| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
7. மது⁴பிண்டி³கத்தே²ரஅபதா³னவண்ணனா
7. Madhupiṇḍikattheraapadānavaṇṇanā
விவனே கானநே தி³ஸ்வாதிஆதி³கங் ஆயஸ்மதோ மது⁴பிண்டி³கத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே நேஸாத³யோனியங் நிப்³ப³த்தோ மஹாஅரஞ்ஞே படிவஸதி. ததா³ விவேகாபி⁴ரதியா ஸம்பத்தங் ஸித்³த⁴த்த²ங் ப⁴க³வந்தங் தி³ஸ்வா ஸமாதி⁴தோ வுட்டி²தஸ்ஸ தஸ்ஸ ஸுமது⁴ரங் மது⁴மதா³ஸி. தத்த² ச பஸன்னமானஸோ வந்தி³த்வா பக்காமி. ஸோ தேனேவ புஞ்ஞேன ஸம்பத்திங் அனுப⁴வந்தோ தே³வமனுஸ்ஸேஸு ஸங்ஸரித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ வுத்³தி⁴ப்பத்தோ ஸத்த²ரி பஸீதி³த்வா பப்³ப³ஜிதோ நசிரஸ்ஸேவ அரஹா அஹோஸி.
Vivane kānane disvātiādikaṃ āyasmato madhupiṇḍikattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle nesādayoniyaṃ nibbatto mahāaraññe paṭivasati. Tadā vivekābhiratiyā sampattaṃ siddhatthaṃ bhagavantaṃ disvā samādhito vuṭṭhitassa tassa sumadhuraṃ madhumadāsi. Tattha ca pasannamānaso vanditvā pakkāmi. So teneva puññena sampattiṃ anubhavanto devamanussesu saṃsaritvā imasmiṃ buddhuppāde kulagehe nibbatto vuddhippatto satthari pasīditvā pabbajito nacirasseva arahā ahosi.
37. ஸோ அபரபா⁴கே³ அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ விவனே கானநே தி³ஸ்வாதிஆதி³மாஹ. தத்த² விவனேதி விஸேஸேன வனங் பத்த²டங் விவனங், ஹத்தி²அஸ்ஸரத²ஸத்³தே³ஹி பே⁴ரிஸத்³தே³ஹி ச வத்து²காமகிலேஸகாமேஹி ச விக³தங் ப்³யாபக³தந்தி அத்தோ², கானநஸங்கா²தே மஹாஅரஞ்ஞே விவனேதி ஸம்ப³ந்தோ⁴. ஓஸதி⁴ங்வ விரோசந்தந்தி ப⁴வவட்³ட⁴கிஜனானங் இச்சி²திச்சி²தங் நிப்பா²தே³தீதி ஓஸத⁴ங். ஓஜானிப்³ப³த்திகாரணங் படிச்ச யாய தாரகாய உக்³க³தாய உத்³த⁴ரந்தி க³ண்ஹந்தீதி ஸா ஓஸதி⁴. ஓஸதி⁴தாரகா இவ விரோசந்தீதி வத்தப்³பே³ கா³தா²ப³ந்த⁴ஸுக²த்த²ங் ‘‘ஓஸதி⁴ங்வ விரோசந்த’’ந்தி ச வுத்தங். ஸேஸங் ஸப்³ப³த்த² உத்தானமேவாதி.
37. So aparabhāge attano pubbakammaṃ saritvā somanassajāto pubbacaritāpadānaṃ pakāsento vivane kānane disvātiādimāha. Tattha vivaneti visesena vanaṃ patthaṭaṃ vivanaṃ, hatthiassarathasaddehi bherisaddehi ca vatthukāmakilesakāmehi ca vigataṃ byāpagatanti attho, kānanasaṅkhāte mahāaraññe vivaneti sambandho. Osadhiṃva virocantanti bhavavaḍḍhakijanānaṃ icchiticchitaṃ nipphādetīti osadhaṃ. Ojānibbattikāraṇaṃ paṭicca yāya tārakāya uggatāya uddharanti gaṇhantīti sā osadhi. Osadhitārakā iva virocantīti vattabbe gāthābandhasukhatthaṃ ‘‘osadhiṃva virocanta’’nti ca vuttaṃ. Sesaṃ sabbattha uttānamevāti.
மது⁴பிண்டி³கத்தே²ரஅபதா³னவண்ணனா ஸமத்தா.
Madhupiṇḍikattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 7. மது⁴பிண்டி³கத்தே²ரஅபதா³னங் • 7. Madhupiṇḍikattheraapadānaṃ
