| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
3. மச்சுபா⁴யனாபா⁴யனபஞ்ஹோ
3. Maccubhāyanābhāyanapañho
3. ‘‘ப⁴ந்தே நாக³ஸேன, பா⁴ஸிதம்பேதங் ப⁴க³வதா ‘ஸப்³பே³ தஸந்தி த³ண்ட³ஸ்ஸ, ஸப்³பே³ பா⁴யந்தி மச்சுனோ’தி, புன ப⁴ணிதங் ‘அரஹா ஸப்³ப³ப⁴யமதிக்கந்தோ’தி. கிங் நு கோ², ப⁴ந்தே நாக³ஸேன, அரஹா த³ண்ட³ப⁴யா தஸதி , நிரயே வா நேரயிகா ஸத்தா ஜலிதா குதி²தா தத்தா ஸந்தத்தா தம்ஹா ஜலிதக்³கி³ஜாலகா மஹானிரயா சவமானா மச்சுனோ பா⁴யந்தி. யதி³, ப⁴ந்தே நாக³ஸேன, ப⁴க³வதா ப⁴ணிதங் ‘ஸப்³பே³ தஸந்தி த³ண்ட³ஸ்ஸ, ஸப்³பே³ பா⁴யந்தி மச்சுனோ’தி, தேன ஹி ‘அரஹா ஸப்³ப³ப⁴யமதிக்கந்தோ’தி யங் வசனங், தங் மிச்சா². யதி³ ப⁴க³வதா ப⁴ணிதங் ‘அரஹா ஸப்³ப³ப⁴யமதிக்கந்தோ’தி, தேன ஹி ‘ஸப்³பே³ தஸந்தி த³ண்ட³ஸ்ஸ, ஸப்³பே³ பா⁴யந்தி மச்சுனோ’தி தம்பி வசனங் மிச்சா². அயங் உப⁴தோ கோடிகோ பஞ்ஹோ தவானுப்பத்தோ, ஸோ தயா நிப்³பா³ஹிதப்³போ³’’தி.
3. ‘‘Bhante nāgasena, bhāsitampetaṃ bhagavatā ‘sabbe tasanti daṇḍassa, sabbe bhāyanti maccuno’ti, puna bhaṇitaṃ ‘arahā sabbabhayamatikkanto’ti. Kiṃ nu kho, bhante nāgasena, arahā daṇḍabhayā tasati , niraye vā nerayikā sattā jalitā kuthitā tattā santattā tamhā jalitaggijālakā mahānirayā cavamānā maccuno bhāyanti. Yadi, bhante nāgasena, bhagavatā bhaṇitaṃ ‘sabbe tasanti daṇḍassa, sabbe bhāyanti maccuno’ti, tena hi ‘arahā sabbabhayamatikkanto’ti yaṃ vacanaṃ, taṃ micchā. Yadi bhagavatā bhaṇitaṃ ‘arahā sabbabhayamatikkanto’ti, tena hi ‘sabbe tasanti daṇḍassa, sabbe bhāyanti maccuno’ti tampi vacanaṃ micchā. Ayaṃ ubhato koṭiko pañho tavānuppatto, so tayā nibbāhitabbo’’ti.
‘‘நேதங், மஹாராஜ, வசனங் ப⁴க³வதா அரஹந்தே உபாதா³ய ப⁴ணிதங் ‘ஸப்³பே³ தஸந்தி த³ண்ட³ஸ்ஸ, ஸப்³பே³ பா⁴யந்தி மச்சுனோ’தி. ட²பிதோ அரஹா தஸ்மிங் வத்து²ஸ்மிங், ஸமூஹதோ ப⁴யஹேது அரஹதோ. யே தே, மஹாராஜ, ஸத்தா ஸகிலேஸா, யேஸஞ்ச அதி⁴மத்தா அத்தானுதி³ட்டி², யே ச ஸுக²து³க்கே²ஸு உன்னதாவனதா, தே உபாதா³ய ப⁴க³வதா ப⁴ணிதங் ‘ஸப்³பே³ தஸந்தி த³ண்ட³ஸ்ஸ, ஸப்³பே³ பா⁴யந்தி மச்சுனோ’தி. அரஹதோ, மஹாராஜ, ஸப்³ப³க³தி உபச்சி²ன்னா, யோனி வித்³த⁴ங்ஸிதா, படிஸந்தி⁴ உபஹதா, ப⁴க்³கா³ பா²ஸுகா, ஸமூஹதா ஸப்³ப³ப⁴வாலயா, ஸமுச்சி²ன்னா ஸப்³ப³ஸங்கா²ரா, ஹதங் குஸலாகுஸலங், விஹதா அவிஜ்ஜா, அபீ³ஜங் விஞ்ஞாணங் கதங், த³ட்³டா⁴ ஸப்³ப³கிலேஸா, அதிவத்தா லோகத⁴ம்மா, தஸ்மா அரஹா ந தஸதி ஸப்³ப³ப⁴யேஹி.
‘‘Netaṃ, mahārāja, vacanaṃ bhagavatā arahante upādāya bhaṇitaṃ ‘sabbe tasanti daṇḍassa, sabbe bhāyanti maccuno’ti. Ṭhapito arahā tasmiṃ vatthusmiṃ, samūhato bhayahetu arahato. Ye te, mahārāja, sattā sakilesā, yesañca adhimattā attānudiṭṭhi, ye ca sukhadukkhesu unnatāvanatā, te upādāya bhagavatā bhaṇitaṃ ‘sabbe tasanti daṇḍassa, sabbe bhāyanti maccuno’ti. Arahato, mahārāja, sabbagati upacchinnā, yoni viddhaṃsitā, paṭisandhi upahatā, bhaggā phāsukā, samūhatā sabbabhavālayā, samucchinnā sabbasaṅkhārā, hataṃ kusalākusalaṃ, vihatā avijjā, abījaṃ viññāṇaṃ kataṃ, daḍḍhā sabbakilesā, ativattā lokadhammā, tasmā arahā na tasati sabbabhayehi.
‘‘இத⁴, மஹாராஜ, ரஞ்ஞோ சத்தாரோ மஹாமத்தா ப⁴வெய்யுங் அனுரக்கா² லத்³த⁴யஸா விஸ்ஸாஸிகா ட²பிதா மஹதி இஸ்ஸரியே டா²னே. அத² ராஜா கிஸ்மிஞ்சி தே³வ கரணீயே ஸமுப்பன்னே யாவதா ஸகவிஜிதே ஸப்³ப³ஜனஸ்ஸ ஆணாபெய்ய ‘ஸப்³பே³வ மே ப³லிங் கரொந்து, ஸாதே⁴த² தும்ஹே சத்தாரோ மஹாமத்தா தங் கரணீய’ந்தி. அபி நு கோ², மஹாராஜ, தேஸங் சதுன்னங் மஹாமத்தானங் ப³லிப⁴யா ஸந்தாஸோ உப்பஜ்ஜெய்யா’’தி? ‘‘ந ஹி ப⁴ந்தே’’தி. ‘‘கேன காரணேன மஹாராஜா’’தி. ‘‘ட²பிதா தே, ப⁴ந்தே, ரஞ்ஞா உத்தமட்டா²னே, நத்தி² தேஸங் ப³லி, ஸமதிக்கந்தப³லினோ தே, அவஸேஸே உபாதா³ய ரஞ்ஞா ஆணாபிதங் ‘ஸப்³பே³வ மே ப³லிங் கரொந்தூ’தி. ‘‘ஏவமேவ கோ², மஹாராஜ, நேதங் வசனங் ப⁴க³வதா அரஹந்தே உபாதா³ய ப⁴ணிதங், ட²பிதோ அரஹா தஸ்மிங் வத்து²ஸ்மிங், ஸமூஹதோ ப⁴யஹேது அரஹதோ, யே தே, மஹாராஜ, ஸத்தா ஸகிலேஸா, யேஸஞ்ச அதி⁴மத்தா அத்தானுதி³ட்டி², யே ச ஸுக²து³க்கே²ஸு உன்னதாவனதா , தே உபாதா³ய ப⁴க³வதா ப⁴ணிதங் ‘ஸப்³பே³ தஸந்தி த³ண்ட³ஸ்ஸ, ஸப்³பே³ பா⁴யந்தி மச்சுனோ’தி. தஸ்மா அரஹா ந தஸதி ஸப்³ப³ப⁴யேஹீ’’தி.
‘‘Idha, mahārāja, rañño cattāro mahāmattā bhaveyyuṃ anurakkhā laddhayasā vissāsikā ṭhapitā mahati issariye ṭhāne. Atha rājā kismiñci deva karaṇīye samuppanne yāvatā sakavijite sabbajanassa āṇāpeyya ‘sabbeva me baliṃ karontu, sādhetha tumhe cattāro mahāmattā taṃ karaṇīya’nti. Api nu kho, mahārāja, tesaṃ catunnaṃ mahāmattānaṃ balibhayā santāso uppajjeyyā’’ti? ‘‘Na hi bhante’’ti. ‘‘Kena kāraṇena mahārājā’’ti. ‘‘Ṭhapitā te, bhante, raññā uttamaṭṭhāne, natthi tesaṃ bali, samatikkantabalino te, avasese upādāya raññā āṇāpitaṃ ‘sabbeva me baliṃ karontū’ti. ‘‘Evameva kho, mahārāja, netaṃ vacanaṃ bhagavatā arahante upādāya bhaṇitaṃ, ṭhapito arahā tasmiṃ vatthusmiṃ, samūhato bhayahetu arahato, ye te, mahārāja, sattā sakilesā, yesañca adhimattā attānudiṭṭhi, ye ca sukhadukkhesu unnatāvanatā , te upādāya bhagavatā bhaṇitaṃ ‘sabbe tasanti daṇḍassa, sabbe bhāyanti maccuno’ti. Tasmā arahā na tasati sabbabhayehī’’ti.
‘‘நேதங், ப⁴ந்தே நாக³ஸேன, வசனங் ஸாவஸேஸங், நிரவஸேஸவசனமேதங் ‘ஸப்³பே³’தி. தத்த² மே உத்தரிங் காரணங் ப்³ரூஹி தங் வசனங் பதிட்டா²பேது’’ந்தி.
‘‘Netaṃ, bhante nāgasena, vacanaṃ sāvasesaṃ, niravasesavacanametaṃ ‘sabbe’ti. Tattha me uttariṃ kāraṇaṃ brūhi taṃ vacanaṃ patiṭṭhāpetu’’nti.
‘‘இத⁴, மஹாராஜ, கா³மே கா³மஸ்ஸாமிகோ ஆணாபகங் ஆணாபெய்ய ‘ஏஹி, போ⁴ ஆணாபக, யாவதா கா³மே கா³மிகா, தே ஸப்³பே³ ஸீக⁴ங் மம ஸந்திகே ஸன்னிபாதேஹீ’தி. ஸோ ‘ஸாது⁴ ஸாமீ’தி ஸம்படிச்சி²த்வா கா³மமஜ்ஜே² ட²த்வா திக்க²த்துங் ஸத்³த³மனுஸ்ஸாவெய்ய ‘யாவதா கா³மே கா³மிகா, தே ஸப்³பே³ ஸீக⁴ஸீக⁴ங் ஸாமினோ ஸந்திகே ஸன்னிபதந்தூ’தி. ததோ தே கா³மிகா ஆணாபகஸ்ஸ வசனேன துரிததுரிதா ஸன்னிபதித்வா கா³மஸ்ஸாமிகஸ்ஸ ஆரோசெந்தி ‘ஸன்னிபதிதா, ஸாமி, ஸப்³பே³ கா³மிகா, யங் தே கரணீயங் தங் கரோஹீ’தி. இதி ஸோ, மஹாராஜ, கா³மஸ்ஸாமிகோ குடிபுரிஸே ஸன்னிபாதெந்தோ ஸப்³பே³ கா³மிகே ஆணாபேதி, தே ச ஆணத்தா ந ஸப்³பே³ ஸன்னிபதந்தி, குடிபுரிஸா யேவ ஸன்னிபதந்தி, ‘எத்தகா யேவ மே கா³மிகா’தி கா³மஸ்ஸாமிகோ ச ததா² ஸம்படிச்ச²தி, அஞ்ஞே ப³ஹுதரா அனாக³தா இத்தி²புரிஸா தா³ஸிதா³ஸா ப⁴தகா கம்மகரா கா³மிகா கி³லானா கோ³மஹிங்ஸா அஜேளகா ஸுவானா, யே அனாக³தா, ஸப்³பே³ தே அக³ணிதா, குடிபுரிஸே யேவ உபாதா³ய ஆணாபிதத்தா ‘ஸப்³பே³ ஸன்னிபதந்தூ’தி. ஏவமேவ கோ², மஹாராஜ, நேதங் வசனங் ப⁴க³வதா அரஹந்தே உபாதா³ய ப⁴ணிதங், ட²பிதோ அரஹா தஸ்மிங் வத்து²ஸ்மிங், ஸமூஹதோ ப⁴யஹேது அரஹதோ, யே தே, மஹாராஜ, ஸத்தா ஸகிலேஸா, யேஸஞ்ச அதி⁴மத்தா அத்தானுதி³ட்டி², யே ச ஸுக²து³க்கே²ஸு உன்னதாவனதா, தே உபாதா³ய ப⁴க³வதா ப⁴ணிதங் ‘ஸப்³பே³ தஸந்தி த³ண்ட³ஸ்ஸ, ஸப்³பே³ பா⁴யந்தி மச்சுனோ’தி . தஸ்மா அரஹா ந தஸதி ஸப்³ப³ப⁴யேஹி.
‘‘Idha, mahārāja, gāme gāmassāmiko āṇāpakaṃ āṇāpeyya ‘ehi, bho āṇāpaka, yāvatā gāme gāmikā, te sabbe sīghaṃ mama santike sannipātehī’ti. So ‘sādhu sāmī’ti sampaṭicchitvā gāmamajjhe ṭhatvā tikkhattuṃ saddamanussāveyya ‘yāvatā gāme gāmikā, te sabbe sīghasīghaṃ sāmino santike sannipatantū’ti. Tato te gāmikā āṇāpakassa vacanena turitaturitā sannipatitvā gāmassāmikassa ārocenti ‘sannipatitā, sāmi, sabbe gāmikā, yaṃ te karaṇīyaṃ taṃ karohī’ti. Iti so, mahārāja, gāmassāmiko kuṭipurise sannipātento sabbe gāmike āṇāpeti, te ca āṇattā na sabbe sannipatanti, kuṭipurisā yeva sannipatanti, ‘ettakā yeva me gāmikā’ti gāmassāmiko ca tathā sampaṭicchati, aññe bahutarā anāgatā itthipurisā dāsidāsā bhatakā kammakarā gāmikā gilānā gomahiṃsā ajeḷakā suvānā, ye anāgatā, sabbe te agaṇitā, kuṭipurise yeva upādāya āṇāpitattā ‘sabbe sannipatantū’ti. Evameva kho, mahārāja, netaṃ vacanaṃ bhagavatā arahante upādāya bhaṇitaṃ, ṭhapito arahā tasmiṃ vatthusmiṃ, samūhato bhayahetu arahato, ye te, mahārāja, sattā sakilesā, yesañca adhimattā attānudiṭṭhi, ye ca sukhadukkhesu unnatāvanatā, te upādāya bhagavatā bhaṇitaṃ ‘sabbe tasanti daṇḍassa, sabbe bhāyanti maccuno’ti . Tasmā arahā na tasati sabbabhayehi.
‘‘அத்தி², மஹாராஜ, ஸாவஸேஸங் வசனங் ஸாவஸேஸோ அத்தோ², அத்தி² ஸாவஸேஸங் வசனங் நிரவஸேஸோ அத்தோ², அத்தி² நிரவஸேஸங் வசனங் ஸாவஸேஸோ அத்தோ², அத்தி² நிரவஸேஸங் வசனங் நிரவஸேஸோ அத்தோ². தேன தேன அத்தோ² ஸம்படிச்சி²தப்³போ³.
‘‘Atthi, mahārāja, sāvasesaṃ vacanaṃ sāvaseso attho, atthi sāvasesaṃ vacanaṃ niravaseso attho, atthi niravasesaṃ vacanaṃ sāvaseso attho, atthi niravasesaṃ vacanaṃ niravaseso attho. Tena tena attho sampaṭicchitabbo.
‘‘பஞ்சவிதே⁴ஹி, மஹாராஜ, காரணேஹி அத்தோ² ஸம்படிச்சி²தப்³போ³ ஆஹச்சபதே³ன ரஸேன ஆசரியவங்ஸேன 1 அதி⁴ப்பாயா காரணுத்தரியதாய. எத்த² ஹி ஆஹச்சபத³ந்தி ஸுத்தங் அதி⁴ப்பேதங். ரஸோதி ஸுத்தானுலோமங். ஆசரியவங்ஸோதி ஆசரியவாதோ³. அதி⁴ப்பாயோதி அத்தனோ மதி. காரணுத்தரியதாதி இமேஹி சதூஹி ஸமெந்தங் 2 காரணங். இமேஹி கோ², மஹாராஜ, பஞ்சஹி காரணேஹி அத்தோ² ஸம்படிச்சி²தப்³போ³. ஏவமேஸோ பஞ்ஹோ ஸுவினிச்சி²தோ ஹோதீ’’தி.
‘‘Pañcavidhehi, mahārāja, kāraṇehi attho sampaṭicchitabbo āhaccapadena rasena ācariyavaṃsena 3 adhippāyā kāraṇuttariyatāya. Ettha hi āhaccapadanti suttaṃ adhippetaṃ. Rasoti suttānulomaṃ. Ācariyavaṃsoti ācariyavādo. Adhippāyoti attano mati. Kāraṇuttariyatāti imehi catūhi samentaṃ 4 kāraṇaṃ. Imehi kho, mahārāja, pañcahi kāraṇehi attho sampaṭicchitabbo. Evameso pañho suvinicchito hotī’’ti.
‘‘ஹோது, ப⁴ந்தே நாக³ஸேன, ததா² தங் ஸம்படிச்சா²மி. ட²பிதோ ஹோது அரஹா தஸ்மிங் வத்து²ஸ்மிங், தஸந்து அவஸேஸா ஸத்தா, நிரயே பன நேரயிகா ஸத்தா து³க்கா² திப்³பா³ கடுகா வேத³னா வேத³யமானா ஜலிதபஜ்ஜலிதஸப்³ப³ங்க³பச்சங்கா³ ருண்ணகாருஞ்ஞகந்தி³தபரிதே³விதலாலப்பிதமுகா² அஸய்ஹதிப்³ப³து³க்கா²பி⁴பூ⁴தா அதாணா அஸரணா அஸரணீபூ⁴தா அனப்பஸோகாதுரா அந்திமபச்சி²மக³திகா ஏகந்தஸோகபராயணா உண்ஹதிகி²ணசண்ட³க²ரதபனதேஜவந்தோ பீ⁴மப⁴யஜனகனினாத³மஹாஸத்³தா³ ஸங்ஸிப்³பி³தச²ப்³பி³த⁴ஜாலாமாலாகுலா ஸமந்தா ஸதயோஜனானுப²ரணச்சிவேகா³ கத³ரியா தபனா மஹானிரயா சவமானா மச்சுனோ பா⁴யந்தீ’’தி? ‘‘ஆம, மஹாராஜா’’தி.
‘‘Hotu, bhante nāgasena, tathā taṃ sampaṭicchāmi. Ṭhapito hotu arahā tasmiṃ vatthusmiṃ, tasantu avasesā sattā, niraye pana nerayikā sattā dukkhā tibbā kaṭukā vedanā vedayamānā jalitapajjalitasabbaṅgapaccaṅgā ruṇṇakāruññakanditaparidevitalālappitamukhā asayhatibbadukkhābhibhūtā atāṇā asaraṇā asaraṇībhūtā anappasokāturā antimapacchimagatikā ekantasokaparāyaṇā uṇhatikhiṇacaṇḍakharatapanatejavanto bhīmabhayajanakaninādamahāsaddā saṃsibbitachabbidhajālāmālākulā samantā satayojanānupharaṇaccivegā kadariyā tapanā mahānirayā cavamānā maccuno bhāyantī’’ti? ‘‘Āma, mahārājā’’ti.
‘‘நனு, ப⁴ந்தே நாக³ஸேன, நிரயோ ஏகந்தது³க்க²வேத³னீயோ, கிஸ்ஸ பன தே நேரயிகா ஸத்தா ஏகந்தது³க்க²வேத³னீயா நிரயா சவமானா மச்சுனோ பா⁴யந்தி, கிஸ்ஸ நிரயே ரமந்தீ’’தி? ‘‘ந தே, மஹாராஜ, நேரயிகா ஸத்தா நிரயே ரமந்தி, முஞ்சிதுகாமாவ தே நிரயா. மரணஸ்ஸேவ ஸோ 5, மஹாராஜ, ஆனுபா⁴வோ, யேன தேஸங் ஸந்தாஸோ உப்பஜ்ஜதீ’’தி. ‘‘ஏதங் கோ², ப⁴ந்தே நாக³ஸேன, ந ஸத்³த³ஹாமி, யங் முச்சிதுகாமானங் சுதியா ஸந்தாஸோ உப்பஜ்ஜதீதி, ஹாஸனீயங் , ப⁴ந்தே நாக³ஸேன, தங் டா²னங், யங் தே பத்தி²தங் லப⁴ந்தி, காரணேன மங் ஸஞ்ஞாபேஹீ’’தி.
‘‘Nanu, bhante nāgasena, nirayo ekantadukkhavedanīyo, kissa pana te nerayikā sattā ekantadukkhavedanīyā nirayā cavamānā maccuno bhāyanti, kissa niraye ramantī’’ti? ‘‘Na te, mahārāja, nerayikā sattā niraye ramanti, muñcitukāmāva te nirayā. Maraṇasseva so 6, mahārāja, ānubhāvo, yena tesaṃ santāso uppajjatī’’ti. ‘‘Etaṃ kho, bhante nāgasena, na saddahāmi, yaṃ muccitukāmānaṃ cutiyā santāso uppajjatīti, hāsanīyaṃ , bhante nāgasena, taṃ ṭhānaṃ, yaṃ te patthitaṃ labhanti, kāraṇena maṃ saññāpehī’’ti.
‘‘மரணந்தி கோ², மஹாராஜ, ஏதங் அதி³ட்ட²ஸச்சானங் தாஸனீயட்டா²னங், எத்தா²யங் ஜனோ தஸதி ச உப்³பி³ஜ்ஜதி ச. யோ ச, மஹாராஜ, கண்ஹஸப்பஸ்ஸ பா⁴யதி, ஸோ மரணஸ்ஸ பா⁴யந்தோ கண்ஹஸப்பஸ்ஸ பா⁴யதி. யோ ச ஹத்தி²ஸ்ஸ பா⁴யதி…பே॰… ஸீஹஸ்ஸ…பே॰… ப்³யக்³க⁴ஸ்ஸ…பே॰… தீ³பிஸ்ஸ…பே॰… அச்ச²ஸ்ஸ…பே॰… தரச்ச²ஸ்ஸ…பே॰… மஹிங்ஸஸ்ஸ…பே॰… க³வயஸ்ஸ…பே॰… அக்³கி³ஸ்ஸ…பே॰… உத³கஸ்ஸ…பே॰… கா²ணுகஸ்ஸ…பே॰… கண்டகஸ்ஸ பா⁴யதி. யோ ச ஸத்தியா பா⁴யதி, ஸோ மரணஸ்ஸ பா⁴யந்தோ ஸத்தியா பா⁴யதி. மரணஸ்ஸேவ ஸோ 7, மஹாராஜ, ஸரஸஸபா⁴வதேஜோ 8, தஸ்ஸ ஸரஸஸபா⁴வதேஜேன ஸகிலேஸா ஸத்தா மரணஸ்ஸ தஸந்தி பா⁴யந்தி, முச்சிதுகாமாபி, மஹாராஜ, நேரயிகா ஸத்தா மரணஸ்ஸ தஸந்தி பா⁴யந்தி.
‘‘Maraṇanti kho, mahārāja, etaṃ adiṭṭhasaccānaṃ tāsanīyaṭṭhānaṃ, etthāyaṃ jano tasati ca ubbijjati ca. Yo ca, mahārāja, kaṇhasappassa bhāyati, so maraṇassa bhāyanto kaṇhasappassa bhāyati. Yo ca hatthissa bhāyati…pe… sīhassa…pe… byagghassa…pe… dīpissa…pe… acchassa…pe… taracchassa…pe… mahiṃsassa…pe… gavayassa…pe… aggissa…pe… udakassa…pe… khāṇukassa…pe… kaṇṭakassa bhāyati. Yo ca sattiyā bhāyati, so maraṇassa bhāyanto sattiyā bhāyati. Maraṇasseva so 9, mahārāja, sarasasabhāvatejo 10, tassa sarasasabhāvatejena sakilesā sattā maraṇassa tasanti bhāyanti, muccitukāmāpi, mahārāja, nerayikā sattā maraṇassa tasanti bhāyanti.
‘‘இத⁴, மஹாராஜ, புரிஸஸ்ஸ காயே மேதோ³ க³ண்டி² உப்பஜ்ஜெய்ய. ஸோ தேன ரோகே³ன து³க்கி²தோ உபத்³த³வா பரிமுச்சிதுகாமோ பி⁴ஸக்கங் ஸல்லகத்தங் ஆமந்தாபெய்ய. தஸ்ஸ வசனங் ஸோ பி⁴ஸக்கோ ஸல்லகத்தோ ஸம்படிச்சி²த்வா தஸ்ஸ ரோக³ஸ்ஸ உத்³த⁴ரணாய உபகரணங் உபட்டா²பெய்ய, ஸத்த²கங் திகி²ணங் கரெய்ய , யமகஸலாகா 11 அக்³கி³ம்ஹி பக்கி²பெய்ய, கா²ரலவணங் நிஸதா³ய பிஸாபெய்ய, அபி நு கோ², மஹாராஜ, தஸ்ஸ ஆதுரஸ்ஸ திகி²ணஸத்த²கச்சே²த³னேன யமகஸலாகாத³ஹனேன கா²ரலோணப்பவேஸனேன தாஸோ உப்பஜ்ஜெய்யா’’தி? ‘‘ஆம ப⁴ந்தே’’தி. ‘‘இதி, மஹாராஜ, தஸ்ஸ ஆதுரஸ்ஸ ரோகா³ முச்சிதுகாமஸ்ஸாபி வேத³னாப⁴யா ஸந்தாஸோ உப்பஜ்ஜதி. ஏவமேவ கோ², மஹாராஜ, நிரயா முச்சிதுகாமானம்பி நேரயிகானங் ஸத்தானங் மரணப⁴யா ஸந்தாஸோ உப்பஜ்ஜதி.
‘‘Idha, mahārāja, purisassa kāye medo gaṇṭhi uppajjeyya. So tena rogena dukkhito upaddavā parimuccitukāmo bhisakkaṃ sallakattaṃ āmantāpeyya. Tassa vacanaṃ so bhisakko sallakatto sampaṭicchitvā tassa rogassa uddharaṇāya upakaraṇaṃ upaṭṭhāpeyya, satthakaṃ tikhiṇaṃ kareyya , yamakasalākā 12 aggimhi pakkhipeyya, khāralavaṇaṃ nisadāya pisāpeyya, api nu kho, mahārāja, tassa āturassa tikhiṇasatthakacchedanena yamakasalākādahanena khāraloṇappavesanena tāso uppajjeyyā’’ti? ‘‘Āma bhante’’ti. ‘‘Iti, mahārāja, tassa āturassa rogā muccitukāmassāpi vedanābhayā santāso uppajjati. Evameva kho, mahārāja, nirayā muccitukāmānampi nerayikānaṃ sattānaṃ maraṇabhayā santāso uppajjati.
‘‘இத⁴, மஹாராஜ, புரிஸோ இஸ்ஸராபராதி⁴கோ ப³த்³தோ⁴ ஸங்க²லிகப³ந்த⁴னேன க³ப்³பே⁴ பக்கி²த்தோ பரிமுச்சிதுகாமோ அஸ்ஸ, தமேனங் ஸோ இஸ்ஸரோ மோசேதுகாமோ பக்கோஸாபெய்ய. அபி நு கோ², மஹாராஜ, தஸ்ஸ இஸ்ஸராபராதி⁴கஸ்ஸ புரிஸஸ்ஸ ‘கததோ³ஸோ அஹ’ந்தி ஜானந்தஸ்ஸ இஸ்ஸரத³ஸ்ஸனேன ஸந்தாஸோ உப்பஜ்ஜெய்யா’’தி? ‘‘ஆம ப⁴ந்தே’’தி. ‘‘இதி, மஹாராஜ, தஸ்ஸ இஸ்ஸராபராதி⁴கஸ்ஸ புரிஸஸ்ஸ பரிமுச்சிதுகாமாஸ்ஸாபி இஸ்ஸரப⁴யா ஸந்தாஸோ உப்பஜ்ஜதி. ஏவமேவ கோ², மஹாராஜ, நிரயா முச்சிதுகாமானம்பி நேரயிகானங் ஸத்தானங் மரணப⁴யா ஸந்தாஸோ உப்பஜ்ஜதீ’’தி.
‘‘Idha, mahārāja, puriso issarāparādhiko baddho saṅkhalikabandhanena gabbhe pakkhitto parimuccitukāmo assa, tamenaṃ so issaro mocetukāmo pakkosāpeyya. Api nu kho, mahārāja, tassa issarāparādhikassa purisassa ‘katadoso aha’nti jānantassa issaradassanena santāso uppajjeyyā’’ti? ‘‘Āma bhante’’ti. ‘‘Iti, mahārāja, tassa issarāparādhikassa purisassa parimuccitukāmāssāpi issarabhayā santāso uppajjati. Evameva kho, mahārāja, nirayā muccitukāmānampi nerayikānaṃ sattānaṃ maraṇabhayā santāso uppajjatī’’ti.
‘‘அபரம்பி , ப⁴ந்தே, உத்தரிங் காரணங் ப்³ரூஹி, யேனாஹங் காரணேன ஓகப்பெய்ய’’ந்தி. ‘‘இத⁴, மஹாராஜ, புரிஸோ த³ட்ட²விஸேன ஆஸீவிஸேன த³ட்டோ² ப⁴வெய்ய, ஸோ தேன விஸவிகாரேன பதெய்ய உப்பதெய்ய வட்டெய்ய பவட்டெய்ய, அத²ஞ்ஞதரோ புரிஸோ ப³லவந்தேன மந்தபதே³ன தங் த³ட்ட²விஸங் ஆஸீவிஸங் ஆனெத்வா தங் த³ட்ட²விஸங் பச்சாசமாபெய்ய, அபி நு கோ², மஹாராஜ, தஸ்ஸ விஸக³தஸ்ஸ புரிஸஸ்ஸ தஸ்மிங் த³ட்ட²விஸே ஸப்பே ஸொத்தி²ஹேது உபக³ச்ச²ந்தே ஸந்தாஸோ உப்பஜ்ஜெய்யா’’தி? ‘‘ஆம ப⁴ந்தே’’தி. இதி, மஹாராஜ, ததா²ரூபே அஹிம்ஹி ஸொத்தி²ஹேதுபி உபக³ச்ச²ந்தே தஸ்ஸ ஸந்தாஸோ உப்பஜ்ஜதி. ஏவமேவ கோ², மஹாராஜ, நிரயா முச்சிதுகாமானம்பி நேரயிகானங் ஸந்தானங் மரணப⁴யா ஸந்தாஸோ உப்பஜ்ஜதி. அனிட்ட²ங், மஹாராஜ, ஸப்³ப³ஸத்தானங் மரணங், தஸ்மா நேரயிகா ஸத்தா நிரயா பரிமுச்சிதுகாமாபி மச்சுனோ பா⁴யந்தீ’’தி. ‘‘ஸாது⁴, ப⁴ந்தே நாக³ஸேன, ஏவமேதங் ததா² ஸம்படிச்சா²மீ’’தி.
‘‘Aparampi , bhante, uttariṃ kāraṇaṃ brūhi, yenāhaṃ kāraṇena okappeyya’’nti. ‘‘Idha, mahārāja, puriso daṭṭhavisena āsīvisena daṭṭho bhaveyya, so tena visavikārena pateyya uppateyya vaṭṭeyya pavaṭṭeyya, athaññataro puriso balavantena mantapadena taṃ daṭṭhavisaṃ āsīvisaṃ ānetvā taṃ daṭṭhavisaṃ paccācamāpeyya, api nu kho, mahārāja, tassa visagatassa purisassa tasmiṃ daṭṭhavise sappe sotthihetu upagacchante santāso uppajjeyyā’’ti? ‘‘Āma bhante’’ti. Iti, mahārāja, tathārūpe ahimhi sotthihetupi upagacchante tassa santāso uppajjati. Evameva kho, mahārāja, nirayā muccitukāmānampi nerayikānaṃ santānaṃ maraṇabhayā santāso uppajjati. Aniṭṭhaṃ, mahārāja, sabbasattānaṃ maraṇaṃ, tasmā nerayikā sattā nirayā parimuccitukāmāpi maccuno bhāyantī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
மச்சுபா⁴யனாபா⁴யனபஞ்ஹோ ததியோ.
Maccubhāyanābhāyanapañho tatiyo.
Footnotes:
