| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
5. мааг̇ан̣д̣ияасуд̇д̇аван̣н̣анаа
5. Māgaṇḍiyasuttavaṇṇanā
207. звам̣ мз суд̇анд̇и мааг̇ан̣д̣ияасуд̇д̇ам̣. д̇ад̇т̇а аг̇яааг̇аарзд̇и аг̇г̇ихомасаалаяам̣. д̇ин̣асант̇аарагзд̇и д̣̇вз мааг̇ан̣д̣ияаа маад̇уло жа бхааг̇инзяяо жа. д̇зсу маад̇уло баб̣б̣аж̇ид̇ваа арахад̇д̇ам̣ бад̇д̇о, бхааг̇инзяяоби саубаниссаяо нажирассзва баб̣б̣аж̇ид̇ваа арахад̇д̇ам̣ баабун̣иссад̇и. ат̇асса бхаг̇аваа убаниссаяам̣ д̣̇исваа раман̣ийяам̣ д̣̇зваг̇аб̣бхасад̣̇исам̣ г̇анд̇хагудим̣ бахааяа д̇ад̇т̇а чааригад̇ин̣агажавараад̣̇ийхи углаабз аг̇яааг̇аарз д̇ин̣асант̇аарагам̣ бан̃н̃аабзд̇ваа барасан̇г̇ахагаран̣ад̇т̇ам̣ гад̇ибаахам̣ васид̇т̇а. д̇ам̣ санд̇хааязд̇ам̣ вуд̇д̇ам̣. д̇знубасан̇гамийд̇и на гзвалам̣ д̇ам̣д̣̇ивасамзва, яасмаа бана д̇ам̣ аг̇яааг̇аарам̣ г̇аамуубажаарз д̣̇аарагад̣̇ааригаахи огин̣н̣ам̣ авивид̇д̇ам̣, д̇асмаа бхаг̇аваа нижжагааламби д̣̇ивасабхааг̇ам̣ д̇асмим̣ ванасан̣д̣з вийд̇инаамзд̇ваа сааяам̣ ваасад̇т̇ааяа д̇ад̇т̇а убаг̇ажчад̇и.
207.Evaṃme sutanti māgaṇḍiyasuttaṃ. Tattha agyāgāreti aggihomasālayaṃ. Tiṇasanthāraketi dve māgaṇḍiyā mātulo ca bhāgineyyo ca. Tesu mātulo pabbajitvā arahattaṃ patto, bhāgineyyopi saupanissayo nacirasseva pabbajitvā arahattaṃ pāpuṇissati. Athassa bhagavā upanissayaṃ disvā ramaṇīyaṃ devagabbhasadisaṃ gandhakuṭiṃ pahāya tattha chārikatiṇakacavarādīhi uklāpe agyāgāre tiṇasanthārakaṃ paññāpetvā parasaṅgahakaraṇatthaṃ katipāhaṃ vasittha. Taṃ sandhāyetaṃ vuttaṃ. Tenupasaṅkamīti na kevalaṃ taṃdivasameva, yasmā pana taṃ agyāgāraṃ gāmūpacāre dārakadārikāhi okiṇṇaṃ avivittaṃ, tasmā bhagavā niccakālampi divasabhāgaṃ tasmiṃ vanasaṇḍe vītināmetvā sāyaṃ vāsatthāya tattha upagacchati.
ад̣̇д̣̇асаа ко…бз… д̇ин̣асант̇аарагам̣ бан̃н̃ад̇д̇анд̇и бхаг̇аваа ан̃н̃зсу д̣̇ивасзсу д̇ин̣асант̇аарагам̣ сан̇гхарид̇ваа сан̃н̃аан̣ам̣ гад̇ваа г̇ажчад̇и, д̇ам̣д̣̇ивасам̣ бана бан̃н̃абзд̇ваава аг̇амааси. гасмаа? д̇ад̣̇аа хи бажжуусасамаяз логам̣ ологзд̇ваава ад̣̇д̣̇аса – ‘‘аж̇ж̇а мааг̇ан̣д̣ияо ид̇хааг̇анд̇ваа имам̣ д̇ин̣асант̇аарагам̣ д̣̇исваа бхаарад̣̇вааж̇зна сад̣̇д̇хим̣ д̇ин̣асант̇аарагам̣ аараб̣бха гат̇аасаллаабам̣ гариссад̇и, ат̇аахам̣ ааг̇анд̇ваа д̇хаммам̣ д̣̇зсзссаами, со д̇хаммам̣ суд̇ваа мама санд̇игз баб̣б̣аж̇ид̇ваа арахад̇д̇ам̣ баабун̣иссад̇и. барзсам̣ сан̇г̇ахагаран̣ад̇т̇амзва хи маяаа баарамияо буурид̇аа’’д̇и д̇ин̣асант̇аарагам̣ бан̃н̃абзд̇ваава аг̇амааси.
Addasākho…pe… tiṇasanthārakaṃ paññattanti bhagavā aññesu divasesu tiṇasanthārakaṃ saṅgharitvā saññāṇaṃ katvā gacchati, taṃdivasaṃ pana paññapetvāva agamāsi. Kasmā? Tadā hi paccūsasamaye lokaṃ oloketvāva addasa – ‘‘ajja māgaṇḍiyo idhāgantvā imaṃ tiṇasanthārakaṃ disvā bhāradvājena saddhiṃ tiṇasanthārakaṃ ārabbha kathāsallāpaṃ karissati, athāhaṃ āgantvā dhammaṃ desessāmi, so dhammaṃ sutvā mama santike pabbajitvā arahattaṃ pāpuṇissati. Paresaṃ saṅgahakaraṇatthameva hi mayā pāramiyo pūritā’’ti tiṇasanthārakaṃ paññapetvāva agamāsi.
саман̣асзяяаануруубам̣ ман̃н̃зд̇и имам̣ д̇ин̣асант̇аарагам̣ ‘‘саман̣асса анужчавигаа сзяяаа’’д̇и ман̃н̃аами. на жа асан̃н̃ад̇асаман̣асса нивуд̇т̇адтаанамзд̇ам̣. д̇ат̇аахзд̇т̇а хад̇т̇зна аагад̣дхид̇адтаанам̣ ваа баад̣̇зна аагад̣дхид̇адтаанам̣ ваа сийсзна бахададтаанам̣ ваа на бан̃н̃ааяад̇и, анаагуло анаагин̣н̣о абхинно чзгзна жид̇д̇агаарзна д̇уулигааяа барижчинд̣̇ид̇ваа бан̃н̃ад̇д̇о вияа. сан̃н̃ад̇асаман̣асса васид̇адтаанам̣, гасса бхо васид̇адтаананд̇и бужчад̇и. бхуунахунод̇и хад̇авад̣дхино марияаад̣̇агаарагасса. гасмаа звамааха? часу д̣̇ваарзсу вад̣дхибан̃н̃аабаналад̣̇д̇хигад̇д̇аа. аяан̃хи д̇асса лад̣̇д̇хи – жагку б̣руухзд̇аб̣б̣ам̣ вад̣дхзд̇аб̣б̣ам̣, ад̣̇идтам̣ д̣̇агкид̇аб̣б̣ам̣, д̣̇идтам̣ самад̇иггамид̇аб̣б̣ам̣. сод̇ам̣ б̣руухзд̇аб̣б̣ам̣ вад̣дхзд̇аб̣б̣ам̣, асуд̇ам̣ сод̇аб̣б̣ам̣, суд̇ам̣ самад̇иггамид̇аб̣б̣ам̣. гхаанам̣ б̣руухзд̇аб̣б̣ам̣ вад̣дхзд̇аб̣б̣ам̣, агхааяид̇ам̣ гхааяид̇аб̣б̣ам̣, гхааяид̇ам̣ самад̇иггамид̇аб̣б̣ам̣. ж̇ивхаа б̣руухзд̇аб̣б̣аа вад̣дхзд̇аб̣б̣аа, ассааяид̇ам̣ сааяид̇аб̣б̣ам̣, сааяид̇ам̣ самад̇иггамид̇аб̣б̣ам̣. гааяо б̣руухзд̇аб̣б̣о вад̣дхзд̇аб̣б̣о, апудтам̣ пусид̇аб̣б̣ам̣, пудтам̣ самад̇иггамид̇аб̣б̣ам̣. мано б̣руухзд̇аб̣б̣о вад̣дхзд̇аб̣б̣о, авин̃н̃аад̇ам̣ виж̇аанид̇аб̣б̣ам̣, вин̃н̃аад̇ам̣ самад̇иггамид̇аб̣б̣ам̣. звам̣ со часу д̣̇ваарзсу вад̣дхим̣ бан̃н̃абзд̇и. бхаг̇аваа бана –
Samaṇaseyyānurūpaṃ maññeti imaṃ tiṇasanthārakaṃ ‘‘samaṇassa anucchavikā seyyā’’ti maññāmi. Na ca asaññatasamaṇassa nivutthaṭṭhānametaṃ. Tathāhettha hatthena ākaḍḍhitaṭṭhānaṃ vā pādena ākaḍḍhitaṭṭhānaṃ vā sīsena pahaṭaṭṭhānaṃ vā na paññāyati, anākulo anākiṇṇo abhinno chekena cittakārena tūlikāya paricchinditvā paññatto viya. Saññatasamaṇassa vasitaṭṭhānaṃ, kassa bho vasitaṭṭhānanti pucchati. Bhūnahunoti hatavaḍḍhino mariyādakārakassa. Kasmā evamāha? Chasu dvāresu vaḍḍhipaññāpanaladdhikattā. Ayañhi tassa laddhi – cakkhu brūhetabbaṃ vaḍḍhetabbaṃ, adiṭṭhaṃ dakkhitabbaṃ, diṭṭhaṃ samatikkamitabbaṃ. Sotaṃ brūhetabbaṃ vaḍḍhetabbaṃ, asutaṃ sotabbaṃ, sutaṃ samatikkamitabbaṃ. Ghānaṃ brūhetabbaṃ vaḍḍhetabbaṃ, aghāyitaṃ ghāyitabbaṃ, ghāyitaṃ samatikkamitabbaṃ. Jivhā brūhetabbā vaḍḍhetabbā, assāyitaṃ sāyitabbaṃ, sāyitaṃ samatikkamitabbaṃ. Kāyo brūhetabbo vaḍḍhetabbo, aphuṭṭhaṃ phusitabbaṃ, phuṭṭhaṃ samatikkamitabbaṃ. Mano brūhetabbo vaḍḍhetabbo, aviññātaṃ vijānitabbaṃ, viññātaṃ samatikkamitabbaṃ. Evaṃ so chasu dvāresu vaḍḍhiṃ paññapeti. Bhagavā pana –
‘‘жагкунаа сам̣варо саад̇ху, саад̇ху сод̇зна сам̣варо;
‘‘Cakkhunā saṃvaro sādhu, sādhu sotena saṃvaro;
гхаанзна сам̣варо саад̇ху, саад̇ху ж̇ивхааяа сам̣варо.
Ghānena saṃvaro sādhu, sādhu jivhāya saṃvaro.
гааязна сам̣варо саад̇ху, саад̇ху ваажааяа сам̣варо;
Kāyena saṃvaro sādhu, sādhu vācāya saṃvaro;
манасаа сам̣варо саад̇ху, саад̇ху саб̣б̣ад̇т̇а сам̣варо;
Manasā saṃvaro sādhu, sādhu sabbattha saṃvaro;
саб̣б̣ад̇т̇а сам̣вуд̇о бхигку, саб̣б̣ад̣̇угкаа бамужжад̇ий’’д̇и. (д̇ха. ба. 360-361) –
Sabbattha saṃvuto bhikkhu, sabbadukkhā pamuccatī’’ti. (dha. pa. 360-361) –
часу д̣̇ваарзсу сам̣варам̣ бан̃н̃абзд̇и. д̇асмаа со ‘‘вад̣дхихад̇о саман̣о г̇од̇амо марияаад̣̇агаараго’’д̇и ман̃н̃амаано ‘‘бхуунахуно’’д̇и ааха.
Chasu dvāresu saṃvaraṃ paññapeti. Tasmā so ‘‘vaḍḍhihato samaṇo gotamo mariyādakārako’’ti maññamāno ‘‘bhūnahuno’’ti āha.
арияз н̃ааяз д̇хаммз гусалзд̇и барисуд̣̇д̇хз гааран̣ад̇хаммз анаваж̇ж̇з. иминаа гим̣ д̣̇ассзд̇и? зваруубасса наама уг̇г̇ад̇асса бан̃н̃аад̇асса яасассино убари ваажам̣ бхаасамаанзна виймам̣сид̇ваа убад̇хаарзд̇ваа мукз аарагкам̣ табзд̇ваа бхаасид̇аб̣б̣о ход̇и. д̇асмаа маа сахасаа абхааси, мукз аарагкам̣ табзхийд̇и д̣̇ассзд̇и. зван̃хи но суд̇д̇з ожарад̇ийд̇и яасмаа амхаагам̣ суд̇д̇з звам̣ ааг̇ажчад̇и, на маяам̣ мукаарул̣хижчаамад̇д̇ам̣ вад̣̇аама, суд̇д̇з жа наама ааг̇ад̇ам̣ вад̣̇амаанаа гасса бхааязяяаама, д̇асмаа саммукааби нам̣ вад̣̇зяяаамаад̇и ад̇т̇о. аббоссуггод̇и мама рагканад̇т̇ааяа ануссугго аваавадо худ̇ваад̇и ад̇т̇о. вуд̇д̇ова нам̣ вад̣̇зяяаад̇и маяаа вуд̇д̇ова худ̇ваа абужчид̇ова гат̇ам̣ самудтаабзд̇ваа амб̣аж̇амб̣ууаад̣̇ийни г̇ахзд̇ваа вияа абуураяамаано маяаа гат̇ид̇анияаамзна бхавам̣ бхаарад̣̇вааж̇о вад̣̇зяяа, вад̣̇ассууд̇и ад̇т̇о.
Ariye ñāye dhamme kusaleti parisuddhe kāraṇadhamme anavajje. Iminā kiṃ dasseti? Evarūpassa nāma uggatassa paññātassa yasassino upari vācaṃ bhāsamānena vīmaṃsitvā upadhāretvā mukhe ārakkhaṃ ṭhapetvā bhāsitabbo hoti. Tasmā mā sahasā abhāsi, mukhe ārakkhaṃ ṭhapehīti dasseti. Evañhi no sutte ocaratīti yasmā amhākaṃ sutte evaṃ āgacchati, na mayaṃ mukhāruḷhicchāmattaṃ vadāma, sutte ca nāma āgataṃ vadamānā kassa bhāyeyyāma, tasmā sammukhāpi naṃ vadeyyāmāti attho. Appossukkoti mama rakkhanatthāya anussukko avāvaṭo hutvāti attho. Vuttova naṃ vadeyyāti mayā vuttova hutvā apucchitova kathaṃ samuṭṭhāpetvā ambajambūādīni gahetvā viya apūrayamāno mayā kathitaniyāmena bhavaṃ bhāradvājo vadeyya, vadassūti attho.
208. ассоси код̇и сад̇т̇аа аалогам̣ вад̣дхзд̇ваа д̣̇иб̣б̣ажагкунаа мааг̇ан̣д̣ияам̣ д̇ад̇т̇а ааг̇ад̇ам̣ ад̣̇д̣̇аса, д̣̇виннам̣ ж̇анаанам̣ бхаасамаанаанам̣ д̣̇иб̣б̣асод̇зна сад̣̇д̣̇амби ассоси. бадисаллаанаа вудтид̇од̇и паласамаабад̇д̇ияаа вудтид̇о. сам̣виг̇г̇од̇и бийд̇исам̣взг̇зна сам̣виг̇г̇о жалид̇о гамбид̇о. д̇асса гира зд̇ад̣̇ахоси – ‘‘нзва мааг̇ан̣д̣иязна саман̣асса г̇од̇амасса аарожид̇ам̣, на маяаа. амхз мун̃жид̇ваа ан̃н̃о зд̇т̇а д̇ад̇ияоби над̇т̇и, суд̇о бхависсад̇и амхаагам̣ сад̣̇д̣̇о д̇икин̣асод̇зна бурисзнаа’’д̇и. ат̇асса аб̣бханд̇арз бийд̇и уббаж̇ж̇ид̇ваа наванавуд̇иломагуубасахассаани уд̣̇д̇хаг̇г̇аани агааси. д̇зна вуд̇д̇ам̣ ‘‘сам̣виг̇г̇о ломахадтаж̇аад̇о’’д̇и. ат̇а ко мааг̇ан̣д̣ияо бариб̣б̣ааж̇агод̇и бариб̣б̣ааж̇агасса бабхиннамукам̣ вияа б̣ийж̇ам̣ барибаагаг̇ад̇ам̣ н̃аан̣ам̣, д̇асмаа саннисийд̣̇ид̇ум̣ асаггонд̇о аахин̣д̣амаано буна сад̇т̇у санд̇игам̣ ааг̇анд̇ваа згаманд̇ам̣ нисийд̣̇и. д̇ам̣ д̣̇ассзд̇ум̣ ‘‘ат̇а ко мааг̇ан̣д̣ияо’’д̇иаад̣̇и вуд̇д̇ам̣.
208.Assosikhoti satthā ālokaṃ vaḍḍhetvā dibbacakkhunā māgaṇḍiyaṃ tattha āgataṃ addasa, dvinnaṃ janānaṃ bhāsamānānaṃ dibbasotena saddampi assosi. Paṭisallānā vuṭṭhitoti phalasamāpattiyā vuṭṭhito. Saṃviggoti pītisaṃvegena saṃviggo calito kampito. Tassa kira etadahosi – ‘‘neva māgaṇḍiyena samaṇassa gotamassa ārocitaṃ, na mayā. Amhe muñcitvā añño ettha tatiyopi natthi, suto bhavissati amhākaṃ saddo tikhiṇasotena purisenā’’ti. Athassa abbhantare pīti uppajjitvā navanavutilomakūpasahassāni uddhaggāni akāsi. Tena vuttaṃ ‘‘saṃviggo lomahaṭṭhajāto’’ti. Athakho māgaṇḍiyo paribbājakoti paribbājakassa pabhinnamukhaṃ viya bījaṃ paripākagataṃ ñāṇaṃ, tasmā sannisīdituṃ asakkonto āhiṇḍamāno puna satthu santikaṃ āgantvā ekamantaṃ nisīdi. Taṃ dassetuṃ ‘‘atha kho māgaṇḍiyo’’tiādi vuttaṃ.
209. сад̇т̇аа – ‘‘звам̣ гира д̇вам̣, мааг̇ан̣д̣ияа, мам̣ аважаа’’д̇и авад̇ваава жагкум̣ ко, мааг̇ан̣д̣ияаад̇и бариб̣б̣ааж̇агасса д̇хаммад̣̇зсанам̣ аарабхи. д̇ад̇т̇а васанадтаанадтзна руубам̣ жагкусса аараамод̇и жагку руубаараамам̣. руубз рад̇анд̇и руубарад̇ам̣. руубзна жагку аамод̣̇ид̇ам̣ бамод̣̇ид̇анд̇и руубасамуд̣̇ид̇ам̣. д̣̇анд̇анд̇и ниб̣б̣исзванам̣. г̇уд̇д̇анд̇и г̇обид̇ам̣. рагкид̇анд̇и табид̇арагкам̣. сам̣вуд̇анд̇и бихид̇ам̣. сам̣варааяаад̇и бид̇хаанад̇т̇ааяа.
209. Satthā – ‘‘evaṃ kira tvaṃ, māgaṇḍiya, maṃ avacā’’ti avatvāva cakkhuṃ kho, māgaṇḍiyāti paribbājakassa dhammadesanaṃ ārabhi. Tattha vasanaṭṭhānaṭṭhena rūpaṃ cakkhussa ārāmoti cakkhu rūpārāmaṃ. Rūpe ratanti rūparataṃ. Rūpena cakkhu āmoditaṃ pamoditanti rūpasamuditaṃ. Dantanti nibbisevanaṃ. Guttanti gopitaṃ. Rakkhitanti ṭhapitarakkhaṃ. Saṃvutanti pihitaṃ. Saṃvarāyāti pidhānatthāya.
210. барижаарид̇абуб̣б̣од̇и абхирамид̇абуб̣б̣о. руубабарил̣ааханд̇и руубам̣ аараб̣бха уббаж̇ж̇анабарил̣аахам̣. имасса бана д̇з, мааг̇ан̣д̣ияа, гимасса важанийяанд̇и имасса руубам̣ бариг̇г̇ан̣хид̇ваа арахад̇д̇аббад̇д̇асса кийн̣аасавасса д̇аяаа гим̣ важанам̣ вад̇д̇аб̣б̣ам̣ асса, вуд̣дхихад̇о марияаад̣̇агаарагод̇и ид̣̇ам̣ вад̇д̇аб̣б̣ам̣, на вад̇д̇аб̣б̣анд̇и бужчад̇и. на гин̃жи, бхо г̇од̇амаад̇и, бхо г̇од̇ама, гин̃жи вад̇д̇аб̣б̣ам̣ над̇т̇и. сзсад̣̇ваарзсуби зсзва наяо.
210.Paricāritapubboti abhiramitapubbo. Rūpapariḷāhanti rūpaṃ ārabbha uppajjanapariḷāhaṃ. Imassa pana te, māgaṇḍiya, kimassa vacanīyanti imassa rūpaṃ pariggaṇhitvā arahattappattassa khīṇāsavassa tayā kiṃ vacanaṃ vattabbaṃ assa, vuḍḍhihato mariyādakārakoti idaṃ vattabbaṃ, na vattabbanti pucchati. Na kiñci, bho gotamāti, bho gotama, kiñci vattabbaṃ natthi. Sesadvāresupi eseva nayo.
211. ид̣̇аани яасмаа д̇аяаа бан̃жагканд̇хз бариг̇г̇ахзд̇ваа арахад̇д̇аббад̇д̇асса кийн̣аасавасса гин̃жи вад̇д̇аб̣б̣ам̣ над̇т̇и, ахан̃жа бан̃жагканд̇хз бариг̇г̇ахзд̇ваа саб̣б̣ан̃н̃уд̇ам̣ бад̇д̇о, д̇асмаа ахамби д̇з на гин̃жи вад̇д̇аб̣б̣од̇и д̣̇ассзд̇ум̣ ахам̣ ко банаад̇иаад̣̇имааха. д̇асса маяхам̣ мааг̇ан̣д̣ияаад̇и г̇ихигаалз ад̇д̇ано самбад̇д̇им̣ д̣̇ассзнд̇о ааха. д̇ад̇т̇а вассигод̇иаад̣̇ийсу яад̇т̇а сукам̣ ход̇и вассагаалз васид̇ум̣, аяам̣ вассиго. ид̇арзсуби зсзва наяо. аяам̣ банзд̇т̇а важанад̇т̇о – вассам̣ ваасо вассам̣, вассам̣ арахад̇ийд̇и вассиго. ид̇арзсуби зсзва наяо.
211. Idāni yasmā tayā pañcakkhandhe pariggahetvā arahattappattassa khīṇāsavassa kiñci vattabbaṃ natthi, ahañca pañcakkhandhe pariggahetvā sabbaññutaṃ patto, tasmā ahampi te na kiñci vattabboti dassetuṃ ahaṃ kho panātiādimāha. Tassa mayhaṃ māgaṇḍiyāti gihikāle attano sampattiṃ dassento āha. Tattha vassikotiādīsu yattha sukhaṃ hoti vassakāle vasituṃ, ayaṃ vassiko. Itaresupi eseva nayo. Ayaṃ panettha vacanattho – vassaṃ vāso vassaṃ, vassaṃ arahatīti vassiko. Itaresupi eseva nayo.
д̇ад̇т̇а вассиго баасаад̣̇о наад̇иужжо ход̇и наад̇инийжо, д̣̇ваараваад̇абаанаанибисса наад̇ид̇анууни наад̇иб̣ахууни, бхуумад̇т̇аран̣абажжад̇т̇аран̣акаж̇ж̇абхож̇ж̇аанибзд̇т̇а миссагаанзва вадданд̇и. хзманд̇игз т̇амбхааби бхид̇д̇ияоби нийжаа хонд̇и, д̣̇ваараваад̇абаанаани д̇анугаани сукумажчид̣̇д̣̇аани. ун̣хабавзсанад̇т̇ааяа бхид̇д̇инияуухаани нийхарийяанд̇и. бхуумад̇т̇аран̣абажжад̇т̇аран̣аниваасанабаарубанаани банзд̇т̇а ун̣хавийрияаани гамб̣алаад̣̇ийни вадданд̇и. каж̇ж̇абхож̇ж̇ам̣ синид̣̇д̇хам̣ гадугасанниссид̇ан̃жа. г̇имхигз т̇амбхааби бхид̇д̇ияоби ужжаа хонд̇и. д̣̇ваараваад̇абаанаани банзд̇т̇а б̣ахууни вибулаж̇аалаани бхаванд̇и. бхуумад̇т̇аран̣аад̣̇ийни д̣̇угууламаяаани вадданд̇и, каж̇ж̇абхож̇ж̇аани мад̇хурарасасийд̇авийрияаани. ваад̇абаанасамийбзсу жзд̇т̇а нава жаадияо табзд̇ваа уд̣̇агасса буурзд̇ваа нийлуббалаад̣̇ийхи сан̃чаад̣̇знд̇и. д̇зсу д̇зсу бад̣̇зсзсу уд̣̇агаяанд̇аани гаронд̇и, язхи д̣̇звз вассанд̇з вияа уд̣̇агад̇хаараа нигкаманд̇и.
Tattha vassiko pāsādo nātiucco hoti nātinīco, dvāravātapānānipissa nātitanūni nātibahūni, bhūmattharaṇapaccattharaṇakhajjabhojjānipettha missakāneva vaṭṭanti. Hemantike thambhāpi bhittiyopi nīcā honti, dvāravātapānāni tanukāni sukhumacchiddāni. Uṇhapavesanatthāya bhittiniyūhāni nīharīyanti. Bhūmattharaṇapaccattharaṇanivāsanapārupanāni panettha uṇhavīriyāni kambalādīni vaṭṭanti. Khajjabhojjaṃ siniddhaṃ kaṭukasannissitañca. Gimhike thambhāpi bhittiyopi uccā honti. Dvāravātapānāni panettha bahūni vipulajālāni bhavanti. Bhūmattharaṇādīni dukūlamayāni vaṭṭanti, khajjabhojjāni madhurarasasītavīriyāni. Vātapānasamīpesu cettha nava cāṭiyo ṭhapetvā udakassa pūretvā nīluppalādīhi sañchādenti. Tesu tesu padesesu udakayantāni karonti, yehi deve vassante viya udakadhārā nikkhamanti.
б̣од̇хисад̇д̇асса бана адтасад̇асуван̣н̣агхадз жа раж̇ад̇агхадз жа г̇анд̇ход̣̇агасса буурзд̇ваа нийлуббалаг̇ажчагз гад̇ваа саяанам̣ бариваарзд̇ваа табаяим̣су. маханд̇зсу лохагадаахзсу г̇анд̇хагалалам̣ буурзд̇ваа нийлуббалабад̣̇умабун̣д̣арийгаани робзд̇ваа уд̇уг̇г̇ахан̣ад̇т̇ааяа д̇ад̇т̇а д̇ад̇т̇а табзсум̣. суурияарасмийхи бубпаани бубпанд̇и. наанаавид̇хаа бхамараг̇ан̣аа баасаад̣̇ам̣ бависид̇ваа бубпзсу расам̣ г̇ан̣ханд̇аа вижаранд̇и. баасаад̣̇о ад̇исуг̇анд̇хо ход̇и. яамагабхид̇д̇ияаа анд̇арз лоханаал̣им̣ табзд̇ваа навабхуумигабаасаад̣̇асса убари аагаасан̇г̇ан̣з рад̇анаман̣д̣абамад̇т̇агз сукумажчид̣̇д̣̇агам̣ ж̇аалам̣ б̣ад̣̇д̇хам̣ ахоси. згасмим̣ таанз сугкамахим̣сажаммам̣ басаарзд̇и. б̣од̇хисад̇д̇асса уд̣̇агагийл̣анавзлааяа махим̣сажаммз баасаан̣аг̇ул̣з кибанд̇и, мзгхат̇анид̇асад̣̇д̣̇о вияа ход̇и. хздтаа яанд̇ам̣ баривад̇д̇знд̇и, уд̣̇агам̣ абхирухид̇ваа ж̇ааламад̇т̇агз бад̇ад̇и, вассабад̇анасалилам̣ вияа ход̇и. д̇ад̣̇аа б̣од̇хисад̇д̇о нийлабадам̣ ниваасзд̇и, нийлабадам̣ баарубад̇и, нийлабасаад̇ханам̣ басаад̇хзд̇и. бариваараабисса жад̇д̇аалийсанаадагасахассаани нийлавад̇т̇аабхаран̣аанзва нийлавилзбанаани худ̇ваа махаабурисам̣ бариваарзд̇ваа рад̇анаман̣д̣абам̣ г̇ажчанд̇и. д̣̇ивасабхааг̇ам̣ уд̣̇агагийл̣ам̣ гийл̣анд̇о сийд̇алам̣ уд̇усукам̣ анубход̇и.
Bodhisattassa pana aṭṭhasatasuvaṇṇaghaṭe ca rajataghaṭe ca gandhodakassa pūretvā nīluppalagacchake katvā sayanaṃ parivāretvā ṭhapayiṃsu. Mahantesu lohakaṭāhesu gandhakalalaṃ pūretvā nīluppalapadumapuṇḍarīkāni ropetvā utuggahaṇatthāya tattha tattha ṭhapesuṃ. Sūriyarasmīhi pupphāni pupphanti. Nānāvidhā bhamaragaṇā pāsādaṃ pavisitvā pupphesu rasaṃ gaṇhantā vicaranti. Pāsādo atisugandho hoti. Yamakabhittiyā antare lohanāḷiṃ ṭhapetvā navabhūmikapāsādassa upari ākāsaṅgaṇe ratanamaṇḍapamatthake sukhumacchiddakaṃ jālaṃ baddhaṃ ahosi. Ekasmiṃ ṭhāne sukkhamahiṃsacammaṃ pasāreti. Bodhisattassa udakakīḷanavelāya mahiṃsacamme pāsāṇaguḷe khipanti, meghathanitasaddo viya hoti. Heṭṭhā yantaṃ parivattenti, udakaṃ abhiruhitvā jālamatthake patati, vassapatanasalilaṃ viya hoti. Tadā bodhisatto nīlapaṭaṃ nivāseti, nīlapaṭaṃ pārupati, nīlapasādhanaṃ pasādheti. Parivārāpissa cattālīsanāṭakasahassāni nīlavatthābharaṇāneva nīlavilepanāni hutvā mahāpurisaṃ parivāretvā ratanamaṇḍapaṃ gacchanti. Divasabhāgaṃ udakakīḷaṃ kīḷanto sītalaṃ utusukhaṃ anubhoti.
баасаад̣̇асса жад̇уусу д̣̇исаасу жад̇д̇ааро сараа хонд̇и. д̣̇иваагаалз наанааван̣н̣асагун̣аг̇ан̣аа баажийнасарад̇о вудтааяа виравамаанаа баасаад̣̇амад̇т̇агзна бажчимасарам̣ г̇ажчанд̇и. бажчимасарад̇о вудтааяа баажийнасарам̣, уд̇д̇арасарад̇о д̣̇агкин̣асарам̣, д̣̇агкин̣асарад̇о уд̇д̇арасарам̣ г̇ажчанд̇и, анд̇аравассасамаяо вияа ход̇и. хзманд̇игабаасаад̣̇о бана бан̃жабхуумиго ахоси, вассигабаасаад̣̇о сад̇д̇абхуумиго.
Pāsādassa catūsu disāsu cattāro sarā honti. Divākāle nānāvaṇṇasakuṇagaṇā pācīnasarato vuṭṭhāya viravamānā pāsādamatthakena pacchimasaraṃ gacchanti. Pacchimasarato vuṭṭhāya pācīnasaraṃ, uttarasarato dakkhiṇasaraṃ, dakkhiṇasarato uttarasaraṃ gacchanti, antaravassasamayo viya hoti. Hemantikapāsādo pana pañcabhūmiko ahosi, vassikapāsādo sattabhūmiko.
ниббурисзхийд̇и бурисавирахид̇зхи. на гзвалан̃жзд̇т̇а д̇уурияаанзва ниббурисаани, саб̣б̣адтаанааниби ниббурисаанзва . д̣̇овааригааби ид̇т̇ияова, нхаабанаад̣̇ибаригаммагарааби ид̇т̇ияова. рааж̇аа гира – ‘‘д̇ат̇ааруубам̣ иссарияасукасамбад̇д̇им̣ анубхавамаанасса бурисам̣ д̣̇исваа барисан̇гаа уббаж̇ж̇ад̇и, саа мз буд̇д̇асса маа ахосий’’д̇и саб̣б̣агижжзсу ид̇т̇ияова табзси. д̇ааяа рад̇ияаа рамамаанод̇и ид̣̇ам̣ жад̇уд̇т̇аж̇жхаанигапаласамаабад̇д̇ирад̇им̣ санд̇хааяа вуд̇д̇ам̣.
Nippurisehīti purisavirahitehi. Na kevalañcettha tūriyāneva nippurisāni, sabbaṭṭhānānipi nippurisāneva . Dovārikāpi itthiyova, nhāpanādiparikammakarāpi itthiyova. Rājā kira – ‘‘tathārūpaṃ issariyasukhasampattiṃ anubhavamānassa purisaṃ disvā parisaṅkā uppajjati, sā me puttassa mā ahosī’’ti sabbakiccesu itthiyova ṭhapesi. Tāya ratiyā ramamānoti idaṃ catutthajjhānikaphalasamāpattiratiṃ sandhāya vuttaṃ.
212. г̇ахабад̇и ваа г̇ахабад̇ибуд̇д̇о ваад̇и зд̇т̇а яасмаа кад̇д̇ияаанам̣ сзд̇ажчад̇д̇асмим̣язва бад̇т̇анаа ход̇и, махаа жа нзсам̣ бабан̃жо, б̣раахман̣аа манд̇зхи ад̇ид̇д̇аа манд̇з г̇авзсанд̇аа вижаранд̇и, г̇ахабад̇ино бана муд̣̇д̣̇ааг̇ан̣анамад̇д̇ам̣ уг̇г̇ахид̇агаалад̇о бадтааяа самбад̇д̇им̣язва анубхаванд̇и, д̇асмаа кад̇д̇ияаб̣раахман̣з аг̇г̇ахзд̇ваа ‘‘г̇ахабад̇и ваа г̇ахабад̇ибуд̇д̇о ваа’’д̇и ааха. ааваддзяяаад̇и маанусагагаамахзд̇у ааваддо бхавзяяаад̇и ад̇т̇о. абхигганд̇ад̇араад̇и висидтад̇араа. бан̣ийд̇ад̇араад̇и ад̇аббагад̇араа. вуд̇д̇амби жзд̇ам̣ –
212.Gahapati vā gahapatiputto vāti ettha yasmā khattiyānaṃ setacchattasmiṃyeva patthanā hoti, mahā ca nesaṃ papañco, brāhmaṇā mantehi atittā mante gavesantā vicaranti, gahapatino pana muddāgaṇanamattaṃ uggahitakālato paṭṭhāya sampattiṃyeva anubhavanti, tasmā khattiyabrāhmaṇe aggahetvā ‘‘gahapati vā gahapatiputto vā’’ti āha. Āvaṭṭeyyāti mānusakakāmahetu āvaṭṭo bhaveyyāti attho. Abhikkantatarāti visiṭṭhatarā. Paṇītatarāti atappakatarā. Vuttampi cetaṃ –
‘‘гусаг̇г̇знуд̣̇агамаад̣̇ааяа, самуд̣̇д̣̇з уд̣̇агам̣ минз;
‘‘Kusaggenudakamādāya, samudde udakaṃ mine;
звам̣ маанусагаа гаамаа, д̣̇иб̣б̣агаамаана санд̇игз’’д̇и. (ж̇аа. 2.21.389) –
Evaṃ mānusakā kāmā, dibbakāmāna santike’’ti. (jā. 2.21.389) –
самад̇хиг̇аяха д̇идтад̇ийд̇и д̣̇иб̣б̣асукам̣ г̇ан̣хид̇ваа д̇ад̇о висидтад̇араа худ̇ваа д̇идтад̇и.
Samadhigayha tiṭṭhatīti dibbasukhaṃ gaṇhitvā tato visiṭṭhatarā hutvā tiṭṭhati.
обаммасам̣санд̣̇анам̣ банзд̇т̇а звам̣ взд̣̇ид̇аб̣б̣ам̣ – г̇ахабад̇исса бан̃жахи гаамаг̇ун̣зхи саман̇г̇ийбхууд̇агаало вияа б̣од̇хисад̇д̇асса д̇ийсу баасаад̣̇зсу жад̇д̇аалийсасахассаид̇т̇имаж̇жхз мод̣̇анагаало, д̇асса сужарид̇ам̣ буурзд̇ваа саг̇г̇з ниб̣б̣ад̇д̇агаало вияа б̣од̇хисад̇д̇асса абхинигкаманам̣ гад̇ваа б̣од̇хибаллан̇гз саб̣б̣ан̃н̃уд̇ам̣ бадивид̣̇д̇хагаало , д̇асса нанд̣̇анаванз самбад̇д̇им̣ анубхаванагаало вияа д̇ат̇ааг̇ад̇асса жад̇уд̇т̇аж̇жхаанигапаласамаабад̇д̇ирад̇ияаа вийд̇ивад̇д̇анагаало, д̇асса маанусагаанам̣ бан̃жаннам̣ гаамаг̇ун̣аанам̣ абад̇т̇анагаало вияа д̇ат̇ааг̇ад̇асса жад̇уд̇т̇аж̇жхаанигапаласамаабад̇д̇ирад̇ияаа вийд̇инаамзнд̇асса хийнаж̇анасукасса абад̇т̇анагаалод̇и.
Opammasaṃsandanaṃ panettha evaṃ veditabbaṃ – gahapatissa pañcahi kāmaguṇehi samaṅgībhūtakālo viya bodhisattassa tīsu pāsādesu cattālīsasahassaitthimajjhe modanakālo, tassa sucaritaṃ pūretvā sagge nibbattakālo viya bodhisattassa abhinikkhamanaṃ katvā bodhipallaṅke sabbaññutaṃ paṭividdhakālo , tassa nandanavane sampattiṃ anubhavanakālo viya tathāgatassa catutthajjhānikaphalasamāpattiratiyā vītivattanakālo, tassa mānusakānaṃ pañcannaṃ kāmaguṇānaṃ apatthanakālo viya tathāgatassa catutthajjhānikaphalasamāpattiratiyā vītināmentassa hīnajanasukhassa apatthanakāloti.
213. сукийд̇и батамам̣ д̣̇угкид̇о бажчаа сукид̇о асса. сзрийд̇и батамам̣ взж̇ж̇ад̣̇уд̇ияаго бажчаа сзрий згаго бхавзяяа. саяам̣васийд̇и батамам̣ взж̇ж̇асса васз вад̇д̇амаано взж̇ж̇зна нисийд̣̇аад̇и вуд̇д̇з нисийд̣̇и, нибаж̇ж̇аад̇и вуд̇д̇з нибаж̇ж̇и, бхун̃ж̇аад̇и вуд̇д̇з бхун̃ж̇и, биваад̇и вуд̇д̇з биви, бажчаа саяам̣васий ж̇аад̇о. язна гаамам̣ г̇амод̇и батамам̣ ижчид̇ижчид̇адтаанам̣ г̇анд̇ум̣ наалад̇т̇а, бажчаа рог̇з вуубасанд̇з ванад̣̇ассана-г̇ирид̣̇ассана-баб̣б̣ад̇ад̣̇ассанаад̣̇ийсуби язнагаамам̣ г̇амо ж̇аад̇о, яад̇т̇а яад̇т̇зва г̇анд̇ум̣ ижчад̇и, д̇ад̇т̇а д̇ад̇т̇зва г̇ажчзяяа.
213.Sukhīti paṭhamaṃ dukkhito pacchā sukhito assa. Serīti paṭhamaṃ vejjadutiyako pacchā serī ekako bhaveyya. Sayaṃvasīti paṭhamaṃ vejjassa vase vattamāno vejjena nisīdāti vutte nisīdi, nipajjāti vutte nipajji, bhuñjāti vutte bhuñji, pivāti vutte pivi, pacchā sayaṃvasī jāto. Yena kāmaṃgamoti paṭhamaṃ icchiticchitaṭṭhānaṃ gantuṃ nālattha, pacchā roge vūpasante vanadassana-giridassana-pabbatadassanādīsupi yenakāmaṃ gamo jāto, yattha yattheva gantuṃ icchati, tattha tattheva gaccheyya.
зд̇т̇ааби ид̣̇ам̣ обаммасам̣санд̣̇анам̣ – бурисасса гудтигаало вияа хи б̣од̇хисад̇д̇асса аг̇аарамаж̇жхз васанагаало, ан̇г̇аарагабаллам̣ вияа згам̣ гаамавад̇т̇у, д̣̇вз габаллаани вияа д̣̇вз вад̇т̇ууни, саггасса бана д̣̇зваран̃н̃о ад̣дхад̇зяяагодияаани ан̇г̇аарагабаллаани вияа ад̣дхад̇ияанаадагагодияо, накзхи ван̣амукаани д̇ажчзд̇ваа ан̇г̇аарагабаллз барид̇аабанам̣ вияа вад̇т̇убадисзванам̣, бхзсаж̇ж̇ам̣ ааг̇амма арог̇агаало вияа гаамзсу аад̣̇ийнавам̣ нзгкаммз жа аанисам̣сам̣ д̣̇исваа нигкамма б̣уд̣̇д̇хабхууд̇агаалз жад̇уд̇т̇аж̇жхаанигапаласамаабад̇д̇ирад̇ияаа вийд̇ивад̇д̇анагаало, ан̃н̃ам̣ гудтибурисам̣ д̣̇исваа абад̇т̇анагаало вияа д̇ааяа рад̇ияаа вийд̇инаамзнд̇асса хийнаж̇анарад̇ияаа абад̇т̇анагаалод̇и.
Etthāpi idaṃ opammasaṃsandanaṃ – purisassa kuṭṭhikālo viya hi bodhisattassa agāramajjhe vasanakālo, aṅgārakapallaṃ viya ekaṃ kāmavatthu, dve kapallāni viya dve vatthūni, sakkassa pana devarañño aḍḍhateyyakoṭiyāni aṅgārakapallāni viya aḍḍhatiyanāṭakakoṭiyo, nakhehi vaṇamukhāni tacchetvā aṅgārakapalle paritāpanaṃ viya vatthupaṭisevanaṃ, bhesajjaṃ āgamma arogakālo viya kāmesu ādīnavaṃ nekkhamme ca ānisaṃsaṃ disvā nikkhamma buddhabhūtakāle catutthajjhānikaphalasamāpattiratiyā vītivattanakālo, aññaṃ kuṭṭhipurisaṃ disvā apatthanakālo viya tāya ratiyā vītināmentassa hīnajanaratiyā apatthanakāloti.
214. убахад̇инд̣̇рияод̇и гимирагудтзна наама убахад̇агааяаббасаад̣̇о. убахад̇инд̣̇рияаад̇и убахад̇абан̃н̃инд̣̇рияаа. д̇з яат̇аа со убахад̇агааяинд̣̇рияо гудтий д̣̇угкасампассасмим̣язва аг̇г̇исмим̣ сукамид̇и вибарийд̇асан̃н̃ам̣ бажжалад̇т̇а, звам̣ бан̃н̃инд̣̇рияасса убахад̇ад̇д̇аа д̣̇угкасампассзсвзва гаамзсу сукамид̇и вибарийд̇асан̃н̃ам̣ бажжалад̇т̇ум̣.
214.Upahatindriyoti kimirakuṭṭhena nāma upahatakāyappasādo. Upahatindriyāti upahatapaññindriyā. Te yathā so upahatakāyindriyo kuṭṭhī dukkhasamphassasmiṃyeva aggismiṃ sukhamiti viparītasaññaṃ paccalattha, evaṃ paññindriyassa upahatattā dukkhasamphassesveva kāmesu sukhamiti viparītasaññaṃ paccalatthuṃ.
215. асужид̇араани жзваад̇иаад̣̇ийсу багад̇ияаава д̇аани асужийни жа д̣̇уг̇г̇анд̇хаани жа бууд̇ийни жа, ид̣̇аани бана асужид̇араани жзва д̣̇уг̇г̇анд̇хад̇араани жа бууд̇ид̇араани жа хонд̇и. гаажийд̇и д̇асса хи барид̇аабзнд̇асса жа ган̣д̣ууванд̇асса жа баан̣агаа анд̇о бависанд̇и, д̣̇удталохид̇ад̣̇удтабуб̣б̣аа баг̇гхаранд̇и. звамасса гаажи ассаад̣̇амад̇д̇аа ход̇и.
215.Asucitarāni cevātiādīsu pakatiyāva tāni asucīni ca duggandhāni ca pūtīni ca, idāni pana asucitarāni ceva duggandhatarāni ca pūtitarāni ca honti. Kācīti tassa hi paritāpentassa ca kaṇḍūvantassa ca pāṇakā anto pavisanti, duṭṭhalohitaduṭṭhapubbā paggharanti. Evamassa kāci assādamattā hoti.
аарог̇яабарамаад̇и г̇аат̇ааяа яз гзжи д̇ханалаабхаа ваа яасалаабхаа ваа буд̇д̇алаабхаа ваа ад̇т̇и, аарог̇яам̣ д̇зсам̣ барамам̣ уд̇д̇амам̣, над̇т̇и д̇ад̇о уд̇д̇арид̇аро лаабход̇и, аарог̇яабарамаа лаабхаа. яам̣гин̃жи жхаанасукам̣ ваа маг̇г̇асукам̣ ваа паласукам̣ ваа ад̇т̇и, ниб̣б̣аанам̣ д̇ад̇т̇а барамам̣, над̇т̇и д̇ад̇о уд̇д̇арид̇арам̣ суканд̇и ниб̣б̣аанам̣ барамам̣ сукам̣. адтан̇г̇иго маг̇г̇аананд̇и буб̣б̣абхааг̇амаг̇г̇аанам̣ буб̣б̣абхааг̇аг̇аманзнзва амад̇аг̇аамийнам̣ адтан̇г̇иго кзмо, над̇т̇и д̇ад̇о кзмад̇аро ан̃н̃о маг̇г̇о. ат̇а ваа кзмам̣ амад̇аг̇ааминанд̇и зд̇т̇а кзманд̇иби амад̇анд̇иби ниб̣б̣аанассзва наамам̣. яаавад̇аа бут̇усаман̣аб̣раахман̣аа бараббаваад̣̇аа кзмаг̇аамино жа амад̇аг̇аамино жаад̇и лад̣̇д̇хивасзна г̇ахид̇аа, саб̣б̣зсам̣ д̇зсам̣ кзмаамад̇аг̇аамийнам̣ маг̇г̇аанам̣ адтан̇г̇иго барамо уд̇д̇амод̇и аяамзд̇т̇а ад̇т̇о.
Ārogyaparamāti gāthāya ye keci dhanalābhā vā yasalābhā vā puttalābhā vā atthi, ārogyaṃ tesaṃ paramaṃ uttamaṃ, natthi tato uttaritaro lābhoti, ārogyaparamā lābhā. Yaṃkiñci jhānasukhaṃ vā maggasukhaṃ vā phalasukhaṃ vā atthi, nibbānaṃ tattha paramaṃ, natthi tato uttaritaraṃ sukhanti nibbānaṃ paramaṃ sukhaṃ. Aṭṭhaṅgiko maggānanti pubbabhāgamaggānaṃ pubbabhāgagamaneneva amatagāmīnaṃ aṭṭhaṅgiko khemo, natthi tato khemataro añño maggo. Atha vā khemaṃ amatagāminanti ettha khemantipi amatantipi nibbānasseva nāmaṃ. Yāvatā puthusamaṇabrāhmaṇā parappavādā khemagāmino ca amatagāmino cāti laddhivasena gahitā, sabbesaṃ tesaṃ khemaamatagāmīnaṃ maggānaṃ aṭṭhaṅgiko paramo uttamoti ayamettha attho.
216. аажарияабаажарияаананд̇и аажарияаанан̃жзва аажарияаажарияаанан̃жа. самзд̇ийд̇и зганаал̣ияаа мид̇ам̣ вияа згад̇улааяа д̇улид̇ам̣ вияа сад̣̇исам̣ ход̇и ниннаанаагаран̣ам̣. аномаж̇ж̇ад̇ийд̇и баан̣им̣ хздтаа од̇аарзнд̇о маж̇ж̇ад̇и – ‘‘ид̣̇ам̣ д̇ам̣, бхо г̇од̇ама, аарог̇яам̣, ид̣̇ам̣ д̇ам̣ ниб̣б̣аана’’нд̇и гаалзна сийсам̣ гаалзна урам̣ баримаж̇ж̇анд̇о звамааха.
216.Ācariyapācariyānanti ācariyānañceva ācariyācariyānañca. Sametīti ekanāḷiyā mitaṃ viya ekatulāya tulitaṃ viya sadisaṃ hoti ninnānākaraṇaṃ. Anomajjatīti pāṇiṃ heṭṭhā otārento majjati – ‘‘idaṃ taṃ, bho gotama, ārogyaṃ, idaṃ taṃ nibbāna’’nti kālena sīsaṃ kālena uraṃ parimajjanto evamāha.
217. чзганд̇и самбаннам̣. саахул̣ижийрзнаад̇и гаал̣агзхи зл̣агаломзхи гад̇ат̇уулажийрзна. сан̇гааражол̣агзнаад̇иби вад̣̇анд̇и. ваажам̣ нижчаарзяяаад̇и гаалзна д̣̇асааяа гаалзна анд̇з гаалзна маж̇жхз баримаж̇ж̇анд̇о нижчаарзяяа, вад̣̇зяяаад̇и ад̇т̇о. буб̣б̣агзхзсаад̇и буб̣б̣агзхи зсаа. вибассийби хи бхаг̇аваа…бз… гассабоби бхаг̇аваа жад̇убарисамаж̇жхз нисинно имам̣ г̇аат̇ам̣ абхааси, ‘‘ад̇т̇аниссид̇аг̇аат̇аа’’д̇и махааж̇ано уг̇г̇ан̣хи. сад̇т̇ари бариниб̣б̣уд̇з абарабхааг̇з бариб̣б̣ааж̇агаанам̣ анд̇арам̣ бавидтаа. д̇з бод̇т̇агаг̇ад̇ам̣ гад̇ваа бад̣̇ад̣̇ваяамзва рагкид̇ум̣ сагким̣су. д̇знааха – саа зд̇арахи анубуб̣б̣зна бут̇уж̇ж̇анаг̇аат̇аад̇и.
217.Chekanti sampannaṃ. Sāhuḷicīrenāti kāḷakehi eḷakalomehi katathūlacīrena. Saṅkāracoḷakenātipi vadanti. Vācaṃ nicchāreyyāti kālena dasāya kālena ante kālena majjhe parimajjanto nicchāreyya, vadeyyāti attho. Pubbakehesāti pubbakehi esā. Vipassīpi hi bhagavā…pe… kassapopi bhagavā catuparisamajjhe nisinno imaṃ gāthaṃ abhāsi, ‘‘atthanissitagāthā’’ti mahājano uggaṇhi. Satthari parinibbute aparabhāge paribbājakānaṃ antaraṃ paviṭṭhā. Te potthakagataṃ katvā padadvayameva rakkhituṃ sakkhiṃsu. Tenāha – sā etarahi anupubbena puthujjanagāthāti.
218. рог̇ова бхууд̇од̇и рог̇абхууд̇о. сзсабад̣̇зсуби зсзва наяо. арияам̣ жагкунд̇и барисуд̣̇д̇хам̣ вибассанаан̃аан̣ан̃жзва маг̇г̇ан̃аан̣ан̃жа. баход̇ийд̇и самад̇т̇о. бхзсаж̇ж̇ам̣ гарзяяаад̇и уд̣̇д̇хам̣вирзжанам̣ ад̇ховирзжанам̣ ан̃ж̇анан̃жаад̇и бхзсаж̇ж̇ам̣ гарзяяа.
218. Rogova bhūtoti rogabhūto. Sesapadesupi eseva nayo. Ariyaṃ cakkhunti parisuddhaṃ vipassanāñāṇañceva maggañāṇañca. Pahotīti samattho. Bhesajjaṃ kareyyāti uddhaṃvirecanaṃ adhovirecanaṃ añjanañcāti bhesajjaṃ kareyya.
219. на жагкууни уббаад̣̇зяяаад̇и яасса хи анд̇араа бид̇д̇асзмхаад̣̇ибаливзтзна жагкубасаад̣̇о убахад̇о ход̇и, со чзгам̣ взж̇ж̇ам̣ ааг̇амма саббааяабхзсаж̇ж̇ам̣ сзванд̇о жагкууни уббаад̣̇зд̇и наама. ж̇ажжанд̇хасса бана маад̇угужчияам̣язва винадтаани, д̇асмаа со на лабхад̇и. д̇зна вуд̇д̇ам̣ ‘‘на жагкууни уббаад̣̇зяяаа’’д̇и.
219.Na cakkhūni uppādeyyāti yassa hi antarā pittasemhādipaliveṭhena cakkhupasādo upahato hoti, so chekaṃ vejjaṃ āgamma sappāyabhesajjaṃ sevanto cakkhūni uppādeti nāma. Jaccandhassa pana mātukucchiyaṃyeva vinaṭṭhāni, tasmā so na labhati. Tena vuttaṃ ‘‘na cakkhūni uppādeyyā’’ti.
220. д̣̇уд̇ияаваарз ж̇ажжанд̇ход̇и ж̇аад̇агаалад̇о бадтааяа бид̇д̇аад̣̇ибаливзтзна анд̇хо. амусминд̇и д̇асмим̣ буб̣б̣з вуд̇д̇з. амид̇д̇ад̇оби д̣̇ахзяяаад̇и амид̇д̇о мз аяанд̇и звам̣ амид̇д̇ад̇о табзяяа. д̣̇уд̇ияабад̣̇зби зсзва наяо. иминаа жид̇д̇знаад̇и ваддз ануг̇ад̇ажид̇д̇зна. д̇асса мз убаад̣̇аанабажжаяаад̇и згасанд̇хи д̣̇висан̇кзбо бажжаяаагааро гат̇ид̇о, ваддам̣ вибхаавид̇ам̣.
220. Dutiyavāre jaccandhoti jātakālato paṭṭhāya pittādipaliveṭhena andho. Amusminti tasmiṃ pubbe vutte. Amittatopi daheyyāti amitto me ayanti evaṃ amittato ṭhapeyya. Dutiyapadepi eseva nayo. Iminā cittenāti vaṭṭe anugatacittena. Tassa me upādānapaccayāti ekasandhi dvisaṅkhepo paccayākāro kathito, vaṭṭaṃ vibhāvitaṃ.
221. д̇хаммаануд̇хамманд̇и д̇хаммасса ануд̇хаммам̣ анужчавигам̣ бадибад̣̇ам̣. имз рог̇аа г̇ан̣д̣аа саллаад̇и бан̃жагканд̇хз д̣̇ассзд̇и. убаад̣̇аананирод̇хаад̇и виваддам̣ д̣̇ассзнд̇о ааха. сзсам̣ саб̣б̣ад̇т̇а уд̇д̇аанамзваад̇и.
221.Dhammānudhammanti dhammassa anudhammaṃ anucchavikaṃ paṭipadaṃ. Ime rogā gaṇḍā sallāti pañcakkhandhe dasseti. Upādānanirodhāti vivaṭṭaṃ dassento āha. Sesaṃ sabbattha uttānamevāti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
мааг̇ан̣д̣ияасуд̇д̇аван̣н̣анаа нидтид̇аа.
Māgaṇḍiyasuttavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 5. мааг̇ан̣д̣ияасуд̇д̇ам̣ • 5. Māgaṇḍiyasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 5. мааг̇ан̣д̣ияасуд̇д̇аван̣н̣анаа • 5. Māgaṇḍiyasuttavaṇṇanā
