| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
८. मागविकङ्गपञ्हो
8. Māgavikaṅgapañho
८. ‘‘भन्ते नागसेन, ‘मागविकस्स चत्तारि अङ्गानि गहेतब्बानी’ति यं वदेसि, कतमानि तानि चत्तारि अङ्गानि गहेतब्बानी’’ति? ‘‘यथा, महाराज, मागविको अप्पमिद्धो होति, एवमेव खो, महाराज, योगिना योगावचरेन अप्पमिद्धेन भवितब्बं। इदं, महाराज, मागविकस्स पठमं अङ्गं गहेतब्बं।
8. ‘‘Bhante nāgasena, ‘māgavikassa cattāri aṅgāni gahetabbānī’ti yaṃ vadesi, katamāni tāni cattāri aṅgāni gahetabbānī’’ti? ‘‘Yathā, mahārāja, māgaviko appamiddho hoti, evameva kho, mahārāja, yoginā yogāvacarena appamiddhena bhavitabbaṃ. Idaṃ, mahārāja, māgavikassa paṭhamaṃ aṅgaṃ gahetabbaṃ.
‘‘पुन चपरं, महाराज, मागविको मिगेसु येव चित्तं उपनिबन्धति, एवमेव खो, महाराज, योगिना योगावचरेन आरम्मणेसु येव चित्तं उपनिबन्धितब्बं। इदं, महाराज, मागविकस्स दुतियं अङ्गं गहेतब्बं।
‘‘Puna caparaṃ, mahārāja, māgaviko migesu yeva cittaṃ upanibandhati, evameva kho, mahārāja, yoginā yogāvacarena ārammaṇesu yeva cittaṃ upanibandhitabbaṃ. Idaṃ, mahārāja, māgavikassa dutiyaṃ aṅgaṃ gahetabbaṃ.
‘‘पुन चपरं, महाराज, मागविको कालं कम्मस्स जानाति, एवमेव खो, महाराज, योगिना योगावचरेन पटिसल्लानस्स कालो जानितब्बो ‘अयं कालो पटिसल्लानस्स, अयं कालो निक्खमनाया’ति। इदं, महाराज, मागविकस्स ततियं अङ्गं गहेतब्बं।
‘‘Puna caparaṃ, mahārāja, māgaviko kālaṃ kammassa jānāti, evameva kho, mahārāja, yoginā yogāvacarena paṭisallānassa kālo jānitabbo ‘ayaṃ kālo paṭisallānassa, ayaṃ kālo nikkhamanāyā’ti. Idaṃ, mahārāja, māgavikassa tatiyaṃ aṅgaṃ gahetabbaṃ.
‘‘पुन चपरं, महाराज, मागविको मिगं दिस्वा हासमभिजनेति ‘इमं लच्छामी’ति, एवमेव खो, महाराज, योगिना योगावचरेन आरम्मणे अभिरमितब्बं, हासमभिजनेतब्बं ‘उत्तरिं विसेसमधिगच्छिस्सामी’ति। इदं, महाराज, मागविकस्स चतुत्थं अङ्गं गहेतब्बं। भासितम्पेतं महाराज थेरेन मोघराजेन –
‘‘Puna caparaṃ, mahārāja, māgaviko migaṃ disvā hāsamabhijaneti ‘imaṃ lacchāmī’ti, evameva kho, mahārāja, yoginā yogāvacarena ārammaṇe abhiramitabbaṃ, hāsamabhijanetabbaṃ ‘uttariṃ visesamadhigacchissāmī’ti. Idaṃ, mahārāja, māgavikassa catutthaṃ aṅgaṃ gahetabbaṃ. Bhāsitampetaṃ mahārāja therena mogharājena –
‘‘‘आरम्मणे लभित्वान, पहितत्तेन भिक्खुना।
‘‘‘Ārammaṇe labhitvāna, pahitattena bhikkhunā;
भिय्यो हासो जनेतब्बो, अधिगच्छिस्सामि उत्तरि’’’न्ति॥
Bhiyyo hāso janetabbo, adhigacchissāmi uttari’’’nti.
मागविकङ्गपञ्हो अट्ठमो।
Māgavikaṅgapañho aṭṭhamo.
