| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၁၀. မဓုရာသုတ္တဝဏ္ဏနာ
10. Madhurāsuttavaṇṇanā
၂၂၀. ဒသမေ ပဉ္စိမေ, ဘိက္ခဝေ, အာဒီနဝာ မဓုရာယန္တိ ဧကံ သမယံ ဘဂဝာ ဘိက္ခုသင္ဃပရိဝုတော စာရိကံ စရမာနော မဓုရာနဂရံ သမ္ပာပုဏိတ္ဝာ အန္တောနဂရံ ပဝိသိတုံ အာရဘိ။ အထေကာ မိစ္ဆာဒိဋ္ဌိကာ ယက္ခိနီ အစေလာ ဟုတ္ဝာ ဒ္ဝေ ဟတ္ထေ ပသာရေတ္ဝာ ဇိဝ္ဟံ နိလ္လာလေတ္ဝာ ဒသဗလသ္သ ပုရတော အဋ္ဌာသိ။ သတ္ထာ အန္တောနဂရံ အပ္ပဝိသိတ္ဝာ တတောဝ နိက္ခမိတ္ဝာ ဝိဟာရံ အဂမာသိ။ မဟာဇနော ခာဒနီယဘောဇနီယဉ္စေဝ သက္ကာရသမ္မာနဉ္စ အာဒာယ ဝိဟာရံ ဂန္တ္ဝာ ဗုဒ္ဓပ္ပမုခသ္သ ဘိက္ခုသင္ဃသ္သ ဒာနံ အဒာသိ။ သတ္ထာ တသ္သ နဂရသ္သ နိဂ္ဂဏ္ဟနတ္ထာယ ဣမံ သုတ္တံ အာရဘိ။ တတ္ထ ဝိသမာတိ န သမတလာ။ ဗဟုရဇာတိ ဝာတပဟရဏကာလေ ဥဒ္ဓတေန ရဇက္ခန္ဓေန ပရိယောနဒ္ဓာ ဝိယ ဟောတိ။ သေသံ သဗ္ဗတ္ထ ဥတ္တာနမေဝာတိ။
220. Dasame pañcime, bhikkhave, ādīnavā madhurāyanti ekaṃ samayaṃ bhagavā bhikkhusaṅghaparivuto cārikaṃ caramāno madhurānagaraṃ sampāpuṇitvā antonagaraṃ pavisituṃ ārabhi. Athekā micchādiṭṭhikā yakkhinī acelā hutvā dve hatthe pasāretvā jivhaṃ nillāletvā dasabalassa purato aṭṭhāsi. Satthā antonagaraṃ appavisitvā tatova nikkhamitvā vihāraṃ agamāsi. Mahājano khādanīyabhojanīyañceva sakkārasammānañca ādāya vihāraṃ gantvā buddhappamukhassa bhikkhusaṅghassa dānaṃ adāsi. Satthā tassa nagarassa niggaṇhanatthāya imaṃ suttaṃ ārabhi. Tattha visamāti na samatalā. Bahurajāti vātapaharaṇakāle uddhatena rajakkhandhena pariyonaddhā viya hoti. Sesaṃ sabbattha uttānamevāti.
အက္ကောသကဝဂ္ဂော ဒုတိယော။
Akkosakavaggo dutiyo.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၁၀. မဓုရာသုတ္တံ • 10. Madhurāsuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၃-၁၀. သီလသုတ္တာဒိဝဏ္ဏနာ • 3-10. Sīlasuttādivaṇṇanā
