаммз сад̇и згз д̣̇аанам̣ д̣̇ад̣̇анд̇и, згз на д̣̇ад̣̇анд̇и мажчарибхааваа. сахассад̣̇аанасад̣̇исаад̇и згааби д̣̇агкин̣аа барижжааг̇ажзд̇анааяа ул̣аарабхаавад̇о сахассад̣̇аанасад̣̇исаа ход̇и.
Yasmā ekacco adānasīlo puriso addhike disvā passantopi na passati, tesaṃ kathaṃ suṇantopi na suṇoti, sayaṃ kiñci na katheti, adātukamyatāthambhe baddho hoti, tasmā tattha mataliṅgāni upalabbhantiyevāti āha ‘‘adānasīlatāya maraṇena matesū’’ti. Aṭṭhakathāyaṃ pana dānamattameva gahetvā matenassa samataṃ dassetuṃ ‘‘yathā hī’’tiādi vuttaṃ. Dānasīlassa pana amataliṅgāni vuttavipariyāyato veditabbāni. Vajanti puthutte ekavacanaṃ, tasmā vacanavipallāsena vuttanti āha ‘‘saha vajantā’’ti. Dānasīlādidhammo purātano, na ajjatanoti sanantano, so etesu atthīti sanantanā, paṇḍitā, tesaṃ dhammāti tesaṃ vasenapi dhammo sanantanoti āha ‘‘sanantanānaṃ vā paṇḍitānaṃ esa dhammo’’ti. Appasmimpi deyyadhamme sati eke dānaṃ dadanti, eke na dadanti maccharibhāvā. Sahassadānasadisāti ekāpi dakkhiṇā pariccāgacetanāya uḷārabhāvato sahassadānasadisā hoti.
д̣̇урануг̇аманод̇и асаман̇г̇инаа ануг̇анд̇ум̣ д̣̇уггаро. анануг̇аманан̃жасса д̇хаммасса абууран̣амзваад̇и ааха ‘‘д̣̇уббууро’’д̇и. ‘‘д̇хаммам̣ жарз’’д̇и аяам̣ д̇хаммажарияаа г̇ахадтасса васзна аарад̣̇д̇хаад̇и ааха ‘‘д̣̇асагусалагаммабат̇ад̇хаммам̣ жарад̇ий’’д̇и. д̇знааха ‘‘д̣̇ааран̃жа боса’’нд̇и. самун̃ж̇аганд̇и гассагзхи ад̇д̇анаа гаад̇аб̣б̣ам̣ гад̇ваа висадтад̇хан̃н̃агаран̣ад̇о калз ун̃чаажарияавасзна самун̃ж̇аниаад̣̇инаа чад̣д̣ид̇ад̇хан̃н̃асам̣харан̣ам̣. д̇знааха ‘‘яо аби…бз… самун̃ж̇агам̣ жарад̇ий’’д̇и. зд̇знаад̇и сад̇асахассасахассаяааг̇иг̇г̇ахан̣зна д̣̇асаннамби бхигкугодийнам̣ бин̣д̣абаад̇о д̣̇ассид̇о ход̇и. ‘‘д̣̇инно’’д̇и бад̣̇ам̣ аанзд̇ваа яож̇анаа. д̣̇асаннам̣ ваа гахаабан̣агодийнам̣ бин̣д̣абаад̇од̇и д̣̇асаннам̣ гахаабан̣агодийнам̣ винияун̃ж̇анавасзна самбаад̣̇ид̇абин̣д̣абаад̇о. д̇аяид̣̇ам̣ сад̇асахассам̣ сахассаяааг̇ийнам̣ д̣̇аанам̣ зд̇д̇агам̣ ход̇ийд̇и гад̇ваа вуд̇д̇ам̣. самун̃ж̇агам̣ жаранд̇обийд̇и самун̃ж̇агам̣ жарид̇вааби, самун̃ж̇агажаран̣ахзд̇ууд̇и ад̇т̇о. сзсабад̣̇ад̣̇ваязби зсзва наяо. д̣̇аарам̣ босзнд̇оби д̇хаммам̣ жарад̇и, аббагасмим̣ д̣̇ад̣̇анд̇оби д̇хаммам̣ жарад̇ийд̇и яож̇анаа. д̇ат̇аавид̇хассаад̇и д̇аад̣̇исасса д̇ат̇аад̇хаммажаарино яаа д̇хаммажарияаа, д̇ассаа галамби наг̇гханд̇и зд̇з сахассаяааг̇ино ад̇д̇ано сахассаяааг̇ид̇ааяа. яам̣ д̇зна д̣̇алид̣̇д̣̇знаад̇иаад̣̇и д̇ассзвад̇т̇асса виваран̣ам̣. саб̣б̣зсамби д̇зсанд̇и ‘‘сад̇ам̣сахассаанам̣ сахассаяааг̇ина’’нд̇и вуд̇д̇аанам̣ д̇зсам̣ саб̣б̣зсамби. ид̇арзсанд̇и ‘‘д̇ат̇аавид̇хассаа’’д̇и вуд̇д̇абурисад̇о ан̃н̃зсам̣. д̣̇асагодисахассад̣̇аананд̇и д̣̇асагодисан̇каад̇ам̣ д̇ад̇о анзгасахассабхзд̣̇ад̇ааяа сахассад̣̇аанам̣.
Duranugamanoti asamaṅginā anugantuṃ dukkaro. Ananugamanañcassa dhammassa apūraṇamevāti āha ‘‘duppūro’’ti. ‘‘Dhammaṃ care’’ti ayaṃ dhammacariyā gahaṭṭhassa vasena āraddhāti āha ‘‘dasakusalakammapathadhammaṃ caratī’’ti. Tenāha ‘‘dārañca posa’’nti. Samuñjakanti kassakehi attanā kātabbaṃ katvā visaṭṭhadhaññakaraṇato khale uñchācariyavasena samuñjaniādinā chaḍḍitadhaññasaṃharaṇaṃ. Tenāha ‘‘yo api…pe… samuñjakaṃ caratī’’ti. Etenāti satasahassasahassayāgiggahaṇena dasannampi bhikkhukoṭīnaṃ piṇḍapāto dassito hoti. ‘‘Dinno’’ti padaṃ ānetvā yojanā. Dasannaṃ vā kahāpaṇakoṭīnaṃ piṇḍapātoti dasannaṃ kahāpaṇakoṭīnaṃ viniyuñjanavasena sampāditapiṇḍapāto. Tayidaṃ satasahassaṃ sahassayāgīnaṃ dānaṃ ettakaṃ hotīti katvā vuttaṃ. Samuñjakaṃ carantopīti samuñjakaṃ caritvāpi, samuñjakacaraṇahetūti attho. Sesapadadvayepi eseva nayo. Dāraṃ posentopi dhammaṃ carati, appakasmiṃ dadantopi dhammaṃ caratīti yojanā. Tathāvidhassāti tādisassa tathādhammacārino yā dhammacariyā, tassā kalampi nagghanti ete sahassayāgino attano sahassayāgitāya. Yaṃ tena daliddenātiādi tassevatthassa vivaraṇaṃ. Sabbesampi tesanti ‘‘sataṃsahassānaṃ sahassayāgina’’nti vuttānaṃ tesaṃ sabbesampi. Itaresanti ‘‘tathāvidhassā’’ti vuttapurisato aññesaṃ. Dasakoṭisahassadānanti dasakoṭisaṅkhātaṃ tato anekasahassabhedatāya sahassadānaṃ.
‘‘галам̣ наг̇гхад̇ий’’д̇и ид̣̇ам̣ д̇зсам̣ д̣̇аанад̇о имасса д̣̇аанасса ул̣аарад̇арабхаавзна вибулад̇арабхаавзна вибулад̇арапалад̇ааяа вуд̇д̇анд̇и ааха ‘‘гат̇ам̣ ну ко зд̇ам̣ махабпалад̇аранд̇и ж̇аананад̇т̇а’’нд̇и. бажжаяависзсзна махад̇д̇ам̣ г̇ад̇од̇и махаг̇г̇ад̇о, ул̣аарод̇и ад̇т̇о. д̇знааха ‘‘вибулассзд̇ам̣ взважана’’нд̇и. самзнаад̇и н̃ааязна, д̇хаммзнаад̇и ад̇т̇о. висамзд̇и на самз мажчарияалагкан̣аббад̇д̇з. чзд̇ваад̇и бийл̣зд̇ваа. д̇ам̣ бана бийл̣анам̣ бот̇ананд̇и д̣̇ассзнд̇о ‘‘бот̇зд̇ваа’’д̇и ааха. ассумукаад̇и д̇инд̇аассумукасаммиссаа барам̣ род̣̇аабзд̇ваа. махаад̣̇аананд̇и яат̇аавуд̇д̇ам̣ б̣ахуд̣̇зяяад̇хаммасса барижжаж̇анзна маханд̇ад̣̇аанам̣. уббад̇д̇ияаа абарисуд̣̇д̇хад̇ааяаад̇и аж̇жхаасаяасса д̣̇зяяад̇хаммаг̇авзсанааяа жа суд̣̇д̇хад̇ааяа малийнад̇д̇аа. ид̇арам̣ д̇хаммажарияааяа ниб̣б̣ад̇д̇ид̇ад̣̇аанам̣. барид̇д̇ад̣̇аананд̇и барид̇д̇асса д̣̇зяяад̇хаммасса васзна барид̇д̇ад̣̇аанам̣. ад̇д̇ано уббад̇д̇ияаа барисуд̣̇д̇хад̇ааяаад̇и аж̇жхаасаяасса д̣̇зяяад̇хаммаг̇авзсанааяа жа висуд̣̇д̇хад̇ааяа. званд̇иаад̣̇имаахаад̇и ‘‘звам̣ сахассаанам̣ сахассаяааг̇ина’’нд̇и авожа. д̇ад̇т̇а сахассаананд̇и сад̇ам̣сахассаанам̣. г̇аат̇ааб̣анд̇хасукад̇т̇ам̣ сад̇аг̇г̇ахан̣ам̣ на гад̇ам̣. сзсам̣ вуд̇д̇анаяамзва.
‘‘Kalaṃ nagghatī’’ti idaṃ tesaṃ dānato imassa dānassa uḷāratarabhāvena vipulatarabhāvena vipulataraphalatāya vuttanti āha ‘‘kathaṃ nu kho etaṃ mahapphalataranti jānanattha’’nti. Paccayavisesena mahattaṃ gatoti mahaggato, uḷāroti attho. Tenāha ‘‘vipulassetaṃ vevacana’’nti. Samenāti ñāyena, dhammenāti attho. Visameti na same macchariyalakkhaṇappatte. Chetvāti pīḷetvā. Taṃ pana pīḷanaṃ pothananti dassento ‘‘pothetvā’’ti āha. Assumukhāti tintaassumukhasammissā paraṃ rodāpetvā. Mahādānanti yathāvuttaṃ bahudeyyadhammassa pariccajanena mahantadānaṃ. Uppattiyā aparisuddhatāyāti ajjhāsayassa deyyadhammagavesanāya ca suddhatāya malīnattā. Itaraṃ dhammacariyāya nibbattitadānaṃ. Parittadānanti parittassa deyyadhammassa vasena parittadānaṃ. Attano uppattiyā parisuddhatāyāti ajjhāsayassa deyyadhammagavesanāya ca visuddhatāya. Evantiādimāhāti ‘‘evaṃ sahassānaṃ sahassayāgina’’nti avoca. Tattha sahassānanti sataṃsahassānaṃ. Gāthābandhasukhatthaṃ sataggahaṇaṃ na kataṃ. Sesaṃ vuttanayameva.
мажчарисуд̇д̇аван̣н̣анаа нидтид̇аа.
Maccharisuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / сам̣яуд̇д̇анигааяа • Saṃyuttanikāya / 2. мажчарисуд̇д̇ам̣ • 2. Maccharisuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 2. мажчарисуд̇д̇аван̣н̣анаа • 2. Maccharisuttavaṇṇanā
