| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
8. මාගවිකඞ්‌ගපඤ්‌හො
8. Māgavikaṅgapañho
8. ‘‘භන්‌තෙ නාගසෙන, ‘මාගවිකස්‌ස චත්‌තාරි අඞ්‌ගානි ගහෙතබ්‌බානී’ති යං වදෙසි, කතමානි තානි චත්‌තාරි අඞ්‌ගානි ගහෙතබ්‌බානී’’ති? ‘‘යථා, මහාරාජ, මාගවිකො අප්‌පමිද්‌ධො හොති, එවමෙව ඛො, මහාරාජ, යොගිනා යොගාවචරෙන අප්‌පමිද්‌ධෙන භවිතබ්‌බං. ඉදං, මහාරාජ, මාගවිකස්‌ස පඨමං අඞ්‌ගං ගහෙතබ්‌බං.
8. ‘‘Bhante nāgasena, ‘māgavikassa cattāri aṅgāni gahetabbānī’ti yaṃ vadesi, katamāni tāni cattāri aṅgāni gahetabbānī’’ti? ‘‘Yathā, mahārāja, māgaviko appamiddho hoti, evameva kho, mahārāja, yoginā yogāvacarena appamiddhena bhavitabbaṃ. Idaṃ, mahārāja, māgavikassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, මාගවිකො මිගෙසු යෙව චිත්‌තං උපනිබන්‌ධති, එවමෙව ඛො, මහාරාජ, යොගිනා යොගාවචරෙන ආරම්‌මණෙසු යෙව චිත්‌තං උපනිබන්‌ධිතබ්‌බං. ඉදං, මහාරාජ, මාගවිකස්‌ස දුතියං අඞ්‌ගං ගහෙතබ්‌බං.
‘‘Puna caparaṃ, mahārāja, māgaviko migesu yeva cittaṃ upanibandhati, evameva kho, mahārāja, yoginā yogāvacarena ārammaṇesu yeva cittaṃ upanibandhitabbaṃ. Idaṃ, mahārāja, māgavikassa dutiyaṃ aṅgaṃ gahetabbaṃ.
‘‘පුන චපරං, මහාරාජ, මාගවිකො කාලං කම්‌මස්‌ස ජානාති, එවමෙව ඛො, මහාරාජ, යොගිනා යොගාවචරෙන පටිසල්‌ලානස්‌ස කාලො ජානිතබ්‌බො ‘අයං කාලො පටිසල්‌ලානස්‌ස, අයං කාලො නික්‌ඛමනායා’ති. ඉදං, මහාරාජ, මාගවිකස්‌ස තතියං අඞ්‌ගං ගහෙතබ්‌බං.
‘‘Puna caparaṃ, mahārāja, māgaviko kālaṃ kammassa jānāti, evameva kho, mahārāja, yoginā yogāvacarena paṭisallānassa kālo jānitabbo ‘ayaṃ kālo paṭisallānassa, ayaṃ kālo nikkhamanāyā’ti. Idaṃ, mahārāja, māgavikassa tatiyaṃ aṅgaṃ gahetabbaṃ.
‘‘පුන චපරං, මහාරාජ, මාගවිකො මිගං දිස්‌වා හාසමභිජනෙති ‘ඉමං ලච්‌ඡාමී’ති, එවමෙව ඛො, මහාරාජ, යොගිනා යොගාවචරෙන ආරම්‌මණෙ අභිරමිතබ්‌බං, හාසමභිජනෙතබ්‌බං ‘උත්‌තරිං විසෙසමධිගච්‌ඡිස්‌සාමී’ති. ඉදං, මහාරාජ, මාගවිකස්‌ස චතුත්‌ථං අඞ්‌ගං ගහෙතබ්‌බං. භාසිතම්‌පෙතං මහාරාජ ථෙරෙන මොඝරාජෙන –
‘‘Puna caparaṃ, mahārāja, māgaviko migaṃ disvā hāsamabhijaneti ‘imaṃ lacchāmī’ti, evameva kho, mahārāja, yoginā yogāvacarena ārammaṇe abhiramitabbaṃ, hāsamabhijanetabbaṃ ‘uttariṃ visesamadhigacchissāmī’ti. Idaṃ, mahārāja, māgavikassa catutthaṃ aṅgaṃ gahetabbaṃ. Bhāsitampetaṃ mahārāja therena mogharājena –
‘‘‘ආරම්‌මණෙ ලභිත්‌වාන, පහිතත්‌තෙන භික්‌ඛුනා;
‘‘‘Ārammaṇe labhitvāna, pahitattena bhikkhunā;
භිය්‍යො හාසො ජනෙතබ්‌බො, අධිගච්‌ඡිස්‌සාමි උත්‌තරි’’’න්‌ති.
Bhiyyo hāso janetabbo, adhigacchissāmi uttari’’’nti.
මාගවිකඞ්‌ගපඤ්‌හො අට්‌ඨමො.
Māgavikaṅgapañho aṭṭhamo.
