| Library / Tipiṭaka / তিপিটক • Tipiṭaka / পটিসম্ভিদামগ্গপাল়ি • Paṭisambhidāmaggapāḷi |
৯. মগ্গকথা
9. Maggakathā
২৩৭. মগ্গোতি কেনট্ঠেন মগ্গো? সোতাপত্তিমগ্গক্খণে দস্সনট্ঠেন সম্মাদিট্ঠি মিচ্ছাদিট্ঠিযা পহানায মগ্গো চেৰ হেতু চ, সহজাতানং ধম্মানং উপত্থম্ভনায মগ্গো চেৰ হেতু চ, কিলেসানং পরিযাদানায মগ্গো চেৰ হেতু চ, পটিৰেধাদিৰিসোধনায মগ্গো চেৰ হেতু চ, চিত্তস্স অধিট্ঠানায মগ্গো চেৰ হেতু চ, চিত্তস্স ৰোদানায মগ্গো চেৰ হেতু চ, ৰিসেসাধিগমায মগ্গো চেৰ হেতু চ, উত্তরি পটিৰেধায 1 মগ্গো চেৰ হেতু চ, সচ্চাভিসমযায মগ্গো চেৰ হেতু চ, নিরোধে পতিট্ঠাপনায মগ্গো চেৰ হেতু চ।
237. Maggoti kenaṭṭhena maggo? Sotāpattimaggakkhaṇe dassanaṭṭhena sammādiṭṭhi micchādiṭṭhiyā pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya 2 maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
অভিনিরোপনট্ঠেন সম্মাসঙ্কপ্পো মিচ্ছাসঙ্কপ্পস্স পহানায মগ্গো চেৰ হেতু চ, সহজাতানং ধম্মানং উপত্থম্ভনায মগ্গো চেৰ হেতু চ, কিলেসানং পরিযাদানায মগ্গো চেৰ হেতু চ, পটিৰেধাদিৰিসোধনায মগ্গো চেৰ হেতু চ, চিত্তস্স অধিট্ঠানায মগ্গো চেৰ হেতু চ, চিত্তস্স ৰোদানায মগ্গো চেৰ হেতু চ, ৰিসেসাধিগমায মগ্গো চেৰ হেতু চ, উত্তরি পটিৰেধায মগ্গো চেৰ হেতু চ, সচ্চাভিসমযায মগ্গো চেৰ হেতু চ, নিরোধে পতিট্ঠাপনায মগ্গো চেৰ হেতু চ।
Abhiniropanaṭṭhena sammāsaṅkappo micchāsaṅkappassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
পরিগ্গহট্ঠেন সম্মাৰাচা মিচ্ছাৰাচায পহানায মগ্গো চেৰ হেতু চ, সহজাতানং ধম্মানং উপত্থম্ভনায মগ্গো চেৰ হেতু চ, কিলেসানং পরিযাদানায মগ্গো চেৰ হেতু চ, পটিৰেধাদিৰিসোধনায মগ্গো চেৰ হেতু চ, চিত্তস্স অধিট্ঠানায মগ্গো চেৰ হেতু চ, চিত্তস্স ৰোদানায মগ্গো চেৰ হেতু চ, ৰিসেসাধিগমায মগ্গো চেৰ হেতু চ, উত্তরি পটিৰেধায মগ্গো চেৰ হেতু চ, সচ্চাভিসমযায মগ্গো চেৰ হেতু চ, নিরোধে পতিট্ঠাপনায মগ্গো চেৰ হেতু চ।
Pariggahaṭṭhena sammāvācā micchāvācāya pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
সমুট্ঠানট্ঠেন সম্মাকম্মন্তো মিচ্ছাকম্মন্তস্স পহানায মগ্গো চেৰ হেতু চ, সহজাতানং ধম্মানং উপত্থম্ভনায মগ্গো চেৰ হেতু চ, কিলেসানং পরিযাদানায মগ্গো চেৰ হেতু চ পটিৰেধাদিৰিসোধনায মগ্গো চেৰ হেতু চ, চিত্তস্স অধিট্ঠানায মগ্গো চেৰ হেতু চ, চিত্তস্স ৰোদানায মগ্গো চেৰ হেতু চ, ৰিসেসাধিগমায মগ্গো চেৰ হেতু চ, উত্তরি পটিৰেধায মগ্গো চেৰ হেতু চ, সচ্চাভিসমযায মগ্গো চেৰ হেতু চ, নিরোধে পতিট্ঠাপনায মগ্গো চেৰ হেতু চ।
Samuṭṭhānaṭṭhena sammākammanto micchākammantassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
ৰোদানট্ঠেন সম্মাআজীৰো মিচ্ছাআজীৰস্স পহানায মগ্গো চেৰ হেতু চ…পে॰… পগ্গহট্ঠেন সম্মাৰাযামো মিচ্ছাৰাযামস্স পহানায মগ্গো চেৰ হেতু চ…পে॰… উপট্ঠানট্ঠেন সম্মাসতি মিচ্ছাসতিযা পহানায মগ্গো চেৰ হেতু চ…পে॰… অৰিক্খেপট্ঠেন সম্মাসমাধি মিচ্ছাসমাধিস্স পহানায মগ্গো চেৰ হেতু চ, সহজাতানং ধম্মানং উপত্থম্ভনায মগ্গো চেৰ হেতু চ, কিলেসানং পরিযাদানায মগ্গো চেৰ হেতু চ, পটিৰেধাদিৰিসোধনায মগ্গো চেৰ হেতু চ, চিত্তস্স অধিট্ঠানায মগ্গো চেৰ হেতু চ, চিত্তস্স ৰোদানায মগ্গো চেৰ হেতু চ, ৰিসেসাধিগমায মগ্গো চেৰ হেতু চ, উত্তরি পটিৰেধায মগ্গো চেৰ হেতু চ, সচ্চাভিসমযায মগ্গো চেৰ হেতু চ, নিরোধে পতিট্ঠাপনায মগ্গো চেৰ হেতু চ।
Vodānaṭṭhena sammāājīvo micchāājīvassa pahānāya maggo ceva hetu ca…pe… paggahaṭṭhena sammāvāyāmo micchāvāyāmassa pahānāya maggo ceva hetu ca…pe… upaṭṭhānaṭṭhena sammāsati micchāsatiyā pahānāya maggo ceva hetu ca…pe… avikkhepaṭṭhena sammāsamādhi micchāsamādhissa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
সকদাগামিমগ্গক্খণে দস্সনট্ঠেন সম্মাদিট্ঠি…পে॰… অৰিক্খেপট্ঠেন সম্মাসমাধি ওল়ারিকস্স কামরাগসঞ্ঞোজনস্স পটিঘসঞ্ঞোজনস্স ওল়ারিকস্স কামরাগানুসযস্স পটিঘানুসযস্স পহানায মগ্গো চেৰ হেতু চ, সহজাতানং ধম্মানং উপত্থম্ভনায মগ্গো চেৰ হেতু চ, কিলেসানং পরিযাদানায মগ্গো চেৰ হেতু চ, পটিৰেধাদিৰিসোধনায মগ্গো চেৰ হেতু চ, চিত্তস্স অধিট্ঠানায মগ্গো চেৰ হেতু চ, চিত্তস্স ৰোদানায মগ্গো চেৰ হেতু চ, ৰিসেসাধিগমায মগ্গো চেৰ হেতু চ, উত্তরি পটিৰেধায মগ্গো চেৰ হেতু চ, সচ্চাভিসমযায মগ্গো চেৰ হেতু চ, নিরোধে পতিট্ঠাপনায মগ্গো চেৰ হেতু চ।
Sakadāgāmimaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi oḷārikassa kāmarāgasaññojanassa paṭighasaññojanassa oḷārikassa kāmarāgānusayassa paṭighānusayassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
অনাগামিমগ্গক্খণে দস্সনট্ঠেন সম্মাদিট্ঠি…পে॰… অৰিক্খেপট্ঠেন সম্মাসমাধি অনুসহগতস্স কামরাগসঞ্ঞোজনস্স পটিঘসঞ্ঞোজনস্স, অনুসহগতস্স কামরাগানুসযস্স পটিঘানুসযস্স পহানায মগ্গো চেৰ হেতু চ, সহজাতানং ধম্মানং উপত্থম্ভনায মগ্গো চেৰ হেতু চ, কিলেসানং পরিযাদানায মগ্গো চেৰ হেতু চ, পটিৰেধাদিৰিসোধনায মগ্গো চেৰ হেতু চ, চিত্তস্স অধিট্ঠানায মগ্গো চেৰ হেতু চ, চিত্তস্স ৰোদানায মগ্গো চেৰ হেতু চ , ৰিসেসাধিগমায মগ্গো চেৰ হেতু চ, উত্তরি পটিৰেধায মগ্গো চেৰ হেতু চ, সচ্চাভিসমযায মগ্গো চেৰ হেতু চ, নিরোধে পতিট্ঠাপনায মগ্গো চেৰ হেতু চ।
Anāgāmimaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi anusahagatassa kāmarāgasaññojanassa paṭighasaññojanassa, anusahagatassa kāmarāgānusayassa paṭighānusayassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa vodānāya maggo ceva hetu ca , visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva hetu ca, nirodhe patiṭṭhāpanāya maggo ceva hetu ca.
অরহত্তমগ্গক্খণে দস্সনট্ঠেন সম্মাদিট্ঠি…পে॰… অৰিক্খেপট্ঠেন সম্মাসমাধি রূপরাগস্স অরূপরাগস্স মানস্স উদ্ধচ্চস্স অৰিজ্জায, মানানুসযস্স ভৰরাগানুসযস্স অৰিজ্জানুসযস্স পহানায মগ্গো চেৰ হেতু চ, সহজাতানং ধম্মানং উপত্থম্ভনায মগ্গো চেৰ হেতু চ, কিলেসানং পরিযাদানায মগ্গো চেৰ হেতু চ, পটিৰেধাদিৰিসোধনায মগ্গো চেৰ হেতু চ, চিত্তস্স অধিট্ঠানায মগ্গো চেৰ হেতু চ, চিত্তস্স, ৰোদানায মগ্গো চেৰ হেতু চ, ৰিসেসাধিগমায মগ্গো চেৰ হেতু চ, উত্তরি পটিৰেধায মগ্গো চেৰ হেতু চ, সচ্চাভিসমযায মগ্গো চেৰ, হেতু চ, নিরোধে পতিট্ঠাপনায মগ্গো চেৰ হেতু চ।
Arahattamaggakkhaṇe dassanaṭṭhena sammādiṭṭhi…pe… avikkhepaṭṭhena sammāsamādhi rūparāgassa arūparāgassa mānassa uddhaccassa avijjāya, mānānusayassa bhavarāgānusayassa avijjānusayassa pahānāya maggo ceva hetu ca, sahajātānaṃ dhammānaṃ upatthambhanāya maggo ceva hetu ca, kilesānaṃ pariyādānāya maggo ceva hetu ca, paṭivedhādivisodhanāya maggo ceva hetu ca, cittassa adhiṭṭhānāya maggo ceva hetu ca, cittassa, vodānāya maggo ceva hetu ca, visesādhigamāya maggo ceva hetu ca, uttari paṭivedhāya maggo ceva hetu ca, saccābhisamayāya maggo ceva, hetu ca, nirodhe patiṭṭhāpanāya maggo ceva hetu ca.
দস্সনমগ্গো সম্মাদিট্ঠি, অভিনিরোপনমগ্গো সম্মাসঙ্কপ্পো , পরিগ্গহমগ্গো সম্মাৰাচা, সমুট্ঠানমগ্গো সম্মাকম্মন্তো, ৰোদানমগ্গো সম্মাআজীৰো, পগ্গহমগ্গো সম্মাৰাযামো, উপট্ঠানমগ্গো সম্মাসতি, অৰিক্খেপমগ্গো সম্মাসমাধি। উপট্ঠানমগ্গো সতিসম্বোজ্ঝঙ্গো, পৰিচযমগ্গো ধম্মৰিচযসম্বোজ্ঝঙ্গো, পগ্গহমগ্গো ৰীরিযসম্বোজ্ঝঙ্গো, ফরণমগ্গো পীতিসম্বোজ্ঝঙ্গো, উপসমমগ্গো পস্সদ্ধিসম্বোজ্ঝঙ্গো, অৰিক্খেপমগ্গো সমাধিসম্বোজ্ঝঙ্গো, পটিসঙ্খানমগ্গো উপেক্খাসম্বোজ্ঝঙ্গো।
Dassanamaggo sammādiṭṭhi, abhiniropanamaggo sammāsaṅkappo , pariggahamaggo sammāvācā, samuṭṭhānamaggo sammākammanto, vodānamaggo sammāājīvo, paggahamaggo sammāvāyāmo, upaṭṭhānamaggo sammāsati, avikkhepamaggo sammāsamādhi. Upaṭṭhānamaggo satisambojjhaṅgo, pavicayamaggo dhammavicayasambojjhaṅgo, paggahamaggo vīriyasambojjhaṅgo, pharaṇamaggo pītisambojjhaṅgo, upasamamaggo passaddhisambojjhaṅgo, avikkhepamaggo samādhisambojjhaṅgo, paṭisaṅkhānamaggo upekkhāsambojjhaṅgo.
অস্সদ্ধিযে অকম্পিযমগ্গো সদ্ধাবলং, কোসজ্জে অকম্পিযমগ্গো ৰীরিযবলং, পমাদে অকম্পিযমগ্গো সতিবলং, উদ্ধচ্চে অকম্পিযমগ্গো সমাধিবলং, অৰিজ্জায অকম্পিযমগ্গো পঞ্ঞাবলং। অধিমোক্খমগ্গো সদ্ধিন্দ্রিযং, পগ্গহমগ্গো ৰীরিযিন্দ্রিযং, উপট্ঠানমগ্গো সতিন্দ্রিযং, অৰিক্খেপমগ্গো সমাধিন্দ্রিযং, দস্সনমগ্গো পঞ্ঞিন্দ্রিযং।
Assaddhiye akampiyamaggo saddhābalaṃ, kosajje akampiyamaggo vīriyabalaṃ, pamāde akampiyamaggo satibalaṃ, uddhacce akampiyamaggo samādhibalaṃ, avijjāya akampiyamaggo paññābalaṃ. Adhimokkhamaggo saddhindriyaṃ, paggahamaggo vīriyindriyaṃ, upaṭṭhānamaggo satindriyaṃ, avikkhepamaggo samādhindriyaṃ, dassanamaggo paññindriyaṃ.
আধিপতেয্যট্ঠেন ইন্দ্রিযা মগ্গো, অকম্পিযট্ঠেন বলা মগ্গো, নিয্যানট্ঠেন বোজ্ঝঙ্গা মগ্গো, হেতুট্ঠেন মগ্গঙ্গা মগ্গো, উপট্ঠানট্ঠেন সতিপট্ঠানা মগ্গো, পদহনট্ঠেন সম্মপ্পধানা মগ্গো, ইজ্ঝনট্ঠেন ইদ্ধিপাদা মগ্গো, তথট্ঠেন সচ্চানি মগ্গো, অৰিক্খেপট্ঠেন সমথো মগ্গো, অনুপস্সনট্ঠেন ৰিপস্সনা মগ্গো, একরসট্ঠেন সমথৰিপস্সনা মগ্গো, অনতিৰত্তনট্ঠেন যুগনদ্ধা মগ্গো, সংৰরট্ঠেন সীলৰিসুদ্ধি মগ্গো, অৰিক্খেপট্ঠেন চিত্তৰিসুদ্ধি মগ্গো, দস্সনট্ঠেন দিট্ঠিৰিসুদ্ধি মগ্গো, মুত্তট্ঠেন ৰিমোক্খো মগ্গো, পটিৰেধট্ঠেন ৰিজ্জা মগ্গো, পরিচ্চাগট্ঠেন ৰিমুত্তি মগ্গো, সমুচ্ছেদট্ঠেন খযে ঞাণং মগ্গো, ছন্দো মূলট্ঠেন মগ্গো, মনসিকারো সমুট্ঠানট্ঠেন মগ্গো, ফস্সো সমোধানট্ঠেন মগ্গো, ৰেদনা সমোসরণট্ঠেন মগ্গো, সমাধি পমুখট্ঠেন মগ্গো, সতি আধিপতেয্যট্ঠেন মগ্গো, পঞ্ঞা ততুত্তরট্ঠেন মগ্গো, ৰিমুত্তি সারট্ঠেন মগ্গো, অমতোগধং নিব্বানং পরিযোসানট্ঠেন মগ্গোতি।
Ādhipateyyaṭṭhena indriyā maggo, akampiyaṭṭhena balā maggo, niyyānaṭṭhena bojjhaṅgā maggo, hetuṭṭhena maggaṅgā maggo, upaṭṭhānaṭṭhena satipaṭṭhānā maggo, padahanaṭṭhena sammappadhānā maggo, ijjhanaṭṭhena iddhipādā maggo, tathaṭṭhena saccāni maggo, avikkhepaṭṭhena samatho maggo, anupassanaṭṭhena vipassanā maggo, ekarasaṭṭhena samathavipassanā maggo, anativattanaṭṭhena yuganaddhā maggo, saṃvaraṭṭhena sīlavisuddhi maggo, avikkhepaṭṭhena cittavisuddhi maggo, dassanaṭṭhena diṭṭhivisuddhi maggo, muttaṭṭhena vimokkho maggo, paṭivedhaṭṭhena vijjā maggo, pariccāgaṭṭhena vimutti maggo, samucchedaṭṭhena khaye ñāṇaṃ maggo, chando mūlaṭṭhena maggo, manasikāro samuṭṭhānaṭṭhena maggo, phasso samodhānaṭṭhena maggo, vedanā samosaraṇaṭṭhena maggo, samādhi pamukhaṭṭhena maggo, sati ādhipateyyaṭṭhena maggo, paññā tatuttaraṭṭhena maggo, vimutti sāraṭṭhena maggo, amatogadhaṃ nibbānaṃ pariyosānaṭṭhena maggoti.
মগ্গকথা নিট্ঠিতা।
Maggakathā niṭṭhitā.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / পটিসম্ভিদামগ্গ-অট্ঠকথা • Paṭisambhidāmagga-aṭṭhakathā / মগ্গকথাৰণ্ণনা • Maggakathāvaṇṇanā
