| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
4. мад̇хурасуд̇д̇аван̣н̣анаа
4. Madhurasuttavaṇṇanā
317. звам̣ мз суд̇анд̇и мад̇хурасуд̇д̇ам̣. д̇ад̇т̇а махаагажжаанод̇и г̇ихигаалз уж̇ж̇знигаран̃н̃о бурохид̇абуд̇д̇о абхируубо д̣̇ассанийяо баасаад̣̇иго суван̣н̣аван̣н̣о жа. мад̇хурааяанд̇и звам̣наамагз наг̇арз. г̇унд̣̇ааванзд̇и ган̣хагаг̇унд̣̇ааванз . аванд̇ибуд̇д̇од̇и аванд̇ирадтз ран̃н̃о д̇хийд̇ааяа буд̇д̇о. вуд̣̇д̇хо жзва арахаа жаад̇и д̣̇ахарам̣ араханд̇амби на д̇ат̇аа самбхаавзнд̇и яат̇аа махаллагам̣, т̇зро бана вуд̣̇д̇хо жзва ахоси арахаа жа. б̣раахман̣аа, бхо гажжаанаад̇и со гира рааж̇аа б̣раахман̣алад̣̇д̇хиго, д̇асмаа звамааха. б̣раахман̣ова сздто ван̣н̣од̇иаад̣̇ийсу ж̇аад̇иг̇од̇д̇аад̣̇ийнам̣ бан̃н̃аабанадтаанз б̣раахман̣аава сздтаад̇и д̣̇ассзд̇и. хийно ан̃н̃о ван̣н̣од̇и ид̇арз д̇аяо ван̣н̣аа хийнаа лаамагаад̇и вад̣̇ад̇и. суггод̇и бан̣д̣аро. ган̣ход̇и гаал̣аго. суж̇жханд̇ийд̇и ж̇аад̇иг̇од̇д̇аад̣̇ибан̃н̃аабанадтаанзсу суж̇жханд̇и. б̣рахмуно буд̇д̇аад̇и махааб̣рахмуно буд̇д̇аа. орасаа мукад̇о ж̇аад̇аад̇и урз васид̇ваа мукад̇о нигканд̇аа, урз гад̇ваа сам̣вад̣̇д̇хид̇аад̇и ваа орасаа. б̣рахмаж̇аад̇и б̣рахмад̇о ниб̣б̣ад̇д̇аа. б̣рахманиммид̇аад̇и б̣рахмунаа ниммид̇аа. б̣рахмад̣̇ааяаад̣̇аад̇и б̣рахмуно д̣̇ааяаад̣̇аа. гхосоязва ко зсод̇и вохаарамад̇д̇амзвзд̇ам̣.
317.Evaṃme sutanti madhurasuttaṃ. Tattha mahākaccānoti gihikāle ujjenikarañño purohitaputto abhirūpo dassanīyo pāsādiko suvaṇṇavaṇṇo ca. Madhurāyanti evaṃnāmake nagare. Gundāvaneti kaṇhakagundāvane . Avantiputtoti avantiraṭṭhe rañño dhītāya putto. Vuddho ceva arahā cāti daharaṃ arahantampi na tathā sambhāventi yathā mahallakaṃ, thero pana vuddho ceva ahosi arahā ca. Brāhmaṇā, bho kaccānāti so kira rājā brāhmaṇaladdhiko, tasmā evamāha. Brāhmaṇova seṭṭho vaṇṇotiādīsu jātigottādīnaṃ paññāpanaṭṭhāne brāhmaṇāva seṭṭhāti dasseti. Hīno añño vaṇṇoti itare tayo vaṇṇā hīnā lāmakāti vadati. Sukkoti paṇḍaro. Kaṇhoti kāḷako. Sujjhantīti jātigottādipaññāpanaṭṭhānesu sujjhanti. Brahmuno puttāti mahābrahmuno puttā. Orasā mukhato jātāti ure vasitvā mukhato nikkhantā, ure katvā saṃvaddhitāti vā orasā. Brahmajāti brahmato nibbattā. Brahmanimmitāti brahmunā nimmitā. Brahmadāyādāti brahmuno dāyādā. Ghosoyeva kho esoti vohāramattamevetaṃ.
318. иж̇жхзяяаад̇и самиж̇жхзяяа, яад̇д̇агаани д̇ханаад̣̇ийни бад̇т̇зяяа, д̇ад̇д̇агзхисса манорат̇о буурзяяаад̇и ад̇т̇о. кад̇д̇ияобиссаассаад̇и кад̇д̇ияоби асса иссарияасамбад̇д̇асса буб̣б̣удтааяий асса. нзсам̣ зд̇т̇а гин̃жийд̇и на зд̇зсам̣ зд̇т̇а гин̃жи.
318.Ijjheyyāti samijjheyya, yattakāni dhanādīni pattheyya, tattakehissa manoratho pūreyyāti attho. Khattiyopissāssāti khattiyopi assa issariyasampattassa pubbuṭṭhāyī assa. Nesaṃ ettha kiñcīti na etesaṃ ettha kiñci.
322. аасанзна ваа ниманд̇зяяаамаад̇и нисиннаасанам̣ бабподзд̇ваа ид̇ха нисийд̣̇аад̇и вад̣̇зяяаама. абхиниманд̇зяяаамаби нанд̇и абхихарид̇ваа д̇ам̣ ниманд̇зяяаама. д̇ад̇т̇а д̣̇увид̇хо абхихааро ваажааяа жзва гааязна жа. ‘‘д̇умхаагам̣ ижчид̇ижчид̇агкан̣з мамам̣ жийвараад̣̇ийхи вад̣̇зяяаат̇а язнад̇т̇о’’д̇и вад̣̇анд̇о хи ваажааяа абхихарид̇ваа ниманд̇зд̇и наама. жийвараад̣̇ивзгаллам̣ саллагкзд̇ваа ‘‘ид̣̇ам̣ г̇ан̣хат̇аа’’д̇и д̇аани д̣̇знд̇о бана гааязна абхихарид̇ваа ниманд̇зд̇и наама. д̇ад̣̇убхаяамби санд̇хааяа ‘‘абхиниманд̇зяяаамаби на’’нд̇и ааха. рагкааваран̣аг̇уд̇д̇инд̇и рагкаасан̇каад̇ан̃жзва ааваран̣асан̇каад̇ан̃жа г̇уд̇д̇им̣. яаа банзсаа аавуд̇хахад̇т̇з бурисз табзнд̇зна рагкаа, саа д̇хаммигаа наама сам̣вихид̇аа на ход̇и. яат̇аа бана авзлааяа гадтахааригаабан̣н̣ахааригаад̣̇аяо вихаарам̣ на бависанд̇и, миг̇алуд̣̇д̣̇агаад̣̇аяо вихаарасиймааяа миг̇з ваа мажчз ваа на г̇ан̣ханд̇и, звам̣ сам̣вид̣̇аханд̇зна д̇хаммигаа наама сам̣вихид̇аа ход̇и. д̇ам̣ санд̇хааяааха ‘‘д̇хаммига’’нд̇и.
322.Āsanena vā nimanteyyāmāti nisinnāsanaṃ papphoṭetvā idha nisīdāti vadeyyāma. Abhinimanteyyāmapi nanti abhiharitvā taṃ nimanteyyāma. Tattha duvidho abhihāro vācāya ceva kāyena ca. ‘‘Tumhākaṃ icchiticchitakkhaṇe mamaṃ cīvarādīhi vadeyyātha yenattho’’ti vadanto hi vācāya abhiharitvā nimanteti nāma. Cīvarādivekallaṃ sallakkhetvā ‘‘idaṃ gaṇhathā’’ti tāni dento pana kāyena abhiharitvā nimanteti nāma. Tadubhayampi sandhāya ‘‘abhinimanteyyāmapi na’’nti āha. Rakkhāvaraṇaguttinti rakkhāsaṅkhātañceva āvaraṇasaṅkhātañca guttiṃ. Yā panesā āvudhahatthe purise ṭhapentena rakkhā, sā dhammikā nāma saṃvihitā na hoti. Yathā pana avelāya kaṭṭhahārikāpaṇṇahārikādayo vihāraṃ na pavisanti, migaluddakādayo vihārasīmāya mige vā macche vā na gaṇhanti, evaṃ saṃvidahantena dhammikā nāma saṃvihitā hoti. Taṃ sandhāyāha ‘‘dhammika’’nti.
звам̣ санд̇зд̇и звам̣ жад̇уннамби ван̣н̣аанам̣ баб̣б̣аж̇ид̇аанам̣ баб̣б̣аж̇ид̇асаггаарзна самз самаанз. сзсам̣ саб̣б̣ад̇т̇а уд̇д̇аанамзваад̇и.
Evaṃsanteti evaṃ catunnampi vaṇṇānaṃ pabbajitānaṃ pabbajitasakkārena same samāne. Sesaṃ sabbattha uttānamevāti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
мад̇хурасуд̇д̇аван̣н̣анаа нидтид̇аа.
Madhurasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 4. мад̇хурасуд̇д̇ам̣ • 4. Madhurasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 4. мад̇хурасуд̇д̇аван̣н̣анаа • 4. Madhurasuttavaṇṇanā
