| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
6. மக்³க³த³த்திகத்தே²ரஅபதா³னவண்ணனா
6. Maggadattikattheraapadānavaṇṇanā
அனோமத³ஸ்ஸீ ப⁴க³வாதிஆதி³கங் ஆயஸ்மதோ மக்³க³த³த்திகத்தே²ரஸ்ஸ அபதா³னங். அயம்பாயஸ்மா புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ அனோமத³ஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தோ வுத்³தி⁴மன்வாய க⁴ராவாஸங் ஸண்ட²பெத்வா வஸந்தோ அனோமத³ஸ்ஸிங் ப⁴க³வந்தங் ஆகாஸே சங்கமந்தங் பாது³த்³தா⁴ரே பாது³த்³தா⁴ரசங்கமனட்டா²னே புப்பா²னங் விகிரணங் அச்ச²ரியஞ்ச தி³ஸ்வா பஸன்னமானஸோ புப்பா²னி ஆகாஸே உக்கி²பி, தானி விதானங் ஹுத்வா அட்ட²ங்ஸு.
Anomadassī bhagavātiādikaṃ āyasmato maggadattikattherassa apadānaṃ. Ayampāyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto anomadassissa bhagavato kāle kulagehe nibbatto vuddhimanvāya gharāvāsaṃ saṇṭhapetvā vasanto anomadassiṃ bhagavantaṃ ākāse caṅkamantaṃ pāduddhāre pāduddhāracaṅkamanaṭṭhāne pupphānaṃ vikiraṇaṃ acchariyañca disvā pasannamānaso pupphāni ākāse ukkhipi, tāni vitānaṃ hutvā aṭṭhaṃsu.
26. ஸோ தேன புஞ்ஞேன ஸுக³தீஸுயேவ ஸங்ஸரந்தோ ஸப்³ப³த்த² பூஜிதோ ஸுக²ங் அனுப⁴வித்வா இமஸ்மிங் பு³த்³து⁴ப்பாதே³ ஏகஸ்மிங் குலே நிப்³ப³த்தோ கமேன யொப்³ப³ஞ்ஞங் பாபுணித்வா ஸத்³தா⁴ஜாதோ பப்³ப³ஜித்வா வத்தஸம்பன்னோ நசிரஸ்ஸேவ அரஹத்தங் பத்தோ சங்கமனஸ்ஸ பூஜிதத்தா மக்³க³த³த்திகத்தே²ரோதி பாகடோ. ஸோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ அனோமத³ஸ்ஸீ ப⁴க³வாதிஆதி³மாஹ. தி³ட்ட²த⁴ம்மஸுக²த்தா²யாதி இமஸ்மிங் அத்தபா⁴வே சங்கமனேன ஸரீரஸல்லஹுகாதி³ஸுக²ங் படிச்சாதி அத்தோ². அப்³போ⁴காஸம்ஹி சங்கமீதி அப்³போ⁴காஸே அங்க³ணட்டா²னே சங்கமி, பத³விக்கே²பங் பத³ஸஞ்சாரங் அகாஸீதி அத்தோ².
26. So tena puññena sugatīsuyeva saṃsaranto sabbattha pūjito sukhaṃ anubhavitvā imasmiṃ buddhuppāde ekasmiṃ kule nibbatto kamena yobbaññaṃ pāpuṇitvā saddhājāto pabbajitvā vattasampanno nacirasseva arahattaṃ patto caṅkamanassa pūjitattā maggadattikattheroti pākaṭo. So pubbakammaṃ saritvā somanassajāto pubbacaritāpadānaṃ pakāsento anomadassī bhagavātiādimāha. Diṭṭhadhammasukhatthāyāti imasmiṃ attabhāve caṅkamanena sarīrasallahukādisukhaṃ paṭiccāti attho. Abbhokāsamhi caṅkamīti abbhokāse aṅgaṇaṭṭhāne caṅkami, padavikkhepaṃ padasañcāraṃ akāsīti attho.
உத்³த⁴தே பாதே³ புப்பா²னீதி சங்கமந்தேன பாதே³ உத்³த⁴தே பது³முப்பலாதீ³னி புப்பா²னி பத²விதோ உக்³க³ந்த்வா சங்கமே விகிரிங்ஸூதி அத்தோ². ஸோப⁴ங் முத்³த⁴னி திட்ட²ரேதி பு³த்³த⁴ஸ்ஸ முத்³த⁴னி ஸீஸே ஸோப⁴யமானா தானி திட்ட²ந்தீதி அத்தோ². ஸேஸங் ஸுவிஞ்ஞெய்யமேவாதி.
Uddhate pāde pupphānīti caṅkamantena pāde uddhate padumuppalādīni pupphāni pathavito uggantvā caṅkame vikiriṃsūti attho. Sobhaṃ muddhani tiṭṭhareti buddhassa muddhani sīse sobhayamānā tāni tiṭṭhantīti attho. Sesaṃ suviññeyyamevāti.
மக்³க³த³த்திகத்தே²ரஅபதா³னவண்ணனா ஸமத்தா.
Maggadattikattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 6. மக்³க³த³த்திகத்தே²ரஅபதா³னங் • 6. Maggadattikattheraapadānaṃ
