| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
২০. ৰীসতিমৰগ্গো
20. Vīsatimavaggo
(১৯৮) ৫. মগ্গকথা
(198) 5. Maggakathā
৮৭২. পঞ্চঙ্গিকো মগ্গোতি? আমন্তা। ননু অট্ঠঙ্গিকো মগ্গো ৰুত্তো ভগৰতা, সেয্যথিদং – সম্মাদিট্ঠি…পে॰… সম্মাসমাধীতি? আমন্তা। হঞ্চি অট্ঠঙ্গিকো মগ্গো ৰুত্তো ভগৰতা , সেয্যথিদং – সম্মাদিট্ঠি …পে॰… সম্মাসমাধি, নো চ ৰত রে ৰত্তব্বে – ‘‘পঞ্চঙ্গিকো মগ্গো’’তি।
872. Pañcaṅgiko maggoti? Āmantā. Nanu aṭṭhaṅgiko maggo vutto bhagavatā, seyyathidaṃ – sammādiṭṭhi…pe… sammāsamādhīti? Āmantā. Hañci aṭṭhaṅgiko maggo vutto bhagavatā , seyyathidaṃ – sammādiṭṭhi …pe… sammāsamādhi, no ca vata re vattabbe – ‘‘pañcaṅgiko maggo’’ti.
পঞ্চঙ্গিকো মগ্গোতি? আমন্তা। ননু ৰুত্তং ভগৰতা –
Pañcaṅgiko maggoti? Āmantā. Nanu vuttaṃ bhagavatā –
‘‘মগ্গানং অট্ঠঙ্গিকো সেট্ঠো, সচ্চানং চতুরো পদা।
‘‘Maggānaṃ aṭṭhaṅgiko seṭṭho, saccānaṃ caturo padā;
ৰিরাগো সেট্ঠো ধম্মানং, দ্ৰিপদানঞ্চ চক্খুমা’’তি 1॥
Virāgo seṭṭho dhammānaṃ, dvipadānañca cakkhumā’’ti 2.
অত্থেৰ সুত্তন্তোতি? আমন্তা। তেন হি অট্ঠঙ্গিকো মগ্গোতি।
Attheva suttantoti? Āmantā. Tena hi aṭṭhaṅgiko maggoti.
৮৭৩. সম্মাৰাচা মগ্গঙ্গং, সা চ ন মগ্গোতি? আমন্তা। সম্মাদিট্ঠি মগ্গঙ্গং, সা চ ন মগ্গোতি? ন হেৰং ৰত্তব্বে…পে॰… সম্মাৰাচা মগ্গঙ্গং, সা চ ন মগ্গোতি? আমন্তা। সম্মাসঙ্কপ্পো…পে॰… সম্মাৰাযামো…পে॰… সম্মাসতি…পে॰… সম্মাসমাধি মগ্গঙ্গং, সো চ ন মগ্গোতি? ন হেৰং ৰত্তব্বে…পে॰…।
873. Sammāvācā maggaṅgaṃ, sā ca na maggoti? Āmantā. Sammādiṭṭhi maggaṅgaṃ, sā ca na maggoti? Na hevaṃ vattabbe…pe… sammāvācā maggaṅgaṃ, sā ca na maggoti? Āmantā. Sammāsaṅkappo…pe… sammāvāyāmo…pe… sammāsati…pe… sammāsamādhi maggaṅgaṃ, so ca na maggoti? Na hevaṃ vattabbe…pe….
সম্মাকম্মন্তো…পে॰… সম্মাআজীৰো মগ্গঙ্গং, সো চ ন মগ্গোতি? আমন্তা। সম্মাদিট্ঠি…পে॰… সম্মাসমাধি মগ্গঙ্গং, সো চ ন মগ্গোতি? ন হেৰং ৰত্তব্বে…পে॰…।
Sammākammanto…pe… sammāājīvo maggaṅgaṃ, so ca na maggoti? Āmantā. Sammādiṭṭhi…pe… sammāsamādhi maggaṅgaṃ, so ca na maggoti? Na hevaṃ vattabbe…pe….
সম্মাদিট্ঠি মগ্গঙ্গং, সা চ মগ্গোতি? আমন্তা। সম্মাৰাচা মগ্গঙ্গং, সা চ মগ্গোতি? ন হেৰং ৰত্তব্বে…পে॰… সম্মাদিট্ঠি মগ্গঙ্গং, সা চ মগ্গোতি? আমন্তা। সম্মাকম্মন্তো…পে॰… সম্মাআজীৰো মগ্গঙ্গং, সো চ মগ্গোতি? ন হেৰং ৰত্তব্বে…পে॰…।
Sammādiṭṭhi maggaṅgaṃ, sā ca maggoti? Āmantā. Sammāvācā maggaṅgaṃ, sā ca maggoti? Na hevaṃ vattabbe…pe… sammādiṭṭhi maggaṅgaṃ, sā ca maggoti? Āmantā. Sammākammanto…pe… sammāājīvo maggaṅgaṃ, so ca maggoti? Na hevaṃ vattabbe…pe….
সম্মাসঙ্কপ্পো…পে॰… সম্মাৰাযামো…পে॰… সম্মাসতি…পে॰… সম্মাসমাধি মগ্গঙ্গং, সো চ মগ্গোতি? আমন্তা। সম্মাৰাচা…পে॰… সম্মাকম্মন্তো…পে॰… সম্মাআজীৰো মগ্গঙ্গং, সো চ মগ্গোতি? ন হেৰং ৰত্তব্বে…পে॰…।
Sammāsaṅkappo…pe… sammāvāyāmo…pe… sammāsati…pe… sammāsamādhi maggaṅgaṃ, so ca maggoti? Āmantā. Sammāvācā…pe… sammākammanto…pe… sammāājīvo maggaṅgaṃ, so ca maggoti? Na hevaṃ vattabbe…pe….
৮৭৪. অরিযো অট্ঠঙ্গিকো মগ্গোতি? আমন্তা। ননু ৰুত্তং ভগৰতা – ‘‘পুব্বেৰ খো পনস্স কাযকম্মং ৰচীকম্মং আজীৰো সুপরিসুদ্ধো হোতি; এৰমস্সাযং অরিযো অট্ঠঙ্গিকো মগ্গো ভাৰনাপারিপূরিং গচ্ছতী’’তি 3! অত্থেৰ সুত্তন্তোতি? আমন্তা। তেন হি পঞ্চঙ্গিকো মগ্গোতি।
874. Ariyo aṭṭhaṅgiko maggoti? Āmantā. Nanu vuttaṃ bhagavatā – ‘‘pubbeva kho panassa kāyakammaṃ vacīkammaṃ ājīvo suparisuddho hoti; evamassāyaṃ ariyo aṭṭhaṅgiko maggo bhāvanāpāripūriṃ gacchatī’’ti 4! Attheva suttantoti? Āmantā. Tena hi pañcaṅgiko maggoti.
৮৭৫. পঞ্চঙ্গিকো মগ্গোতি? আমন্তা। ননু ৰুত্তং ভগৰতা – ‘‘যস্মিং খো, সুভদ্দ, ধম্মৰিনযে অরিযো অট্ঠঙ্গিকো মগ্গো ন উপলব্ভতি, সমণোপি তত্থ ন উপলব্ভতি, দুতিযোপি তত্থ সমণো ন উপলব্ভতি, ততিযোপি তত্থ সমণো ন উপলব্ভতি, চতুত্থোপি তত্থ সমণো ন উপলব্ভতি। যস্মিঞ্চ খো, সুভদ্দ, ধম্মৰিনযে অরিযো অট্ঠঙ্গিকো মগ্গো উপলব্ভতি, সমণোপি তত্থ উপলব্ভতি, দুতিযোপি…পে॰… ততিযোপি…পে॰… চতুত্থোপি তত্থ সমণো উপলব্ভতি। ইমস্মিং খো, সুভদ্দ, ধম্মৰিনযে অরিযো অট্ঠঙ্গিকো মগ্গো উপলব্ভতি। ইধেৰ, সুভদ্দ , সমণো, ইধ দুতিযো সমণো, ইধ ততিযো সমণো, ইধ চতুত্থো সমণো। সুঞ্ঞা পরপ্পৰাদা সমণেভি অঞ্ঞেহী’’তি 5! অত্থেৰ সুত্তন্তোতি? আমন্তা। তেন হি অট্ঠঙ্গিকো মগ্গোতি।
875. Pañcaṅgiko maggoti? Āmantā. Nanu vuttaṃ bhagavatā – ‘‘yasmiṃ kho, subhadda, dhammavinaye ariyo aṭṭhaṅgiko maggo na upalabbhati, samaṇopi tattha na upalabbhati, dutiyopi tattha samaṇo na upalabbhati, tatiyopi tattha samaṇo na upalabbhati, catutthopi tattha samaṇo na upalabbhati. Yasmiñca kho, subhadda, dhammavinaye ariyo aṭṭhaṅgiko maggo upalabbhati, samaṇopi tattha upalabbhati, dutiyopi…pe… tatiyopi…pe… catutthopi tattha samaṇo upalabbhati. Imasmiṃ kho, subhadda, dhammavinaye ariyo aṭṭhaṅgiko maggo upalabbhati. Idheva, subhadda , samaṇo, idha dutiyo samaṇo, idha tatiyo samaṇo, idha catuttho samaṇo. Suññā parappavādā samaṇebhi aññehī’’ti 6! Attheva suttantoti? Āmantā. Tena hi aṭṭhaṅgiko maggoti.
মগ্গকথা নিট্ঠিতা।
Maggakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ৫. মগ্গকথাৰণ্ণনা • 5. Maggakathāvaṇṇanā
