| Library / Tipiṭaka / д̇ибидага • Tipiṭaka / маж̇жхиманигааяа (дийгаа) • Majjhimanikāya (ṭīkā) |
4. мад̇хурасуд̇д̇аван̣н̣анаа
4. Madhurasuttavaṇṇanā
317. мад̇хурааяанд̇и уд̇д̇арамад̇хурааяам̣. г̇унд̣̇ааванзд̇и гаал̣асиббаливанз. ад̇имуд̇д̇агаванзд̇и жа вад̣̇анд̇и. жад̇уусу ван̣н̣зсу б̣раахман̣ова сздто ван̣н̣о. бан̣д̣арод̇и барисуд̣̇д̇хо. гаал̣агод̇и абарисуд̣̇д̇хо. ж̇аад̇иг̇од̇д̇аад̣̇ибан̃н̃аабанадтаанзсууд̇и ж̇аад̇иг̇од̇д̇аад̣̇ивасзна суд̣̇д̇хажинд̇ааяам̣ б̣раахман̣аа зва суд̣̇д̇хаж̇аад̇игаа, на ид̇арзд̇и ад̇хиббааяо. сам̣саарад̇о ваа суд̣̇д̇хажинд̇ааяам̣ б̣раахман̣аава суж̇жханд̇и взд̣̇авихид̇асса суд̣̇д̇хавид̇хино ан̃н̃зсам̣ ависаяад̇д̇аад̇и ад̇хиббааяо. д̇ам̣ банзд̇ам̣ д̇зсам̣ вируж̇жхад̇и кад̇д̇ияавзссаанамби манд̇аж̇жхзнасса анун̃н̃аад̇ад̇д̇аа, манд̇аж̇жхзнавид̇хинаа жа сам̣саарасуд̣̇д̇хияаабхаавад̇о. буд̇д̇аа наама анорасааби хонд̇и, на д̇ат̇аа имзд̇и ааха ‘‘орасаа’’д̇и. урз сам̣вад̣дхид̇абуд̇д̇оби ‘‘ораса’’нд̇и вужжад̇и. имз бана мукад̇о ниг̇г̇ад̇о худ̇ваа урз сам̣вад̣дхаад̇и д̣̇ассзд̇ум̣ ‘‘орасаа мукад̇о ж̇аад̇аа’’д̇и вуд̇д̇ам̣. д̇ад̇о зва б̣рахмад̇о ж̇аад̇аад̇и б̣рахмаж̇аа, б̣рахмасамбхууд̇ааби ‘‘б̣рахмаж̇аа’’д̇и вужжанд̇и, на д̇ат̇аа имз. имз бана бажжагкад̇о б̣рахмунаа ниммид̇аад̇и б̣рахманиммид̇аа, д̇ад̇о зва б̣рахмад̇о лад̣̇д̇хаб̣б̣авиж̇ж̇аад̣̇ид̣̇ааяаж̇ж̇ад̣̇ааяаад̣̇аад̇и б̣рахмад̣̇ааяаад̣̇аад̇и саб̣б̣амзд̇ам̣ б̣раахман̣аанам̣ гад̇т̇анаабалаабасад̣̇исам̣ вин̃н̃уунам̣ аббамаан̣ам̣ авимад̣̇д̣̇агкамам̣ ваажаавад̇т̇умад̇д̇ам̣ б̣рахмагуд̇д̇ассзва абхаавад̇о. яам̣ банзд̇т̇а вад̇д̇аб̣б̣ам̣, д̇ам̣ висуд̣̇д̇химаг̇г̇аван̣н̣анааяам̣ вуд̇д̇амзва. д̇знааха ‘‘гхосоязваа’’д̇иаад̣̇и. вохаарамад̇д̇амзвзд̇анд̇и зд̇ам̣ ‘‘б̣раахман̣ова сздто ван̣н̣о’’д̇иаад̣̇и важанамад̇д̇амзва, на д̇асса ад̇т̇о д̇зхи ад̇хиббзд̇аббагааро ад̇т̇и.
317.Madhurāyanti uttaramadhurāyaṃ. Gundāvaneti kāḷasippalivane. Atimuttakavaneti ca vadanti. Catūsu vaṇṇesu brāhmaṇova seṭṭho vaṇṇo. Paṇḍaroti parisuddho. Kāḷakoti aparisuddho. Jātigottādipaññāpanaṭṭhānesūti jātigottādivasena suddhacintāyaṃ brāhmaṇā eva suddhajātikā, na itareti adhippāyo. Saṃsārato vā suddhacintāyaṃ brāhmaṇāva sujjhanti vedavihitassa suddhavidhino aññesaṃ avisayattāti adhippāyo. Taṃ panetaṃ tesaṃ virujjhati khattiyavessānampi mantajjhenassa anuññātattā, mantajjhenavidhinā ca saṃsārasuddhiyābhāvato. Puttā nāma anorasāpi honti, na tathā imeti āha ‘‘orasā’’ti. Ure saṃvaḍḍhitaputtopi ‘‘orasa’’nti vuccati. Ime pana mukhato niggato hutvā ure saṃvaḍḍhāti dassetuṃ ‘‘orasā mukhato jātā’’ti vuttaṃ. Tato eva brahmato jātāti brahmajā, brahmasambhūtāpi ‘‘brahmajā’’ti vuccanti, na tathā ime. Ime pana paccakkhato brahmunā nimmitāti brahmanimmitā, tato eva brahmato laddhabbavijjādidāyajjadāyādāti brahmadāyādāti sabbametaṃ brāhmaṇānaṃ katthanāpalāpasadisaṃ viññūnaṃ appamāṇaṃ avimaddakkhamaṃ vācāvatthumattaṃ brahmakuttasseva abhāvato. Yaṃ panettha vattabbaṃ, taṃ visuddhimaggavaṇṇanāyaṃ vuttameva. Tenāha ‘‘ghosoyevā’’tiādi. Vohāramattamevetanti etaṃ ‘‘brāhmaṇova seṭṭho vaṇṇo’’tiādi vacanamattameva, na tassa attho tehi adhippetappakāro atthi.
318. самиж̇жхзяяаад̇и д̣̇идтид̣̇ийбанавасзна ад̇д̇ано аж̇жхаасаяо нибпаж̇ж̇зяяа. д̇знааха ‘‘манорат̇о буурзяяаа’’д̇и. кад̇д̇ияобийд̇и баракад̇д̇ияоби . ассаад̇и самид̣̇д̇хад̇ханаад̣̇им̣ бад̇д̇асса. д̇знааха – ‘‘иссарияасамбад̇д̇ассаа’’д̇и нзсанд̇и зд̇зсам̣ жад̇уннам̣ ван̣н̣аанам̣ зд̇т̇а буб̣б̣удтааяибхааваад̣̇инаа ид̇арзхи убажарид̇аб̣б̣ад̇ааяа на гин̃жи наанаагаран̣анд̇и яож̇анаа.
318.Samijjheyyāti diṭṭhidīpanavasena attano ajjhāsayo nipphajjeyya. Tenāha ‘‘manoratho pūreyyā’’ti. Khattiyopīti parakhattiyopi . Assāti samiddhadhanādiṃ pattassa. Tenāha – ‘‘issariyasampattassā’’ti nesanti etesaṃ catunnaṃ vaṇṇānaṃ ettha pubbuṭṭhāyibhāvādinā itarehi upacaritabbatāya na kiñci nānākaraṇanti yojanā.
322. ахам̣ жийвараад̣̇ийхи убадтааго, д̇умхаагам̣ ижчид̇ажчид̇агкан̣з вад̣̇зяяаат̇а язнад̇т̇од̇и яож̇анаа. жораад̣̇иубад̣̇д̣̇аванисзд̇ханзна рагкааг̇уд̇д̇и, д̣̇аанаад̣̇инимид̇д̇аубад̣̇д̣̇аванисзд̇ханзна ааваран̣аг̇уд̇д̇и. бажжуббаннаанад̇т̇анисзд̇ханзна ваа рагкааг̇уд̇д̇и, ааг̇аамианад̇т̇анисзд̇ханзна ааваран̣аг̇уд̇д̇и. зд̇т̇а жа кад̇д̇ияаад̣̇ийсу яо яо иссаро, д̇асса ид̇арзна анувад̇д̇зд̇аб̣б̣абхаавз, гусалаагусалагаран̣зна нзсам̣ васзна лад̣̇д̇хаб̣б̣аабхисамбарааяз, баб̣б̣аж̇ид̇зхи лад̣̇д̇хаб̣б̣асаамийжигирияааяа жа ан̣умад̇д̇оби висзсо над̇т̇и, д̇асмаа со висзсаабхааво баал̣ияам̣ д̇ад̇т̇а д̇ад̇т̇а ваарз ‘‘звам̣ санд̇з’’д̇иаад̣̇инаа вибхаавид̇о. сзсам̣ сувин̃н̃зяяамзва.
322. Ahaṃ cīvarādīhi upaṭṭhāko, tumhākaṃ icchitacchitakkhaṇe vadeyyātha yenatthoti yojanā. Corādiupaddavanisedhanena rakkhāgutti, dānādinimittaupaddavanisedhanena āvaraṇagutti. Paccuppannānatthanisedhanena vā rakkhāgutti, āgāmianatthanisedhanena āvaraṇagutti. Ettha ca khattiyādīsu yo yo issaro, tassa itarena anuvattetabbabhāve, kusalākusalakaraṇena nesaṃ vasena laddhabbaabhisamparāye, pabbajitehi laddhabbasāmīcikiriyāya ca aṇumattopi viseso natthi, tasmā so visesābhāvo pāḷiyaṃ tattha tattha vāre ‘‘evaṃ sante’’tiādinā vibhāvito. Sesaṃ suviññeyyameva.
мад̇хурасуд̇д̇аван̣н̣анааяа лийнад̇т̇аббагаасанаа самад̇д̇аа.
Madhurasuttavaṇṇanāya līnatthappakāsanā samattā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 4. мад̇хурасуд̇д̇ам̣ • 4. Madhurasuttaṃ
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 4. мад̇хурасуд̇д̇аван̣н̣анаа • 4. Madhurasuttavaṇṇanā
