| Library / Tipiṭaka / তিপিটক • Tipiṭaka / অপদান-অট্ঠকথা • Apadāna-aṭṭhakathā |
৬. মগ্গদত্তিকত্থেরঅপদানৰণ্ণনা
6. Maggadattikattheraapadānavaṇṇanā
অনোমদস্সী ভগৰাতিআদিকং আযস্মতো মগ্গদত্তিকত্থেরস্স অপদানং। অযম্পাযস্মা পুরিমবুদ্ধেসু কতাধিকারো তত্থ তত্থ ভৰে ৰিৰট্টূপনিস্সযানি পুঞ্ঞানি উপচিনন্তো অনোমদস্সিস্স ভগৰতো কালে কুলগেহে নিব্বত্তো ৰুদ্ধিমন্ৰায ঘরাৰাসং সণ্ঠপেত্ৰা ৰসন্তো অনোমদস্সিং ভগৰন্তং আকাসে চঙ্কমন্তং পাদুদ্ধারে পাদুদ্ধারচঙ্কমনট্ঠানে পুপ্ফানং ৰিকিরণং অচ্ছরিযঞ্চ দিস্ৰা পসন্নমানসো পুপ্ফানি আকাসে উক্খিপি, তানি ৰিতানং হুত্ৰা অট্ঠংসু।
Anomadassī bhagavātiādikaṃ āyasmato maggadattikattherassa apadānaṃ. Ayampāyasmā purimabuddhesu katādhikāro tattha tattha bhave vivaṭṭūpanissayāni puññāni upacinanto anomadassissa bhagavato kāle kulagehe nibbatto vuddhimanvāya gharāvāsaṃ saṇṭhapetvā vasanto anomadassiṃ bhagavantaṃ ākāse caṅkamantaṃ pāduddhāre pāduddhāracaṅkamanaṭṭhāne pupphānaṃ vikiraṇaṃ acchariyañca disvā pasannamānaso pupphāni ākāse ukkhipi, tāni vitānaṃ hutvā aṭṭhaṃsu.
২৬. সো তেন পুঞ্ঞেন সুগতীসুযেৰ সংসরন্তো সব্বত্থ পূজিতো সুখং অনুভৰিত্ৰা ইমস্মিং বুদ্ধুপ্পাদে একস্মিং কুলে নিব্বত্তো কমেন যোব্বঞ্ঞং পাপুণিত্ৰা সদ্ধাজাতো পব্বজিত্ৰা ৰত্তসম্পন্নো নচিরস্সেৰ অরহত্তং পত্তো চঙ্কমনস্স পূজিতত্তা মগ্গদত্তিকত্থেরোতি পাকটো। সো পুব্বকম্মং সরিত্ৰা সোমনস্সজাতো পুব্বচরিতাপদানং পকাসেন্তো অনোমদস্সী ভগৰাতিআদিমাহ। দিট্ঠধম্মসুখত্থাযাতি ইমস্মিং অত্তভাৰে চঙ্কমনেন সরীরসল্লহুকাদিসুখং পটিচ্চাতি অত্থো। অব্ভোকাসম্হি চঙ্কমীতি অব্ভোকাসে অঙ্গণট্ঠানে চঙ্কমি, পদৰিক্খেপং পদসঞ্চারং অকাসীতি অত্থো।
26. So tena puññena sugatīsuyeva saṃsaranto sabbattha pūjito sukhaṃ anubhavitvā imasmiṃ buddhuppāde ekasmiṃ kule nibbatto kamena yobbaññaṃ pāpuṇitvā saddhājāto pabbajitvā vattasampanno nacirasseva arahattaṃ patto caṅkamanassa pūjitattā maggadattikattheroti pākaṭo. So pubbakammaṃ saritvā somanassajāto pubbacaritāpadānaṃ pakāsento anomadassī bhagavātiādimāha. Diṭṭhadhammasukhatthāyāti imasmiṃ attabhāve caṅkamanena sarīrasallahukādisukhaṃ paṭiccāti attho. Abbhokāsamhi caṅkamīti abbhokāse aṅgaṇaṭṭhāne caṅkami, padavikkhepaṃ padasañcāraṃ akāsīti attho.
উদ্ধতে পাদে পুপ্ফানীতি চঙ্কমন্তেন পাদে উদ্ধতে পদুমুপ্পলাদীনি পুপ্ফানি পথৰিতো উগ্গন্ত্ৰা চঙ্কমে ৰিকিরিংসূতি অত্থো। সোভং মুদ্ধনি তিট্ঠরেতি বুদ্ধস্স মুদ্ধনি সীসে সোভযমানা তানি তিট্ঠন্তীতি অত্থো। সেসং সুৰিঞ্ঞেয্যমেৰাতি।
Uddhate pāde pupphānīti caṅkamantena pāde uddhate padumuppalādīni pupphāni pathavito uggantvā caṅkame vikiriṃsūti attho. Sobhaṃ muddhani tiṭṭhareti buddhassa muddhani sīse sobhayamānā tāni tiṭṭhantīti attho. Sesaṃ suviññeyyamevāti.
মগ্গদত্তিকত্থেরঅপদানৰণ্ণনা সমত্তা।
Maggadattikattheraapadānavaṇṇanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / খুদ্দকনিকায • Khuddakanikāya / অপদানপাল়ি • Apadānapāḷi / ৬. মগ্গদত্তিকত্থেরঅপদানং • 6. Maggadattikattheraapadānaṃ
