| Library / Tipiṭaka / ਤਿਪਿਟਕ • Tipiṭaka / ਮਿਲਿਨ੍ਦਪਞ੍ਹਪਾਲ਼ਿ • Milindapañhapāḷi |
੮. ਮਾਗવਿਕਙ੍ਗਪਞ੍ਹੋ
8. Māgavikaṅgapañho
੮. ‘‘ਭਨ੍ਤੇ ਨਾਗਸੇਨ, ‘ਮਾਗવਿਕਸ੍ਸ ਚਤ੍ਤਾਰਿ ਅਙ੍ਗਾਨਿ ਗਹੇਤਬ੍ਬਾਨੀ’ਤਿ ਯਂ વਦੇਸਿ, ਕਤਮਾਨਿ ਤਾਨਿ ਚਤ੍ਤਾਰਿ ਅਙ੍ਗਾਨਿ ਗਹੇਤਬ੍ਬਾਨੀ’’ਤਿ? ‘‘ਯਥਾ, ਮਹਾਰਾਜ, ਮਾਗવਿਕੋ ਅਪ੍ਪਮਿਦ੍ਧੋ ਹੋਤਿ, ਏવਮੇવ ਖੋ, ਮਹਾਰਾਜ, ਯੋਗਿਨਾ ਯੋਗਾવਚਰੇਨ ਅਪ੍ਪਮਿਦ੍ਧੇਨ ਭવਿਤਬ੍ਬਂ। ਇਦਂ, ਮਹਾਰਾਜ, ਮਾਗવਿਕਸ੍ਸ ਪਠਮਂ ਅਙ੍ਗਂ ਗਹੇਤਬ੍ਬਂ।
8. ‘‘Bhante nāgasena, ‘māgavikassa cattāri aṅgāni gahetabbānī’ti yaṃ vadesi, katamāni tāni cattāri aṅgāni gahetabbānī’’ti? ‘‘Yathā, mahārāja, māgaviko appamiddho hoti, evameva kho, mahārāja, yoginā yogāvacarena appamiddhena bhavitabbaṃ. Idaṃ, mahārāja, māgavikassa paṭhamaṃ aṅgaṃ gahetabbaṃ.
‘‘ਪੁਨ ਚਪਰਂ, ਮਹਾਰਾਜ, ਮਾਗવਿਕੋ ਮਿਗੇਸੁ ਯੇવ ਚਿਤ੍ਤਂ ਉਪਨਿਬਨ੍ਧਤਿ, ਏવਮੇવ ਖੋ, ਮਹਾਰਾਜ, ਯੋਗਿਨਾ ਯੋਗਾવਚਰੇਨ ਆਰਮ੍ਮਣੇਸੁ ਯੇવ ਚਿਤ੍ਤਂ ਉਪਨਿਬਨ੍ਧਿਤਬ੍ਬਂ। ਇਦਂ, ਮਹਾਰਾਜ, ਮਾਗવਿਕਸ੍ਸ ਦੁਤਿਯਂ ਅਙ੍ਗਂ ਗਹੇਤਬ੍ਬਂ।
‘‘Puna caparaṃ, mahārāja, māgaviko migesu yeva cittaṃ upanibandhati, evameva kho, mahārāja, yoginā yogāvacarena ārammaṇesu yeva cittaṃ upanibandhitabbaṃ. Idaṃ, mahārāja, māgavikassa dutiyaṃ aṅgaṃ gahetabbaṃ.
‘‘ਪੁਨ ਚਪਰਂ, ਮਹਾਰਾਜ, ਮਾਗવਿਕੋ ਕਾਲਂ ਕਮ੍ਮਸ੍ਸ ਜਾਨਾਤਿ, ਏવਮੇવ ਖੋ, ਮਹਾਰਾਜ, ਯੋਗਿਨਾ ਯੋਗਾવਚਰੇਨ ਪਟਿਸਲ੍ਲਾਨਸ੍ਸ ਕਾਲੋ ਜਾਨਿਤਬ੍ਬੋ ‘ਅਯਂ ਕਾਲੋ ਪਟਿਸਲ੍ਲਾਨਸ੍ਸ, ਅਯਂ ਕਾਲੋ ਨਿਕ੍ਖਮਨਾਯਾ’ਤਿ। ਇਦਂ, ਮਹਾਰਾਜ, ਮਾਗવਿਕਸ੍ਸ ਤਤਿਯਂ ਅਙ੍ਗਂ ਗਹੇਤਬ੍ਬਂ।
‘‘Puna caparaṃ, mahārāja, māgaviko kālaṃ kammassa jānāti, evameva kho, mahārāja, yoginā yogāvacarena paṭisallānassa kālo jānitabbo ‘ayaṃ kālo paṭisallānassa, ayaṃ kālo nikkhamanāyā’ti. Idaṃ, mahārāja, māgavikassa tatiyaṃ aṅgaṃ gahetabbaṃ.
‘‘ਪੁਨ ਚਪਰਂ, ਮਹਾਰਾਜ, ਮਾਗવਿਕੋ ਮਿਗਂ ਦਿਸ੍વਾ ਹਾਸਮਭਿਜਨੇਤਿ ‘ਇਮਂ ਲਚ੍ਛਾਮੀ’ਤਿ, ਏવਮੇવ ਖੋ, ਮਹਾਰਾਜ, ਯੋਗਿਨਾ ਯੋਗਾવਚਰੇਨ ਆਰਮ੍ਮਣੇ ਅਭਿਰਮਿਤਬ੍ਬਂ, ਹਾਸਮਭਿਜਨੇਤਬ੍ਬਂ ‘ਉਤ੍ਤਰਿਂ વਿਸੇਸਮਧਿਗਚ੍ਛਿਸ੍ਸਾਮੀ’ਤਿ। ਇਦਂ, ਮਹਾਰਾਜ, ਮਾਗવਿਕਸ੍ਸ ਚਤੁਤ੍ਥਂ ਅਙ੍ਗਂ ਗਹੇਤਬ੍ਬਂ। ਭਾਸਿਤਮ੍ਪੇਤਂ ਮਹਾਰਾਜ ਥੇਰੇਨ ਮੋਘਰਾਜੇਨ –
‘‘Puna caparaṃ, mahārāja, māgaviko migaṃ disvā hāsamabhijaneti ‘imaṃ lacchāmī’ti, evameva kho, mahārāja, yoginā yogāvacarena ārammaṇe abhiramitabbaṃ, hāsamabhijanetabbaṃ ‘uttariṃ visesamadhigacchissāmī’ti. Idaṃ, mahārāja, māgavikassa catutthaṃ aṅgaṃ gahetabbaṃ. Bhāsitampetaṃ mahārāja therena mogharājena –
‘‘‘ਆਰਮ੍ਮਣੇ ਲਭਿਤ੍વਾਨ, ਪਹਿਤਤ੍ਤੇਨ ਭਿਕ੍ਖੁਨਾ।
‘‘‘Ārammaṇe labhitvāna, pahitattena bhikkhunā;
ਭਿਯ੍ਯੋ ਹਾਸੋ ਜਨੇਤਬ੍ਬੋ, ਅਧਿਗਚ੍ਛਿਸ੍ਸਾਮਿ ਉਤ੍ਤਰਿ’’’ਨ੍ਤਿ॥
Bhiyyo hāso janetabbo, adhigacchissāmi uttari’’’nti.
ਮਾਗવਿਕਙ੍ਗਪਞ੍ਹੋ ਅਟ੍ਠਮੋ।
Māgavikaṅgapañho aṭṭhamo.
