| Library / Tipiṭaka / திபிடக • Tipiṭaka / மஹானித்³தே³ஸ-அட்ட²கதா² • Mahāniddesa-aṭṭhakathā |
9. மாக³ண்டி³யஸுத்தனித்³தே³ஸவண்ணனா
9. Māgaṇḍiyasuttaniddesavaṇṇanā
70. நவமே மாக³ண்டி³யஸுத்தனித்³தே³ஸே பட²மகா³தா²ய தாவ அஜபாலனிக்³ரோத⁴மூலே நானாரூபானி நிம்மினித்வா அபி⁴காமங் ஆக³தங் மாரதீ⁴தரங் தி³ஸ்வான தண்ஹங் அரதிங் ரக³ஞ்ச ச²ந்த³மத்தம்பி மேது²னஸ்மிங் நாஹோஸி, கிமேவித³ங் இமிஸ்ஸா தா³ரிகாய முத்தகரீஸபுண்ணங் ரூபங் தி³ஸ்வா ப⁴விஸ்ஸதி, ஸப்³ப³தா² பாதா³பி நங் ஸம்பு²ஸிதுங் ந இச்சே², குதோனேன ஸங்வஸிதுந்தி.
70. Navame māgaṇḍiyasuttaniddese paṭhamagāthāya tāva ajapālanigrodhamūle nānārūpāni nimminitvā abhikāmaṃ āgataṃ māradhītaraṃ disvāna taṇhaṃ aratiṃ ragañca chandamattampi methunasmiṃ nāhosi, kimevidaṃ imissā dārikāya muttakarīsapuṇṇaṃ rūpaṃ disvā bhavissati, sabbathā pādāpi naṃ samphusituṃ na icche, kutonena saṃvasitunti.
முத்தபுண்ணந்தி ஆஹாரஉதுவஸேன வத்தி²புடந்தரங் பூரெத்வா டி²தமுத்தேன பூரிதங். கரீஸபுண்ணந்தி பக்காஸயஸங்கா²தே ஹெட்டா²னாபி⁴பிட்டி²கண்டகமூலானங் அந்தரே உப்³பே³தே⁴ன அட்ட²ங்கு³லமத்தே அந்தாவஸானே டி²தவச்சேன புண்ணங். ஸெம்ஹபுண்ணந்தி உத³ரபடலே டி²தஏகபத்தப்பமாணேன ஸெம்ஹேன பூரிதங். ருஹிரபுண்ணந்தி யகனஸ்ஸ ஹெட்டா²பா⁴க³ங் பூரெத்வா ஹத³யவக்கபப்பா²ஸானங் உபரி தோ²கங் தோ²கங் பக்³க⁴ரந்தேன வக்கஹத³யயகனபப்பா²ஸே தேமயமானேன டி²தேன ஏகபத்தஸ்ஸ பூரணமத்தேன ஸன்னிசிதலோஹிதஸங்கா²தேன ச கேஸலோமனக²த³ந்தானங் மங்ஸவினிமுத்தட்டா²னஞ்சேவ த²த்³த⁴ஸுக்க²சம்மஞ்ச ட²பெத்வா த⁴மனீஜாலானுஸாரேன ஸப்³ப³ங் உபாதி³ண்ணகஸரீரங் ப²ரித்வா டி²தஸங்ஸரணலோஹிதஸங்கா²தேன ச து³விதே⁴ன ருஹிரேன புண்ணங்.
Muttapuṇṇanti āhārautuvasena vatthipuṭantaraṃ pūretvā ṭhitamuttena pūritaṃ. Karīsapuṇṇanti pakkāsayasaṅkhāte heṭṭhānābhipiṭṭhikaṇṭakamūlānaṃ antare ubbedhena aṭṭhaṅgulamatte antāvasāne ṭhitavaccena puṇṇaṃ. Semhapuṇṇanti udarapaṭale ṭhitaekapattappamāṇena semhena pūritaṃ. Ruhirapuṇṇanti yakanassa heṭṭhābhāgaṃ pūretvā hadayavakkapapphāsānaṃ upari thokaṃ thokaṃ paggharantena vakkahadayayakanapapphāse temayamānena ṭhitena ekapattassa pūraṇamattena sannicitalohitasaṅkhātena ca kesalomanakhadantānaṃ maṃsavinimuttaṭṭhānañceva thaddhasukkhacammañca ṭhapetvā dhamanījālānusārena sabbaṃ upādiṇṇakasarīraṃ pharitvā ṭhitasaṃsaraṇalohitasaṅkhātena ca duvidhena ruhirena puṇṇaṃ.
அட்டி²ஸங்கா⁴தந்தி ஸகலஸரீரே ஹெட்டா² அட்டீ²னங் உபரிட்டி²தானி ஸாதி⁴கானி தீணி அட்டி²ஸதானி, தேஹி அட்டீ²ஹி க⁴டிதங். ந்ஹாருஸம்ப³ந்த⁴ந்தி ஸகலஸரீரே அட்டீ²னி ஆப³ந்தி⁴த்வா டி²தானி நவ ந்ஹாருஸதானி, தேஹி ந்ஹாரூஹி ஸம்ப³ந்த⁴ங் ஆப³ந்த⁴ங். ருதி⁴ரமங்ஸாவலேபனந்தி ஸங்ஸரணலோஹிதேன ச ஸாதி⁴கானி தீணி அட்டி²ஸதானி அனுலிம்பெத்வா டி²தேன நவமங்ஸபேஸிஸதேன ச அனுலித்தங் ஸரீரங். சம்மவினத்³த⁴ந்தி ஸகலஸரீரங் பரியோனந்தி⁴த்வா பாகடகிலோமகஸ்ஸ உபரி ச²வியா ஹெட்டா² டி²தங் சம்மங், தேன சம்மேன வினத்³த⁴ங் பரியோனத்³த⁴ங். ‘‘சம்மாவனத்³த⁴’’ந்திபி பாளி. ச²வியா படிச்ச²ன்னந்தி அதிஸுகு²மச²வியா படிச்ச²ன்னங் சா²தெ³த்வா டி²தங். சி²த்³தா³வசி²த்³த³ந்தி அனேகசி²த்³த³ங். உக்³க⁴ரந்தந்தி அக்கி²முகா²தீ³ஹி உக்³க⁴ரந்தங். பக்³க⁴ரந்தந்தி அதோ⁴பா⁴கே³ன பக்³க⁴ரந்தங். கிமிஸங்க⁴னிஸேவிதந்தி ஸூசிமுகா²தீ³ஹி நானாபாணகுலஸமூஹேஹி ஆஸேவிதங். நானாகலிமலபரிபூரந்தி அனேகவிதே⁴ஹி அஸுசிகொட்டா²ஸேஹி பூரிதங்.
Aṭṭhisaṅghātanti sakalasarīre heṭṭhā aṭṭhīnaṃ upariṭṭhitāni sādhikāni tīṇi aṭṭhisatāni, tehi aṭṭhīhi ghaṭitaṃ. Nhārusambandhanti sakalasarīre aṭṭhīni ābandhitvā ṭhitāni nava nhārusatāni, tehi nhārūhi sambandhaṃ ābandhaṃ. Rudhiramaṃsāvalepananti saṃsaraṇalohitena ca sādhikāni tīṇi aṭṭhisatāni anulimpetvā ṭhitena navamaṃsapesisatena ca anulittaṃ sarīraṃ. Cammavinaddhanti sakalasarīraṃ pariyonandhitvā pākaṭakilomakassa upari chaviyā heṭṭhā ṭhitaṃ cammaṃ, tena cammena vinaddhaṃ pariyonaddhaṃ. ‘‘Cammāvanaddha’’ntipi pāḷi. Chaviyā paṭicchannanti atisukhumachaviyā paṭicchannaṃ chādetvā ṭhitaṃ. Chiddāvachiddanti anekachiddaṃ. Uggharantanti akkhimukhādīhi uggharantaṃ. Paggharantanti adhobhāgena paggharantaṃ. Kimisaṅghanisevitanti sūcimukhādīhi nānāpāṇakulasamūhehi āsevitaṃ. Nānākalimalaparipūranti anekavidhehi asucikoṭṭhāsehi pūritaṃ.
71. ததோ மாக³ண்டி³யோ ‘‘பப்³ப³ஜிதா நாம மானுஸகே காமே பஹாய தி³ப்³ப³காமத்தா²ய பப்³ப³ஜந்தி, அயஞ்ச தி³ப்³பே³பி காமே ந இச்ச²தி, இத³ம்பி இத்தி²ரதனங், கா நு அஸ்ஸ தி³ட்டீ²’’தி புச்சி²துங் து³தியங் கா³த²மாஹ. தத்த² ஏதாதி³ஸங் சே ரதனந்தி தி³ப்³பி³த்தி²ரதனங் ஸந்தா⁴ய ப⁴ணதி. நாரிந்தி அத்தனோ தீ⁴தரங் ஸந்தா⁴ய. தி³ட்டி²க³தங் ஸீலவதங் நு ஜீவிதந்தி தி³ட்டி²ஞ்ச ஸீலஞ்ச வதஞ்ச ஜீவிதஞ்ச. ப⁴வூபபத்திஞ்ச வதே³ஸி கீதி³ஸந்தி அத்தனோ ப⁴வூபபத்திங் வா துவங் கீதி³ஸங் வதே³ஸி.
71. Tato māgaṇḍiyo ‘‘pabbajitā nāma mānusake kāme pahāya dibbakāmatthāya pabbajanti, ayañca dibbepi kāme na icchati, idampi itthiratanaṃ, kā nu assa diṭṭhī’’ti pucchituṃ dutiyaṃ gāthamāha. Tattha etādisaṃ ce ratananti dibbitthiratanaṃ sandhāya bhaṇati. Nārinti attano dhītaraṃ sandhāya. Diṭṭhigataṃ sīlavataṃ nu jīvitanti diṭṭhiñca sīlañca vatañca jīvitañca. Bhavūpapattiñca vadesi kīdisanti attano bhavūpapattiṃ vā tuvaṃ kīdisaṃ vadesi.
72. இதோ பரா த்³வே கா³தா² விஸ்ஸஜ்ஜனபுச்சா²னயேன பவத்தத்தா பாகடஸம்ப³ந்தா⁴யேவ. தாஸு பட²மகா³தா²ய ஸங்கே²பத்தோ² – தஸ்ஸ மய்ஹங் மாக³ண்டி³ய த்³வாஸட்டி²தி³ட்டி²க³தத⁴ம்மேஸு நிச்சி²னித்வா ‘‘இத³மேவ ஸச்சங், மோக⁴மஞ்ஞ’’ந்தி (ம॰ நி॰ 3.27, 301) ஏவங் இத³ங் வதா³மீதி ஸமுக்³க³ஹீதங் ந ஹோதி நத்தி² ந விஜ்ஜதி, கிங் காரணா? அஹஞ்ஹி பஸ்ஸந்தோ தி³ட்டீ²ஸு ஆதீ³னவங் கஞ்சி தி³ட்டி²ங் அக்³க³ஹெத்வா ஸச்சானி பவிசினந்தோ அஜ்ஜ²த்தங் ராகா³தீ³னங் ஸந்திபா⁴வேன அஜ்ஜ²த்தஸந்திஸங்கா²தங் நிப்³பா³னமேவ அத்³த³ஸந்தி.
72. Ito parā dve gāthā vissajjanapucchānayena pavattattā pākaṭasambandhāyeva. Tāsu paṭhamagāthāya saṅkhepattho – tassa mayhaṃ māgaṇḍiya dvāsaṭṭhidiṭṭhigatadhammesu nicchinitvā ‘‘idameva saccaṃ, moghamañña’’nti (ma. ni. 3.27, 301) evaṃ idaṃ vadāmīti samuggahītaṃ na hoti natthi na vijjati, kiṃ kāraṇā? Ahañhi passanto diṭṭhīsu ādīnavaṃ kañci diṭṭhiṃ aggahetvā saccāni pavicinanto ajjhattaṃ rāgādīnaṃ santibhāvena ajjhattasantisaṅkhātaṃ nibbānameva addasanti.
ஆதீ³னவந்தி உபத்³த³வங். ஸது³க்க²ந்தி காயிகது³க்கே²ன ஸது³க்க²ங். ஸவிகா⁴தந்தி சேதஸிகது³க்கே²ன ஸஹிதங். ஸஉபாயாஸந்தி உபாயாஸஸஹிதங். ஸபரிளாஹந்தி ஸத³ரத²ங். ந நிப்³பி³தா³யாதி ந வட்டே நிப்³பி³ந்த³னத்தா²ய. ந விராகா³யாதி ந வட்டே விராக³த்தா²ய. ந நிரோதா⁴யாதி ந வட்டஸ்ஸ நிரோத⁴த்தா²ய. ந உபஸமாயாதி ந வட்டஸ்ஸ உபஸமத்தா²ய. ந அபி⁴ஞ்ஞாயாதி ந வட்டஸ்ஸ அபி⁴ஜானநத்தா²ய. ந ஸம்போ³தா⁴யாதி ந கிலேஸனித்³தா³விக³மேன வட்டதோ ஸம்பு³ஜ்ஜ²னத்தா²ய . ந நிப்³பா³னாயாதி ந அமதனிப்³பா³னத்தா²ய. எத்த² பன ‘‘நிப்³பி³தா³யா’’தி விபஸ்ஸனா. ‘‘விராகா³யா’’தி மக்³கோ³. ‘‘நிரோதா⁴ய உபஸமாயா’’தி நிப்³பா³னங். ‘‘அபி⁴ஞ்ஞாய ஸம்போ³தா⁴யா’’தி மக்³கோ³. ‘‘நிப்³பா³னாயா’’தி நிப்³பா³னமேவ. ஏவங் ஏகஸ்மிங் டா²னே விபஸ்ஸனா, தீஸு மக்³கோ³, தீஸு நிப்³பா³னங் வுத்தந்தி ஏவங் வவத்தா²னகதா² வேதி³தப்³பா³. பரியாயேன பன ஸப்³பா³னிபேதானி மக்³க³வேவசனானிபி நிப்³பா³னவேவசனானிபி ஹொந்தியேவ.
Ādīnavanti upaddavaṃ. Sadukkhanti kāyikadukkhena sadukkhaṃ. Savighātanti cetasikadukkhena sahitaṃ. Saupāyāsanti upāyāsasahitaṃ. Sapariḷāhanti sadarathaṃ. Na nibbidāyāti na vaṭṭe nibbindanatthāya. Na virāgāyāti na vaṭṭe virāgatthāya. Na nirodhāyāti na vaṭṭassa nirodhatthāya. Na upasamāyāti na vaṭṭassa upasamatthāya. Na abhiññāyāti na vaṭṭassa abhijānanatthāya. Na sambodhāyāti na kilesaniddāvigamena vaṭṭato sambujjhanatthāya . Na nibbānāyāti na amatanibbānatthāya. Ettha pana ‘‘nibbidāyā’’ti vipassanā. ‘‘Virāgāyā’’ti maggo. ‘‘Nirodhāya upasamāyā’’ti nibbānaṃ. ‘‘Abhiññāya sambodhāyā’’ti maggo. ‘‘Nibbānāyā’’ti nibbānameva. Evaṃ ekasmiṃ ṭhāne vipassanā, tīsu maggo, tīsu nibbānaṃ vuttanti evaṃ vavatthānakathā veditabbā. Pariyāyena pana sabbānipetāni maggavevacanānipi nibbānavevacanānipi hontiyeva.
அஜ்ஜ²த்தங் ராக³ஸ்ஸ ஸந்திந்தி அஜ்ஜ²த்தராக³ஸ்ஸ ஸந்தபா⁴வேன நிப்³பு³தபா⁴வேன அஜ்ஜ²த்தஸந்திஸங்கா²தங் நிப்³பா³னங் ஓலோகேஸிங். தோ³ஸஸ்ஸ ஸந்திந்திஆதீ³ஸுபி ஏஸேவ நயோ. பசினந்தி நித்³தே³ஸஸ்ஸ உத்³தே³ஸபத³ங். விசினந்தோதி ஸச்சானி வட்³டெ⁴ந்தோ விபா⁴வெந்தோ. பவிசினந்தோதி தானேவ பச்சேகங் விபா⁴வெந்தோ . கேசி ‘‘க³வேஸந்தோ’’தி வண்ணயந்தி. அத³ஸ்ஸந்தி ஓலோகேஸிங். அத³க்கி²ந்தி வினிவிஜ்ஜி²ங். அப²ஸ்ஸிந்தி பஞ்ஞாய பு²ஸிங். படிவிஜ்ஜி²ந்தி ஞாணேன பச்சக்க²ங் அகாஸிங்.
Ajjhattaṃ rāgassa santinti ajjhattarāgassa santabhāvena nibbutabhāvena ajjhattasantisaṅkhātaṃ nibbānaṃ olokesiṃ. Dosassa santintiādīsupi eseva nayo. Pacinanti niddesassa uddesapadaṃ. Vicinantoti saccāni vaḍḍhento vibhāvento. Pavicinantoti tāneva paccekaṃ vibhāvento . Keci ‘‘gavesanto’’ti vaṇṇayanti. Adassanti olokesiṃ. Adakkhinti vinivijjhiṃ. Aphassinti paññāya phusiṃ. Paṭivijjhinti ñāṇena paccakkhaṃ akāsiṃ.
73. து³தியகா³தா²ய ஸங்கே²பத்தோ² – யானிமானி தி³ட்டி²க³தானி தேஹி தேஹி ஸத்தேஹி வினிச்சி²னித்வா க³ஹிதத்தா ‘‘வினிச்ச²யா’’தி ச அத்தனோ பச்சயேஹி அபி⁴ஸங்க²தபா⁴வாதி³னா நயேன ‘‘பகப்பிதானீ’’தி ச வுச்சந்தி, தே வே முனீ தி³ட்டி²க³தத⁴ம்மே அக்³க³ஹெத்வா அஜ்ஜ²த்தஸந்தீதி யமேதமத்த²ங் ப்³ரூஸி, ஆசிக்க² மே, கத²ங் நு தீ⁴ரேஹி பவேதி³தங் தங் கத²ங் பகாஸிதங் தீ⁴ரேஹீதி வத³தி.
73. Dutiyagāthāya saṅkhepattho – yānimāni diṭṭhigatāni tehi tehi sattehi vinicchinitvā gahitattā ‘‘vinicchayā’’ti ca attano paccayehi abhisaṅkhatabhāvādinā nayena ‘‘pakappitānī’’ti ca vuccanti, te ve munī diṭṭhigatadhamme aggahetvā ajjhattasantīti yametamatthaṃ brūsi, ācikkha me, kathaṃ nu dhīrehi paveditaṃ taṃ kathaṃ pakāsitaṃ dhīrehīti vadati.
இமிஸ்ஸா கா³தா²ய நித்³தே³ஸோ உத்தானத்தோ² ட²பெத்வா பரமத்த²பத³ங். தத்த² யங் பரமத்த²ந்தி யங் உத்தமங் நிப்³பா³னங்.
Imissā gāthāya niddeso uttānattho ṭhapetvā paramatthapadaṃ. Tattha yaṃ paramatthanti yaṃ uttamaṃ nibbānaṃ.
74. அத²ஸ்ஸ ப⁴க³வா யதா² யேன உபாயேன தங் பத³ங் தீ⁴ரேஹி பகாஸிதங், தங் உபாயங் ஸபடிபக்க²ங் த³ஸ்ஸெந்தோ ‘‘ந தி³ட்டி²யா’’தி கா³த²மாஹ. தத்த² ந தி³ட்டி²யாதிஆதீ³ஹி தி³ட்டி²ஸுதிஅட்ட²ஸமாபத்திஞாணபா³ஹிரஸீலப்³ப³தானி படிக்கி²பதி. ‘‘ஸுத்³தி⁴மாஹா’’தி எத்த² வுத்தங் ஆஹ-ஸத்³த³ங் ஸப்³ப³த்த² நகாரேன ஸத்³தி⁴ங் யோஜெத்வா புரிமபத³த்தயங் நெத்வா ‘‘தி³ட்டி²யா ஸுத்³தி⁴ங் நாஹ ந கதே²மீ’’தி ஏவமத்தோ² வேதி³தப்³போ³. யதா² செத்த², ஏவங் உத்தரபதே³ஸுபி. தத்த² ச அதி³ட்டி²யா நாஹாதி த³ஸவத்து²கங் ஸம்மாதி³ட்டி²ங் வினா ந கதே²மி. ததா² அஸ்ஸுதியாதி நவங்க³ங் ஸவனங் வினா. அஞாணாதி கம்மஸ்ஸகதஸச்சானுலோமிகஞாணங் வினா. அஸீலதாதி பாதிமொக்க²ஸங்வரங் வினா. அப்³ப³தாதி து⁴தங்க³வதங் வினா. நோபி தேனாதி தேஸு ஏகமேகேன தி³ட்டி²ஆதி³மத்தேனாபி ந கதே²மீதி ஏவமத்தோ² வேதி³தப்³போ³. ஏதே ச நிஸ்ஸஜ்ஜ அனுக்³க³ஹாயாதி ஏதே ச புரிமதி³ட்டி²ஆதி³பே⁴தே³ கண்ஹபக்கி²கே த⁴ம்மே ஸமுக்³கா⁴தகரணேன நிஸ்ஸஜ்ஜ, பச்சி²மே அதி³ட்டி²ஆதி³பே⁴தே³ ஸுக்கபக்கி²கேபி அதம்மயதாபஜ்ஜனேன அனுக்³க³ஹாய. ஸந்தோ அனிஸ்ஸாய ப⁴வங் ந ஜப்பேதி இமாய படிபத்தியா ராகா³தி³வூபஸமேன ஸந்தோ சக்கா²தீ³ஸு கஞ்சி த⁴ம்மங் அனிஸ்ஸாய ஏகம்பி ப⁴வங் ந ஜப்பே, அபிஹேதுங் அபத்தே²துங் ஸமத்தோ² ஸியா, அயமஸ்ஸ அஜ்ஜ²த்தஸந்தீதி அதி⁴ப்பாயோ.
74. Athassa bhagavā yathā yena upāyena taṃ padaṃ dhīrehi pakāsitaṃ, taṃ upāyaṃ sapaṭipakkhaṃ dassento ‘‘na diṭṭhiyā’’ti gāthamāha. Tattha na diṭṭhiyātiādīhi diṭṭhisutiaṭṭhasamāpattiñāṇabāhirasīlabbatāni paṭikkhipati. ‘‘Suddhimāhā’’ti ettha vuttaṃ āha-saddaṃ sabbattha nakārena saddhiṃ yojetvā purimapadattayaṃ netvā ‘‘diṭṭhiyā suddhiṃ nāha na kathemī’’ti evamattho veditabbo. Yathā cettha, evaṃ uttarapadesupi. Tattha ca adiṭṭhiyā nāhāti dasavatthukaṃ sammādiṭṭhiṃ vinā na kathemi. Tathā assutiyāti navaṅgaṃ savanaṃ vinā. Añāṇāti kammassakatasaccānulomikañāṇaṃ vinā. Asīlatāti pātimokkhasaṃvaraṃ vinā. Abbatāti dhutaṅgavataṃ vinā. Nopi tenāti tesu ekamekena diṭṭhiādimattenāpi na kathemīti evamattho veditabbo. Ete ca nissajja anuggahāyāti ete ca purimadiṭṭhiādibhede kaṇhapakkhike dhamme samugghātakaraṇena nissajja, pacchime adiṭṭhiādibhede sukkapakkhikepi atammayatāpajjanena anuggahāya. Santo anissāya bhavaṃ na jappeti imāya paṭipattiyā rāgādivūpasamena santo cakkhādīsu kañci dhammaṃ anissāya ekampi bhavaṃ na jappe, apihetuṃ apatthetuṃ samattho siyā, ayamassa ajjhattasantīti adhippāyo.
ஸவனம்பி இச்சி²தப்³ப³ந்தி ஸுத்தாதி³வஸேன ஸுணனம்பி ஆகங்கி²தப்³ப³ங். ஸம்பா⁴ரா இமே த⁴ம்மாதி ஸம்மாதி³ட்டி²ஆதி³கா இமே த⁴ம்மா உபகாரட்டே²ன ஸம்பா⁴ரா ஹொந்தி . கண்ஹபக்கி²கானந்தி அகுஸலபக்கே² ப⁴வானங். ஸமுக்³கா⁴ததோ பஹானங் இச்சி²தப்³ப³ந்தி ஸம்மா ஹனநதோ ஸமுச்சே²த³தோ பஹானங் ஆகங்கி²தப்³ப³ங். தேதா⁴துகேஸு குஸலேஸு த⁴ம்மேஸூதி காமரூபாரூபஸங்கா²தேஸு தேபூ⁴மகேஸு கோஸல்லஸம்பூ⁴தேஸு. அதம்மயதாதி நித்தண்ஹபா⁴வோ.
Savanampi icchitabbanti suttādivasena suṇanampi ākaṅkhitabbaṃ. Sambhārā ime dhammāti sammādiṭṭhiādikā ime dhammā upakāraṭṭhena sambhārā honti . Kaṇhapakkhikānanti akusalapakkhe bhavānaṃ. Samugghātato pahānaṃ icchitabbanti sammā hananato samucchedato pahānaṃ ākaṅkhitabbaṃ. Tedhātukesu kusalesu dhammesūti kāmarūpārūpasaṅkhātesu tebhūmakesu kosallasambhūtesu. Atammayatāti nittaṇhabhāvo.
75. ஏவங் வுத்தே வசனத்த²ங் அஸல்லக்கெ²ந்தோ மாக³ண்டி³யோ ‘‘நோ சே கிரா’’தி கா³த²மாஹ. தத்த² தி³ட்டா²தீ³னி வுத்தனயானேவ. கண்ஹபக்கி²கானியேவ பன ஸந்தா⁴ய உப⁴யத்ராபி ஆஹ. ஆஹ-ஸத்³த³ங் பன ‘‘நோ சே’’தி ஸத்³தே³ன யோஜெத்வா நோ சே கிர ஆஹ நோ சே கிர கதே²ஸீதி ஏவங் அத்தோ² த³ட்ட²ப்³போ³. மோமூஹந்தி அதிமூள்ஹங், மோஹனங் வா. பச்செந்தீதி ஜானந்தி. இமிஸ்ஸாபி கா³தா²ய நித்³தே³ஸோ உத்தானோ.
75. Evaṃ vutte vacanatthaṃ asallakkhento māgaṇḍiyo ‘‘no ce kirā’’ti gāthamāha. Tattha diṭṭhādīni vuttanayāneva. Kaṇhapakkhikāniyeva pana sandhāya ubhayatrāpi āha. Āha-saddaṃ pana ‘‘no ce’’ti saddena yojetvā no ce kira āha no ce kira kathesīti evaṃ attho daṭṭhabbo. Momūhanti atimūḷhaṃ, mohanaṃ vā. Paccentīti jānanti. Imissāpi gāthāya niddeso uttāno.
76. அத²ஸ்ஸ ப⁴க³வா தங் தி³ட்டி²ங் நிஸ்ஸாய புச்ச²ங் படிக்கி²பந்தோ ‘‘தி³ட்டி²ஞ்ச நிஸ்ஸாயா’’தி கா³த²மாஹ. தஸ்ஸத்தோ² – த்வங் மாக³ண்டி³ய தி³ட்டி²ங் நிஸ்ஸாய புனப்புனங் புச்ச²மானோ யானி தே தி³ட்டி²க³தானி ஸமுக்³க³ஹிதானி, தெஸ்வேவ ஸமுக்³க³ஹீதேஸு பமோஹங் ஆக³தோ த்வங் இதோ ச மயா வுத்தஅஜ்ஜ²த்தஸந்திதோ படிபத்திதோ த⁴ம்மதே³ஸனதோ வா அணும்பி யுத்தஸஞ்ஞங் ந பஸ்ஸஸி, தேன காரணேன த்வங் இமங் த⁴ம்மங் மோமூஹதோ பஸ்ஸஸீதி.
76. Athassa bhagavā taṃ diṭṭhiṃ nissāya pucchaṃ paṭikkhipanto ‘‘diṭṭhiñca nissāyā’’ti gāthamāha. Tassattho – tvaṃ māgaṇḍiya diṭṭhiṃ nissāya punappunaṃ pucchamāno yāni te diṭṭhigatāni samuggahitāni, tesveva samuggahītesu pamohaṃ āgato tvaṃ ito ca mayā vuttaajjhattasantito paṭipattito dhammadesanato vā aṇumpi yuttasaññaṃ na passasi, tena kāraṇena tvaṃ imaṃ dhammaṃ momūhato passasīti.
லக்³க³னங் நிஸ்ஸாய லக்³க³னந்தி தி³ட்டி²லக்³க³னங் அல்லீயித்வா தி³ட்டி²லக்³க³னங். ப³ந்த⁴னந்தி தி³ட்டி²ப³ந்த⁴னங். பலிபோ³த⁴ந்தி தி³ட்டி²பலிபோ³த⁴ங்.
Lagganaṃ nissāya laggananti diṭṭhilagganaṃ allīyitvā diṭṭhilagganaṃ. Bandhananti diṭṭhibandhanaṃ. Palibodhanti diṭṭhipalibodhaṃ.
அந்த⁴காரங் பக்க²ந்தோ³ஸீதி ப³ஹலந்த⁴காரங் பவிட்டோ²ஸி. யுத்தஸஞ்ஞந்தி ஸமணத⁴ம்மே யுத்தஸஞ்ஞங். பத்தஸஞ்ஞந்தி ஸமணத⁴ம்மே படிலத்³த⁴ஸஞ்ஞங். லக்³க³னஸஞ்ஞந்தி ஸஞ்ஜானிதஸஞ்ஞங். காரணஸஞ்ஞந்தி ஹேதுஸஞ்ஞங். டா²னஸஞ்ஞந்தி காரணஸஞ்ஞங். ந படிலப⁴ஸீதி ந விந்த³ஸி. குதோ ஞாணந்தி மக்³க³ஞாணங் பன கேன காரணேன லபி⁴ஸ்ஸஸி. அனிச்சங் வாதி ஹுத்வா அபா⁴வட்டே²ன பஞ்சக்க²ந்தா⁴ அனிச்சங். அனிச்சஸஞ்ஞானுலோமங் வாதி ‘‘பஞ்சக்க²ந்தா⁴ அனிச்சா’’தி உப்பன்னா ஸஞ்ஞா அனிச்சஸஞ்ஞா, தாய ஸஞ்ஞாய அனுலோமங் அப்படிக்கூலங் அனிச்சஸஞ்ஞானுலோமங். கிங் தங்? விபஸ்ஸனாஞாணங். த்³வின்னங் விபஸ்ஸனாஞாணானங் து³க்கா²னத்தஸஞ்ஞானுலோமானம்பி ஏஸேவ நயோ.
Andhakāraṃ pakkhandosīti bahalandhakāraṃ paviṭṭhosi. Yuttasaññanti samaṇadhamme yuttasaññaṃ. Pattasaññanti samaṇadhamme paṭiladdhasaññaṃ. Lagganasaññanti sañjānitasaññaṃ. Kāraṇasaññanti hetusaññaṃ. Ṭhānasaññanti kāraṇasaññaṃ. Na paṭilabhasīti na vindasi. Kuto ñāṇanti maggañāṇaṃ pana kena kāraṇena labhissasi. Aniccaṃ vāti hutvā abhāvaṭṭhena pañcakkhandhā aniccaṃ. Aniccasaññānulomaṃ vāti ‘‘pañcakkhandhā aniccā’’ti uppannā saññā aniccasaññā, tāya saññāya anulomaṃ appaṭikkūlaṃ aniccasaññānulomaṃ. Kiṃ taṃ? Vipassanāñāṇaṃ. Dvinnaṃ vipassanāñāṇānaṃ dukkhānattasaññānulomānampi eseva nayo.
77. ஏவங் ஸமுக்³க³ஹிதேஸு பமோஹேன மாக³ண்டி³யஸ்ஸ விவாதா³பத்திங் த³ஸ்ஸெத்வா இதா³னி தேஸு அஞ்ஞேஸு ச த⁴ம்மேஸு விக³தப்பமோஹஸ்ஸ அத்தனோ நிப்³பி³வாத³தங் த³ஸ்ஸெந்தோ ‘‘ஸமோ விஸேஸீ’’தி கா³த²மாஹ. தஸ்ஸத்தோ² – யோ ஏவங் திதா⁴ மானேன வா தி³ட்டி²யா வா புக்³க³லேன வா மஞ்ஞதி, ஸோ தேன மானேன தாய வா தி³ட்டி²யா தேன வா புக்³க³லேன விவதெ³ய்ய. யோ பன அம்ஹாதி³ஸோ இமாஸு தீஸு விதா⁴ஸு அவிகம்பமானோ, ஸமோ விஸேஸீதி ந தஸ்ஸ ஹோதி, ந ச ஹீனோதி பாட²ஸேஸோ. இமிஸ்ஸாபி கா³தா²ய நித்³தே³ஸோ உத்தானோவ.
77. Evaṃ samuggahitesu pamohena māgaṇḍiyassa vivādāpattiṃ dassetvā idāni tesu aññesu ca dhammesu vigatappamohassa attano nibbivādataṃ dassento ‘‘samo visesī’’ti gāthamāha. Tassattho – yo evaṃ tidhā mānena vā diṭṭhiyā vā puggalena vā maññati, so tena mānena tāya vā diṭṭhiyā tena vā puggalena vivadeyya. Yo pana amhādiso imāsu tīsu vidhāsu avikampamāno, samo visesīti na tassa hoti, na ca hīnoti pāṭhaseso. Imissāpi gāthāya niddeso uttānova.
78. கிஞ்ச பி⁴ய்யோ – ‘‘ஸச்சந்தி ஸோ’’தி கா³தா². தஸ்ஸத்தோ² – ஸோ ஏவரூபோ பஹீனமானதி³ட்டி²கோ ‘‘மாதி³ஸோ ‘பா³ஹிதபாபத்தா’தி³னா நயேன ப்³ராஹ்மணோ, இத³மேவ ஸச்ச’’ந்தி கிங் வதெ³ய்ய கிங் வத்து²ங் ப⁴ணெய்ய, கேன வா காரணேன ப⁴ணெய்ய, ‘‘மய்ஹங் ஸச்சங், துய்ஹங் முஸா’’தி வா கேன மானேன தி³ட்டி²யா புக்³க³லேன வா விவதெ³ய்ய. யஸ்மிங் மாதி³ஸே கீ²ணாஸவே ‘‘ஸதி³ஸோஹமஸ்மீ’’தி பவத்தியா ஸமங் வா, இதரத்³வயபா⁴வேன பவத்தியா விஸமங் வா மஞ்ஞிதங் நத்தி², ஸமானாதீ³ஸு கேன வாத³ங் படிஸங்யுஜெய்ய படிப்ப²ரெய்யாதி. இமிஸ்ஸாபி கா³தா²ய நித்³தே³ஸோ உத்தானோ.
78. Kiñca bhiyyo – ‘‘saccanti so’’ti gāthā. Tassattho – so evarūpo pahīnamānadiṭṭhiko ‘‘mādiso ‘bāhitapāpattā’dinā nayena brāhmaṇo, idameva sacca’’nti kiṃ vadeyya kiṃ vatthuṃ bhaṇeyya, kena vā kāraṇena bhaṇeyya, ‘‘mayhaṃ saccaṃ, tuyhaṃ musā’’ti vā kena mānena diṭṭhiyā puggalena vā vivadeyya. Yasmiṃ mādise khīṇāsave ‘‘sadisohamasmī’’ti pavattiyā samaṃ vā, itaradvayabhāvena pavattiyā visamaṃ vā maññitaṃ natthi, samānādīsu kena vādaṃ paṭisaṃyujeyya paṭipphareyyāti. Imissāpi gāthāya niddeso uttāno.
79. நனு ஏகங்ஸேனேவ ஏவரூபோ புக்³க³லோ? ‘‘ஓகங் பஹாயா’’தி கா³தா². தத்த² ஓகங் பஹாயாதி ரூபதா⁴த்வாதி³விஞ்ஞாணஸ்ஸோகாஸங் தத்ர ச²ந்த³ராக³ப்பஹானேன ச²ட்³டெ³த்வா. அனிகேதஸாரீதி ரூபனிமித்தனிகேதாதீ³னி தண்ஹாவஸேன அஸரந்தோ. கா³மே அகுப்³ப³ங் முனி ஸந்த²வானீதி கா³மே கி³ஹிஸந்த²வானி அகரொந்தோ. காமேஹி ரித்தோதி காமேஸு ச²ந்த³ராகா³பா⁴வேன ஸப்³ப³காமேஹி புது²பூ⁴தோ. அபுரக்க²ரானோதி ஆயதிங் அத்தபா⁴வங் அனபி⁴னிப்³ப³த்தெந்தோ. கத²ங் ந விக்³க³ய்ஹ ஜனேன கயிராதி ஜனேன ஸத்³தி⁴ங் விக்³கா³ஹிககத²ங் ந கதெ²ய்ய.
79. Nanu ekaṃseneva evarūpo puggalo? ‘‘Okaṃ pahāyā’’ti gāthā. Tattha okaṃ pahāyāti rūpadhātvādiviññāṇassokāsaṃ tatra chandarāgappahānena chaḍḍetvā. Aniketasārīti rūpanimittaniketādīni taṇhāvasena asaranto. Gāme akubbaṃ muni santhavānīti gāme gihisanthavāni akaronto. Kāmehi rittoti kāmesu chandarāgābhāvena sabbakāmehi puthubhūto. Apurakkharānoti āyatiṃ attabhāvaṃ anabhinibbattento. Kathaṃ na viggayha janena kayirāti janena saddhiṃ viggāhikakathaṃ na katheyya.
ஹாலித்³த³கானீதி ஏவங்னாமகோ க³ஹபதி. யேனாயஸ்மா மஹாகச்சானோ தேனுபஸங்கமீதி யேனாதி பு⁴ம்மத்தே² கரணவசனங். தஸ்மா யத்த² மஹாகச்சானோ, தத்த² உபஸங்கமீதி ஏவமெத்த² அத்தோ² த³ட்ட²ப்³போ³. யேன வா காரணேன மஹாகச்சானோ தே³வமனுஸ்ஸேஹி உபஸங்கமிதப்³போ³, தேன காரணேன உபஸங்கமீதி ஏவமெத்த² அத்தோ² த³ட்ட²ப்³போ³. கேன ச காரணேன மஹாகச்சானோ உபஸங்கமிதப்³போ³? நானப்பகாரகு³ணவிஸேஸாதி⁴க³மாதி⁴ப்பாயேன, ஸாது³ப²லூபபோ⁴கா³தி⁴ப்பாயேன தி³ஜக³ணேஹி நிச்சப²லிதமஹாருக்கோ² விய. உபஸங்கமீதி ச க³தோதி வுத்தங் ஹோதி. உபஸங்கமித்வாதி உபஸங்கமனபரியோஸானதீ³பனங். அத² வா ஏவங் க³தோ ததோ ஆஸன்னதரங் டா²னங் மஹாகச்சானஸ்ஸ ஸமீபஸங்கா²தங் க³ந்த்வாதிபி வுத்தங் ஹோதி.
Hāliddakānīti evaṃnāmako gahapati. Yenāyasmā mahākaccāno tenupasaṅkamīti yenāti bhummatthe karaṇavacanaṃ. Tasmā yattha mahākaccāno, tattha upasaṅkamīti evamettha attho daṭṭhabbo. Yena vā kāraṇena mahākaccāno devamanussehi upasaṅkamitabbo, tena kāraṇena upasaṅkamīti evamettha attho daṭṭhabbo. Kena ca kāraṇena mahākaccāno upasaṅkamitabbo? Nānappakāraguṇavisesādhigamādhippāyena, sāduphalūpabhogādhippāyena dijagaṇehi niccaphalitamahārukkho viya. Upasaṅkamīti ca gatoti vuttaṃ hoti. Upasaṅkamitvāti upasaṅkamanapariyosānadīpanaṃ. Atha vā evaṃ gato tato āsannataraṃ ṭhānaṃ mahākaccānassa samīpasaṅkhātaṃ gantvātipi vuttaṃ hoti.
அபி⁴வாதெ³த்வாதி பஞ்சபதிட்டி²தேன வந்தி³த்வா. இதா³னி யேனத்தே²ன மஹாகச்சானஸ்ஸ உபட்டா²னங் ஆக³தோ, தங் புச்சி²துகாமோ த³ஸனக²ஸமோதா⁴னஸமுஜ்ஜலங் அஞ்ஜலிங் ஸிரஸி பதிட்டா²பெத்வா ஏகமந்தங் நிஸீதி³. ஏகமந்தந்தி பா⁴வனபுங்ஸகனித்³தே³ஸோ ‘‘விஸமங் சந்தி³மஸூரியா பரிவத்தந்தீ’’திஆதீ³ஸு (அ॰ நி॰ 4.7) விய. தஸ்மா யதா² நிஸின்னோ ஏகமந்தங் நிஸின்னோ ஹோதி, ஏவங் நிஸீதீ³தி ஏவமெத்த² அத்தோ² த³ட்ட²ப்³போ³. பு⁴ம்மத்தே² வா ஏதங் உபயோக³வசனங். நிஸீதீ³தி நிஸஜ்ஜங் கப்பேஸி. பண்டி³தா ஹி தே³வமனுஸ்ஸா க³ருட்டா²னியங் உபஸங்கமித்வா ஆஸனகுஸலதாய ஏகமந்தங் நிஸீத³ந்தி. அயஞ்ச க³ஹபதி தேஸங் அஞ்ஞதரோ, தஸ்மா ஏகமந்தங் நிஸீதி³.
Abhivādetvāti pañcapatiṭṭhitena vanditvā. Idāni yenatthena mahākaccānassa upaṭṭhānaṃ āgato, taṃ pucchitukāmo dasanakhasamodhānasamujjalaṃ añjaliṃ sirasi patiṭṭhāpetvā ekamantaṃ nisīdi. Ekamantanti bhāvanapuṃsakaniddeso ‘‘visamaṃ candimasūriyā parivattantī’’tiādīsu (a. ni. 4.7) viya. Tasmā yathā nisinno ekamantaṃ nisinno hoti, evaṃ nisīdīti evamettha attho daṭṭhabbo. Bhummatthe vā etaṃ upayogavacanaṃ. Nisīdīti nisajjaṃ kappesi. Paṇḍitā hi devamanussā garuṭṭhāniyaṃ upasaṅkamitvā āsanakusalatāya ekamantaṃ nisīdanti. Ayañca gahapati tesaṃ aññataro, tasmā ekamantaṃ nisīdi.
கத²ங் நிஸின்னோ ச பன ஏகமந்தங் நிஸின்னோ ஹோதீதி? ச² நிஸஜ்ஜதோ³ஸே வஜ்ஜெத்வா. ஸெய்யதி²த³ங்? அதிதூ³ரங் அச்சாஸன்னங் உபரிவாதங் உன்னதப்பதே³ஸங் அதிஸம்முக²ங் அதிபச்சா²தி. அதிதூ³ரே நிஸின்னோ ஹி ஸசே கதே²துகாமோ ஹோதி, உச்சாஸத்³தே³ன கதே²தப்³ப³ங் ஹோதி. அச்சாஸன்னே நிஸின்னோ ஸங்க⁴ட்டனங் கரோதி. உபரிவாதே நிஸின்னோ ஸரீரக³ந்தே⁴ன பா³த⁴தி. உன்னதப்பதே³ஸே நிஸின்னோ அகா³ரவங் பகாஸேதி. அதிஸம்முகா² நிஸின்னோ ஸசே த³ட்டு²காமோ ஹோதி, சக்கு²னா சக்கு²ங் ஆஹச்ச த³ட்ட²ப்³ப³ங் ஹோதி. அதிபச்சா² நிஸின்னோ ஸசே த³ட்டு²காமோ ஹோதி, கீ³வங் பஸாரெத்வா த³ட்ட²ப்³ப³ங் ஹோதி. தஸ்மா அயம்பி ஏதே ச² நிஸஜ்ஜதோ³ஸே வஜ்ஜெத்வா நிஸீதி³. தேன வுத்தங் – ‘‘ஏகமந்தங் நிஸீதீ³’’தி.
Kathaṃ nisinno ca pana ekamantaṃ nisinno hotīti? Cha nisajjadose vajjetvā. Seyyathidaṃ? Atidūraṃ accāsannaṃ uparivātaṃ unnatappadesaṃ atisammukhaṃ atipacchāti. Atidūre nisinno hi sace kathetukāmo hoti, uccāsaddena kathetabbaṃ hoti. Accāsanne nisinno saṅghaṭṭanaṃ karoti. Uparivāte nisinno sarīragandhena bādhati. Unnatappadese nisinno agāravaṃ pakāseti. Atisammukhā nisinno sace daṭṭhukāmo hoti, cakkhunā cakkhuṃ āhacca daṭṭhabbaṃ hoti. Atipacchā nisinno sace daṭṭhukāmo hoti, gīvaṃ pasāretvā daṭṭhabbaṃ hoti. Tasmā ayampi ete cha nisajjadose vajjetvā nisīdi. Tena vuttaṃ – ‘‘ekamantaṃ nisīdī’’ti.
ஏதத³வோசாதி ஏதங் அவோச. வுத்தமித³ங் ப⁴ந்தே கச்சான ப⁴க³வதா அட்ட²கவக்³கி³யே மாக³ண்டி³யபஞ்ஹேதி அட்ட²கவக்³கி³யம்ஹி மாக³ண்டி³யபஞ்ஹோ நாம அத்தி², தஸ்மிங் பஞ்ஹே.
Etadavocāti etaṃ avoca. Vuttamidaṃ bhante kaccāna bhagavatā aṭṭhakavaggiye māgaṇḍiyapañheti aṭṭhakavaggiyamhi māgaṇḍiyapañho nāma atthi, tasmiṃ pañhe.
ரூபதா⁴தூதி ரூபக்க²ந்தோ⁴ அதி⁴ப்பேதோ. ரூபதா⁴துராக³வினிப³ந்த⁴ந்தி ரூபதா⁴தும்ஹி ராகே³ன வினிப³த்³த⁴ங். விஞ்ஞாணந்தி கம்மவிஞ்ஞாணங். ஓகஸாரீதி கே³ஹஸாரீ ஆலயஸாரீ. கஸ்மா பனெத்த² ‘‘விஞ்ஞாணதா⁴து கோ² க³ஹபதீ’’தி ந வுத்தந்தி? ஸம்மோஹவிகா⁴தத்த²ங். ‘‘ஓகோ’’தி ஹி அத்த²தோ பச்சயோ வுச்சதி, புரேஜாதஞ்ச கம்மவிஞ்ஞாணங் பச்சா²ஜாதஸ்ஸ கம்மவிஞ்ஞாணஸ்ஸபி விபாகவிஞ்ஞாணஸ்ஸபி, விபாகவிஞ்ஞாணஞ்ச விபாகவிஞ்ஞாணஸ்ஸபி கம்மவிஞ்ஞாணஸ்ஸபி பச்சயோ ஹோதி, தஸ்மா ‘‘கதரங் நு கோ² இத⁴ விஞ்ஞாண’’ந்தி ஸம்மோஹோ ப⁴வெய்ய. தஸ்ஸ விகா⁴தத்த²ங் தங் அக்³க³ஹெத்வா அஸம்பி⁴ன்னாவ தே³ஸனா கதாதி. அபிச விபாகஆரம்மணவஸேன சதஸ்ஸோ அபி⁴ஸங்கா²ரவிஞ்ஞாணட்டி²தியோதி வுத்தாதி தா த³ஸ்ஸேதும்பி இத⁴ விஞ்ஞாணங் ந க³ஹிதங்.
Rūpadhātūti rūpakkhandho adhippeto. Rūpadhāturāgavinibandhanti rūpadhātumhi rāgena vinibaddhaṃ. Viññāṇanti kammaviññāṇaṃ. Okasārīti gehasārī ālayasārī. Kasmā panettha ‘‘viññāṇadhātu kho gahapatī’’ti na vuttanti? Sammohavighātatthaṃ. ‘‘Oko’’ti hi atthato paccayo vuccati, purejātañca kammaviññāṇaṃ pacchājātassa kammaviññāṇassapi vipākaviññāṇassapi, vipākaviññāṇañca vipākaviññāṇassapi kammaviññāṇassapi paccayo hoti, tasmā ‘‘kataraṃ nu kho idha viññāṇa’’nti sammoho bhaveyya. Tassa vighātatthaṃ taṃ aggahetvā asambhinnāva desanā katāti. Apica vipākaārammaṇavasena catasso abhisaṅkhāraviññāṇaṭṭhitiyoti vuttāti tā dassetumpi idha viññāṇaṃ na gahitaṃ.
உபயுபாதா³னாதி தண்ஹூபயதி³ட்டூ²பயவஸேன த்³வே உபயா, காமுபாதா³னாதீ³னி சத்தாரி உபாதா³னானி ச. சேதஸோ அதி⁴ட்டா²னாபி⁴னிவேஸானுஸயாதி அகுஸலசித்தஸ்ஸ அதி⁴ட்டா²னபூ⁴தா சேவ அபி⁴னிவேஸபூ⁴தா ச அனுஸயபூ⁴தா ச. ததா²க³தஸ்ஸாதி ஸம்மாஸம்பு³த்³த⁴ஸ்ஸ. ஸப்³பே³ஸம்பி ஹி கீ²ணாஸவானங் ஏதே பஹீனாவ, ஸத்து² பன கீ²ணாஸவபா⁴வோ லோகே அதிபாகடோதி உபரிமகோடியா ஏவங் வுத்தங். விஞ்ஞாணதா⁴துயாதி இத⁴ விஞ்ஞாணங் கஸ்மா க³ஹிதங்? கிலேஸப்பஹானத³ஸ்ஸனத்த²ங். கிலேஸா ஹி ந கேவலங் சதூஸுயேவ க²ந்தே⁴ஸு பஹீனா பஹீயந்தி, பஞ்சஸுபி பஹீயந்தியேவாதி கிலேஸப்பஹானத³ஸ்ஸனத்த²ங் க³ஹிதங். ஏவங் கோ² க³ஹபதி அனோகஸாரீ ஹோதீதி ஏவங் கம்மவிஞ்ஞாணேன ஓகங் அஸரந்தேன அனோகஸாரீ நாம ஹோதி.
Upayupādānāti taṇhūpayadiṭṭhūpayavasena dve upayā, kāmupādānādīni cattāri upādānāni ca. Cetaso adhiṭṭhānābhinivesānusayāti akusalacittassa adhiṭṭhānabhūtā ceva abhinivesabhūtā ca anusayabhūtā ca. Tathāgatassāti sammāsambuddhassa. Sabbesampi hi khīṇāsavānaṃ ete pahīnāva, satthu pana khīṇāsavabhāvo loke atipākaṭoti uparimakoṭiyā evaṃ vuttaṃ. Viññāṇadhātuyāti idha viññāṇaṃ kasmā gahitaṃ? Kilesappahānadassanatthaṃ. Kilesā hi na kevalaṃ catūsuyeva khandhesu pahīnā pahīyanti, pañcasupi pahīyantiyevāti kilesappahānadassanatthaṃ gahitaṃ. Evaṃ kho gahapati anokasārī hotīti evaṃ kammaviññāṇena okaṃ asarantena anokasārī nāma hoti.
ரூபனிமித்தனிகேதவிஸாரவினிப³ந்தா⁴தி ரூபமேவ கிலேஸானங் பச்சயட்டே²ன நிமித்தங், ஆரம்மணகிரியஸங்கா²தேன நிவாஸட்டே²ன நிகேதந்தி ரூபனிமித்தனிகேதங். விஸாரோ ச வினிப³ந்தோ⁴ ச விஸாரவினிப³ந்தா⁴. உப⁴யேனபி ஹி கிலேஸானங் பத்த²டபா⁴வோ ச வினிப³ந்த⁴னபா⁴வோ ச வுத்தோ, ரூபனிமித்தனிகேதே விஸாரவினிப³ந்தா⁴தி ரூபனிமித்தனிகேதவிஸாரவினிப³ந்தா⁴, தஸ்மா ரூபனிமித்தனிகேதம்ஹி உப்பன்னேன கிலேஸவிஸாரேன சேவ கிலேஸவினிப³ந்த⁴னேன சாதி அத்தோ². நிகேதஸாரீதி வுச்சதீதி ஆரம்மணகரணவஸேன நிவாஸட்டா²னட்டே²ன நிகேதஸாரீதி வுச்சதி. பஹீனாதி தே ரூபனிமித்தனிகேதே கிலேஸவிஸாரவினிப³ந்தா⁴ பஹீனா.
Rūpanimittaniketavisāravinibandhāti rūpameva kilesānaṃ paccayaṭṭhena nimittaṃ, ārammaṇakiriyasaṅkhātena nivāsaṭṭhena niketanti rūpanimittaniketaṃ. Visāro ca vinibandho ca visāravinibandhā. Ubhayenapi hi kilesānaṃ patthaṭabhāvo ca vinibandhanabhāvo ca vutto, rūpanimittanikete visāravinibandhāti rūpanimittaniketavisāravinibandhā, tasmā rūpanimittaniketamhi uppannena kilesavisārena ceva kilesavinibandhanena cāti attho. Niketasārīti vuccatīti ārammaṇakaraṇavasena nivāsaṭṭhānaṭṭhena niketasārīti vuccati. Pahīnāti te rūpanimittanikete kilesavisāravinibandhā pahīnā.
கஸ்மா பனெத்த² பஞ்சக்க²ந்தா⁴ ச ‘‘ஓகா’’தி வுத்தா, ச² ஆரம்மணானி ‘‘நிகேத’’ந்தி? ச²ந்த³ராக³ஸ்ஸ ப³லவது³ப்³ப³லதாய. ஸமானேபி ஹி ஏதேஸங் ஆலயட்டே²ன விஸயபா⁴வே ஓகோதி நிப்பரியாயேன ஸுத்³த⁴ங் கே³ஹமேவ வுச்சதி, நிகேதந்தி ‘‘அஜ்ஜ அஸுகட்டா²னே கீளிஸ்ஸாமா’’தி கதஸங்கேதானங் நிவாஸனட்டா²னங் உய்யானாதி³. தத்த² யதா² புத்ததா³ரத⁴னத⁴ஞ்ஞபுண்ணகே³ஹே ச²ந்த³ராகோ³ ப³லவா ஹோதி, ஏவங் அஜ்ஜ²த்திகேஸு க²ந்தே⁴ஸு. யதா² பன உய்யானட்டா²னாதீ³ஸு ததோ து³ப்³ப³லதரோ ஹோதி, ஏவங் பா³ஹிரேஸு ச²ஸு ஆரம்மணேஸூதி ச²ந்த³ராக³ஸ்ஸ ப³லவது³ப்³ப³லதாய ஏவங் தே³ஸனா கதாதி வேதி³தப்³பா³.
Kasmā panettha pañcakkhandhā ca ‘‘okā’’ti vuttā, cha ārammaṇāni ‘‘niketa’’nti? Chandarāgassa balavadubbalatāya. Samānepi hi etesaṃ ālayaṭṭhena visayabhāve okoti nippariyāyena suddhaṃ gehameva vuccati, niketanti ‘‘ajja asukaṭṭhāne kīḷissāmā’’ti katasaṅketānaṃ nivāsanaṭṭhānaṃ uyyānādi. Tattha yathā puttadāradhanadhaññapuṇṇagehe chandarāgo balavā hoti, evaṃ ajjhattikesu khandhesu. Yathā pana uyyānaṭṭhānādīsu tato dubbalataro hoti, evaṃ bāhiresu chasu ārammaṇesūti chandarāgassa balavadubbalatāya evaṃ desanā katāti veditabbā.
ஸுகி²தேஸு ஸுகி²தோதி உபட்டா²கேஸு த⁴னத⁴ஞ்ஞலாபா⁴தி³வஸேன ஸுகி²தேஸு ‘‘இதா³னாஹங் மனாபங் சீவரங் மனாபங் போ⁴ஜனங் லபி⁴ஸ்ஸாமீ’’தி கே³ஹஸ்ஸிதஸுகே²ன ஸுகி²தோ ஹோதி, தேஹி பத்தஸம்பத்திங் அத்தனா அனுப⁴வமானோ விய சரதி. து³க்கி²தேஸு து³க்கி²தோதி தேஸங் கேனசிதே³வ காரணேன து³க்கே² உப்பன்னே ஸயங் த்³விகு³ணேன து³க்கே²ன து³க்கி²தோ ஹோதி. கிச்சகரணீயேஸூதி கிச்சஸங்கா²தேஸு கரணீயேஸு. வோயோக³ங் ஆபஜ்ஜதீதி உபயோக³ங் ஸயங் தேஸங் கிச்சானங் கத்தப்³ப³தங் ஆபஜ்ஜதி.
Sukhitesu sukhitoti upaṭṭhākesu dhanadhaññalābhādivasena sukhitesu ‘‘idānāhaṃ manāpaṃ cīvaraṃ manāpaṃ bhojanaṃ labhissāmī’’ti gehassitasukhena sukhito hoti, tehi pattasampattiṃ attanā anubhavamāno viya carati. Dukkhitesu dukkhitoti tesaṃ kenacideva kāraṇena dukkhe uppanne sayaṃ dviguṇena dukkhena dukkhito hoti. Kiccakaraṇīyesūti kiccasaṅkhātesu karaṇīyesu. Voyogaṃ āpajjatīti upayogaṃ sayaṃ tesaṃ kiccānaṃ kattabbataṃ āpajjati.
காமேஸூதி வத்து²காமேஸு. ஏவங் கோ² க³ஹபதி காமேஹி அரித்தோ ஹோதீதி ஏவங் கிலேஸகாமேஹி அரித்தோ ஹோதி.
Kāmesūti vatthukāmesu. Evaṃ kho gahapati kāmehi aritto hotīti evaṃ kilesakāmehi aritto hoti.
அந்தோ காமானங் பா⁴வேன அதுச்சோ². ஸுக்கபக்கோ² தேஸங் அபா⁴வேன ரித்தோ துச்சோ²தி வேதி³தப்³போ³.
Anto kāmānaṃ bhāvena atuccho. Sukkapakkho tesaṃ abhāvena ritto tucchoti veditabbo.
புரக்க²ரானோதி வட்டங் புரதோ குருமானோ. ஏவங்ரூபோ ஸியந்திஆதீ³ஸு தீ³க⁴ரஸ்ஸகாளோதா³தாதீ³ஸு ரூபேஸு ஏவங்ரூபோ நாம ப⁴வெய்யந்தி பத்தே²தி. ஸுகா²தீ³ஸு வேத³னாஸு ஏவங்வேத³னோ நாம. நீலஸஞ்ஞாதீ³ஸு ஸஞ்ஞாஸு ஏவங்ஸஞ்ஞோ நாம. புஞ்ஞாபி⁴ஸங்கா²ராதீ³ஸு ஸங்கா²ரேஸு ஏவங்ஸங்கா²ரோ நாம. சக்கு²விஞ்ஞாணாதீ³ஸு விஞ்ஞாணேஸு ஏவங்விஞ்ஞாணோ நாம ப⁴வெய்யந்தி பத்தே²தி.
Purakkharānoti vaṭṭaṃ purato kurumāno. Evaṃrūpo siyantiādīsu dīgharassakāḷodātādīsu rūpesu evaṃrūpo nāma bhaveyyanti pattheti. Sukhādīsu vedanāsu evaṃvedano nāma. Nīlasaññādīsu saññāsu evaṃsañño nāma. Puññābhisaṅkhārādīsu saṅkhāresu evaṃsaṅkhāro nāma. Cakkhuviññāṇādīsu viññāṇesu evaṃviññāṇo nāma bhaveyyanti pattheti.
அபுரக்க²ரானோதி வட்டங் புரதோ அகுருமானோ. ஸஹிதங் மே, அஸஹிதங் தேதி துய்ஹங் வசனங் அஸஹிதங் அஸிலிட்ட²ங், மய்ஹங் ஸஹிதங் ஸிலிட்ட²ங் மது⁴ரங் மது⁴ரபானஸதி³ஸங். அதி⁴சிண்ணங் தே விபராவத்தந்தி யங் துய்ஹங் தீ³கே⁴ன காலேன பரிசிதங் ஸுப்பகு³ணங், தங் மம வாத³ங் ஆக³ம்ம ஸப்³ப³ங் க²ணேன விபராவத்தங் நிவத்தங். ஆரோபிதோ தே வாதோ³தி துய்ஹங் தோ³ஸோ மயா ஆரோபிதோ. சர வாத³ப்பமொக்கா²யாதி தங் தங் ஆசரியங் உபஸங்கமித்வா உத்தரங் பரியேஸந்தோ இமஸ்ஸ வாத³ஸ்ஸ மொக்கா²ய சர ஆஹிண்ட³. நிப்³பே³டே²ஹி வா ஸசே பஹோஸீதி அத² ஸயமேவ பஹோஸி, இதே⁴வ நிப்³பே³டே²ஹீதி.
Apurakkharānoti vaṭṭaṃ purato akurumāno. Sahitaṃ me, asahitaṃ teti tuyhaṃ vacanaṃ asahitaṃ asiliṭṭhaṃ, mayhaṃ sahitaṃ siliṭṭhaṃ madhuraṃ madhurapānasadisaṃ. Adhiciṇṇaṃ te viparāvattanti yaṃ tuyhaṃ dīghena kālena paricitaṃ suppaguṇaṃ, taṃ mama vādaṃ āgamma sabbaṃ khaṇena viparāvattaṃ nivattaṃ. Āropito te vādoti tuyhaṃ doso mayā āropito. Cara vādappamokkhāyāti taṃ taṃ ācariyaṃ upasaṅkamitvā uttaraṃ pariyesanto imassa vādassa mokkhāya cara āhiṇḍa. Nibbeṭhehi vā sace pahosīti atha sayameva pahosi, idheva nibbeṭhehīti.
80. ஸோ ஏவரூபோ ‘‘யேஹி விவித்தோ’’தி கா³தா². தத்த² யேஹீதி யேஹி தி³ட்டி²க³தாதீ³ஹி. விவித்தோ விசரெய்யாதி ரித்தோ சரெய்ய. ந தானி உக்³க³ய்ஹ வதெ³ய்ய நாகோ³தி ‘‘ஆகு³ங் ந கரோதீ’’திஆதி³னா (சூளனி॰ ப⁴த்³ராவுத⁴மாணவபுச்சா²னித்³தே³ஸ 70; பாராயனானுகீ³தினித்³தே³ஸ 102) நயேன நாகோ³ தானி தி³ட்டி²க³தானி உக்³க³ஹெத்வா ந சரெய்ய. ஏலம்பு³ஜந்தி ஏலஸஞ்ஞிதே அம்பு³ம்ஹி ஜாதங் கண்டகனாளங் வாரிஜங், பது³மந்தி வுத்தங் ஹோதி. யதா² ஜலேன பங்கேன சனூபலித்தந்தி தங் பது³மங் யதா² ஜலேன ச பங்கேன ச அனுபலித்தங் ஹோதி. ஏவங் முனி ஸந்திவாதோ³ அகி³த்³தோ⁴தி ஏவங் அஜ்ஜ²த்தஸந்திவாதோ³ முனி கே³தா⁴பா⁴வேன அகி³த்³தோ⁴. காமே ச லோகே ச அனூபலித்தோதி து³விதே⁴பி காமே அபாயாதி³கே ச லோகே த்³வீஹி ஸிலேஸேஹி அனுபலித்தோ ஹோதி.
80. So evarūpo ‘‘yehi vivitto’’ti gāthā. Tattha yehīti yehi diṭṭhigatādīhi. Vivitto vicareyyāti ritto careyya. Na tāniuggayha vadeyya nāgoti ‘‘āguṃ na karotī’’tiādinā (cūḷani. bhadrāvudhamāṇavapucchāniddesa 70; pārāyanānugītiniddesa 102) nayena nāgo tāni diṭṭhigatāni uggahetvā na careyya. Elambujanti elasaññite ambumhi jātaṃ kaṇṭakanāḷaṃ vārijaṃ, padumanti vuttaṃ hoti. Yathā jalena paṅkena canūpalittanti taṃ padumaṃ yathā jalena ca paṅkena ca anupalittaṃ hoti. Evaṃ muni santivādo agiddhoti evaṃ ajjhattasantivādo muni gedhābhāvena agiddho. Kāme ca loke ca anūpalittoti duvidhepi kāme apāyādike ca loke dvīhi silesehi anupalitto hoti.
ஆகு³ங் ந கரோதீதி அகுஸலாதி³தோ³ஸங் ந கரோதி. ந க³ச்ச²தீதி அக³திவஸேன ந க³ச்ச²தி. நாக³ச்ச²தீதி பஹீனகிலேஸே ந உபேதி. பாபகாதி லாமகா. அகுஸலாதி அகோஸல்லஸம்பூ⁴தா. தே கிலேஸே ந புனேதீதி யே கிலேஸா பஹீனா, தே கிலேஸே புன ந ஏதி. ந பச்சேதீதி படி ந உபேதி. ந பச்சாக³ச்ச²தீதி புன ந நிவத்ததி.
Āguṃ na karotīti akusalādidosaṃ na karoti. Na gacchatīti agativasena na gacchati. Nāgacchatīti pahīnakilese na upeti. Pāpakāti lāmakā. Akusalāti akosallasambhūtā. Te kilese na punetīti ye kilesā pahīnā, te kilese puna na eti. Na paccetīti paṭi na upeti. Na paccāgacchatīti puna na nivattati.
க²ரத³ண்டோ³தி க²ரபத்தத³ண்டோ³ ப²ருஸத³ண்டோ³. சத்தகே³தோ⁴தி விஸ்ஸட்ட²கே³தோ⁴. வந்தகே³தோ⁴தி வமிதகே³தோ⁴. முத்தகே³தோ⁴தி சி²ன்னப³ந்த⁴னகே³தோ⁴. பஹீனகே³தோ⁴தி பஜஹிதகே³தோ⁴. படினிஸ்ஸட்ட²கே³தோ⁴தி யதா² ந புன சித்தங் ஆருஹதி, ஏவங் படிவிஸ்ஸஜ்ஜிதகே³தோ⁴. உபரி வீதராகா³தீ³ஸுபி ஏஸேவ நயோ. ஸப்³பா³னேவ தானி க³ஹிதக்³க³ஹணஸ்ஸ விஸ்ஸட்ட²பா⁴வவேவசனானி.
Kharadaṇḍoti kharapattadaṇḍo pharusadaṇḍo. Cattagedhoti vissaṭṭhagedho. Vantagedhoti vamitagedho. Muttagedhoti chinnabandhanagedho. Pahīnagedhoti pajahitagedho. Paṭinissaṭṭhagedhoti yathā na puna cittaṃ āruhati, evaṃ paṭivissajjitagedho. Upari vītarāgādīsupi eseva nayo. Sabbāneva tāni gahitaggahaṇassa vissaṭṭhabhāvavevacanāni.
81. கிஞ்ச பி⁴ய்யோ – ‘‘ந வேத³கூ³’’தி கா³தா². தத்த² ந வேத³கூ³ தி³ட்டி²யாயகோதி சதுமக்³க³வேத³கூ³ மாதி³ஸோ தி³ட்டி²யாயகோ ந ஹோதி, தி³ட்டி²யா க³ச்ச²ந்தோ வா, தங் ஸாரதோ பச்செந்தோ வா ந ஹோதி. தத்த² வசனத்தோ² – யாயதீதி யாயகோ. கரணவசனேன தி³ட்டி²யா யாயதீதி தி³ட்டி²யாயகோ. உபயோக³த்தே² ஸாமிவசனேனபி தி³ட்டி²யா யாதீதிபி தி³ட்டி²யாயகோ. ந முதியா ஸ மானமேதீதி முதரூபாதி³பே⁴தா³ய முதியாபி ஸோ மானங் ந ஏதி. ந ஹி தம்மயோ ஸோதி தண்ஹாதி³ட்டி²வஸேன தம்மயோ ஹோதி தப்பராயணோ, அயங் பன ந தாதி³ஸோ. ந கம்முனா நோபி ஸுதேன நெய்யோதி புஞ்ஞாபி⁴ஸங்கா²ராதி³னா கம்முனா வா, ஸுதஸுத்³தி⁴ஆதி³னா ஸுதேன வா ஸோ நேதப்³போ³ ந ஹோதி. அனூபனீதோ ஸ நிவேஸனேஸூதி ஸோ த்³வின்னம்பி உபயானங் பஹீனத்தா ஸப்³பே³ஸு தண்ஹாதி³ட்டி²னிவேஸனேஸு அனுபனீதோ.
81. Kiñca bhiyyo – ‘‘na vedagū’’ti gāthā. Tattha na vedagū diṭṭhiyāyakoti catumaggavedagū mādiso diṭṭhiyāyako na hoti, diṭṭhiyā gacchanto vā, taṃ sārato paccento vā na hoti. Tattha vacanattho – yāyatīti yāyako. Karaṇavacanena diṭṭhiyā yāyatīti diṭṭhiyāyako. Upayogatthe sāmivacanenapi diṭṭhiyā yātītipi diṭṭhiyāyako. Na mutiyā sa mānametīti mutarūpādibhedāya mutiyāpi so mānaṃ na eti. Na hi tammayo soti taṇhādiṭṭhivasena tammayo hoti tapparāyaṇo, ayaṃ pana na tādiso. Na kammunā nopisutena neyyoti puññābhisaṅkhārādinā kammunā vā, sutasuddhiādinā sutena vā so netabbo na hoti. Anūpanīto sa nivesanesūti so dvinnampi upayānaṃ pahīnattā sabbesu taṇhādiṭṭhinivesanesu anupanīto.
முதரூபேன வாதி எத்த² முதரூபங் நாம க³ந்த⁴ரஸபொ²ட்ட²ப்³பா³னி. மானங் நேதீதி அஸ்மிமானங் ந ஏதி. ந உபேதீதி ஸமீபங் ந ஏதி. ந உபக³ச்ச²தீதி உபக³ந்த்வா ந திட்ட²தி. தம்மயோதி தப்பகதோ.
Mutarūpena vāti ettha mutarūpaṃ nāma gandharasaphoṭṭhabbāni. Mānaṃ netīti asmimānaṃ na eti. Na upetīti samīpaṃ na eti. Na upagacchatīti upagantvā na tiṭṭhati. Tammayoti tappakato.
82. தஸ்ஸ ச ஏவங்வித⁴ஸ்ஸ ‘‘ஸஞ்ஞாவிரத்தஸ்ஸா’’தி கா³தா². தத்த² ஸஞ்ஞாவிரத்தஸ்ஸாதி நெக்க²ம்மஸஞ்ஞாபுப்³ப³ங்க³மாய பா⁴வனாய பஹீனகாமாதி³ஸஞ்ஞஸ்ஸ. இமினா பதே³ன உப⁴தோபா⁴க³விமுத்தோ ஸமத²யானிகோ அதி⁴ப்பேதோ. பஞ்ஞாவிமுத்தஸ்ஸாதி விபஸ்ஸனாபுப்³ப³ங்க³மாய பா⁴வனாய ஸப்³ப³கிலேஸேஹி விமுத்தஸ்ஸ. இமினா ஸுக்க²விபஸ்ஸகோ அதி⁴ப்பேதோ. ஸஞ்ஞஞ்ச தி³ட்டி²ஞ்ச யே அக்³க³ஹேஸுங், தே க⁴ட்டமானா விசரந்தி லோகேதி யே பன காமஸஞ்ஞாதி³கங் ஸஞ்ஞங் அக்³க³ஹேஸுங், தே விஸேஸதோ க³ஹட்டா² காமாதி⁴கரணங், யே ச தி³ட்டி²ங் அக்³க³ஹேஸுங், தே விஸேஸதோ பப்³ப³ஜிதா த⁴ம்மாதி⁴கரணங் அஞ்ஞமஞ்ஞங் க⁴ட்டெந்தா விசரந்தீதி.
82. Tassa ca evaṃvidhassa ‘‘saññāvirattassā’’ti gāthā. Tattha saññāvirattassāti nekkhammasaññāpubbaṅgamāya bhāvanāya pahīnakāmādisaññassa. Iminā padena ubhatobhāgavimutto samathayāniko adhippeto. Paññāvimuttassāti vipassanāpubbaṅgamāya bhāvanāya sabbakilesehi vimuttassa. Iminā sukkhavipassako adhippeto. Saññañca diṭṭhiñca ye aggahesuṃ, te ghaṭṭamānā vicaranti loketi ye pana kāmasaññādikaṃ saññaṃ aggahesuṃ, te visesato gahaṭṭhā kāmādhikaraṇaṃ, ye ca diṭṭhiṃ aggahesuṃ, te visesato pabbajitā dhammādhikaraṇaṃ aññamaññaṃ ghaṭṭentā vicarantīti.
யோ ஸமத²புப்³ப³ங்க³மங் அரியமக்³க³ங் பா⁴வேதீதி யோ புக்³க³லோ ஸமத²புப்³ப³ங்க³மங் புரேசாரிகங் கத்வா ஸஹவிபஸ்ஸனங் அரியமக்³க³ங் பா⁴வேதி, பட²மங் ஸமாதி⁴ங் உப்பாதெ³த்வா பச்சா² ஸஹவிபஸ்ஸனங் அரியமக்³க³ங் உப்பாதே³தீதி அத்தோ². தஸ்ஸ ஆதி³தோதி தஸ்ஸ புக்³க³லஸ்ஸ பட²மஜ்ஜா²னாதி³தோ. உபாதா³யாதி படிச்ச ஆக³ம்ம. க³ந்தா² விக்க²ம்பீ⁴தா ஹொந்தீதி க³ந்தா² தூ³ரீகதா ப⁴வந்தி. அரஹத்தே பத்தேதி அரஹத்தப²லங் பத்தே. அரஹதோதி அரஹத்தப²லே டி²தஸ்ஸ. க³ந்தா² ச மோஹா சாதிஆத³யோ ஸப்³பே³ கிலேஸா பஹீனா ஹொந்தி.
Yo samathapubbaṅgamaṃ ariyamaggaṃ bhāvetīti yo puggalo samathapubbaṅgamaṃ purecārikaṃ katvā sahavipassanaṃ ariyamaggaṃ bhāveti, paṭhamaṃ samādhiṃ uppādetvā pacchā sahavipassanaṃ ariyamaggaṃ uppādetīti attho. Tassa āditoti tassa puggalassa paṭhamajjhānādito. Upādāyāti paṭicca āgamma. Ganthā vikkhambhītā hontīti ganthā dūrīkatā bhavanti. Arahatte patteti arahattaphalaṃ patte. Arahatoti arahattaphale ṭhitassa. Ganthā ca mohā cātiādayo sabbe kilesā pahīnā honti.
யோ விபஸ்ஸனாபுப்³ப³ங்க³மங் அரியமக்³க³ங் பா⁴வேதீதி யோ புக்³க³லோ விபஸ்ஸனங் புப்³ப³ங்க³மங் புரேசாரிகங் கத்வா அரியமக்³க³ங் பா⁴வேதி, பட²மங் விபஸ்ஸனங் உப்பாதெ³த்வா பச்சா² அரியமக்³க³ஸம்பயுத்தங் ஸமாதி⁴ங் பா⁴வேதீதி அத்தோ². தஸ்ஸ ஆதி³தோ உபாதா³யாதி தஸ்ஸ புக்³க³லஸ்ஸ விபஸ்ஸனதோ பட்டா²ய விபஸ்ஸனங் படிச்ச. மோஹா விக்க²ம்பி⁴தா ஹொந்தீதி எத்த² விக்க²ம்பி⁴தாதி தூ³ரங் பாபிதா ஸஞ்ஞாவஸேன. க⁴ட்டெந்தீதி யே காமஸஞ்ஞாதி³ங் க³ண்ஹந்தி, தே ஸஞ்ஞாவஸேன பீளெந்தி. ஸங்க⁴ட்டெந்தீதி ததோ ததோ பீளெந்தி . இதா³னி க⁴ட்டெந்தே த³ஸ்ஸேதுங் ‘‘ராஜானோபி ராஜூஹி விவத³ந்தீ’’திஆதி³னா நயேன வித்தா²ரோ வுத்தோ. அஞ்ஞமஞ்ஞங் பாணீஹிபி உபக்கமந்தீதி எத்த² அஞ்ஞமஞ்ஞங் ஹத்தே²ஹி பஹரந்தி. லெட்³டூ³ஹீதி கபாலக²ண்டே³ஹி. த³ண்டே³ஹீதி அட்³ட⁴த³ண்ட³கேஹி. ஸத்தே²ஹீதி உப⁴தோதா⁴ரேஹி ஸத்தே²ஹி.
Yo vipassanāpubbaṅgamaṃ ariyamaggaṃ bhāvetīti yo puggalo vipassanaṃ pubbaṅgamaṃ purecārikaṃ katvā ariyamaggaṃ bhāveti, paṭhamaṃ vipassanaṃ uppādetvā pacchā ariyamaggasampayuttaṃ samādhiṃ bhāvetīti attho. Tassa ādito upādāyāti tassa puggalassa vipassanato paṭṭhāya vipassanaṃ paṭicca. Mohā vikkhambhitā hontīti ettha vikkhambhitāti dūraṃ pāpitā saññāvasena. Ghaṭṭentīti ye kāmasaññādiṃ gaṇhanti, te saññāvasena pīḷenti. Saṅghaṭṭentīti tato tato pīḷenti . Idāni ghaṭṭente dassetuṃ ‘‘rājānopirājūhi vivadantī’’tiādinā nayena vitthāro vutto. Aññamaññaṃ pāṇīhipi upakkamantīti ettha aññamaññaṃ hatthehi paharanti. Leḍḍūhīti kapālakhaṇḍehi. Daṇḍehīti aḍḍhadaṇḍakehi. Satthehīti ubhatodhārehi satthehi.
அபி⁴ஸங்கா²ரானங் அப்பஹீனத்தாதி புஞ்ஞாதி³அபி⁴ஸங்கா²ரானங் அப்பஹீனபா⁴வேன. க³தியா க⁴ட்டெந்தீதி க³ந்தப்³பா³ய பதிட்டா²பூ⁴தாய க³தியா பீளெந்தி க⁴ட்டனங் ஆபஜ்ஜந்தி. நிரயாதீ³ஸுபி ஏஸேவ நயோ. ஸேஸமெத்த² வுத்தனயத்தா உத்தானமேவ.
Abhisaṅkhārānaṃ appahīnattāti puññādiabhisaṅkhārānaṃ appahīnabhāvena. Gatiyā ghaṭṭentīti gantabbāya patiṭṭhābhūtāya gatiyā pīḷenti ghaṭṭanaṃ āpajjanti. Nirayādīsupi eseva nayo. Sesamettha vuttanayattā uttānameva.
ஸத்³த⁴ம்மப்பஜ்ஜோதிகாய மஹானித்³தே³ஸட்ட²கதா²ய
Saddhammappajjotikāya mahāniddesaṭṭhakathāya
மாக³ண்டி³யஸுத்தனித்³தே³ஸவண்ணனா நிட்டி²தா.
Māgaṇḍiyasuttaniddesavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / மஹானித்³தே³ஸபாளி • Mahāniddesapāḷi / 9. மாக³ண்டி³யஸுத்தனித்³தே³ஸோ • 9. Māgaṇḍiyasuttaniddeso
