| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༨. མཱགཝིཀངྒཔཉྷོ
8. Māgavikaṅgapañho
༨. ‘‘བྷནྟེ ནཱགསེན, ‘མཱགཝིཀསྶ ཙཏྟཱརི ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི ཙཏྟཱརི ཨངྒཱནི གཧེཏབྦཱནཱི’’ཏི? ‘‘ཡཐཱ, མཧཱརཱཛ, མཱགཝིཀོ ཨཔྤམིདྡྷོ ཧོཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨཔྤམིདྡྷེན བྷཝིཏབྦཾ། ཨིདཾ, མཧཱརཱཛ, མཱགཝིཀསྶ པཋམཾ ཨངྒཾ གཧེཏབྦཾ།
8. ‘‘Bhante nāgasena, ‘māgavikassa cattāri aṅgāni gahetabbānī’ti yaṃ vadesi, katamāni tāni cattāri aṅgāni gahetabbānī’’ti? ‘‘Yathā, mahārāja, māgaviko appamiddho hoti, evameva kho, mahārāja, yoginā yogāvacarena appamiddhena bhavitabbaṃ. Idaṃ, mahārāja, māgavikassa paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, མཱགཝིཀོ མིགེསུ ཡེཝ ཙིཏྟཾ ཨུཔནིབནྡྷཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨཱརམྨཎེསུ ཡེཝ ཙིཏྟཾ ཨུཔནིབནྡྷིཏབྦཾ། ཨིདཾ, མཧཱརཱཛ, མཱགཝིཀསྶ དུཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, māgaviko migesu yeva cittaṃ upanibandhati, evameva kho, mahārāja, yoginā yogāvacarena ārammaṇesu yeva cittaṃ upanibandhitabbaṃ. Idaṃ, mahārāja, māgavikassa dutiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, མཱགཝིཀོ ཀཱལཾ ཀམྨསྶ ཛཱནཱཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན པཊིསལླཱནསྶ ཀཱལོ ཛཱནིཏབྦོ ‘ཨཡཾ ཀཱལོ པཊིསལླཱནསྶ, ཨཡཾ ཀཱལོ ནིཀྑམནཱཡཱ’ཏི། ཨིདཾ, མཧཱརཱཛ, མཱགཝིཀསྶ ཏཏིཡཾ ཨངྒཾ གཧེཏབྦཾ།
‘‘Puna caparaṃ, mahārāja, māgaviko kālaṃ kammassa jānāti, evameva kho, mahārāja, yoginā yogāvacarena paṭisallānassa kālo jānitabbo ‘ayaṃ kālo paṭisallānassa, ayaṃ kālo nikkhamanāyā’ti. Idaṃ, mahārāja, māgavikassa tatiyaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, མཱགཝིཀོ མིགཾ དིསྭཱ ཧཱསམབྷིཛནེཏི ‘ཨིམཾ ལཙྪཱམཱི’ཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཨཱརམྨཎེ ཨབྷིརམིཏབྦཾ, ཧཱསམབྷིཛནེཏབྦཾ ‘ཨུཏྟརིཾ ཝིསེསམདྷིགཙྪིསྶཱམཱི’ཏི། ཨིདཾ, མཧཱརཱཛ, མཱགཝིཀསྶ ཙཏུཏྠཾ ཨངྒཾ གཧེཏབྦཾ། བྷཱསིཏམྤེཏཾ མཧཱརཱཛ ཐེརེན མོགྷརཱཛེན –
‘‘Puna caparaṃ, mahārāja, māgaviko migaṃ disvā hāsamabhijaneti ‘imaṃ lacchāmī’ti, evameva kho, mahārāja, yoginā yogāvacarena ārammaṇe abhiramitabbaṃ, hāsamabhijanetabbaṃ ‘uttariṃ visesamadhigacchissāmī’ti. Idaṃ, mahārāja, māgavikassa catutthaṃ aṅgaṃ gahetabbaṃ. Bhāsitampetaṃ mahārāja therena mogharājena –
‘‘‘ཨཱརམྨཎེ ལབྷིཏྭཱན, པཧིཏཏྟེན བྷིཀྑུནཱ།
‘‘‘Ārammaṇe labhitvāna, pahitattena bhikkhunā;
བྷིཡྻོ ཧཱསོ ཛནེཏབྦོ, ཨདྷིགཙྪིསྶཱམི ཨུཏྟརི’’’ནྟི༎
Bhiyyo hāso janetabbo, adhigacchissāmi uttari’’’nti.
མཱགཝིཀངྒཔཉྷོ ཨཊྛམོ།
Māgavikaṅgapañho aṭṭhamo.
