| Library / Tipiṭaka / තිපිටක • Tipiṭaka / අපදානපාළි • Apadānapāḷi |
4. මධුදායකත්‌ථෙරඅපදානං
4. Madhudāyakattheraapadānaṃ
333.
333.
‘‘සින්‌ධුයා නදියා තීරෙ, සුකතො අස්‌සමො මම;
‘‘Sindhuyā nadiyā tīre, sukato assamo mama;
තත්‌ථ වාචෙමහං සිස්‌සෙ, ඉතිහාසං සලක්‌ඛණං.
Tattha vācemahaṃ sisse, itihāsaṃ salakkhaṇaṃ.
334.
334.
‘‘ධම්‌මකාමා විනීතා තෙ, සොතුකාමා සුසාසනං;
‘‘Dhammakāmā vinītā te, sotukāmā susāsanaṃ;
ඡළඞ්‌ගෙ පාරමිප්‌පත්‌තා, සින්‌ධුකූලෙ වසන්‌ති තෙ.
Chaḷaṅge pāramippattā, sindhukūle vasanti te.
335.
335.
‘‘උප්‌පාතගමනෙ චෙව, ලක්‌ඛණෙසු ච කොවිදා;
‘‘Uppātagamane ceva, lakkhaṇesu ca kovidā;
උත්‌තමත්‌ථං ගවෙසන්‌තා, වසන්‌ති විපිනෙ තදා.
Uttamatthaṃ gavesantā, vasanti vipine tadā.
336.
336.
‘‘සුමෙධො නාම සම්‌බුද්‌ධො, ලොකෙ උප්‌පජ්‌ජි තාවදෙ;
‘‘Sumedho nāma sambuddho, loke uppajji tāvade;
අම්‌හාකං අනුකම්‌පන්‌තො, උපාගච්‌ඡි විනායකො.
Amhākaṃ anukampanto, upāgacchi vināyako.
337.
337.
‘‘උපාගතං මහාවීරං, සුමෙධං ලොකනායකං;
‘‘Upāgataṃ mahāvīraṃ, sumedhaṃ lokanāyakaṃ;
තිණසන්‌ථාරකං කත්‌වා, ලොකජෙට්‌ඨස්‌සදාසහං.
Tiṇasanthārakaṃ katvā, lokajeṭṭhassadāsahaṃ.
338.
338.
‘‘විපිනාතො මධුං ගය්‌හ, බුද්‌ධසෙට්‌ඨස්‌සදාසහං;
‘‘Vipināto madhuṃ gayha, buddhaseṭṭhassadāsahaṃ;
සම්‌බුද්‌ධො පරිභුඤ්‌ජිත්‌වා, ඉදං වචනමබ්‍රවි.
Sambuddho paribhuñjitvā, idaṃ vacanamabravi.
339.
339.
‘‘‘යො තං අදාසි මධුං මෙ, පසන්‌නො සෙහි පාණිභි;
‘‘‘Yo taṃ adāsi madhuṃ me, pasanno sehi pāṇibhi;
තමහං කිත්‌තයිස්‌සාමි, සුණාථ මම භාසතො.
Tamahaṃ kittayissāmi, suṇātha mama bhāsato.
340.
340.
‘‘‘ඉමිනා මධුදානෙන, තිණසන්‌ථාරකෙන ච;
‘‘‘Iminā madhudānena, tiṇasanthārakena ca;
තිංස කප්‌පසහස්‌සානි, දෙවලොකෙ රමිස්‌සති.
Tiṃsa kappasahassāni, devaloke ramissati.
341.
341.
‘‘‘තිංස කප්‌පසහස්‌සම්‌හි, ඔක්‌කාකකුලසම්‌භවො;
‘‘‘Tiṃsa kappasahassamhi, okkākakulasambhavo;
ගොතමො නාම ගොත්‌තෙන, සත්‌ථා ලොකෙ භවිස්‌සති.
Gotamo nāma gottena, satthā loke bhavissati.
342.
342.
‘‘‘තස්‌ස ධම්‌මෙසු දායාදො, ඔරසො ධම්‌මනිම්‌මිතො;
‘‘‘Tassa dhammesu dāyādo, oraso dhammanimmito;
සබ්‌බාසවෙ පරිඤ්‌ඤාය, නිබ්‌බායිස්‌සතිනාසවො.
Sabbāsave pariññāya, nibbāyissatināsavo.
343.
343.
‘‘‘දෙවලොකා ඉධාගන්‌ත්‌වා, මාතුකුච්‌ඡිං උපාගතෙ;
‘‘‘Devalokā idhāgantvā, mātukucchiṃ upāgate;
මධුවස්‌සං පවස්‌සිත්‌ථ, ඡාදයං මධුනා මහිං’.
Madhuvassaṃ pavassittha, chādayaṃ madhunā mahiṃ’.
344.
344.
‘‘මයි නික්‌ඛන්‌තමත්‌තම්‌හි, කුච්‌ඡියා ච සුදුත්‌තරා;
‘‘Mayi nikkhantamattamhi, kucchiyā ca suduttarā;
තත්‍රාපි මධුවස්‌සං මෙ, වස්‌සතෙ නිච්‌චකාලිකං.
Tatrāpi madhuvassaṃ me, vassate niccakālikaṃ.
345.
345.
‘‘අගාරා අභිනික්‌ඛම්‌ම, පබ්‌බජිං අනගාරියං;
‘‘Agārā abhinikkhamma, pabbajiṃ anagāriyaṃ;
ලාභී අන්‌නස්‌ස පානස්‌ස, මධුදානස්‌සිදං ඵලං.
Lābhī annassa pānassa, madhudānassidaṃ phalaṃ.
346.
346.
‘‘සබ්‌බකාමසමිද්‌ධොහං, භවිත්‌වා දෙවමානුසෙ;
‘‘Sabbakāmasamiddhohaṃ, bhavitvā devamānuse;
තෙනෙව මධුදානෙන, පත්‌තොම්‌හි ආසවක්‌ඛයං.
Teneva madhudānena, pattomhi āsavakkhayaṃ.
347.
347.
සුඤ්‌ඤෙ ඝරෙ මණ්‌ඩපරුක්‌ඛමූලකෙ, වසාමි නිච්‌චං සුඛිතො අනාසවො.
Suññe ghare maṇḍaparukkhamūlake, vasāmi niccaṃ sukhito anāsavo.
348.
348.
අජ්‌ජ මෙ ආසවා ඛීණා, නත්‌ථි දානි පුනබ්‌භවො.
Ajja me āsavā khīṇā, natthi dāni punabbhavo.
349.
349.
‘‘තිංසකප්‌පසහස්‌සම්‌හි, යං දානමදදිං තදා;
‘‘Tiṃsakappasahassamhi, yaṃ dānamadadiṃ tadā;
දුග්‌ගතිං නාභිජානාමි, මධුදානස්‌සිදං ඵලං.
Duggatiṃ nābhijānāmi, madhudānassidaṃ phalaṃ.
350.
350.
‘‘කිලෙසා ඣාපිතා මය්‌හං, භවා සබ්‌බෙ සමූහතා;
‘‘Kilesā jhāpitā mayhaṃ, bhavā sabbe samūhatā;
සබ්‌බාසවා පරික්‌ඛීණා, නත්‌ථි දානි පුනබ්‌භවො.
Sabbāsavā parikkhīṇā, natthi dāni punabbhavo.
351.
351.
‘‘ස්‌වාගතං වත මෙ ආසි…පෙ.… කතං බුද්‌ධස්‌ස සාසනං.
‘‘Svāgataṃ vata me āsi…pe… kataṃ buddhassa sāsanaṃ.
352.
352.
‘‘පටිසම්‌භිදා චතස්‌සො…පෙ.… කතං බුද්‌ධස්‌ස සාසනං’’.
‘‘Paṭisambhidā catasso…pe… kataṃ buddhassa sāsanaṃ’’.
ඉත්‌ථං සුදං ආයස්‌මා මධුදායකො ථෙරො ඉමා ගාථායො අභාසිත්‌ථාති.
Itthaṃ sudaṃ āyasmā madhudāyako thero imā gāthāyo abhāsitthāti.
මධුදායකත්‌ථෙරස්‌සාපදානං චතුත්‌ථං.
Madhudāyakattherassāpadānaṃ catutthaṃ.
Footnotes:
