| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
4. மது⁴ரஸுத்தவண்ணனா
4. Madhurasuttavaṇṇanā
317. மது⁴ராயந்தி உத்தரமது⁴ராயங். கு³ந்தா³வனேதி காளஸிப்பலிவனே. அதிமுத்தகவனேதி ச வத³ந்தி. சதூஸு வண்ணேஸு ப்³ராஹ்மணோவ ஸெட்டோ² வண்ணோ. பண்ட³ரோதி பரிஸுத்³தோ⁴. காளகோதி அபரிஸுத்³தோ⁴. ஜாதிகொ³த்தாதி³பஞ்ஞாபனட்டா²னேஸூதி ஜாதிகொ³த்தாதி³வஸேன ஸுத்³த⁴சிந்தாயங் ப்³ராஹ்மணா ஏவ ஸுத்³த⁴ஜாதிகா, ந இதரேதி அதி⁴ப்பாயோ. ஸங்ஸாரதோ வா ஸுத்³த⁴சிந்தாயங் ப்³ராஹ்மணாவ ஸுஜ்ஜ²ந்தி வேத³விஹிதஸ்ஸ ஸுத்³த⁴விதி⁴னோ அஞ்ஞேஸங் அவிஸயத்தாதி அதி⁴ப்பாயோ. தங் பனேதங் தேஸங் விருஜ்ஜ²தி க²த்தியவெஸ்ஸானம்பி மந்தஜ்ஜே²னஸ்ஸ அனுஞ்ஞாதத்தா, மந்தஜ்ஜே²னவிதி⁴னா ச ஸங்ஸாரஸுத்³தி⁴யாபா⁴வதோ. புத்தா நாம அனோரஸாபி ஹொந்தி, ந ததா² இமேதி ஆஹ ‘‘ஓரஸா’’தி. உரே ஸங்வட்³டி⁴தபுத்தோபி ‘‘ஓரஸ’’ந்தி வுச்சதி. இமே பன முக²தோ நிக்³க³தோ ஹுத்வா உரே ஸங்வட்³டா⁴தி த³ஸ்ஸேதுங் ‘‘ஓரஸா முக²தோ ஜாதா’’தி வுத்தங். ததோ ஏவ ப்³ரஹ்மதோ ஜாதாதி ப்³ரஹ்மஜா, ப்³ரஹ்மஸம்பூ⁴தாபி ‘‘ப்³ரஹ்மஜா’’தி வுச்சந்தி, ந ததா² இமே. இமே பன பச்சக்க²தோ ப்³ரஹ்முனா நிம்மிதாதி ப்³ரஹ்மனிம்மிதா, ததோ ஏவ ப்³ரஹ்மதோ லத்³த⁴ப்³ப³விஜ்ஜாதி³தா³யஜ்ஜதா³யாதா³தி ப்³ரஹ்மதா³யாதா³தி ஸப்³ப³மேதங் ப்³ராஹ்மணானங் கத்த²னாபலாபஸதி³ஸங் விஞ்ஞூனங் அப்பமாணங் அவிமத்³த³க்க²மங் வாசாவத்து²மத்தங் ப்³ரஹ்மகுத்தஸ்ஸேவ அபா⁴வதோ. யங் பனெத்த² வத்தப்³ப³ங், தங் விஸுத்³தி⁴மக்³க³வண்ணனாயங் வுத்தமேவ. தேனாஹ ‘‘கோ⁴ஸோயேவா’’திஆதி³. வோஹாரமத்தமேவேதந்தி ஏதங் ‘‘ப்³ராஹ்மணோவ ஸெட்டோ² வண்ணோ’’திஆதி³ வசனமத்தமேவ, ந தஸ்ஸ அத்தோ² தேஹி அதி⁴ப்பேதப்பகாரோ அத்தி².
317.Madhurāyanti uttaramadhurāyaṃ. Gundāvaneti kāḷasippalivane. Atimuttakavaneti ca vadanti. Catūsu vaṇṇesu brāhmaṇova seṭṭho vaṇṇo. Paṇḍaroti parisuddho. Kāḷakoti aparisuddho. Jātigottādipaññāpanaṭṭhānesūti jātigottādivasena suddhacintāyaṃ brāhmaṇā eva suddhajātikā, na itareti adhippāyo. Saṃsārato vā suddhacintāyaṃ brāhmaṇāva sujjhanti vedavihitassa suddhavidhino aññesaṃ avisayattāti adhippāyo. Taṃ panetaṃ tesaṃ virujjhati khattiyavessānampi mantajjhenassa anuññātattā, mantajjhenavidhinā ca saṃsārasuddhiyābhāvato. Puttā nāma anorasāpi honti, na tathā imeti āha ‘‘orasā’’ti. Ure saṃvaḍḍhitaputtopi ‘‘orasa’’nti vuccati. Ime pana mukhato niggato hutvā ure saṃvaḍḍhāti dassetuṃ ‘‘orasā mukhato jātā’’ti vuttaṃ. Tato eva brahmato jātāti brahmajā, brahmasambhūtāpi ‘‘brahmajā’’ti vuccanti, na tathā ime. Ime pana paccakkhato brahmunā nimmitāti brahmanimmitā, tato eva brahmato laddhabbavijjādidāyajjadāyādāti brahmadāyādāti sabbametaṃ brāhmaṇānaṃ katthanāpalāpasadisaṃ viññūnaṃ appamāṇaṃ avimaddakkhamaṃ vācāvatthumattaṃ brahmakuttasseva abhāvato. Yaṃ panettha vattabbaṃ, taṃ visuddhimaggavaṇṇanāyaṃ vuttameva. Tenāha ‘‘ghosoyevā’’tiādi. Vohāramattamevetanti etaṃ ‘‘brāhmaṇova seṭṭho vaṇṇo’’tiādi vacanamattameva, na tassa attho tehi adhippetappakāro atthi.
318. ஸமிஜ்ஜெ²ய்யாதி தி³ட்டி²தீ³பனவஸேன அத்தனோ அஜ்ஜா²ஸயோ நிப்ப²ஜ்ஜெய்ய. தேனாஹ ‘‘மனோரதோ² பூரெய்யா’’தி. க²த்தியோபீதி பரக²த்தியோபி . அஸ்ஸாதி ஸமித்³த⁴த⁴னாதி³ங் பத்தஸ்ஸ. தேனாஹ – ‘‘இஸ்ஸரியஸம்பத்தஸ்ஸா’’தி நேஸந்தி ஏதேஸங் சதுன்னங் வண்ணானங் எத்த² புப்³பு³ட்டா²யிபா⁴வாதி³னா இதரேஹி உபசரிதப்³ப³தாய ந கிஞ்சி நானாகரணந்தி யோஜனா.
318.Samijjheyyāti diṭṭhidīpanavasena attano ajjhāsayo nipphajjeyya. Tenāha ‘‘manoratho pūreyyā’’ti. Khattiyopīti parakhattiyopi . Assāti samiddhadhanādiṃ pattassa. Tenāha – ‘‘issariyasampattassā’’ti nesanti etesaṃ catunnaṃ vaṇṇānaṃ ettha pubbuṭṭhāyibhāvādinā itarehi upacaritabbatāya na kiñci nānākaraṇanti yojanā.
322. அஹங் சீவராதீ³ஹி உபட்டா²கோ, தும்ஹாகங் இச்சி²தச்சி²தக்க²ணே வதெ³ய்யாத² யேனத்தோ²தி யோஜனா. சோராதி³உபத்³த³வனிஸேத⁴னேன ரக்கா²கு³த்தி, தா³னாதி³னிமித்தஉபத்³த³வனிஸேத⁴னேன ஆவரணகு³த்தி. பச்சுப்பன்னானத்த²னிஸேத⁴னேன வா ரக்கா²கு³த்தி, ஆகா³மிஅனத்த²னிஸேத⁴னேன ஆவரணகு³த்தி. எத்த² ச க²த்தியாதீ³ஸு யோ யோ இஸ்ஸரோ, தஸ்ஸ இதரேன அனுவத்தேதப்³ப³பா⁴வே, குஸலாகுஸலகரணேன நேஸங் வஸேன லத்³த⁴ப்³ப³அபி⁴ஸம்பராயே, பப்³ப³ஜிதேஹி லத்³த⁴ப்³ப³ஸாமீசிகிரியாய ச அணுமத்தோபி விஸேஸோ நத்தி², தஸ்மா ஸோ விஸேஸாபா⁴வோ பாளியங் தத்த² தத்த² வாரே ‘‘ஏவங் ஸந்தே’’திஆதி³னா விபா⁴விதோ. ஸேஸங் ஸுவிஞ்ஞெய்யமேவ.
322. Ahaṃ cīvarādīhi upaṭṭhāko, tumhākaṃ icchitacchitakkhaṇe vadeyyātha yenatthoti yojanā. Corādiupaddavanisedhanena rakkhāgutti, dānādinimittaupaddavanisedhanena āvaraṇagutti. Paccuppannānatthanisedhanena vā rakkhāgutti, āgāmianatthanisedhanena āvaraṇagutti. Ettha ca khattiyādīsu yo yo issaro, tassa itarena anuvattetabbabhāve, kusalākusalakaraṇena nesaṃ vasena laddhabbaabhisamparāye, pabbajitehi laddhabbasāmīcikiriyāya ca aṇumattopi viseso natthi, tasmā so visesābhāvo pāḷiyaṃ tattha tattha vāre ‘‘evaṃ sante’’tiādinā vibhāvito. Sesaṃ suviññeyyameva.
மது⁴ரஸுத்தவண்ணனாய லீனத்த²ப்பகாஸனா ஸமத்தா.
Madhurasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 4. மது⁴ரஸுத்தங் • 4. Madhurasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 4. மது⁴ரஸுத்தவண்ணனா • 4. Madhurasuttavaṇṇanā
