| Library / Tipiṭaka / д̇ибидага • Tipiṭaka / маж̇жхиманигааяа • Majjhimanikāya |
5. мааг̇ан̣д̣ияасуд̇д̇ам̣
5. Māgaṇḍiyasuttaṃ
207. звам̣ мз суд̇ам̣ – згам̣ самаяам̣ бхаг̇аваа гуруусу вихарад̇и гаммаасад̇хаммам̣ наама гуруунам̣ ниг̇амо, бхаарад̣̇вааж̇аг̇од̇д̇асса б̣раахман̣асса аг̇яааг̇аарз д̇ин̣асант̇аарагз 1. ат̇а ко бхаг̇аваа буб̣б̣ан̣хасамаяам̣ ниваасзд̇ваа бад̇д̇ажийварамаад̣̇ааяа гаммаасад̇хаммам̣ бин̣д̣ааяа баависи. гаммаасад̇хаммам̣ бин̣д̣ааяа жарид̇ваа бажчаабхад̇д̇ам̣ бин̣д̣абаад̇абадигганд̇о язна ан̃н̃ад̇аро ванасан̣д̣о д̇знубасан̇гами д̣̇иваавихаарааяа. д̇ам̣ ванасан̣д̣ам̣ аж̇жхог̇аахзд̇ваа ан̃н̃ад̇арасмим̣ ругкамуулз д̣̇иваавихаарам̣ нисийд̣̇и. ат̇а ко мааг̇ан̣д̣ияо 2 бариб̣б̣ааж̇аго ж̇ан̇гхаавихаарам̣ анужан̇гамамаано анувижарамаано язна бхаарад̣̇вааж̇аг̇од̇д̇асса б̣раахман̣асса аг̇яааг̇аарам̣ д̇знубасан̇гами. ад̣̇д̣̇асаа ко мааг̇ан̣д̣ияо бариб̣б̣ааж̇аго бхаарад̣̇вааж̇аг̇од̇д̇асса б̣раахман̣асса аг̇яааг̇аарз д̇ин̣асант̇аарагам̣ бан̃н̃ад̇д̇ам̣. д̣̇исваана бхаарад̣̇вааж̇аг̇од̇д̇ам̣ б̣раахман̣ам̣ зд̇ад̣̇авожа – ‘‘гасса нваяам̣ бход̇о бхаарад̣̇вааж̇асса аг̇яааг̇аарз д̇ин̣асант̇аараго бан̃н̃ад̇д̇о, саман̣асзяяаануруубам̣ 3 ман̃н̃з’’д̇и? ‘‘ад̇т̇и, бхо мааг̇ан̣д̣ияа, саман̣о г̇од̇амо сагяабуд̇д̇о сагяагулаа баб̣б̣аж̇ид̇о. д̇ам̣ ко бана бхаванд̇ам̣ г̇од̇амам̣ звам̣ галяаан̣о гид̇д̇исад̣̇д̣̇о аб̣бхуг̇г̇ад̇о – ‘ид̇иби со бхаг̇аваа арахам̣ саммаасамб̣уд̣̇д̇хо виж̇ж̇аажаран̣асамбанно суг̇ад̇о логавид̣̇уу ануд̇д̇аро бурисад̣̇аммасаарат̇и сад̇т̇аа д̣̇звамануссаанам̣ б̣уд̣̇д̇хо бхаг̇аваа’д̇и. д̇ассзсаа бход̇о г̇од̇амасса сзяяаа бан̃н̃ад̇д̇аа’’д̇и. ‘‘д̣̇уд̣̇д̣̇идтам̣ вад̇а, бхо бхаарад̣̇вааж̇а, ад̣̇д̣̇асаама; д̣̇уд̣̇д̣̇идтам̣ вад̇а, бхо бхаарад̣̇вааж̇а, ад̣̇д̣̇асаама! яз маяам̣ д̇асса бход̇о г̇од̇амасса бхуунахуно 4 сзяяам̣ ад̣̇д̣̇асаамаа’’д̇и. ‘‘рагкассзд̇ам̣, мааг̇ан̣д̣ияа, ваажам̣; рагкассзд̇ам̣ , мааг̇ан̣д̣ияа, ваажам̣. б̣ахуу хи д̇асса бход̇о г̇од̇амасса кад̇д̇ияабан̣д̣ид̇ааби б̣раахман̣абан̣д̣ид̇ааби г̇ахабад̇ибан̣д̣ид̇ааби саман̣абан̣д̣ид̇ааби абхиббасаннаа винийд̇аа арияз н̃ааяз д̇хаммз гусалз’’д̇и. ‘‘саммукаа жзби маяам̣, бхо бхаарад̣̇вааж̇а, д̇ам̣ бхаванд̇ам̣ г̇од̇амам̣ бассзяяаама, саммукааби нам̣ вад̣̇зяяаама – ‘бхуунаху 5 саман̣о г̇од̇амо’д̇и. д̇ам̣ гисса хзд̇у? зван̃хи но суд̇д̇з ожарад̇ий’’д̇и. ‘‘сажз д̇ам̣ бход̇о мааг̇ан̣д̣ияасса аг̇ару аарожзяяаами д̇ам̣ 6 саман̣асса г̇од̇амассаа’’д̇и. ‘‘аббоссугго бхавам̣ бхаарад̣̇вааж̇о вуд̇д̇ова нам̣ вад̣̇зяяаа’’д̇и.
207. Evaṃ me sutaṃ – ekaṃ samayaṃ bhagavā kurūsu viharati kammāsadhammaṃ nāma kurūnaṃ nigamo, bhāradvājagottassa brāhmaṇassa agyāgāre tiṇasanthārake 7. Atha kho bhagavā pubbaṇhasamayaṃ nivāsetvā pattacīvaramādāya kammāsadhammaṃ piṇḍāya pāvisi. Kammāsadhammaṃ piṇḍāya caritvā pacchābhattaṃ piṇḍapātapaṭikkanto yena aññataro vanasaṇḍo tenupasaṅkami divāvihārāya. Taṃ vanasaṇḍaṃ ajjhogāhetvā aññatarasmiṃ rukkhamūle divāvihāraṃ nisīdi. Atha kho māgaṇḍiyo 8 paribbājako jaṅghāvihāraṃ anucaṅkamamāno anuvicaramāno yena bhāradvājagottassa brāhmaṇassa agyāgāraṃ tenupasaṅkami. Addasā kho māgaṇḍiyo paribbājako bhāradvājagottassa brāhmaṇassa agyāgāre tiṇasanthārakaṃ paññattaṃ. Disvāna bhāradvājagottaṃ brāhmaṇaṃ etadavoca – ‘‘kassa nvayaṃ bhoto bhāradvājassa agyāgāre tiṇasanthārako paññatto, samaṇaseyyānurūpaṃ 9 maññe’’ti? ‘‘Atthi, bho māgaṇḍiya, samaṇo gotamo sakyaputto sakyakulā pabbajito. Taṃ kho pana bhavantaṃ gotamaṃ evaṃ kalyāṇo kittisaddo abbhuggato – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā’ti. Tassesā bhoto gotamassa seyyā paññattā’’ti. ‘‘Duddiṭṭhaṃ vata, bho bhāradvāja, addasāma; duddiṭṭhaṃ vata, bho bhāradvāja, addasāma! Ye mayaṃ tassa bhoto gotamassa bhūnahuno 10 seyyaṃ addasāmā’’ti. ‘‘Rakkhassetaṃ, māgaṇḍiya, vācaṃ; rakkhassetaṃ , māgaṇḍiya, vācaṃ. Bahū hi tassa bhoto gotamassa khattiyapaṇḍitāpi brāhmaṇapaṇḍitāpi gahapatipaṇḍitāpi samaṇapaṇḍitāpi abhippasannā vinītā ariye ñāye dhamme kusale’’ti. ‘‘Sammukhā cepi mayaṃ, bho bhāradvāja, taṃ bhavantaṃ gotamaṃ passeyyāma, sammukhāpi naṃ vadeyyāma – ‘bhūnahu 11 samaṇo gotamo’ti. Taṃ kissa hetu? Evañhi no sutte ocaratī’’ti. ‘‘Sace taṃ bhoto māgaṇḍiyassa agaru āroceyyāmi taṃ 12 samaṇassa gotamassā’’ti. ‘‘Appossukko bhavaṃ bhāradvājo vuttova naṃ vadeyyā’’ti.
208. ассоси ко бхаг̇аваа д̣̇иб̣б̣ааяа сод̇ад̇хаад̇уяаа висуд̣̇д̇хааяа ад̇игганд̇амаанусигааяа бхаарад̣̇вааж̇аг̇од̇д̇асса б̣раахман̣асса мааг̇ан̣д̣иязна бариб̣б̣ааж̇агзна сад̣̇д̇хим̣ имам̣ гат̇аасаллаабам̣. ат̇а ко бхаг̇аваа сааяанхасамаяам̣ бадисаллаанаа вудтид̇о язна бхаарад̣̇вааж̇аг̇од̇д̇асса б̣раахман̣асса аг̇яааг̇аарам̣ д̇знубасан̇гами; убасан̇гамид̇ваа нисийд̣̇и бхаг̇аваа бан̃н̃ад̇д̇з д̇ин̣асант̇аарагз. ат̇а ко бхаарад̣̇вааж̇аг̇од̇д̇о б̣раахман̣о язна бхаг̇аваа д̇знубасан̇гами; убасан̇гамид̇ваа бхаг̇авад̇аа сад̣̇д̇хим̣ саммод̣̇и. саммод̣̇анийяам̣ гат̇ам̣ сааран̣ийяам̣ вийд̇исаарзд̇ваа згаманд̇ам̣ нисийд̣̇и. згаманд̇ам̣ нисиннам̣ ко бхаарад̣̇вааж̇аг̇од̇д̇ам̣ б̣раахман̣ам̣ бхаг̇аваа зд̇ад̣̇авожа – ‘‘аху бана д̇з, бхаарад̣̇вааж̇а, мааг̇ан̣д̣иязна бариб̣б̣ааж̇агзна сад̣̇д̇хим̣ имам̣язва д̇ин̣асант̇аарагам̣ аараб̣бха гожид̣̇зва гат̇аасаллаабо’’д̇и? звам̣ вуд̇д̇з, бхаарад̣̇вааж̇аг̇од̇д̇о б̣раахман̣о сам̣виг̇г̇о ломахадтаж̇аад̇о бхаг̇аванд̇ам̣ зд̇ад̣̇авожа – ‘‘зд̇ад̣̇зва ко бана маяам̣ бход̇о г̇од̇амасса аарожзд̇угаамаа. ат̇а жа бана бхавам̣ г̇од̇амо анагкаад̇ам̣язва агкаасий’’д̇и. аяан̃жа хи 13 бхаг̇авад̇о бхаарад̣̇вааж̇аг̇од̇д̇зна б̣раахман̣зна сад̣̇д̇хим̣ анд̇араагат̇аа виббагад̇аа ход̇и. ат̇а ко мааг̇ан̣д̣ияо бариб̣б̣ааж̇аго ж̇ан̇гхаавихаарам̣ анужан̇гамамаано анувижарамаано язна бхаарад̣̇вааж̇аг̇од̇д̇асса б̣раахман̣асса аг̇яааг̇аарам̣ язна бхаг̇аваа д̇знубасан̇гами; убасан̇гамид̇ваа бхаг̇авад̇аа сад̣̇д̇хим̣ саммод̣̇и. саммод̣̇анийяам̣ гат̇ам̣ сааран̣ийяам̣ вийд̇исаарзд̇ваа згаманд̇ам̣ нисийд̣̇и. згаманд̇ам̣ нисиннам̣ ко мааг̇ан̣д̣ияам̣ бариб̣б̣ааж̇агам̣ бхаг̇аваа зд̇ад̣̇авожа –
208. Assosi kho bhagavā dibbāya sotadhātuyā visuddhāya atikkantamānusikāya bhāradvājagottassa brāhmaṇassa māgaṇḍiyena paribbājakena saddhiṃ imaṃ kathāsallāpaṃ. Atha kho bhagavā sāyanhasamayaṃ paṭisallānā vuṭṭhito yena bhāradvājagottassa brāhmaṇassa agyāgāraṃ tenupasaṅkami; upasaṅkamitvā nisīdi bhagavā paññatte tiṇasanthārake. Atha kho bhāradvājagotto brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinnaṃ kho bhāradvājagottaṃ brāhmaṇaṃ bhagavā etadavoca – ‘‘ahu pana te, bhāradvāja, māgaṇḍiyena paribbājakena saddhiṃ imaṃyeva tiṇasanthārakaṃ ārabbha kocideva kathāsallāpo’’ti? Evaṃ vutte, bhāradvājagotto brāhmaṇo saṃviggo lomahaṭṭhajāto bhagavantaṃ etadavoca – ‘‘etadeva kho pana mayaṃ bhoto gotamassa ārocetukāmā. Atha ca pana bhavaṃ gotamo anakkhātaṃyeva akkhāsī’’ti. Ayañca hi 14 bhagavato bhāradvājagottena brāhmaṇena saddhiṃ antarākathā vippakatā hoti. Atha kho māgaṇḍiyo paribbājako jaṅghāvihāraṃ anucaṅkamamāno anuvicaramāno yena bhāradvājagottassa brāhmaṇassa agyāgāraṃ yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinnaṃ kho māgaṇḍiyaṃ paribbājakaṃ bhagavā etadavoca –
209. ‘‘жагкум̣ ко, мааг̇ан̣д̣ияа, руубаараамам̣ руубарад̇ам̣ руубасаммуд̣̇ид̇ам̣. д̇ам̣ д̇ат̇ааг̇ад̇асса д̣̇анд̇ам̣ г̇уд̇д̇ам̣ рагкид̇ам̣ сам̣вуд̇ам̣, д̇асса жа сам̣варааяа д̇хаммам̣ д̣̇зсзд̇и. ид̣̇ам̣ ну д̇з зд̇ам̣, мааг̇ан̣д̣ияа, санд̇хааяа бхаасид̇ам̣ – ‘бхуунаху саман̣о г̇од̇амо’’’д̇и? ‘‘зд̇ад̣̇зва ко бана мз, бхо г̇од̇ама, санд̇хааяа бхаасид̇ам̣ – ‘бхуунаху саман̣о г̇од̇амо’д̇и. д̇ам̣ гисса хзд̇у? зван̃хи но суд̇д̇з ожарад̇ий’’д̇и. ‘‘сод̇ам̣ ко, мааг̇ан̣д̣ияа, сад̣̇д̣̇аараамам̣…бз… гхаанам̣.20273 ко, мааг̇ан̣д̣ияа г̇анд̇хаараамам̣… ж̇ивхаа ко, мааг̇ан̣д̣ияа, расаараамаа расарад̇аа расасаммуд̣̇ид̇аа. саа д̇ат̇ааг̇ад̇асса д̣̇анд̇аа г̇уд̇д̇аа рагкид̇аа сам̣вуд̇аа, д̇ассаа жа сам̣варааяа д̇хаммам̣ д̣̇зсзд̇и. ид̣̇ам̣ ну д̇з зд̇ам̣, мааг̇ан̣д̣ияа, санд̇хааяа бхаасид̇ам̣ – ‘бхуунаху саман̣о г̇од̇амо’’’д̇и? ‘‘зд̇ад̣̇зва ко бана мз, бхо г̇од̇ама, санд̇хааяа бхаасид̇ам̣ – ‘бхуунаху саман̣о г̇од̇амо’д̇и. д̇ам̣ гисса хзд̇у? зван̃хи но суд̇д̇з ожарад̇ий’’д̇и. ‘‘гааяо ко, мааг̇ан̣д̣ияа, подтаб̣б̣аараамо подтаб̣б̣арад̇о…бз… мано ко, мааг̇ан̣д̣ияа, д̇хаммаараамо д̇хаммарад̇о д̇хаммасаммуд̣̇ид̇о. со д̇ат̇ааг̇ад̇асса д̣̇анд̇о г̇уд̇д̇о рагкид̇о сам̣вуд̇о, д̇асса жа сам̣варааяа д̇хаммам̣ д̣̇зсзд̇и. ид̣̇ам̣ ну д̇з зд̇ам̣, мааг̇ан̣д̣ияа, санд̇хааяа бхаасид̇ам̣ – ‘бхуунаху саман̣о г̇од̇амо’’’д̇и? ‘‘зд̇ад̣̇зва ко бана мз, бхо г̇од̇ама, санд̇хааяа бхаасид̇ам̣ – ‘бхуунаху саман̣о г̇од̇амо’д̇и. д̇ам̣ гисса хзд̇у? зван̃хи но суд̇д̇з ожарад̇ий’’д̇и.
209. ‘‘Cakkhuṃ kho, māgaṇḍiya, rūpārāmaṃ rūparataṃ rūpasammuditaṃ. Taṃ tathāgatassa dantaṃ guttaṃ rakkhitaṃ saṃvutaṃ, tassa ca saṃvarāya dhammaṃ deseti. Idaṃ nu te etaṃ, māgaṇḍiya, sandhāya bhāsitaṃ – ‘bhūnahu samaṇo gotamo’’’ti? ‘‘Etadeva kho pana me, bho gotama, sandhāya bhāsitaṃ – ‘bhūnahu samaṇo gotamo’ti. Taṃ kissa hetu? Evañhi no sutte ocaratī’’ti. ‘‘Sotaṃ kho, māgaṇḍiya, saddārāmaṃ…pe… ghānaṃ.20273 kho, māgaṇḍiya gandhārāmaṃ… jivhā kho, māgaṇḍiya, rasārāmā rasaratā rasasammuditā. Sā tathāgatassa dantā guttā rakkhitā saṃvutā, tassā ca saṃvarāya dhammaṃ deseti. Idaṃ nu te etaṃ, māgaṇḍiya, sandhāya bhāsitaṃ – ‘bhūnahu samaṇo gotamo’’’ti? ‘‘Etadeva kho pana me, bho gotama, sandhāya bhāsitaṃ – ‘bhūnahu samaṇo gotamo’ti. Taṃ kissa hetu? Evañhi no sutte ocaratī’’ti. ‘‘Kāyo kho, māgaṇḍiya, phoṭṭhabbārāmo phoṭṭhabbarato…pe… mano kho, māgaṇḍiya, dhammārāmo dhammarato dhammasammudito. So tathāgatassa danto gutto rakkhito saṃvuto, tassa ca saṃvarāya dhammaṃ deseti. Idaṃ nu te etaṃ, māgaṇḍiya, sandhāya bhāsitaṃ – ‘bhūnahu samaṇo gotamo’’’ti? ‘‘Etadeva kho pana me, bho gotama, sandhāya bhāsitaṃ – ‘bhūnahu samaṇo gotamo’ti. Taṃ kissa hetu? Evañhi no sutte ocaratī’’ti.
210. ‘‘д̇ам̣ гим̣ ман̃н̃аси, мааг̇ан̣д̣ияа – ‘ид̇хзгажжо жагкувин̃н̃зяязхи руубзхи барижаарид̇абуб̣б̣о асса идтзхи ганд̇зхи манаабзхи бияаруубзхи гаамуубасам̣хид̇зхи раж̇анийязхи, со абарзна самаязна руубаанам̣язва самуд̣̇аяан̃жа ад̇т̇ан̇г̇аман̃жа ассаад̣̇ан̃жа аад̣̇ийнаван̃жа ниссаран̣ан̃жа яат̇аабхууд̇ам̣ вид̣̇ид̇ваа руубад̇ан̣хам̣ бахааяа руубабарил̣аахам̣ бадивинод̣̇зд̇ваа виг̇ад̇абибаасо аж̇жхад̇д̇ам̣ вуубасанд̇ажид̇д̇о вихарзяяа. имасса бана д̇з, мааг̇ан̣д̣ияа, гимасса важанийяа’’’нд̇и? ‘‘на гин̃жи, бхо г̇од̇ама’’. ‘‘д̇ам̣ гим̣ ман̃н̃аси, мааг̇ан̣д̣ияа – ‘ид̇хзгажжо сод̇авин̃н̃зяязхи сад̣̇д̣̇зхи…бз… гхаанавин̃н̃зяязхи г̇анд̇хзхи… ж̇ивхаавин̃н̃зяязхи расзхи… гааяавин̃н̃зяязхи подтаб̣б̣зхи барижаарид̇абуб̣б̣о асса идтзхи ганд̇зхи манаабзхи бияаруубзхи гаамуубасам̣хид̇зхи раж̇анийязхи, со абарзна самаязна подтаб̣б̣аанам̣язва самуд̣̇аяан̃жа ад̇т̇ан̇г̇аман̃жа ассаад̣̇ан̃жа аад̣̇ийнаван̃жа ниссаран̣ан̃жа яат̇аабхууд̇ам̣ вид̣̇ид̇ваа подтаб̣б̣ад̇ан̣хам̣ бахааяа подтаб̣б̣абарил̣аахам̣ бадивинод̣̇зд̇ваа виг̇ад̇абибаасо аж̇жхад̇д̇ам̣ вуубасанд̇ажид̇д̇о вихарзяяа. имасса бана д̇з, мааг̇ан̣д̣ияа, гимасса важанийяа’’’нд̇и? ‘‘на гин̃жи, бхо г̇од̇ама’’.
210. ‘‘Taṃ kiṃ maññasi, māgaṇḍiya – ‘idhekacco cakkhuviññeyyehi rūpehi paricāritapubbo assa iṭṭhehi kantehi manāpehi piyarūpehi kāmūpasaṃhitehi rajanīyehi, so aparena samayena rūpānaṃyeva samudayañca atthaṅgamañca assādañca ādīnavañca nissaraṇañca yathābhūtaṃ viditvā rūpataṇhaṃ pahāya rūpapariḷāhaṃ paṭivinodetvā vigatapipāso ajjhattaṃ vūpasantacitto vihareyya. Imassa pana te, māgaṇḍiya, kimassa vacanīya’’’nti? ‘‘Na kiñci, bho gotama’’. ‘‘Taṃ kiṃ maññasi, māgaṇḍiya – ‘idhekacco sotaviññeyyehi saddehi…pe… ghānaviññeyyehi gandhehi… jivhāviññeyyehi rasehi… kāyaviññeyyehi phoṭṭhabbehi paricāritapubbo assa iṭṭhehi kantehi manāpehi piyarūpehi kāmūpasaṃhitehi rajanīyehi, so aparena samayena phoṭṭhabbānaṃyeva samudayañca atthaṅgamañca assādañca ādīnavañca nissaraṇañca yathābhūtaṃ viditvā phoṭṭhabbataṇhaṃ pahāya phoṭṭhabbapariḷāhaṃ paṭivinodetvā vigatapipāso ajjhattaṃ vūpasantacitto vihareyya. Imassa pana te, māgaṇḍiya, kimassa vacanīya’’’nti? ‘‘Na kiñci, bho gotama’’.
211. ‘‘ахам̣ ко бана, мааг̇ан̣д̣ияа, буб̣б̣з аг̇аарияабхууд̇о самаано бан̃жахи гаамаг̇ун̣зхи самаббид̇о саман̇г̇ийбхууд̇о барижаарзсим̣ жагкувин̃н̃зяязхи руубзхи идтзхи ганд̇зхи манаабзхи бияаруубзхи гаамуубасам̣хид̇зхи раж̇анийязхи, сод̇авин̃н̃зяязхи сад̣̇д̣̇зхи…бз… гхаанавин̃н̃зяязхи г̇анд̇хзхи… ж̇ивхаавин̃н̃зяязхи расзхи… гааяавин̃н̃зяязхи подтаб̣б̣зхи идтзхи ганд̇зхи манаабзхи бияаруубзхи гаамуубасам̣хид̇зхи раж̇анийязхи. д̇асса маяхам̣, мааг̇ан̣д̣ияа, д̇аяо баасаад̣̇аа ахзсум̣ – зго вассиго, зго хзманд̇иго, зго г̇имхиго. со ко ахам̣, мааг̇ан̣д̣ияа, вассигз баасаад̣̇з вассигз жад̇д̇ааро 15 маасз ниббурисзхи д̇ууриязхи 16 барижаараяамаано 17 на хздтаабаасаад̣̇ам̣ орохаами. со абарзна самаязна гаамаанам̣язва самуд̣̇аяан̃жа ад̇т̇ан̇г̇аман̃жа ассаад̣̇ан̃жа аад̣̇ийнаван̃жа ниссаран̣ан̃жа яат̇аабхууд̇ам̣ вид̣̇ид̇ваа гаамад̇ан̣хам̣ бахааяа гаамабарил̣аахам̣ бадивинод̣̇зд̇ваа виг̇ад̇абибаасо аж̇жхад̇д̇ам̣ вуубасанд̇ажид̇д̇о вихараами. со ан̃н̃з сад̇д̇з бассаами гаамзсу авийд̇арааг̇з гаамад̇ан̣хаахи каж̇ж̇амаанз гаамабарил̣аахзна барид̣аяхамаанз гаамз бадисзванд̇з. со д̇зсам̣ на бихзми, на д̇ад̇т̇а абхирамаами . д̇ам̣ гисса хзд̇у? яаахаяам̣, мааг̇ан̣д̣ияа, рад̇и, ан̃н̃ад̇рзва гаамзхи ан̃н̃ад̇ра агусалзхи д̇хаммзхи – аби д̣̇иб̣б̣ам̣ сукам̣ самад̇хиг̇аяха д̇идтад̇и – д̇ааяа рад̇ияаа рамамаано хийнасса на бихзми, на д̇ад̇т̇а абхирамаами.
211. ‘‘Ahaṃ kho pana, māgaṇḍiya, pubbe agāriyabhūto samāno pañcahi kāmaguṇehi samappito samaṅgībhūto paricāresiṃ cakkhuviññeyyehi rūpehi iṭṭhehi kantehi manāpehi piyarūpehi kāmūpasaṃhitehi rajanīyehi, sotaviññeyyehi saddehi…pe… ghānaviññeyyehi gandhehi… jivhāviññeyyehi rasehi… kāyaviññeyyehi phoṭṭhabbehi iṭṭhehi kantehi manāpehi piyarūpehi kāmūpasaṃhitehi rajanīyehi. Tassa mayhaṃ, māgaṇḍiya, tayo pāsādā ahesuṃ – eko vassiko, eko hemantiko, eko gimhiko. So kho ahaṃ, māgaṇḍiya, vassike pāsāde vassike cattāro 18 māse nippurisehi tūriyehi 19 paricārayamāno 20 na heṭṭhāpāsādaṃ orohāmi. So aparena samayena kāmānaṃyeva samudayañca atthaṅgamañca assādañca ādīnavañca nissaraṇañca yathābhūtaṃ viditvā kāmataṇhaṃ pahāya kāmapariḷāhaṃ paṭivinodetvā vigatapipāso ajjhattaṃ vūpasantacitto viharāmi. So aññe satte passāmi kāmesu avītarāge kāmataṇhāhi khajjamāne kāmapariḷāhena pariḍayhamāne kāme paṭisevante. So tesaṃ na pihemi, na tattha abhiramāmi . Taṃ kissa hetu? Yāhayaṃ, māgaṇḍiya, rati, aññatreva kāmehi aññatra akusalehi dhammehi – api dibbaṃ sukhaṃ samadhigayha tiṭṭhati – tāya ratiyā ramamāno hīnassa na pihemi, na tattha abhiramāmi.
212. ‘‘сзяяат̇ааби, мааг̇ан̣д̣ияа, г̇ахабад̇и ваа г̇ахабад̇ибуд̇д̇о ваа ад̣дхо махад̣̇д̇хано махаабхог̇о бан̃жахи гаамаг̇ун̣зхи самаббид̇о саман̇г̇ийбхууд̇о барижаарзяяа жагкувин̃н̃зяязхи руубзхи…бз… подтаб̣б̣зхи идтзхи ганд̇зхи манаабзхи бияаруубзхи гаамуубасам̣хид̇зхи раж̇анийязхи. со гааязна сужарид̇ам̣ жарид̇ваа ваажааяа сужарид̇ам̣ жарид̇ваа манасаа сужарид̇ам̣ жарид̇ваа гааяасса бхзд̣̇аа барам̣ маран̣аа суг̇ад̇им̣ саг̇г̇ам̣ логам̣ убабаж̇ж̇зяяа д̣̇зваанам̣ д̇аавад̇им̣саанам̣ сахаб̣яад̇ам̣. со д̇ад̇т̇а нанд̣̇анз ванз ажчараасан̇гхабаривуд̇о д̣̇иб̣б̣зхи бан̃жахи гаамаг̇ун̣зхи самаббид̇о саман̇г̇ийбхууд̇о барижаарзяяа. со бассзяяа г̇ахабад̇им̣ ваа г̇ахабад̇ибуд̇д̇ам̣ ваа бан̃жахи гаамаг̇ун̣зхи самаббид̇ам̣ саман̇г̇ийбхууд̇ам̣ барижаараяамаанам̣.
212. ‘‘Seyyathāpi, māgaṇḍiya, gahapati vā gahapatiputto vā aḍḍho mahaddhano mahābhogo pañcahi kāmaguṇehi samappito samaṅgībhūto paricāreyya cakkhuviññeyyehi rūpehi…pe… phoṭṭhabbehi iṭṭhehi kantehi manāpehi piyarūpehi kāmūpasaṃhitehi rajanīyehi. So kāyena sucaritaṃ caritvā vācāya sucaritaṃ caritvā manasā sucaritaṃ caritvā kāyassa bhedā paraṃ maraṇā sugatiṃ saggaṃ lokaṃ upapajjeyya devānaṃ tāvatiṃsānaṃ sahabyataṃ. So tattha nandane vane accharāsaṅghaparivuto dibbehi pañcahi kāmaguṇehi samappito samaṅgībhūto paricāreyya. So passeyya gahapatiṃ vā gahapatiputtaṃ vā pañcahi kāmaguṇehi samappitaṃ samaṅgībhūtaṃ paricārayamānaṃ.
‘‘д̇ам̣ гим̣ ман̃н̃аси, мааг̇ан̣д̣ияа, аби ну со д̣̇звабуд̇д̇о нанд̣̇анз ванз ажчараасан̇гхабаривуд̇о д̣̇иб̣б̣зхи бан̃жахи гаамаг̇ун̣зхи самаббид̇о саман̇г̇ийбхууд̇о барижаараяамаано амусса г̇ахабад̇исса ваа г̇ахабад̇ибуд̇д̇асса ваа бихзяяа, маанусагаанам̣ ваа бан̃жаннам̣ гаамаг̇ун̣аанам̣ маанусагзхи ваа гаамзхи ааваддзяяаа’’д̇и? ‘‘но хид̣̇ам̣, бхо г̇од̇ама’’. д̇ам̣ гисса хзд̇у? маанусагзхи, бхо г̇од̇ама, гаамзхи д̣̇иб̣б̣агаамаа абхигганд̇ад̇араа жа бан̣ийд̇ад̇араа жаа’’д̇и. ‘‘звамзва ко ахам̣, мааг̇ан̣д̣ияа, буб̣б̣з аг̇аарияабхууд̇о самаано бан̃жахи гаамаг̇ун̣зхи самаббид̇о саман̇г̇ийбхууд̇о барижаарзсим̣ жагкувин̃н̃зяязхи руубзхи идтзхи ганд̇зхи манаабзхи бияаруубзхи гаамуубасам̣хид̇зхи раж̇анийязхи, сод̇авин̃н̃зяязхи сад̣̇д̣̇зхи…бз… гхаанавин̃н̃зяязхи г̇анд̇хзхи… ж̇ивхаавин̃н̃зяязхи расзхи… гааяавин̃н̃зяязхи подтаб̣б̣зхи идтзхи ганд̇зхи манаабзхи бияаруубзхи гаамуубасам̣хид̇зхи раж̇анийязхи. со абарзна самаязна гаамаанам̣язва самуд̣̇аяан̃жа ад̇т̇ан̇г̇аман̃жа ассаад̣̇ан̃жа аад̣̇ийнаван̃жа ниссаран̣ан̃жа яат̇аабхууд̇ам̣ вид̣̇ид̇ваа гаамад̇ан̣хам̣ бахааяа гаамабарил̣аахам̣ бадивинод̣̇зд̇ваа виг̇ад̇абибаасо аж̇жхад̇д̇ам̣ вуубасанд̇ажид̇д̇о вихараами. со ан̃н̃з сад̇д̇з бассаами гаамзсу авийд̇арааг̇з гаамад̇ан̣хаахи каж̇ж̇амаанз гаамабарил̣аахзна барид̣аяхамаанз гаамз бадисзванд̇з, со д̇зсам̣ на бихзми, на д̇ад̇т̇а абхирамаами. д̇ам̣ гисса хзд̇у? яаахаяам̣, мааг̇ан̣д̣ияа, рад̇и ан̃н̃ад̇рзва гаамзхи ан̃н̃ад̇ра агусалзхи д̇хаммзхи – аби д̣̇иб̣б̣ам̣ сукам̣ самад̇хиг̇аяха д̇идтад̇и – д̇ааяа рад̇ияаа рамамаано хийнасса на бихзми, на д̇ад̇т̇а абхирамаами.
‘‘Taṃ kiṃ maññasi, māgaṇḍiya, api nu so devaputto nandane vane accharāsaṅghaparivuto dibbehi pañcahi kāmaguṇehi samappito samaṅgībhūto paricārayamāno amussa gahapatissa vā gahapatiputtassa vā piheyya, mānusakānaṃ vā pañcannaṃ kāmaguṇānaṃ mānusakehi vā kāmehi āvaṭṭeyyā’’ti? ‘‘No hidaṃ, bho gotama’’. Taṃ kissa hetu? Mānusakehi, bho gotama, kāmehi dibbakāmā abhikkantatarā ca paṇītatarā cā’’ti. ‘‘Evameva kho ahaṃ, māgaṇḍiya, pubbe agāriyabhūto samāno pañcahi kāmaguṇehi samappito samaṅgībhūto paricāresiṃ cakkhuviññeyyehi rūpehi iṭṭhehi kantehi manāpehi piyarūpehi kāmūpasaṃhitehi rajanīyehi, sotaviññeyyehi saddehi…pe… ghānaviññeyyehi gandhehi… jivhāviññeyyehi rasehi… kāyaviññeyyehi phoṭṭhabbehi iṭṭhehi kantehi manāpehi piyarūpehi kāmūpasaṃhitehi rajanīyehi. So aparena samayena kāmānaṃyeva samudayañca atthaṅgamañca assādañca ādīnavañca nissaraṇañca yathābhūtaṃ viditvā kāmataṇhaṃ pahāya kāmapariḷāhaṃ paṭivinodetvā vigatapipāso ajjhattaṃ vūpasantacitto viharāmi. So aññe satte passāmi kāmesu avītarāge kāmataṇhāhi khajjamāne kāmapariḷāhena pariḍayhamāne kāme paṭisevante, so tesaṃ na pihemi, na tattha abhiramāmi. Taṃ kissa hetu? Yāhayaṃ, māgaṇḍiya, rati aññatreva kāmehi aññatra akusalehi dhammehi – api dibbaṃ sukhaṃ samadhigayha tiṭṭhati – tāya ratiyā ramamāno hīnassa na pihemi, na tattha abhiramāmi.
213. ‘‘сзяяат̇ааби , мааг̇ан̣д̣ияа, гудтий бурисо аруг̇ад̇д̇о баггаг̇ад̇д̇о гимийхи каж̇ж̇амаано накзхи ван̣амукаани виббад̇ажчамаано ан̇г̇аарагаасуяаа гааяам̣ барид̇аабзяяа. д̇асса мид̇д̇аамажжаа н̃аад̇исаалохид̇аа бхисаггам̣ саллагад̇д̇ам̣ убадтаабзяяум̣. д̇асса со бхисагго саллагад̇д̇о бхзсаж̇ж̇ам̣ гарзяяа. со д̇ам̣ бхзсаж̇ж̇ам̣ ааг̇амма гудтзхи баримужжзяяа, арог̇о асса сукий сзрий саяам̣васий язна гаамам̣ г̇амо. со ан̃н̃ам̣ гудтим̣ бурисам̣ бассзяяа аруг̇ад̇д̇ам̣ баггаг̇ад̇д̇ам̣ гимийхи каж̇ж̇амаанам̣ накзхи ван̣амукаани виббад̇ажчамаанам̣ ан̇г̇аарагаасуяаа гааяам̣ барид̇аабзнд̇ам̣.
213. ‘‘Seyyathāpi , māgaṇḍiya, kuṭṭhī puriso arugatto pakkagatto kimīhi khajjamāno nakhehi vaṇamukhāni vippatacchamāno aṅgārakāsuyā kāyaṃ paritāpeyya. Tassa mittāmaccā ñātisālohitā bhisakkaṃ sallakattaṃ upaṭṭhāpeyyuṃ. Tassa so bhisakko sallakatto bhesajjaṃ kareyya. So taṃ bhesajjaṃ āgamma kuṭṭhehi parimucceyya, arogo assa sukhī serī sayaṃvasī yena kāmaṃ gamo. So aññaṃ kuṭṭhiṃ purisaṃ passeyya arugattaṃ pakkagattaṃ kimīhi khajjamānaṃ nakhehi vaṇamukhāni vippatacchamānaṃ aṅgārakāsuyā kāyaṃ paritāpentaṃ.
‘‘д̇ам̣ гим̣ ман̃н̃аси, мааг̇ан̣д̣ияа, аби ну со бурисо амусса гудтисса бурисасса бихзяяа ан̇г̇аарагаасуяаа ваа бхзсаж̇ж̇ам̣ бадисзванааяа ваа’’д̇и? ‘‘но хид̣̇ам̣, бхо г̇од̇ама. д̇ам̣ гисса хзд̇у? рог̇з хи, бхо г̇од̇ама, сад̇и бхзсаж̇ж̇зна гаран̣ийяам̣ ход̇и, рог̇з асад̇и на бхзсаж̇ж̇зна гаран̣ийяам̣ ход̇ий’’д̇и. ‘‘звамзва ко ахам̣, мааг̇ан̣д̣ияа, буб̣б̣з аг̇аарияабхууд̇о самаано бан̃жахи гаамаг̇ун̣зхи самаббид̇о саман̇г̇ийбхууд̇о барижаарзсим̣, жагкувин̃н̃зяязхи руубзхи идтзхи ганд̇зхи манаабзхи бияаруубзхи гаамуубасам̣хид̇зхи раж̇анийязхи, сод̇авин̃н̃зяязхи сад̣̇д̣̇зхи…бз… гхаанавин̃н̃зяязхи г̇анд̇хзхи… ж̇ивхаавин̃н̃зяязхи расзхи… гааяавин̃н̃зяязхи подтаб̣б̣зхи идтзхи ганд̇зхи манаабзхи бияаруубзхи гаамуубасам̣хид̇зхи раж̇анийязхи. со абарзна самаязна гаамаанам̣язва самуд̣̇аяан̃жа ад̇т̇ан̇г̇аман̃жа ассаад̣̇ан̃жа аад̣̇ийнаван̃жа ниссаран̣ан̃жа яат̇аабхууд̇ам̣ вид̣̇ид̇ваа гаамад̇ан̣хам̣ бахааяа гаамабарил̣аахам̣ бадивинод̣̇зд̇ваа виг̇ад̇абибаасо аж̇жхад̇д̇ам̣ вуубасанд̇ажид̇д̇о вихараами. со ан̃н̃з сад̇д̇з бассаами гаамзсу авийд̇арааг̇з гаамад̇ан̣хаахи каж̇ж̇амаанз гаамабарил̣аахзна барид̣аяхамаанз гаамз бадисзванд̇з. со д̇зсам̣ на бихзми, на д̇ад̇т̇а абхирамаами. д̇ам̣ гисса хзд̇у? яаахаяам̣, мааг̇ан̣д̣ияа, рад̇и, ан̃н̃ад̇рзва гаамзхи ан̃н̃ад̇ра агусалзхи д̇хаммзхи – аби д̣̇иб̣б̣ам̣ сукам̣ самад̇хиг̇аяха д̇идтад̇и – д̇ааяа рад̇ияаа рамамаано хийнасса на бихзми, на д̇ад̇т̇а абхирамаами.
‘‘Taṃ kiṃ maññasi, māgaṇḍiya, api nu so puriso amussa kuṭṭhissa purisassa piheyya aṅgārakāsuyā vā bhesajjaṃ paṭisevanāya vā’’ti? ‘‘No hidaṃ, bho gotama. Taṃ kissa hetu? Roge hi, bho gotama, sati bhesajjena karaṇīyaṃ hoti, roge asati na bhesajjena karaṇīyaṃ hotī’’ti. ‘‘Evameva kho ahaṃ, māgaṇḍiya, pubbe agāriyabhūto samāno pañcahi kāmaguṇehi samappito samaṅgībhūto paricāresiṃ, cakkhuviññeyyehi rūpehi iṭṭhehi kantehi manāpehi piyarūpehi kāmūpasaṃhitehi rajanīyehi, sotaviññeyyehi saddehi…pe… ghānaviññeyyehi gandhehi… jivhāviññeyyehi rasehi… kāyaviññeyyehi phoṭṭhabbehi iṭṭhehi kantehi manāpehi piyarūpehi kāmūpasaṃhitehi rajanīyehi. So aparena samayena kāmānaṃyeva samudayañca atthaṅgamañca assādañca ādīnavañca nissaraṇañca yathābhūtaṃ viditvā kāmataṇhaṃ pahāya kāmapariḷāhaṃ paṭivinodetvā vigatapipāso ajjhattaṃ vūpasantacitto viharāmi. So aññe satte passāmi kāmesu avītarāge kāmataṇhāhi khajjamāne kāmapariḷāhena pariḍayhamāne kāme paṭisevante. So tesaṃ na pihemi, na tattha abhiramāmi. Taṃ kissa hetu? Yāhayaṃ, māgaṇḍiya, rati, aññatreva kāmehi aññatra akusalehi dhammehi – api dibbaṃ sukhaṃ samadhigayha tiṭṭhati – tāya ratiyā ramamāno hīnassa na pihemi, na tattha abhiramāmi.
214. ‘‘сзяяат̇ааби , мааг̇ан̣д̣ияа, гудтий бурисо аруг̇ад̇д̇о баггаг̇ад̇д̇о гимийхи каж̇ж̇амаано накзхи ван̣амукаани виббад̇ажчамаано ан̇г̇аарагаасуяаа гааяам̣ барид̇аабзяяа. д̇асса мид̇д̇аамажжаа н̃аад̇исаалохид̇аа бхисаггам̣ саллагад̇д̇ам̣ убадтаабзяяум̣. д̇асса со бхисагго саллагад̇д̇о бхзсаж̇ж̇ам̣ гарзяяа. со д̇ам̣ бхзсаж̇ж̇ам̣ ааг̇амма гудтзхи баримужжзяяа, арог̇о асса сукий сзрий саяам̣васий язна гаамам̣ г̇амо. д̇амзнам̣ д̣̇вз б̣алаванд̇о бурисаа наанааб̣аахаасу г̇ахзд̇ваа ан̇г̇аарагаасум̣ убагад̣дхзяяум̣.
214. ‘‘Seyyathāpi , māgaṇḍiya, kuṭṭhī puriso arugatto pakkagatto kimīhi khajjamāno nakhehi vaṇamukhāni vippatacchamāno aṅgārakāsuyā kāyaṃ paritāpeyya. Tassa mittāmaccā ñātisālohitā bhisakkaṃ sallakattaṃ upaṭṭhāpeyyuṃ. Tassa so bhisakko sallakatto bhesajjaṃ kareyya. So taṃ bhesajjaṃ āgamma kuṭṭhehi parimucceyya, arogo assa sukhī serī sayaṃvasī yena kāmaṃ gamo. Tamenaṃ dve balavanto purisā nānābāhāsu gahetvā aṅgārakāsuṃ upakaḍḍheyyuṃ.
‘‘д̇ам̣ гим̣ ман̃н̃аси, мааг̇ан̣д̣ияа, аби ну со бурисо ид̇и жид̇ижзва гааяам̣ саннаамзяяаа’’д̇и? ‘‘звам̣, бхо г̇од̇ама’’. ‘‘д̇ам̣ гисса хзд̇у’’? ‘‘асу хи, бхо г̇од̇ама, аг̇г̇и д̣̇угкасампассо жзва махаабхид̇аабо жа махаабарил̣аахо жаа’’д̇и. ‘‘д̇ам̣ гим̣ ман̃н̃аси, мааг̇ан̣д̣ияа, ид̣̇аанзва ну ко со аг̇г̇и д̣̇угкасампассо жзва махаабхид̇аабо жа махаабарил̣аахо жа уд̣̇ааху буб̣б̣зби со аг̇г̇и д̣̇угкасампассо жзва махаабхид̇аабо жа махаабарил̣аахо жаа’’д̇и ? ‘‘ид̣̇аани жзва, бхо г̇од̇ама, со аг̇г̇и д̣̇угкасампассо жзва махаабхид̇аабо жа махаабарил̣аахо жа, буб̣б̣зби со аг̇г̇и д̣̇угкасампассо жзва махаабхид̇аабо жа махаабарил̣аахо жа. асу жа 21, бхо г̇од̇ама, гудтий бурисо аруг̇ад̇д̇о баггаг̇ад̇д̇о гимийхи каж̇ж̇амаано накзхи ван̣амукаани виббад̇ажчамаано убахад̇инд̣̇рияо д̣̇угкасампассзязва аг̇г̇исмим̣ сукамид̇и вибарийд̇асан̃н̃ам̣ бажжалад̇т̇аа’’д̇и. ‘‘звамзва ко, мааг̇ан̣д̣ияа, ад̇ийд̇амби ад̣̇д̇хаанам̣ гаамаа д̣̇угкасампассаа жзва махаабхид̇аабаа жа махаабарил̣аахаа жа, анааг̇ад̇амби ад̣̇д̇хаанам̣ гаамаа д̣̇угкасампассаа жзва махаабхид̇аабаа жа махаабарил̣аахаа жа, зд̇арахиби бажжуббаннам̣ ад̣̇д̇хаанам̣ гаамаа д̣̇угкасампассаа жзва махаабхид̇аабаа жа махаабарил̣аахаа жа. имз жа, мааг̇ан̣д̣ияа, сад̇д̇аа гаамзсу авийд̇арааг̇аа гаамад̇ан̣хаахи каж̇ж̇амаанаа гаамабарил̣аахзна барид̣аяхамаанаа убахад̇инд̣̇рияаа д̣̇угкасампассзсуязва гаамзсу сукамид̇и вибарийд̇асан̃н̃ам̣ бажжалад̇т̇ум̣.
‘‘Taṃ kiṃ maññasi, māgaṇḍiya, api nu so puriso iti citiceva kāyaṃ sannāmeyyā’’ti? ‘‘Evaṃ, bho gotama’’. ‘‘Taṃ kissa hetu’’? ‘‘Asu hi, bho gotama, aggi dukkhasamphasso ceva mahābhitāpo ca mahāpariḷāho cā’’ti. ‘‘Taṃ kiṃ maññasi, māgaṇḍiya, idāneva nu kho so aggi dukkhasamphasso ceva mahābhitāpo ca mahāpariḷāho ca udāhu pubbepi so aggi dukkhasamphasso ceva mahābhitāpo ca mahāpariḷāho cā’’ti ? ‘‘Idāni ceva, bho gotama, so aggi dukkhasamphasso ceva mahābhitāpo ca mahāpariḷāho ca, pubbepi so aggi dukkhasamphasso ceva mahābhitāpo ca mahāpariḷāho ca. Asu ca 22, bho gotama, kuṭṭhī puriso arugatto pakkagatto kimīhi khajjamāno nakhehi vaṇamukhāni vippatacchamāno upahatindriyo dukkhasamphasseyeva aggismiṃ sukhamiti viparītasaññaṃ paccalatthā’’ti. ‘‘Evameva kho, māgaṇḍiya, atītampi addhānaṃ kāmā dukkhasamphassā ceva mahābhitāpā ca mahāpariḷāhā ca, anāgatampi addhānaṃ kāmā dukkhasamphassā ceva mahābhitāpā ca mahāpariḷāhā ca, etarahipi paccuppannaṃ addhānaṃ kāmā dukkhasamphassā ceva mahābhitāpā ca mahāpariḷāhā ca. Ime ca, māgaṇḍiya, sattā kāmesu avītarāgā kāmataṇhāhi khajjamānā kāmapariḷāhena pariḍayhamānā upahatindriyā dukkhasamphassesuyeva kāmesu sukhamiti viparītasaññaṃ paccalatthuṃ.
215. ‘‘сзяяат̇ааби, мааг̇ан̣д̣ияа, гудтий бурисо аруг̇ад̇д̇о баггаг̇ад̇д̇о гимийхи каж̇ж̇амаано накзхи ван̣амукаани виббад̇ажчамаано ан̇г̇аарагаасуяаа гааяам̣ барид̇аабзд̇и. яат̇аа яат̇аа ко, мааг̇ан̣д̣ияа, асу гудтий бурисо аруг̇ад̇д̇о баггаг̇ад̇д̇о гимийхи каж̇ж̇амаано накзхи ван̣амукаани виббад̇ажчамаано ан̇г̇аарагаасуяаа гааяам̣ барид̇аабзд̇и д̇ат̇аа д̇ат̇аа’сса 23 д̇аани ван̣амукаани асужид̇араани жзва хонд̇и д̣̇уг̇г̇анд̇хад̇араани жа бууд̇игад̇араани жа , ход̇и жзва гаажи саад̇амад̇д̇аа ассаад̣̇амад̇д̇аа – яад̣̇ид̣̇ам̣ ван̣амукаанам̣ ган̣д̣ууванахзд̇у; звамзва ко, мааг̇ан̣д̣ияа, сад̇д̇аа гаамзсу авийд̇арааг̇аа гаамад̇ан̣хаахи каж̇ж̇амаанаа гаамабарил̣аахзна жа барид̣аяхамаанаа гаамз бадисзванд̇и. яат̇аа яат̇аа ко, мааг̇ан̣д̣ияа, сад̇д̇аа гаамзсу авийд̇арааг̇аа гаамад̇ан̣хаахи каж̇ж̇амаанаа гаамабарил̣аахзна жа барид̣аяхамаанаа гаамз бадисзванд̇и д̇ат̇аа д̇ат̇аа д̇зсам̣ д̇зсам̣ сад̇д̇аанам̣ гаамад̇ан̣хаа жзва бавад̣дхад̇и, гаамабарил̣аахзна жа барид̣аяханд̇и, ход̇и жзва саад̇амад̇д̇аа ассаад̣̇амад̇д̇аа – яад̣̇ид̣̇ам̣ бан̃жагаамаг̇ун̣з бадижжа.
215. ‘‘Seyyathāpi, māgaṇḍiya, kuṭṭhī puriso arugatto pakkagatto kimīhi khajjamāno nakhehi vaṇamukhāni vippatacchamāno aṅgārakāsuyā kāyaṃ paritāpeti. Yathā yathā kho, māgaṇḍiya, asu kuṭṭhī puriso arugatto pakkagatto kimīhi khajjamāno nakhehi vaṇamukhāni vippatacchamāno aṅgārakāsuyā kāyaṃ paritāpeti tathā tathā’ssa 24 tāni vaṇamukhāni asucitarāni ceva honti duggandhatarāni ca pūtikatarāni ca , hoti ceva kāci sātamattā assādamattā – yadidaṃ vaṇamukhānaṃ kaṇḍūvanahetu; evameva kho, māgaṇḍiya, sattā kāmesu avītarāgā kāmataṇhāhi khajjamānā kāmapariḷāhena ca pariḍayhamānā kāme paṭisevanti. Yathā yathā kho, māgaṇḍiya, sattā kāmesu avītarāgā kāmataṇhāhi khajjamānā kāmapariḷāhena ca pariḍayhamānā kāme paṭisevanti tathā tathā tesaṃ tesaṃ sattānaṃ kāmataṇhā ceva pavaḍḍhati, kāmapariḷāhena ca pariḍayhanti, hoti ceva sātamattā assādamattā – yadidaṃ pañcakāmaguṇe paṭicca.
‘‘д̇ам̣ гим̣ ман̃н̃аси, мааг̇ан̣д̣ияа, аби ну д̇з д̣̇идто ваа суд̇о ваа рааж̇аа ваа рааж̇амахаамад̇д̇о ваа бан̃жахи гаамаг̇ун̣зхи самаббид̇о саман̇г̇ийбхууд̇о барижаараяамаано гаамад̇ан̣хам̣ аббахааяа гаамабарил̣аахам̣ аббадивинод̣̇зд̇ваа виг̇ад̇абибаасо аж̇жхад̇д̇ам̣ вуубасанд̇ажид̇д̇о вихааси ваа вихарад̇и ваа вихариссад̇и ваа’’д̇и ? ‘‘но хид̣̇ам̣, бхо г̇од̇ама’’. ‘‘саад̇ху, мааг̇ан̣д̣ияа! маяааби ко зд̇ам̣, мааг̇ан̣д̣ияа, нзва д̣̇идтам̣ на суд̇ам̣ рааж̇аа ваа рааж̇амахаамад̇д̇о ваа бан̃жахи гаамаг̇ун̣зхи самаббид̇о саман̇г̇ийбхууд̇о барижаараяамаано гаамад̇ан̣хам̣ аббахааяа гаамабарил̣аахам̣ аббадивинод̣̇зд̇ваа виг̇ад̇абибаасо аж̇жхад̇д̇ам̣ вуубасанд̇ажид̇д̇о вихааси ваа вихарад̇и ваа вихариссад̇и ваа. ат̇а ко, мааг̇ан̣д̣ияа, яз хи гзжи саман̣аа ваа б̣раахман̣аа ваа виг̇ад̇абибаасаа аж̇жхад̇д̇ам̣ вуубасанд̇ажид̇д̇аа вихаасум̣ ваа вихаранд̇и ваа вихариссанд̇и ваа саб̣б̣з д̇з гаамаанам̣язва самуд̣̇аяан̃жа ад̇т̇ан̇г̇аман̃жа ассаад̣̇ан̃жа аад̣̇ийнаван̃жа ниссаран̣ан̃жа яат̇аабхууд̇ам̣ вид̣̇ид̇ваа гаамад̇ан̣хам̣ бахааяа гаамабарил̣аахам̣ бадивинод̣̇зд̇ваа виг̇ад̇абибаасаа аж̇жхад̇д̇ам̣ вуубасанд̇ажид̇д̇аа вихаасум̣ ваа вихаранд̇и ваа вихариссанд̇и ваа’’д̇и. ат̇а ко бхаг̇аваа д̇ааяам̣ взлааяам̣ имам̣ уд̣̇аанам̣ уд̣̇аанзси –
‘‘Taṃ kiṃ maññasi, māgaṇḍiya, api nu te diṭṭho vā suto vā rājā vā rājamahāmatto vā pañcahi kāmaguṇehi samappito samaṅgībhūto paricārayamāno kāmataṇhaṃ appahāya kāmapariḷāhaṃ appaṭivinodetvā vigatapipāso ajjhattaṃ vūpasantacitto vihāsi vā viharati vā viharissati vā’’ti ? ‘‘No hidaṃ, bho gotama’’. ‘‘Sādhu, māgaṇḍiya! Mayāpi kho etaṃ, māgaṇḍiya, neva diṭṭhaṃ na sutaṃ rājā vā rājamahāmatto vā pañcahi kāmaguṇehi samappito samaṅgībhūto paricārayamāno kāmataṇhaṃ appahāya kāmapariḷāhaṃ appaṭivinodetvā vigatapipāso ajjhattaṃ vūpasantacitto vihāsi vā viharati vā viharissati vā. Atha kho, māgaṇḍiya, ye hi keci samaṇā vā brāhmaṇā vā vigatapipāsā ajjhattaṃ vūpasantacittā vihāsuṃ vā viharanti vā viharissanti vā sabbe te kāmānaṃyeva samudayañca atthaṅgamañca assādañca ādīnavañca nissaraṇañca yathābhūtaṃ viditvā kāmataṇhaṃ pahāya kāmapariḷāhaṃ paṭivinodetvā vigatapipāsā ajjhattaṃ vūpasantacittā vihāsuṃ vā viharanti vā viharissanti vā’’ti. Atha kho bhagavā tāyaṃ velāyaṃ imaṃ udānaṃ udānesi –
‘‘аарог̇яабарамаа лаабхаа, ниб̣б̣аанам̣ барамам̣ сукам̣;
‘‘Ārogyaparamā lābhā, nibbānaṃ paramaṃ sukhaṃ;
адтан̇г̇иго жа маг̇г̇аанам̣, кзмам̣ амад̇аг̇аамина’’нд̇и.
Aṭṭhaṅgiko ca maggānaṃ, khemaṃ amatagāmina’’nti.
216. звам̣ вуд̇д̇з, мааг̇ан̣д̣ияо бариб̣б̣ааж̇аго бхаг̇аванд̇ам̣ зд̇ад̣̇авожа – ‘‘ажчарияам̣, бхо г̇од̇ама, аб̣бхуд̇ам̣, бхо г̇од̇ама! яаава субхаасид̇ам̣ жид̣̇ам̣ бход̇аа г̇од̇амзна – ‘аарог̇яабарамаа лаабхаа, ниб̣б̣аанам̣ барамам̣ сука’нд̇и. маяааби ко зд̇ам̣, бхо г̇од̇ама, суд̇ам̣ буб̣б̣агаанам̣ бариб̣б̣ааж̇агаанам̣ аажарияабаажарияаанам̣ бхаасамаанаанам̣ – ‘аарог̇яабарамаа лаабхаа, ниб̣б̣аанам̣ барамам̣ сука’нд̇и; д̇аяид̣̇ам̣, бхо г̇од̇ама, самзд̇ий’’д̇и. ‘‘яам̣ бана д̇з зд̇ам̣, мааг̇ан̣д̣ияа, суд̇ам̣ буб̣б̣агаанам̣ бариб̣б̣ааж̇агаанам̣ аажарияабаажарияаанам̣ бхаасамаанаанам̣ – ‘аарог̇яабарамаа лаабхаа, ниб̣б̣аанам̣ барамам̣ сука’нд̇и, гад̇амам̣ д̇ам̣ аарог̇яам̣, гад̇амам̣ д̇ам̣ ниб̣б̣аана’’нд̇и? звам̣ вуд̇д̇з, мааг̇ан̣д̣ияо бариб̣б̣ааж̇аго сагаанзва суд̣̇ам̣ г̇ад̇д̇аани баан̣инаа аномаж̇ж̇ад̇и – ‘‘ид̣̇анд̇ам̣, бхо г̇од̇ама, аарог̇яам̣, ид̣̇анд̇ам̣ ниб̣б̣аанам̣. ахан̃хи, бхо г̇од̇ама, зд̇арахи арог̇о сукий, на мам̣ гин̃жи ааб̣аад̇хад̇ий’’д̇и.
216. Evaṃ vutte, māgaṇḍiyo paribbājako bhagavantaṃ etadavoca – ‘‘acchariyaṃ, bho gotama, abbhutaṃ, bho gotama! Yāva subhāsitaṃ cidaṃ bhotā gotamena – ‘ārogyaparamā lābhā, nibbānaṃ paramaṃ sukha’nti. Mayāpi kho etaṃ, bho gotama, sutaṃ pubbakānaṃ paribbājakānaṃ ācariyapācariyānaṃ bhāsamānānaṃ – ‘ārogyaparamā lābhā, nibbānaṃ paramaṃ sukha’nti; tayidaṃ, bho gotama, sametī’’ti. ‘‘Yaṃ pana te etaṃ, māgaṇḍiya, sutaṃ pubbakānaṃ paribbājakānaṃ ācariyapācariyānaṃ bhāsamānānaṃ – ‘ārogyaparamā lābhā, nibbānaṃ paramaṃ sukha’nti, katamaṃ taṃ ārogyaṃ, katamaṃ taṃ nibbāna’’nti? Evaṃ vutte, māgaṇḍiyo paribbājako sakāneva sudaṃ gattāni pāṇinā anomajjati – ‘‘idantaṃ, bho gotama, ārogyaṃ, idantaṃ nibbānaṃ. Ahañhi, bho gotama, etarahi arogo sukhī, na maṃ kiñci ābādhatī’’ti.
217. ‘‘сзяяат̇ааби, мааг̇ан̣д̣ияа, ж̇ажжанд̇хо бурисо; со на бассзяяа ган̣хасуггаани руубаани, на бассзяяа нийлагаани руубаани, на бассзяяа бийд̇агаани руубаани, на бассзяяа лохид̇агаани руубаани, на бассзяяа ман̃ж̇идтагаани 25 руубаани, на бассзяяа самависамам̣, на бассзяяа д̇аарагаруубаани, на бассзяяа жанд̣̇имасуурияз. со сун̣зяяа жагкумад̇о бхаасамаанасса – ‘чзгам̣ вад̇а, бхо , од̣̇аад̇ам̣ вад̇т̇ам̣ абхируубам̣ ниммалам̣ сужий’д̇и! со од̣̇аад̇абариязсанам̣ жарзяяа. д̇амзнам̣ ан̃н̃ад̇аро бурисо д̇зламалигад̇зна саахул̣ижийрзна 26 ван̃жзяяа – ‘ид̣̇ам̣ д̇з, амбхо буриса, од̣̇аад̇ам̣ вад̇т̇ам̣ абхируубам̣ ниммалам̣ сужий’д̇и. со д̇ам̣ бадиг̇г̇ан̣хзяяа, бадиг̇г̇ахзд̇ваа баарубзяяа, баарубзд̇ваа ад̇д̇амано ад̇д̇аманаваажам̣ нижчаарзяяа – ‘чзгам̣ вад̇а, бхо, од̣̇аад̇ам̣ вад̇т̇ам̣ абхируубам̣ ниммалам̣ сужий’д̇и!
217. ‘‘Seyyathāpi, māgaṇḍiya, jaccandho puriso; so na passeyya kaṇhasukkāni rūpāni, na passeyya nīlakāni rūpāni, na passeyya pītakāni rūpāni, na passeyya lohitakāni rūpāni, na passeyya mañjiṭṭhakāni 27 rūpāni, na passeyya samavisamaṃ, na passeyya tārakarūpāni, na passeyya candimasūriye. So suṇeyya cakkhumato bhāsamānassa – ‘chekaṃ vata, bho , odātaṃ vatthaṃ abhirūpaṃ nimmalaṃ sucī’ti! So odātapariyesanaṃ careyya. Tamenaṃ aññataro puriso telamalikatena sāhuḷicīrena 28 vañceyya – ‘idaṃ te, ambho purisa, odātaṃ vatthaṃ abhirūpaṃ nimmalaṃ sucī’ti. So taṃ paṭiggaṇheyya, paṭiggahetvā pārupeyya, pārupetvā attamano attamanavācaṃ nicchāreyya – ‘chekaṃ vata, bho, odātaṃ vatthaṃ abhirūpaṃ nimmalaṃ sucī’ti!
‘‘д̇ам̣ гим̣ ман̃н̃аси, мааг̇ан̣д̣ияа, аби ну со ж̇ажжанд̇хо бурисо ж̇аананд̇о бассанд̇о амум̣ д̇зламалигад̇ам̣ саахул̣ижийрам̣ бадиг̇г̇ан̣хзяяа, бадиг̇г̇ахзд̇ваа баарубзяяа, баарубзд̇ваа ад̇д̇амано ад̇д̇аманаваажам̣ нижчаарзяяа – ‘чзгам̣ вад̇а, бхо, од̣̇аад̇ам̣ вад̇т̇ам̣ абхируубам̣ ниммалам̣ сужий’д̇и уд̣̇ааху жагкумад̇о сад̣̇д̇хааяаа’’д̇и? ‘‘аж̇аананд̇о хи, бхо г̇од̇ама, абассанд̇о со ж̇ажжанд̇хо бурисо амум̣ д̇зламалигад̇ам̣ саахул̣ижийрам̣ бадиг̇г̇ан̣хзяяа, бадиг̇г̇ахзд̇ваа баарубзяяа, баарубзд̇ваа ад̇д̇амано ад̇д̇аманаваажам̣ нижчаарзяяа – ‘чзгам̣ вад̇а, бхо, од̣̇аад̇ам̣ вад̇т̇ам̣ абхируубам̣ ниммалам̣ сужий’д̇и, жагкумад̇о сад̣̇д̇хааяаа’’д̇и. ‘‘звамзва ко, мааг̇ан̣д̣ияа, ан̃н̃ад̇ид̇т̇ияаа бариб̣б̣ааж̇агаа анд̇хаа ажагкугаа аж̇аананд̇аа аарог̇яам̣, абассанд̇аа ниб̣б̣аанам̣ , ат̇а жа банимам̣ г̇аат̇ам̣ бхаасанд̇и – ‘аарог̇яабарамаа лаабхаа, ниб̣б̣аанам̣ барамам̣ сука’нд̇и. буб̣б̣агзхзсаа, мааг̇ан̣д̣ияа, араханд̇зхи саммаасамб̣уд̣̇д̇хзхи г̇аат̇аа бхаасид̇аа –
‘‘Taṃ kiṃ maññasi, māgaṇḍiya, api nu so jaccandho puriso jānanto passanto amuṃ telamalikataṃ sāhuḷicīraṃ paṭiggaṇheyya, paṭiggahetvā pārupeyya, pārupetvā attamano attamanavācaṃ nicchāreyya – ‘chekaṃ vata, bho, odātaṃ vatthaṃ abhirūpaṃ nimmalaṃ sucī’ti udāhu cakkhumato saddhāyā’’ti? ‘‘Ajānanto hi, bho gotama, apassanto so jaccandho puriso amuṃ telamalikataṃ sāhuḷicīraṃ paṭiggaṇheyya, paṭiggahetvā pārupeyya, pārupetvā attamano attamanavācaṃ nicchāreyya – ‘chekaṃ vata, bho, odātaṃ vatthaṃ abhirūpaṃ nimmalaṃ sucī’ti, cakkhumato saddhāyā’’ti. ‘‘Evameva kho, māgaṇḍiya, aññatitthiyā paribbājakā andhā acakkhukā ajānantā ārogyaṃ, apassantā nibbānaṃ , atha ca panimaṃ gāthaṃ bhāsanti – ‘ārogyaparamā lābhā, nibbānaṃ paramaṃ sukha’nti. Pubbakehesā, māgaṇḍiya, arahantehi sammāsambuddhehi gāthā bhāsitā –
‘аарог̇яабарамаа лаабхаа, ниб̣б̣аанам̣ барамам̣ сукам̣;
‘Ārogyaparamā lābhā, nibbānaṃ paramaṃ sukhaṃ;
адтан̇г̇иго жа маг̇г̇аанам̣, кзмам̣ амад̇аг̇аамина’нд̇и.
Aṭṭhaṅgiko ca maggānaṃ, khemaṃ amatagāmina’nti.
218. ‘‘саа зд̇арахи анубуб̣б̣зна бут̇уж̇ж̇анаг̇аат̇аа 29. аяам̣ ко бана, мааг̇ан̣д̣ияа, гааяо рог̇абхууд̇о г̇ан̣д̣абхууд̇о саллабхууд̇о агхабхууд̇о ааб̣аад̇хабхууд̇о, со д̇вам̣ имам̣ гааяам̣ рог̇абхууд̇ам̣ г̇ан̣д̣абхууд̇ам̣ саллабхууд̇ам̣ агхабхууд̇ам̣ ааб̣аад̇хабхууд̇ам̣ – ‘ид̣̇анд̇ам̣, бхо г̇од̇ама, аарог̇яам̣, ид̣̇анд̇ам̣ ниб̣б̣аана’нд̇и вад̣̇зси. д̇ан̃хи д̇з, мааг̇ан̣д̣ияа, арияам̣ жагкум̣ над̇т̇и язна д̇вам̣ ариязна жагкунаа аарог̇яам̣ ж̇аанзяяааси, ниб̣б̣аанам̣ бассзяяаасий’’д̇и. ‘‘звам̣ басанно ахам̣ бход̇о г̇од̇амасса! баход̇и мз бхавам̣ г̇од̇амо д̇ат̇аа д̇хаммам̣ д̣̇зсзд̇ум̣ яат̇аахам̣ аарог̇яам̣ ж̇аанзяяам̣, ниб̣б̣аанам̣ бассзяяа’’нд̇и.
218. ‘‘Sā etarahi anupubbena puthujjanagāthā 30. Ayaṃ kho pana, māgaṇḍiya, kāyo rogabhūto gaṇḍabhūto sallabhūto aghabhūto ābādhabhūto, so tvaṃ imaṃ kāyaṃ rogabhūtaṃ gaṇḍabhūtaṃ sallabhūtaṃ aghabhūtaṃ ābādhabhūtaṃ – ‘idantaṃ, bho gotama, ārogyaṃ, idantaṃ nibbāna’nti vadesi. Tañhi te, māgaṇḍiya, ariyaṃ cakkhuṃ natthi yena tvaṃ ariyena cakkhunā ārogyaṃ jāneyyāsi, nibbānaṃ passeyyāsī’’ti. ‘‘Evaṃ pasanno ahaṃ bhoto gotamassa! Pahoti me bhavaṃ gotamo tathā dhammaṃ desetuṃ yathāhaṃ ārogyaṃ jāneyyaṃ, nibbānaṃ passeyya’’nti.
219. ‘‘сзяяат̇ааби , мааг̇ан̣д̣ияа, ж̇ажжанд̇хо бурисо; со на бассзяяа ган̣хасуггаани руубаани, на бассзяяа нийлагаани руубаани, на бассзяяа бийд̇агаани руубаани, на бассзяяа лохид̇агаани руубаани, на бассзяяа ман̃ж̇идтагаани руубаани, на бассзяяа самависамам̣, на бассзяяа д̇аарагаруубаани, на бассзяяа жанд̣̇имасуурияз. д̇асса мид̇д̇аамажжаа н̃аад̇исаалохид̇аа бхисаггам̣ саллагад̇д̇ам̣ убадтаабзяяум̣. д̇асса со бхисагго саллагад̇д̇о бхзсаж̇ж̇ам̣ гарзяяа. со д̇ам̣ бхзсаж̇ж̇ам̣ ааг̇амма на жагкууни уббаад̣̇зяяа, на жагкууни висод̇хзяяа. д̇ам̣ гим̣ ман̃н̃аси, мааг̇ан̣д̣ияа, нану со взж̇ж̇о яаавад̣̇зва гиламат̇асса вигхаад̇асса бхааг̇ий ассаа’’д̇и? ‘‘звам̣, бхо г̇од̇ама’’. ‘‘звамзва ко, мааг̇ан̣д̣ияа, ахан̃жз д̇з д̇хаммам̣ д̣̇зсзяяам̣ – ‘ид̣̇анд̇ам̣ аарог̇яам̣, ид̣̇анд̇ам̣ ниб̣б̣аана’нд̇и, со д̇вам̣ аарог̇яам̣ на ж̇аанзяяааси, ниб̣б̣аанам̣ на бассзяяааси. со мамасса гиламат̇о, саа мамасса вихзсаа’’д̇и. ‘‘звам̣ басанно ахам̣ бход̇о г̇од̇амасса. баход̇и мз бхавам̣ г̇од̇амо д̇ат̇аа д̇хаммам̣ д̣̇зсзд̇ум̣ яат̇аахам̣ аарог̇яам̣ ж̇аанзяяам̣, ниб̣б̣аанам̣ бассзяяа’’нд̇и.
219. ‘‘Seyyathāpi , māgaṇḍiya, jaccandho puriso; so na passeyya kaṇhasukkāni rūpāni, na passeyya nīlakāni rūpāni, na passeyya pītakāni rūpāni, na passeyya lohitakāni rūpāni, na passeyya mañjiṭṭhakāni rūpāni, na passeyya samavisamaṃ, na passeyya tārakarūpāni, na passeyya candimasūriye. Tassa mittāmaccā ñātisālohitā bhisakkaṃ sallakattaṃ upaṭṭhāpeyyuṃ. Tassa so bhisakko sallakatto bhesajjaṃ kareyya. So taṃ bhesajjaṃ āgamma na cakkhūni uppādeyya, na cakkhūni visodheyya. Taṃ kiṃ maññasi, māgaṇḍiya, nanu so vejjo yāvadeva kilamathassa vighātassa bhāgī assā’’ti? ‘‘Evaṃ, bho gotama’’. ‘‘Evameva kho, māgaṇḍiya, ahañce te dhammaṃ deseyyaṃ – ‘idantaṃ ārogyaṃ, idantaṃ nibbāna’nti, so tvaṃ ārogyaṃ na jāneyyāsi, nibbānaṃ na passeyyāsi. So mamassa kilamatho, sā mamassa vihesā’’ti. ‘‘Evaṃ pasanno ahaṃ bhoto gotamassa. Pahoti me bhavaṃ gotamo tathā dhammaṃ desetuṃ yathāhaṃ ārogyaṃ jāneyyaṃ, nibbānaṃ passeyya’’nti.
220. ‘‘сзяяат̇ааби, мааг̇ан̣д̣ияа, ж̇ажжанд̇хо бурисо; со на бассзяяа ган̣хасуггаани руубаани, на бассзяяа нийлагаани руубаани, на бассзяяа бийд̇агаани руубаани, на бассзяяа лохид̇агаани руубаани, на бассзяяа ман̃ж̇идтагаани руубаани, на бассзяяа самависамам̣, на бассзяяа д̇аарагаруубаани, на бассзяяа жанд̣̇имасуурияз. со сун̣зяяа жагкумад̇о бхаасамаанасса – ‘чзгам̣ вад̇а, бхо, од̣̇аад̇ам̣ вад̇т̇ам̣ абхируубам̣ ниммалам̣ сужий’д̇и! со од̣̇аад̇абариязсанам̣ жарзяяа. д̇амзнам̣ ан̃н̃ад̇аро бурисо д̇зламалигад̇зна саахул̣ижийрзна ван̃жзяяа – ‘ид̣̇ам̣ д̇з, амбхо буриса, од̣̇аад̇ам̣ вад̇т̇ам̣ абхируубам̣ ниммалам̣ сужий’д̇и. со д̇ам̣ бадиг̇г̇ан̣хзяяа, бадиг̇г̇ахзд̇ваа баарубзяяа. д̇асса мид̇д̇аамажжаа н̃аад̇исаалохид̇аа бхисаггам̣ саллагад̇д̇ам̣ убадтаабзяяум̣. д̇асса со бхисагго саллагад̇д̇о бхзсаж̇ж̇ам̣ гарзяяа – уд̣̇д̇хам̣вирзжанам̣ ад̇ховирзжанам̣ ан̃ж̇анам̣ бажжан̃ж̇анам̣ над̇т̇угаммам̣. со д̇ам̣ бхзсаж̇ж̇ам̣ ааг̇амма жагкууни уббаад̣̇зяяа, жагкууни висод̇хзяяа. д̇асса саха жагкуббаад̣̇аа яо амусмим̣ д̇зламалигад̇з саахул̣ижийрз чанд̣̇арааг̇о со бахийязт̇а. д̇ан̃жа нам̣ бурисам̣ амид̇д̇ад̇оби д̣̇ахзяяа, бажжад̇т̇игад̇оби д̣̇ахзяяа, аби жа ж̇ийвид̇аа воробзд̇аб̣б̣ам̣ ман̃н̃зяяа – ‘д̣̇ийгхарад̇д̇ам̣ вад̇а, бхо, ахам̣ иминаа бурисзна д̇зламалигад̇зна саахул̣ижийрзна нигад̇о ван̃жид̇о балуд̣̇д̇хо – ид̣̇ам̣ д̇з, амбхо буриса, од̣̇аад̇ам̣ вад̇т̇ам̣ абхируубам̣ ниммалам̣ сужий’д̇и. звамзва ко, мааг̇ан̣д̣ияа, ахан̃жз д̇з д̇хаммам̣ д̣̇зсзяяам̣ – ‘ид̣̇анд̇ам̣ аарог̇яам̣, ид̣̇анд̇ам̣ ниб̣б̣аана’нд̇и. со д̇вам̣ аарог̇яам̣ ж̇аанзяяааси, ниб̣б̣аанам̣ бассзяяааси. д̇асса д̇з саха жагкуббаад̣̇аа яо бан̃жасубаад̣̇аанагканд̇хзсу чанд̣̇арааг̇о со бахийязт̇а; аби жа д̇з звамасса – ‘д̣̇ийгхарад̇д̇ам̣ вад̇а, бхо, ахам̣ иминаа жид̇д̇зна нигад̇о ван̃жид̇о балуд̣̇д̇хо 31. ахан̃хи руубам̣язва убаад̣̇ияамаано убаад̣̇ияим̣, взд̣̇анам̣язва убаад̣̇ияамаано убаад̣̇ияим̣, сан̃н̃ам̣язва убаад̣̇ияамаано убаад̣̇ияим̣, сан̇каарзязва убаад̣̇ияамаано убаад̣̇ияим̣, вин̃н̃аан̣ам̣язва убаад̣̇ияамаано убаад̣̇ияим̣. д̇асса мз убаад̣̇аанабажжаяаа бхаво, бхавабажжаяаа ж̇аад̇и, ж̇аад̇ибажжаяаа ж̇араамаран̣ам̣ согабарид̣̇звад̣̇угкад̣̇оманассубааяаасаа самбхаванд̇и; звамзд̇асса гзваласса д̣̇угкагканд̇хасса самуд̣̇аяо ход̇ий’’’д̇и. ‘‘звам̣ басанно ахам̣ бход̇о г̇од̇амасса! баход̇и мз бхавам̣ г̇од̇амо д̇ат̇аа д̇хаммам̣ д̣̇зсзд̇ум̣ яат̇аахам̣ имамхаа аасанаа ананд̇хо вудтахзяяа’’нд̇и.
220. ‘‘Seyyathāpi, māgaṇḍiya, jaccandho puriso; so na passeyya kaṇhasukkāni rūpāni, na passeyya nīlakāni rūpāni, na passeyya pītakāni rūpāni, na passeyya lohitakāni rūpāni, na passeyya mañjiṭṭhakāni rūpāni, na passeyya samavisamaṃ, na passeyya tārakarūpāni, na passeyya candimasūriye. So suṇeyya cakkhumato bhāsamānassa – ‘chekaṃ vata, bho, odātaṃ vatthaṃ abhirūpaṃ nimmalaṃ sucī’ti! So odātapariyesanaṃ careyya. Tamenaṃ aññataro puriso telamalikatena sāhuḷicīrena vañceyya – ‘idaṃ te, ambho purisa, odātaṃ vatthaṃ abhirūpaṃ nimmalaṃ sucī’ti. So taṃ paṭiggaṇheyya, paṭiggahetvā pārupeyya. Tassa mittāmaccā ñātisālohitā bhisakkaṃ sallakattaṃ upaṭṭhāpeyyuṃ. Tassa so bhisakko sallakatto bhesajjaṃ kareyya – uddhaṃvirecanaṃ adhovirecanaṃ añjanaṃ paccañjanaṃ natthukammaṃ. So taṃ bhesajjaṃ āgamma cakkhūni uppādeyya, cakkhūni visodheyya. Tassa saha cakkhuppādā yo amusmiṃ telamalikate sāhuḷicīre chandarāgo so pahīyetha. Tañca naṃ purisaṃ amittatopi daheyya, paccatthikatopi daheyya, api ca jīvitā voropetabbaṃ maññeyya – ‘dīgharattaṃ vata, bho, ahaṃ iminā purisena telamalikatena sāhuḷicīrena nikato vañcito paluddho – idaṃ te, ambho purisa, odātaṃ vatthaṃ abhirūpaṃ nimmalaṃ sucī’ti. Evameva kho, māgaṇḍiya, ahañce te dhammaṃ deseyyaṃ – ‘idantaṃ ārogyaṃ, idantaṃ nibbāna’nti. So tvaṃ ārogyaṃ jāneyyāsi, nibbānaṃ passeyyāsi. Tassa te saha cakkhuppādā yo pañcasupādānakkhandhesu chandarāgo so pahīyetha; api ca te evamassa – ‘dīgharattaṃ vata, bho, ahaṃ iminā cittena nikato vañcito paluddho 32. Ahañhi rūpaṃyeva upādiyamāno upādiyiṃ, vedanaṃyeva upādiyamāno upādiyiṃ, saññaṃyeva upādiyamāno upādiyiṃ, saṅkhāreyeva upādiyamāno upādiyiṃ, viññāṇaṃyeva upādiyamāno upādiyiṃ. Tassa me upādānapaccayā bhavo, bhavapaccayā jāti, jātipaccayā jarāmaraṇaṃ sokaparidevadukkhadomanassupāyāsā sambhavanti; evametassa kevalassa dukkhakkhandhassa samudayo hotī’’’ti. ‘‘Evaṃ pasanno ahaṃ bhoto gotamassa! Pahoti me bhavaṃ gotamo tathā dhammaṃ desetuṃ yathāhaṃ imamhā āsanā anandho vuṭṭhaheyya’’nti.
221. ‘‘д̇зна хи д̇вам̣, мааг̇ан̣д̣ияа, саббурисз бхаж̇зяяааси. яад̇о ко д̇вам̣, мааг̇ан̣д̣ияа, саббурисз бхаж̇иссаси д̇ад̇о д̇вам̣, мааг̇ан̣д̣ияа, сад̣̇д̇хаммам̣ соссаси; яад̇о ко д̇вам̣, мааг̇ан̣д̣ияа, сад̣̇д̇хаммам̣ соссаси д̇ад̇о д̇вам̣, мааг̇ан̣д̣ияа, д̇хаммаануд̇хаммам̣ бадибаж̇ж̇иссаси; яад̇о ко д̇вам̣, мааг̇ан̣д̣ияа, д̇хаммаануд̇хаммам̣ бадибаж̇ж̇иссаси д̇ад̇о д̇вам̣, мааг̇ан̣д̣ияа, саамам̣язва н̃ассаси, саамам̣ д̣̇агкиссаси – имз рог̇аа г̇ан̣д̣аа саллаа; ид̇ха рог̇аа г̇ан̣д̣аа саллаа абарисзсаа нируж̇жханд̇и. д̇асса мз убаад̣̇аананирод̇хаа бхаванирод̇хо, бхаванирод̇хаа ж̇аад̇инирод̇хо, ж̇аад̇инирод̇хаа ж̇араамаран̣ам̣ согабарид̣̇звад̣̇угкад̣̇оманассубааяаасаа нируж̇жханд̇и; звамзд̇асса гзваласса д̣̇угкагканд̇хасса нирод̇хо ход̇ий’’д̇и.
221. ‘‘Tena hi tvaṃ, māgaṇḍiya, sappurise bhajeyyāsi. Yato kho tvaṃ, māgaṇḍiya, sappurise bhajissasi tato tvaṃ, māgaṇḍiya, saddhammaṃ sossasi; yato kho tvaṃ, māgaṇḍiya, saddhammaṃ sossasi tato tvaṃ, māgaṇḍiya, dhammānudhammaṃ paṭipajjissasi; yato kho tvaṃ, māgaṇḍiya, dhammānudhammaṃ paṭipajjissasi tato tvaṃ, māgaṇḍiya, sāmaṃyeva ñassasi, sāmaṃ dakkhissasi – ime rogā gaṇḍā sallā; idha rogā gaṇḍā sallā aparisesā nirujjhanti. Tassa me upādānanirodhā bhavanirodho, bhavanirodhā jātinirodho, jātinirodhā jarāmaraṇaṃ sokaparidevadukkhadomanassupāyāsā nirujjhanti; evametassa kevalassa dukkhakkhandhassa nirodho hotī’’ti.
222. звам̣ вуд̇д̇з, мааг̇ан̣д̣ияо бариб̣б̣ааж̇аго бхаг̇аванд̇ам̣ зд̇ад̣̇авожа – ‘‘абхигганд̇ам̣, бхо г̇од̇ама, абхигганд̇ам̣, бхо г̇од̇ама! сзяяат̇ааби, бхо г̇од̇ама, ниггуж̇ж̇ид̇ам̣ ваа уггуж̇ж̇зяяа, бадижчаннам̣ ваа виварзяяа, муул̣хасса ваа маг̇г̇ам̣ аажигкзяяа, анд̇хагаарз ваа д̇злабаж̇ж̇од̇ам̣ д̇хаарзяяа – жагкуманд̇о руубаани д̣̇агканд̇ийд̇и; звамзвам̣ бход̇аа г̇од̇амзна анзгабарияааязна д̇хаммо багаасид̇о. зсаахам̣ бхаванд̇ам̣ г̇од̇амам̣ саран̣ам̣ г̇ажчаами д̇хамман̃жа бхигкусан̇гхан̃жа . лабхзяяаахам̣ бход̇о г̇од̇амасса санд̇игз баб̣б̣аж̇ж̇ам̣, лабхзяяам̣ убасамбад̣̇а’’нд̇и. ‘‘яо ко, мааг̇ан̣д̣ияа, ан̃н̃ад̇ид̇т̇ияабуб̣б̣о имасмим̣ д̇хаммавинаяз ааган̇кад̇и баб̣б̣аж̇ж̇ам̣, ааган̇кад̇и убасамбад̣̇ам̣, со жад̇д̇ааро маасз баривасад̇и; жад̇уннам̣ маасаанам̣ ажжаязна аарад̣̇д̇хажид̇д̇аа бхигкуу баб̣б̣ааж̇знд̇и , убасамбаад̣̇знд̇и бхигкубхаавааяа. аби жа мзд̇т̇а буг̇г̇алавзмад̇д̇ад̇аа вид̣̇ид̇аа’’д̇и. ‘‘сажз, бханд̇з, ан̃н̃ад̇ид̇т̇ияабуб̣б̣аа имасмим̣ д̇хаммавинаяз ааган̇канд̇аа баб̣б̣аж̇ж̇ам̣, ааган̇канд̇аа убасамбад̣̇ам̣ жад̇д̇ааро маасз баривасанд̇и, жад̇уннам̣ маасаанам̣ ажжаязна аарад̣̇д̇хажид̇д̇аа бхигкуу баб̣б̣ааж̇знд̇и убасамбаад̣̇знд̇и бхигкубхаавааяа; ахам̣ жад̇д̇аари вассаани баривасиссаами, жад̇уннам̣ вассаанам̣ ажжаязна аарад̣̇д̇хажид̇д̇аа бхигкуу баб̣б̣ааж̇знд̇у, убасамбаад̣̇знд̇у бхигкубхаавааяаа’’д̇и . алад̇т̇а ко мааг̇ан̣д̣ияо бариб̣б̣ааж̇аго бхаг̇авад̇о санд̇игз баб̣б̣аж̇ж̇ам̣, алад̇т̇а убасамбад̣̇ам̣. ажируубасамбанно ко банааяасмаа мааг̇ан̣д̣ияо зго вуубагадто аббамад̇д̇о аад̇аабий бахид̇ад̇д̇о вихаранд̇о нажирассзва – яассад̇т̇ааяа гулабуд̇д̇аа саммад̣̇зва аг̇аарасмаа анаг̇аарияам̣ баб̣б̣аж̇анд̇и д̇ад̣̇ануд̇д̇арам̣ – б̣рахмажарияабарияосаанам̣ д̣̇идтзва д̇хаммз саяам̣ абхин̃н̃аа сажчигад̇ваа убасамбаж̇ж̇а вихааси. ‘кийн̣аа ж̇аад̇и, вусид̇ам̣ б̣рахмажарияам̣, гад̇ам̣ гаран̣ийяам̣, наабарам̣ ид̇т̇ад̇д̇ааяаа’д̇и аб̣бхан̃н̃ааси. ан̃н̃ад̇аро ко банааяасмаа мааг̇ан̣д̣ияо арахад̇ам̣ ахосийд̇и.
222. Evaṃ vutte, māgaṇḍiyo paribbājako bhagavantaṃ etadavoca – ‘‘abhikkantaṃ, bho gotama, abhikkantaṃ, bho gotama! Seyyathāpi, bho gotama, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya – cakkhumanto rūpāni dakkhantīti; evamevaṃ bhotā gotamena anekapariyāyena dhammo pakāsito. Esāhaṃ bhavantaṃ gotamaṃ saraṇaṃ gacchāmi dhammañca bhikkhusaṅghañca . Labheyyāhaṃ bhoto gotamassa santike pabbajjaṃ, labheyyaṃ upasampada’’nti. ‘‘Yo kho, māgaṇḍiya, aññatitthiyapubbo imasmiṃ dhammavinaye ākaṅkhati pabbajjaṃ, ākaṅkhati upasampadaṃ, so cattāro māse parivasati; catunnaṃ māsānaṃ accayena āraddhacittā bhikkhū pabbājenti , upasampādenti bhikkhubhāvāya. Api ca mettha puggalavemattatā viditā’’ti. ‘‘Sace, bhante, aññatitthiyapubbā imasmiṃ dhammavinaye ākaṅkhantā pabbajjaṃ, ākaṅkhantā upasampadaṃ cattāro māse parivasanti, catunnaṃ māsānaṃ accayena āraddhacittā bhikkhū pabbājenti upasampādenti bhikkhubhāvāya; ahaṃ cattāri vassāni parivasissāmi, catunnaṃ vassānaṃ accayena āraddhacittā bhikkhū pabbājentu, upasampādentu bhikkhubhāvāyā’’ti . Alattha kho māgaṇḍiyo paribbājako bhagavato santike pabbajjaṃ, alattha upasampadaṃ. Acirūpasampanno kho panāyasmā māgaṇḍiyo eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anagāriyaṃ pabbajanti tadanuttaraṃ – brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti abbhaññāsi. Aññataro kho panāyasmā māgaṇḍiyo arahataṃ ahosīti.
мааг̇ан̣д̣ияасуд̇д̇ам̣ нидтид̇ам̣ бан̃жамам̣.
Māgaṇḍiyasuttaṃ niṭṭhitaṃ pañcamaṃ.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / маж̇жхиманигааяа (адтагат̇аа) • Majjhimanikāya (aṭṭhakathā) / 5. мааг̇ан̣д̣ияасуд̇д̇аван̣н̣анаа • 5. Māgaṇḍiyasuttavaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 5. мааг̇ан̣д̣ияасуд̇д̇аван̣н̣анаа • 5. Māgaṇḍiyasuttavaṇṇanā
