| Library / Tipiṭaka / तिपिटक • Tipiṭaka / सुत्तनिपातपाळि • Suttanipātapāḷi |
९. मागण्डियसुत्तं
9. Māgaṇḍiyasuttaṃ
८४१.
841.
‘‘दिस्वान तण्हं अरतिं रगञ्च 1, नाहोसि छन्दो अपि मेथुनस्मिं।
‘‘Disvāna taṇhaṃ aratiṃ ragañca 2, nāhosi chando api methunasmiṃ;
किमेविदं मुत्तकरीसपुण्णं, पादापि नं सम्फुसितुं न इच्छे’’॥
Kimevidaṃ muttakarīsapuṇṇaṃ, pādāpi naṃ samphusituṃ na icche’’.
८४२.
842.
‘‘एतादिसं चे रतनं न इच्छसि, नारिं नरिन्देहि बहूहि पत्थितं।
‘‘Etādisaṃ ce ratanaṃ na icchasi, nāriṃ narindehi bahūhi patthitaṃ;
दिट्ठिगतं सीलवतं नु जीवितं 3, भवूपपत्तिञ्च वदेसि कीदिसं’’॥
Diṭṭhigataṃ sīlavataṃ nu jīvitaṃ 4, bhavūpapattiñca vadesi kīdisaṃ’’.
८४३.
843.
‘‘इदं वदामीति न तस्स होति, (मागण्डियाति 5 भगवा)
‘‘Idaṃ vadāmīti na tassa hoti, (māgaṇḍiyāti 6 bhagavā)
धम्मेसु निच्छेय्य समुग्गहीतं।
Dhammesu niccheyya samuggahītaṃ;
पस्सञ्च दिट्ठीसु अनुग्गहाय,
Passañca diṭṭhīsu anuggahāya,
अज्झत्तसन्तिं पचिनं अदस्सं’’॥
Ajjhattasantiṃ pacinaṃ adassaṃ’’.
८४४.
844.
ते वे मुनी ब्रूसि अनुग्गहाय।
Te ve munī brūsi anuggahāya;
अज्झत्तसन्तीति यमेतमत्थं,
Ajjhattasantīti yametamatthaṃ,
कथं नु धीरेहि पवेदितं तं’’॥
Kathaṃ nu dhīrehi paveditaṃ taṃ’’.
८४५.
845.
‘‘न दिट्ठिया न सुतिया न ञाणेन, (मागण्डियाति भगवा)
‘‘Na diṭṭhiyā na sutiyā na ñāṇena, (māgaṇḍiyāti bhagavā)
सीलब्बतेनापि न सुद्धिमाह।
Sīlabbatenāpi na suddhimāha;
अदिट्ठिया अस्सुतिया अञाणा,
Adiṭṭhiyā assutiyā añāṇā,
असीलता अब्बता नोपि तेन।
Asīlatā abbatā nopi tena;
एते च निस्सज्ज अनुग्गहाय,
Ete ca nissajja anuggahāya,
सन्तो अनिस्साय भवं न जप्पे’’॥
Santo anissāya bhavaṃ na jappe’’.
८४६.
846.
‘‘नो चे किर दिट्ठिया न सुतिया न ञाणेन, (इति मागण्डियो)
‘‘No ce kira diṭṭhiyā na sutiyā na ñāṇena, (iti māgaṇḍiyo)
सीलब्बतेनापि न सुद्धिमाह।
Sīlabbatenāpi na suddhimāha;
अदिट्ठिया अस्सुतिया अञाणा,
Adiṭṭhiyā assutiyā añāṇā,
असीलता अब्बता नोपि तेन।
Asīlatā abbatā nopi tena;
मञ्ञामहं मोमुहमेव धम्मं,
Maññāmahaṃ momuhameva dhammaṃ,
दिट्ठिया एके पच्चेन्ति सुद्धिं’’॥
Diṭṭhiyā eke paccenti suddhiṃ’’.
८४७.
847.
‘‘दिट्ठञ्च निस्साय अनुपुच्छमानो, (मागण्डियाति भगवा)
‘‘Diṭṭhañca nissāya anupucchamāno, (māgaṇḍiyāti bhagavā)
इतो च नाद्दक्खि अणुम्पि सञ्ञं,
Ito ca nāddakkhi aṇumpi saññaṃ,
तस्मा तुवं मोमुहतो दहासि॥
Tasmā tuvaṃ momuhato dahāsi.
८४८.
848.
‘‘समो विसेसी उद वा निहीनो, यो मञ्ञती सो विवदेथ तेन।
‘‘Samo visesī uda vā nihīno, yo maññatī so vivadetha tena;
तीसु विधासु अविकम्पमानो, समो विसेसीति न तस्स होति॥
Tīsu vidhāsu avikampamāno, samo visesīti na tassa hoti.
८४९.
849.
‘‘सच्चन्ति सो ब्राह्मणो किं वदेय्य, मुसाति वा सो विवदेथ केन।
‘‘Saccanti so brāhmaṇo kiṃ vadeyya, musāti vā so vivadetha kena;
यस्मिं समं विसमं वापि नत्थि, स केन वादं पटिसंयुजेय्य॥
Yasmiṃ samaṃ visamaṃ vāpi natthi, sa kena vādaṃ paṭisaṃyujeyya.
८५०.
850.
‘‘ओकं पहाय अनिकेतसारी, गामे अकुब्बं मुनि सन्थवानि 11।
‘‘Okaṃ pahāya aniketasārī, gāme akubbaṃ muni santhavāni 12;
कामेहि रित्तो अपुरेक्खरानो, कथं न विग्गय्ह जनेन कयिरा॥
Kāmehi ritto apurekkharāno, kathaṃ na viggayha janena kayirā.
८५१.
851.
‘‘येहि विवित्तो विचरेय्य लोके, न तानि उग्गय्ह वदेय्य नागो।
‘‘Yehi vivitto vicareyya loke, na tāni uggayha vadeyya nāgo;
जलम्बुजं 13 कण्डकं वारिजं यथा, जलेन पङ्केन चनूपलित्तं।
Jalambujaṃ 14 kaṇḍakaṃ vārijaṃ yathā, jalena paṅkena canūpalittaṃ;
एवं मुनी सन्तिवादो अगिद्धो, कामे च लोके च अनूपलित्तो॥
Evaṃ munī santivādo agiddho, kāme ca loke ca anūpalitto.
८५२.
852.
‘‘न वेदगू दिट्ठियायको 15 न मुतिया, स मानमेति न हि तम्मयो सो।
‘‘Na vedagū diṭṭhiyāyako 16 na mutiyā, sa mānameti na hi tammayo so;
न कम्मुना नोपि सुतेन नेय्यो, अनूपनीतो स निवेसनेसु॥
Na kammunā nopi sutena neyyo, anūpanīto sa nivesanesu.
८५३.
853.
‘‘सञ्ञाविरत्तस्स न सन्ति गन्था, पञ्ञाविमुत्तस्स न सन्ति मोहा।
‘‘Saññāvirattassa na santi ganthā, paññāvimuttassa na santi mohā;
सञ्ञञ्च दिट्ठिञ्च ये अग्गहेसुं, ते घट्टयन्ता 17 विचरन्ति लोके’’ति॥
Saññañca diṭṭhiñca ye aggahesuṃ, te ghaṭṭayantā 18 vicaranti loke’’ti.
मागण्डियसुत्तं नवमं निट्ठितं।
Māgaṇḍiyasuttaṃ navamaṃ niṭṭhitaṃ.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / सुत्तनिपात-अट्ठकथा • Suttanipāta-aṭṭhakathā / ९. मागण्डियसुत्तवण्णना • 9. Māgaṇḍiyasuttavaṇṇanā
