| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
5. மாக³ண்டி³யஸுத்தவண்ணனா
5. Māgaṇḍiyasuttavaṇṇanā
207. த்³வே மாக³ண்டி³யாதி த்³வே மாக³ண்டி³யனாமகா. தே³வக³ப்³ப⁴ஸதி³ஸந்தி தே³வானங் வஸனஓவரகஸதி³ஸங். ஏதங் வுத்தந்தி ‘‘பா⁴ரத்³வாஜகொ³த்தஸ்ஸ ப்³ராஹ்மணஸ்ஸ அக்³யாகா³ரே திணஸந்தா²ரகே’’தி ஏதங் வுத்தங். ந கேவலங் தங் தி³வஸமேவாதி யங் தி³வஸங் மாக³ண்டி³யோ பரிப்³பா³ஜகோ திணஸந்தா²ரகங் பஞ்ஞத்தங், ந கேவலங் தங் தி³வஸமேவ ப⁴க³வா யேனஞ்ஞதரோ வனஸண்டோ³, தேனுபஸங்கமீதி யோஜனா. கா³மூபசாரேதி கா³மஸமீபே. ஸஞ்ஞாணங் கத்வாதி ஸஞ்ஞாணங் கத்வா விய. ந ஹி ப⁴க³வதோ தஸ்ஸ ஸஞ்ஞாணகரணே பயோஜனங் அத்தி².
207.Dvemāgaṇḍiyāti dve māgaṇḍiyanāmakā. Devagabbhasadisanti devānaṃ vasanaovarakasadisaṃ. Etaṃ vuttanti ‘‘bhāradvājagottassa brāhmaṇassa agyāgāre tiṇasanthārake’’ti etaṃ vuttaṃ. Na kevalaṃ taṃ divasamevāti yaṃ divasaṃ māgaṇḍiyo paribbājako tiṇasanthārakaṃ paññattaṃ, na kevalaṃ taṃ divasameva bhagavā yenaññataro vanasaṇḍo, tenupasaṅkamīti yojanā. Gāmūpacāreti gāmasamīpe. Saññāṇaṃ katvāti saññāṇaṃ katvā viya. Na hi bhagavato tassa saññāṇakaraṇe payojanaṃ atthi.
ஸமணஸெய்யானுரூபந்தி ஸமணஸ்ஸ அனுச்ச²விகா ஸெய்யா. பாஸங்ஸத்தோ² ஹி அயங் ரூப-ஸத்³தோ³. தேனாஹ ‘‘இமங் திணஸந்தா²ரக’’ந்திஆதி³. அனாகிண்ணோதி விலுளிதோ அக⁴ட்டிதோ. ஹத்த²பாத³ஸீஸேஹி தத்த² தத்த² பஹடேன ந சலிதோ அபி⁴ன்னோ, அசலிதத்தா ஏவ அபி⁴ன்னங் அத்த²ரணங். பரிச்சி²ந்தி³த்வா பஞ்ஞத்தோ வியாதி அயங் சே²கேன சித்தகாரேன சிந்தெத்வா துலிகாய பரிச்சி²ன்னலேகா²ய பரிச்சி²ந்தி³த்வா லிகி²தா சித்தகதஸெய்யா விய. பூ⁴னங் வுச்சதி வட்³டி⁴தங், தங் ஹந்தீதி பூ⁴னஹுனோ. தேனாஹ ‘‘ஹதவட்³டி⁴னோ’’தி. தங் பனாயங் சக்கா²தீ³ஸு ஸங்வரவிதா⁴னங் வட்³டி⁴ஹனநங் மஞ்ஞதி. தேனாஹ ‘‘மரியாத³காரகஸ்ஸா’’தி. ப்³ரூஹேதப்³ப³ந்தி உளாரவிஸயூபஹாரேன வட்³டே⁴தப்³ப³ங் பீணேதப்³ப³ங். தங் பன அனநுபூ⁴தானுப⁴வனேன ஹோதீதி ஆஹ ‘‘அதி³ட்ட²ங் த³க்கி²தப்³ப³’’ந்தி. அனுபூ⁴தங் பன அபணீதங் ஹோதீதி வுத்தங் ‘‘தி³ட்ட²ங் ஸமதிக்கமிதப்³ப³’’ந்தி. ஸேஸவாரேஸுபி ஏஸேவ நயோ. பரமதி³ட்ட²த⁴ம்மனிப்³பா³னவாதீ³ கிரேஸ பரிப்³பா³ஜகோ, தஸ்மா ஏவங் ச²ஸு த்³வாரேஸு வட்³டி⁴ங் பஞ்ஞபேதி. யஸ்மா யங் ச²ன்னம்பி சக்கா²தீ³னங் யதா²ஸகங் விஸயக்³க³ஹணங் படிக்கி²பந்தோ லோகஸ்ஸ அவட்³டி⁴தங் வினாஸமேவ பஞ்ஞபேதி, தஸ்மா ஸோ ஸயம்பி வட்³டி⁴ஹதோ ஹதவட்³டி⁴தோ.
Samaṇaseyyānurūpanti samaṇassa anucchavikā seyyā. Pāsaṃsattho hi ayaṃ rūpa-saddo. Tenāha ‘‘imaṃ tiṇasanthāraka’’ntiādi. Anākiṇṇoti viluḷito aghaṭṭito. Hatthapādasīsehi tattha tattha pahaṭena na calito abhinno, acalitattā eva abhinnaṃ attharaṇaṃ. Paricchinditvā paññatto viyāti ayaṃ chekena cittakārena cintetvā tulikāya paricchinnalekhāya paricchinditvā likhitā cittakataseyyā viya. Bhūnaṃ vuccati vaḍḍhitaṃ, taṃ hantīti bhūnahuno. Tenāha ‘‘hatavaḍḍhino’’ti. Taṃ panāyaṃ cakkhādīsu saṃvaravidhānaṃ vaḍḍhihananaṃ maññati. Tenāha ‘‘mariyādakārakassā’’ti. Brūhetabbanti uḷāravisayūpahārena vaḍḍhetabbaṃ pīṇetabbaṃ. Taṃ pana ananubhūtānubhavanena hotīti āha ‘‘adiṭṭhaṃ dakkhitabba’’nti. Anubhūtaṃ pana apaṇītaṃ hotīti vuttaṃ ‘‘diṭṭhaṃ samatikkamitabba’’nti. Sesavāresupi eseva nayo. Paramadiṭṭhadhammanibbānavādī kiresa paribbājako, tasmā evaṃ chasu dvāresu vaḍḍhiṃ paññapeti. Yasmā yaṃ channampi cakkhādīnaṃ yathāsakaṃ visayaggahaṇaṃ paṭikkhipanto lokassa avaḍḍhitaṃ vināsameva paññapeti, tasmā so sayampi vaḍḍhihato hatavaḍḍhito.
ஸங்கிலேஸதோ ஆரகத்தா அரியோ நிய்யானிகத⁴ம்மபா⁴வதோ ஞாயோ த⁴ம்மோ. வஜ்ஜலேஸஸ்ஸபி அபா⁴வதோ குஸலோ. தேனாஹ ‘‘பரிஸுத்³தே⁴ காரணத⁴ம்மே அனவஜ்ஜே’’தி. உக்³க³தஸ்ஸாதி உச்சகுலீனதாதி³னா உளாரஸ்ஸ. முகே² ஆரக்க²ங் ட²பெத்வாதி முகே²ன ஸங்யதோ ஹுத்வா. அம்ப³ஜம்பூ³ஆதீ³னி க³ஹெத்வா விய அபூரயமானோதி அம்ப³ஜம்பூ³ஆதீ³னி அஞ்ஞமஞ்ஞவிஸதி³ஸானி விய பூரணகதா²னயேன யங் கிஞ்சி அகதெ²த்வா. தேனாஹ ‘‘மயா கதி²தனியாமேனா’’தி.
Saṃkilesato ārakattā ariyo niyyānikadhammabhāvato ñāyo dhammo. Vajjalesassapi abhāvato kusalo. Tenāha ‘‘parisuddhe kāraṇadhamme anavajje’’ti. Uggatassāti uccakulīnatādinā uḷārassa. Mukhe ārakkhaṃ ṭhapetvāti mukhena saṃyato hutvā. Ambajambūādīni gahetvā viya apūrayamānoti ambajambūādīni aññamaññavisadisāni viya pūraṇakathānayena yaṃ kiñci akathetvā. Tenāha ‘‘mayā kathitaniyāmenā’’ti.
208. ப²லஸமாபத்தியா வுட்டி²தோதி தி³வாவிஹாரதோ வுட்டி²தோதி அத்தோ². தி³வாவிஹாரோபி ஹி ‘‘படிஸல்லான’’ந்தி வுச்சதி ‘‘ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதீ³’’திஆதீ³ஸு (பாரா॰ 18). ப⁴க³வா ஹி ப²லஸமாபத்திதோ வுட்டா²னுத்தரகாலங் தேஸங் கதா²ஸல்லாபங் ஸுத்வா தி³வாவிஹாரதோ வுட்டா²ய தத்த² க³தோ. ஸங்வேகோ³ நாம ஸஹொத்தப்பஞாணங், தங் நிப்³பி³ந்த³னவஸேனபி ஹோதி, ஸங்வேக³னிஸ்ஸிதங் ஸந்தா⁴யாஹ ‘‘பீதிஸங்வேகே³ன ஸங்விக்³கோ³’’தி. ஸோ பன யஸ்மா புரிமாவத்தா²ய சலனங் ஹோதி சித்தஸ்ஸ, தஸ்மா ஆஹ ‘‘சலிதோ கம்பிதோ’’தி. திகி²ணஸோதேன புரிஸேனாதி ப⁴க³வந்தங் ஸந்தா⁴யாஹ.
208.Phalasamāpattiyāvuṭṭhitoti divāvihārato vuṭṭhitoti attho. Divāvihāropi hi ‘‘paṭisallāna’’nti vuccati ‘‘rahogatassa paṭisallīnassa evaṃ cetaso parivitakko udapādī’’tiādīsu (pārā. 18). Bhagavā hi phalasamāpattito vuṭṭhānuttarakālaṃ tesaṃ kathāsallāpaṃ sutvā divāvihārato vuṭṭhāya tattha gato. Saṃvego nāma sahottappañāṇaṃ, taṃ nibbindanavasenapi hoti, saṃveganissitaṃ sandhāyāha ‘‘pītisaṃvegena saṃviggo’’ti. So pana yasmā purimāvatthāya calanaṃ hoti cittassa, tasmā āha ‘‘calito kampito’’ti. Tikhiṇasotena purisenāti bhagavantaṃ sandhāyāha.
209. த⁴ம்மதே³ஸனங் ஆரபி⁴ யதா² வினெய்யத³மனகுஸலோ வஸனட்டா²னட்டே²னாதி இத³ங் ஆரமிதப்³ப³பா⁴வஸ்ஸ பா⁴வலக்க²ணவசனங். ஆரமதி எத்தா²தி ஆராமோ, ரூபங் ஆராமோ ஏதஸ்ஸாதி ரூபாராமங், ததோ ஏவ தன்னின்னபா⁴வேன ரூபே ரதந்தி ரூபரதங், தேன ஸம்மோ து³ப்பத்தியா ரூபேன ஸம்முதி³தந்தி ரூபஸம்முதி³தங், ததே³தங் தத³பி⁴ஹதஜவனகிச்சங் தத்த² ஆரோபெத்வா வுத்தங். த³ந்தந்திஆதீ³ஸுபி ஏஸேவ நயோ. த³ந்தங் த³மிதங். நிப்³பி³ஸேவனந்தி விக³தவிஸுகாயிகங். கு³த்தந்தி ஸதியா கு³த்தங். ரக்கி²தந்தி தஸ்ஸேவ வேவசனங். ஸங்வுதந்தி அபனீதங் பவேஸனிவாரணேன. தேனாஹ ‘‘பிஹித’’ந்தி.
209.Dhammadesanaṃ ārabhi yathā vineyyadamanakusalo vasanaṭṭhānaṭṭhenāti idaṃ āramitabbabhāvassa bhāvalakkhaṇavacanaṃ. Āramati etthāti ārāmo, rūpaṃ ārāmo etassāti rūpārāmaṃ, tato eva tanninnabhāvena rūpe ratanti rūparataṃ, tena sammo duppattiyā rūpena sammuditanti rūpasammuditaṃ, tadetaṃ tadabhihatajavanakiccaṃ tattha āropetvā vuttaṃ. Dantantiādīsupi eseva nayo. Dantaṃ damitaṃ. Nibbisevananti vigatavisukāyikaṃ. Guttanti satiyā guttaṃ. Rakkhitanti tasseva vevacanaṃ. Saṃvutanti apanītaṃ pavesanivāraṇena. Tenāha ‘‘pihita’’nti.
210. உப்பஜ்ஜனபரிளாஹந்தி உப்பஜ்ஜனகிலேஸபரிளாஹங். கிங் வசனங் வத்தப்³ப³ங் அஸ்ஸாதி ரூபாரம்மணங் அனுப⁴வித்வா ஸமுத³யாதி³பஹானங் பரிக்³க³ண்ஹித்வா பரினிப்³பி³ந்தி³த்வா விரஜ்ஜித்வா யோ விமுத்தோ, தத்த² கிங் வுத்³தி⁴ஹதபரியாயோ அவஸ்ஸங் லப⁴தி ந லப⁴தீதி புச்ச²தி. பரிப்³பா³ஜகோ தாதி³ஸே ஸாரப³த்³த⁴விமுத்திகே வுத்³தி⁴ஹதோதி ந வதெ³ய்யாதி ஆஹ ‘‘ந கிஞ்சி, போ⁴, கோ³தமா’’தி.
210.Uppajjanapariḷāhanti uppajjanakilesapariḷāhaṃ. Kiṃ vacanaṃ vattabbaṃ assāti rūpārammaṇaṃ anubhavitvā samudayādipahānaṃ pariggaṇhitvā parinibbinditvā virajjitvā yo vimutto, tattha kiṃ vuddhihatapariyāyo avassaṃ labhati na labhatīti pucchati. Paribbājako tādise sārabaddhavimuttike vuddhihatoti na vadeyyāti āha ‘‘na kiñci, bho, gotamā’’ti.
211. தேதி தயா, அயமேவ வா பாடோ². வஸ்ஸங் வாஸோ வஸ்ஸங் உத்தரபத³லோபேன, வஸ்ஸிதுங் அரஹதீதி வஸ்ஸிகோ, வஸ்ஸகாலே நிவாஸானுச்ச²விகோதி அத்தோ².
211.Teti tayā, ayameva vā pāṭho. Vassaṃ vāso vassaṃ uttarapadalopena, vassituṃ arahatīti vassiko, vassakāle nivāsānucchavikoti attho.
நாதிஉச்சோ ஹோதி நாதினீசோதி கி³ம்ஹிகோ விய உச்சோ, ஹேமந்திகோ விய நீசோ ந ஹோதி, அத² கோ² தது³ப⁴யவேமஜ்ஜ²லக்க²ணதாய நாதிஉச்சோ ஹோதி நாதினீசோ. நாதிதனூனீதி ஹேமந்திகஸ்ஸ விய ந கு²த்³த³கானி. நாதிப³ஹூனீதி கி³ம்ஹிகஸ்ஸ விய ந அதிப³ஹூனி. மிஸ்ஸகானேவாதி ஹேமந்திககி³ம்ஹிகேஸு வுத்தலக்க²ணவோமிஸ்ஸகானி. உண்ஹபவேஸனத்தா²யாதி நியூஹேஸு புரேப⁴த்தங் பச்சா²ப⁴த்தஞ்ச பதிதஸூரியோபா⁴ஸவஸேன உண்ஹஸ்ஸ அப்³ப⁴ந்தரபவேஸனத்தா²ய. பி⁴த்தினியூஹானி நீஹரீயந்தீதி த³க்கி²ணபஸ்ஸே பி⁴த்தீஸு நியூஹானி நீஹரித்வா கரீயந்தி. விபுலஜாலானீதி புது²லசி²த்³தா³னி. உத³கயந்தானீதி உத³கவாஹகயந்தானி.
Nātiucco hoti nātinīcoti gimhiko viya ucco, hemantiko viya nīco na hoti, atha kho tadubhayavemajjhalakkhaṇatāya nātiucco hoti nātinīco. Nātitanūnīti hemantikassa viya na khuddakāni. Nātibahūnīti gimhikassa viya na atibahūni. Missakānevāti hemantikagimhikesu vuttalakkhaṇavomissakāni. Uṇhapavesanatthāyāti niyūhesu purebhattaṃ pacchābhattañca patitasūriyobhāsavasena uṇhassa abbhantarapavesanatthāya. Bhittiniyūhāni nīharīyantīti dakkhiṇapasse bhittīsu niyūhāni nīharitvā karīyanti. Vipulajālānīti puthulachiddāni. Udakayantānīti udakavāhakayantāni.
நீலுப்பலக³ச்ச²கே கத்வாதி விகஸிதேஹி நீலுப்பலேஹி க³ச்ச²கே நளினிகே கத்வா. க³ந்த⁴கலலந்தி க³ந்த⁴மிஸ்ஸககத்³த³மங். யமகபி⁴த்தீதி யுக³ளபி⁴த்தி, தஸ்ஸா அந்தரே நாளி, யதோ உத³கங் அபி⁴ருஹதி. லோஹனாளிந்தி லோஹமயயந்தனாளிங். ஜாலந்தி தம்ப³லோஹமயங் ஜாலங். ஹெட்டா² யந்தங் பரிவத்தெந்தீதி ஹெட்டா²பா⁴கே³ உத³கயந்தங் க³மெந்தி. உத³கபு²ஸிதே தேமெந்தே விவண்ணதா மாஹோஸீதி நீலபடங் நிவாஸேதி. தி³வாகாலேதி தி³வஸவேலாய. அஜ்ஜ²த்தங் வூபஸந்தசித்தோ விஹராமீதி ஏதேன அத்தனோ ப²லஸமாபத்திவிஹாரோ ப⁴க³வதா த³ஸ்ஸிதோதி ஆஹ – ‘‘தாய ரதியா ரமமானோதி இத³ங் சதுத்த²ஜ்ஜா²னிகப²லஸமாபத்திரதிங் ஸந்தா⁴ய வுத்த’’ந்தி.
Nīluppalagacchake katvāti vikasitehi nīluppalehi gacchake naḷinike katvā. Gandhakalalanti gandhamissakakaddamaṃ. Yamakabhittīti yugaḷabhitti, tassā antare nāḷi, yato udakaṃ abhiruhati. Lohanāḷinti lohamayayantanāḷiṃ. Jālanti tambalohamayaṃ jālaṃ. Heṭṭhā yantaṃ parivattentīti heṭṭhābhāge udakayantaṃ gamenti. Udakaphusite temente vivaṇṇatā māhosīti nīlapaṭaṃ nivāseti. Divākāleti divasavelāya. Ajjhattaṃ vūpasantacitto viharāmīti etena attano phalasamāpattivihāro bhagavatā dassitoti āha – ‘‘tāya ratiyā ramamānoti idaṃ catutthajjhānikaphalasamāpattiratiṃ sandhāya vutta’’nti.
212. மஹா ச நேஸங் பபஞ்சோதி நேஸங் ராஜூனங் மஹாபபஞ்சோ ராஜித்³தி⁴வஸேன ஸப்³ப³தா³ ஸம்பத்திவிஸயோ ச, அனுப⁴விதுங் ந லப⁴ந்தீதி அதி⁴ப்பாயோ. மந்தே க³வேஸந்தா விசரந்தி, ந போ⁴க³ஸுக²ங். க³ணனா நாம அச்சி²ன்னக³ணனா, ந விக³ணக³ணனா ந பணக³ணனா. ஆவட்டோதி யதா²தி⁴க³தே தி³ப்³பே³ காமே பஹாய காமஹேது ஆவட்டோ நிவத்தோ பரிவத்திதோ ப⁴வெய்ய. ஏவங் மானுஸகா காமாதி யதா² கோசி குஸக்³கே³ன உத³கங் க³ஹெத்வா மஹாஸமுத்³தே³ உத³கங் மினெய்ய. தத்த² மஹாஸமுத்³தே³ உத³கமேவ மஹந்தங் விபுலங் பணீதஞ்ச, ஏவங் தி³ப்³பா³னங் காமானங் ஸமீபே உபனிதா⁴ய மானுஸகா காமா அப்பமத்தகா ஓரமத்தகா நிஹீனா, தி³ப்³பா³வ காமா மஹந்தா விபுலா உளாரா பணீதா. ஸமதி⁴க³ய்ஹாதி ஸம்மா அதி⁴க³மனவஸேன நிக்³க³ய்ஹ தி³ப்³ப³ம்பி ஸுக²ங் ஹீனங் கத்வா திட்ட²தி.
212.Mahāca nesaṃ papañcoti nesaṃ rājūnaṃ mahāpapañco rājiddhivasena sabbadā sampattivisayo ca, anubhavituṃ na labhantīti adhippāyo. Mante gavesantā vicaranti, na bhogasukhaṃ. Gaṇanā nāma acchinnagaṇanā, na vigaṇagaṇanā na paṇagaṇanā. Āvaṭṭoti yathādhigate dibbe kāme pahāya kāmahetu āvaṭṭo nivatto parivattito bhaveyya. Evaṃ mānusakā kāmāti yathā koci kusaggena udakaṃ gahetvā mahāsamudde udakaṃ mineyya. Tattha mahāsamudde udakameva mahantaṃ vipulaṃ paṇītañca, evaṃ dibbānaṃ kāmānaṃ samīpe upanidhāya mānusakā kāmā appamattakā oramattakā nihīnā, dibbāva kāmā mahantā vipulā uḷārā paṇītā. Samadhigayhāti sammā adhigamanavasena niggayha dibbampi sukhaṃ hīnaṃ katvā tiṭṭhati.
213. ஆரொக்³யஹேதுகங் ஸுக²ங் அஸ்ஸ அத்தீ²தி ஸுகீ², தங் பனஸ்ஸ ரோக³விக³மதோவாதி ஆஹ ‘‘பட²மங் து³க்கி²தோ பச்சா² ஸுகி²தோ’’தி. ஸேரீ நாம அத்தாதீ⁴னவுத்தீதி ஆஹ ‘‘ஸேரீ ஏககோ ப⁴வெய்யா’’தி. அத்தனோ வஸோ ஸயங்வஸோ, ஸோ ஏதஸ்ஸ அத்தீ²தி ஸயங்வஸீ. அங்கா³ரகபல்லங் விய காமவத்து²பரிளாஹஹேதுதோ. தச்செ²த்வாதி க⁴ட்டெத்வா, கண்டூ³யித்வாதி அத்தோ².
213. Ārogyahetukaṃ sukhaṃ assa atthīti sukhī, taṃ panassa rogavigamatovāti āha ‘‘paṭhamaṃ dukkhito pacchā sukhito’’ti. Serī nāma attādhīnavuttīti āha ‘‘serī ekako bhaveyyā’’ti. Attano vaso sayaṃvaso, so etassa atthīti sayaṃvasī. Aṅgārakapallaṃ viya kāmavatthupariḷāhahetuto. Tacchetvāti ghaṭṭetvā, kaṇḍūyitvāti attho.
214. யேன காயோ மது⁴ரகஜாதோ ஹோதி, தங் கிர குட்ட²ங் ச²விங் வினாஸேதி, சம்மங் சி²த்³த³ஜாதங் விய ஹோதி. தேனேவாஹ ‘‘உபஹதகாயப்பஸாதோ³’’தி. பச்சலத்தா²தி படிலபி⁴. அவிஜ்ஜாபி⁴பூ⁴ததாய விரோதி⁴பச்சயஸமாயோகே³ன பஞ்ஞிந்த்³ரியஸ்ஸ உபஹதத்தா. ஆயதிங் து³க்க²ப²லதாய ஏதரஹி ச கிலேஸது³க்க²ப³ஹுலதாய காமானங் து³க்க²ஸம்ப²ஸ்ஸதா, தது³ப⁴யஸங்யுத்தேஸு தேஸு ச தங் அஸல்லக்கி²த்வா ஏகந்தஸுகா²பி⁴னிவேஸோ விபரீதஸஞ்ஞாய, ந கேவலாய ஸுக²வேத³னாய ஸுகா²தி பவத்தஸஞ்ஞீ.
214. Yena kāyo madhurakajāto hoti, taṃ kira kuṭṭhaṃ chaviṃ vināseti, cammaṃ chiddajātaṃ viya hoti. Tenevāha ‘‘upahatakāyappasādo’’ti. Paccalatthāti paṭilabhi. Avijjābhibhūtatāya virodhipaccayasamāyogena paññindriyassa upahatattā. Āyatiṃ dukkhaphalatāya etarahi ca kilesadukkhabahulatāya kāmānaṃ dukkhasamphassatā, tadubhayasaṃyuttesu tesu ca taṃ asallakkhitvā ekantasukhābhiniveso viparītasaññāya, na kevalāya sukhavedanāya sukhāti pavattasaññī.
215. தானீதி குட்ட²ஸரீரே வணமுகா²னி. அஸுசீனீதி அஸுபா⁴னி. து³க்³க³ந்தா⁴னீதி விஸ்ஸக³ந்தா⁴னி. பூதீனீதி குணபபூ⁴தானி. இதா³னீதி ஏதரஹி. நகே²ஹி விப்பதச்ச²னஅக்³கி³பரிதாபனேஹி அதினிப்பீளனகாலே பாணகா…பே॰… பக்³க⁴ரந்தி, தேன வேத³னா தனுகா ஹோதி. ஏவந்தி வுத்தனயேன வேத³னாய தனுகபா⁴வதோ.
215.Tānīti kuṭṭhasarīre vaṇamukhāni. Asucīnīti asubhāni. Duggandhānīti vissagandhāni. Pūtīnīti kuṇapabhūtāni. Idānīti etarahi. Nakhehi vippatacchanaaggiparitāpanehi atinippīḷanakāle pāṇakā…pe… paggharanti, tena vedanā tanukā hoti. Evanti vuttanayena vedanāya tanukabhāvato.
ஆரொக்³யபா⁴வே த⁴னலாபா⁴தி³லாபு⁴ப்பத்திதோ, அஸதி ச ஆரொக்³யே லாப⁴ஸ்ஸ நிரத்த²கபா⁴வதோ, தி³ட்ட²த⁴ம்மிகாதி³ஸப்³ப³ஸம்பத்தீனங் லாப⁴ஸ்ஸ நிமித்தபா⁴வதோ ச ஆரொக்³யபரமா லாபா⁴. நிப்³பா³னே ஸுகு²ப்பத்திதோ, அஸதி ச நிப்³பா³னாதி⁴க³மே தாதி³ஸஸ்ஸ ஸுக²ஸ்ஸ அனுபலப்³ப⁴னதோ, ஸப்³ப³ஸங்க²தவிவித்தத்தா ச ஸப்³ப³ஸோ ச ஸங்ஸாரது³க்கா²பா⁴வதோ, அதி⁴க³தே ச தஸ்மிங் ஸகலவட்டது³க்கா²பா⁴வதோ ச நிப்³பா³னங் பரமங் ஸுக²ங். புப்³ப³பா⁴க³மக்³கா³னந்தி காயானுபஸ்ஸனாதி³பே⁴த³பி⁴ன்னானங் அரியமக்³க³ஸ்ஸ புப்³ப³பா⁴கி³யானங் மக்³கா³னங். தேஸஞ்ச அமதகா³மிதா நாம தன்னின்னதாவஸேனேவ ஸச்சி²கிரியாவஸேனாதி ஆஹ ‘‘புப்³ப³பா⁴க³க³மனேனேவ அமதகா³மின’’ந்தி. அட்ட²ங்கி³கோ அரியமக்³கோ³ கே²மோ ஸப்³ப³பரிஸ்ஸயஸமுக்³கா⁴தனேன அனுபத்³து³தத்தா, தங்ஸமங்கீ³னங் ஸப்³ப³ஸோ அனுபத்³து³தத்தா தங்ஸமங்கீ³னங் ஸப்³ப³ஸோ அனுபத்³த³வஹேதுதோ ச. லத்³தி⁴வஸேன க³ஹிதாதி ஸஸ்ஸதவாதா³தீ³ஹி கேவலங் தேஸங் லத்³தி⁴வஸேன ததா² க³ஹிதா. கே²மஅமதகா³மினந்தி இமினா ஹி ‘‘கே²மங்அமதகா³மின’’ந்தி விப⁴த்திஅலோபேன நித்³தே³ஸோ, அத்தோ² பன விப⁴த்திலோபேன த³ட்ட²ப்³போ³தி த³ஸ்ஸேதி.
Ārogyabhāve dhanalābhādilābhuppattito, asati ca ārogye lābhassa niratthakabhāvato, diṭṭhadhammikādisabbasampattīnaṃ lābhassa nimittabhāvato ca ārogyaparamā lābhā. Nibbāne sukhuppattito, asati ca nibbānādhigame tādisassa sukhassa anupalabbhanato, sabbasaṅkhatavivittattā ca sabbaso ca saṃsāradukkhābhāvato, adhigate ca tasmiṃ sakalavaṭṭadukkhābhāvato ca nibbānaṃ paramaṃ sukhaṃ. Pubbabhāgamaggānanti kāyānupassanādibhedabhinnānaṃ ariyamaggassa pubbabhāgiyānaṃ maggānaṃ. Tesañca amatagāmitā nāma tanninnatāvaseneva sacchikiriyāvasenāti āha ‘‘pubbabhāgagamaneneva amatagāmina’’nti. Aṭṭhaṅgiko ariyamaggo khemo sabbaparissayasamugghātanena anupaddutattā, taṃsamaṅgīnaṃ sabbaso anupaddutattā taṃsamaṅgīnaṃ sabbaso anupaddavahetuto ca. Laddhivasena gahitāti sassatavādādīhi kevalaṃ tesaṃ laddhivasena tathā gahitā. Khemaamatagāminanti iminā hi ‘‘khemaṃamatagāmina’’nti vibhattialopena niddeso, attho pana vibhattilopena daṭṭhabboti dasseti.
216. அனோமஜ்ஜதீதி அனு அனு ஓமஜ்ஜதி. அபராபரங் ஹத்த²ங் ஹெட்டா² ஓதாரெந்தோ மஜ்ஜதி.
216.Anomajjatīti anu anu omajjati. Aparāparaṃ hatthaṃ heṭṭhā otārento majjati.
217. சே²கந்தி க⁴னபா⁴வேன வீதங். க⁴னமட்ட²பா⁴வேன ஸுந்த³ரங் ஹோதீதி ஆஹ ‘‘ஸம்பன்ன’’ந்தி. ஸாதூ⁴ஹி பரமப்பிச்ச²ஸந்துட்டே²ஹி லாதோ க³ஹிதோதி ஸாஹுளி. ஸங்காரசோளகங் நிச்சகாளகங்.
217.Chekanti ghanabhāvena vītaṃ. Ghanamaṭṭhabhāvena sundaraṃ hotīti āha ‘‘sampanna’’nti. Sādhūhi paramappicchasantuṭṭhehi lāto gahitoti sāhuḷi. Saṅkāracoḷakaṃ niccakāḷakaṃ.
218. தத்த² தத்த² ருஜனட்டே²ன விபா³த⁴னட்டே²ன ரோகோ³வ பூ⁴தோ. விபஸ்ஸனாஞாணேனபி ஸிகா²ப்பத்தேன ஆரொக்³யங் ஏகதே³ஸேன பஸ்ஸதி, நிப்³பா³னஞ்ச வட்டபடிபக்க²தோதி ஆஹ ‘‘விபஸ்ஸனாஞாணஞ்சேவா’’தி.
218. Tattha tattha rujanaṭṭhena vibādhanaṭṭhena rogova bhūto. Vipassanāñāṇenapi sikhāppattena ārogyaṃ ekadesena passati, nibbānañca vaṭṭapaṭipakkhatoti āha ‘‘vipassanāñāṇañcevā’’ti.
219. அந்தராதி பட²முப்பத்தி ஜராமரணானங் வேமஜ்ஜே². உபஹதோதி பித்தஸெம்ஹாதி³தோ³ஸேஹி தூ³ஸிதபா⁴வேன கதி²தோ. பித்தாதி³தோ³ஸே பன பே⁴ஸஜ்ஜஸேவனாய நிவத்தெந்தோ உபஹதங் படிபாகதிகங் கரொந்தோ சக்கூ²னி உப்பாதே³தி நாம. வினட்டா²னீதி அனுப்பத்தித⁴ம்மதங் ஆபன்னானி.
219.Antarāti paṭhamuppatti jarāmaraṇānaṃ vemajjhe. Upahatoti pittasemhādidosehi dūsitabhāvena kathito. Pittādidose pana bhesajjasevanāya nivattento upahataṃ paṭipākatikaṃ karonto cakkhūni uppādeti nāma. Vinaṭṭhānīti anuppattidhammataṃ āpannāni.
220. புப்³பே³ வுத்தே ஸாஹுளியசீரே. வட்டே அனுக³தசித்தேனாதி அனமதக்³கே³ ஸங்ஸாரவட்டே அனாதீ³னவத³ஸ்ஸிதாய அனுகா³மிசித்தேன.
220.Pubbe vutte sāhuḷiyacīre. Vaṭṭe anugatacittenāti anamatagge saṃsāravaṭṭe anādīnavadassitāya anugāmicittena.
221. த⁴ம்மஸ்ஸாதி நிப்³பா³னஸ்ஸ. அனுத⁴ம்மந்தி அனுரூபங் நிய்யானத⁴ம்மங். தேனாஹ ‘‘அனுச்ச²விகங் படிபத³’’ந்தி. பஞ்சக்க²ந்தே⁴தி பஞ்சுபாதா³னக்க²ந்தே⁴ த³ஸ்ஸேதி. ‘‘தீ³க⁴ரத்தங் வத, போ⁴’’திஆதி³னா பாளியங் விவட்டங் த³ஸ்ஸிதங். தேனாஹ ‘‘உபாதா³னநிரோதா⁴தி விவட்டங் த³ஸ்ஸெந்தோ’’தி. ஸேஸங் ஸுவிஞ்ஞெய்யமேவ.
221.Dhammassāti nibbānassa. Anudhammanti anurūpaṃ niyyānadhammaṃ. Tenāha ‘‘anucchavikaṃ paṭipada’’nti. Pañcakkhandheti pañcupādānakkhandhe dasseti. ‘‘Dīgharattaṃ vata, bho’’tiādinā pāḷiyaṃ vivaṭṭaṃ dassitaṃ. Tenāha ‘‘upādānanirodhāti vivaṭṭaṃ dassento’’ti. Sesaṃ suviññeyyameva.
மாக³ண்டி³யஸுத்தவண்ணனாய லீனத்த²ப்பகாஸனா ஸமத்தா.
Māgaṇḍiyasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 5. மாக³ண்டி³யஸுத்தங் • 5. Māgaṇḍiyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 5. மாக³ண்டி³யஸுத்தவண்ணனா • 5. Māgaṇḍiyasuttavaṇṇanā
