| Library / Tipiṭaka / ཏིཔིཊཀ • Tipiṭaka / མཧཱནིདྡེས-ཨཊྛཀཐཱ • Mahāniddesa-aṭṭhakathā |
༩. མཱགཎྜིཡསུཏྟནིདྡེསཝཎྞནཱ
9. Māgaṇḍiyasuttaniddesavaṇṇanā
༧༠. ནཝམེ མཱགཎྜིཡསུཏྟནིདྡེསེ པཋམགཱཐཱཡ ཏཱཝ ཨཛཔཱལནིགྲོདྷམཱུལེ ནཱནཱརཱུཔཱནི ནིམྨིནིཏྭཱ ཨབྷིཀཱམཾ ཨཱགཏཾ མཱརདྷཱིཏརཾ དིསྭཱན ཏཎྷཾ ཨརཏིཾ རགཉྩ ཚནྡམཏྟམྤི མེཐུནསྨིཾ ནཱཧོསི, ཀིམེཝིདཾ ཨིམིསྶཱ དཱརིཀཱཡ མུཏྟཀརཱིསཔུཎྞཾ རཱུཔཾ དིསྭཱ བྷཝིསྶཏི, སབྦཐཱ པཱདཱཔི ནཾ སམྥུསིཏུཾ ན ཨིཙྪེ, ཀུཏོནེན སཾཝསིཏུནྟི།
70. Navame māgaṇḍiyasuttaniddese paṭhamagāthāya tāva ajapālanigrodhamūle nānārūpāni nimminitvā abhikāmaṃ āgataṃ māradhītaraṃ disvāna taṇhaṃ aratiṃ ragañca chandamattampi methunasmiṃ nāhosi, kimevidaṃ imissā dārikāya muttakarīsapuṇṇaṃ rūpaṃ disvā bhavissati, sabbathā pādāpi naṃ samphusituṃ na icche, kutonena saṃvasitunti.
མུཏྟཔུཎྞནྟི ཨཱཧཱརཨུཏུཝསེན ཝཏྠིཔུཊནྟརཾ པཱུརེཏྭཱ ཋིཏམུཏྟེན པཱུརིཏཾ། ཀརཱིསཔུཎྞནྟི པཀྐཱསཡསངྑཱཏེ ཧེཊྛཱནཱབྷིཔིཊྛིཀཎྚཀམཱུལཱནཾ ཨནྟརེ ཨུབྦེདྷེན ཨཊྛངྒུལམཏྟེ ཨནྟཱཝསཱནེ ཋིཏཝཙྩེན པུཎྞཾ། སེམྷཔུཎྞནྟི ཨུདརཔཊལེ ཋིཏཨེཀཔཏྟཔྤམཱཎེན སེམྷེན པཱུརིཏཾ། རུཧིརཔུཎྞནྟི ཡཀནསྶ ཧེཊྛཱབྷཱགཾ པཱུརེཏྭཱ ཧདཡཝཀྐཔཔྥཱསཱནཾ ཨུཔརི ཐོཀཾ ཐོཀཾ པགྒྷརནྟེན ཝཀྐཧདཡཡཀནཔཔྥཱསེ ཏེམཡམཱནེན ཋིཏེན ཨེཀཔཏྟསྶ པཱུརཎམཏྟེན སནྣིཙིཏལོཧིཏསངྑཱཏེན ཙ ཀེསལོམནཁདནྟཱནཾ མཾསཝིནིམུཏྟཊྛཱནཉྩེཝ ཐདྡྷསུཀྑཙམྨཉྩ ཋཔེཏྭཱ དྷམནཱིཛཱལཱནུསཱརེན སབྦཾ ཨུཔཱདིཎྞཀསརཱིརཾ ཕརིཏྭཱ ཋིཏསཾསརཎལོཧིཏསངྑཱཏེན ཙ དུཝིདྷེན རུཧིརེན པུཎྞཾ།
Muttapuṇṇanti āhārautuvasena vatthipuṭantaraṃ pūretvā ṭhitamuttena pūritaṃ. Karīsapuṇṇanti pakkāsayasaṅkhāte heṭṭhānābhipiṭṭhikaṇṭakamūlānaṃ antare ubbedhena aṭṭhaṅgulamatte antāvasāne ṭhitavaccena puṇṇaṃ. Semhapuṇṇanti udarapaṭale ṭhitaekapattappamāṇena semhena pūritaṃ. Ruhirapuṇṇanti yakanassa heṭṭhābhāgaṃ pūretvā hadayavakkapapphāsānaṃ upari thokaṃ thokaṃ paggharantena vakkahadayayakanapapphāse temayamānena ṭhitena ekapattassa pūraṇamattena sannicitalohitasaṅkhātena ca kesalomanakhadantānaṃ maṃsavinimuttaṭṭhānañceva thaddhasukkhacammañca ṭhapetvā dhamanījālānusārena sabbaṃ upādiṇṇakasarīraṃ pharitvā ṭhitasaṃsaraṇalohitasaṅkhātena ca duvidhena ruhirena puṇṇaṃ.
ཨཊྛིསངྒྷཱཏནྟི སཀལསརཱིརེ ཧེཊྛཱ ཨཊྛཱིནཾ ཨུཔརིཊྛིཏཱནི སཱདྷིཀཱནི ཏཱིཎི ཨཊྛིསཏཱནི, ཏེཧི ཨཊྛཱིཧི གྷཊིཏཾ། ནྷཱརུསམྦནྡྷནྟི སཀལསརཱིརེ ཨཊྛཱིནི ཨཱབནྡྷིཏྭཱ ཋིཏཱནི ནཝ ནྷཱརུསཏཱནི, ཏེཧི ནྷཱརཱུཧི སམྦནྡྷཾ ཨཱབནྡྷཾ། རུདྷིརམཾསཱཝལེཔནནྟི སཾསརཎལོཧིཏེན ཙ སཱདྷིཀཱནི ཏཱིཎི ཨཊྛིསཏཱནི ཨནུལིམྤེཏྭཱ ཋིཏེན ནཝམཾསཔེསིསཏེན ཙ ཨནུལིཏྟཾ སརཱིརཾ། ཙམྨཝིནདྡྷནྟི སཀལསརཱིརཾ པརིཡོནནྡྷིཏྭཱ པཱཀཊཀིལོམཀསྶ ཨུཔརི ཚཝིཡཱ ཧེཊྛཱ ཋིཏཾ ཙམྨཾ, ཏེན ཙམྨེན ཝིནདྡྷཾ པརིཡོནདྡྷཾ། ‘‘ཙམྨཱཝནདྡྷ’’ནྟིཔི པཱལི༹། ཚཝིཡཱ པཊིཙྪནྣནྟི ཨཏིསུཁུམཚཝིཡཱ པཊིཙྪནྣཾ ཚཱདེཏྭཱ ཋིཏཾ། ཚིདྡཱཝཚིདྡནྟི ཨནེཀཚིདྡཾ། ཨུགྒྷརནྟནྟི ཨཀྑིམུཁཱདཱིཧི ཨུགྒྷརནྟཾ། པགྒྷརནྟནྟི ཨདྷོབྷཱགེན པགྒྷརནྟཾ། ཀིམིསངྒྷནིསེཝིཏནྟི སཱུཙིམུཁཱདཱིཧི ནཱནཱཔཱཎཀུལསམཱུཧེཧི ཨཱསེཝིཏཾ། ནཱནཱཀལིམལཔརིཔཱུརནྟི ཨནེཀཝིདྷེཧི ཨསུཙིཀོཊྛཱསེཧི པཱུརིཏཾ།
Aṭṭhisaṅghātanti sakalasarīre heṭṭhā aṭṭhīnaṃ upariṭṭhitāni sādhikāni tīṇi aṭṭhisatāni, tehi aṭṭhīhi ghaṭitaṃ. Nhārusambandhanti sakalasarīre aṭṭhīni ābandhitvā ṭhitāni nava nhārusatāni, tehi nhārūhi sambandhaṃ ābandhaṃ. Rudhiramaṃsāvalepananti saṃsaraṇalohitena ca sādhikāni tīṇi aṭṭhisatāni anulimpetvā ṭhitena navamaṃsapesisatena ca anulittaṃ sarīraṃ. Cammavinaddhanti sakalasarīraṃ pariyonandhitvā pākaṭakilomakassa upari chaviyā heṭṭhā ṭhitaṃ cammaṃ, tena cammena vinaddhaṃ pariyonaddhaṃ. ‘‘Cammāvanaddha’’ntipi pāḷi. Chaviyā paṭicchannanti atisukhumachaviyā paṭicchannaṃ chādetvā ṭhitaṃ. Chiddāvachiddanti anekachiddaṃ. Uggharantanti akkhimukhādīhi uggharantaṃ. Paggharantanti adhobhāgena paggharantaṃ. Kimisaṅghanisevitanti sūcimukhādīhi nānāpāṇakulasamūhehi āsevitaṃ. Nānākalimalaparipūranti anekavidhehi asucikoṭṭhāsehi pūritaṃ.
༧༡. ཏཏོ མཱགཎྜིཡོ ‘‘པབྦཛིཏཱ ནཱམ མཱནུསཀེ ཀཱམེ པཧཱཡ དིབྦཀཱམཏྠཱཡ པབྦཛནྟི, ཨཡཉྩ དིབྦེཔི ཀཱམེ ན ཨིཙྪཏི, ཨིདམྤི ཨིཏྠིརཏནཾ, ཀཱ ནུ ཨསྶ དིཊྛཱི’’ཏི པུཙྪིཏུཾ དུཏིཡཾ གཱཐམཱཧ། ཏཏྠ ཨེཏཱདིསཾ ཙེ རཏནནྟི དིབྦིཏྠིརཏནཾ སནྡྷཱཡ བྷཎཏི། ནཱརིནྟི ཨཏྟནོ དྷཱིཏརཾ སནྡྷཱཡ། དིཊྛིགཏཾ སཱིལཝཏཾ ནུ ཛཱིཝིཏནྟི དིཊྛིཉྩ སཱིལཉྩ ཝཏཉྩ ཛཱིཝིཏཉྩ། བྷཝཱུཔཔཏྟིཉྩ ཝདེསི ཀཱིདིསནྟི ཨཏྟནོ བྷཝཱུཔཔཏྟིཾ ཝཱ ཏུཝཾ ཀཱིདིསཾ ཝདེསི།
71. Tato māgaṇḍiyo ‘‘pabbajitā nāma mānusake kāme pahāya dibbakāmatthāya pabbajanti, ayañca dibbepi kāme na icchati, idampi itthiratanaṃ, kā nu assa diṭṭhī’’ti pucchituṃ dutiyaṃ gāthamāha. Tattha etādisaṃ ce ratananti dibbitthiratanaṃ sandhāya bhaṇati. Nārinti attano dhītaraṃ sandhāya. Diṭṭhigataṃ sīlavataṃ nu jīvitanti diṭṭhiñca sīlañca vatañca jīvitañca. Bhavūpapattiñca vadesi kīdisanti attano bhavūpapattiṃ vā tuvaṃ kīdisaṃ vadesi.
༧༢. ཨིཏོ པརཱ དྭེ གཱཐཱ ཝིསྶཛྫནཔུཙྪཱནཡེན པཝཏྟཏྟཱ པཱཀཊསམྦནྡྷཱཡེཝ། ཏཱསུ པཋམགཱཐཱཡ སངྑེཔཏྠོ – ཏསྶ མཡ྄ཧཾ མཱགཎྜིཡ དྭཱསཊྛིདིཊྛིགཏདྷམྨེསུ ནིཙྪིནིཏྭཱ ‘‘ཨིདམེཝ སཙྩཾ, མོགྷམཉྙ’’ནྟི (མ॰ ནི॰ ༣.༢༧, ༣༠༡) ཨེཝཾ ཨིདཾ ཝདཱམཱིཏི སམུགྒཧཱིཏཾ ན ཧོཏི ནཏྠི ན ཝིཛྫཏི, ཀིཾ ཀཱརཎཱ? ཨཧཉྷི པསྶནྟོ དིཊྛཱིསུ ཨཱདཱིནཝཾ ཀཉྩི དིཊྛིཾ ཨགྒཧེཏྭཱ སཙྩཱནི པཝིཙིནནྟོ ཨཛ྄ཛྷཏྟཾ རཱགཱདཱིནཾ སནྟིབྷཱཝེན ཨཛ྄ཛྷཏྟསནྟིསངྑཱཏཾ ནིབྦཱནམེཝ ཨདྡསནྟི།
72. Ito parā dve gāthā vissajjanapucchānayena pavattattā pākaṭasambandhāyeva. Tāsu paṭhamagāthāya saṅkhepattho – tassa mayhaṃ māgaṇḍiya dvāsaṭṭhidiṭṭhigatadhammesu nicchinitvā ‘‘idameva saccaṃ, moghamañña’’nti (ma. ni. 3.27, 301) evaṃ idaṃ vadāmīti samuggahītaṃ na hoti natthi na vijjati, kiṃ kāraṇā? Ahañhi passanto diṭṭhīsu ādīnavaṃ kañci diṭṭhiṃ aggahetvā saccāni pavicinanto ajjhattaṃ rāgādīnaṃ santibhāvena ajjhattasantisaṅkhātaṃ nibbānameva addasanti.
ཨཱདཱིནཝནྟི ཨུཔདྡཝཾ། སདུཀྑནྟི ཀཱཡིཀདུཀྑེན སདུཀྑཾ། སཝིགྷཱཏནྟི ཙེཏསིཀདུཀྑེན སཧིཏཾ། སཨུཔཱཡཱསནྟི ཨུཔཱཡཱསསཧིཏཾ། སཔརིལཱ༹ཧནྟི སདརཐཾ། ན ནིབྦིདཱཡཱཏི ན ཝཊྚེ ནིབྦིནྡནཏྠཱཡ། ན ཝིརཱགཱཡཱཏི ན ཝཊྚེ ཝིརཱགཏྠཱཡ། ན ནིརོདྷཱཡཱཏི ན ཝཊྚསྶ ནིརོདྷཏྠཱཡ། ན ཨུཔསམཱཡཱཏི ན ཝཊྚསྶ ཨུཔསམཏྠཱཡ། ན ཨབྷིཉྙཱཡཱཏི ན ཝཊྚསྶ ཨབྷིཛཱནནཏྠཱཡ། ན སམྦོདྷཱཡཱཏི ན ཀིལེསནིདྡཱཝིགམེན ཝཊྚཏོ སམྦུཛ྄ཛྷནཏྠཱཡ ། ན ནིབྦཱནཱཡཱཏི ན ཨམཏནིབྦཱནཏྠཱཡ། ཨེཏྠ པན ‘‘ནིབྦིདཱཡཱ’’ཏི ཝིཔསྶནཱ། ‘‘ཝིརཱགཱཡཱ’’ཏི མགྒོ། ‘‘ནིརོདྷཱཡ ཨུཔསམཱཡཱ’’ཏི ནིབྦཱནཾ། ‘‘ཨབྷིཉྙཱཡ སམྦོདྷཱཡཱ’’ཏི མགྒོ། ‘‘ནིབྦཱནཱཡཱ’’ཏི ནིབྦཱནམེཝ། ཨེཝཾ ཨེཀསྨིཾ ཋཱནེ ཝིཔསྶནཱ, ཏཱིསུ མགྒོ, ཏཱིསུ ནིབྦཱནཾ ཝུཏྟནྟི ཨེཝཾ ཝཝཏྠཱནཀཐཱ ཝེདིཏབྦཱ། པརིཡཱཡེན པན སབྦཱནིཔེཏཱནི མགྒཝེཝཙནཱནིཔི ནིབྦཱནཝེཝཙནཱནིཔི ཧོནྟིཡེཝ།
Ādīnavanti upaddavaṃ. Sadukkhanti kāyikadukkhena sadukkhaṃ. Savighātanti cetasikadukkhena sahitaṃ. Saupāyāsanti upāyāsasahitaṃ. Sapariḷāhanti sadarathaṃ. Na nibbidāyāti na vaṭṭe nibbindanatthāya. Na virāgāyāti na vaṭṭe virāgatthāya. Na nirodhāyāti na vaṭṭassa nirodhatthāya. Na upasamāyāti na vaṭṭassa upasamatthāya. Na abhiññāyāti na vaṭṭassa abhijānanatthāya. Na sambodhāyāti na kilesaniddāvigamena vaṭṭato sambujjhanatthāya . Na nibbānāyāti na amatanibbānatthāya. Ettha pana ‘‘nibbidāyā’’ti vipassanā. ‘‘Virāgāyā’’ti maggo. ‘‘Nirodhāya upasamāyā’’ti nibbānaṃ. ‘‘Abhiññāya sambodhāyā’’ti maggo. ‘‘Nibbānāyā’’ti nibbānameva. Evaṃ ekasmiṃ ṭhāne vipassanā, tīsu maggo, tīsu nibbānaṃ vuttanti evaṃ vavatthānakathā veditabbā. Pariyāyena pana sabbānipetāni maggavevacanānipi nibbānavevacanānipi hontiyeva.
ཨཛ྄ཛྷཏྟཾ རཱགསྶ སནྟིནྟི ཨཛ྄ཛྷཏྟརཱགསྶ སནྟབྷཱཝེན ནིབྦུཏབྷཱཝེན ཨཛ྄ཛྷཏྟསནྟིསངྑཱཏཾ ནིབྦཱནཾ ཨོལོཀེསིཾ། དོསསྶ སནྟིནྟིཨཱདཱིསུཔི ཨེསེཝ ནཡོ། པཙིནནྟི ནིདྡེསསྶ ཨུདྡེསཔདཾ། ཝིཙིནནྟོཏི སཙྩཱནི ཝཌྜྷེནྟོ ཝིབྷཱཝེནྟོ། པཝིཙིནནྟོཏི ཏཱནེཝ པཙྩེཀཾ ཝིབྷཱཝེནྟོ ། ཀེཙི ‘‘གཝེསནྟོ’’ཏི ཝཎྞཡནྟི། ཨདསྶནྟི ཨོལོཀེསིཾ། ཨདཀྑིནྟི ཝིནིཝིཛ྄ཛྷིཾ། ཨཕསྶིནྟི པཉྙཱཡ ཕུསིཾ། པཊིཝིཛ྄ཛྷིནྟི ཉཱཎེན པཙྩཀྑཾ ཨཀཱསིཾ།
Ajjhattaṃ rāgassa santinti ajjhattarāgassa santabhāvena nibbutabhāvena ajjhattasantisaṅkhātaṃ nibbānaṃ olokesiṃ. Dosassa santintiādīsupi eseva nayo. Pacinanti niddesassa uddesapadaṃ. Vicinantoti saccāni vaḍḍhento vibhāvento. Pavicinantoti tāneva paccekaṃ vibhāvento . Keci ‘‘gavesanto’’ti vaṇṇayanti. Adassanti olokesiṃ. Adakkhinti vinivijjhiṃ. Aphassinti paññāya phusiṃ. Paṭivijjhinti ñāṇena paccakkhaṃ akāsiṃ.
༧༣. དུཏིཡགཱཐཱཡ སངྑེཔཏྠོ – ཡཱནིམཱནི དིཊྛིགཏཱནི ཏེཧི ཏེཧི སཏྟེཧི ཝིནིཙྪིནིཏྭཱ གཧིཏཏྟཱ ‘‘ཝིནིཙྪཡཱ’’ཏི ཙ ཨཏྟནོ པཙྩཡེཧི ཨབྷིསངྑཏབྷཱཝཱདིནཱ ནཡེན ‘‘པཀཔྤིཏཱནཱི’’ཏི ཙ ཝུཙྩནྟི, ཏེ ཝེ མུནཱི དིཊྛིགཏདྷམྨེ ཨགྒཧེཏྭཱ ཨཛ྄ཛྷཏྟསནྟཱིཏི ཡམེཏམཏྠཾ བྲཱུསི, ཨཱཙིཀྑ མེ, ཀཐཾ ནུ དྷཱིརེཧི པཝེདིཏཾ ཏཾ ཀཐཾ པཀཱསིཏཾ དྷཱིརེཧཱིཏི ཝདཏི།
73. Dutiyagāthāya saṅkhepattho – yānimāni diṭṭhigatāni tehi tehi sattehi vinicchinitvā gahitattā ‘‘vinicchayā’’ti ca attano paccayehi abhisaṅkhatabhāvādinā nayena ‘‘pakappitānī’’ti ca vuccanti, te ve munī diṭṭhigatadhamme aggahetvā ajjhattasantīti yametamatthaṃ brūsi, ācikkha me, kathaṃ nu dhīrehi paveditaṃ taṃ kathaṃ pakāsitaṃ dhīrehīti vadati.
ཨིམིསྶཱ གཱཐཱཡ ནིདྡེསོ ཨུཏྟཱནཏྠོ ཋཔེཏྭཱ པརམཏྠཔདཾ། ཏཏྠ ཡཾ པརམཏྠནྟི ཡཾ ཨུཏྟམཾ ནིབྦཱནཾ།
Imissā gāthāya niddeso uttānattho ṭhapetvā paramatthapadaṃ. Tattha yaṃ paramatthanti yaṃ uttamaṃ nibbānaṃ.
༧༤. ཨཐསྶ བྷགཝཱ ཡཐཱ ཡེན ཨུཔཱཡེན ཏཾ པདཾ དྷཱིརེཧི པཀཱསིཏཾ, ཏཾ ཨུཔཱཡཾ སཔཊིཔཀྑཾ དསྶེནྟོ ‘‘ན དིཊྛིཡཱ’’ཏི གཱཐམཱཧ། ཏཏྠ ན དིཊྛིཡཱཏིཨཱདཱིཧི དིཊྛིསུཏིཨཊྛསམཱཔཏྟིཉཱཎབཱཧིརསཱིལབྦཏཱནི པཊིཀྑིཔཏི། ‘‘སུདྡྷིམཱཧཱ’’ཏི ཨེཏྠ ཝུཏྟཾ ཨཱཧ-སདྡཾ སབྦཏྠ ནཀཱརེན སདྡྷིཾ ཡོཛེཏྭཱ པུརིམཔདཏྟཡཾ ནེཏྭཱ ‘‘དིཊྛིཡཱ སུདྡྷིཾ ནཱཧ ན ཀཐེམཱི’’ཏི ཨེཝམཏྠོ ཝེདིཏབྦོ། ཡཐཱ ཙེཏྠ, ཨེཝཾ ཨུཏྟརཔདེསུཔི། ཏཏྠ ཙ ཨདིཊྛིཡཱ ནཱཧཱཏི དསཝཏྠུཀཾ སམྨཱདིཊྛིཾ ཝིནཱ ན ཀཐེམི། ཏཐཱ ཨསྶུཏིཡཱཏི ནཝངྒཾ སཝནཾ ཝིནཱ། ཨཉཱཎཱཏི ཀམྨསྶཀཏསཙྩཱནུལོམིཀཉཱཎཾ ཝིནཱ། ཨསཱིལཏཱཏི པཱཏིམོཀྑསཾཝརཾ ཝིནཱ། ཨབྦཏཱཏི དྷུཏངྒཝཏཾ ཝིནཱ། ནོཔི ཏེནཱཏི ཏེསུ ཨེཀམེཀེན དིཊྛིཨཱདིམཏྟེནཱཔི ན ཀཐེམཱིཏི ཨེཝམཏྠོ ཝེདིཏབྦོ། ཨེཏེ ཙ ནིསྶཛྫ ཨནུགྒཧཱཡཱཏི ཨེཏེ ཙ པུརིམདིཊྛིཨཱདིབྷེདེ ཀཎྷཔཀྑིཀེ དྷམྨེ སམུགྒྷཱཏཀརཎེན ནིསྶཛྫ, པཙྪིམེ ཨདིཊྛིཨཱདིབྷེདེ སུཀྐཔཀྑིཀེཔི ཨཏམྨཡཏཱཔཛྫནེན ཨནུགྒཧཱཡ། སནྟོ ཨནིསྶཱཡ བྷཝཾ ན ཛཔྤེཏི ཨིམཱཡ པཊིཔཏྟིཡཱ རཱགཱདིཝཱུཔསམེན སནྟོ ཙཀྑཱདཱིསུ ཀཉྩི དྷམྨཾ ཨནིསྶཱཡ ཨེཀམྤི བྷཝཾ ན ཛཔྤེ, ཨཔིཧེཏུཾ ཨཔཏྠེཏུཾ སམཏྠོ སིཡཱ, ཨཡམསྶ ཨཛ྄ཛྷཏྟསནྟཱིཏི ཨདྷིཔྤཱཡོ།
74. Athassa bhagavā yathā yena upāyena taṃ padaṃ dhīrehi pakāsitaṃ, taṃ upāyaṃ sapaṭipakkhaṃ dassento ‘‘na diṭṭhiyā’’ti gāthamāha. Tattha na diṭṭhiyātiādīhi diṭṭhisutiaṭṭhasamāpattiñāṇabāhirasīlabbatāni paṭikkhipati. ‘‘Suddhimāhā’’ti ettha vuttaṃ āha-saddaṃ sabbattha nakārena saddhiṃ yojetvā purimapadattayaṃ netvā ‘‘diṭṭhiyā suddhiṃ nāha na kathemī’’ti evamattho veditabbo. Yathā cettha, evaṃ uttarapadesupi. Tattha ca adiṭṭhiyā nāhāti dasavatthukaṃ sammādiṭṭhiṃ vinā na kathemi. Tathā assutiyāti navaṅgaṃ savanaṃ vinā. Añāṇāti kammassakatasaccānulomikañāṇaṃ vinā. Asīlatāti pātimokkhasaṃvaraṃ vinā. Abbatāti dhutaṅgavataṃ vinā. Nopi tenāti tesu ekamekena diṭṭhiādimattenāpi na kathemīti evamattho veditabbo. Ete ca nissajja anuggahāyāti ete ca purimadiṭṭhiādibhede kaṇhapakkhike dhamme samugghātakaraṇena nissajja, pacchime adiṭṭhiādibhede sukkapakkhikepi atammayatāpajjanena anuggahāya. Santo anissāya bhavaṃ na jappeti imāya paṭipattiyā rāgādivūpasamena santo cakkhādīsu kañci dhammaṃ anissāya ekampi bhavaṃ na jappe, apihetuṃ apatthetuṃ samattho siyā, ayamassa ajjhattasantīti adhippāyo.
སཝནམྤི ཨིཙྪིཏབྦནྟི སུཏྟཱདིཝསེན སུཎནམྤི ཨཱཀངྑིཏབྦཾ། སམྦྷཱརཱ ཨིམེ དྷམྨཱཏི སམྨཱདིཊྛིཨཱདིཀཱ ཨིམེ དྷམྨཱ ཨུཔཀཱརཊྛེན སམྦྷཱརཱ ཧོནྟི ། ཀཎྷཔཀྑིཀཱནནྟི ཨཀུསལཔཀྑེ བྷཝཱནཾ། སམུགྒྷཱཏཏོ པཧཱནཾ ཨིཙྪིཏབྦནྟི སམྨཱ ཧནནཏོ སམུཙྪེདཏོ པཧཱནཾ ཨཱཀངྑིཏབྦཾ། ཏེདྷཱཏུཀེསུ ཀུསལེསུ དྷམྨེསཱུཏི ཀཱམརཱུཔཱརཱུཔསངྑཱཏེསུ ཏེབྷཱུམཀེསུ ཀོསལླསམྦྷཱུཏེསུ། ཨཏམྨཡཏཱཏི ནིཏྟཎྷབྷཱཝོ།
Savanampi icchitabbanti suttādivasena suṇanampi ākaṅkhitabbaṃ. Sambhārā ime dhammāti sammādiṭṭhiādikā ime dhammā upakāraṭṭhena sambhārā honti . Kaṇhapakkhikānanti akusalapakkhe bhavānaṃ. Samugghātato pahānaṃ icchitabbanti sammā hananato samucchedato pahānaṃ ākaṅkhitabbaṃ. Tedhātukesu kusalesu dhammesūti kāmarūpārūpasaṅkhātesu tebhūmakesu kosallasambhūtesu. Atammayatāti nittaṇhabhāvo.
༧༥. ཨེཝཾ ཝུཏྟེ ཝཙནཏྠཾ ཨསལླཀྑེནྟོ མཱགཎྜིཡོ ‘‘ནོ ཙེ ཀིརཱ’’ཏི གཱཐམཱཧ། ཏཏྠ དིཊྛཱདཱིནི ཝུཏྟནཡཱནེཝ། ཀཎྷཔཀྑིཀཱནིཡེཝ པན སནྡྷཱཡ ཨུབྷཡཏྲཱཔི ཨཱཧ། ཨཱཧ-སདྡཾ པན ‘‘ནོ ཙེ’’ཏི སདྡེན ཡོཛེཏྭཱ ནོ ཙེ ཀིར ཨཱཧ ནོ ཙེ ཀིར ཀཐེསཱིཏི ཨེཝཾ ཨཏྠོ དཊྛབྦོ། མོམཱུཧནྟི ཨཏིམཱུལ༹ྷཾ, མོཧནཾ ཝཱ། པཙྩེནྟཱིཏི ཛཱནནྟི། ཨིམིསྶཱཔི གཱཐཱཡ ནིདྡེསོ ཨུཏྟཱནོ།
75. Evaṃ vutte vacanatthaṃ asallakkhento māgaṇḍiyo ‘‘no ce kirā’’ti gāthamāha. Tattha diṭṭhādīni vuttanayāneva. Kaṇhapakkhikāniyeva pana sandhāya ubhayatrāpi āha. Āha-saddaṃ pana ‘‘no ce’’ti saddena yojetvā no ce kira āha no ce kira kathesīti evaṃ attho daṭṭhabbo. Momūhanti atimūḷhaṃ, mohanaṃ vā. Paccentīti jānanti. Imissāpi gāthāya niddeso uttāno.
༧༦. ཨཐསྶ བྷགཝཱ ཏཾ དིཊྛིཾ ནིསྶཱཡ པུཙྪཾ པཊིཀྑིཔནྟོ ‘‘དིཊྛིཉྩ ནིསྶཱཡཱ’’ཏི གཱཐམཱཧ། ཏསྶཏྠོ – ཏྭཾ མཱགཎྜིཡ དིཊྛིཾ ནིསྶཱཡ པུནཔྤུནཾ པུཙྪམཱནོ ཡཱནི ཏེ དིཊྛིགཏཱནི སམུགྒཧིཏཱནི, ཏེསྭེཝ སམུགྒཧཱིཏེསུ པམོཧཾ ཨཱགཏོ ཏྭཾ ཨིཏོ ཙ མཡཱ ཝུཏྟཨཛ྄ཛྷཏྟསནྟིཏོ པཊིཔཏྟིཏོ དྷམྨདེསནཏོ ཝཱ ཨཎུམྤི ཡུཏྟསཉྙཾ ན པསྶསི, ཏེན ཀཱརཎེན ཏྭཾ ཨིམཾ དྷམྨཾ མོམཱུཧཏོ པསྶསཱིཏི།
76. Athassa bhagavā taṃ diṭṭhiṃ nissāya pucchaṃ paṭikkhipanto ‘‘diṭṭhiñca nissāyā’’ti gāthamāha. Tassattho – tvaṃ māgaṇḍiya diṭṭhiṃ nissāya punappunaṃ pucchamāno yāni te diṭṭhigatāni samuggahitāni, tesveva samuggahītesu pamohaṃ āgato tvaṃ ito ca mayā vuttaajjhattasantito paṭipattito dhammadesanato vā aṇumpi yuttasaññaṃ na passasi, tena kāraṇena tvaṃ imaṃ dhammaṃ momūhato passasīti.
ལགྒནཾ ནིསྶཱཡ ལགྒནནྟི དིཊྛིལགྒནཾ ཨལླཱིཡིཏྭཱ དིཊྛིལགྒནཾ། བནྡྷནནྟི དིཊྛིབནྡྷནཾ། པལིབོདྷནྟི དིཊྛིཔལིབོདྷཾ།
Lagganaṃ nissāya laggananti diṭṭhilagganaṃ allīyitvā diṭṭhilagganaṃ. Bandhananti diṭṭhibandhanaṃ. Palibodhanti diṭṭhipalibodhaṃ.
ཨནྡྷཀཱརཾ པཀྑནྡོསཱིཏི བཧལནྡྷཀཱརཾ པཝིཊྛོསི། ཡུཏྟསཉྙནྟི སམཎདྷམྨེ ཡུཏྟསཉྙཾ། པཏྟསཉྙནྟི སམཎདྷམྨེ པཊིལདྡྷསཉྙཾ། ལགྒནསཉྙནྟི སཉྫཱནིཏསཉྙཾ། ཀཱརཎསཉྙནྟི ཧེཏུསཉྙཾ། ཋཱནསཉྙནྟི ཀཱརཎསཉྙཾ། ན པཊིལབྷསཱིཏི ན ཝིནྡསི། ཀུཏོ ཉཱཎནྟི མགྒཉཱཎཾ པན ཀེན ཀཱརཎེན ལབྷིསྶསི། ཨནིཙྩཾ ཝཱཏི ཧུཏྭཱ ཨབྷཱཝཊྛེན པཉྩཀྑནྡྷཱ ཨནིཙྩཾ། ཨནིཙྩསཉྙཱནུལོམཾ ཝཱཏི ‘‘པཉྩཀྑནྡྷཱ ཨནིཙྩཱ’’ཏི ཨུཔྤནྣཱ སཉྙཱ ཨནིཙྩསཉྙཱ, ཏཱཡ སཉྙཱཡ ཨནུལོམཾ ཨཔྤཊིཀྐཱུལཾ ཨནིཙྩསཉྙཱནུལོམཾ། ཀིཾ ཏཾ? ཝིཔསྶནཱཉཱཎཾ། དྭིནྣཾ ཝིཔསྶནཱཉཱཎཱནཾ དུཀྑཱནཏྟསཉྙཱནུལོམཱནམྤི ཨེསེཝ ནཡོ།
Andhakāraṃ pakkhandosīti bahalandhakāraṃ paviṭṭhosi. Yuttasaññanti samaṇadhamme yuttasaññaṃ. Pattasaññanti samaṇadhamme paṭiladdhasaññaṃ. Lagganasaññanti sañjānitasaññaṃ. Kāraṇasaññanti hetusaññaṃ. Ṭhānasaññanti kāraṇasaññaṃ. Na paṭilabhasīti na vindasi. Kuto ñāṇanti maggañāṇaṃ pana kena kāraṇena labhissasi. Aniccaṃ vāti hutvā abhāvaṭṭhena pañcakkhandhā aniccaṃ. Aniccasaññānulomaṃ vāti ‘‘pañcakkhandhā aniccā’’ti uppannā saññā aniccasaññā, tāya saññāya anulomaṃ appaṭikkūlaṃ aniccasaññānulomaṃ. Kiṃ taṃ? Vipassanāñāṇaṃ. Dvinnaṃ vipassanāñāṇānaṃ dukkhānattasaññānulomānampi eseva nayo.
༧༧. ཨེཝཾ སམུགྒཧིཏེསུ པམོཧེན མཱགཎྜིཡསྶ ཝིཝཱདཱཔཏྟིཾ དསྶེཏྭཱ ཨིདཱནི ཏེསུ ཨཉྙེསུ ཙ དྷམྨེསུ ཝིགཏཔྤམོཧསྶ ཨཏྟནོ ནིབྦིཝཱདཏཾ དསྶེནྟོ ‘‘སམོ ཝིསེསཱི’’ཏི གཱཐམཱཧ། ཏསྶཏྠོ – ཡོ ཨེཝཾ ཏིདྷཱ མཱནེན ཝཱ དིཊྛིཡཱ ཝཱ པུགྒལེན ཝཱ མཉྙཏི, སོ ཏེན མཱནེན ཏཱཡ ཝཱ དིཊྛིཡཱ ཏེན ཝཱ པུགྒལེན ཝིཝདེཡྻ། ཡོ པན ཨམྷཱདིསོ ཨིམཱསུ ཏཱིསུ ཝིདྷཱསུ ཨཝིཀམྤམཱནོ, སམོ ཝིསེསཱིཏི ན ཏསྶ ཧོཏི, ན ཙ ཧཱིནོཏི པཱཋསེསོ། ཨིམིསྶཱཔི གཱཐཱཡ ནིདྡེསོ ཨུཏྟཱནོཝ།
77. Evaṃ samuggahitesu pamohena māgaṇḍiyassa vivādāpattiṃ dassetvā idāni tesu aññesu ca dhammesu vigatappamohassa attano nibbivādataṃ dassento ‘‘samo visesī’’ti gāthamāha. Tassattho – yo evaṃ tidhā mānena vā diṭṭhiyā vā puggalena vā maññati, so tena mānena tāya vā diṭṭhiyā tena vā puggalena vivadeyya. Yo pana amhādiso imāsu tīsu vidhāsu avikampamāno, samo visesīti na tassa hoti, na ca hīnoti pāṭhaseso. Imissāpi gāthāya niddeso uttānova.
༧༨. ཀིཉྩ བྷིཡྻོ – ‘‘སཙྩནྟི སོ’’ཏི གཱཐཱ། ཏསྶཏྠོ – སོ ཨེཝརཱུཔོ པཧཱིནམཱནདིཊྛིཀོ ‘‘མཱདིསོ ‘བཱཧིཏཔཱཔཏྟཱ’དིནཱ ནཡེན བྲཱཧྨཎོ, ཨིདམེཝ སཙྩ’’ནྟི ཀིཾ ཝདེཡྻ ཀིཾ ཝཏྠུཾ བྷཎེཡྻ, ཀེན ཝཱ ཀཱརཎེན བྷཎེཡྻ, ‘‘མཡ྄ཧཾ སཙྩཾ, ཏུཡ྄ཧཾ མུསཱ’’ཏི ཝཱ ཀེན མཱནེན དིཊྛིཡཱ པུགྒལེན ཝཱ ཝིཝདེཡྻ། ཡསྨིཾ མཱདིསེ ཁཱིཎཱསཝེ ‘‘སདིསོཧམསྨཱི’’ཏི པཝཏྟིཡཱ སམཾ ཝཱ, ཨིཏརདྭཡབྷཱཝེན པཝཏྟིཡཱ ཝིསམཾ ཝཱ མཉྙིཏཾ ནཏྠི, སམཱནཱདཱིསུ ཀེན ཝཱདཾ པཊིསཾཡུཛེཡྻ པཊིཔྥརེཡྻཱཏི། ཨིམིསྶཱཔི གཱཐཱཡ ནིདྡེསོ ཨུཏྟཱནོ།
78. Kiñca bhiyyo – ‘‘saccanti so’’ti gāthā. Tassattho – so evarūpo pahīnamānadiṭṭhiko ‘‘mādiso ‘bāhitapāpattā’dinā nayena brāhmaṇo, idameva sacca’’nti kiṃ vadeyya kiṃ vatthuṃ bhaṇeyya, kena vā kāraṇena bhaṇeyya, ‘‘mayhaṃ saccaṃ, tuyhaṃ musā’’ti vā kena mānena diṭṭhiyā puggalena vā vivadeyya. Yasmiṃ mādise khīṇāsave ‘‘sadisohamasmī’’ti pavattiyā samaṃ vā, itaradvayabhāvena pavattiyā visamaṃ vā maññitaṃ natthi, samānādīsu kena vādaṃ paṭisaṃyujeyya paṭipphareyyāti. Imissāpi gāthāya niddeso uttāno.
༧༩. ནནུ ཨེཀཾསེནེཝ ཨེཝརཱུཔོ པུགྒལོ? ‘‘ཨོཀཾ པཧཱཡཱ’’ཏི གཱཐཱ། ཏཏྠ ཨོཀཾ པཧཱཡཱཏི རཱུཔདྷཱཏྭཱདིཝིཉྙཱཎསྶོཀཱསཾ ཏཏྲ ཚནྡརཱགཔྤཧཱནེན ཚཌྜེཏྭཱ། ཨནིཀེཏསཱརཱིཏི རཱུཔནིམིཏྟནིཀེཏཱདཱིནི ཏཎྷཱཝསེན ཨསརནྟོ། གཱམེ ཨཀུབྦཾ མུནི སནྠཝཱནཱིཏི གཱམེ གིཧིསནྠཝཱནི ཨཀརོནྟོ། ཀཱམེཧི རིཏྟོཏི ཀཱམེསུ ཚནྡརཱགཱབྷཱཝེན སབྦཀཱམེཧི པུཐུབྷཱུཏོ། ཨཔུརཀྑརཱནོཏི ཨཱཡཏིཾ ཨཏྟབྷཱཝཾ ཨནབྷིནིབྦཏྟེནྟོ། ཀཐཾ ན ཝིགྒཡ྄ཧ ཛནེན ཀཡིརཱཏི ཛནེན སདྡྷིཾ ཝིགྒཱཧིཀཀཐཾ ན ཀཐེཡྻ།
79. Nanu ekaṃseneva evarūpo puggalo? ‘‘Okaṃ pahāyā’’ti gāthā. Tattha okaṃ pahāyāti rūpadhātvādiviññāṇassokāsaṃ tatra chandarāgappahānena chaḍḍetvā. Aniketasārīti rūpanimittaniketādīni taṇhāvasena asaranto. Gāme akubbaṃ muni santhavānīti gāme gihisanthavāni akaronto. Kāmehi rittoti kāmesu chandarāgābhāvena sabbakāmehi puthubhūto. Apurakkharānoti āyatiṃ attabhāvaṃ anabhinibbattento. Kathaṃ na viggayha janena kayirāti janena saddhiṃ viggāhikakathaṃ na katheyya.
ཧཱལིདྡཀཱནཱིཏི ཨེཝཾནཱམཀོ གཧཔཏི། ཡེནཱཡསྨཱ མཧཱཀཙྩཱནོ ཏེནུཔསངྐམཱིཏི ཡེནཱཏི བྷུམྨཏྠེ ཀརཎཝཙནཾ། ཏསྨཱ ཡཏྠ མཧཱཀཙྩཱནོ, ཏཏྠ ཨུཔསངྐམཱིཏི ཨེཝམེཏྠ ཨཏྠོ དཊྛབྦོ། ཡེན ཝཱ ཀཱརཎེན མཧཱཀཙྩཱནོ དེཝམནུསྶེཧི ཨུཔསངྐམིཏབྦོ, ཏེན ཀཱརཎེན ཨུཔསངྐམཱིཏི ཨེཝམེཏྠ ཨཏྠོ དཊྛབྦོ། ཀེན ཙ ཀཱརཎེན མཧཱཀཙྩཱནོ ཨུཔསངྐམིཏབྦོ? ནཱནཔྤཀཱརགུཎཝིསེསཱདྷིགམཱདྷིཔྤཱཡེན, སཱདུཕལཱུཔབྷོགཱདྷིཔྤཱཡེན དིཛགཎེཧི ནིཙྩཕལིཏམཧཱརུཀྑོ ཝིཡ། ཨུཔསངྐམཱིཏི ཙ གཏོཏི ཝུཏྟཾ ཧོཏི། ཨུཔསངྐམིཏྭཱཏི ཨུཔསངྐམནཔརིཡོསཱནདཱིཔནཾ། ཨཐ ཝཱ ཨེཝཾ གཏོ ཏཏོ ཨཱསནྣཏརཾ ཋཱནཾ མཧཱཀཙྩཱནསྶ སམཱིཔསངྑཱཏཾ གནྟྭཱཏིཔི ཝུཏྟཾ ཧོཏི།
Hāliddakānīti evaṃnāmako gahapati. Yenāyasmā mahākaccāno tenupasaṅkamīti yenāti bhummatthe karaṇavacanaṃ. Tasmā yattha mahākaccāno, tattha upasaṅkamīti evamettha attho daṭṭhabbo. Yena vā kāraṇena mahākaccāno devamanussehi upasaṅkamitabbo, tena kāraṇena upasaṅkamīti evamettha attho daṭṭhabbo. Kena ca kāraṇena mahākaccāno upasaṅkamitabbo? Nānappakāraguṇavisesādhigamādhippāyena, sāduphalūpabhogādhippāyena dijagaṇehi niccaphalitamahārukkho viya. Upasaṅkamīti ca gatoti vuttaṃ hoti. Upasaṅkamitvāti upasaṅkamanapariyosānadīpanaṃ. Atha vā evaṃ gato tato āsannataraṃ ṭhānaṃ mahākaccānassa samīpasaṅkhātaṃ gantvātipi vuttaṃ hoti.
ཨབྷིཝཱདེཏྭཱཏི པཉྩཔཏིཊྛིཏེན ཝནྡིཏྭཱ། ཨིདཱནི ཡེནཏྠེན མཧཱཀཙྩཱནསྶ ཨུཔཊྛཱནཾ ཨཱགཏོ, ཏཾ པུཙྪིཏུཀཱམོ དསནཁསམོདྷཱནསམུཛྫལཾ ཨཉྫལིཾ སིརསི པཏིཊྛཱཔེཏྭཱ ཨེཀམནྟཾ ནིསཱིདི། ཨེཀམནྟནྟི བྷཱཝནཔུཾསཀནིདྡེསོ ‘‘ཝིསམཾ ཙནྡིམསཱུརིཡཱ པརིཝཏྟནྟཱི’’ཏིཨཱདཱིསུ (ཨ॰ ནི॰ ༤.༧) ཝིཡ། ཏསྨཱ ཡཐཱ ནིསིནྣོ ཨེཀམནྟཾ ནིསིནྣོ ཧོཏི, ཨེཝཾ ནིསཱིདཱིཏི ཨེཝམེཏྠ ཨཏྠོ དཊྛབྦོ། བྷུམྨཏྠེ ཝཱ ཨེཏཾ ཨུཔཡོགཝཙནཾ། ནིསཱིདཱིཏི ནིསཛྫཾ ཀཔྤེསི། པཎྜིཏཱ ཧི དེཝམནུསྶཱ གརུཊྛཱནིཡཾ ཨུཔསངྐམིཏྭཱ ཨཱསནཀུསལཏཱཡ ཨེཀམནྟཾ ནིསཱིདནྟི། ཨཡཉྩ གཧཔཏི ཏེསཾ ཨཉྙཏརོ, ཏསྨཱ ཨེཀམནྟཾ ནིསཱིདི།
Abhivādetvāti pañcapatiṭṭhitena vanditvā. Idāni yenatthena mahākaccānassa upaṭṭhānaṃ āgato, taṃ pucchitukāmo dasanakhasamodhānasamujjalaṃ añjaliṃ sirasi patiṭṭhāpetvā ekamantaṃ nisīdi. Ekamantanti bhāvanapuṃsakaniddeso ‘‘visamaṃ candimasūriyā parivattantī’’tiādīsu (a. ni. 4.7) viya. Tasmā yathā nisinno ekamantaṃ nisinno hoti, evaṃ nisīdīti evamettha attho daṭṭhabbo. Bhummatthe vā etaṃ upayogavacanaṃ. Nisīdīti nisajjaṃ kappesi. Paṇḍitā hi devamanussā garuṭṭhāniyaṃ upasaṅkamitvā āsanakusalatāya ekamantaṃ nisīdanti. Ayañca gahapati tesaṃ aññataro, tasmā ekamantaṃ nisīdi.
ཀཐཾ ནིསིནྣོ ཙ པན ཨེཀམནྟཾ ནིསིནྣོ ཧོཏཱིཏི? ཚ ནིསཛྫདོསེ ཝཛྫེཏྭཱ། སེཡྻཐིདཾ? ཨཏིདཱུརཾ ཨཙྩཱསནྣཾ ཨུཔརིཝཱཏཾ ཨུནྣཏཔྤདེསཾ ཨཏིསམྨུཁཾ ཨཏིཔཙྪཱཏི། ཨཏིདཱུརེ ནིསིནྣོ ཧི སཙེ ཀཐེཏུཀཱམོ ཧོཏི, ཨུཙྩཱསདྡེན ཀཐེཏབྦཾ ཧོཏི། ཨཙྩཱསནྣེ ནིསིནྣོ སངྒྷཊྚནཾ ཀརོཏི། ཨུཔརིཝཱཏེ ནིསིནྣོ སརཱིརགནྡྷེན བཱདྷཏི། ཨུནྣཏཔྤདེསེ ནིསིནྣོ ཨགཱརཝཾ པཀཱསེཏི། ཨཏིསམྨུཁཱ ནིསིནྣོ སཙེ དཊྛུཀཱམོ ཧོཏི, ཙཀྑུནཱ ཙཀྑུཾ ཨཱཧཙྩ དཊྛབྦཾ ཧོཏི། ཨཏིཔཙྪཱ ནིསིནྣོ སཙེ དཊྛུཀཱམོ ཧོཏི, གཱིཝཾ པསཱརེཏྭཱ དཊྛབྦཾ ཧོཏི། ཏསྨཱ ཨཡམྤི ཨེཏེ ཚ ནིསཛྫདོསེ ཝཛྫེཏྭཱ ནིསཱིདི། ཏེན ཝུཏྟཾ – ‘‘ཨེཀམནྟཾ ནིསཱིདཱི’’ཏི།
Kathaṃ nisinno ca pana ekamantaṃ nisinno hotīti? Cha nisajjadose vajjetvā. Seyyathidaṃ? Atidūraṃ accāsannaṃ uparivātaṃ unnatappadesaṃ atisammukhaṃ atipacchāti. Atidūre nisinno hi sace kathetukāmo hoti, uccāsaddena kathetabbaṃ hoti. Accāsanne nisinno saṅghaṭṭanaṃ karoti. Uparivāte nisinno sarīragandhena bādhati. Unnatappadese nisinno agāravaṃ pakāseti. Atisammukhā nisinno sace daṭṭhukāmo hoti, cakkhunā cakkhuṃ āhacca daṭṭhabbaṃ hoti. Atipacchā nisinno sace daṭṭhukāmo hoti, gīvaṃ pasāretvā daṭṭhabbaṃ hoti. Tasmā ayampi ete cha nisajjadose vajjetvā nisīdi. Tena vuttaṃ – ‘‘ekamantaṃ nisīdī’’ti.
ཨེཏདཝོཙཱཏི ཨེཏཾ ཨཝོཙ། ཝུཏྟམིདཾ བྷནྟེ ཀཙྩཱན བྷགཝཏཱ ཨཊྛཀཝགྒིཡེ མཱགཎྜིཡཔཉྷེཏི ཨཊྛཀཝགྒིཡམྷི མཱགཎྜིཡཔཉྷོ ནཱམ ཨཏྠི, ཏསྨིཾ པཉྷེ།
Etadavocāti etaṃ avoca. Vuttamidaṃ bhante kaccāna bhagavatā aṭṭhakavaggiye māgaṇḍiyapañheti aṭṭhakavaggiyamhi māgaṇḍiyapañho nāma atthi, tasmiṃ pañhe.
རཱུཔདྷཱཏཱུཏི རཱུཔཀྑནྡྷོ ཨདྷིཔྤེཏོ། རཱུཔདྷཱཏུརཱགཝིནིབནྡྷནྟི རཱུཔདྷཱཏུམྷི རཱགེན ཝིནིབདྡྷཾ། ཝིཉྙཱཎནྟི ཀམྨཝིཉྙཱཎཾ། ཨོཀསཱརཱིཏི གེཧསཱརཱི ཨཱལཡསཱརཱི། ཀསྨཱ པནེཏྠ ‘‘ཝིཉྙཱཎདྷཱཏུ ཁོ གཧཔཏཱི’’ཏི ན ཝུཏྟནྟི? སམྨོཧཝིགྷཱཏཏྠཾ། ‘‘ཨོཀོ’’ཏི ཧི ཨཏྠཏོ པཙྩཡོ ཝུཙྩཏི, པུརེཛཱཏཉྩ ཀམྨཝིཉྙཱཎཾ པཙྪཱཛཱཏསྶ ཀམྨཝིཉྙཱཎསྶཔི ཝིཔཱཀཝིཉྙཱཎསྶཔི, ཝིཔཱཀཝིཉྙཱཎཉྩ ཝིཔཱཀཝིཉྙཱཎསྶཔི ཀམྨཝིཉྙཱཎསྶཔི པཙྩཡོ ཧོཏི, ཏསྨཱ ‘‘ཀཏརཾ ནུ ཁོ ཨིདྷ ཝིཉྙཱཎ’’ནྟི སམྨོཧོ བྷཝེཡྻ། ཏསྶ ཝིགྷཱཏཏྠཾ ཏཾ ཨགྒཧེཏྭཱ ཨསམྦྷིནྣཱཝ དེསནཱ ཀཏཱཏི། ཨཔིཙ ཝིཔཱཀཨཱརམྨཎཝསེན ཙཏསྶོ ཨབྷིསངྑཱརཝིཉྙཱཎཊྛིཏིཡོཏི ཝུཏྟཱཏི ཏཱ དསྶེཏུམྤི ཨིདྷ ཝིཉྙཱཎཾ ན གཧིཏཾ།
Rūpadhātūti rūpakkhandho adhippeto. Rūpadhāturāgavinibandhanti rūpadhātumhi rāgena vinibaddhaṃ. Viññāṇanti kammaviññāṇaṃ. Okasārīti gehasārī ālayasārī. Kasmā panettha ‘‘viññāṇadhātu kho gahapatī’’ti na vuttanti? Sammohavighātatthaṃ. ‘‘Oko’’ti hi atthato paccayo vuccati, purejātañca kammaviññāṇaṃ pacchājātassa kammaviññāṇassapi vipākaviññāṇassapi, vipākaviññāṇañca vipākaviññāṇassapi kammaviññāṇassapi paccayo hoti, tasmā ‘‘kataraṃ nu kho idha viññāṇa’’nti sammoho bhaveyya. Tassa vighātatthaṃ taṃ aggahetvā asambhinnāva desanā katāti. Apica vipākaārammaṇavasena catasso abhisaṅkhāraviññāṇaṭṭhitiyoti vuttāti tā dassetumpi idha viññāṇaṃ na gahitaṃ.
ཨུཔཡུཔཱདཱནཱཏི ཏཎྷཱུཔཡདིཊྛཱུཔཡཝསེན དྭེ ཨུཔཡཱ, ཀཱམུཔཱདཱནཱདཱིནི ཙཏྟཱརི ཨུཔཱདཱནཱནི ཙ། ཙེཏསོ ཨདྷིཊྛཱནཱབྷིནིཝེསཱནུསཡཱཏི ཨཀུསལཙིཏྟསྶ ཨདྷིཊྛཱནབྷཱུཏཱ ཙེཝ ཨབྷིནིཝེསབྷཱུཏཱ ཙ ཨནུསཡབྷཱུཏཱ ཙ། ཏཐཱགཏསྶཱཏི སམྨཱསམྦུདྡྷསྶ། སབྦེསམྤི ཧི ཁཱིཎཱསཝཱནཾ ཨེཏེ པཧཱིནཱཝ, སཏྠུ པན ཁཱིཎཱསཝབྷཱཝོ ལོཀེ ཨཏིཔཱཀཊོཏི ཨུཔརིམཀོཊིཡཱ ཨེཝཾ ཝུཏྟཾ། ཝིཉྙཱཎདྷཱཏུཡཱཏི ཨིདྷ ཝིཉྙཱཎཾ ཀསྨཱ གཧིཏཾ? ཀིལེསཔྤཧཱནདསྶནཏྠཾ། ཀིལེསཱ ཧི ན ཀེཝལཾ ཙཏཱུསུཡེཝ ཁནྡྷེསུ པཧཱིནཱ པཧཱིཡནྟི, པཉྩསུཔི པཧཱིཡནྟིཡེཝཱཏི ཀིལེསཔྤཧཱནདསྶནཏྠཾ གཧིཏཾ། ཨེཝཾ ཁོ གཧཔཏི ཨནོཀསཱརཱི ཧོཏཱིཏི ཨེཝཾ ཀམྨཝིཉྙཱཎེན ཨོཀཾ ཨསརནྟེན ཨནོཀསཱརཱི ནཱམ ཧོཏི།
Upayupādānāti taṇhūpayadiṭṭhūpayavasena dve upayā, kāmupādānādīni cattāri upādānāni ca. Cetaso adhiṭṭhānābhinivesānusayāti akusalacittassa adhiṭṭhānabhūtā ceva abhinivesabhūtā ca anusayabhūtā ca. Tathāgatassāti sammāsambuddhassa. Sabbesampi hi khīṇāsavānaṃ ete pahīnāva, satthu pana khīṇāsavabhāvo loke atipākaṭoti uparimakoṭiyā evaṃ vuttaṃ. Viññāṇadhātuyāti idha viññāṇaṃ kasmā gahitaṃ? Kilesappahānadassanatthaṃ. Kilesā hi na kevalaṃ catūsuyeva khandhesu pahīnā pahīyanti, pañcasupi pahīyantiyevāti kilesappahānadassanatthaṃ gahitaṃ. Evaṃ kho gahapati anokasārī hotīti evaṃ kammaviññāṇena okaṃ asarantena anokasārī nāma hoti.
རཱུཔནིམིཏྟནིཀེཏཝིསཱརཝིནིབནྡྷཱཏི རཱུཔམེཝ ཀིལེསཱནཾ པཙྩཡཊྛེན ནིམིཏྟཾ, ཨཱརམྨཎཀིརིཡསངྑཱཏེན ནིཝཱསཊྛེན ནིཀེཏནྟི རཱུཔནིམིཏྟནིཀེཏཾ། ཝིསཱརོ ཙ ཝིནིབནྡྷོ ཙ ཝིསཱརཝིནིབནྡྷཱ། ཨུབྷཡེནཔི ཧི ཀིལེསཱནཾ པཏྠཊབྷཱཝོ ཙ ཝིནིབནྡྷནབྷཱཝོ ཙ ཝུཏྟོ, རཱུཔནིམིཏྟནིཀེཏེ ཝིསཱརཝིནིབནྡྷཱཏི རཱུཔནིམིཏྟནིཀེཏཝིསཱརཝིནིབནྡྷཱ, ཏསྨཱ རཱུཔནིམིཏྟནིཀེཏམྷི ཨུཔྤནྣེན ཀིལེསཝིསཱརེན ཙེཝ ཀིལེསཝིནིབནྡྷནེན ཙཱཏི ཨཏྠོ། ནིཀེཏསཱརཱིཏི ཝུཙྩཏཱིཏི ཨཱརམྨཎཀརཎཝསེན ནིཝཱསཊྛཱནཊྛེན ནིཀེཏསཱརཱིཏི ཝུཙྩཏི། པཧཱིནཱཏི ཏེ རཱུཔནིམིཏྟནིཀེཏེ ཀིལེསཝིསཱརཝིནིབནྡྷཱ པཧཱིནཱ།
Rūpanimittaniketavisāravinibandhāti rūpameva kilesānaṃ paccayaṭṭhena nimittaṃ, ārammaṇakiriyasaṅkhātena nivāsaṭṭhena niketanti rūpanimittaniketaṃ. Visāro ca vinibandho ca visāravinibandhā. Ubhayenapi hi kilesānaṃ patthaṭabhāvo ca vinibandhanabhāvo ca vutto, rūpanimittanikete visāravinibandhāti rūpanimittaniketavisāravinibandhā, tasmā rūpanimittaniketamhi uppannena kilesavisārena ceva kilesavinibandhanena cāti attho. Niketasārīti vuccatīti ārammaṇakaraṇavasena nivāsaṭṭhānaṭṭhena niketasārīti vuccati. Pahīnāti te rūpanimittanikete kilesavisāravinibandhā pahīnā.
ཀསྨཱ པནེཏྠ པཉྩཀྑནྡྷཱ ཙ ‘‘ཨོཀཱ’’ཏི ཝུཏྟཱ, ཚ ཨཱརམྨཎཱནི ‘‘ནིཀེཏ’’ནྟི? ཚནྡརཱགསྶ བལཝདུབྦལཏཱཡ། སམཱནེཔི ཧི ཨེཏེསཾ ཨཱལཡཊྛེན ཝིསཡབྷཱཝེ ཨོཀོཏི ནིཔྤརིཡཱཡེན སུདྡྷཾ གེཧམེཝ ཝུཙྩཏི, ནིཀེཏནྟི ‘‘ཨཛྫ ཨསུཀཊྛཱནེ ཀཱིལི༹སྶཱམཱ’’ཏི ཀཏསངྐེཏཱནཾ ནིཝཱསནཊྛཱནཾ ཨུཡྻཱནཱདི། ཏཏྠ ཡཐཱ པུཏྟདཱརདྷནདྷཉྙཔུཎྞགེཧེ ཚནྡརཱགོ བལཝཱ ཧོཏི, ཨེཝཾ ཨཛ྄ཛྷཏྟིཀེསུ ཁནྡྷེསུ། ཡཐཱ པན ཨུཡྻཱནཊྛཱནཱདཱིསུ ཏཏོ དུབྦལཏརོ ཧོཏི, ཨེཝཾ བཱཧིརེསུ ཚསུ ཨཱརམྨཎེསཱུཏི ཚནྡརཱགསྶ བལཝདུབྦལཏཱཡ ཨེཝཾ དེསནཱ ཀཏཱཏི ཝེདིཏབྦཱ།
Kasmā panettha pañcakkhandhā ca ‘‘okā’’ti vuttā, cha ārammaṇāni ‘‘niketa’’nti? Chandarāgassa balavadubbalatāya. Samānepi hi etesaṃ ālayaṭṭhena visayabhāve okoti nippariyāyena suddhaṃ gehameva vuccati, niketanti ‘‘ajja asukaṭṭhāne kīḷissāmā’’ti katasaṅketānaṃ nivāsanaṭṭhānaṃ uyyānādi. Tattha yathā puttadāradhanadhaññapuṇṇagehe chandarāgo balavā hoti, evaṃ ajjhattikesu khandhesu. Yathā pana uyyānaṭṭhānādīsu tato dubbalataro hoti, evaṃ bāhiresu chasu ārammaṇesūti chandarāgassa balavadubbalatāya evaṃ desanā katāti veditabbā.
སུཁིཏེསུ སུཁིཏོཏི ཨུཔཊྛཱཀེསུ དྷནདྷཉྙལཱབྷཱདིཝསེན སུཁིཏེསུ ‘‘ཨིདཱནཱཧཾ མནཱཔཾ ཙཱིཝརཾ མནཱཔཾ བྷོཛནཾ ལབྷིསྶཱམཱི’’ཏི གེཧསྶིཏསུཁེན སུཁིཏོ ཧོཏི, ཏེཧི པཏྟསམྤཏྟིཾ ཨཏྟནཱ ཨནུབྷཝམཱནོ ཝིཡ ཙརཏི། དུཀྑིཏེསུ དུཀྑིཏོཏི ཏེསཾ ཀེནཙིདེཝ ཀཱརཎེན དུཀྑེ ཨུཔྤནྣེ སཡཾ དྭིགུཎེན དུཀྑེན དུཀྑིཏོ ཧོཏི། ཀིཙྩཀརཎཱིཡེསཱུཏི ཀིཙྩསངྑཱཏེསུ ཀརཎཱིཡེསུ། ཝོཡོགཾ ཨཱཔཛྫཏཱིཏི ཨུཔཡོགཾ སཡཾ ཏེསཾ ཀིཙྩཱནཾ ཀཏྟབྦཏཾ ཨཱཔཛྫཏི།
Sukhitesu sukhitoti upaṭṭhākesu dhanadhaññalābhādivasena sukhitesu ‘‘idānāhaṃ manāpaṃ cīvaraṃ manāpaṃ bhojanaṃ labhissāmī’’ti gehassitasukhena sukhito hoti, tehi pattasampattiṃ attanā anubhavamāno viya carati. Dukkhitesu dukkhitoti tesaṃ kenacideva kāraṇena dukkhe uppanne sayaṃ dviguṇena dukkhena dukkhito hoti. Kiccakaraṇīyesūti kiccasaṅkhātesu karaṇīyesu. Voyogaṃ āpajjatīti upayogaṃ sayaṃ tesaṃ kiccānaṃ kattabbataṃ āpajjati.
ཀཱམེསཱུཏི ཝཏྠུཀཱམེསུ། ཨེཝཾ ཁོ གཧཔཏི ཀཱམེཧི ཨརིཏྟོ ཧོཏཱིཏི ཨེཝཾ ཀིལེསཀཱམེཧི ཨརིཏྟོ ཧོཏི།
Kāmesūti vatthukāmesu. Evaṃ kho gahapati kāmehi aritto hotīti evaṃ kilesakāmehi aritto hoti.
ཨནྟོ ཀཱམཱནཾ བྷཱཝེན ཨཏུཙྪོ། སུཀྐཔཀྑོ ཏེསཾ ཨབྷཱཝེན རིཏྟོ ཏུཙྪོཏི ཝེདིཏབྦོ།
Anto kāmānaṃ bhāvena atuccho. Sukkapakkho tesaṃ abhāvena ritto tucchoti veditabbo.
པུརཀྑརཱནོཏི ཝཊྚཾ པུརཏོ ཀུརུམཱནོ། ཨེཝཾརཱུཔོ སིཡནྟིཨཱདཱིསུ དཱིགྷརསྶཀཱལོ༹དཱཏཱདཱིསུ རཱུཔེསུ ཨེཝཾརཱུཔོ ནཱམ བྷཝེཡྻནྟི པཏྠེཏི། སུཁཱདཱིསུ ཝེདནཱསུ ཨེཝཾཝེདནོ ནཱམ། ནཱིལསཉྙཱདཱིསུ སཉྙཱསུ ཨེཝཾསཉྙོ ནཱམ། པུཉྙཱབྷིསངྑཱརཱདཱིསུ སངྑཱརེསུ ཨེཝཾསངྑཱརོ ནཱམ། ཙཀྑུཝིཉྙཱཎཱདཱིསུ ཝིཉྙཱཎེསུ ཨེཝཾཝིཉྙཱཎོ ནཱམ བྷཝེཡྻནྟི པཏྠེཏི།
Purakkharānoti vaṭṭaṃ purato kurumāno. Evaṃrūpo siyantiādīsu dīgharassakāḷodātādīsu rūpesu evaṃrūpo nāma bhaveyyanti pattheti. Sukhādīsu vedanāsu evaṃvedano nāma. Nīlasaññādīsu saññāsu evaṃsañño nāma. Puññābhisaṅkhārādīsu saṅkhāresu evaṃsaṅkhāro nāma. Cakkhuviññāṇādīsu viññāṇesu evaṃviññāṇo nāma bhaveyyanti pattheti.
ཨཔུརཀྑརཱནོཏི ཝཊྚཾ པུརཏོ ཨཀུརུམཱནོ། སཧིཏཾ མེ, ཨསཧིཏཾ ཏེཏི ཏུཡ྄ཧཾ ཝཙནཾ ཨསཧིཏཾ ཨསིལིཊྛཾ, མཡ྄ཧཾ སཧིཏཾ སིལིཊྛཾ མདྷུརཾ མདྷུརཔཱནསདིསཾ། ཨདྷིཙིཎྞཾ ཏེ ཝིཔརཱཝཏྟནྟི ཡཾ ཏུཡ྄ཧཾ དཱིགྷེན ཀཱལེན པརིཙིཏཾ སུཔྤགུཎཾ, ཏཾ མམ ཝཱདཾ ཨཱགམྨ སབྦཾ ཁཎེན ཝིཔརཱཝཏྟཾ ནིཝཏྟཾ། ཨཱརོཔིཏོ ཏེ ཝཱདོཏི ཏུཡ྄ཧཾ དོསོ མཡཱ ཨཱརོཔིཏོ། ཙར ཝཱདཔྤམོཀྑཱཡཱཏི ཏཾ ཏཾ ཨཱཙརིཡཾ ཨུཔསངྐམིཏྭཱ ཨུཏྟརཾ པརིཡེསནྟོ ཨིམསྶ ཝཱདསྶ མོཀྑཱཡ ཙར ཨཱཧིཎྜ། ནིབྦེཋེཧི ཝཱ སཙེ པཧོསཱིཏི ཨཐ སཡམེཝ པཧོསི, ཨིདྷེཝ ནིབྦེཋེཧཱིཏི།
Apurakkharānoti vaṭṭaṃ purato akurumāno. Sahitaṃ me, asahitaṃ teti tuyhaṃ vacanaṃ asahitaṃ asiliṭṭhaṃ, mayhaṃ sahitaṃ siliṭṭhaṃ madhuraṃ madhurapānasadisaṃ. Adhiciṇṇaṃ te viparāvattanti yaṃ tuyhaṃ dīghena kālena paricitaṃ suppaguṇaṃ, taṃ mama vādaṃ āgamma sabbaṃ khaṇena viparāvattaṃ nivattaṃ. Āropito te vādoti tuyhaṃ doso mayā āropito. Cara vādappamokkhāyāti taṃ taṃ ācariyaṃ upasaṅkamitvā uttaraṃ pariyesanto imassa vādassa mokkhāya cara āhiṇḍa. Nibbeṭhehi vā sace pahosīti atha sayameva pahosi, idheva nibbeṭhehīti.
༨༠. སོ ཨེཝརཱུཔོ ‘‘ཡེཧི ཝིཝིཏྟོ’’ཏི གཱཐཱ། ཏཏྠ ཡེཧཱིཏི ཡེཧི དིཊྛིགཏཱདཱིཧི། ཝིཝིཏྟོ ཝིཙརེཡྻཱཏི རིཏྟོ ཙརེཡྻ། ན ཏཱནི ཨུགྒཡ྄ཧ ཝདེཡྻ ནཱགོཏི ‘‘ཨཱགུཾ ན ཀརོཏཱི’’ཏིཨཱདིནཱ (ཙཱུལ༹ནི॰ བྷདྲཱཝུདྷམཱཎཝཔུཙྪཱནིདྡེས ༧༠; པཱརཱཡནཱནུགཱིཏིནིདྡེས ༡༠༢) ནཡེན ནཱགོ ཏཱནི དིཊྛིགཏཱནི ཨུགྒཧེཏྭཱ ན ཙརེཡྻ། ཨེལམྦུཛནྟི ཨེལསཉྙིཏེ ཨམྦུམྷི ཛཱཏཾ ཀཎྚཀནཱལ༹ཾ ཝཱརིཛཾ, པདུམནྟི ཝུཏྟཾ ཧོཏི། ཡཐཱ ཛལེན པངྐེན ཙནཱུཔལིཏྟནྟི ཏཾ པདུམཾ ཡཐཱ ཛལེན ཙ པངྐེན ཙ ཨནུཔལིཏྟཾ ཧོཏི། ཨེཝཾ མུནི སནྟིཝཱདོ ཨགིདྡྷོཏི ཨེཝཾ ཨཛ྄ཛྷཏྟསནྟིཝཱདོ མུནི གེདྷཱབྷཱཝེན ཨགིདྡྷོ། ཀཱམེ ཙ ལོཀེ ཙ ཨནཱུཔལིཏྟོཏི དུཝིདྷེཔི ཀཱམེ ཨཔཱཡཱདིཀེ ཙ ལོཀེ དྭཱིཧི སིལེསེཧི ཨནུཔལིཏྟོ ཧོཏི།
80. So evarūpo ‘‘yehi vivitto’’ti gāthā. Tattha yehīti yehi diṭṭhigatādīhi. Vivitto vicareyyāti ritto careyya. Na tāniuggayha vadeyya nāgoti ‘‘āguṃ na karotī’’tiādinā (cūḷani. bhadrāvudhamāṇavapucchāniddesa 70; pārāyanānugītiniddesa 102) nayena nāgo tāni diṭṭhigatāni uggahetvā na careyya. Elambujanti elasaññite ambumhi jātaṃ kaṇṭakanāḷaṃ vārijaṃ, padumanti vuttaṃ hoti. Yathā jalena paṅkena canūpalittanti taṃ padumaṃ yathā jalena ca paṅkena ca anupalittaṃ hoti. Evaṃ muni santivādo agiddhoti evaṃ ajjhattasantivādo muni gedhābhāvena agiddho. Kāme ca loke ca anūpalittoti duvidhepi kāme apāyādike ca loke dvīhi silesehi anupalitto hoti.
ཨཱགུཾ ན ཀརོཏཱིཏི ཨཀུསལཱདིདོསཾ ན ཀརོཏི། ན གཙྪཏཱིཏི ཨགཏིཝསེན ན གཙྪཏི། ནཱགཙྪཏཱིཏི པཧཱིནཀིལེསེ ན ཨུཔེཏི། པཱཔཀཱཏི ལཱམཀཱ། ཨཀུསལཱཏི ཨཀོསལླསམྦྷཱུཏཱ། ཏེ ཀིལེསེ ན པུནེཏཱིཏི ཡེ ཀིལེསཱ པཧཱིནཱ, ཏེ ཀིལེསེ པུན ན ཨེཏི། ན པཙྩེཏཱིཏི པཊི ན ཨུཔེཏི། ན པཙྩཱགཙྪཏཱིཏི པུན ན ནིཝཏྟཏི།
Āguṃ na karotīti akusalādidosaṃ na karoti. Na gacchatīti agativasena na gacchati. Nāgacchatīti pahīnakilese na upeti. Pāpakāti lāmakā. Akusalāti akosallasambhūtā. Te kilese na punetīti ye kilesā pahīnā, te kilese puna na eti. Na paccetīti paṭi na upeti. Na paccāgacchatīti puna na nivattati.
ཁརདཎྜོཏི ཁརཔཏྟདཎྜོ ཕརུསདཎྜོ། ཙཏྟགེདྷོཏི ཝིསྶཊྛགེདྷོ། ཝནྟགེདྷོཏི ཝམིཏགེདྷོ། མུཏྟགེདྷོཏི ཚིནྣབནྡྷནགེདྷོ། པཧཱིནགེདྷོཏི པཛཧིཏགེདྷོ། པཊིནིསྶཊྛགེདྷོཏི ཡཐཱ ན པུན ཙིཏྟཾ ཨཱརུཧཏི, ཨེཝཾ པཊིཝིསྶཛྫིཏགེདྷོ། ཨུཔརི ཝཱིཏརཱགཱདཱིསུཔི ཨེསེཝ ནཡོ། སབྦཱནེཝ ཏཱནི གཧིཏགྒཧཎསྶ ཝིསྶཊྛབྷཱཝཝེཝཙནཱནི།
Kharadaṇḍoti kharapattadaṇḍo pharusadaṇḍo. Cattagedhoti vissaṭṭhagedho. Vantagedhoti vamitagedho. Muttagedhoti chinnabandhanagedho. Pahīnagedhoti pajahitagedho. Paṭinissaṭṭhagedhoti yathā na puna cittaṃ āruhati, evaṃ paṭivissajjitagedho. Upari vītarāgādīsupi eseva nayo. Sabbāneva tāni gahitaggahaṇassa vissaṭṭhabhāvavevacanāni.
༨༡. ཀིཉྩ བྷིཡྻོ – ‘‘ན ཝེདགཱུ’’ཏི གཱཐཱ། ཏཏྠ ན ཝེདགཱུ དིཊྛིཡཱཡཀོཏི ཙཏུམགྒཝེདགཱུ མཱདིསོ དིཊྛིཡཱཡཀོ ན ཧོཏི, དིཊྛིཡཱ གཙྪནྟོ ཝཱ, ཏཾ སཱརཏོ པཙྩེནྟོ ཝཱ ན ཧོཏི། ཏཏྠ ཝཙནཏྠོ – ཡཱཡཏཱིཏི ཡཱཡཀོ། ཀརཎཝཙནེན དིཊྛིཡཱ ཡཱཡཏཱིཏི དིཊྛིཡཱཡཀོ། ཨུཔཡོགཏྠེ སཱམིཝཙནེནཔི དིཊྛིཡཱ ཡཱཏཱིཏིཔི དིཊྛིཡཱཡཀོ། ན མུཏིཡཱ ས མཱནམེཏཱིཏི མུཏརཱུཔཱདིབྷེདཱཡ མུཏིཡཱཔི སོ མཱནཾ ན ཨེཏི། ན ཧི ཏམྨཡོ སོཏི ཏཎྷཱདིཊྛིཝསེན ཏམྨཡོ ཧོཏི ཏཔྤརཱཡཎོ, ཨཡཾ པན ན ཏཱདིསོ། ན ཀམྨུནཱ ནོཔི སུཏེན ནེཡྻོཏི པུཉྙཱབྷིསངྑཱརཱདིནཱ ཀམྨུནཱ ཝཱ, སུཏསུདྡྷིཨཱདིནཱ སུཏེན ཝཱ སོ ནེཏབྦོ ན ཧོཏི། ཨནཱུཔནཱིཏོ ས ནིཝེསནེསཱུཏི སོ དྭིནྣམྤི ཨུཔཡཱནཾ པཧཱིནཏྟཱ སབྦེསུ ཏཎྷཱདིཊྛིནིཝེསནེསུ ཨནུཔནཱིཏོ།
81. Kiñca bhiyyo – ‘‘na vedagū’’ti gāthā. Tattha na vedagū diṭṭhiyāyakoti catumaggavedagū mādiso diṭṭhiyāyako na hoti, diṭṭhiyā gacchanto vā, taṃ sārato paccento vā na hoti. Tattha vacanattho – yāyatīti yāyako. Karaṇavacanena diṭṭhiyā yāyatīti diṭṭhiyāyako. Upayogatthe sāmivacanenapi diṭṭhiyā yātītipi diṭṭhiyāyako. Na mutiyā sa mānametīti mutarūpādibhedāya mutiyāpi so mānaṃ na eti. Na hi tammayo soti taṇhādiṭṭhivasena tammayo hoti tapparāyaṇo, ayaṃ pana na tādiso. Na kammunā nopisutena neyyoti puññābhisaṅkhārādinā kammunā vā, sutasuddhiādinā sutena vā so netabbo na hoti. Anūpanīto sa nivesanesūti so dvinnampi upayānaṃ pahīnattā sabbesu taṇhādiṭṭhinivesanesu anupanīto.
མུཏརཱུཔེན ཝཱཏི ཨེཏྠ མུཏརཱུཔཾ ནཱམ གནྡྷརསཕོཊྛབྦཱནི། མཱནཾ ནེཏཱིཏི ཨསྨིམཱནཾ ན ཨེཏི། ན ཨུཔེཏཱིཏི སམཱིཔཾ ན ཨེཏི། ན ཨུཔགཙྪཏཱིཏི ཨུཔགནྟྭཱ ན ཏིཊྛཏི། ཏམྨཡོཏི ཏཔྤཀཏོ།
Mutarūpena vāti ettha mutarūpaṃ nāma gandharasaphoṭṭhabbāni. Mānaṃ netīti asmimānaṃ na eti. Na upetīti samīpaṃ na eti. Na upagacchatīti upagantvā na tiṭṭhati. Tammayoti tappakato.
༨༢. ཏསྶ ཙ ཨེཝཾཝིདྷསྶ ‘‘སཉྙཱཝིརཏྟསྶཱ’’ཏི གཱཐཱ། ཏཏྠ སཉྙཱཝིརཏྟསྶཱཏི ནེཀྑམྨསཉྙཱཔུབྦངྒམཱཡ བྷཱཝནཱཡ པཧཱིནཀཱམཱདིསཉྙསྶ། ཨིམིནཱ པདེན ཨུབྷཏོབྷཱགཝིམུཏྟོ སམཐཡཱནིཀོ ཨདྷིཔྤེཏོ། པཉྙཱཝིམུཏྟསྶཱཏི ཝིཔསྶནཱཔུབྦངྒམཱཡ བྷཱཝནཱཡ སབྦཀིལེསེཧི ཝིམུཏྟསྶ། ཨིམིནཱ སུཀྑཝིཔསྶཀོ ཨདྷིཔྤེཏོ། སཉྙཉྩ དིཊྛིཉྩ ཡེ ཨགྒཧེསུཾ, ཏེ གྷཊྚམཱནཱ ཝིཙརནྟི ལོཀེཏི ཡེ པན ཀཱམསཉྙཱདིཀཾ སཉྙཾ ཨགྒཧེསུཾ, ཏེ ཝིསེསཏོ གཧཊྛཱ ཀཱམཱདྷིཀརཎཾ, ཡེ ཙ དིཊྛིཾ ཨགྒཧེསུཾ, ཏེ ཝིསེསཏོ པབྦཛིཏཱ དྷམྨཱདྷིཀརཎཾ ཨཉྙམཉྙཾ གྷཊྚེནྟཱ ཝིཙརནྟཱིཏི།
82. Tassa ca evaṃvidhassa ‘‘saññāvirattassā’’ti gāthā. Tattha saññāvirattassāti nekkhammasaññāpubbaṅgamāya bhāvanāya pahīnakāmādisaññassa. Iminā padena ubhatobhāgavimutto samathayāniko adhippeto. Paññāvimuttassāti vipassanāpubbaṅgamāya bhāvanāya sabbakilesehi vimuttassa. Iminā sukkhavipassako adhippeto. Saññañca diṭṭhiñca ye aggahesuṃ, te ghaṭṭamānā vicaranti loketi ye pana kāmasaññādikaṃ saññaṃ aggahesuṃ, te visesato gahaṭṭhā kāmādhikaraṇaṃ, ye ca diṭṭhiṃ aggahesuṃ, te visesato pabbajitā dhammādhikaraṇaṃ aññamaññaṃ ghaṭṭentā vicarantīti.
ཡོ སམཐཔུབྦངྒམཾ ཨརིཡམགྒཾ བྷཱཝེཏཱིཏི ཡོ པུགྒལོ སམཐཔུབྦངྒམཾ པུརེཙཱརིཀཾ ཀཏྭཱ སཧཝིཔསྶནཾ ཨརིཡམགྒཾ བྷཱཝེཏི, པཋམཾ སམཱདྷིཾ ཨུཔྤཱདེཏྭཱ པཙྪཱ སཧཝིཔསྶནཾ ཨརིཡམགྒཾ ཨུཔྤཱདེཏཱིཏི ཨཏྠོ། ཏསྶ ཨཱདིཏོཏི ཏསྶ པུགྒལསྶ པཋམཛ྄ཛྷཱནཱདིཏོ། ཨུཔཱདཱཡཱཏི པཊིཙྩ ཨཱགམྨ། གནྠཱ ཝིཀྑམྦྷཱིཏཱ ཧོནྟཱིཏི གནྠཱ དཱུརཱིཀཏཱ བྷཝནྟི། ཨརཧཏྟེ པཏྟེཏི ཨརཧཏྟཕལཾ པཏྟེ། ཨརཧཏོཏི ཨརཧཏྟཕལེ ཋིཏསྶ། གནྠཱ ཙ མོཧཱ ཙཱཏིཨཱདཡོ སབྦེ ཀིལེསཱ པཧཱིནཱ ཧོནྟི།
Yo samathapubbaṅgamaṃ ariyamaggaṃ bhāvetīti yo puggalo samathapubbaṅgamaṃ purecārikaṃ katvā sahavipassanaṃ ariyamaggaṃ bhāveti, paṭhamaṃ samādhiṃ uppādetvā pacchā sahavipassanaṃ ariyamaggaṃ uppādetīti attho. Tassa āditoti tassa puggalassa paṭhamajjhānādito. Upādāyāti paṭicca āgamma. Ganthā vikkhambhītā hontīti ganthā dūrīkatā bhavanti. Arahatte patteti arahattaphalaṃ patte. Arahatoti arahattaphale ṭhitassa. Ganthā ca mohā cātiādayo sabbe kilesā pahīnā honti.
ཡོ ཝིཔསྶནཱཔུབྦངྒམཾ ཨརིཡམགྒཾ བྷཱཝེཏཱིཏི ཡོ པུགྒལོ ཝིཔསྶནཾ པུབྦངྒམཾ པུརེཙཱརིཀཾ ཀཏྭཱ ཨརིཡམགྒཾ བྷཱཝེཏི, པཋམཾ ཝིཔསྶནཾ ཨུཔྤཱདེཏྭཱ པཙྪཱ ཨརིཡམགྒསམྤཡུཏྟཾ སམཱདྷིཾ བྷཱཝེཏཱིཏི ཨཏྠོ། ཏསྶ ཨཱདིཏོ ཨུཔཱདཱཡཱཏི ཏསྶ པུགྒལསྶ ཝིཔསྶནཏོ པཊྛཱཡ ཝིཔསྶནཾ པཊིཙྩ། མོཧཱ ཝིཀྑམྦྷིཏཱ ཧོནྟཱིཏི ཨེཏྠ ཝིཀྑམྦྷིཏཱཏི དཱུརཾ པཱཔིཏཱ སཉྙཱཝསེན། གྷཊྚེནྟཱིཏི ཡེ ཀཱམསཉྙཱདིཾ གཎྷནྟི, ཏེ སཉྙཱཝསེན པཱིལེ༹ནྟི། སངྒྷཊྚེནྟཱིཏི ཏཏོ ཏཏོ པཱིལེ༹ནྟི ། ཨིདཱནི གྷཊྚེནྟེ དསྶེཏུཾ ‘‘རཱཛཱནོཔི རཱཛཱུཧི ཝིཝདནྟཱི’’ཏིཨཱདིནཱ ནཡེན ཝིཏྠཱརོ ཝུཏྟོ། ཨཉྙམཉྙཾ པཱཎཱིཧིཔི ཨུཔཀྐམནྟཱིཏི ཨེཏྠ ཨཉྙམཉྙཾ ཧཏྠེཧི པཧརནྟི། ལེཌྜཱུཧཱིཏི ཀཔཱལཁཎྜེཧི། དཎྜེཧཱིཏི ཨཌྜྷདཎྜཀེཧི། སཏྠེཧཱིཏི ཨུབྷཏོདྷཱརེཧི སཏྠེཧི།
Yo vipassanāpubbaṅgamaṃ ariyamaggaṃ bhāvetīti yo puggalo vipassanaṃ pubbaṅgamaṃ purecārikaṃ katvā ariyamaggaṃ bhāveti, paṭhamaṃ vipassanaṃ uppādetvā pacchā ariyamaggasampayuttaṃ samādhiṃ bhāvetīti attho. Tassa ādito upādāyāti tassa puggalassa vipassanato paṭṭhāya vipassanaṃ paṭicca. Mohā vikkhambhitā hontīti ettha vikkhambhitāti dūraṃ pāpitā saññāvasena. Ghaṭṭentīti ye kāmasaññādiṃ gaṇhanti, te saññāvasena pīḷenti. Saṅghaṭṭentīti tato tato pīḷenti . Idāni ghaṭṭente dassetuṃ ‘‘rājānopirājūhi vivadantī’’tiādinā nayena vitthāro vutto. Aññamaññaṃ pāṇīhipi upakkamantīti ettha aññamaññaṃ hatthehi paharanti. Leḍḍūhīti kapālakhaṇḍehi. Daṇḍehīti aḍḍhadaṇḍakehi. Satthehīti ubhatodhārehi satthehi.
ཨབྷིསངྑཱརཱནཾ ཨཔྤཧཱིནཏྟཱཏི པུཉྙཱདིཨབྷིསངྑཱརཱནཾ ཨཔྤཧཱིནབྷཱཝེན། གཏིཡཱ གྷཊྚེནྟཱིཏི གནྟབྦཱཡ པཏིཊྛཱབྷཱུཏཱཡ གཏིཡཱ པཱིལེ༹ནྟི གྷཊྚནཾ ཨཱཔཛྫནྟི། ནིརཡཱདཱིསུཔི ཨེསེཝ ནཡོ། སེསམེཏྠ ཝུཏྟནཡཏྟཱ ཨུཏྟཱནམེཝ།
Abhisaṅkhārānaṃ appahīnattāti puññādiabhisaṅkhārānaṃ appahīnabhāvena. Gatiyā ghaṭṭentīti gantabbāya patiṭṭhābhūtāya gatiyā pīḷenti ghaṭṭanaṃ āpajjanti. Nirayādīsupi eseva nayo. Sesamettha vuttanayattā uttānameva.
སདྡྷམྨཔྤཛྫོཏིཀཱཡ མཧཱནིདྡེསཊྛཀཐཱཡ
Saddhammappajjotikāya mahāniddesaṭṭhakathāya
མཱགཎྜིཡསུཏྟནིདྡེསཝཎྞནཱ ནིཊྛིཏཱ།
Māgaṇḍiyasuttaniddesavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཁུདྡཀནིཀཱཡ • Khuddakanikāya / མཧཱནིདྡེསཔཱལི༹ • Mahāniddesapāḷi / ༩. མཱགཎྜིཡསུཏྟནིདྡེསོ • 9. Māgaṇḍiyasuttaniddeso
