| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
8. мад̇хубин̣д̣игасуд̇д̇аван̣н̣анаа
8. Madhupiṇḍikasuttavaṇṇanā
199. звам̣ мз суд̇анд̇и мад̇хубин̣д̣игасуд̇д̇ам̣. д̇ад̇т̇а махаавананд̇и химаванд̇зна сад̣̇д̇хим̣ згааб̣ад̣̇д̇хам̣ аробимам̣ ж̇аад̇иванам̣, на яат̇аа взсаалияам̣ робид̇ааробид̇амиссагам̣. д̣̇иваавихаарааяаад̇и д̣̇иваа бадисаллаанад̇т̇ааяа. б̣злуваладтигааяаад̇и д̇арун̣аб̣злуваругкасса. д̣̇ан̣д̣абаан̣ийд̇и на ж̇араад̣̇уб̣б̣алад̇ааяа д̣̇ан̣д̣ахад̇т̇о. аяан̃хи д̇арун̣о батамаваяз тид̇о, д̣̇ан̣д̣ажид̇д̇ад̇ааяа бана суван̣н̣ад̣̇ан̣д̣ам̣ г̇ахзд̇ваа вижарад̇и, д̇асмаа д̣̇ан̣д̣абаан̣ийд̇и вуд̇д̇о. ж̇ан̇гхаавихааранд̇и ж̇ан̇гхаагиламат̇авинод̣̇анад̇т̇ам̣ ж̇ан̇гхаажаарам̣. анужан̇гамамаано анувижарамаанод̇и аараамад̣̇ассана-ванад̣̇ассана-баб̣б̣ад̇ад̣̇ассанаад̣̇ийнам̣ ад̇т̇ааяа ид̇о жид̇о жа вижарамаано. ад̇хижжанигкамано гирзса гад̣̇аажи д̣̇зва нигкамид̇ваа звам̣ вижарад̇и. д̣̇ан̣д̣амолуб̣бхаад̇и д̣̇ан̣д̣ам̣ олумбхид̇ваа г̇обаалагад̣̇аараго вияа д̣̇ан̣д̣ам̣ бурад̇о табзд̇ваа д̣̇ан̣д̣амад̇т̇агз д̣̇вз хад̇т̇з бад̇идтаабзд̇ваа бидтибаан̣им̣ ханугзна уббийл̣зд̇ваа згаманд̇ам̣ адтааси.
199. Evaṃ me sutanti madhupiṇḍikasuttaṃ. Tattha mahāvananti himavantena saddhiṃ ekābaddhaṃ aropimaṃ jātivanaṃ, na yathā vesāliyaṃ ropitāropitamissakaṃ. Divāvihārāyāti divā paṭisallānatthāya. Beluvalaṭṭhikāyāti taruṇabeluvarukkhassa. Daṇḍapāṇīti na jarādubbalatāya daṇḍahattho. Ayañhi taruṇo paṭhamavaye ṭhito, daṇḍacittatāya pana suvaṇṇadaṇḍaṃ gahetvā vicarati, tasmā daṇḍapāṇīti vutto. Jaṅghāvihāranti jaṅghākilamathavinodanatthaṃ jaṅghācāraṃ. Anucaṅkamamāno anuvicaramānoti ārāmadassana-vanadassana-pabbatadassanādīnaṃ atthāya ito cito ca vicaramāno. Adhiccanikkhamano kiresa kadāci deva nikkhamitvā evaṃ vicarati. Daṇḍamolubbhāti daṇḍaṃ olumbhitvā gopālakadārako viya daṇḍaṃ purato ṭhapetvā daṇḍamatthake dve hatthe patiṭṭhāpetvā piṭṭhipāṇiṃ hanukena uppīḷetvā ekamantaṃ aṭṭhāsi.
200. гим̣ваад̣̇ийд̇и гим̣д̣̇идтиго. гимагкааяийд̇и гим̣ гат̇зд̇и. аяам̣ рааж̇аа бхаг̇аванд̇ам̣ аванд̣̇ид̇ваа бадисант̇аарамад̇д̇агамзва гад̇ваа бан̃хам̣ бужчад̇и. д̇амби на ан̃н̃аад̇угаамад̇ааяа, ажид̇д̇ийгаарзна бужчад̇и. гасмаа? д̣̇звад̣̇ад̇д̇асса багкиго гирзса. д̣̇звад̣̇ад̇д̇о ад̇д̇ано санд̇игам̣ ааг̇ажчамаанз д̇ат̇ааг̇ад̇з бхинд̣̇ад̇и. со гира звам̣ вад̣̇зд̇и ‘‘саман̣о г̇од̇амо амхаагам̣ гулзна сад̣̇д̇хим̣ взрий, на но гуласса вуд̣̇д̇хим̣ ижчад̇и. бхаг̇инийби мз жаггавад̇д̇ибарибхог̇аа, д̇ам̣ бахааяа ‘нассад̇зсаа’д̇и нигкамид̇ваа баб̣б̣аж̇и. бхааг̇инзяяоби мз жаггавад̇д̇иб̣ийж̇анд̇и н̃ад̇ваа амхаагам̣ гуласса вад̣дхияаа ад̇уссанд̇о ‘нассад̇зд̇а’нд̇и д̇амби д̣̇ахарагаалзязва баб̣б̣ааж̇зси. ахам̣ бана д̇зна винаа вад̇д̇ид̇ум̣ асаггонд̇о анубаб̣б̣аж̇ид̇о. звам̣ баб̣б̣аж̇ид̇амби мам̣ баб̣б̣аж̇ид̇ад̣̇ивасад̇о бадтааяа на уж̇угзхи агкийхи ологзд̇и. барисамаж̇жхз бхаасанд̇оби махаапарасунаа бахаранд̇о вияа аабааяиго д̣̇звад̣̇ад̇д̇од̇иаад̣̇ийни бхаасад̇ий’’д̇и. звам̣ аяамби рааж̇аа д̣̇звад̣̇ад̇д̇зна бхинно, д̇асмаа звамагааси.
200.Kiṃvādīti kiṃdiṭṭhiko. Kimakkhāyīti kiṃ katheti. Ayaṃ rājā bhagavantaṃ avanditvā paṭisanthāramattakameva katvā pañhaṃ pucchati. Tampi na aññātukāmatāya, acittīkārena pucchati. Kasmā? Devadattassa pakkhiko kiresa. Devadatto attano santikaṃ āgacchamāne tathāgate bhindati. So kira evaṃ vadeti ‘‘samaṇo gotamo amhākaṃ kulena saddhiṃ verī, na no kulassa vuddhiṃ icchati. Bhaginīpi me cakkavattiparibhogā, taṃ pahāya ‘nassatesā’ti nikkhamitvā pabbaji. Bhāgineyyopi me cakkavattibījanti ñatvā amhākaṃ kulassa vaḍḍhiyā atussanto ‘nassateta’nti tampi daharakāleyeva pabbājesi. Ahaṃ pana tena vinā vattituṃ asakkonto anupabbajito. Evaṃ pabbajitampi maṃ pabbajitadivasato paṭṭhāya na ujukehi akkhīhi oloketi. Parisamajjhe bhāsantopi mahāpharasunā paharanto viya āpāyiko devadattotiādīni bhāsatī’’ti. Evaṃ ayampi rājā devadattena bhinno, tasmā evamakāsi.
ат̇а бхаг̇аваа яат̇аа аяам̣ рааж̇аа маяаа бан̃хз бужчид̇з на гат̇зд̇ийд̇и вад̇д̇ум̣ на лабхад̇и, яат̇аа жа бхаасид̇асса ад̇т̇ам̣ на ж̇аанаад̇и, звамасса гат̇зссаамийд̇и д̇ассаанужчавигам̣ гат̇знд̇о яат̇ааваад̣̇ий код̇иаад̣̇имааха.
Atha bhagavā yathā ayaṃ rājā mayā pañhe pucchite na kathetīti vattuṃ na labhati, yathā ca bhāsitassa atthaṃ na jānāti, evamassa kathessāmīti tassānucchavikaṃ kathento yathāvādī khotiādimāha.
д̇ад̇т̇а на гзнажи логз виг̇г̇аяха д̇идтад̇ийд̇и логз гзнажи сад̣̇д̇хим̣ виг̇г̇аахигагат̇ам̣ на гарод̇и на вивад̣̇ад̇и. д̇ат̇ааг̇ад̇о хи логзна сад̣̇д̇хим̣ на вивад̣̇ад̇и; лого бана д̇ат̇ааг̇ад̇зна сад̣̇д̇хим̣ анижжанд̇и вуд̇д̇з нижжанд̇и вад̣̇амаано, д̣̇угкам̣, анад̇д̇аа, асубханд̇и вуд̇д̇з субханд̇и вад̣̇амаано вивад̣̇ад̇и. д̇знзвааха ‘‘наахам̣, бхигкавз, логзна вивад̣̇аами, логова ко, бхигкавз, маяаа вивад̣̇ад̇и, д̇ат̇аа на, бхигкавз, д̇хаммаваад̣̇ий гзнажи логасмим̣ вивад̣̇ад̇и, ад̇хаммаваад̣̇ийва ко, бхигкавз, вивад̣̇ад̇ий’’д̇и (сам̣. ни. 3.94). яат̇аад̇и язна гааран̣зна. гаамзхийд̇и вад̇т̇угаамзхиби гилзсагаамзхиби. д̇ам̣ б̣раахман̣анд̇и д̇ам̣ кийн̣аасавам̣ б̣раахман̣ам̣. агат̇ам̣гат̇инд̇и ниб̣б̣ижигижчам̣. чиннагуггужжанд̇и виббадисаарагуггужжасса жзва хад̇т̇абаад̣̇агуггужжасса жа чиннад̇д̇аа чиннагуггужжам̣. бхаваабхавзд̇и бунаббунаб̣бхавз, хийнабан̣ийд̇з ваа бхавз, бан̣ийд̇о хи бхаво вуд̣̇д̇хиббад̇д̇о абхавод̇и вужжад̇и. сан̃н̃аад̇и гилзсасан̃н̃аа. гилзсааязва ваа ид̇ха сан̃н̃аанаамзна вуд̇д̇аа, д̇асмаа язна гааран̣зна гаамзхи висам̣яуд̇д̇ам̣ вихаранд̇ам̣ д̇ам̣ логз ниннааваад̣̇им̣ кийн̣аасаваб̣раахман̣ам̣ гилзсасан̃н̃аа наанусзнд̇и, д̇ан̃жа гааран̣ам̣ ахам̣ вад̣̇аамийд̇и аяамзд̇т̇а ад̇т̇о. ид̇и бхаг̇аваа ад̇д̇ано кийн̣аасавабхаавам̣ д̣̇ийбзд̇и. ниллаал̣зд̇ваад̇и нийхарид̇ваа гийл̣аабзд̇ваа. д̇ивисааканд̇и д̇исаакам̣. налаадиганд̇и валибхан̇г̇ам̣ налаадз д̇иссо рааж̇ияо д̣̇ассзнд̇о валибхан̇г̇ам̣ вудтаабзд̇ваад̇и ад̇т̇о. д̣̇ан̣д̣амолуб̣бхаад̇и д̣̇ан̣д̣ам̣ уббийл̣зд̇ваа. ‘‘д̣̇ан̣д̣амаалуб̣бхаа’’д̇иби баато, г̇ахзд̇ваа баггаамийд̇и ад̇т̇о.
Tattha na kenaci loke viggayha tiṭṭhatīti loke kenaci saddhiṃ viggāhikakathaṃ na karoti na vivadati. Tathāgato hi lokena saddhiṃ na vivadati; loko pana tathāgatena saddhiṃ aniccanti vutte niccanti vadamāno, dukkhaṃ, anattā, asubhanti vutte subhanti vadamāno vivadati. Tenevāha ‘‘nāhaṃ, bhikkhave, lokena vivadāmi, lokova kho, bhikkhave, mayā vivadati, tathā na, bhikkhave, dhammavādī kenaci lokasmiṃ vivadati, adhammavādīva kho, bhikkhave, vivadatī’’ti (saṃ. ni. 3.94). Yathāti yena kāraṇena. Kāmehīti vatthukāmehipi kilesakāmehipi. Taṃ brāhmaṇanti taṃ khīṇāsavaṃ brāhmaṇaṃ. Akathaṃkathinti nibbicikicchaṃ. Chinnakukkuccanti vippaṭisārakukkuccassa ceva hatthapādakukkuccassa ca chinnattā chinnakukkuccaṃ. Bhavābhaveti punappunabbhave, hīnapaṇīte vā bhave, paṇīto hi bhavo vuddhippatto abhavoti vuccati. Saññāti kilesasaññā. Kilesāyeva vā idha saññānāmena vuttā, tasmā yena kāraṇena kāmehi visaṃyuttaṃ viharantaṃ taṃ loke ninnāvādiṃ khīṇāsavabrāhmaṇaṃ kilesasaññā nānusenti, tañca kāraṇaṃ ahaṃ vadāmīti ayamettha attho. Iti bhagavā attano khīṇāsavabhāvaṃ dīpeti. Nillāḷetvāti nīharitvā kīḷāpetvā. Tivisākhanti tisākhaṃ. Nalāṭikanti valibhaṅgaṃ nalāṭe tisso rājiyo dassento valibhaṅgaṃ vuṭṭhāpetvāti attho. Daṇḍamolubbhāti daṇḍaṃ uppīḷetvā. ‘‘Daṇḍamālubbhā’’tipi pāṭho, gahetvā pakkāmīti attho.
201. ан̃н̃ад̇арод̇и наамзна абаагадо зго бхигку. со гира анусанд̇хигусало, бхаг̇авад̇аа яат̇аа д̣̇ан̣д̣абаан̣ий на ж̇аанаад̇и, д̇ат̇аа маяаа гат̇ид̇анд̇и вуд̇д̇з гинд̇и ну ко бхаг̇авад̇аа авин̃н̃зяяам̣ гад̇ваа бан̃хо гат̇ид̇од̇и анусанд̇хим̣ г̇ахзд̇ваа д̣̇асаб̣алам̣ яаажид̇ваа имам̣ бан̃хам̣ бхигкусан̇гхасса баагадам̣ гариссаамийд̇и удтааяаасанаа згам̣сам̣ уд̇д̇араасан̇г̇ам̣ гарид̇ваа д̣̇асанакасамуж̇ж̇алам̣ ан̃ж̇алим̣ баг̇г̇аяха гим̣ваад̣̇ий бана, бханд̇з бхаг̇аваад̇иаад̣̇имааха.
201.Aññataroti nāmena apākaṭo eko bhikkhu. So kira anusandhikusalo, bhagavatā yathā daṇḍapāṇī na jānāti, tathā mayā kathitanti vutte kinti nu kho bhagavatā aviññeyyaṃ katvā pañho kathitoti anusandhiṃ gahetvā dasabalaṃ yācitvā imaṃ pañhaṃ bhikkhusaṅghassa pākaṭaṃ karissāmīti uṭṭhāyāsanā ekaṃsaṃ uttarāsaṅgaṃ karitvā dasanakhasamujjalaṃ añjaliṃ paggayha kiṃvādī pana, bhante bhagavātiādimāha.
яад̇онид̣̇аананд̇и бхааванабум̣сагам̣ зд̇ам̣, язна гааран̣зна яасмим̣ гааран̣з сад̇ийд̇и ад̇т̇о. бабан̃жасан̃н̃аасан̇каад̇и зд̇т̇а сан̇каад̇и годтаасо. бабан̃жасан̃н̃аад̇и д̇ан̣хаамаанад̣̇идтибабан̃жасамбаяуд̇д̇аа сан̃н̃аа , сан̃н̃аанаамзна ваа бабан̃жааязва вуд̇д̇аа. д̇асмаа бабан̃жагодтаасаад̇и аяамзд̇т̇а ад̇т̇о. самуд̣̇аажаранд̇ийд̇и бавад̇д̇анд̇и. зд̇т̇а жз над̇т̇и абхинанд̣̇ид̇аб̣б̣анд̇и яасмим̣ д̣̇ваад̣̇асааяад̇анасан̇каад̇з гааран̣з сад̇и бабан̃жасан̃н̃аасан̇каа самуд̣̇аажаранд̇и, зд̇т̇а згааяад̇анамби жз абхинанд̣̇ид̇аб̣б̣ам̣ абхивад̣̇ид̇аб̣б̣ам̣ аж̇жхосид̇аб̣б̣ам̣ над̇т̇ийд̇и ад̇т̇о. д̇ад̇т̇а абхининд̣̇ид̇аб̣б̣анд̇и ахам̣ маманд̇и абхинанд̣̇ид̇аб̣б̣ам̣. абхивад̣̇ид̇аб̣б̣анд̇и ахам̣ мамаад̇и вад̇д̇аб̣б̣ам̣. аж̇жхосид̇аб̣б̣анд̇и аж̇жхосид̇ваа г̇илид̇ваа баринидтабзд̇ваа г̇ахзд̇аб̣б̣аяуд̇д̇ам̣. зд̇знзд̇т̇а д̇ан̣хаад̣̇ийнам̣язва аббавад̇д̇им̣ гат̇зд̇и. зсзванд̇од̇и аяам̣ абхинанд̣̇анаад̣̇ийнам̣ над̇т̇ибхаавова рааг̇аанусаяаад̣̇ийнам̣ анд̇о. зсзва наяо саб̣б̣ад̇т̇а.
Yatonidānanti bhāvanapuṃsakaṃ etaṃ, yena kāraṇena yasmiṃ kāraṇe satīti attho. Papañcasaññāsaṅkhāti ettha saṅkhāti koṭṭhāso. Papañcasaññāti taṇhāmānadiṭṭhipapañcasampayuttā saññā , saññānāmena vā papañcāyeva vuttā. Tasmā papañcakoṭṭhāsāti ayamettha attho. Samudācarantīti pavattanti. Ettha ce natthi abhinanditabbanti yasmiṃ dvādasāyatanasaṅkhāte kāraṇe sati papañcasaññāsaṅkhā samudācaranti, ettha ekāyatanampi ce abhinanditabbaṃ abhivaditabbaṃ ajjhositabbaṃ natthīti attho. Tattha abhininditabbanti ahaṃ mamanti abhinanditabbaṃ. Abhivaditabbanti ahaṃ mamāti vattabbaṃ. Ajjhositabbanti ajjhositvā gilitvā pariniṭṭhapetvā gahetabbayuttaṃ. Etenettha taṇhādīnaṃyeva appavattiṃ katheti. Esevantoti ayaṃ abhinandanādīnaṃ natthibhāvova rāgānusayādīnaṃ anto. Eseva nayo sabbattha.
д̣̇ан̣д̣аад̣̇аанаад̣̇ийсу бана яааяа жзд̇анааяа д̣̇ан̣д̣ам̣ аад̣̇ияад̇и, саа д̣̇ан̣д̣аад̣̇аанам̣. яааяа сад̇т̇ам̣ аад̣̇ияад̇и бараамасад̇и, саа сад̇т̇аад̣̇аанам̣. мад̇т̇агаббад̇д̇ам̣ галахам̣. наанааг̇аахамад̇д̇ам̣ виг̇г̇ахам̣. наанааваад̣̇амад̇д̇ам̣ виваад̣̇ам̣. д̇увам̣ д̇уванд̇и звам̣ бавад̇д̇ам̣ д̇увам̣ д̇увам̣. бияасун̃н̃агаран̣ам̣ бзсун̃н̃ам̣. аяат̇аасабхаавам̣ мусааваад̣̇ам̣ гарод̇и, саа мусааваад̣̇од̇и взд̣̇ид̇аб̣б̣аа. зд̇т̇зд̇зд̇и зд̇т̇а д̣̇ваад̣̇асасу ааяад̇анзсу зд̇з гилзсаа. гилзсаа хи уббаж̇ж̇амаанааби д̣̇ваад̣̇асааяад̇анаани ниссааяа уббаж̇ж̇анд̇и, нируж̇жхамаанааби д̣̇ваад̣̇асасу ааяад̇анзсуязва нируж̇жханд̇и. звам̣ яад̇т̇уббаннаа, д̇ад̇т̇зва нируд̣̇д̇хаа хонд̇и. свааяамад̇т̇о самуд̣̇аяасажжабан̃хзна д̣̇ийбзд̇аб̣б̣о –
Daṇḍādānādīsu pana yāya cetanāya daṇḍaṃ ādiyati, sā daṇḍādānaṃ. Yāya satthaṃ ādiyati parāmasati, sā satthādānaṃ. Matthakappattaṃ kalahaṃ. Nānāgāhamattaṃ viggahaṃ. Nānāvādamattaṃ vivādaṃ. Tuvaṃ tuvanti evaṃ pavattaṃ tuvaṃ tuvaṃ. Piyasuññakaraṇaṃ pesuññaṃ. Ayathāsabhāvaṃ musāvādaṃ karoti, sā musāvādoti veditabbā. Ettheteti ettha dvādasasu āyatanesu ete kilesā. Kilesā hi uppajjamānāpi dvādasāyatanāni nissāya uppajjanti, nirujjhamānāpi dvādasasu āyatanesuyeva nirujjhanti. Evaṃ yatthuppannā, tattheva niruddhā honti. Svāyamattho samudayasaccapañhena dīpetabbo –
‘‘саа ко банзсаа д̇ан̣хаа гад̇т̇а уббаж̇ж̇амаанаа уббаж̇ж̇ад̇и, гад̇т̇а нивисамаанаа нивисад̇ий’’д̇и вад̇ваа – ‘‘яам̣ логз бияаруубам̣ саад̇аруубам̣, зд̇т̇зсаа д̇ан̣хаа уббаж̇ж̇амаанаа уббаж̇ж̇ад̇и, зд̇т̇а нивисамаанаа нивисад̇и. гин̃жа логз бияаруубам̣ саад̇аруубам̣? жагку логз бияаруубам̣ саад̇арууба’’нд̇иаад̣̇инаа (вибха. 203) наязна д̣̇ваад̣̇асасуязва ааяад̇анзсу д̇ассаа уббад̇д̇и жа нирод̇хо жа вуд̇д̇о. яат̇зва жа д̇ан̣хаа д̣̇ваад̣̇асасу ааяад̇анзсу уббаж̇ж̇ид̇ваа ниб̣б̣аанам̣ ааг̇амма нируд̣̇д̇хааби ааяад̇анзсу буна самуд̣̇аажаарасса абхаавад̇о ааяад̇анзсуязва нируд̣̇д̇хаад̇и вуд̇д̇аа, звамимзби баабагаа агусалаа д̇хаммаа ааяад̇анзсу нируж̇жханд̇ийд̇и взд̣̇ид̇аб̣б̣аа. ат̇а ваа явааяам̣ абхинанд̣̇анаад̣̇ийнам̣ абхаавова рааг̇аанусаяаад̣̇ийнам̣ анд̇од̇и вуд̇д̇о. зд̇т̇зд̇з рааг̇аанусаяаад̣̇ийнам̣ анд̇од̇и лад̣̇д̇хавохаарз ниб̣б̣аанз баабагаа агусалаа д̇хаммаа абарисзсаа нируж̇жханд̇и. яан̃хи яад̇т̇а над̇т̇и, д̇ам̣ д̇ад̇т̇а нируд̣̇д̇хам̣ наама ход̇и, свааяамад̇т̇о нирод̇хабан̃хзна д̣̇ийбзд̇аб̣б̣о. вуд̇д̇ан̃хзд̇ам̣ ‘‘д̣̇уд̇ияам̣ жхаанам̣ самаабаннасса вид̇аггавижаараа важийсан̇каараа бадиббассад̣̇д̇хаа хонд̇ий’’д̇иаад̣̇и (бади. ма. 1.83).
‘‘Sā kho panesā taṇhā kattha uppajjamānā uppajjati, kattha nivisamānā nivisatī’’ti vatvā – ‘‘yaṃ loke piyarūpaṃ sātarūpaṃ, etthesā taṇhā uppajjamānā uppajjati, ettha nivisamānā nivisati. Kiñca loke piyarūpaṃ sātarūpaṃ? Cakkhu loke piyarūpaṃ sātarūpa’’ntiādinā (vibha. 203) nayena dvādasasuyeva āyatanesu tassā uppatti ca nirodho ca vutto. Yatheva ca taṇhā dvādasasu āyatanesu uppajjitvā nibbānaṃ āgamma niruddhāpi āyatanesu puna samudācārassa abhāvato āyatanesuyeva niruddhāti vuttā, evamimepi pāpakā akusalā dhammā āyatanesu nirujjhantīti veditabbā. Atha vā yvāyaṃ abhinandanādīnaṃ abhāvova rāgānusayādīnaṃ antoti vutto. Etthete rāgānusayādīnaṃ antoti laddhavohāre nibbāne pāpakā akusalā dhammā aparisesā nirujjhanti. Yañhi yattha natthi, taṃ tattha niruddhaṃ nāma hoti, svāyamattho nirodhapañhena dīpetabbo. Vuttañhetaṃ ‘‘dutiyaṃ jhānaṃ samāpannassa vitakkavicārā vacīsaṅkhārā paṭippassaddhā hontī’’tiādi (paṭi. ma. 1.83).
202. сад̇т̇у жзва сам̣ван̣н̣ид̇од̇и сад̇т̇аараа жа басам̣сид̇о. вин̃н̃уунанд̇и ид̣̇амби гаран̣ад̇т̇з саамиважанам̣, бан̣д̣ид̇зхи саб̣рахмажаарийхи жа самбхаавид̇од̇и ад̇т̇о. баход̇ийд̇и саггод̇и.
202.Satthu ceva saṃvaṇṇitoti satthārā ca pasaṃsito. Viññūnanti idampi karaṇatthe sāmivacanaṃ, paṇḍitehi sabrahmacārīhi ca sambhāvitoti attho. Pahotīti sakkoti.
203. ад̇иггаммзва муулам̣ ад̇иггамма канд̇ханд̇и сааро наама муулз ваа канд̇хз ваа бхавзяяа, д̇амби ад̇иггамид̇ваад̇и ад̇т̇о. звам̣самбад̣̇анд̇и звам̣самбад̇д̇игам̣, ийд̣̇исанд̇и ад̇т̇о. ад̇исид̇ваад̇и ад̇иггамид̇ваа. ж̇аанам̣ ж̇аанаад̇ийд̇и ж̇аанид̇аб̣б̣амзва ж̇аанаад̇и. бассам̣ бассад̇ийд̇и бассид̇аб̣б̣амзва бассад̇и. яат̇аа ваа згажжо вибарийд̇ам̣ г̇ан̣ханд̇о ж̇аананд̇оби на ж̇аанаад̇и, бассанд̇оби на бассад̇и, на звам̣ бхаг̇аваа. бхаг̇аваа бана ж̇аананд̇о ж̇аанаад̇иязва, бассанд̇о бассад̇иязва. свааяам̣ д̣̇ассанабарин̣ааяагадтзна жагкубхууд̇о. вид̣̇ид̇агаран̣адтзна н̃аан̣абхууд̇о. авибарийд̇асабхаавадтзна барияад̇д̇ид̇хаммаббавад̇д̇анад̇о ваа хад̣̇аязна жинд̇зд̇ваа ваажааяа нижчаарид̇ад̇хаммамаяод̇и д̇хаммабхууд̇о. сздтадтзна б̣рахмабхууд̇о. ат̇а ваа жагку вияа бхууд̇од̇и жагкубхууд̇од̇и звамзд̇зсу бад̣̇зсу ад̇т̇о взд̣̇ид̇аб̣б̣о. свааяам̣ д̇хаммасса вад̇д̇анад̇о вад̇д̇аа. бавад̇д̇аабанад̇о бавад̇д̇аа. ад̇т̇ам̣ нийхарид̇ваа д̣̇ассанасамад̇т̇ад̇ааяа ад̇т̇асса ниннзд̇аа. амад̇аад̇хиг̇амааяа бадибад̇д̇им̣ д̣̇ад̣̇аад̇ийд̇и амад̇асса д̣̇аад̇аа. аг̇арум̣ гад̇ваад̇и бунаббунам̣ ааяаажаабзнд̇оби хи г̇арум̣ гарод̇и наама, ад̇д̇ано саавагабаарамийн̃аан̣з тад̇ваа синзруубаад̣̇ад̇о ваалугам̣ уд̣̇д̇харамаано вияа д̣̇уб̣б̣ин̃н̃зяяам̣ гад̇ваа гат̇знд̇оби г̇арум̣ гарод̇иязва наама. звам̣ агад̇ваа амхз бунаббунам̣ аяаажаабзд̇ваа сувин̃н̃зяяамби но гад̇ваа гат̇зхийд̇и вуд̇д̇ам̣ ход̇и.
203.Atikkammeva mūlaṃ atikkamma khandhanti sāro nāma mūle vā khandhe vā bhaveyya, tampi atikkamitvāti attho. Evaṃsampadanti evaṃsampattikaṃ, īdisanti attho. Atisitvāti atikkamitvā. Jānaṃ jānātīti jānitabbameva jānāti. Passaṃ passatīti passitabbameva passati. Yathā vā ekacco viparītaṃ gaṇhanto jānantopi na jānāti, passantopi na passati, na evaṃ bhagavā. Bhagavā pana jānanto jānātiyeva, passanto passatiyeva. Svāyaṃ dassanapariṇāyakaṭṭhena cakkhubhūto. Viditakaraṇaṭṭhena ñāṇabhūto. Aviparītasabhāvaṭṭhena pariyattidhammappavattanato vā hadayena cintetvā vācāya nicchāritadhammamayoti dhammabhūto. Seṭṭhaṭṭhena brahmabhūto. Atha vā cakkhu viya bhūtoti cakkhubhūtoti evametesu padesu attho veditabbo. Svāyaṃ dhammassa vattanato vattā. Pavattāpanato pavattā. Atthaṃ nīharitvā dassanasamatthatāya atthassa ninnetā. Amatādhigamāya paṭipattiṃ dadātīti amatassa dātā. Agaruṃ katvāti punappunaṃ āyācāpentopi hi garuṃ karoti nāma, attano sāvakapāramīñāṇe ṭhatvā sinerūpādato vālukaṃ uddharamāno viya dubbiññeyyaṃ katvā kathentopi garuṃ karotiyeva nāma. Evaṃ akatvā amhe punappunaṃ ayācāpetvā suviññeyyampi no katvā kathehīti vuttaṃ hoti.
204. яам̣ ко но аавусод̇и зд̇т̇а гин̃жааби ‘‘яам̣ ко во’’д̇и вад̇д̇аб̣б̣ам̣ сияаа, д̇з бана бхигкуу ад̇д̇анаа сад̣̇д̇хим̣ сан̇г̇ан̣ханд̇о ‘‘яам̣ ко но’’д̇и ааха. яасмаа ваа уд̣̇д̣̇зсова д̇зсам̣ уд̣̇д̣̇идтова. бхаг̇аваа бана т̇зрассааби д̇зсамби бхаг̇аваава. д̇асмаа бхаг̇аваад̇и бад̣̇ам̣ санд̇хааяаби звамааха, яам̣ ко амхаагам̣ бхаг̇аваа д̇умхаагам̣ сам̣кид̇д̇зна уд̣̇д̣̇зсам̣ уд̣̇д̣̇исид̇ваад̇и ад̇т̇о.
204.Yaṃkho no āvusoti ettha kiñcāpi ‘‘yaṃ kho vo’’ti vattabbaṃ siyā, te pana bhikkhū attanā saddhiṃ saṅgaṇhanto ‘‘yaṃ kho no’’ti āha. Yasmā vā uddesova tesaṃ uddiṭṭhova. Bhagavā pana therassāpi tesampi bhagavāva. Tasmā bhagavāti padaṃ sandhāyapi evamāha, yaṃ kho amhākaṃ bhagavā tumhākaṃ saṃkhittena uddesaṃ uddisitvāti attho.
жагкун̃жаавусод̇иаад̣̇ийсу аяамад̇т̇о, аавусо, ниссаяабхаавзна жагкубасаад̣̇ан̃жа аарамман̣абхаавзна жад̇усамудтаанигаруубз жа бадижжа жагкувин̃н̃аан̣ам̣ наама уббаж̇ж̇ад̇и. д̇ин̣н̣ам̣ сан̇г̇ад̇и пассод̇и д̇зсам̣ д̇ин̣н̣ам̣ сан̇г̇ад̇ияаа пассо наама уббаж̇ж̇ад̇и. д̇ам̣ пассам̣ бадижжа сахаж̇аад̇аад̣̇ивасзна пассабажжаяаа взд̣̇анаа уббаж̇ж̇ад̇и. д̇ааяа взд̣̇анааяа яам̣ аарамман̣ам̣ взд̣̇зд̇и, д̇ад̣̇зва сан̃н̃аа сан̃ж̇аанаад̇и, яам̣ сан̃н̃аа сан̃ж̇аанаад̇и, д̇ад̣̇зва аарамман̣ам̣ вид̇агго вид̇аггзд̇и. яам̣ вид̇агго вид̇аггзд̇и, д̇ад̣̇зваарамман̣ам̣ бабан̃жо бабан̃жзд̇и. д̇ад̇онид̣̇аананд̇и зд̇зхи жагкуруубаад̣̇ийхи гааран̣зхи. бурисам̣ бабан̃жасан̃н̃аасан̇каа самуд̣̇аажаранд̇ийд̇и д̇ам̣ абарин̃н̃аад̇агааран̣ам̣ бурисам̣ бабан̃жагодтаасаа абхибхаванд̇и, д̇асса бавад̇д̇анд̇ийд̇и ад̇т̇о. д̇ад̇т̇а пассавзд̣̇анаасан̃н̃аа жагкувин̃н̃аан̣зна сахаж̇аад̇аа хонд̇и. вид̇агго жагкувин̃н̃аан̣аананд̇араад̣̇ийсу савид̇аггажид̇д̇зсу д̣̇адтаб̣б̣о. бабан̃жасан̇каа ж̇аванзна сахаж̇аад̇аа хонд̇и. яад̣̇и звам̣ гасмаа ад̇ийд̇аанааг̇ад̇аг̇г̇ахан̣ам̣ гад̇анд̇и? д̇ат̇аа уббаж̇ж̇анад̇о. яат̇зва хи зд̇арахи жагкуд̣̇ваариго бабан̃жо жагкун̃жа руубз жа пассавзд̣̇анаасан̃н̃аавид̇аггз жа бадижжа уббанно, звамзвам̣ ад̇ийд̇аанааг̇ад̇зсуби жагкувин̃н̃зяязсу руубзсу д̇ассуббад̇д̇им̣ д̣̇ассзнд̇о звамааха.
Cakkhuñcāvusotiādīsu ayamattho, āvuso, nissayabhāvena cakkhupasādañca ārammaṇabhāvena catusamuṭṭhānikarūpe ca paṭicca cakkhuviññāṇaṃ nāma uppajjati. Tiṇṇaṃ saṅgati phassoti tesaṃ tiṇṇaṃ saṅgatiyā phasso nāma uppajjati. Taṃ phassaṃ paṭicca sahajātādivasena phassapaccayā vedanā uppajjati. Tāya vedanāya yaṃ ārammaṇaṃ vedeti, tadeva saññā sañjānāti, yaṃ saññā sañjānāti, tadeva ārammaṇaṃ vitakko vitakketi. Yaṃ vitakko vitakketi, tadevārammaṇaṃ papañco papañceti. Tatonidānanti etehi cakkhurūpādīhi kāraṇehi. Purisaṃ papañcasaññāsaṅkhā samudācarantīti taṃ apariññātakāraṇaṃ purisaṃ papañcakoṭṭhāsā abhibhavanti, tassa pavattantīti attho. Tattha phassavedanāsaññā cakkhuviññāṇena sahajātā honti. Vitakko cakkhuviññāṇānantarādīsu savitakkacittesu daṭṭhabbo. Papañcasaṅkhā javanena sahajātā honti. Yadi evaṃ kasmā atītānāgataggahaṇaṃ katanti? Tathā uppajjanato. Yatheva hi etarahi cakkhudvāriko papañco cakkhuñca rūpe ca phassavedanāsaññāvitakke ca paṭicca uppanno, evamevaṃ atītānāgatesupi cakkhuviññeyyesu rūpesu tassuppattiṃ dassento evamāha.
сод̇ан̃жаавусод̇иаад̣̇ийсуби зсзва наяо. чадтад̣̇ваарз бана мананд̇и бхаван̇г̇ажид̇д̇ам̣. д̇хаммзд̇и д̇збхуумагад̇хаммаарамман̣ам̣. мановин̃н̃аан̣анд̇и ааваж̇ж̇анам̣ ваа ж̇аванам̣ ваа. ааваж̇ж̇анз г̇ахид̇з пассавзд̣̇анаасан̃н̃аавид̇аггаа ааваж̇ж̇анасахаж̇аад̇аа хонд̇и. бабан̃жо ж̇аванасахаж̇аад̇о. ж̇аванз г̇ахид̇з сахааваж̇ж̇анагам̣ бхаван̇г̇а мано наама ход̇и, д̇ад̇о пассаад̣̇аяо саб̣б̣зби ж̇аванзна сахаж̇аад̇аава. манод̣̇ваарз бана яасмаа ад̇ийд̇аад̣̇ибхзд̣̇ам̣ саб̣б̣амби аарамман̣ам̣ ход̇и, д̇асмаа ад̇ийд̇аанааг̇ад̇абажжуббаннзсууд̇и ид̣̇ам̣ яуд̇д̇амзва.
Sotañcāvusotiādīsupi eseva nayo. Chaṭṭhadvāre pana mananti bhavaṅgacittaṃ. Dhammeti tebhūmakadhammārammaṇaṃ. Manoviññāṇanti āvajjanaṃ vā javanaṃ vā. Āvajjane gahite phassavedanāsaññāvitakkā āvajjanasahajātā honti. Papañco javanasahajāto. Javane gahite sahāvajjanakaṃ bhavaṅga mano nāma hoti, tato phassādayo sabbepi javanena sahajātāva. Manodvāre pana yasmā atītādibhedaṃ sabbampi ārammaṇaṃ hoti, tasmā atītānāgatapaccuppannesūti idaṃ yuttameva.
ид̣̇аани ваддам̣ д̣̇ассзнд̇о со вад̇аавусод̇и д̣̇зсанам̣ аарабхи. пассабан̃н̃ад̇д̇им̣ бан̃н̃абзссад̇ийд̇и пассо наама зго д̇хаммо уббаж̇ж̇ад̇ийд̇и звам̣ пассабан̃н̃ад̇д̇им̣ бан̃н̃абзссад̇и, д̣̇ассзссад̇ийд̇и ад̇т̇о. зса наяо саб̣б̣ад̇т̇а. звам̣ имасмим̣ сад̇и ид̣̇ам̣ ход̇ийд̇и д̣̇ваад̣̇асааяад̇анавасзна сагалам̣ ваддам̣ д̣̇ассзд̇ваа ид̣̇аани д̣̇ваад̣̇асааяад̇анабадигкзбавасзна виваддам̣ д̣̇ассзнд̇о со вад̇аавусо жагкусмим̣ асад̇ийд̇и д̣̇зсанам̣ аарабхи. д̇ад̇т̇а вуд̇д̇анаязнзва ад̇т̇о взд̣̇ид̇аб̣б̣о.
Idāni vaṭṭaṃ dassento so vatāvusoti desanaṃ ārabhi. Phassapaññattiṃ paññapessatīti phasso nāma eko dhammo uppajjatīti evaṃ phassapaññattiṃ paññapessati, dassessatīti attho. Esa nayo sabbattha. Evaṃ imasmiṃ sati idaṃ hotīti dvādasāyatanavasena sakalaṃ vaṭṭaṃ dassetvā idāni dvādasāyatanapaṭikkhepavasena vivaṭṭaṃ dassento so vatāvuso cakkhusmiṃasatīti desanaṃ ārabhi. Tattha vuttanayeneva attho veditabbo.
звам̣ бан̃хам̣ виссаж̇ж̇зд̇ваа ид̣̇аани саавагзна бан̃хо гат̇ид̇од̇и маа нигган̇каа ахувад̇т̇а, аяам̣ бхаг̇аваа саб̣б̣ан̃н̃уд̇ан̃аан̣ад̇улам̣ г̇ахзд̇ваа нисинно, ижчамаанаа д̇амзва убасан̇гамид̇ваа нигган̇каа хот̇аад̇и уяяож̇знд̇о ааган̇камаанаа жа банаад̇иаад̣̇имааха.
Evaṃ pañhaṃ vissajjetvā idāni sāvakena pañho kathitoti mā nikkaṅkhā ahuvattha, ayaṃ bhagavā sabbaññutañāṇatulaṃ gahetvā nisinno, icchamānā tameva upasaṅkamitvā nikkaṅkhā hothāti uyyojento ākaṅkhamānā ca panātiādimāha.
205. имзхи аагаарзхийд̇и имзхи гааран̣зхи бабан̃жуббад̇д̇ияаа баадиязггагааран̣зхи жзва ваддавиваддагааран̣зхи жа. имзхи бад̣̇зхийд̇и имзхи агкарасамбин̣д̣анзхи. б̣яан̃ж̇анзхийд̇и баадиязггаагкарзхи. бан̣д̣ид̇од̇и бан̣д̣ижжзна саманнааг̇ад̇о. жад̇уухи ваа гааран̣зхи бан̣д̣ид̇о д̇хаад̇угусало ааяад̇анагусало бажжаяаагаарагусало гааран̣аагааран̣агусалод̇и. махаабан̃н̃од̇и маханд̇з ад̇т̇з маханд̇з д̇хаммз маханд̇аа нируд̇д̇ияо маханд̇аани бадибхаанаани бариг̇г̇ахан̣асамад̇т̇ааяа махаабан̃н̃ааяа саманнааг̇ад̇о. яат̇аа д̇ам̣ махаагажжаанзнаад̇и яат̇аа махаагажжаанзна б̣яаагад̇ам̣, д̇ам̣ санд̇хааяа д̇анд̇и вуд̇д̇ам̣. яат̇аа махаагажжаанзна б̣яаагад̇ам̣, ахамби д̇ам̣ звамзвам̣ б̣яаагарзяязнд̇и ад̇т̇о.
205.Imehi ākārehīti imehi kāraṇehi papañcuppattiyā pāṭiyekkakāraṇehi ceva vaṭṭavivaṭṭakāraṇehi ca. Imehi padehīti imehi akkharasampiṇḍanehi. Byañjanehīti pāṭiyekkaakkharehi. Paṇḍitoti paṇḍiccena samannāgato. Catūhi vā kāraṇehi paṇḍito dhātukusalo āyatanakusalo paccayākārakusalo kāraṇākāraṇakusaloti. Mahāpaññoti mahante atthe mahante dhamme mahantā niruttiyo mahantāni paṭibhānāni pariggahaṇasamatthāya mahāpaññāya samannāgato. Yathā taṃ mahākaccānenāti yathā mahākaccānena byākataṃ, taṃ sandhāya tanti vuttaṃ. Yathā mahākaccānena byākataṃ, ahampi taṃ evamevaṃ byākareyyenti attho.
мад̇хубин̣д̣иганд̇и маханд̇ам̣ г̇ул̣абуувам̣ б̣ад̣̇д̇хасад̇д̇уг̇ул̣агам̣ ваа. асзжанаганд̇и асзжид̇аб̣б̣агам̣. саббипаан̣ид̇амад̇хусаггараад̣̇ийсу ид̣̇ам̣ наамзд̇т̇а манд̣̇ам̣ ид̣̇ам̣ б̣ахуганд̇и на вад̇д̇аб̣б̣ам̣ самаяож̇ид̇арасам̣. жзд̇асод̇и жинд̇агаж̇аад̇иго. д̣̇аб̣б̣аж̇аад̇игод̇и бан̣д̣ид̇асабхааво. го наамо аяанд̇и ид̣̇ам̣ т̇зро ад̇ибхад̣̇д̣̇аго аяам̣ д̇хаммабарияааяо, д̣̇асаб̣аласса саб̣б̣ан̃н̃уд̇ан̃н̃аан̣знзвасса наамам̣ г̇ан̣хаабзссаамийд̇и жинд̇зд̇ваа ааха. д̇асмаад̇и яасмаа мад̇хубин̣д̣иго вияа мад̇хуро, д̇асмаа мад̇хубин̣д̣игабарияааяод̇взва нам̣ д̇хаарзхийд̇и вад̣̇ад̇и. сзсам̣ саб̣б̣ад̇т̇а уд̇д̇аанад̇т̇амзваад̇и.
Madhupiṇḍikanti mahantaṃ guḷapūvaṃ baddhasattuguḷakaṃ vā. Asecanakanti asecitabbakaṃ. Sappiphāṇitamadhusakkarādīsu idaṃ nāmettha mandaṃ idaṃ bahukanti na vattabbaṃ samayojitarasaṃ. Cetasoti cintakajātiko. Dabbajātikoti paṇḍitasabhāvo. Ko nāmo ayanti idaṃ thero atibhaddako ayaṃ dhammapariyāyo, dasabalassa sabbaññutaññāṇenevassa nāmaṃ gaṇhāpessāmīti cintetvā āha. Tasmāti yasmā madhupiṇḍiko viya madhuro, tasmā madhupiṇḍikapariyāyotveva naṃ dhārehīti vadati. Sesaṃ sabbattha uttānatthamevāti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
мад̇хубин̣д̣игасуд̇д̇аван̣н̣анаа нидтид̇аа.
Madhupiṇḍikasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 8. мад̇хубин̣д̣игасуд̇д̇ам̣ • 8. Madhupiṇḍikasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 8. мад̇хубин̣д̣игасуд̇д̇аван̣н̣анаа • 8. Madhupiṇḍikasuttavaṇṇanā
