| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) |
੨. ਮਚ੍ਛਰਿਸੁਤ੍ਤવਣ੍ਣਨਾ
2. Maccharisuttavaṇṇanā
੩੨. ਪਮਜ੍ਜਨਾਕਾਰੇਨ ਪવਤ੍ਤਾ ਅਨੁਪਲਦ੍ਧਿ ਪਮਾਦੋ। ਤੇਨ ਏਕਨ੍ਤਤੋ ਸਤਿਰਹਿਤਾ ਹੋਨ੍ਤੀਤਿ વੁਤ੍ਤਂ ‘‘ਸਤਿવਿਪ੍ਪવਾਸਲਕ੍ਖਣੇਨਾ’’ਤਿ। ਦਿਟ੍ਠਿવਿਚਿਕਿਚ੍ਛਾਦਯੋ ਚੇਤ੍ਥ ਪਮਾਦੇਨੇવ ਸਙ੍ਗਹਿਤਾ। ਇਦਾਨਿ ਯਥਾ ਮਚ੍ਛਰਿਯਨਿਮਿਤ੍ਤਞ੍ਚ ਪਮਾਦਨਿਮਿਤ੍ਤਞ੍ਚ ਦਾਨਂ ਨ ਦੀਯਤਿ, ਤਂ ਦਸ੍ਸੇਤੁਂ ‘‘ਏਕਚ੍ਚੋ ਹੀ’’ਤਿਆਦਿ વੁਤ੍ਤਂ। ਪਰਿਕ੍ਖਯਂ ਗਮਿਸ੍ਸਤੀਤਿ ਭੋਗਪਰਿਹਾਨਿਂ ਗਮਿਸ੍ਸਤਿ। ਖਿਡ੍ਡਾਦੀਤਿ ਆਦਿ-ਸਦ੍ਦੇਨ ਮਣ੍ਡਨવਿਭੂਸਨਛਣਨਕ੍ਖਤ੍ਤਕਿਚ੍ਚਬ੍ਯਸਨਾਦਿਂ ਸਙ੍ਗਣ੍ਹਾਤਿ। ਯਸਦਾਯਕਨ੍ਤਿ ਕਿਤ੍ਤਿਯਸਸ੍ਸ ਪਰਿવਾਰਯਸਸ੍ਸ ਚ ਦਾਯਕਂ। ਸਿਰੀਦਾਯਕਨ੍ਤਿ ਸੋਭਗ੍ਗਦਾਯਕਂ। ਸਮ੍ਪਤ੍ਤਿਦਾਯਕਨ੍ਤਿ ਕੁਲਭੋਗਰੂਪਭੋਗਸਮ੍ਪਦਾਹਿ ਸਮ੍ਪਤ੍ਤਿਦਾਯਕਂ। ਪੁਞ੍ਞਨ੍ਤਿ વਾ ਇਧ ਪੁਞ੍ਞਫਲਂ ਦਟ੍ਠਬ੍ਬਂ ‘‘ਏવਮਿਦਂ ਪੁਞ੍ਞਂ ਪવਡ੍ਢਤੀ’’ਤਿਆਦੀਸੁ (ਦੀ॰ ਨਿ॰ ੩.੮੦) વਿਯ। ਅਤ੍ਥਿ ਦਾਨਸ੍ਸ ਫਲਨ੍ਤਿ ਏਤ੍ਥ ਦੇਯ੍ਯਧਮ੍ਮਸ੍ਸ ਅਨવਟ੍ਠਿਤਤਂ ਬਹੁਲਸਾਧਾਰਣਤਂ, ਤਂ ਪਹਾਯ ਗਮਨੀਯਤਂ , ਤਬ੍ਬਿਸਯਾਯ ਪੀਤਿਯਾ ਸਾવਜ੍ਜਤਂ, ਦਾਨਧਮ੍ਮਸ੍ਸ ਅਨਞ੍ਞਸਾਧਾਰਣਤਂ ਅਨੁਗਾਮਿਕਤਂ, ਤਬ੍ਬਿਸਯਾਯ ਪੀਤਿਯਾ ਅਨવਜ੍ਜਤਂ, ਲੋਭਾਦਿਪਾਪਧਮ੍ਮਾਨਂ વਿਨੋਦਨਂ, ਸੇਸਪੁਞ੍ਞਾਨਂ ਉਪਨਿਸ੍ਸਯਞ੍ਚ ਜਾਨਨ੍ਤੇਨਾਤਿ વਤ੍ਤਬ੍ਬਂ।
32. Pamajjanākārena pavattā anupaladdhi pamādo. Tena ekantato satirahitā hontīti vuttaṃ ‘‘sativippavāsalakkhaṇenā’’ti. Diṭṭhivicikicchādayo cettha pamādeneva saṅgahitā. Idāni yathā macchariyanimittañca pamādanimittañca dānaṃ na dīyati, taṃ dassetuṃ ‘‘ekacco hī’’tiādi vuttaṃ. Parikkhayaṃ gamissatīti bhogaparihāniṃ gamissati. Khiḍḍādīti ādi-saddena maṇḍanavibhūsanachaṇanakkhattakiccabyasanādiṃ saṅgaṇhāti. Yasadāyakanti kittiyasassa parivārayasassa ca dāyakaṃ. Sirīdāyakanti sobhaggadāyakaṃ. Sampattidāyakanti kulabhogarūpabhogasampadāhi sampattidāyakaṃ. Puññanti vā idha puññaphalaṃ daṭṭhabbaṃ ‘‘evamidaṃ puññaṃ pavaḍḍhatī’’tiādīsu (dī. ni. 3.80) viya. Atthi dānassa phalanti ettha deyyadhammassa anavaṭṭhitataṃ bahulasādhāraṇataṃ, taṃ pahāya gamanīyataṃ , tabbisayāya pītiyā sāvajjataṃ, dānadhammassa anaññasādhāraṇataṃ anugāmikataṃ, tabbisayāya pītiyā anavajjataṃ, lobhādipāpadhammānaṃ vinodanaṃ, sesapuññānaṃ upanissayañca jānantenāti vattabbaṃ.
ਤਂਯੇવ ਬਾਲਨ੍ਤਿ ਯੋ ਮਚ੍ਛਰੀ, ਤਮੇવ। ਅਦਾਨਸੀਲਾ ਬਾਲਾ। ਏਕਚ੍ਚੋ ਧਨਸ੍ਸ ਪਰਿਭੋਗਪਰਿਕ੍ਖਯਭਯੇਨ ਅਤ੍ਤਨਾਪਿ ਨ ਪਰਿਭੁਞ੍ਜਤਿ ਅਤਿਲੋਭਸੇਟ੍ਠਿ વਿਯਾਤਿ ਆਹ ‘‘ਇਧਲੋਕਪਰਲੋਕੇਸੂ’’ਤਿ।
Taṃyeva bālanti yo maccharī, tameva. Adānasīlā bālā. Ekacco dhanassa paribhogaparikkhayabhayena attanāpi na paribhuñjati atilobhaseṭṭhi viyāti āha ‘‘idhalokaparalokesū’’ti.
ਯਸ੍ਮਾ ਏਕਚ੍ਚੋ ਅਦਾਨਸੀਲੋ ਪੁਰਿਸੋ ਅਦ੍ਧਿਕੇ ਦਿਸ੍વਾ ਪਸ੍ਸਨ੍ਤੋਪਿ ਨ ਪਸ੍ਸਤਿ, ਤੇਸਂ ਕਥਂ ਸੁਣਨ੍ਤੋਪਿ ਨ ਸੁਣੋਤਿ, ਸਯਂ ਕਿਞ੍ਚਿ ਨ ਕਥੇਤਿ, ਅਦਾਤੁਕਮ੍ਯਤਾਥਮ੍ਭੇ ਬਦ੍ਧੋ ਹੋਤਿ, ਤਸ੍ਮਾ ਤਤ੍ਥ ਮਤਲਿਙ੍ਗਾਨਿ ਉਪਲਬ੍ਭਨ੍ਤਿਯੇવਾਤਿ ਆਹ ‘‘ਅਦਾਨਸੀਲਤਾਯ ਮਰਣੇਨ ਮਤੇਸੂ’’ਤਿ। ਅਟ੍ਠਕਥਾਯਂ ਪਨ ਦਾਨਮਤ੍ਤਮੇવ ਗਹੇਤ੍વਾ ਮਤੇਨਸ੍ਸ ਸਮਤਂ ਦਸ੍ਸੇਤੁਂ ‘‘ਯਥਾ ਹੀ’’ਤਿਆਦਿ વੁਤ੍ਤਂ। ਦਾਨਸੀਲਸ੍ਸ ਪਨ ਅਮਤਲਿਙ੍ਗਾਨਿ વੁਤ੍ਤવਿਪਰਿਯਾਯਤੋ વੇਦਿਤਬ੍ਬਾਨਿ। વਜਨ੍ਤਿ ਪੁਥੁਤ੍ਤੇ ਏਕવਚਨਂ, ਤਸ੍ਮਾ વਚਨવਿਪਲ੍ਲਾਸੇਨ વੁਤ੍ਤਨ੍ਤਿ ਆਹ ‘‘ਸਹ વਜਨ੍ਤਾ’’ਤਿ। ਦਾਨਸੀਲਾਦਿਧਮ੍ਮੋ ਪੁਰਾਤਨੋ, ਨ ਅਜ੍ਜਤਨੋਤਿ ਸਨਨ੍ਤਨੋ, ਸੋ ਏਤੇਸੁ ਅਤ੍ਥੀਤਿ ਸਨਨ੍ਤਨਾ, ਪਣ੍ਡਿਤਾ, ਤੇਸਂ ਧਮ੍ਮਾਤਿ ਤੇਸਂ વਸੇਨਪਿ ਧਮ੍ਮੋ ਸਨਨ੍ਤਨੋਤਿ ਆਹ ‘‘ਸਨਨ੍ਤਨਾਨਂ વਾ ਪਣ੍ਡਿਤਾਨਂ ਏਸ ਧਮ੍ਮੋ’’ਤਿ। ਅਪ੍ਪਸ੍ਮਿਮ੍ਪਿ ਦੇਯ੍ਯਧਮ੍ਮੇ ਸਤਿ ਏਕੇ ਦਾਨਂ ਦਦਨ੍ਤਿ, ਏਕੇ ਨ ਦਦਨ੍ਤਿ ਮਚ੍ਛਰਿਭਾવਾ। ਸਹਸ੍ਸਦਾਨਸਦਿਸਾਤਿ ਏਕਾਪਿ ਦਕ੍ਖਿਣਾ ਪਰਿਚ੍ਚਾਗਚੇਤਨਾਯ ਉਲ਼ਾਰਭਾવਤੋ ਸਹਸ੍ਸਦਾਨਸਦਿਸਾ ਹੋਤਿ।
Yasmā ekacco adānasīlo puriso addhike disvā passantopi na passati, tesaṃ kathaṃ suṇantopi na suṇoti, sayaṃ kiñci na katheti, adātukamyatāthambhe baddho hoti, tasmā tattha mataliṅgāni upalabbhantiyevāti āha ‘‘adānasīlatāya maraṇena matesū’’ti. Aṭṭhakathāyaṃ pana dānamattameva gahetvā matenassa samataṃ dassetuṃ ‘‘yathā hī’’tiādi vuttaṃ. Dānasīlassa pana amataliṅgāni vuttavipariyāyato veditabbāni. Vajanti puthutte ekavacanaṃ, tasmā vacanavipallāsena vuttanti āha ‘‘saha vajantā’’ti. Dānasīlādidhammo purātano, na ajjatanoti sanantano, so etesu atthīti sanantanā, paṇḍitā, tesaṃ dhammāti tesaṃ vasenapi dhammo sanantanoti āha ‘‘sanantanānaṃ vā paṇḍitānaṃ esa dhammo’’ti. Appasmimpi deyyadhamme sati eke dānaṃ dadanti, eke na dadanti maccharibhāvā. Sahassadānasadisāti ekāpi dakkhiṇā pariccāgacetanāya uḷārabhāvato sahassadānasadisā hoti.
ਦੁਰਨੁਗਮਨੋਤਿ ਅਸਮਙ੍ਗਿਨਾ ਅਨੁਗਨ੍ਤੁਂ ਦੁਕ੍ਕਰੋ। ਅਨਨੁਗਮਨਞ੍ਚਸ੍ਸ ਧਮ੍ਮਸ੍ਸ ਅਪੂਰਣਮੇવਾਤਿ ਆਹ ‘‘ਦੁਪ੍ਪੂਰੋ’’ਤਿ। ‘‘ਧਮ੍ਮਂ ਚਰੇ’’ਤਿ ਅਯਂ ਧਮ੍ਮਚਰਿਯਾ ਗਹਟ੍ਠਸ੍ਸ વਸੇਨ ਆਰਦ੍ਧਾਤਿ ਆਹ ‘‘ਦਸਕੁਸਲਕਮ੍ਮਪਥਧਮ੍ਮਂ ਚਰਤੀ’’ਤਿ। ਤੇਨਾਹ ‘‘ਦਾਰਞ੍ਚ ਪੋਸ’’ਨ੍ਤਿ। ਸਮੁਞ੍ਜਕਨ੍ਤਿ ਕਸ੍ਸਕੇਹਿ ਅਤ੍ਤਨਾ ਕਾਤਬ੍ਬਂ ਕਤ੍વਾ વਿਸਟ੍ਠਧਞ੍ਞਕਰਣਤੋ ਖਲੇ ਉਞ੍ਛਾਚਰਿਯવਸੇਨ ਸਮੁਞ੍ਜਨਿਆਦਿਨਾ ਛਡ੍ਡਿਤਧਞ੍ਞਸਂਹਰਣਂ। ਤੇਨਾਹ ‘‘ਯੋ ਅਪਿ…ਪੇ॰… ਸਮੁਞ੍ਜਕਂ ਚਰਤੀ’’ਤਿ। ਏਤੇਨਾਤਿ ਸਤਸਹਸ੍ਸਸਹਸ੍ਸਯਾਗਿਗ੍ਗਹਣੇਨ ਦਸਨ੍ਨਮ੍ਪਿ ਭਿਕ੍ਖੁਕੋਟੀਨਂ ਪਿਣ੍ਡਪਾਤੋ ਦਸ੍ਸਿਤੋ ਹੋਤਿ। ‘‘ਦਿਨ੍ਨੋ’’ਤਿ ਪਦਂ ਆਨੇਤ੍વਾ ਯੋਜਨਾ। ਦਸਨ੍ਨਂ વਾ ਕਹਾਪਣਕੋਟੀਨਂ ਪਿਣ੍ਡਪਾਤੋਤਿ ਦਸਨ੍ਨਂ ਕਹਾਪਣਕੋਟੀਨਂ વਿਨਿਯੁਞ੍ਜਨવਸੇਨ ਸਮ੍ਪਾਦਿਤਪਿਣ੍ਡਪਾਤੋ। ਤਯਿਦਂ ਸਤਸਹਸ੍ਸਂ ਸਹਸ੍ਸਯਾਗੀਨਂ ਦਾਨਂ ਏਤ੍ਤਕਂ ਹੋਤੀਤਿ ਕਤ੍વਾ વੁਤ੍ਤਂ। ਸਮੁਞ੍ਜਕਂ ਚਰਨ੍ਤੋਪੀਤਿ ਸਮੁਞ੍ਜਕਂ ਚਰਿਤ੍વਾਪਿ, ਸਮੁਞ੍ਜਕਚਰਣਹੇਤੂਤਿ ਅਤ੍ਥੋ। ਸੇਸਪਦਦ੍વਯੇਪਿ ਏਸੇવ ਨਯੋ। ਦਾਰਂ ਪੋਸੇਨ੍ਤੋਪਿ ਧਮ੍ਮਂ ਚਰਤਿ, ਅਪ੍ਪਕਸ੍ਮਿਂ ਦਦਨ੍ਤੋਪਿ ਧਮ੍ਮਂ ਚਰਤੀਤਿ ਯੋਜਨਾ। ਤਥਾવਿਧਸ੍ਸਾਤਿ ਤਾਦਿਸਸ੍ਸ ਤਥਾਧਮ੍ਮਚਾਰਿਨੋ ਯਾ ਧਮ੍ਮਚਰਿਯਾ, ਤਸ੍ਸਾ ਕਲਮ੍ਪਿ ਨਗ੍ਘਨ੍ਤਿ ਏਤੇ ਸਹਸ੍ਸਯਾਗਿਨੋ ਅਤ੍ਤਨੋ ਸਹਸ੍ਸਯਾਗਿਤਾਯ। ਯਂ ਤੇਨ ਦਲਿਦ੍ਦੇਨਾਤਿਆਦਿ ਤਸ੍ਸੇવਤ੍ਥਸ੍ਸ વਿવਰਣਂ। ਸਬ੍ਬੇਸਮ੍ਪਿ ਤੇਸਨ੍ਤਿ ‘‘ਸਤਂਸਹਸ੍ਸਾਨਂ ਸਹਸ੍ਸਯਾਗਿਨ’’ਨ੍ਤਿ વੁਤ੍ਤਾਨਂ ਤੇਸਂ ਸਬ੍ਬੇਸਮ੍ਪਿ। ਇਤਰੇਸਨ੍ਤਿ ‘‘ਤਥਾવਿਧਸ੍ਸਾ’’ਤਿ વੁਤ੍ਤਪੁਰਿਸਤੋ ਅਞ੍ਞੇਸਂ। ਦਸਕੋਟਿਸਹਸ੍ਸਦਾਨਨ੍ਤਿ ਦਸਕੋਟਿਸਙ੍ਖਾਤਂ ਤਤੋ ਅਨੇਕਸਹਸ੍ਸਭੇਦਤਾਯ ਸਹਸ੍ਸਦਾਨਂ।
Duranugamanoti asamaṅginā anugantuṃ dukkaro. Ananugamanañcassa dhammassa apūraṇamevāti āha ‘‘duppūro’’ti. ‘‘Dhammaṃ care’’ti ayaṃ dhammacariyā gahaṭṭhassa vasena āraddhāti āha ‘‘dasakusalakammapathadhammaṃ caratī’’ti. Tenāha ‘‘dārañca posa’’nti. Samuñjakanti kassakehi attanā kātabbaṃ katvā visaṭṭhadhaññakaraṇato khale uñchācariyavasena samuñjaniādinā chaḍḍitadhaññasaṃharaṇaṃ. Tenāha ‘‘yo api…pe… samuñjakaṃ caratī’’ti. Etenāti satasahassasahassayāgiggahaṇena dasannampi bhikkhukoṭīnaṃ piṇḍapāto dassito hoti. ‘‘Dinno’’ti padaṃ ānetvā yojanā. Dasannaṃ vā kahāpaṇakoṭīnaṃ piṇḍapātoti dasannaṃ kahāpaṇakoṭīnaṃ viniyuñjanavasena sampāditapiṇḍapāto. Tayidaṃ satasahassaṃ sahassayāgīnaṃ dānaṃ ettakaṃ hotīti katvā vuttaṃ. Samuñjakaṃ carantopīti samuñjakaṃ caritvāpi, samuñjakacaraṇahetūti attho. Sesapadadvayepi eseva nayo. Dāraṃ posentopi dhammaṃ carati, appakasmiṃ dadantopi dhammaṃ caratīti yojanā. Tathāvidhassāti tādisassa tathādhammacārino yā dhammacariyā, tassā kalampi nagghanti ete sahassayāgino attano sahassayāgitāya. Yaṃ tena daliddenātiādi tassevatthassa vivaraṇaṃ. Sabbesampi tesanti ‘‘sataṃsahassānaṃ sahassayāgina’’nti vuttānaṃ tesaṃ sabbesampi. Itaresanti ‘‘tathāvidhassā’’ti vuttapurisato aññesaṃ. Dasakoṭisahassadānanti dasakoṭisaṅkhātaṃ tato anekasahassabhedatāya sahassadānaṃ.
‘‘ਕਲਂ ਨਗ੍ਘਤੀ’’ਤਿ ਇਦਂ ਤੇਸਂ ਦਾਨਤੋ ਇਮਸ੍ਸ ਦਾਨਸ੍ਸ ਉਲ਼ਾਰਤਰਭਾવੇਨ વਿਪੁਲਤਰਭਾવੇਨ વਿਪੁਲਤਰਫਲਤਾਯ વੁਤ੍ਤਨ੍ਤਿ ਆਹ ‘‘ਕਥਂ ਨੁ ਖੋ ਏਤਂ ਮਹਪ੍ਫਲਤਰਨ੍ਤਿ ਜਾਨਨਤ੍ਥ’’ਨ੍ਤਿ। ਪਚ੍ਚਯવਿਸੇਸੇਨ ਮਹਤ੍ਤਂ ਗਤੋਤਿ ਮਹਗ੍ਗਤੋ, ਉਲ਼ਾਰੋਤਿ ਅਤ੍ਥੋ। ਤੇਨਾਹ ‘‘વਿਪੁਲਸ੍ਸੇਤਂ વੇવਚਨ’’ਨ੍ਤਿ। ਸਮੇਨਾਤਿ ਞਾਯੇਨ, ਧਮ੍ਮੇਨਾਤਿ ਅਤ੍ਥੋ। વਿਸਮੇਤਿ ਨ ਸਮੇ ਮਚ੍ਛਰਿਯਲਕ੍ਖਣਪ੍ਪਤ੍ਤੇ। ਛੇਤ੍વਾਤਿ ਪੀਲ਼ੇਤ੍વਾ। ਤਂ ਪਨ ਪੀਲ਼ਨਂ ਪੋਥਨਨ੍ਤਿ ਦਸ੍ਸੇਨ੍ਤੋ ‘‘ਪੋਥੇਤ੍વਾ’’ਤਿ ਆਹ। ਅਸ੍ਸੁਮੁਖਾਤਿ ਤਿਨ੍ਤਅਸ੍ਸੁਮੁਖਸਮ੍ਮਿਸ੍ਸਾ ਪਰਂ ਰੋਦਾਪੇਤ੍વਾ। ਮਹਾਦਾਨਨ੍ਤਿ ਯਥਾવੁਤ੍ਤਂ ਬਹੁਦੇਯ੍ਯਧਮ੍ਮਸ੍ਸ ਪਰਿਚ੍ਚਜਨੇਨ ਮਹਨ੍ਤਦਾਨਂ। ਉਪ੍ਪਤ੍ਤਿਯਾ ਅਪਰਿਸੁਦ੍ਧਤਾਯਾਤਿ ਅਜ੍ਝਾਸਯਸ੍ਸ ਦੇਯ੍ਯਧਮ੍ਮਗવੇਸਨਾਯ ਚ ਸੁਦ੍ਧਤਾਯ ਮਲੀਨਤ੍ਤਾ। ਇਤਰਂ ਧਮ੍ਮਚਰਿਯਾਯ ਨਿਬ੍ਬਤ੍ਤਿਤਦਾਨਂ। ਪਰਿਤ੍ਤਦਾਨਨ੍ਤਿ ਪਰਿਤ੍ਤਸ੍ਸ ਦੇਯ੍ਯਧਮ੍ਮਸ੍ਸ વਸੇਨ ਪਰਿਤ੍ਤਦਾਨਂ। ਅਤ੍ਤਨੋ ਉਪ੍ਪਤ੍ਤਿਯਾ ਪਰਿਸੁਦ੍ਧਤਾਯਾਤਿ ਅਜ੍ਝਾਸਯਸ੍ਸ ਦੇਯ੍ਯਧਮ੍ਮਗવੇਸਨਾਯ ਚ વਿਸੁਦ੍ਧਤਾਯ। ਏવਨ੍ਤਿਆਦਿਮਾਹਾਤਿ ‘‘ਏવਂ ਸਹਸ੍ਸਾਨਂ ਸਹਸ੍ਸਯਾਗਿਨ’’ਨ੍ਤਿ ਅવੋਚ। ਤਤ੍ਥ ਸਹਸ੍ਸਾਨਨ੍ਤਿ ਸਤਂਸਹਸ੍ਸਾਨਂ। ਗਾਥਾਬਨ੍ਧਸੁਖਤ੍ਥਂ ਸਤਗ੍ਗਹਣਂ ਨ ਕਤਂ। ਸੇਸਂ વੁਤ੍ਤਨਯਮੇવ।
‘‘Kalaṃ nagghatī’’ti idaṃ tesaṃ dānato imassa dānassa uḷāratarabhāvena vipulatarabhāvena vipulataraphalatāya vuttanti āha ‘‘kathaṃ nu kho etaṃ mahapphalataranti jānanattha’’nti. Paccayavisesena mahattaṃ gatoti mahaggato, uḷāroti attho. Tenāha ‘‘vipulassetaṃ vevacana’’nti. Samenāti ñāyena, dhammenāti attho. Visameti na same macchariyalakkhaṇappatte. Chetvāti pīḷetvā. Taṃ pana pīḷanaṃ pothananti dassento ‘‘pothetvā’’ti āha. Assumukhāti tintaassumukhasammissā paraṃ rodāpetvā. Mahādānanti yathāvuttaṃ bahudeyyadhammassa pariccajanena mahantadānaṃ. Uppattiyā aparisuddhatāyāti ajjhāsayassa deyyadhammagavesanāya ca suddhatāya malīnattā. Itaraṃ dhammacariyāya nibbattitadānaṃ. Parittadānanti parittassa deyyadhammassa vasena parittadānaṃ. Attano uppattiyā parisuddhatāyāti ajjhāsayassa deyyadhammagavesanāya ca visuddhatāya. Evantiādimāhāti ‘‘evaṃ sahassānaṃ sahassayāgina’’nti avoca. Tattha sahassānanti sataṃsahassānaṃ. Gāthābandhasukhatthaṃ sataggahaṇaṃ na kataṃ. Sesaṃ vuttanayameva.
ਮਚ੍ਛਰਿਸੁਤ੍ਤવਣ੍ਣਨਾ ਨਿਟ੍ਠਿਤਾ।
Maccharisuttavaṇṇanā niṭṭhitā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੨. ਮਚ੍ਛਰਿਸੁਤ੍ਤਂ • 2. Maccharisuttaṃ
ਅਟ੍ਠਕਥਾ • Aṭṭhakathā / ਸੁਤ੍ਤਪਿਟਕ (ਅਟ੍ਠਕਥਾ) • Suttapiṭaka (aṭṭhakathā) / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) / ੨. ਮਚ੍ਛਰਿਸੁਤ੍ਤવਣ੍ਣਨਾ • 2. Maccharisuttavaṇṇanā
