| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
[288] 8. мажчуд̣̇д̣̇аанаж̇аад̇агаван̣н̣анаа
[288] 8. Macchuddānajātakavaṇṇanā
аг̇гханд̇и мажчаад̇и ид̣̇ам̣ сад̇т̇аа ж̇зд̇аванз вихаранд̇о згам̣ гуудаваан̣иж̇ам̣ аараб̣бха гат̇зси. вад̇т̇у хздтаа гат̇ид̇амзва.
Agghanti macchāti idaṃ satthā jetavane viharanto ekaṃ kūṭavāṇijaṃ ārabbha kathesi. Vatthu heṭṭhā kathitameva.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о гудумб̣игагулз ниб̣б̣ад̇д̇ид̇ваа вин̃н̃уд̇ам̣ бад̇д̇о гудумб̣ам̣ сан̣табзси. ганидтабхаад̇аабисса ад̇т̇и, д̇зсам̣ абарабхааг̇з бид̇аа гаалагад̇о. д̇з згад̣̇ивасам̣ ‘‘бид̇у санд̇агам̣ вохаарам̣ саад̇хзссаамаа’’д̇и згам̣ г̇аамам̣ г̇анд̇ваа гахаабан̣асахассам̣ лабхид̇ваа ааг̇ажчанд̇аа над̣̇ийд̇ид̇т̇з наавам̣ бадимаанзнд̇аа будабхад̇д̇ам̣ бхун̃ж̇им̣су. б̣од̇хисад̇д̇о ад̇ирзгабхад̇д̇ам̣ г̇ан̇г̇ааяа мажчаанам̣ д̣̇ад̇ваа над̣̇ийд̣̇звад̇ааяа бад̇д̇им̣ ад̣̇ааси. д̣̇звад̇аа бад̇д̇им̣ анумод̣̇ид̇вааязва д̣̇иб̣б̣зна яасзна вад̣дхид̇ваа ад̇д̇ано яасавуд̣дхим̣ ааваж̇ж̇амаанаа д̇ам̣ гааран̣ам̣ ан̃н̃ааси. б̣од̇хисад̇д̇оби ваалигааяам̣ уд̇д̇араасан̇г̇ам̣ бад̇т̇арид̇ваа нибанно нид̣̇д̣̇ам̣ оггами, ганидтабхаад̇аа банасса т̇огам̣ жорабагад̇иго. со д̇з гахаабан̣з б̣од̇хисад̇д̇асса ад̣̇ад̇ваа саяамзва г̇ан̣хид̇угаамад̇ааяа гахаабан̣абхан̣д̣игасад̣̇исам̣ згам̣ сагкарабхан̣д̣игам̣ гад̇ваа д̣̇взби бхан̣д̣игаа згад̇ова табзси. д̇зсам̣ наавам̣ абхирухид̇ваа г̇ан̇г̇аамаж̇жхаг̇ад̇аанам̣ ганидто наавам̣ кобхзд̇ваа ‘‘сагкарабхан̣д̣игам̣ уд̣̇агз кибиссаамий’’д̇и сахассабхан̣д̣игам̣ кибид̇ваа ‘‘бхаад̇ига, сахассабхан̣д̣игаа уд̣̇агз бад̇ид̇аа, гинд̇и гаромаа’’д̇и ааха. ‘‘уд̣̇агз бад̇ид̇ааяа гим̣ гариссаама, маа жинд̇аяий’’д̇и. над̣̇ийд̣̇звад̇аа жинд̇зси – ‘‘ахам̣ иминаа д̣̇иннабад̇д̇им̣ анумод̣̇ид̇ваа д̣̇иб̣б̣аяасзна вад̣дхид̇ваа зд̇асса санд̇агам̣ рагкиссаамий’’д̇и ад̇д̇ано аанубхаавзна д̇ам̣ бхан̣д̣игам̣ згам̣ махаамажчам̣ г̇илаабзд̇ваа саяам̣ аарагкам̣ г̇ан̣хи. соби жоро г̇зхам̣ г̇анд̇ваа ‘‘бхаад̇аа мз ван̃жид̇о’’д̇и бхан̣д̣игам̣ можзнд̇о сагкараа бассид̇ваа хад̣̇аязна суссанд̇зна ман̃жасса аданим̣ убаг̇уухид̇ваа нибаж̇ж̇и.
Atīte bārāṇasiyaṃ brahmadatte rajjaṃ kārente bodhisatto kuṭumbikakule nibbattitvā viññutaṃ patto kuṭumbaṃ saṇṭhapesi. Kaniṭṭhabhātāpissa atthi, tesaṃ aparabhāge pitā kālakato. Te ekadivasaṃ ‘‘pitu santakaṃ vohāraṃ sādhessāmā’’ti ekaṃ gāmaṃ gantvā kahāpaṇasahassaṃ labhitvā āgacchantā nadītitthe nāvaṃ paṭimānentā puṭabhattaṃ bhuñjiṃsu. Bodhisatto atirekabhattaṃ gaṅgāya macchānaṃ datvā nadīdevatāya pattiṃ adāsi. Devatā pattiṃ anumoditvāyeva dibbena yasena vaḍḍhitvā attano yasavuḍḍhiṃ āvajjamānā taṃ kāraṇaṃ aññāsi. Bodhisattopi vālikāyaṃ uttarāsaṅgaṃ pattharitvā nipanno niddaṃ okkami, kaniṭṭhabhātā panassa thokaṃ corapakatiko. So te kahāpaṇe bodhisattassa adatvā sayameva gaṇhitukāmatāya kahāpaṇabhaṇḍikasadisaṃ ekaṃ sakkharabhaṇḍikaṃ katvā dvepi bhaṇḍikā ekatova ṭhapesi. Tesaṃ nāvaṃ abhiruhitvā gaṅgāmajjhagatānaṃ kaniṭṭho nāvaṃ khobhetvā ‘‘sakkharabhaṇḍikaṃ udake khipissāmī’’ti sahassabhaṇḍikaṃ khipitvā ‘‘bhātika, sahassabhaṇḍikā udake patitā, kinti karomā’’ti āha. ‘‘Udake patitāya kiṃ karissāma, mā cintayī’’ti. Nadīdevatā cintesi – ‘‘ahaṃ iminā dinnapattiṃ anumoditvā dibbayasena vaḍḍhitvā etassa santakaṃ rakkhissāmī’’ti attano ānubhāvena taṃ bhaṇḍikaṃ ekaṃ mahāmacchaṃ gilāpetvā sayaṃ ārakkhaṃ gaṇhi. Sopi coro gehaṃ gantvā ‘‘bhātā me vañcito’’ti bhaṇḍikaṃ mocento sakkharā passitvā hadayena sussantena mañcassa aṭaniṃ upagūhitvā nipajji.
д̇ад̣̇аа гзваддаа мажчаг̇ахан̣ад̇т̇ааяа ж̇аалам̣ кибим̣су. со мажчо д̣̇звад̇аанубхаавзна ж̇аалам̣ баависи. гзваддаа д̇ам̣ г̇ахзд̇ваа виггин̣ид̇ум̣ наг̇арам̣ бавидтаа. мануссаа махаамажчам̣ д̣̇исваа муулам̣ бужчанд̇и. гзваддаа ‘‘гахаабан̣асахассан̃жа сад̇д̇а жа маасагз д̣̇ад̇ваа г̇ан̣хат̇аа’’д̇и вад̣̇анд̇и. мануссаа ‘‘сахассаг̇гханагамажчоби но д̣̇идто’’д̇и барихаасам̣ гаронд̇и. гзваддаа мажчам̣ г̇ахзд̇ваа б̣од̇хисад̇д̇асса гхарад̣̇ваарам̣ г̇анд̇ваа ‘‘имам̣ мажчам̣ г̇ан̣хат̇аа’’д̇и аахам̣су. ‘‘гимасса муула’’нд̇и? ‘‘сад̇д̇а маасагз д̣̇ад̇ваа г̇ан̣хат̇аа’’д̇и. ‘‘ан̃н̃зсам̣ д̣̇ад̣̇амаанаа гат̇ам̣ д̣̇зт̇аа’’д̇и? ‘‘ан̃н̃зсам̣ сахассзна жа сад̇д̇ахи жа маасагзхи д̣̇зма, д̇умхз бана сад̇д̇а маасагз д̣̇ад̇ваа г̇ан̣хат̇аа’’д̇и. со д̇зсам̣ сад̇д̇а маасагз д̣̇ад̇ваа мажчам̣ бхарияааяа бзсзси. саа мажчасса гужчим̣ паалаяамаанаа сахассабхан̣д̣игам̣ д̣̇исваа б̣од̇хисад̇д̇асса аарожзси. б̣од̇хисад̇д̇о д̇ам̣ ологзд̇ваа ад̇д̇ано лан̃чам̣ д̣̇исваа сагасанд̇агабхаавам̣ н̃ад̇ваа ‘‘ид̣̇аани имз гзваддаа имам̣ мажчам̣ ан̃н̃зсам̣ д̣̇ад̣̇амаанаа сахассзна жзва сад̇д̇ахи жа маасагзхи д̣̇знд̇и, амхз бана бад̇ваа сахассасса амхаагам̣ санд̇агад̇д̇аа сад̇д̇зва маасагз г̇ахзд̇ваа ад̣̇ам̣су, ид̣̇ам̣ анд̇арам̣ аж̇аананд̇ам̣ на саггаа ган̃жи сад̣̇д̣̇ахаабзд̇у’’нд̇и жинд̇зд̇ваа батамам̣ г̇аат̇амааха –
Tadā kevaṭṭā macchagahaṇatthāya jālaṃ khipiṃsu. So maccho devatānubhāvena jālaṃ pāvisi. Kevaṭṭā taṃ gahetvā vikkiṇituṃ nagaraṃ paviṭṭhā. Manussā mahāmacchaṃ disvā mūlaṃ pucchanti. Kevaṭṭā ‘‘kahāpaṇasahassañca satta ca māsake datvā gaṇhathā’’ti vadanti. Manussā ‘‘sahassagghanakamacchopi no diṭṭho’’ti parihāsaṃ karonti. Kevaṭṭā macchaṃ gahetvā bodhisattassa gharadvāraṃ gantvā ‘‘imaṃ macchaṃ gaṇhathā’’ti āhaṃsu. ‘‘Kimassa mūla’’nti? ‘‘Satta māsake datvā gaṇhathā’’ti. ‘‘Aññesaṃ dadamānā kathaṃ dethā’’ti? ‘‘Aññesaṃ sahassena ca sattahi ca māsakehi dema, tumhe pana satta māsake datvā gaṇhathā’’ti. So tesaṃ satta māsake datvā macchaṃ bhariyāya pesesi. Sā macchassa kucchiṃ phālayamānā sahassabhaṇḍikaṃ disvā bodhisattassa ārocesi. Bodhisatto taṃ oloketvā attano lañchaṃ disvā sakasantakabhāvaṃ ñatvā ‘‘idāni ime kevaṭṭā imaṃ macchaṃ aññesaṃ dadamānā sahassena ceva sattahi ca māsakehi denti, amhe pana patvā sahassassa amhākaṃ santakattā satteva māsake gahetvā adaṃsu, idaṃ antaraṃ ajānantaṃ na sakkā kañci saddahāpetu’’nti cintetvā paṭhamaṃ gāthamāha –
112.
112.
‘‘аг̇гханд̇и мажчаа ад̇хигам̣ сахассам̣, на со ад̇т̇и яо имам̣ сад̣̇д̣̇ахзяяа;
‘‘Agghanti macchā adhikaṃ sahassaṃ, na so atthi yo imaṃ saddaheyya;
маяхан̃жа ассу ид̇ха сад̇д̇а маасаа, ахамби д̇ам̣ мажчуд̣̇д̣̇аанам̣ гин̣зяяа’’нд̇и.
Mayhañca assu idha satta māsā, ahampi taṃ macchuddānaṃ kiṇeyya’’nti.
д̇ад̇т̇а ад̇хиганд̇и ан̃н̃зхи бужчид̇аа гзваддаа ‘‘сад̇д̇амаасаад̇хигам̣ сахассам̣ аг̇гханд̇ий’’д̇и вад̣̇анд̇и. на со ад̇т̇и яо имам̣ сад̣̇д̣̇ахзяяаад̇и со бурисо на ад̇т̇и, яо имам̣ гааран̣ам̣ бажжагкад̇о аж̇аананд̇о мама важанзна сад̣̇д̣̇ахзяяа, зд̇д̇агам̣ ваа мажчаа аг̇гханд̇ийд̇и яо имам̣ сад̣̇д̣̇ахзяяа, со над̇т̇и, д̇асмааязва д̇з ан̃н̃зхи на г̇ахид̇аад̇иби ад̇т̇о. маяхан̃жа ассууд̇и маяхам̣ бана сад̇д̇а маасагаа ахзсум̣. мажчуд̣̇д̣̇аананд̇и мажчаваг̇г̇ам̣. д̇зна хи мажчзна сад̣̇д̇хим̣ ан̃н̃зби мажчаа згад̇о б̣ад̣̇д̇хаа д̇ам̣ сагаламби мажчуд̣̇д̣̇аанам̣ санд̇хааязд̇ам̣ вуд̇д̇ам̣. гин̣зяяанд̇и гин̣им̣, сад̇д̇зва маасагз д̣̇ад̇ваа зд̇д̇агам̣ мажчаваг̇г̇ам̣ г̇ан̣хинд̇и ад̇т̇о.
Tattha adhikanti aññehi pucchitā kevaṭṭā ‘‘sattamāsādhikaṃ sahassaṃ agghantī’’ti vadanti. Na so atthi yo imaṃ saddaheyyāti so puriso na atthi, yo imaṃ kāraṇaṃ paccakkhato ajānanto mama vacanena saddaheyya, ettakaṃ vā macchā agghantīti yo imaṃ saddaheyya, so natthi, tasmāyeva te aññehi na gahitātipi attho. Mayhañca assūti mayhaṃ pana satta māsakā ahesuṃ. Macchuddānanti macchavaggaṃ. Tena hi macchena saddhiṃ aññepi macchā ekato baddhā taṃ sakalampi macchuddānaṃ sandhāyetaṃ vuttaṃ. Kiṇeyyanti kiṇiṃ, satteva māsake datvā ettakaṃ macchavaggaṃ gaṇhinti attho.
зван̃жа бана вад̇ваа ид̣̇ам̣ жинд̇зси – ‘‘гим̣ ну ко ниссааяа маяаа зд̇з гахаабан̣аа лад̣̇д̇хаа’’д̇и? д̇асмим̣ кан̣з над̣̇ийд̣̇звад̇аа аагаасз д̣̇иссамаанаруубзна тад̇ваа ‘‘ахам̣, г̇ан̇г̇аад̣̇звад̇аа, д̇аяаа мажчаанам̣ ад̇ирзгабхад̇д̇ам̣ д̣̇ад̇ваа маяхам̣ бад̇д̇и д̣̇иннаа, д̇знаахам̣ д̇ава санд̇агам̣ рагканд̇ий ааг̇ад̇аа’’д̇и д̣̇ийбаяамаанаа г̇аат̇амааха –
Evañca pana vatvā idaṃ cintesi – ‘‘kiṃ nu kho nissāya mayā ete kahāpaṇā laddhā’’ti? Tasmiṃ khaṇe nadīdevatā ākāse dissamānarūpena ṭhatvā ‘‘ahaṃ, gaṅgādevatā, tayā macchānaṃ atirekabhattaṃ datvā mayhaṃ patti dinnā, tenāhaṃ tava santakaṃ rakkhantī āgatā’’ti dīpayamānā gāthamāha –
113.
113.
‘‘мажчаанам̣ бхож̇анам̣ д̣̇ад̇ваа, мама д̣̇агкин̣амаад̣̇иси;
‘‘Macchānaṃ bhojanaṃ datvā, mama dakkhiṇamādisi;
д̇ам̣ д̣̇агкин̣ам̣ саранд̇ияаа, гад̇ам̣ абажид̇им̣ д̇аяаа’’д̇и.
Taṃ dakkhiṇaṃ sarantiyā, kataṃ apacitiṃ tayā’’ti.
д̇ад̇т̇а д̣̇агкин̣анд̇и имасмим̣ таанз бад̇д̇ид̣̇аанам̣ д̣̇агкин̣аа наама. саранд̇ияаа гад̇ам̣ абажид̇им̣ д̇аяаад̇и д̇ам̣ д̇аяаа маяхам̣ гад̇ам̣ абажид̇им̣ саранд̇ияаа маяаа ид̣̇ам̣ д̇ава д̇ханам̣ рагкид̇анд̇и ад̇т̇о.
Tattha dakkhiṇanti imasmiṃ ṭhāne pattidānaṃ dakkhiṇā nāma. Sarantiyā kataṃ apacitiṃ tayāti taṃ tayā mayhaṃ kataṃ apacitiṃ sarantiyā mayā idaṃ tava dhanaṃ rakkhitanti attho.
ид̣̇ам̣ вад̇ваа жа бана саа д̣̇звад̇аа д̇асса ганидтзна гад̇агуудагаммам̣ саб̣б̣ам̣ гат̇зд̇ваа ‘‘зсо ид̣̇аани хад̣̇аязна суссанд̇зна нибанно, д̣̇удтажид̇д̇асса вуд̣дхи наама над̇т̇и, ахам̣ бана ‘д̇ава санд̇агам̣ маа нассий’д̇и д̇ханам̣ д̇з аахарид̇ваа ад̣̇аасим̣, ид̣̇ам̣ ганидтажорасса ад̣̇ад̇ваа саб̣б̣ам̣ д̇ван̃н̃зва г̇ан̣хаа’’д̇и вад̇ваа д̇ад̇ияам̣ г̇аат̇амааха –
Idaṃ vatvā ca pana sā devatā tassa kaniṭṭhena katakūṭakammaṃ sabbaṃ kathetvā ‘‘eso idāni hadayena sussantena nipanno, duṭṭhacittassa vuḍḍhi nāma natthi, ahaṃ pana ‘tava santakaṃ mā nassī’ti dhanaṃ te āharitvā adāsiṃ, idaṃ kaniṭṭhacorassa adatvā sabbaṃ tvaññeva gaṇhā’’ti vatvā tatiyaṃ gāthamāha –
114.
114.
‘‘бад̣̇удтажид̇д̇асса на паад̇и ход̇и, на жааби д̇ам̣ д̣̇звад̇аа бууж̇аяанд̇и;
‘‘Paduṭṭhacittassa na phāti hoti, na cāpi taṃ devatā pūjayanti;
яо бхаад̇арам̣ бзд̇д̇игам̣ саабад̇зяяам̣, аван̃жаяий д̣̇уггадагаммагаарий’’д̇и.
Yo bhātaraṃ pettikaṃ sāpateyyaṃ, avañcayī dukkaṭakammakārī’’ti.
д̇ад̇т̇а на паад̇и ход̇ийд̇и зваруубасса буг̇г̇аласса ид̇халогз ваа баралогз ваа вуд̣дхи наама на ход̇и. на жааби д̇анд̇и д̇ам̣ буг̇г̇алам̣ д̇асса санд̇агам̣ рагкамаанаа д̣̇звад̇аа на бууж̇аяанд̇и.
Tattha na phāti hotīti evarūpassa puggalassa idhaloke vā paraloke vā vuḍḍhi nāma na hoti. Na cāpi tanti taṃ puggalaṃ tassa santakaṃ rakkhamānā devatā na pūjayanti.
ид̇и д̣̇звад̇аа мид̇д̇ад̣̇уб̣бхижорасса гахаабан̣з ад̣̇аад̇угаамаа звамааха. б̣од̇хисад̇д̇о бана ‘‘на саггаа звам̣ гаад̇у’’нд̇и д̇ассаби бан̃жа гахаабан̣асад̇аани бзсзсиязва.
Iti devatā mittadubbhicorassa kahāpaṇe adātukāmā evamāha. Bodhisatto pana ‘‘na sakkā evaṃ kātu’’nti tassapi pañca kahāpaṇasatāni pesesiyeva.
сад̇т̇аа имам̣ д̇хаммад̣̇зсанам̣ аахарид̇ваа сажжаани багаасзд̇ваа ж̇аад̇агам̣ самод̇хаанзси, сажжабарияосаанз ваан̣иж̇о сод̇аабад̇д̇ипалз бад̇идтахи. ‘‘д̇ад̣̇аа ганидтабхаад̇аа ид̣̇аани гуудаваан̣иж̇о, ж̇здтабхаад̇аа бана ахамзва ахоси’’нд̇и.
Satthā imaṃ dhammadesanaṃ āharitvā saccāni pakāsetvā jātakaṃ samodhānesi, saccapariyosāne vāṇijo sotāpattiphale patiṭṭhahi. ‘‘Tadā kaniṭṭhabhātā idāni kūṭavāṇijo, jeṭṭhabhātā pana ahameva ahosi’’nti.
мажчуд̣̇д̣̇аанаж̇аад̇агаван̣н̣анаа адтамаа.
Macchuddānajātakavaṇṇanā aṭṭhamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 288. мажчуд̣̇д̣̇аанаж̇аад̇агам̣ • 288. Macchuddānajātakaṃ
